UÁNIKUA uéxurhinicha jimbo, imecha engaksï uékaenga Bibliani no sési pakatani, uandasïrendiksï eska rei Belsasari enga libru de Daniel jimbo uandajka, no méni irekaska (Dan. 5:1). Ísïksï jakajkusïrendi jimbokaksï ima kʼuiripuecha engaksï ióntki anapu ambe jirhinhantajka, nóksï ambe ma exentaxapti enga xaratapirhinga eska ima rei meru niáraspka irekani. Peru inde ambe mójtakurhispti 1854 jimbo. ¿Andi?

Imani uéxurhini jimbo, John Taylor Gran Bretania anapu, jarhakuspti Iraki surirhu ísï nani enga ióntki ireta Uri japka. Jima exentaspti kʼéri torre ma jimbo uirhipitini járhatichani engaksï atsïmueri úkatepka (cilindros de arcilla) ka engaksï 10 sentimetru (4 pulgada) ioskapka. Jiminksï karakata jarhaspti máru ambe ióntki anapu letrecha jingoni, ka ístu kómarhikua ma paraka Babilonia anapu rei Nabonidu ióni irekapiringa ka ístu imeri uájpa enga sánderu kʼéripka, Belsasari. Asta imecha engaksï uékenga Bibliani no sési pakatani, jatsisptiksï para jiókuarhini eska inde ambe xarhatasïrenga eska Belsasari meru irekaspka.

Peru Biblia no solu uandasïndi eska Belsasari irekaspka ístu uandasïndi eska reispka. Ménderu imecha engaksï uékenga no sési pakatani Bibliani, uandasptiksï eska inde ambe no ísïspka. Por ejemplu 1875 ísï, sientifiku William Talbot karaspti eskaksï máru kʼuiripuecha uandasïnga eska “Bel-sar-ussur [Belsasari] markuksï juramuspka imeri táti jemba Nabonidu jingoni. Peru no ma ambe jarhasti enga uáka xarhatani inde ambe”.

Inde arhijperata jiáni kʼamakurhispti engaksï máteru inde járhati karakatecha xarhatapka eska rei Nabonidu, Belsasariri táti jemba, uánikua uéxurhinicha jimbo no jarhaspka imani lugari jimbo nani enga juramuni japka. ¿Né juramuxapi enga ima no japka? Encyclopaedia Britannica, uandasïndi: “Enga Nabonidu máteru paisi jimbo japka, Belsasarini jurajkukuspti juramukuani ka sáno iámindu imeri ejersituni”. Ísï jimbo, Belsasari juramuspti Babilonia imani tiempu jimbo enga táti jemba no jima japka. Ini ambe jimbo, Alan Millard enga ióntki anapu ambe jirhinhantajka ka enga idiomecheri ambe estudiarijka, uandaspti eska sési jarhaspka enga libru de Daniel jimbo uandajka eska Belsasari reispka.

Peru Tata Diosïri marhuarichachi jakajkusïnga ambe enga libru de Daniel uandajka ka eska Tata Diosïni jimboeska, jimboka Bibliarhu mismu ísï uandasïnga (2 Tim. 3:16).