1. ¿Ambejtsïni úpirini uandanhiatani ka nénachi úpirini pʼikuarherani indeni ambe jimbo?

¿NIÁRASKICHI ménisï kánikua uandanhiani jarhani ambe ma jimbo? * Jamberi jindepti jimboka nema úska o uandani ambe ma engajtsïni no sési pʼikuastaka. O ambe engajtsïni uandanhiatani jaka ima ambeti engachi jucha mismu úka o uandani. Jamberichi pekadu ma úka ka uandanhiani jarhani eskajtsïni Jeoba no méni puáchentaaka. O ístu, jamberichi eratsejka eskachi ísï pʼikuarherasïnga jimbokachi no mintsikasïnga Jeobani jimbokachi no ambarhati kʼuiripueska. Peru, ¿ísïski inde ambe?

2. ¿Náki Bibliaeri ejempluechaksï xarhatasïni eska uandanhiani jarhani no arhikuekasïnga eskachi no mintsikasïnga Jeobani?

² Ju je exeani máru Bibliaeri ejempluechani. Ana enga profeta Samueliri amambepka, kánikua mintsikasïrendi Jeobani. Peru nájkiruka ísïpka, kánikua no sési pʼikuarherasïredi jimboka imeri kʼumanchikuarhu anapu ma kánikua no sési kámasïrenga (1 Sam. 1:7). Apostuli Pablujtu kʼéri jakajkukua ma jatsispti peru kánikua uandanhiasïrendi iápuru anapu kúnguarhikuechani jimbo (2 Kor. 11:28). Jeoba kánikua xénchasïrendi rei Dabidini jimboka ima kánikua mintsikasïrenga (Uku. 13:22). Peru nájkiruka ísïpka, niáraspti kánikua no sési pʼikuarherani imani pekaduecha jimbo enga uápka (Sal. 38:4). Iámindu imechani, Jeoba uinhaperantaaspti ka sési pʼikuastantaani. Ju je exeni ambechi uá jorhenguarhini imecheri ambe.

3. ¿Andijtsïnisï úpirini uandanhiatani ambe engaksï máteruecha uandaaka juchari ambe?

³ Ambe ma engajtsïni uáka uandanhiatani jindesti eskajtsïni nema no sési arhiaka o no sésijtsïni kámani ka sánderia enga ambakiti amigu máeuaka o kʼumanchikuarhu anapu ma. Jamberichi uandanhiajka eskachi nóteru uákia sési pájperani imani jingoni. Ménisï, ima engajtsïni no sési pʼikuastaka no eratseparinisï ísï úti indeni ambe ka ísïchi pʼikuarheraspka enajkijtsïni ‘espada jimbo chʼurhuripi’ (Prov. 12:18). Peru ístu ménisï, jamberi ima kʼuiripu meru uékaparini uandaati ambe ma parajtsïni no sési pʼikuastani. Ini ambe nitamakuarhispti pirenchi ma. Ima uandasïndi: “Máru uéxurhini ísïstia enga nema engani ji ísï exenga komu juchiti amiga, úndasptirini chkuanderakua ambe jauatachini redesi sosialicharhu. Kánikua no sési pʼikuarheraspka ka uandanhiani. No úsïrenga jakajkuni eskarini xáni no sési úchepiringa”. Engajtsïni amigu ma o kʼumanchikuarhu anapu ma no sési pʼikuastaka, uákachi uánikua ambe jorhenguarhini Anaeri ambe.

4. ¿Ana náki kʼérati uandanhiatechani jatsispi para tekaantani?

⁴ Ana jatsispti para kʼérati uandanhiatechani tekaantani. Ima no úsïrendi sapiichani kánguarhiani (1 Sam. 1:2). Uánikua Israelitechaksï eratsesïrendi eska enga uarhiiti ma no uénga sapiichani kánguarhiani, jindespka jimboka Tata Diosï no újchakuraxapka. Ini ambe jimbo Ana kánikua kʼurhatsesïrendi (Gén. 30: 1, 2). Ka máteru ambe enga sánderu no sési pʼikuastenga Anani, jindespti eska imeri acheeti máteru témbani jatsispka enga Penina arhinhenga ka i kʼóru kaasïrendi sapiichani. Penina ikiakusïrendi Anani ka teresmarhusïrendi para no sési pʼikuastani (1 Sam. 1:6). Uénani jámani, Ana kánikua kómu pʼikuarherasïrendi ini ambe jimbo. Xáni no sési pʼikuarherasïrendi enga jamberi niárenga uerani ka no ma ambe tʼireni. Niáraspti kánikua no sési pʼikuarherani (1 Sam. 1:7, 10). ¿Néna úspi Ana sési pʼikuarherantani?

5. ¿Néna jarhuataspi kómarhikua Anani?

⁵ Ana mintsita jingoni aiangukuarhispti Jeobani iámindu ambe. Enga na kómarhipkia, aianguspti saserdoti Elini ambe enga nitamakuarhini japka. Eli arhispti: “Niia nintani, asteru uandanhia, ka eskakini Tata Diosï Israeli anapu íntskuaka ambe engari kurhakuka”. ¿Ambe úkuarhispi tátsekua? Ana “nintaspti ka tʼirespti ka nóteru kómu ninharhixaptia” (1 Sam. 1:17, 18). Kómarhikua jarhuataspti paraka sési pʼikuarherantapiringa.

6. ¿Ambejtsïni jorhendasïni kómarhikueri ambe Anaeri ejemplu ka ambe enga arhijka Filipusʌ 4:6, 7?

⁶ Uákachi sési pʼikuarherantani engachi no jurajkuska kómarhini. Ana ióni kómarhispti  imeri Táti auandarhu anapuni (1 Sam. 1:12). Juchajtuchi uáka ióni uandontskuarhikuni Jeobani ka aiangukuarhini ambe engajtsïni uandanhiatajka, ambe enga újka eskachi chéaka ka ambe engachi no sési úka. Engachi kómarhijka, no uétarhisïndi eskachi sési járhati uandakuechani úrauaka. Jamberichi ménisï kánikua kómu pʼikuarheraparini o ueparini kómarhiaka. Perujtsïni Jeoba no méni kuatantaati kurhajchani. Aparte de juchari uandanhiatecheri ambe aiangukuarhini, jatsiskachi para miáni imani konsejuechani ambe engaksï Filipusʌ 4:6, 7 jimbo jaka (arhinta je). Ixú Pablu uandaspti eska engachi kómarhiaka, jatsiskachi para diosmeiamukua arhini Tata Diosïni. Ka jarhasti uánikua ambe engachi jimbo uáka ísï úni. Por ejemplu, tsípikua jimbo, ambe enga xáni kueraaka, imeri ambakiti uékperakua jimbo ka imani erokuarhikua jimbo engajtsïni íntskuka. ¿Ambeteruchi uá jorhenguarhini Anaeri ejemplueri ambe?

7. ¿Ambeksï úsïreni méntkisï Ana ka imeri uámba?

⁷ Nájkiruka uandanhiatechani jatsiapka, Ana méntkisï pámbintasïrendi imeri uámbani jini Silo nani engaksï kómarhienga Jeobani (1 Sam. 1:1-5). Jiminispti tabernakulurhu nani enga kʼéri saserdoti Eli sési pʼikuastantapka arhiparini eska mintsikasïrenga eska Jeoba mókuntapiringa imeri kómarhikuani (1 Sam. 1:9, 17).

8. Uandanta je nénajtsïni uá jarhuatani tánguarhikuecha.

⁸ Uákachi sési pʼikuarherantani engachi no kuerataska tánguarhikuecharhu. Enga tánguarhikua uénakuarhijka, sáno méntkisï erachichaksï kómarhisïndi Jeobani eska imeri espiritu santu jima jauaka. Ka espiritu santu úsïndi eska pínandikua jauaka (Gal. 5:22). Engachi nirajka tánguarhikuecharhu nájkirukachi no sési pʼikuarherani jarhajka, úsïngachi eska Jeoba ka juchari erachichajtsïni sési pʼikuastantaaka ka jarhuatantsïni parachi nóteru xáni uandanhiania. Jeoba úrasïndi kómarhikuani ka tánguarhikuechani parajtsïni sési pʼikuastantani (Ebr. 10:24, 25). Ju je exeni máteru ambe engajtsïni jorhendajka Anaeri ejemplu.

9. ¿Ambe seguirixapi tekaantani Ana peru ambe jarhuataspi?

⁹ Ambe enga uandanhiatenga Anani, no jirejiresï kʼamakurhispti. Ísï tátsekua engaksï na kʼuanhatsentapkia tabernakulurhu uératini, útasïksï májku kʼéri irekaspti Penina jingoni. Ka Biblia no nani uandasïndi eska Penina mójtakurhispka. Ísï jimbo, jamberi Ana seguirini japti tekaantani na enga xáni no sési arhienga Penina. Peru Ana nóteru xáni no sési pʼikuarherasïrendia. Ju je miáni eska enga na iámindu ambe Jeobani jurajkukupkia, ima nóteru uandanhiasptia. Jurajkuspti eska Jeoba uinhaperantapiringa ka sési pʼikuastantani. Ka tátsekua, Jeoba mókukuntaspti kómarhikuani ka ima kánguarhiaspti sapiichani (1 Sam. 1:19, 20; 2:21).

10. ¿Ambejtsïni jorhendasïni ambe enga Ana nitamakuarhipka?

¹⁰ Uákachi sési pʼikuarherantani nájkiruka ima ambe engajtsïni uandanhiatani jauaka no kʼamakurhiaka. Jamberichi útasï seguirini jauaka jatsiani problemechani nájkirukachi someni kómarhini jauaka ka méntkisïchi nirani tánguarhikuecharhu. Peru ambe enga Ana nitamakuarhipka, jorhendasïndijtsïni eska no ma ambe ójkutaaka Jeobani parajtsïni sési pʼikuastantani. Imajtsïni no méni jurajkuati, ka niáraatijtsïni kóndintani engachi méntkisï mintsikaska (Ebr. 11:6).

11. ¿Ambe ka ambe úsïreni eska Pablu uandanhiapiringa?

¹¹ Pablu uánikua ambe jatsispti enga jimbo úpiringa uandanhiani. Por ejemplu, jimboka xénchaasïrenga erachichani, uandanhiasïrendi engaksï icha nitamakuarhinchenga ambe ma (2 Kor. 2:4; 11:28). Imani tiempu jimbo enga aianhpini jámapka Tata Diosïri ambe, máru kʼuiripuechaksï ataspti ka ónhani, jimbokaksï no uékasïrenga eska indeni ambe úpiringa. Máteru  ambe enga ístu uandanhiatenga, jindespti eska jatsispka para sántku jingoni irekani (Filip. 4:12). Ka jimboka tánimu xanhari no sési nitamakuarhispka marirhu, úsïngachi eranhaskani na enga xáni chénga méni enga barkuni ma jataenga (2 Kor. 11:23-27). ¿Ambe jarhuataspi Pabluni para no xáni uandanhiani?

12. ¿Ambe úspi eska Pablu nóteru xáni uandanhiapiringuia?

¹² Pablu méntkisï miáni jarhasïrendi ambe engaksï nitamakuarhini jarhenga imeri ermanuecha, peru miásïrendi eska no úpiringa jandiajku jarhuataani. Arhiaspti máteru kristianuechani eskaksï jarhuatapiringa pendienti jarhani kúnguarhikuarhu anapuecha jimbo. Por ejemplu, arhiaspti máru erachichani engaksï mintsinharhikuepka, komu Timoteuni ka Tituni eskaksï uápiringa máru ánchikuarhitechani kúnguarhikuarhu. Ambe engaksï i erachicha úpka, úspti eska Pablu nóteru xáni uandanhiapiringuia (Filip. 2:19, 20; Titu 1:1, 4, 5).

13. ¿Nénaksï uá orhejtsïkuticha májkueni úni eska Pablu?

¹³ Ju je kurhajkuarhini jarhuajperata. Ini jurhiatikuecha jimbo uánikua orhejtsïkutichaksï májkueni pʼikuarherasïndi eska Pablu. Jimbokaksï xáni xénchaasïnga erachichani, kánikuaksï no sési pʼikuarherasïndi engaksï icha no sési nitamakuarhini jarhajka. Peru orhejtsïkuti ma no uáti jandiajku iámu ambe sési péntani. Kaxumbikua, uáti eska jarhuajperata kurhakuauaka máteru erachichani ka eska jánguarhintaaka tumbiichani arhistakuani paraksï jarhuatani pendienti jarhani kúnguarhikuarhu anapuecha jimbo (2 Tim. 2:2).

14. ¿Ambe jimbo no kʼuratsesïreni Pablu ka ambechi jorhenguarhisïni?

¹⁴ Ju je jiókuarhini eskachi uétarhinchasïnga sési pʼikuastanhantani. Pablu kaxumbitispti jimbosï jurajkuendi eskaksï imeri amigu jembecha sési pʼikuastantapiringa. No kʼuratsesïrendi eskaksï máteruecha mítepiringa eskaksï erachicha sési pʼikuastantaspka. Enga Filemonini karakupka, arhispti eska tsípisïrenga ka uinhapini pʼikuarherani imeri uékperakua jimbo (Filem. 7). Ka máteru karakata jimbo, uánikua erachichani uandaaspti engaksï kánikua uinhaperantapka jiáni enga ima uandanhiani japka (Kol. 4:7-11). Engachi kaxumbikua jingoni jiókuarhiska eskachi uétarhinchasïnga eskajtsïni nema uinhaperantaaka, erachichajtsïni tsípikua jingoni jarhuataati.

15. ¿Ambe jarhuataspi Pabluni enga xáni no sési ambe nitamakuarhini japka?

¹⁵ Ju je mintsikani Tata Diosïri Karakatani. Pablu mítespti eska Tata Diosïri Karakata úpiringa sési pʼikuastantani (Rom. 15:4). Ka ístu jarhuatapirindi para jánhaskatiini para náki uéjki uandanhiatani orhepani uérakuni (2 Tim. 3: 15, 16). Enga tsimani úni jámani ónhakata japkia jini Roma, mítespti eska no ióni jimbo uarhipiringuia. ¿Ambe úspi enga xáni no sési ambe nitamakuarhini japka? Arhispti Timoteuni eska kókuani nipiringa exeni ka eska pákuapiringa “karakatechani” (2 Tim. 4:6, 7, 9, 13, Táta Diósïri Uandakua Tata Jesukristueri Aiatsperakua). ¿Andisï indeni ambe kurhakupi? Jimboka imani karakatecha jimbo, jamberiksï karakata japti máru particha Karakata Ebreauecheri enga ima úpiringa úraani para sánderu ambe jorhenguarhini. Engachi juchajtu méntkisï estudiariska Bibliani ísï eska Pablu, Jeoba indeni ambe úraati parajtsïni sési pʼikuastantani náki uéjki uandanhiatanchi nitamakuarhini jarhani.

16. ¿Néna pʼikuarheraspi Dabidi enga kʼéri pekadu ma úpka?

¹⁶ Dabidi úspti ambe ma enga no sési japka ka i ambe kánikua no sési pʼikuastasïrendi. Ísku jándikua ambe úspti Bat-Seba jingoni, úspti eskaksï uándikupiringa Bat-Sebaeri uámbani ka ma tiempu jimbo jánguarhintaspti paraka no nema mítepiringa ambe enga úpka (2 Sam. 12:9). Uénakuarhu, ima uékaspti jískani ambe enga úpka, peru ini ambe jimbo nóteru úsptia ambakiti pájperakua ma jatsini Jeoba jingoni, ístu niáraspti kánikua no sési pʼikuarherani ka asta pʼamenchani (Sal. 32:3, 4). ¿Ambe úspi Dabidi para nóteru xáni no sési pʼikuarherani imani ambe jimbo enga ima mismu jirinhakuarhipka? Ka ¿ambejtsïni uá jarhuatani juchantsïni engachi niáraska kʼéri pekadu ma úni?

17. ¿Néna xarhatasïni ambe enga arhijka Salmo 51:1-4 eska Dabidi mintsita jingoni moantaspka?

¹⁷ Ju je kurhakuni Jeobani eskajtsïni puáchentaaka. Dabidi kómarhispti Jeobani ka jimboka mintsita jingoni moantaspkia, aiangukuarhispti Jeobani ambe enga xáni no sési úpka (arhinta je Salmo 51:1-4). Inde ambe jarhuataspti para nóteru xáni no sési pʼikuarherania (Sal. 32:1, 2, 4, 5). Engachi niáraska kʼéri pekadu ma úni, ju je no jískani. Sánderu sési, ju je kómarhini Jeobani ka aiangukuarhini ambe engachi no sési úka. Engachi ísï úska, nóteruchi xáni no sési pʼikuarheraakia imani ambe jimbo engachi no sési úka. Peru engachi uéjka ménderu ambakiti pájperakua ma jatsini Jeoba jingoni, jatsiskachi para ístu máteru ambe úni.

18. ¿Ambe úspi Dabidi enga Jeoba jurhimberantapka?

¹⁸ Ju je jiókuarhini eskajtsïni Jeoba jurhimberantaaka. Enga Jeoba profeta Natanini axapka para uandontskuarheni Dabidi jingoni ima amberi enga úpka, Dabidi jiókuarhispti ambe enga niátapka ka no uandaspti eska no xáni no sési jarhaspka. Jirejiresï uandaspti eska ísïspka, eska  no solu no sési úkuspka Bat-Sebaeri uámbani sino eska kʼéri pekadu ma úspka Jeobani japarini. Dabidi jiókuarhispti eska Jeoba jurhimberantapiringa ka Jeoba puákuntaspti (2 Sam. 12:10-14). Engachi kʼéri pekadu ma úka, jatsiskachi para uandontskuarhini orhejtsïkuticha jingoni enga Jeoba péraaka parajtsïni jarhuatani (Sant. 5:14, 15). Jatsiskachi para jiókuarhini ambe engachi úka. Engachi sóntku jiókuarhiska eskajtsïni jurhimberantaaka ka mójtakuni ambe enga uétarhiaka, sánderu kókuanchi uáka ménderu sési pʼikuarherantani ka tsípikua jingoni irekani.

19. ¿Ambechi jatsiski para jánguarhintani úni?

¹⁹ Ju je jánguarhintani parachi no ménderu májkueni no sési úni. Rei Dabidi mítespti eska uétarhinchasïrenga Jeobaeri jarhuajperata para no ménderu májkueni no sési úni (Sal. 51:7, 10, 12). Enga Jeoba puákuntapkia, Dabidi jánguarhintaspti para nóteru méni ísku ambe ma eratseni. Ka indeni ambe úni, jarhuataspti ménderu sési pʼikuarherantani.

20. ¿Nénachi xarhatasïni eskachi kánikua jukaparharasïnga engajtsïni Jeoba puáchentajka?

²⁰ Engachi kómarhijka Jeobani eskajtsïni puáchentaaka, jiókuarhini eskajtsïni jurhimberantaaka ka engachi jánguarhintajka parachi no ménderu májkueni no sési úni, xarhatasïngachi eskachi jukaparharasïnga engajtsïni Jeoba puáchentajka. Engachi ini ambe újka, niárasïngachi ménderu sési pʼikuarherantani. Inde ambesï nitamakuarhipti James, erachi ma enga kʼéri pekadu ma úpka. Ima uandasïndi: “Engani aiangukuarhiapka orhejtsïkutichani ambe engani no sési úpka, kánikua sési pʼikuarheraspka”. Kánikuajtsïni uinhaperantasïndi míteni eska “Jeoba imecha jingoni jarhas[ka] engaksï no sési pʼikuarhinhijka mintsitarhu” ka pʼímutantaani “imechani engaksï kómu pʼikuarherajka” (Sal. 34:18).

21. ¿Ambechi jatsiski para úni parajtsïni Jeoba sési pʼikuastantani?

²¹ Jimboka sánderu axúterku jarhaskia enga i parhakpini anapu ambe kʼamajkunhaaka, jamberichi sánderu uandanhiatechani jatsiauaka. Engachi indeni ambe nitamakuarhini jauaka, ju je sóntku kómarhini Jeobani parajtsïni jarhuatani ka méntkisï Bibliani estudiarini. Ístu ju je miántani ambe engajtsïni jorhendajka Anaeri, Pablueri ka Dabidiri ejemplu. Ka ju je kurhakuni Jeobani eskajtsïni jarhuataaka míteni ambeski engajtsïni xáni uandanhiatajka (Sal. 139:23). Ju je jurajkuni eskajtsïni Jeoba jarhuataaka juchari uandanhiatechani jingoni ka sánderia imani ambe jingoni engachi no ma ambe uáka úni. Engachi ísï úska, májkuenchi pʼikuarheraaka eska salmueri karari ma enga ísï pirekupka Jeobani: “Engani uánikua uandanhiatechani jatsiapka, uinhaperantaspkarini ka sésirini pʼikuastantani” (Sal. 94:19).