1. ¿Andichisï míte eska Jesúsi jukaparharasïreenga Tata Diosïiri Karakatani?

 ¿MÉNISÏCHI eratsentaski na enga xáni ambakiti ambeepka kurhaani enga Jesúsi jorhentpini jarheenga? Ima mémindu memoria jimbo uandasïreendi ambe enga Tata Diosïiri Karaka arhijka. Ka ambe enga uandapka ísï tátsekua enga na itsï atakuarhipkia ka ante de uarhini xarhatasïndi eska i ambe ísïiska (Deut. 8:3; Sal. 31:5; Luk. 4:4; 23:46). b Ka tanimu uéxurhini ka terujkani enga aianhpini jámapka Jesúsi mémindu arhintasïreendi Tata Diosïiri Karakatani, uandaspti ambe enga arhienga ka aianguasïreendi máteruechani ambe enga arhikuekeenga (Mat. 5:17, 18, 21; 5:22, TNM; Mat. 5:27, 28; Luk. 4:16-20).

2. Enga Jesúsi na kʼépani japka, ¿ambe jarhuataspi para sési míteni Tata Diosïiri Karakatani? (Exe je dibujuni enga ueenakuarhu jaka i rebistarhu).

² Asta ante de Jesúsi ueenani aianhpini pʼindespti arhintani Tata Diosïiri Karakatani ka kurhajchaani máteruechani engaksï arhintani jarheenga ka engaksï indeeri ambe uandani jarheenga. Seguru eska ima kurhajchasïreenga Maríani ka Joséni úrani Tata Diosïiri Karakatani engaksï uandontskuarheni jarheenga familia jingoni (Deut. 6:6, 7). c Seguruchi jarhaska eska Jesúsi mándani sábadu nirasïreenga sinagogarhu imeeri familia jingoni ka eska kánikua jingontku kurhaasïreenga enga arhinhantani jarheenga Tata Diosïiri Karakata (Luk. 4:16). Ka tiempu jingoni, ima jandiajku ueenaspti arhiantani karakateechani. Indeni ambe jimbo, no solu niáraspti míteni ambe enga Tata Diosïiri Karakata uandeenga, ístu niáraspti tsitini  ambe enga jima uandeenga ka jurajkuspti eska inde ambe jarhuatapiringa. Ejemplu ma enga xarhatajka eska i ambe ísïiska jindeesti ima ambe enga úkuarhipka enga ima 12 uéxurhintku jatiripka. Jorhentpiriicha engaksï sési mítekupka Moisésiiri Leini, ískuksï pakaraspti “enga ima xáni mítekupka ka enga xáni jurhimbitku mókukuarhienga” (Luk. 2:46, 47, 52).

3. ¿Ambechi exeni jaua ini jorhenguarhikua jimbo?

³ Juchajtuchi uaaka niárani míteni ka tsitini ambe enga Tata Diosïiri Karakata arhijka engachi mémindu arhintaaka. ¿Peru ambechi uaa úni parajtsïni marhuacheni ambe engachi Bibliarhu arhintaaka? Parachi úni míteni, exeakachi ambe enga Jesúsi arhiapka imeechani engaksï sési mítepka Leiiri ambe, komu karariichani, fariseuechani ka saduseuechani. Nájkirukaksï i relijioniiri orhejtsïkutiicha pʼindepka Tata Diosïiri Karakatani arhintani, nóksï marhuanchasïreendi. Jesúsi tanimu ambe uandaspti engaksï imeecha jatsipka para úni, paraka marhuakuapiringa ima ambe engaksï arhinteenga. Ka ambe enga Jesúsi uandapka jarhuataatijtsïni parachi 1) sánderu sési kurhanguni ambe engachi arhintajka, 2) jukaparhakua ambe exentani engajtsïni marhuacheaka ka 3) jurajkuni eskajtsïni Tata Diosïiri Karakata mójtakuaka.

4. ¿Ambejtsïni jorhendasïni Lukasʌ 10:25-29 na engachi jatsika para Bibliani arhintani?

⁴ Uékasïngachi kurhanguni ambe engachi Bibliarhu arhintajka, jimboka engachi no ísï úska, ambe engachi arhintaaka nójtsïni marhuacheati. Ju je eratsentani ambe enga Jesúsi arhipka “Leiiri jorhentpirini” ma (arhinta je Lukasʌ 10:25-29). Ima achamasï uékasïreendi míteni ambe enga jatsipka para úni para tsípikua jatsini para méntkisï. Ka para úni mókukuntani, Jesúsi úspti eska eratsentapiringa Tata Diosïiri Karakatani. Arhispti: “¿Ambe karakata jarhaski libru Leiiri jimbo? ¿Ambeeri arhintasïni?”. Ima acheeti sési mókukuntaspti. Ka úraparini ambe enga Tata Diosïiri Karakata arhijka uandaspti eska jatsispka para xénchani Tata Diosïni ka ístu máteruechani (Lev. 19:18; Deut. 6:5). Peru tátsekua kurhamarhispti Jesúsini: “¿Andi neeski juchiiti besinu [o prójimu]?”. Enga ísï uandapka, xarhataspti eska sési jimbo no kurhangusïreenga ambe enga arhinteenga. Ka indeni ambe jimbo no mítespti néna úni ambe enga arhintapka.

5. Kómarhini Tata Diosïni ka iatsitakuarhu arhintani, ¿andijtsïnisï jarhuatajki parachi sánderu sési kurhanguni ambe enga Biblia arhijka?

⁵ Jarhasti máru ambe engajtsïni jarhuataaka sánderu sési kurhanguni Tata Diosïiri Uandakuani. Orheta, jatsiskachi para kómarhini Tata Diosïni ante de ueenani arhintani. Engajtsïni Tata Diosï Jeoba no jarhuataaka, nóchi uaaka kurhanguni ambe enga Biblia arhijka, ísï jimbochisï kurhakujka eskajtsïni íntskuaka imeeri espiritu santu parachi no máteru ambe eratseni jarhani engachi arhintani jauaka. Tátsekua, ju je ueenani arhintani peru iatsitakuarhu parachi úni kurhanguni ambe engachi arhintani jauaka. Ístujtsïni uaati jarhuatani bosi alta jimbo arhintani o Biblieri grabasioniichani kurhauani engachi jamberi arhintani jauaka. Inde ambejtsïni jarhuataati parachi eranhaskani ambe engachi arhintani jaka ka ísïchi no sóntku mirikurhiaka ambe engachi arhintaaka ka mintsitarhujtsïni niáracheati (Jos. 1:8). Engachi kʼamaraakia arhintani, ju je ménderu kómarhini Tata Diosï Jeobani parachi grasiasi íntskuntani imeeri Karakata jimbo ka ju je kurhakuni eskajtsïni jarhuataaka ísï úni eskachi na arhintakia.

6. Kurhamarhikuechani úkuarhiani ka karani máru ambe, ¿nénajtsïni marhuachea engachi Bibliani arhintani jauaka? (Ístu exea je imajeniichani).

⁶ ¿Ambe máteru ambejtsïni jarhuataa sánderu sési kurhanguni engachi Bibliani arhintani jauaka? Kurhamarhikuechani úkuarhiani. Pori ejemplu, ¿neecheri uandaxaki?, ¿né uandaxaki?, ¿néni uandontskuarhekuxaki ka andi?, ¿nani ka káni  ísï úkuarhiski? I kurhamarhikuechajtsïni jarhuataati eratsentani ka míteni ambe enga sánderu jukaparhakueka ima ambeeri engachi arhintani jauaka. Ístuchi uaaka karani máru ambe. Ísï úni, jarhuataatijtsïni sési kurhanguni ambe engachi arhintaaka. Ka ísïchi uaaka eratsentani indeni ambe, sánderu sési kurhanguni ka no mirikurhini. ¿Ambechi úpirini karani? Imani kurhamarhikuechani engachi úkuarhiaka, ambe engachi inbestigariika, ima ambe enga sánderu jukaparhakueka, nénachi uaa úrani ambe engachi arhintaka o na engajtsïni pʼikuastaka. Engachi ini ambe úska engachi Bibliani arhintani jauaka, ísïchi pʼikuarheraaka enajkijtsïni Tata Diosï Jeoba meru juchantsïni uandontskuarhechini jaki.

7. ¿Ambechi uétarhinchasïni engachi Bibliani arhintani jauaka, ka andi? (Mateu 24:15).

⁷ Jesúsi uandaspti eskachi uétarhinchasïnga jánhastiini parachi úni kurhanguni ambe enga Biblia arhijka (arhinta je Mateu 24:15). ¿Ambe arhikuekasïni jánhastiini? Kʼuiripu ma enga jánhastiijka úsïndi exeni néna terukuntasïni Biblieri bersikulu ma máteru bersikulu jingoni ka néna jimboksï no májkueniiski. Ístu úsïndi kurhanguni andisï ísï úkuarhijki ambe ma. Ísï jimbo, ísï eska Jesúsi na uandapka, jánhastiini jarhuataatijtsïni parachi exeni eska máru ambe enga úkuarhini jaka, xarhatasïnga eskaksï kumplirikuarhixaka Biblieri profesiecha. Ístu, jánhastiini jarhuatasïndijtsïni parajtsïni marhuacheni iámindu ambe engachi Bibliarhu arhintaaka.

8. ¿Ambejtsïni jarhuataa sési kurhanguni ambe engachi arhintaaka?

⁸ Tata Diosï Jeobasï újti eskaksï imeeri marhuariicha jánhastiuaka. Ísï jimbochisï jatsika para imani kómarhini ka kurhakuni eskajtsïni jarhuataaka sánderu jánhastiini (Prov. 2:6). Peru ístu uétarhisïndi eskachi máteru ambe uaaka, jatsiskachi para sési jorhenguarhini ambe engachi arhintaaka ka exeni néna terukuntasïni ima ambe engachi arhintani jaka imani ambe jingoni engachi mítekia. Ka uánikua Biblieri publikasionichaksï jarhasti engajtsïni jarhuataaka ísï úni, komu Jarhuajperata paraksï Jeobaeri testiguecha estudiarini. Engachi úraaska ini publikasionichani, uaakachi kurhanguni ambe engachi Bibliarhu arhintaaka ka uaakachi  exeni ambe engachi uaaka para ísï úni eskachi na jorhenguarhiaka (Ebr. 5:14). Engachi eratsentaska ambe engachi arhintaaka sánhani arhiakachi sánderu sési kurhanguni Tata Diosïiri Uandakuani.

9. ¿Ambeksï no jakajkusïreeni saduseuecha enga kánikua jukaparhakueka?

⁹ Nájkirukaksï saduseuecha sési míteapka orheta sinko libruecha Karakata Ebreaecheeri, nóksï jakajkusïreendi jurhimbikua ambe engaksï indeni libruecha jimbo jaka engaksï Tata Diosïni jimboeka. Pori ejemplu, eratsenta je ambe enga Jesúsi arhiapka saduseuechani engaksï imeecha tsíntskueri ambe kurhamarhipka. Jesúsi kurhamarhiaspti: “¿Nójtsï méni arhintaski Moisésiiri libruni jimbo na enga Diosï uandajpapka Moisésini sïtunirhu ka arhini: ‘Ji jindeeska Diosï Abraániiri ka Diosï Isaakiiri ka Diosï Jakobueri’?” (Mar. 12:18, 26). Seguru eskaksï saduseuecha uánikua xanhari arhintapkia indeni ambe, peru ambe enga Jesúsi kurhamarhiapka xarhataspti eskaksï no jakajkusïreenga jurhimbikua ambe enga Biblia jorhentpijka tsíntskueri ambe (Mar. 12:27; Luk. 20:38). d

10. ¿Ambe ka ambechi jatsiski para exeni engachi Bibliani arhintani jauaka?

¹⁰ ¿Ambechi uaa jorhenguarhini ima ambeeri enga Jesúsi arhiapka saduseuechani? Eska engachi Bibliani arhintaaka, jatsiskachi para exeni ambe engachi uaaka jorhenguarhini Biblieri bersikulueri ma o istorieri ma. Nóchi solu uékasïnga kurhanguni ima ambe enga fásiliika sino ístu jukaparhakua ambe jorhenguarhini ka prinsipiuechani engaksï Bibliarhu jískakata jaka.

11. Ísï eska na uandajka 2 Timoteo 3:16, 17, TNM, ¿nénachi uaa jirinhantani jukaparhakua ambe engachi Bibliani arhintani jauaka?

¹¹ ¿Nénachi uaa exentani jukaparhakua ambe enga Bibliarhu jaka? Ju je exeni ambe enga arhijka 2 Timoteo 3:16, 17, TNM (arhinta je). Jimini uandasïndi eska “ambe enga xáni karakata jaka […] marhuasïnga” para tʼámu ambe: para jorhentpini, para exerani kʼuiripuechani ambe engaksï no sési úni jaka, para sési peentaani iámindu ambe ka para jorhendaani kʼuiripuechani ambakiti ambe úni. Asta ima Biblieri libruecha engaksï no xáni úrakuarhejka marhuasïndiksï para ini ambe úni. Engachi Bibliani arhintani jauaka, ju je jánguarhintani exeni ambejtsïni jorhendasïni Tata Diosï Jeobaeri ambe, ima ambeeri enga uéjka úni o imeeri prinsipiuecheeri ambe. Ka parajtsïni Biblieri bersikuluecha exerani ambe engachi no sési úni jaka, jatsiskachi para exeni ambe engajtsïni jarhuataaka no úni nijtu tsitini imani ambe enga no sési jaka ka parachi no jurajkuni Tata Diosï Jeobani. Ístu ju je eratsentani na engaksï máru bersikuluecha uaaka sési peentani ambe ma o jurhimberantani ambe ma engachi jucha eratsejka ka enga no sési jaka, jamberi jindeeti ambe ma engachi aianhpikuarhu arhinhaka. ¿Ka ambechi uaa úni parajtsïni Biblieri bersikuluecha jorhendani ambakiti ambe úni? Jatsiskachi para exeni na engajtsïni ima bersikuluecha jarhuataaka parachi májkueni eratseni eska Tata Diosï. Engachi úska ini tʼámu ambe engachi Bibliani arhintani jauaka, sánderuchi jukaparhakua ambe exentaaka ka sánderujtsïni marhuacheati.

12. ¿Andisï Jesúsi kurhamarhiapi fariseuechani sinksï no arhintaspi ambe enga uandeenga Tata Diosïiri Karakata?

¹² Fariseuechaksï arhintasïreendi Tata Diosïiri Uandakuani, joperu para máteruechani arhinchaani. Jesúsi xarhataspti eska i ambe ísïispka enga kurhamarhiapka sinksï no arhintaspi ambe enga uandeenga Tata Diosïiri Karakata (Mat. 12:1-7). e Ima xanhari, fariseuechaksï uandaspti eskaksï Jesúsiiri chúxapatiicha no kurhajchasïreenga sábadueri leini. Para úni mókukuantani, Jesúsi tsimani ejempluechani uandaaspti engaksï Tata Diosïiri Karakatarhu jaka ka ístu uandaspti Oseasiiri bersikulueri ma. Ísï, xarhataspti eskaksï fariseuecha no kurhangusïreenga andisï uaxastanhapi sábadueri lei ka eskaksï no pʼamojpesïreenga. Íksï acheetiicha arhintasïreendi Tata Diosïiri Karakatani, joperu no marhuakuasïreendi. ¿Andi? Jimbokaksï kʼéramakuarhisïreenga ka soluksï arhintasïreendi paraksï máteruechani arhinchaani. Indeni ambe jimbo, nóksï úsïreendi kurhanguni ambemindusï arhikuekeeni ambe engaksï arhinteenga (Mat. 23:23; Juanu 5:39, 40).

13. ¿Náki kualidadijtsïni jarhuataa engachi Bibliani arhintani jauaka, ka andi?

¹³ Jesúsiiri uandakuechajtsïni jorhendasïndi eska uétarhisïnga Bibliani arhintani parachi jorhenguarhini ambe ma. Ju je no májkueni úni eska fariseuecha. Sánderu sési, ju je kaxumbitiini ka jurajkuni eskajtsïni Tata Diosï Jeoba jorhendaaka. Ísï eska na uandajka Santiago 1:21, TNM, “kaxumbikua jingoni jurajkutakuarhi je eska Tata Diosïiri uandakua […] tsikiaka chaari mintsitarhu”. Engachi kaxumbitiiska jurajkuakachi eskajtsïni Tata Diosïiri Karakata mintsitarhu niáracheaka. Engachi Bibliani arhintani jauaka, ju je no kʼéramakuarhini ni eratseni jarhani ambe engaksï máteruecha no sési úni jaka. Engachi ísï úska jurajkunchi jauaka eskajtsïni mójtakuaka ambe enga Biblia arhijka pʼamojperakueri ambe ka uékperakueri ambe.

14. ¿Nénachi uaa míteni sinchi jurajkuxaki eskajtsïni Biblia mójtakuaka? (Ístu exea je imajeniichani).

 ¹⁴ Na engachi kaajka máteruechani xarhatasïndi sinchi jurajkuxaki eskajtsïni Biblia mójtakuaka. Fariseuechaksï no jurajkusïreendi eska Tata Diosïiri Uandakua mójtakuapiringa, ka indeni ambe jimbo kʼamanharhitantasïreendiksï imeechani engaksï no no sési ambe ueenga (Mat. 12:7). Ísï jimbo, ju je eratseni na engachi exeajka ka kaajka máteruechani. Pori ejemplu, ¿pʼindeskichi uandani ambe engaksï máteruecha sési újka, ochi sánderu imani ambe uandasïni ambe engaksï no sési újka? ¿Puákuantasïnchi máteruechani, ochi arhinchaasïni ka jatanhekuani? Ambe engachi mókuntaaka xarhataati sinchi jurajkuxaki eska Biblia mójtakuaka ambe engachi eratsejka, pʼikuarherani ka úni (1 Tim. 4:12, 15; Ebr. 4:12).

15. ¿Na exesïreeni Jesúsi Tata Diosïiri Karakatani?

¹⁵ Jesúsi kánikua tsitisïreendi ambe enga Tata Diosïiri Karakata uandajka. Ka Salmo 40:8 uandasïndi na enga xáni jukaparharapiringa Tata Diosïiri Karakatani, jimini arhisïndi: “Úni ambe engari tʼu uéjka, oh, juchiiti Tata Diosï, kʼéri tsípikuarhita máesti para ji, ka chiiti juramukuani juchiiti mintsitarhu pásïnga”. Jimboka Jesúsi kánikua tsitisïreenga ambe enga Tata Diosïiri Karakata uandajka, inde ambe jarhuataspti tsípikua jingoni irekani ka seguiriini marhuakuni Tata Diosï Jeobani. Juchajtuchi uaaka tsípikua jingoni irekani engachi jánguarhintaska arhintani Tata Diosïiri Karakatani ka tsitini ambe enga arhijka (Sal. 1:1-3).

16. ¿Ambe ka ambejtsï uaa úni paraksïni sánderu marhuacheni ambe engajtsï Bibliarhu arhintaaka? (Exe je rekuadruni “ Jesúsiiri uandakuechajtsïni jarhuatasïndi kurhanguni ambe engachi arhintajka”).

¹⁶ Jesúsiiri uandakuecha ka imeeri ejemplu, úsïndi eskachi sánderu sési arhintaaka ka jorhenguarhini Tata Diosïiri Karakatani. Parachi úni sánderu sési kurhanguni ambe engachi arhintaaka, ju je kómarhini Tata Diosï Jeobani, iatsitakuarhu arhintani, kurhamarhikuechani úkuarhiani ka ju je karani máru ambe. Para jánhaskani ambe engachi arhintani jauaka, ju je sési kurhanguni ambe engachi arhintani jauaka ka ístu ju je sánderu informasioni jirinhantani juchaari publikasionicharhu. Ka parachi sánderu sési míteni Tata Diosïiri Karakatani, ju je jirinhantani jukaparhakua ambe asta imani bersikuluecharhu engaksï no kánikua úrakuarhejka. Ka parachi jurajkuni eskajtsïni Tata Diosïiri Uandakua mójtakuaka, ju je méntkisï arhintani parachi jorhenguarhini ambe ma. Engachi iámindu ini ambe úska, sánderujtsïni marhuacheati ambe engachi Bibliarhu arhintaaka ka sánderuchi andarhieraaka Tata Diosï Jeobani (Sal. 119:17, 18; Sant. 4:8).