SEMANA 7
Kánikuachi xénchasïnga Jeobani, juchari Táti uékpiti
“Juchachi uékasïnga Diosïni, jimbokajtsïni ima orheta uékaska juchantsïni” (1 JUANU 4:19).
PIREKUA 3 Jeoba, tʼuri jíndeni jingoni jarhaska
AMBE ENGACHI EXEAKA *
1, 2. ¿Andijtsïnisï Jeoba sésikua íntsku parachi imeri familia jingoni kuenta úkuarhini ka néna jimbo ísï úski?
JEOBAJTSÏNI ambakiti pʼímarperakua ma úchisti: uékasïndi eskachi imeri familia jingoni kuenta úkuarhiaka. Ini familia jimbo, jarhastiksï ima kʼuiripuecha engaksï aiakukuarhikia Jeobani ka engaksï imeri Uájperi uarhikuani mintsikajka. Familia máeskachi engachi tsípikua jingoni irekajka. Míteskachi andichisï irekani jaki, ka kánikuajtsïni sési pʼikuastasïndi míteni eskachi sánderu orhepani uáka irekani para méntkisï auandarhu o ixú Echerirhu nani enga kánikua sési jándeaka.
2 Uékperakua jimbo, Jeoba íntspisti imeri Uájpani parachi jucha úni imeri familiani jingoni kuenta úkuarhini (Juanu 3:16). Biblia uandasïndi eskachi jucha “piántskata jarhaska” (1 Kor. 6:20). Pʼímutantskua jimbo, Tata Diosï ústi eskachi úpiringa ambakiti pájperakua ma jatsini imani jingoni. Kʼéri kóntperata máesti para jucha, arhini Táti, imani enga sánderu kʼéri ambeka eska iámindu ambe enga jaka. Ka eskachi na exekia máteru jorhenguarhikua jimbo, ima jindesti sánderu ambakiti Táti engachi uáka jatsini.
3. ¿Ambechi úpirini kurhamarhikuarhini? (Ístu exe je rekuadruni “ ¿Jeoba pendienti jarhajki jíndeni jimbo?”).
3 Jamberichi juchajtu májkueni kurhamarhikuarhijka eska Bibliaeri karari ma enga uandapka: “¿Néna meiamuntaa Jeobani iámu ambakiti ambe enga úka jíndeni jimbo?” (Sal. 116:12). No ma ambe jingonchi uáka meiamuntani juchari Táti auandarhu anapuni. Peru, imeri uékperakua úsïndi eskachi juchajtu xénchaaka. Apostuli Juanu karaspti: “Juchachi uékasïnga Diosïni, jimbokajtsïni ima orheta uékaska juchantsïni” (1 Juanu 4:19). Jiájkani, ¿nénachi uá xarhatakuni juchari Tátini eskachi xénchasïnga?
JU JE MÉNTKISÏ JEOBA JINGONI JARHANI
Xarhatasïngachi na engachi xáni xénchajka Jeobani, juchari Táti uékpitini, engachi andarhierajka kómarhikua jimbo, kurhajchaparini ka jarhuatapariani máteruechani xénchani imani. (Exe je párrafu 4 a 14).
4. Eska na arhijka Santiagu 4:8, ¿andichisï jatsi para jánguarhintani andarhierani Jeobani?
4 Jeoba uékasïndi eskachi andarhieraaka ka eskachi méntkisï kómarhiaka (arhinta je Santiagu 4:8). Arhisïndijtsïni eskachi méntkisï kómarhiaka ka ima méntkisï jingontku jarhasïndi parajtsïni kurhajchani (Rom. 12:12). No méni kuataraati o kuatantani parajtsïni kurhajchani. ¿Ka nénachi kurhajchaa jucha imani? Ma ambe engachi uáka úni, jindesti arhintani imeri Karakatani ka publikasionichani engajtsïni jarhuatajka kurhanguni Bibliani. Ístuchi kurhajchasïnga engachi jingontku kurhaajka tánguarhikuecharhu. Ísï eskaksï na sési pájperajka táticha imecheri sapiicha jingoni jimbokaksï sési uandontskuarhesïnga, juchajtuchi sánderu andarhieraaka Jeobani engachi someni kómarhiska.
(Exe je párrafu 5).
5. ¿Nénachi uá sánderu sési kómarhini?
5 ¿Mintsita jingonchi kómarhisïni Tata Diosïni? Ima uékasïndi eskachi ísï uáka (Sal. 62:8). Jimbosï xáni sésiiti eskachi kurhamarhikuarhiaka: “¿Someni ma ambejkuni kómarhini jarhasïni Jeobani? ¿O ísï kómarhisïni Jeobani komueskani na uandontskuarhejka amigu ma jingoni engani iámu ambe aiangukuarhijka?”. Ísïti, kánikuachi xénchajka Jeobani ka uékasïngachi méntkisï imani jingoni jarhani. Ka para ísï úni, jatsiskachi para someni kómarhini. Ju je mintsita jingoni aiangukuarhini ambe engajtsïni sési pʼikuastajka ka imani ambe engajtsïni uandanhiatajka. Ju je seguru jarhani eskachi uáka imani kómarhini parajtsïni jarhuatani.
6. ¿Ambechi jatsiski para úni parachi méntkisï Jeoba jingoni jarhani?
6 Parachi méntkisï Jeoba jingoni jarhani, ístuchi jatsiska para agradesidueni. Májkuenchi pʼikuarherasïnga eska salmueri karari ma enga uandapka: “¡Xáni engari uánikua ambe úka, oh, Jeoba juchiti Tata Diosï! Uánikua ambakiti ambesti engari úka ka engari eratsejka para juchantsïni jimbo —no nema úsïndi tʼunguini jingoni terukuntani—. Engani uékapiringa uandantani ka inderi ambe uandani, jukariksï uánipirindi engani jamberi no úpiringa iámindu ambe uandantani” (Sal. 40:5). Peruchi no solu eratsesïnga eskachi agradesidueska. Ístuchi xarhatakusïnga Jeobani uandakuecha ka úkuecha jingoni. I ambe úsïndi eskachi no májkueniuaka eskaksï iásï anapu kʼuiripuecha. Irekaxakachi parhakpini ma jimbo engaksï kʼuiripuecha no agradeserijka iámindu ambe enga Tata Diosï újka imecha jimbo. Ka ma ambe enga xarhatajka eskachi “últimu jurhiatikuechani jimbo” irekaxaka, jindesti eskaksï kʼuiripuecha no agradeserisïnga ambe ma (2 Tim. 3:1, 2). ¡Nóchi méni uékasïnga ísïni eska i kʼuiripuecha!
7. ¿Ambe uékasïni Jeoba eskachi uáka ka andi?
7 Táti jembechaksï no uékasïndi eskaksï uájpecha no sési kámberaaka, sino eskaksï sési pájperaaka. Ka Jeobajtu uékasïndi eskaksï imeri uájpecha májkueni uáka. Uékperakua engachi xarhatatsperajka, xarhatasïndi eskachi jurhimbiti kristianueska (Juanu 13:35). Tata Diosïri marhuari ma, karaspti: “¡Exe je! ¡Na enga xáni sésiika ka sési pʼikuarherakuarhini eskaksï erachicha májku kʼéri jauaka!” (Sal. 133:1). ¿A no eskachi májkueni pʼikuarherasïnga eska i salmueri karari? Engachi xénchaajka juchari erachichani, ístuchi xarhatasïnga eskachi xénchasïnga Jeobani (1 Juanu 4:20). Kuenta úkuarhini familiarhu ma nani engaksï iámindu erachicha sési kámberajka ka ístu pʼamojperani, meru kánikua ambakiti ambesti (Efes. 4:32).
UÉKPERAKUACHI XARHATAAKA ENGACHI KURHAJCHASKA JEOBANI
(Exe je párrafu 8).
8. Eska na arhijka 1 Juanu 5:3, ¿ambe jimbochi sánderu kurhajchasïni Jeobani?
8 Jeoba uékasïndi eskaksï uájpecha kurhajchauaka táti jembechani, ka ístu uékasïndi eskachi juchajtu imani kurhajchaaka (Efes. 6:1). Jatsiskachi para kurhajchani jimbokajtsïni ima kueraaska, ístu úsïndi eskachi tsípiti jauaka ka imajkusï jindeti Táti enga sánderu jánhastika. Peru ambe engachi jimbo sánderu kurhajchajka Jeobani, jindesti jimbokachi xénchasïnga (arhinta je 1 Juanu 5:3). Ísïsti eska uánikua ambe jarhaska engachi jimbo jatsika para kurhajchani, peru Jeoba no uékasïndi eskachi afuersa ísï uáka. Imajtsïni íntskusti sésikua parakachi uáka erakuni ambe úni ka kánikua sési pʼikuarherasïndi engachi uékperakua jimbo kurhajchajka.
9, 10. ¿Andisï jukaparhakue eskachi míteaka ambe enga Jeoba juramujka ka ísï irekani eska ima na uandajka?
9 Tátichaksï uékasïndi eskaksï imecheri sapiicha sési irekaaka. Ísï jimbo, paraksï kuájchakuani, arhiasïndiksï ambe engaksï jatsika para úni. Sapiicha engaksï kurhanderajka, xarhatasïndiksï eskaksï mintsikaasïnga táti jembechani ka eskaksï janhanharhiasïnga. Jiájkani, engaksï sapiicha ísï újka, juchachi jatsiska para sánderu jánguarhintani míteni ambe enga juchari Táti auandarhu anapu juramujka ka ísï irekani eskajtsïni ima na arhijka. Engachi ísï újka, xarhatasïngachi eskachi xénchasïnga Jeobani ka janhanharhini. Ka inde ambe úsïndi eskachi sési irekaaka (Is. 48:17, 18). Peru imecha engaksï no újka ambe enga Jeoba juramujka, jandiajkuksï no sési úkuarhinchasïndi (Gal. 6:7, 8).
10 Ísï irekani eska Jeoba na uéjka, úsïndi eskachi sési jauaka, no xáni uandanhiani ka eskachi ambakiti pájperakua ma jatsiaka Jeoba jingoni. Ima mítesti ambe enga sánderu sésika para jucha. Pirenchi Aurora enga Estados Unidos irekani jaka, uandasïndi: “Míteska eska kurhajchani Jeobani, úsïnga eska ma sánderu sési irekaaka”. Ka iáminduechachi exesïnga eska inde ambe meru ísïska. Ju je kurhamarhikuarhini: “¿Nénarini marhuacheskia ísï úni ambe enga Jeoba uékperakua jingoni juramujka?”.
11. ¿Nénajtsïni jarhuatasïni kómarhikua?
11 Kómarhikuajtsïni jarhuatasïndi parachi kurhajchani Jeobani nájkirukachi úkua jukanchaaka. Jimbokachi iáminduecha pekadoriska, ménisïchi jatsisïnga para kánikua jánguarhintani para Jeobani kurhajchani. Peruchi jatsiska para ísï úni. Salmueri karari ma ini ambe kurhakuspti Tata Diosïni: “Ú eskakini uékaaka kurhajchani” (Sal. 51:12). Denise, pirenchi ma enga prekursora regularika, uandasïndi: “Engani úkua jukanchani jarhajka úni ambe ma enga Jeoba juramujka, kómarhisïnga parani imani ambe úni enga sési jaka”. Uákachi seguru jarhani eska ima méntkisï mókuantauaka indeni járhati kómarhikuechani (Luk. 11:9-13).
JU JE JARHUATAANI MÁTERUECHANI PARAKSÏ XÉNCHANI JUCHARI TÁTINI
12. ¿Ambe uandasïni Efesu 5:1 eskachi jatsiska para úni?
12 (Arhinta je Efesu 5:1). Jimbokachi Jeobaeri uájpeska “enga ima xáni uéajka”, kánikuachi jánguarhintasïnga para ísïni eska ima. Májkuenchi úsïnga eska ima engachi xénchpijka, sési kámpini ka puátspintani. Engaksï kʼuiripuecha engaksï no míteka Tata Diosïni exejka juchari jánguani, jamberi inde ambe uáti eskaksï imecha uékaaka sánderu míteni Jeobaeri ambe (1 Ped. 2:12). Táticha engaksï kristianueka, ambakiti rasoni maksï jatsisti paraksï májkueni kaani uájpechani ísï eskajtsïni Jeoba na kámajka juchantsïni. Engaksï ísï úska, jamberiksï uájpechajtu uékaati amigueni juchari Táti uékpitiri.
(Exe je párrafu 13).
13. ¿Ambechi jatsiski para eratseni parachi no chéni ka aianguani máteruechani Jeobaeri ambe?
13 Sáno iámindu sapiichaksï kʼéri ambe exeasïndi táti jembechani ka tsípikua jingonksï uandantasïndi imecheri ambe. Májkueni, juchajtuchi kʼéri ambe exesïnga juchari Táti auandarhu anapuni ka uékasïngachi eskaksï máteruechajtu míteaka. Májkuenchi pʼikuarherasïnga eska rei Dabidi enga karapka: “Kánikua sési pʼikuarheraaka Jeobaeri ambe uandantani” (Sal. 34:2). Peru jamberichi máru chéjka Jeobaeri ambe uandantani. ¿Ambejtsïni jarhuataa parachi no chéni? Eratsentani eska engachi uandantaska imeri ambe, uákachi kánikua tsíperani Jeobani ka na enga xáni murhuakuauaka imechani engaksï niáraka míteni imani. Imajtsïni íntskuati balori engachi uétarhinchajka. Ka jarhuataatijtsïni ísï eska na jarhuataapka primeru siglurhu anapu erachichani (1 Tes. 2:2).
14. ¿Andisï xáni jukaparhakue parachi Jesusiri chúxapatichani uáni?
14 Jeoba no nema jingoni sánderu kʼuetsapesïndi ka kánikua sési pʼikuarherasïndi engajtsïni exejka eskachi uékperakua jingoni kásïnga máteruechani no arhiparini nani engaksï anapueka (Uku. 10:34, 35). Ma ambe engachi uáka úni para xarhatani eskachi xénchaasïnga kʼuiripuechani, jindesti aianguani ambakiti ambe (Mat. 28:19, 20). ¿Ambe niáraa úkuarhini ini ánchikuarhita jingoni? Eska imecha engajtsïni kurhajchaaka, niáraakaksï sánderu sési irekani iásï ka eskaksï sánderu orhepani uáka irekani para méntkisï (1 Tim. 4:16).
JU JE XÉNCHANI JUCHARI TÁTINI KA TSÍPIKUA JINGONCHI IREKAAKA
15, 16. ¿Andichisï újki tsípikua jingoni irekani?
15 Jeoba, Táti uékpiti máesti ka uékasïndi eska imeri familia tsípikua jingoni irekaaka (Is. 65:14). Nájkirukachi ménisï úkua jukanchajka, uánikua ambechi jatsiska engachi jimbo uáka tsípikua jingoni irekani iásï. Por ejemplu, sésichi mítetixaka eskajtsïni juchari Táti auandarhu anapu kánikua xénchasïnga. Sésichi míteska ambe enga Biblia jorhentpijka (Jer. 15:16). Ka kuenta úkuarhisïngachi imani familia jingoni engaksï kánikua xénchajka Jeobani, engaksï janhanharhiajka imeri juramukuechani ka nani engaksï iáminduecha xénchperajka (Sal. 106:4, 5).
16 Ístuchi úsïnga tsípikua jingoni irekani jimbokachi seguru jarhaska eskachi sánderu orhepani uáka sánderu sési irekani. Míteskachi eska no ióni jimbo, Jeoba kʼamajkuauaka no sési úrichani ka eska imeri Reinu jimbo uáka eska Echerirhu kánikua sési jandeaka. Ístuchi erokuarhixaka eskaksï uarhiricha tsíntaaka ka eskaksï ménderu uáka imecheri familiaecha jingoni jarhani (Juanu 5:28, 29). Kánikua sési jásï ambeuati, ¿a no? Ka ambe enga sánderu jukaparhakueka, jindesti eskachi seguru jarhaska eska no ióni jimbo iáminduecha, jini auandarhu ka ixú Echerirhu, uáka janhanharhini, kʼéri ambe arhini ka kómarhini juchari Táti uékpitini ísï eska ima na jukanchaka.
PIREKUA 12 Juchari kʼéri Tata Diosï Jeoba
^ párr. 5 Míteskachi eskajtsïni juchari Táti Jeoba kánikua xénchasïnga ka eskajtsïni imani familia jingoni peeraska nani engaksï imeri ambakiti marhuaricha jaka. Indeni ambe jimbo, juchachi niáraska xénchani imani. ¿Nénachi uá xarhatakuni ambe engachi pʼikuarherajka imani jimbo? Ini jorhenguarhikua jimbochi exeaka máru ambe engachi uáka úni.
