1. ¿Nákiskiksï máru kurhamarhikuecha enga pirenchi ma jatsika para úkuarhiani enga eratseni jauakia uambuchani?

IÁMINDU kristianuechachi tata Jesukristueri juramukua jimbo jarhaska, enga jindeeka sánderu ambakiti juramuti. Joperu enga pirenchi ma uambuchajka, jatsisti para kurhajchani uámbani ka i ambe no méntkisï fásilisïndi. Ísï jimbo, engajtsï eratseni jauaka uambuchani erachi ma jingoni, sési japirindi eskajtsï kurhamarhikurhipiringa: “¿Ambe xarhatasïni eska i erachi ambakiti familieri orhejtsïkuti máeuaka? ¿Jindeeski Jeobani marhuakuni ambe enga sánderu jukaparharajka? ¿Uá eskachi sánderu sési pájperaaka Jeobani jingoni?”. Ístu, pirenchi jatsisti para kurhamarhikuarhini: “¿Ambe uá úni parachi sési irekuarhini temungurhiri? ¿Tekaantstiski ka sési kámpisïni? ¿Na xáni sési pájperasïni ji Jeobani jingoni?” (Ecl. 4:9, 12). Enga pirenchi ambakiti ambe erakuska úni antede uambuchani, jarhuataati paraka uáka sési irekuarhini ka tsípikua jingoni.

2. ¿Ambechi exea ini jorhenguarhikua jimbo?

² Uánikua pirenchichaksï ambakiti ejemplu ma íntspisïndi engaksï kurhajchajka uámbani. Kʼéri tsípikuarhita máesti márku marhuakuni Jeobani ini pirenchicha jingoni ka diosmaiamukuachi arhiasïnga jimbokaksï no jurajkusïnga Jeobani. Ini jorhenguarhikua jimbo, mókuantauakachi ini tanimu kurhamarhikuechani: ¿nákiskiksï máru uandanhiatecha engaksï uáka jatsiani uarhiiticha?, ¿andiksïsï uarhiiticha kurhajchaajki uámbechani? ka ¿ambeksï uá jorhenguarhini pirenchicha ka erachicha engaksï tembuchatini jakaia para kurhajchani ka janhanharhini juramukuani engaksï máteruecha jatsika ísï eska na úpka Jesusi, Abigaili ka Maria enga Jesusiri amambepka?

3. ¿Andiksïsï iámindu temungurhiricha uandanhiatechani jatsiajki?

³ Temungurhirikua intsïmperata máesti Tata Diosïri ka i intsïmperata perfektuesti, joperu kʼuiripuechachi imperfektueska  (1 Juanu 1:8). Ísï jimbo, Tata Diosïri Karakata arhiasïndi tembuchatichani eskaksï uandanhiatechani jatsiauaka (1 Kor. 7:28). Íksï jindeesti máru uandanhiatecha enga uarhiiti úpiringa jatsiani.

4. ¿Andisï úpirini uarhiiti ma ísï pʼikuarherani eska kurhajchani uámbani menusi úsïnga?

⁴ Jamberi jimboka ísï tʼarhexeranhaska pirenchi ma úpirindi ísï pʼikuarherani eska kurhajchani uámbani menusi úsïnga. Marisoli, enga Estados Unidos irekaka, uandasïndi: “Nani engani ji tʼarhexeka, méntkisïksï arhiani jarhasïrendi nanakechani eskaksï jatsiska para iámu ambe jimbo májkuenini eska tatakecha. Joperu ji míteska eska Jeoba juramukua íntsaaska acheetichani ka eskaksï uarhiiticha jatsiska para kurhajchaani, joperu ístu, eskaksï uarhiiticha jatsiska para janhanharhikua jingoni kánhani. Joperu no méntkisï fásilisïndi janhanharhini juchiti acheetini jimbokaksï kʼuiripuecha uandasïnga eskani no jatsiska para ísï úni”.

5. ¿Ambeksï uandasïni máru acheeticha uarhiiticheri ambe enga no sési jaka?

⁵ Joperu, úpirindi uarhiiti ma uambuchatini jarhani acheeti ma jingoni enga eratsejka eskaksï nanakecha no xáni jukaparhakueska eska tatakecha. Pirenchi ma enga Ivon arhinhajka ka enga Sudamérica irekaka, uandasïndi: “Nani engani ji irekaka, orhetaksï tatakecha tʼiresïndi ka tátsekua nanakecha. Desde sapichku uénani, erokuarhisïndiksï eska nanakecha úmantaaka ka limpiarini, joperu tataka sapirhatichani, amambechaksï jatsirakuasïndi ka pirembecha ka arhiasïndiksï eska imaksï jindeeska engaksï sánderu jukaparhakueka familiarhu”. Pirenchi ma enga arhinhajka Yingling ka enga Asia irekaka, uandasïndi: “Juchiti idioma jimbo, jarhasti uandakua ma enga arhikuekajka eskaksï uarhiiticha no jatsiska para jánhastiini ka niksï jorhendani úni ambe ma. Ambe enga jatsika para úni uarhiiti, jindeesti úni ambe enga kʼumanchikuarhu uétarhiaka ka no ma ambe úsïndi arhini acheetini”. Acheeti ma enga no xarhatajka uékperakua ka enga no újka ambe enga Biblia uandajka, no sési pʼikuastasïndi témbani, no ísï úni jarhasïndi eska Jesusi ka no jaiapanherantasïndi Jeobani (Efes. 5:28, 29; 1 Ped. 3:7).

6. ¿Ambe jukaparhakueski eskaksï uáka uarhiiticha paraksï sánderu sési pájperani Jeobani jingoni?

⁶ Eskachi na exekia máteru jorhenguarhikua jimbo, Jeoba erokuarhisïndi eskaksï acheeticha jarhuataaka imecheri familiani paraksï kómarhini Jeobani, kéndaani ambe engaksï uétarhinchaaka ka eskaksï sési pʼikuastauaka (1 Tim. 5:8). Joperu, pirenchicha engaksï uambuchatini jaka, jatsistiksï para arhutani tiempu paraksï pauani pauani arhintani Bibliani, eratsentani ambe engaksï arhintajka ka paraksï mintsitarhu uératini kómarhini Jeobani. Joperu i ambe úpirindi úkua jukani jimbokaksï uarhiiticha uánikua úkua ambe jatsisïnga. Úpirindiksï ísï pʼikuarherani eskaksï no jatsiska tiempu ka uinhapikua paraksï iámindu i ambe úni, joperu jukaparhakuesti eskaksï arhutaaka tiempu. ¿Andi? Jimboka Jeoba uékasïnga eska mándani imeri marhuaricha niáraaka sési pájperani imani jingoni (Uku. 17:27).

7. ¿Ambe jarhuataa uarhiitini para kurhajchani ka janhanharhini uámbani?

⁷ Ísïsti, uarhiiti jatsisti para jánguarhintani para janhanharhini ka kurhajchani uámbani enga imperfektueka. Joperu sánderu no úkua jukanchaati kurhajchani ambe enga Jeoba arhijka, enga kurhanguska ka jiókuarhini andisï Biblia arhijki eska jatsiska para kurhajchani ka janhanharhini imeri uámbani.

8. Eska na arhijka Efesu 5:22-24, ¿andisï uarhiiti enga kristianeka jiókuarhijki uámberi juramukuani?

⁸ Uarhiiti ma enga kristianeka erakusïndi kurhajchani uámbani jimboka inde ambesï erokuarhijka Jeoba eska uáka (arhinta je Efesu 5:22-24). Mintsinharhisïndi imeri Táti auandarhu  anapuni ka mítesti eska ima xénchasïnga ka eska no ma ambe kurhakupiringa enga no sési japiringa (Deut. 6:24; 1 Juanu 5:3).

9. ¿Ambe úkuarhisïni enga uarhiiti janhanharhijka uámberi juramukuani?

⁹ Kʼuiripuechaksï arhiasïndi uarhiitichani eskaksï no kurhajchauaka Jeobaeri juramukuechani ka eska kurhajchani uámbani menusi uásïnga. Imecha engaksï ísï eratsejka, nóksï mítesti juchari Tata Diosï uékpitini. Jeoba no méni kurhakupirindi imeri uájpechani enga ima xáni uékajka, eskaksï úpiringa ambe ma enga menusi uápiringa. Ima pirenchi enga jánguarhintajka kurhajchani uámbani, ísï eska Jeoba na juramujka, jarhuajpisïndi paraka imeri familia pínandikua jingoni irekaaka (Sal. 119:165). Ísï úparini, iáminduechaksï andani uérasïndi, uámba, uájpecha ka ima mismu.

10. ¿Ambechi jorhenguarhisïni ambe enga Carol uandaka?

¹⁰ Uarhiiti enga jiókuarhijka uámberi juramukuani, enga imperfektueka, xarhatasïndi eska xénchasïnga ka janhanharhini Jeobani, enga íntsaaka juramukua sáni máteruechani. Carol enga Sudamérica irekaka, uandasïndi: “Míteska eska juchiti acheeti no uáka iámindu ambe sési úni. Ka ístuni míteska eska ambe engani ji uáka enga i ambe úkuarhiska, xarhataaka na engani xáni jukaparharajka juchiti pájperakua Jeobani jingoni. Ísï jimbo, jánguarhintasïnga parani seguirini janhanharhini juchiti acheetini, jimbokani míteska eska Jeoba jaiapanhentasïnga i ambe”.

11. a) ¿Ambe jarhuatasïni Aneeseni para puátspintani? b) ¿Ambechi jorhenguarhisïni imeri ambe?

¹¹ Enga uarhiiti ísï pʼikuarherajka eska uámba no kuenta úsïnga na enga ima pʼikuarherajka ka ambe enga uandanhiatajka, kánikua úkua jukakuati janhanharhini ka kurhajchani. Joperu ju je exeni ambe enga újka Aneese enga i ambe úkuarhijka, pirenchi ma enga uámbuchatini jaka. Ima uandasïndi: “Jánguarhintasïnga no ikiani ka eratseni eska no nema úsïnga iámindu ambe sési úni. Jánguarhintasïnga puátspintani ísï eska Jeoba na újka. Engani ísï újka, ménderuni sési pʼikuarherantasïnga” (Sal. 86:5). Enga uarhiiti ma jorhenguarhijka puátspintani, sánderu fásilisïndi jiókuarhini uámberi juramukuani.

12. ¿Náki ejempluechaksï jarhaski Bibliarhu?

¹² Jamberi máruksï eratsejti eska imecha engaksï kurhajchajka máteruechani, debilisïnga. Joperu i ambe méntku no ísïsti. Bibliarhu, jarhastiksï uánikua ejempluecha kʼuiripuecheri engaksï  jiókuarhipka máteruecheri juramukuani, joperu engaksï kánikua balori jukapka. Ju je exeni ambechi uá jorhenguarhini Jesusiri, Abigailiri ka Marieri.

13. Uanda je andisï Jesusi janhanharhijki Jeobaeri juramukuani.

¹³ Jesusi janhanharhisïndi Jeobaeri juramukuani, joperu enga i ambe újka no arhikuekasïndi eska no jánhastiiska o eska no jorhenaska úni ambe ma. Ima ambe enga jorhentpipka ka enga no úkua jukenga para kurhanguni xarhatasïndi eska ima kánikua jánhastiiska (Juanu 7:45, 46). Jeoba mítesti eska Jesusi kánikua jánhastiiska, jimbosï jurajkupti para imani jingoni ánchikuarhini jiáni enga Jeoba kueraapka iámu ambe Echerirhu ka auandarhu (Prov. 8:30; Ebr. 1:2-4). Ka desdeka Jesusi tsítanhantaka, Jeoba íntskusti iámindu juramukua auandarhu ka ístu parhakpinirhu (Mat. 28:18). Nájkiruka Jesusi uánikua ambe míteka úni, ima útasï jirinhasïndi Jeobaeri jarhuajperatani ka ísï úsïndi jimboka xénchasïnga imeri Tátini (Juanu 14:31).

14. a) ¿Ambeksï uá jorhenguarhini acheeticha Jeobaeri ejemplu jingoni? b) ¿Ambeksï uá jorhenguarhini ambe enga arhijka Proverbios 31?

¹⁴ ¿Ambeksï uá jorhenguarhini acheeticha? Jeoba no uandasti eska uarhiiti kurhajchaaka uámbani jimboka eratsesïnga eska uarhiiti no xáni jukaparhaska. Ka i ambe xarharasïndi jimboka Jeoba uarhiitichani erakuaska ka acheetichani paraksï Jesusini jingoni juramuni (Gal. 3:26-29). Jeoba xarhatasïndi eska mintsikasïnga imeri Uájpani jimbosï juramukua íntskuti, májkueni, acheeti enga jánhastiika, ístu juramukua sáni íntskusïndi imeri témbani. Tata Diosïri Karakata uandasïndi ambe enga újka úni uarhiiti jánhasti ma, úsïndi exeni ambe enga uétarhijka kʼumanchikuarhu, piáni ka atarantani echerichani ka negosiu ambe úni (arhinta je Proverbios 31:15, 16, 18). No jántspiri máesti enga no uáka uandani ambesï eratsejki. Sánderu sési, uámba mintsinharhisïndi ka kuenta úsïndi ambe enga témba uandajka (arhinta je Proverbios 31:11, 26, 27). Enga acheeti ma ísï janhanharhiska témbani, ima tsípikua jingoni kurhajchaati.

15. ¿Ambeksï uá jorhenguarhini uarhiiticha Jesusiri ejemplu jingoni?

¹⁵ ¿Ambeksï uá jorhenguarhini uarhiiticha? Nájkiruka Jesusi xáni uánikua ambe úkia, no ísï pʼikuarherasïndi eska menusi úsïnga enga janhanharhijka Jeobaeri juramukuani (Juanu 6:38; 1 Kor. 15:28). Májkueni, uarhiiti ma enga jánhastiika ka enga májkueni újka eska Jesusi, no ísï pʼikuarherasïndi eska menusisïnga enga kurhajchajka uámbani. Jarhuatasïndi uámbani jimboka xénchasïnga, joperu sánderu jukaparhakua ambe jimboka xénchasïnga ka janhanharhisïnga Jeobani.

16. Eska na arhijka 1 Samuel 25:3, 23-28, ¿náki uandanhiatechani nitamakurhiaspi Abigaili? (Exe je imajenini enga uénakuarhu jaka i rebisteri).

¹⁶ Abigaili Nabaliri témbespti, acheeti ma enga uarhisipka, enga kʼéramakuerhienga ka enga no ma ambe jukaparharenga. Enga uékapiringa para kʼamajkuni imeri temunguarhikuani, jurajkupirindi eska Dabidi ka imeri soldaduecha uándikupiringa uámbani. Joperu no ísï úspti, sánderu sési jánguarhintaspti kuájchakuni Nabalini ka imeri kʼumanchikuarhu anapuechani. ¡Kánikua balori uétarhinchapti Abigaili para úni orhepani niárakuani 400 acheetichani engaksï armechani káuenga para úni janhanharhikua jingoni uandontskuarhekuni Dabidini! Niáraspti jamberi uandani eska tekakuntapiringa imani ambe jimbo enga uámbani úpka (arhinta 1 Samuel 25:3, 23-28). Dabidi kuenta íntskukuarhispti eska Jeobasï úrani japka ini uarhiitini enga xáni balori jukapka para konseju íntskuni ka para no jiárhitani eska no sési jásï ambe úpiringa.

17. ¿Ambeksï uá jorhenguarhini acheeticha ambe enga nitamakuarhipka Dabidi ka Abigaili?

¹⁷ ¿Ambeksï uá jorhenguarhini acheeticha? Abigaili uarhiiti jánhasti máespti. Ísï jimbo, Dabidi kánikua jánhaskakua xarhataspti  enga kurhajchapka ini uarhiitini. Ka ini ambe jimbo Dabidi no uándikuaspti imechani engaksï no kulpa jatsipka. Májkueni, acheeti jatsisti para jingontku kurhajchani imeri uarhiitini enga ima eratseni jauaka jukaparhakua ambe úni. Jamberi i ambe jarhuataati para no imani ambe úni enga no sési jauaka.

18. ¿Ambeksï uá jorhenguarhini uarhiiticha Abigailiri ejemplu jingoni?

¹⁸ ¿Ambeksï uá jorhenguarhini uarhiiticha? Uarhiiti enga xénchajka ka janhanharhini Jeobani, uáti kánikua marhuakuni imeri familiani, nájkiruka imeri acheeti no marhuakuaka Jeobani o no ísï irekani eska Jeoba na uandajka. Uarhiiti no uékaati úni ambe ma para kʼamajkuni imeri temungurhirikuani, sánderu sési, janhanharhiati ka kurhajchaati uámbani ka ini ambe úparini uáti eska imeri acheeti uékaaka jorhenguarhini Jeobaeri ambe (1 Ped. 3:1, 2). Ka nájkiruka uámba no marhuakuska Jeobani, Jeoba sési pʼikuarherasïndi enga exejka eska uarhiiti kurhajchasïnga uámbani ka eska no jurajkusïnga Jeobani.

19. ¿Uarhiiti káni no jatsiski para kurhajchani uámbani?

¹⁹ Joperu, pirenchi ma no kurhajchaati uámbani enga ima kurhakuska ambe ma enga Biblia no jaiapanhentajka. Eranhaska je eska acheeti ma enga no marhuakujka Jeobani kurhakuska pirenchini ma eska chkuanderaaka, eska sïpaaka o eska máteru ambe uáka enga Jeoba no jaiapanhentajka. Pirenchicha engaksï uambuchatiika, májkueni eska iáminduecha engachi marhuakujka Jeobani, jatsistiksï para sánderu kurhajchani Jeobani ka eska kʼuiripuechani. Ísï jimbo, engaksï pirenchini ma arhiaka eska uáka ambe ma enga Biblia no jaiapanhentajka, no jatsisti para ísï úni. Tátsekua iatsitakuarhu, joperu no sáni chéparini, jatsisti para arhini uámbani andisï no uá ísï úni (Uku. 5:29).

20. ¿Andichisï míti eska Maria ambakiti pájperakua ma jatsispka Jeobani jingoni?

²⁰ Maria ambakiti pájperakua ma jatsispti Jeoba jingoni. Xarharasïrendi eska sési míteaspka karakatechani, jimboka ma xanhari enga uandontskuarheni japka Elisabeti jingoni enga Juanu el Bautisteri amambepka, jukari beinte xanhari uandaspti ambe engaksï arhijka Karakata Ebreaecha (Luk. 1:46-55). Ka ju je eratseni i ambe: Maria ka José tembuperapirindiksïa, joperu Jeobaeri ánjeli no orheta Joséni xarhakuspti. Orheta Maria jingoni uandontskuarhespti ka arhispti eska kánguarhipiringa Tata Diosïri Uájpani (Luk. 1:26-33). Jeoba sési mítespti  Mariani ka seguru jarhaspti eska xénchapiringa Uájpani ka eska sési kuidaripiringa. Maria seguirispti ambakiti pájperakua ma jatsini Jeobani jingoni, asta jiáni útasï enga Jesusi uarhipka ka enga auandarhu karhanchintapka (Uku. 1:14).

21. ¿Ambeksï uá jorhenguarhini acheeticha, ambe enga Biblia uandajka Marieri ambe?

²¹ ¿Ambeksï uá jorhenguarhini acheeticha? Acheeti enga jánhastiika tsípisïndi enga témba sési míteajka karakatechani. No ikiasïndi témba jingoni o eratseni eska ima uékasïnga familiani orhejtsïkuni. Mítesti eska kánikua marhuakuaka imeri familiani enga témba sési míteska ambe enga uandajka Biblia. Ka nájkiruka uarhiiti jindeeka enga sánderu nika eskuela, acheetisï jatsiti para orhejtsïkuni familiaeri jorhenguarhikuani ka para jarhuatani Jeobani marhuakuni (Efes. 6:4).

22. ¿Ambeksï uá jorhenguarhini uarhiiticha Marieri ambe?

²² ¿Ambeksï uá jorhenguarhini uarhiiticha? Uarhiiti jatsisti para janhanharhini uámberi juramukuani, joperu imasï mismu jatsiti para jánguarhintani sánderu mintsikani Jeobani (Gal. 6:5). Jatsisti para tiempu arhutani para jandiajku jorhenguarhini Bibliaeri ambe ka para eratsentani ambe enga jorhenguarhijka. I ambe jarhuataati paraka seguiriuaka xénchani ka janhanharhini Jeobani ka tsípikua jingoni irekaati enga seguiriuaka kurhajchani uámbani.

23. Engaksï uarhiiticha janhanharhijka juramukuani, ¿néna marhuakuasïni imechani, imecheri familiechani ka kúnguarhikuani?

²³ Uarhiiticha engaksï janhanharhijka uámberi juramukuani jimbokaksï xénchasïnga Jeobani, sánderuksï tsípikua jingoni irekaati ka eska imecha engaksï no janhanharhijka juramukuani. Ístu, ambakiti ejempluksï ma íntsaasïndi acheetichani ka uarhiitichani engaksï sánderu sapirhatiika ka jarhuajpisïndiksï paraka sánderu ambakiti pájperakua ma jauaka imecheri familiarhu ka ístu kúnguarhikuarhu (Titu 2:3-5). Ini jurhiatikuecha jimbo sánderuestiksï nanakecha engaksï Jeobani marhuakujka (Sal. 68:11). Joperu, no arhiparini engachi nanakeuaka o tatakeni, iáminduechachi ambakiti ánchikuarhita ma jatsiska kúnguarhikuarhu. Máteru jorhenguarhikua jimbo, exeakachi nénachi uá i ambe úni.