1, 2. ¿Ambe jorhenguarhispi orhejtsïkuti ma enga konseju ma íntskupka pirenchini ma?

 MÁRU uéxurhinisïstia engaksï tsimani orhejtsïkuticha nípka pʼorhembini pirenchini ma enga ióni páni japkia enga no nireenga tánguarhikuecharhu. Ma orhejtsïkuti, uánikua karakatechani arhikuantaspti engaksï tánguarhikuecheri ambe uandajka. Ima orhejtsïkuti eratsespti eskaksï uinhaperantaspkia pirenchini, peru engaksï níntani japkia, pirenchi arhiaspti: “Chájtsï no sáni míteska ambe engani nitamakuarhini jaka”. Erachichaksï konseju íntskuspti pirenchini peruksï no kurhamarhispti ambe jimbo nitamakuarhixapi. Ísï jimbo, pirenchi no exespti eskaksï jarhuataspka.

² Ima orhejtsïkuti enga arhikuantapka tekstuechani, uandantasïndi: “Engajtsïni ísï arhipka, ji eratsespka eskajtsïni no janhanharhixapka. Peru engani eratsentapka, kuenta íntskukuarhespka eska enbesi de xáni uánikua tekstuechani arhikuantani, sánderu sésipiringa kurhamarhini: ‘¿Nájtsï jarhaski?’ ‘¿Nájtsï pʼikuarheraxaki?’ ‘¿Nénaksïni uaa jarhuatani?’”. I orhejtsïkuti ambakiti ambe jorhenguarhispti ka iásï úsïndi jarhuataani máteruechani jimboka kurhangutspisïnga.

3. ¿Neechaksï uaa konseju íntspiani kúnguarhikuarhu?

 ³ Orhejtsïkutichaksï jatsisti para konseju íntskuani imeechani engaksï uétarhinchajka. Peru ménichani, kúnguarhikuarhu anapu erachichaksï jatsiati para konseju íntskuni máteru nemani. Pori ejemplu, jamberi nema uaati konseju ma íntskuni amiguni ma Biblia jingoni (Sal. 141:5; Prov. 25:12). O ménichani pirenchi ma enga jatirikia uaati konseju ma íntskuni máteru pirenchini enga sánderu sapichku jaka ima ambeeri enga Titu 2:3-5 jimbo uandajka. Ka taatichaksï mémindu jatsisïndi para konseju íntskuani jarhani ka jurhimberantaani imeecheri  uájpeechani. Ísï jimbo, nájkiruka i jorhenguarhikua úkata jaka para orhejtsïkuticha, iáminduechachi uaaka jorhenguarhini néna íntspiani ambakiti konsejuechani ka engaksï uinhaperpintaaka, engaksï sési pʼikuastantajka mintsitani (Prov. 27:9).

4. ¿Náki kurhamarhikuechanchi mókuantani jaua ini jorhenguarhikuarhu?

⁴ Ini jorhenguarhikua jimbo, mókuantanchi jauaka arini kurhamarhikuechani engajtsïni jarhuataaka ambakiti konsejuechani íntspiani: ¿ambe jimbochi íntspiasïni konsejuechani?, ¿meru uétarhisïni?, ¿né jatsiski para konseju íntspini? ka ¿nénachi uaa ambakiti konsejuechani íntspiani?

5. ¿Andisï sánderu fásili eska nema jiókuarhiaka konseju ma enga uékperakua jingoni intsïnhaaka? (1 Korintu 13: 4, 7).

⁵ Orhejtsïkutichaksï kánikua xénchaasïndi erachichani, jimboksïsï ménichani jatsijti para konseju íntskuni nemani enga no káni sési jámani jarhajka (Gal. 6:1). Enga orhejtsïkuti ma konseju íntskuaka máteru nemani, jatsipirindi para eratsentani máru ambe enga apostoli Pablu uandapka xénchperakueri ambe: “Ima enga uékpijka, tekaantasïndi ka sési útspini. [...] Iámindu ambe tekaantasïndi, iámindu ambakiti ambe jakajkusïndi, méntkisï ambakiti ambejku erokasïndi, ka iámindu ambe jimbo uinhapikuarhisïndi para úni tekaantani” (arhinta je 1 Korintu 13:4, 7). Enga orhejtsïkuti eratseantauaka ini bersikuluechani, jarhuataati para exeni sini uékperakua jimboeski enga íntspiaka konsejuni. Sánderu fásilisti eska nema jiókuarhiaka konsejuni ma enga exeska eska ima enga íntskujka konsejuni, uandanhiasïnga imani jimbo (Rom. 12:10).

6. ¿Náki ambakiti ejemplujtsïni jurajkucheski Pablu engachi konseju ma íntspiaka?

⁶ Apostoli Pablu, ambakiti ejemplu máesti para orhejtsïkuticha. Jiáni enga uétarhipka, konseju íntsaaspti Tesalonika anapu erachichani. Peru orheta, imeeri kartecharhu sési ambe arhiaspti imani ánchikuarhita jimbo engaksï úni japka ka jimbokaksï tekaantskua jingoni ísï úxapka. Ístu eratsentaspti na engaksï nitamakuarhini japka ka arhiaspti eska mítespka eskaksï no sési nitamakuarhixapka ka eskaksï no sési kánhaxapka (1 Tes. 1:3; 2 Tes. 1:4). Ka ístu arhiaspti eskaksï ambakiti ejemplu máespka para máteru erachicha (1 Tes. 1:8, 9). ¡Kánikuaksï sési pʼikuarherapti enga Pablu xáni ambakiti ambe arhiapka! Seguruksï jarhaspti eska Pablu kánikua xénchaasïreenga. Ísï jimbo, konsejuecha enga Pablu íntskuapka imani tsimani kartecha jimbo enga karakuapka, kánikua jarhuataaspti (1 Tes. 4:1, 3-5, 11; 2 Tes. 3:11, 12).

7. ¿Andisï nema úpirini no jiókuarhini konseju ma?

⁷ Engachi no xénchperakua jimbo íntspiaka konseju ma, úpirindi úkuarhini ambe enga uandapka orhejtsïkuti ma: “Máruksï no jiókuarhisïndi konseju ma, no jimboka konseju no sési jauaka, sino jimbokaksï no uékperakua jimbo intsïnhaska”. ¿Ambechi uaa jorhenguarhini? Eska sánderu fásiliska jiókuarhiani konsejuechani engaksï xénchperakua jimboejka ka no ikiatapu jimbo.

8. ¿Ambe jatsipirini para eratsentani orhejtsïkuti ma ante de nemani konseju ma íntskuni?

⁸ Orhejtsïkutichaksï no jatsisti para sóntku konseju íntskuni nemani. Ante de orhejtsïkuti ma konseju íntskuni nemani, jatsipirindi para eratsentani: “¿Meru uétarhisïni eskani arhiaka ambe ma? ¿Seguru jarhaski eska ima no sési úxaka ambe ma? ¿No úxaki ambe ma enga Biblia arhijka o solu úxaki ambe ma engani ji no úpiringa?”. Orhejtsïkuti ma enga jánhastika, no sóntku uandasïndi ambe ma (Prov. 29:20). Enga no seguru jauaka, uaati máteru  orhejtsïkuti jingoni uandontskuarheni paraksï exeni sini ima erachi meru úxaki ambe ma enga Biblia no jorhentpijka (2 Tim. 3:16, 17).

9. ¿Nénaksï uaa orhejtsïkuticha májkueni úni eska Pablu engaksï konseju íntspiaka xukuparhakueri ambe? (1 Timoteo 2:9, 10).

⁹ Ju je exeni ejemplu ma. Ju je eranhaskani eska orhejtsïkuti ma uandanhiasïnga na enga mórhekuarhijka erachi ma. Úpirindi eratsentani: “¿Úxaki ambe ma enga Biblia uandajka eska no sési jarhaska?”. Jimboka no uékasïnga úni ambe enga ima eratsejka, úpirindi kurhamarhini máteru orhejtsïkutini o máteru erachini enga sési marhuakuni jaka Tata Diosïni. Uaatiksï májku kʼéri exeni ambe enga uandapka Pablu xukuparhakueri ambe (arhinta je 1 Timoteo 2:9, 10). Pablu no meru uandaspti ambe engachi uaaka úni ka ambe nómbe. Sánderu sési, íntspiaspti máru konsejuechani engajtsïni jarhuatajka parachi sési xukuparhani, kaxumbikua jingoni ka ambakiti eratsekua jingoni. Ima mítespti eskaksï kristianuecha úpiringa erakuni néna xukuparhani joperu eska terukuntapiringa imani ambe jingoni enga Biblia uandajka. Ante de konseju íntskuni nemani, orhejtsïkutichaksï jatsisti para exeni sini ima erachi o pirenchi kaxumbikua ka ambakiti eratsekua jingoni jámasïnga.

10. ¿Ambechi jatsiski para miáni ima ambeeri engaksï máteruecha erakuaka úni?

¹⁰ Jatsiskachi para miáni eskaksï tsimani erachicha engaksï sési marhuakuni jaka Tata Diosïni, uaakaksï táchani jásï erakuni ambe ma. Peru inde ambe no arhikuekasïndi eska ma sési jarhaska ka máteru nómbe. Ísï jimbo, nóchi jatsiska para arhiani máteruechani ambe engachi jucha eratsejka eska sési jarhaska ka ambe nómbe (Rom. 14:10).

11, 12. Enga uétarhiaka konseju ma íntspini, ¿ambe jatsiski para eratsentani orhejtsïkuti ma, ka andi?

¹¹ Ka enga jaka ambe ma enga jimbo nema uétarhinchani jaka konseju ma, ¿né jatsipirini para íntskuni? Pori ejemplu, ante de konseju íntskuni pirenchini ma enga uambuchatini jaka o sapini ma, orhejtsïkuti orheta jatsipirindi para uandontskuarheni indeeri ambe pirenchiri uámba jingoni o sapiiri taati jémba jingoni. Jamberi ima sánderu sési exeati ima íntskuni konsejuni o jima jarhani enga orhejtsïkuti konseju íntskuaka. * O enga uétarhiaka konseju ma íntskuni pirenchini ma enga sánderu sapichku jaka, jamberi sánderu sési jauati eska pirenchi ma enga jatiriikia íntskuaka konsejuni isï eskachi na exeka  párrafu 3 jimbo.

¹² Orhejtsïkuti ístu jatsipirindi para eratsentani ini ambe: “¿Sési jarhaski eskani ji íntskuaka konsejuni o sánderu sési jaua eska máteru nema íntskuaka?”. Pori ejemplu, nema enga ísï pʼikuarherajka enajki no ma ambe újka sési úni, sánderu sési jauati eska orhejtsïkuti ma enga sáno májkueni ambe pʼikuarherenga íntskuaka  konsejuni jimboka sánderu sési kurhangukuaka. Ísïisti, iámindu orhejtsïkutichaksï jatsisti para pʼímarhiani erachichani parakaksï ísï jámaaka eska Biblia na uandajka. Enga nema uétarhinchani jaka konseju intsïnhani para jurhimberanhantani, kánikua jukaparhakuesti eska intsïnhaaka.

13, 14. ¿Andisï xáni jukaparhakue eskaksï orhejtsïkuticha jingontku kurhajchauaka erachichani?

¹³ Jingontku kurhajcha je. Enga orhejtsïkuti ma prepararikuarhini jauaka para konseju íntspini, jatsipirindi para kurhamarhikuarhini: “¿Meruni míteski ambe enga nitamakuarhini jaka erachi? ¿Míteski na enga pʼikuarherani jaka? ¿Nitamakuarhixaki ambe ma engani ji no míteka? ¿Ambe meru uétarhinchani jaki?”.

¹⁴ Ambe enga uandajka Santiagu 1:19 kánikua marhuakuasïndi imeechani engaksï konseju íntspijka. Santiagu karaspti: “Jorhenguarhi je iáminduecha sóntku kurhandini peru ióndantsï mókukuarhini ka ístu ióndantsï ikiani”. Orhejtsïkuti ma no jatsipirindi para eratseni eska iámindu ambe míteska ambe enga jimbo nitamakuarhini jaka erachi enga konsejuni íntskuaka. Proverbios 18:13 miátantasïndijtsïni: “Enga nema mókuntajka ante de kurhaani ambe ma, inde ambe tontuesti ka kʼuratsekua ma”. Sánderu sésisti kurhamarhini kʼuiripuni ambe enga jimbo nitamakuarhini jaka, ka parachi míteni, jatsiskachi para kurhajchani ante de arhini ambe ma. Inde ambe jorhenguarhispti orhejtsïkuti engachi uénakuarhu uandaka. Kuenta íntskukuarhespti eska enbesi de orheta arhikuantani karakatechani enga jingoni prepararikuarhipka, sánderu sési japirindi kurhamarhini “¿nájtsï jarhaski?”, “¿nájtsï pʼikuarheraxaki?”, “¿nénaksïni uaa jarhuatani?”. Engaksï orhejtsïkuticha jánguarhintaaka míteni ambe engaksï nitamakuarhini jaka erachicha, sánderuksï uaati jarhuataani ka sési pʼikuastantaani.

15. ¿Nénaksï uaa orhejtsïkuticha úni ambe enga arhijka Proverbios 27:23?

¹⁵ Sési mítea je erachichani. Eskachi na exekia, parachi úni ambakiti konseju ma íntskuni nemani, no solu uétarhisïndi uánikua tekstuechani arhikuantani ka máru konsejuechani íntsaani. Erachichaksï jatsisti para exeni eskachi uandanhiasïnga imeechani jimbo, eskachi kurhangukuasïnga ka eskachi uékasïnga jarhuataani (arhinta je Proverbios 27:23). Orhejtsïkutichaksï jatsisti paraksï ambakiti amigu úkuarhini erachicheri ka pirenchicheri.

16. ¿Ambeksï jatsiski para úni orhejtsïkuticha parakaksï imeecha engaksï íntsauaka konseju ma jiókuarhiaka?

¹⁶ Orhejtsïkutichaksï no jatsisti paraksï úni eskaksï erachicha eratseaka eskaksï jiántkusï uandontskuarhejka imeechani jingoni engaksï konseju ma uéjka íntsaani. Sánderu sési, jatsistiksï para uandontskuarheni imeecha jingoni ka pendienti jarhani imeechani jimbo jiáni engaksï no sési nitamakuarhini jauaka. Erachi ma enga ióni páni jakaia orhejtsïkutini, uandasïndi eska engaksï úska ini ambe, niáraakaksï amigu úkuarhini erachicha jingoni. Ka ístu ­uandasïndi: ­“Sánderu fásilisïndi konseju ma íntsaani jiáni enga uétarhijka”. Ka ístu sánderu fásilisïndi eska ima enga konseju ma intsïnhaaka jiókuarhika.

17. ¿Káni sánderu uétarhisïni eskaksï orhejtsïkuticha tekaantstiuaka ka xénchperakua xarhatani?

 ¹⁷ Tekaantskua ka xénchperakua xarhata je. Kánikua jukaparhakuesti tekaantstini ka xénchperakua xarhatani enga nema ueenakuarhu no jiókuarhiska konseju ma enga Bibliarhu pʼitakata jauaka o enga ióndaska úni ambe enga arhinhajka. Orhejtsïkutichaksï no jatsisti para ikiani engaksï erachicha ísï uaaka. Bibliarhu i ambe uandasïndi Jesúsiri ambe: “Ima no kuarhakuati pʼatamu tasakukatani, [o enga sánisï kuarhakurhitini jakaia] ka nijtu pátani kandelani enga sánisterku tʼinharani jauaka” (Mat. 12:20). Orhejtsïkutichaksï jatsisti para májkueni úni eska Jesúsi. Ísï jimbo, orhejtsïkuti ma uaati kómarhini Tata Diosï Jeobani eska jarhuataaka kʼuiripuni kurhanguni andisï uétarhinchajki konsejuni ka eska uaaka ambe enga arhinhaaka. Jamberi ima kʼuiripu tiempu uétarhinchaati para eratsentani ambe enga arhinhaka. Enga orhejtsïkuti tekaantstiuaka ka xénchperakua xarhatani, kʼuiripu jiókuarhiati konsejuni ka no eratsentani pakaraati na engaksï íntskuka konsejuni. Ísïisti, méntkisï konseju ma jatsisti para Tata Diosïri Karakatarhu pʼitakata jarhani.

18. a) ¿Ambechi jatsiski para miáni engachi konseju ma íntspiaka? b) Eska na xarharajka imajenirhu ka rekuadrurhu, ¿ambeksï jatsiski para orheta exeni taaticha antesi deksï konseju ma íntskuni imeecheri uájpani ma?

¹⁸ Jorhenguarhi je ima ambeeri engajtsï no sési úka. Iáminduechachi niárasïnga no sési úni ambe ma, nóchi uaaka iámindu ambe úni engachi xáni jorhenguarhikia ini jorhenguarhikua jimbo (Sant. 3:2). Niáraakachi no sési úni ambe ma, joperuchi jatsiska para jorhenguarhini inde ambeeri. Engaksï erachicha exeska eskachi xénchaasïnga, uaatijtsïni puáchentani engachi úska o uandaska ambe ma enga no sési pʼikuastauaka. (Ístu exe je rekuadruni “ Jukaparhakua ambe para taaticha”).

19. ¿Nénachi uaa sési pʼikuastantaani erachichani?

¹⁹ Eskachi na exekia, no fásilisti ambakiti konsejuechani íntspiani. Iáminduechachi imperfektueska,  imeecha engaksï íntspiajka konsejuechani ka ístu imeecha engaksï intsïnhajka. Ísï jimbo, ju je miántani ambe engachi xáni jorhenguarhikia ini jorhenguarhikua jimbo. Engachi nemani konseju ma íntskuaka, ju je uékperakua jimbo ísï úni. Ístu, jatsiskachi para exeni sini meru uétarhinchaxaki konseju ma ka né jatsiski para íntskuni. Ju je kurhamarhikuechani úkuani ka jingontku kurhajchani parachi míteni ambe enga jimbo nitamakuarhini jaka. Ka ju je jánguarhintani kurhangukuani, xénchperakua jingoni kaani erachichani ka imeecheri amigu úkuarhini. Ju je miáni eska ambe engachi uéjka, jindeeska ambakiti konsejuechani íntspiani ka eskaksï sési pʼikuastpentaaka (Prov. 27:9).