1. ¿Náki jindeeski ma ambe enga jimbo májku kʼéri jaka Jeobaeri kúnguarhikua?

KÁNIKUACHI tsípisïnga Jeobaeri kúnguarhikua jingoni kuenta úkuarhini. Ma ambe jimbo engachi jatsika pínandikua ka engachi jimbo újka májku kʼéri jarhani, jindeesti jimbokachi jánguarhintasïnga janhanharhiani imechani enga Jeoba juramukua sáni íntsaaka. Engachi sánderu sési kurhangujka andisï Jeoba máru kʼuiripuechani juramukua sáni íntsaa, sánderuchi májku kʼéri jarhasïnga.

2. ¿Náki kurhamarhikuechanchi mókuantaua ini jorhenguarhikua jimbo?

² Ini jorhenguarhikua jimbochi exeaka néksï jatsiski juramukua kúnguarhikuarhu. Ístuchi mókuantani jauaka arhini kurhamarhikuechani: ¿náki ánchikuarhita íntsaaski Jeoba pirenchichani?, ¿ísïski eskaksï iámindu erachicha orhejtsïkuasïnga iámindu pirenchichani? ka ¿májkueni jásï juramukua ma jatsiski orhejtsïkuti ma, erachicha ka pirenchicha jingoni ísï eska familieri orhejtsïkuti ma imeri témba ka uájpecha jingoni? Orheta, ju je exeni náki ánchikuarhita íntsaaski Jeoba pirenchichani ka nénachi jatsiski para exeani.

3. ¿Ambejtsïni jarhuataa parachi sánderu jukaparharani ambe engaksï újka pirenchicha?

³ Jukaparharaasïngachi pirenchichani jimbokaksï kánikua jánguarhintasïnga kuidarini imeri familiani, aianhpini ambakiti ambe ka jarhuataani kúnguarhikuarhu anapu erachichani, joperu engachi eratsentaska na enga exeajka Jeoba ka Jesusi ka na enga kaapka apostuli Pablu sánderuchi jukaparharauaka.

4. ¿Néna xarhatasïni Biblia eska Jeoba májkueni jukaparharaasïnga tatakechani ka nanakechani?

⁴ Biblia uandasïndi eska para Jeoba tatakecha ka nanakecha májkueni jukaparhakueska. Por ejemplu, uandasïndi eska primeru sigluru, Jeoba espiritu santu íntsaaspka tatakechani ka nanakechani parakaksï úpiringa milagruechani uáni, komu idiomecha  jimbo uandani (Uku. 2:1-4, 15-18). Imani grupuni jimbo engaksï Kristuni jingoni juramuaka, jarhastiksï tatakecha ka nanakecha (Gal. 3:26-29). Májkueni, Jeoba íntsaauati tatakechani ka nanakechani tsípikua para méntkisï ixú Echerirhu (Jaŋ. 7:9, 10, 13-15). Ka Jesusi juramukuaspti tatakechani ka nanakechani paraksï aianhpini ka jorhentpini ambakiti ambe (Mat. 28:19, 20). Por ejemplu, libru Ukuecha jimbo, uandasïndi pirenchiri ma enga Prisila arhinhenga. Ima ka imeri uámba Ákila, sánderu sésiksï aianguspti jurhimbikueri ambe acheetini ma enga kánikua jánhastipka enga Apolosi arhinhenga (Uku. 18:24-26).

5. Eska na arhijka Lukasʌ 10:38, 39, 42, ¿na exeasïreni Jesusi nanakechani?

⁵ Jesusi janhanharhiasïrendi nanakechani. No ísïspti eska fariseuecha, engaksï no jukaparharauenga nanakechani, niksï uandontskuarhieni imecha jingoni kʼuiripuni japarini ka menusia paraksï aianguani Karakateri ambe. Joperu Jesusi kánikua ménderuenispti, uandontskuarhespti tatakecha ka nanakecha jingoni jukaparhakua ambe karakatecheri (arhinta je Lukasʌ 10:38, 39, 42). * Ístu, jurajkuspti eskaksï uánikua nanakecha nipiringa pámbeni enga ima aianhpini jámani jarhenga (Luk. 8:1-3). Ka ístu, máru imechani íntsaaspti kʼéri kóntperata paraksï aianguani apostulichani eska ima tsíntaspkia (Juanu 20:16-18).

6. ¿Néna xarhataspi apostuli Pablu eska janhanharhiasïrenga nanakechani?

⁶ Apostuli Pablu arhispti Timoteuni eska janhanharhiapiringa nanakechani. Arhispti eska ísï kaapiringa nanakechani engaksï sánderu jatiripkia, komueska imeri amambani ka eska sánderu sapirhatichani komueska imeri pirenchichani (1 Tim. 5:1, 2). Nájkiruka Pablu kánikua jarhuatapka Timoteuni para ima mintsikani Jeobani, uandaspti eska amamba ka imeri mama kʼéri, jindeespka engaksï jorhendapka “pímbinhasï karakatani” (2 Tim. 1:5; 3:14, 15). Ístu, enga Pablu karta axakuapka Roma anapuechani, uandajperata axakuaspti pirenchichani ka nombri jimbo arhiaspti. Ima kuenta íntskukuarhesïrendi ambe engaksï xáni uénga ima pirenchicha ka uandaspti na enga xáni jukaparharenga imecheri ánchikuarhitani (Rom. 16:1-4, 6, 12, Táta Diósïri Uandakua Tata Jesukristueri Aiatsperakua; Filip. 4:3).

7. ¿Náki kurhamarhikuechanchi mókuantaua?

⁷ Bibliarhu no arhisïndi eskaksï tatakecha sánderu jukaparhakueska eskaksï nanakecha. Pirenchichaksï kánikua jarhuajpisïndi kúnguarhikuarhu ka orhejtsïkutichaksï mítesti eskaksï pirenchicha jarhuajpisïnga paraka pínandikua jauaka kúnguarhikuarhu ka paraka sési pájperanhaaka. Joperu, iásï ju je mókuantani arhini kurhamarhikuechani: ¿andisï arhiajki Jeoba pirenchichani eskaksï ójtsïaka para máru ambe úni? ka jimbokaksï erachichajkusï erakunhajti paraksï orhejtsïkutini ka orhejtsïkutiri jarhuajpirini, ¿arhikuekasïni i ambe eskaksï erachicha orhejtsïkuasïnga iámindu pirenchichani?

8. Ísï eska na arhijka Efesu 5:23, ¿andiksïsï no iámindu erachicha orhejtsïkuajki iámindu pirenchichani?

⁸ ¿Jatsiskiksï para erachicha iámindu pirenchichani orhejtsïkuani? Nómbe. Kristujkusï jindeeti enga orhejtsïkuajka iámindu pirenchichani (arhinta je Efesu 5:23). Familiarhu, acheeti orhejtsïkusïndi uarhiitini, joperu imeri uájpa tataka enga itsï atakuarhikia no orhejtsïkusïndi amambani (Efes. 6:1, 2). Ka kúnguarhikuarhu, orhejtsïkutichaksï no iámindu juramukua jatsisti erachicha ka pirenchicha jingoni (1 Tes. 5:12; Ebr. 13:17). Ka ¿ambe uá úni pirenchi ma enga no uambuchatini jaka ka enga nóteru imeri táti jémbecha jingoni irekani jakaia? Ima seguirisïndi janhanharhiani, joperuksï  nóteru táti jémbecha juramukusïndia. Ka pirenchi janhanharhiasïndi orhejtsïkutichani, joperu Jesusijkusï jindeeti imeri orhejtsïkuti, májkueni eska kúnguarhikuarhu anapu erachicheri.

9. ¿Andiksïsï pirenchicha ménisï jatsi para ójtsïni?

⁹ Ísïsti, Jeoba erachichani erakuasti paraksï orhejtsïkuni kúnguarhikuani ka no pirenchichani (1 Tim. 2:12). ¿Andi? Imani ambe jimbo enga Jeoba, Jesusini peeraka para acheetini orhejtsïkuni: paraka kúnguarhikuarhu iámu ambe sési jauaka. Joperu enga pirenchi ma ánchikuarhita ma uáka engaksï erachicha újka, Jeoba uandasïndi eskaksï jatsiska para ójtsïni (1 Kor. 11:4-7). * I ambe no jindesti para menusi úni, sino para xarhatani eska janhanharhisïnga imani enga Jeoba juramukua sáni íntskuka. Iásï ju je arini kurhamarhikuani mókuntani: ¿náksï xáni juramukua jatsiski orhejtsïkuticha ka familieri orhejtsïkuticha?

10. ¿Ambe jimboksï orhejtsïkuticha úpirini eratseni eskaksï uáka uandani ambe engaksï uáka kúnguarhikuarhu anapu erachicha?

¹⁰ Orhejtsïkutichaksï xénchasïndi Kristuni ka ístu imani karichichani enga Jeoba ka Jesusi arhiaka paraksï kuidariuani (Juanu 21:15-17). Jimboka orhejtsïkuti ma uandanhiasïnga kúnguarhikuarhu anapuecha jimbo, úpirindi eratseni eska imecheri táti jémbeska. Jamberi úpirindi eratseni: “Enga familieri orhejtsïkuti ma újka uandani ambe enga úkuarhiaka familiarhu para kuájchakuni, ístu orhejtsïkuti ma uáti uandani ambe enga úkuarhiaka para kuájchakuani Tata Diosïri karichichani”. Ka máru erachicha ka pirenchichaksï úpirindi úni eskaksï orhejtsïkuticha eratseaka eskaksï imecha arhiauaka ambe engaksï uáka úni. Joperuksï, ¿májkueni jásï juramukua jatsiski orhejtsïkuticha ka eska familieri orhejtsïkuticha?

11. ¿Ambe jimboksï sáno májkueniski orhejtsïkuticheri ka familieri orhejtsïkuticheri juramukua?

 ¹¹ Apostuli Pablu uandaspti eska familieri orhejtsïkutiri juramukua máru ambe jimbo sáno májkueniska orhejtsïkuticheri juramukua jingoni (1 Tim. 3:4, 5). Por ejemplu, Jeoba uékasïndi eskaksï iámindu familiarhu anapuecha kurhajchaaka familieri orhejtsïkutini ka eskaksï kúnguarhikuarhu anapu erachicha kurhajchauaka orhejtsïkutichani (Kol. 3:20). Ístu erokuarhisïndi eskaksï orhejtsïkuticha ka familieri orhejtsïkuticha jarhuatauaka imechani engaksï kuidariuajka paraksï sánderu mintsikani Jeobani ka paraksï pʼikuarherani eskaksï xénchanhasïnga ka jukaparharanhani. Ka ísï eska acheeti ma enga sési orhejtsïkujka imeri familiani, orhejtsïkutichajtuksï jarhuataasïndi erachichani engaksï uétarhinchani jarhajka (Sant. 2:15-17). Ístu, Jeoba erokuarhisïndi eskaksï orhejtsïkuticha ka familieri orhejtsïkuticha, jarhuatauaka máteruechani paraksï kurhajchaani Jeobaeri juramukuechani ka eskaksï “no sánderu ambe eratse[aka] ka eska enga karakata jaka” Bibliarhu (1 Kor. 4:6).

12, 13. Eska na arhijka Roma 7:2, ¿ambe jimbo ménderueniski orhejtsïkuticheri juramukua familieri orhejtsïkuticheri jingoni?

¹² Joperu ístu kánikua ménderuenisti orhejtsïkuticheri juramukua familieri orhejtsïkuticheri jingoni. Ma jindesti eska Jeoba orhejtsïkutichani  íntsaaska ánchikuarhita paraksï ísïni komueska juesicha ka petaantani kúnguarhikuarhu imechani engaksï no móantaaka (1 Kor. 5:11-13).

¹³ Jeoba familieri orhejtsïkutichani íntsaasti juramukua máru ambe jimbo engaksï orhejtsïkuticha no újka úni. Ma jindesti, eskaksï úsïnga juramuni ambe engaksï jatsika para úni imeri familiarhu anapuecha ka úni eska ísï úkuarhiaka (arhinta je Roma 7:2). Por ejemplu, familieri orhejtsïkuti jatsisti sésikua para uandani na engaksï jandora jatsika para niántani uájpecha imeo chúrikua ka ístu jatsisti juramukua para jurhimberantaani engaksï no kurhandiraaka (Efes. 6:1). Familieri orhejtsïkuti ma, jatsisti para uandontskuarheni imeri uarhiiti jingoni antede uandani ambe enga úkuarhiaka, jimbokaksï tsimarhani jindeeska “máechakua kuerpu” (Mat. 19:6). *

14. a) Eska na arhijka Markusʌ 10:45, ¿andisï Jeoba Jesusini eraku para kúnguarhikuani orhejtsïkuni? b) ¿Náki jindeeski ánchikuarhita Grupueri enga Orhejtsïkuajka iámindu kúnguarhikuechani? (Exe je rekuadruni “ Ánchikuarhita Grupueri enga Orhejtsïkuajka iámindu kúnguarhikuechani”).

¹⁴ Pʼímutantskua jimbo, Jeoba piántasti iámindu imecheri tsípikuani engaksï kúnguarhikuarhu jaka ka iámindu imani kʼuiripuecheri engaksï jakajkujka Jesusini (arhinta je Markusʌ 10:45; Uku. 20:28; 1 Kor. 15:21, 22). Jimboka Kristu uarhiska juchantsïni jimbo, jimbosï Jeoba imani erakuti para kúnguarhikueri orhejtsïkutini. Ini ambe jimbo, Jesusi jatsisti juramukua para uandani ambe engaksï uáka kʼuiripuecha, familiarhu anapuecha ka iámindu kúnguarhikuarhu anapuecha ka eskaksï ísï uáka (Gal. 6:2). Joperujtsïni Jesusi no solu juramuchisïndi ambe engachi jatsika para úni,  sino ístujtsïni kuidarisïndi ka xénchani (Efes. 5:29).

15, 16. ¿Ambechi jorhenguarhisïni imani ambe jingoni enga Marley ka Benjamin uandajka?

¹⁵ Pirenchichaksï xarhatasïndi eskaksï janhanharhisïnga Kristueri juramukuani, engaksï ísï újka eskaksï na uandajka erachicha enga Jesusi erakuaka paraksï kuidarini kúnguarhikuani. Estados Unidos anapu pirenchi ma enga Marley arhinhajka, uandasïndi: “Kánikua jukaparharasïnga juchiti ánchikuarhitani eska témba ka ístu ambe engani sésikua jatsika para úni kúnguarhikuarhu. Kánikua jánguarhintasïnga parani janhanharhini imani juramukuani enga Jeoba íntskuka juchiti acheetini ka kúnguarhikuarhu anapu erachichani. Joperu juchiti acheeti ka kúnguarhikuarhu anapu erachichaksï úsïndiksï eskani no úkua jukanchaaka kurhajchaani, jimbokajtsïni janhanharhisïnga ka xarhatachintsïni eskaksï jukaparharasïnga ambe engani xáni újka”. Seguru eskaksï uánikua pirenchicha ísï pʼikuarherasïnga eska i pirenchi.

¹⁶ Erachichaksï xarhatasïndi eskaksï kurhangusïnga eska Jeoba íntsaaska sáni juramukua máteruechani engaksï janhanharhiajka ka jukaparharaani pirenchichani. Benjamin, erachi ma enga Inglaterra anapueka, uandasïndi: “Uánikua ambe jorhenguarhisïnga ima amberi engaksï pirenchicha mókuntajka tánguarhikuecharhu ka imecheri konsejuecha jingoni para Bibliaeri ambe jorhenguarhini ka néna sánderu sési aianhpini ka jorhentpini. Ambe engaksï pirenchicha újka kánikua jukaparhakuesti”.

17. ¿Andichisï jatsi para janhanharhini imani juramukuani enga Jeoba íntsaaka sánisï máteruechani?

¹⁷ Engaksï iámindu kúnguarhikuarhu anapuecha, tatakecha, nanakecha, orhejtsïkuticha ka familieri orhejtsïkuticha, kurhangujka ka janhanharhini imani juramukuani enga Jeoba íntsaaka sánisï máteruechani, iámu kúnguarhikua sési jarhasïndi. Ka enga sánderu jukaparhakueka kʼéri ambechi arhini jarhasïnga juchari Tátini auandarhu anapuni enga xáni xénchpitika, Jeobani (Sal. 150:6).