1. ¿Ambe úkuarhespi engaksï Joseri ermanuecha ísï enbidiariuenga imani?

JAKOBU xénchaasïrendi iámindu imeri uájpechani, peru sánderu xénchasïrendi Joseni enga 17 jatiripka. ¿Nénaksï exespi ini ambe máteru imeri uájpecha? Enbidiarisptiksï Joseni ka indeni ambe jimboksï niáraspti kurhunheni. Ima no ma ambe úkuaspti paraksï imecha ísï kámani. Peru imechaksï atarantaspti para jántspiri máeni ka arhisptiksï táti jembani eska animali apejpiti ma antaspka imeri sapini enga xáni xénchenga. Enbidia úspti eska familia nóteru úpiringuia sési pájperani ka kánikuaksï no sési pʼikuastaspti táti jembani (Gén. 37:3, 4, 27-34).

2. Eska na arhijka Galasia 5:19-21, ¿andisï xáni no sési jaki enbidiarpini?

² Tata Diosïri Karakatarhu, enbidia * kuenta úkuarhisïndi imani ukuecha jingoni engaksï xáni no sési útspijka engaksï ‘mintsita tamapuerika’ ka engaksï úpiringa úni eska kʼuiripu ma no inchaaka Tata Diosïri Juramukuarhu (arhinta je Galasia 5:19-21). Sáno méntkisï, enbidia jindesti enga újka eskaksï kʼuiripuecha no uáka sési pájperani, eskaksï uarhiperaaka ka eskaksï sóntku ikiauaka.

3. ¿Ambechi exea ini jorhenguarhikua jimbo?

³ Ambe engaksï Joseri ermanuecha úpka, xarhatasïndi na enga xáni no sési úkuajka enbidia kʼuiripuechani ka na enga újka eska familia ma nóteru sési pájperaakia. Nájkirukachi jucha no méni ísï jámapiringa eska Joseri ermanuecha, nóchi jatsiska para mirikurhini eskachi no perfektueska ka eskajtsïni mintsita ménisï támu ísï jánhastasïnga (Jer. 17:9). Jimbochisï ménisï niárajka enbidiarpini. Ju je exeani máru Bibliarhu anapu ejempluecha engajtsïni jarhuataaka jingontku jámani ka parachi míteni andichisï niárajki  enbidia pʼikuarhenhini. Tátsekuachi exeaka ambechi jatsiski para úni parachi no enbidiarpini ka jánguarhintani jarhuajpini parachi iáminduecha sési pájperani.

4. ¿Andiksïsï filisteuecha enbidiariueni Isakini?

⁴ Enga nema jatsikuarhirijka. Isaki jatsikuarhirispti, ka filisteuechaksï enbidiarisïrendi indeni ambe jimbo (Gén. 26:12-14). Xánksï enbidiarisïrendi engaksï jamberi echeri jingoni uinirantaapka imani posuechani nani enga Isaki itsï pʼitenga para animalichani itsïmataani (Gén. 26:15, 16, 27). Ini jurhiatikuecha jimbo, máru kʼuiripuechaksï ísï jámasïndi eska filisteuecha ka enbidiariuasïndiksï imani kʼuiripuechani engaksï sánderu jatsikuarhirika eska imecha. Nóksï solu tsitisïndi ambe engaksï máteruecha jatsikuarhika, sino ístuksï uékasïndi eskaksï ima kʼuiripuecha no jatsiaka imani ambe.

5. ¿Andiksïsï relijioniri orhejtsïkuticha enbidiariueni Jesusini?

⁵ Enga nema sési exenhajka. Judiuecha engaksï relijioniri orhejtsïkutipka enbidiarisïrendiksï Jesusini jimboka kʼuiripu xénchasirenga (Mat. 7:28, 29). Tata Diosï axaspti Jesusini ka ima jurhimbikua ambe jorhentpisïrendi. Nájkiruka ísïpka, relijioniri orhejtsïkutichaksï chkuanderakua ambe uandantaspti paraksï no sési pakatani Jesusini (Mar. 15:10; Juanu 11:47, 48; 12:12, 13, 19). ¿Ambechi jorhenguarhisïni íri ambe? Eskachi no jatsiska para enbidiariuani imechani engaksï sési kánhajka kúnguarhikuarhu o xénchanhani imecheri kualidadicha jimbo. Sánderu sési, jatsiskachi para jánguarhintani májkueni úni eska imecha (1 Kor. 11:1; 3 Juanu 11).

6. ¿Néna xarhataspi Diotrefesi eska enbidiariuasïrenga erachichani?

⁶ Enga nema ánchikuarhita ma intsïnhajka kúnguarhikuarhu. Primeru siglurhu, Diotrefesi enbidiariuasïrendi imechani engaksï kúnguarhikuani orhejtsïkuenga. Uékasïrendi sánderu kʼéri ambeeni kúnguarhikuarhu, jimbosï no sési ambe uandapti apostuli Juanueri ka máteru erachicheri ambe paraksï no janhanharhinhani (3 Juanu 9, 10). Nájkirukachi jucha no niáraaka ísï jámani eska Diotrefesi, úpiringachi uénani enbidiarini erachini ma enga imani ánchikuarhita intsïnhaka engachi jucha uékenga, ka sánderia engachi ísï exejka eskachi juchajtu úpiringa májkueni sési úni imani ánchikuarhitani.

7. ¿Nénajtsïni uá no sési úcheni enbidia?

⁷ Enbidia ísïsti eska uemberhikua: enga uénajkia mintsitarhu tsikini, úkua jukasïndi kénditani. Ka sánderu kʼésïndi enga nema uénajka kʼéramakuarhini, selosueni ka uarhisiini. Enbidia úsïndi eska nema no uékpeaka, pʼamojpini ni sési kámpini. Jatsiskachi para méntku murutani engachi uénaska exeni eska juchari mintsitarhu tsikixaka. ¿Ambechi uá úni parachi no enbidiarpini?

8. ¿Ambejtsïni jarhuataa no enbidiarpini?

⁸ Engachi kaxumbitiska ka sésichi pʼikuarherani imani ambe jingoni engachi jatsika nóchi enbidiarpiaka. Engachi jánguarhintaaka ísï úni, nóchi jurajkuaka eska juchari mintsitarhu tsikiaka. Engachi kaxumbitiska, nóchi kʼéramakuarhiaka ni eratseni eskachi sánderu uánikua ambe jukanchaska eska máteruecha (Gal. 6:3, 4). Ima enga sési pʼikuarherajka imani ambe jingontku enga jatsikuarhika, tsípikua jingoni irekasïndi ka no jámasïndi terukukuarhintani máteruecha jingoni (1 Tim. 6:7, 8). Jo, ima enga kaxumbitika ka enga no sánderu ambe uékajka jatsini, tsípisïndi enga máteru nema ambakiti ambe intsïnhajka.

9. Eska na arhijka Galasia 5:16 ka Filipusʌ 2:3, 4, ¿ambejtsïni jarhuataa úni espiritu santu?

⁹ Uétarhinchasïngachi Jeobaeri espiritu santu parachi no uénani enbidiarpini, sánderu sési, kaxumbitiini ka sésichi pʼikuarherani imani ambe jingoni engachi jatsika (arhinta je Galasia 5:16; Filipusʌ 2:3, 4). Jeobaeri espiritu santujtsïni jarhuatasïndi míteni ambe  engaminduchi eratsejka ka andichisï uéjki úni ambe ma. Tata Diosïri jarhuajperata jingoni, uákachi mójtakurhini parachi iásï ambakiti ambe eratsenia ka pʼikuarherani (Sal. 26:2; 51:10). Ju je exeni Moisesiri ka Pablueri ejempluni engaksï no enbidiarpipka.

10. ¿Ambe úkuarhispi ma xanhari enga úpiringa xarhatani sini Moisesi enbidiarpisïreni o nómbe? (Exe je dibujuni enga uénakuarhu jaka).

¹⁰ Moisesi kánikua juramukua jatsispti Tata Diosïri ireta jimbo, peru no exesïrendi eska imajkusï jindepka enga jatsipiringa indeni kóntperatani. Por ejemplu ma xanhari, Jeoba euantaspti Moisesini sáni espiritu santu, ka íntsaaspti máru Israeli anapu orhejtsïkutichani engaksï jima no iauani japka nani enga japka kʼumanchikua para tánguarhini. Ísï tátsekua, Moisesi mítespti eskaksï ístu intsïnhaspka espiritu santu tsimani orhejtsïkuticha engaksï no nipka kʼumanchikuarhu para tánguarhini ka eskaksï uénaspka profetaeni jámani. ¿Ambe úspi enga Josue arhipka eska arhiapiringa ambe ma imani tsimani orhejtsïkutichani? Moisesi no enbidiariuaspti imani achamasïchani enga Jeoba erakuapka, sánderu sési, tsípispti engaksï jatsipka kóntperata paraksï profetaeni (Núm. 11:24-29). ¿Ambechi jorhenguarhisïni Moisesiri ambe?

11. ¿Nénaksï uá orhejtsïkuticha májkueni úni eska Moisesi?

¹¹ Ju je eratseni orhejtsïkutini ma enga kánikua tsitijka úni imeri ánchikuarhitani kúnguarhikuarhu, por ejemplu, nitamatarani Jorhenguarhikuani Aianhpiri jingoni. Peru arhinhasïndi eska arhistakuaka máteru erachini para sánderu orhepani ima nitamatarani indeni tánguarhikuani. Enga kaxumbitiika májkueni eska Moisesi, no ísï pʼikuarheraati enajki nóteru xáni janhanharhinhaaia. Sánderu sési, kánikua tsípikua jingoni jarhuataati erachini.

12. ¿Nénaksï xarhatasïni uánikua Tata Diosïri marhuaricha eskaksï kaxumbitiska ka eskaksï sési pʼikuarherasïnga imani ambe jingoni engaksï jatsika?

¹² Ju je exeni máteru ambe engaksï nitamakuarhijka uánikua erachicha engaksï jatirikia. Uánikua uéxurhinicha jimbo, i erachichaksï ísï marhuaxapti kúnguarhikuarhu komu orhejtsïkuti enga orhekupajka máteru orhejtsïkutichani. Peru engaksï na 80 jatirijkia, tsípikua jingonksï jurajkusïndi ini ánchikuarhitani. Ka sirkuitueri orhejtsïkuticha engaksï na 70 jatirijkia, xarhatasïndiksï eskaksï kaxumbitiska engaksï jurajkujka ini ánchikuarhitani ka máteru ánchikuarhitaksï jiókuarhini. Ka arini uéxurhinicha jimbo, interu parhakpini anapu erachicha engaksï Betelicha jimbo marhuani japka, jimbanhi ánchikuarhitaksï ma intsïnhastia Jeobaeri kúnguarhikuarhu ka nóteru para Beteli marhuania. I ambakiti erachicha ka pirenchicha nóksï no sési pʼikuarherasïndi engaksï iásï máteruecha újkia imani ánchikuarhitani engaksï antesi imecha uénga.

13. ¿Ambe jimbo úpirini Pablu uénani ebidiariuani 12 apostulichani?

¹³ Apostuli Pablu jindesti máteru ambakiti ejemplu, jimboka kaxumbitispka ka sési pʼikuarherasïrendi imani ambe jimbo enga jatsipka. No jurajkuspti eska imeri mintsita uénapiringa enbidia pʼikuarherani. Kánikua jánguarhintaspti aianhpikuarhu peru kaxumbikua jingoni uandaspti: “Ji sánderu sapichitu ambeska ka eska iámindu apostulicha engani no jukanchaka arhinhani ma apostuli” (1 Kor. 15:9, 10). Ima 12 apostulichaksï Jesusi jingoni jámaspti aianhpini Echerirhu, peru Pablu kristianu úkuarhispti ísï tátsekua enga Jesusi na uarhipkia ka tsíntani. Nájkiruka tátsekua niárapka jindeni “apostuli no Israeli anapuecheri”, no kuenta úkuarhispti 12 apostulicha jingoni (Rom. 11:13; Uku. 1:21-26). Nájkiruka ísïpka, sési pʼikuarherasïrendi imani ambe jingoni enga jatsipka ka no enbidiariuasïrendi 12 apostulichani engaksï niárapka xáni sési pájperani Jesusi jingoni.

14. ¿Ambechi uá engachi kaxumbitiska ka sési pʼikuarherani imani ambe jingoni engachi jatsika?

¹⁴ Engachi kaxumbiska ka sésichi pʼikuarherani  imani ambe jingoni engachi jatsika, ísïuakachi eska Pablu ka janhanharhiauakachi imani erachichani enga Jeoba juramukua íntsaaka (Uku. 21:20-26). Jeoba erakuasti erachichani paraksï orhejtsïkuni kúnguarhikuani. Nájkirukaksï no perfektueka, Jeoba ísï exeasïndi komueska intsïmperakua ma (Efes. 4:11). Engachi janhanharhiajka ka úni ambe engajtsïni imecha arhijka, xarhatasïngachi eskachi Jeobaeri amigueska ka sésichi pájperasïnga erachicha jingoni.

15. ¿Ambechi jatsiski para úni enbidia jingoni?

¹⁵ Nani enga enbidia jaka kʼuiripuechaksï no úsïndi sési pájperani. Jatsiskachi para juchari mintsitarhu méntku kénditani ka no úni eskaksï máteruecha uénaaka indeni ambe pʼikuarherani. Jatsiskachi para indeni tsimani ambe úni parachi “méntku jauenani úni jarhani ambe engachi jimbo sési pájperani jauaka ka uinhaperperantanchi” ka ísïchi kurhajchani jauaka Jeobaeri juramukuani (Rom. 14:19). ¿Ambechi uá úni parachi jarhuataani máteruechani paraksï no enbidiarpini ka jarhuajpini parachi iáminduecha sési pájperani?

16. ¿Nénachi uá jarhuataani máteruechani paraksï no enbidiarpini?

¹⁶ Na engachi jámajka ka ambe engachi újka uáti eskaksï máteruechajtu ísï uáka. I parhakpini jorhentpisïndi eskachi jatsiska para “jatsikuarhikua jimbo sési xekorheni” (1 Juanu 2:16, Táta Diósïri Uandakua Tata Jesukristueri Aiatsperakua). Peru inde ambe úsïndi eska jauaka enbidia. ¿Ambechi uá úni paraksï máteruecha no uénani enbidia pʼikuarherani? Ma ambe jindesti no jámani someni uandantani jarhani ambe engachi  xáni jatsikuarhika o ambe engachi uékani jaka piáni. Máteru ambe jindesti kaxumbitini ka no kʼéri ambe exekuarhini imani ánchikuarhita jimbo engachi kúnguarhikuarhu intsïnhajka. Someni uandani jarhani inderi ambe, úsïndi eska enbidia uénaaka jarhani. Peru engachi sánderu pendiente jarhajka máteruecha jimbo ka exeni imani ambakiti ambe engaksï újka, jarhuataasïngachi paraksï sési pʼikuarherani ka úsïngachi eskachi iáminduecha sési pájperaaka ka májku kʼéri jarhani kúnguarhikuarhu.

17. ¿Ambeksï nóteru pʼikuarherasïrenia Joseri ermanuecha ka ambeksï úspi indeni ambe jimbo?

¹⁷ Uákachi nóteru pʼikuarherania enbidia engachi jánguarhintaska. Ju je ménderu exeni Joseri ermanuecheri ejemplu. Uánikua uéxurhini tátsekua engaksï xáni no sési kámapka, ménderuksï exéjperantaspti jini Ejiptu. Peru Jose no jirejiresï aianguaspti néspi ima, orheta úspti ambe ma para exeni sinksï mójtakurhispkia. Tʼirekua ma úspti para ermanu jembecha, peru juramuspti eskaksï sánderu kánikua tʼirekua íntskupiringa Benjaminini enga jindepka imeri ermanu sánderu sapichu (Gén. 43:33, 34). Peru no nani arhisïndi eskaksï ermanu jembecha enbidia pʼikuarherapiringa. Sánderu sési, kánikuaksï pendienti jarhaspti Benjaminini jimbo ka imecheri táti Jakobu jimbo (Gén. 44:30-34). Joseri ermanuechaksï nóteru enbidiarpisïrendia ka indeni ambe jimbo, úsptiksï eska iámindu familia ménderu sési pájperapiringa (Gén. 45:4, 15). Májkueni, engachi no jurajkuska eskachi uénaaka pʼikuarherani enbidia, jarhuajpiakachi para iámindu juchari familia sési pájperani ka ístu kúnguarhikuarhu anapuecha.

18. Eska na arhijka Santiagu 3:17, 18, ¿ambe úkuarhia engachi jarhuajpiska paraka pínandikua jauaka?

¹⁸ Jeoba uékasïndi eskachi kánikua jánguarhintaaka parachi no enbidiarpini ka eskachi jarhuajpiaka parachi iáminduecha sési pájperani. Para inde ambe úni, jatsiskachi para kánikua jánguarhintani jimboka ísï eskachi na exekia ini jorhenguarhikua jimbo, pʼindeskachi enbidia pʼikuarherani (Sant. 4:5). Ístuchi irekaxaka ini parhakpini jimbo enga kánikua enbidia jaka. Peru engachi kaxumbitiska ka engachi jukaparharajka ka sésichi pʼikuarherani imani ambe jingoni engachi jatsika, nóchi pʼikuarheraaka enbidia. Sánderu sési, jarhuajpiakachi paraka pínandikua jauaka ka parachi imani ambakiti kualidadichani xarhataani engachi ixú exeakia (arhinta je Santiagu 3:17, 18).