1. ¿Andijtsïsï chá agradesidu jaki engajtsï Bibliani jatsika?

 ¡KÁNIKUACHI agradesidu jarhaska Tata Diosï Jeoba jingoni engajtsïni íntskuka Bibliani! Jima, ima ambakiti konsejuechajtsïni íntskuasïndi engaksï kánikua marhuajka ka engajtsïni jarhuatajka míteni ambe úni engachi uandanhiateechani jatsiajka. Ístu, Tata Diosïjtsïni Bibliarhu arhisïndi eskachi ambakiti erokuarhikua ma jatsiska para sánderu orhepatini. Ka sánderu jukaparhakua ambe, xarhatachesïndijtsïni na enga jásïika ima. Eratseantani xáni sési járhati kualidadiichani enga Tata Diosï Jeoba jatsiaka, mintsitarhujtsïni niárachesïndi ka inde ambe úsïndi eskachi uékaaka sánderu andarhierani imani ka imeeri amigueni (Sal. 25:14).

2. ¿Ambe ka ambe úraski Tata Diosï Jeoba parachi úni míteni imeeri ambe?

² Tata Diosï Jeoba uékasïndi eskaksï kʼuiripuecha míteaka imani. Ióntki, ima tsánharhitaaspti kʼuiripuechani, jánhastaaspti ka asta ánjeliichani úraaspti parajtsïni aianguni imeeri ambe (Núm. 12:6; Uku. 10:3, 4). Peru nóchi úpiringa jorhenguarhini iámindu i ambe enga no karakata pakarapiringa. Ísï jimbo, Tata Diosï Jeoba arhiaspti achamasïichani máru eskaksï karapiringa “librurhu ma” ambe enga ima uékeenga eskachi mítepiringa (Jer. 30:2). Uaakachi seguru jarhani eska ima úska eska sési karakuarhipiringa i ambe engajtsïni kánikua marhuachejka, jimboka “Tata Diosï jurhimbitiiri xanharu perfektues[ka]” (Sal. 18:30).

3. ¿Ambe úski Tata Diosï Jeoba paraka Biblia asta iásï jamberi japiringa? (Isaías 40:8).

³ (Arhinta je Isaías 40:8). Iónisïistia enga Tata Diosïiri Uandakua úkia jarhuataani Tata Diosïiri marhuariichani. Peru ¿néna jimbo? I ambakiti kurhamarhikua máesti, jimboka ióniiskia enga Biblia karakuarhika indeni materialiicha jimbo engaksï sóntku ambendurhikuarhijka. Ka iásï no ma karakata jarhasti imeecheri engaksï orheta karanhapka. Joperu Tata Diosï Jeoba úspti eskaksï kopiechani uaapiringa ima primeru karakateecheri. Imeecha engaksï kopiechani  uaapka nóksï perfektuespti, peruksï kánikua jingontku úspti imeecheri ánchikuarhitani. Ka asta achamasï ma enga Karakata Ebreaecheeri ambe míteka uandaspti: “Uaakachi seguru jarhani eska no jarhaska máteru ióntki anapu libru ma enga xáni sési kopiarinhaka”. Ísï jimbo, nájkiruka ióniikia engaksï máru achamasïicha engaksï no perfektuepka Bibliani karaka ka imani materialiichani jingoni engaksï sóntku ambendurhikuarhijka, uaakachi seguru jarhani eska ambe engachi iásï arhintajka Bibliarhu, ima ambeeska enga Tata Diosï Jeoba eratsejka.

4. ¿Ambechi exeni jaua ini jorhenguarhikua jimbo?

⁴ “Iámindu ambakiti intsïmperakua ka ístu iámindu ambakiti ambe enga sésiika” Tata Diosï Jeoba jimboesti ka Biblia ambakiti regalu máesti engajtsïni Tata Diosï íntskuka (Sant. 1:17). Engajtsïni nema regalu ma íntskujka, uánikua ambejtsïni xarhatachesïndi imeeri ambe. Pori ejemplu, xarhatachesïndijtsïni eskajtsïni sési míteska ka eska míteska ambe engachi uétarhinchajka. Ka májkueniisti Biblia jingoni. Engachi arhintajka, kánikuachi jorhenguarhisïnga Tata Diosï Jeobaeri ambe. Ka kuentachi íntskukuarhesïnga eskajtsïni ima kánikua sési míteska ka eska míteska ambe engachi uétarhinchajka. Ini jorhenguarhikua jimbo, exeakachi ambe enga Biblia uandajka tanimu kualidadicheeri enga Tata Diosï Jeoba xarhataajka: imeeri jánhaskakua, na enga jurhimbikua jingoni kámpijka ka uékperakua. Ju je orheta exeni ambe enga Biblia uandajka Tata Diosïiri jánhaskakueri ambe.

5. ¿Biblia néna xarhatasïni Tata Diosïiri jánhaskakuani?

⁵ Tata Diosï Jeoba mítesti eskachi uétarhinchasïnga imeeri konsejuechani. Ísï jimbojtsïnisï íntskuti Bibliani, enga xarhatajka na enga xáni jánhastiika Tata Diosï ka imeeri konsejuecha kánikua marhuakuasïndi kʼuiripuechani. Ísï jimbo, Biblia úsïndi mójtakuni kʼuiripuecheri tsípikuani. Enga Moisési karapka orheta libru Biblieri, ini ambe arhiaspti israeliteechani engaksï Tata Diosïiri ireteepka: “Íksï uandakuecha no ísku ambeesti para chá, sinoksï chaari tsípikuanisï arhikuekajti” (Deut. 32:47). Ísï jimbo, imeecha engaksï kurhajchapiringa ambe engaksï uandeenga ima karakateecha, tsípikua jingonksï irekapirindi ka sési nikuapirindi (Sal. 1:2, 3). Nájkiruka ióniikia enga Biblia karanhaka, útasï jarhuataaxati kʼuiripuechani paraksï mójtakuni imeecheri tsípikuani. Pori ejemplu, partirhu “Biblia jarhuataasti mójtakuni irekua”, enga jw.org jimbo jaka, jukari 50 eksperiensiechaksï jarhasti kʼuiripuecheri engaksï úka mójtakuni imeecheri tsípikua ka sánderuksï sési irekania jimbokaksï ísï úska eskaksï Biblieri konsejuecha na uandajka (1 Tes. 2:13).

6. ¿Andichisï uandajki eska no jarhaska máteru libru enga ísïika eska Biblia?

⁶ No ma libru jarhasti enga ísïika eska Biblia. ¿Andi? Jimboka ima enga kararkuarhika, Tata Diosï Jeoba, iámindu ambe úsïnga úni, méntkisï jauati ka ima sánderu jánhastiisti eska náki uéjki kʼuiripu ma. Uánikua libruechaksï jarhasti engaksï kʼuiripuecha útasï arhiantani jarhajka nájkiruka ima enga kararkuarhika uarhiakia. Peru tiempu jingoni imeeri konsejuechaksï nóteru marhuasïndia. Joperu no ísï úkuarhisïndi Biblia jingoni, imeeri ambakiti konsejuechaksï méntkisï marhuasïndi ka jarhuatastia ióntki anapu ka iásï anapu kʼuiripuechani. Engachi arhintajka i Tata Diosïiri libruni ka eratsentani imeeri konsejuechani, Tata Diosï úrasïndi imeeri espiritu santuni parajtsïni jarhuatani ísï úni eskachi na jorhenguarhini jaka (Sal. 119:27; Mal. 3:16; Ebr. 4:12). Ísïisti, ima enga Bibliani kararkuarhika uékaxatiksïni mintsita jingoni jarhuatani. ¿A no eska i ambe úsïnga eskachi pʼindeaka Bibliani arhintani?

7. ¿Biblia néna jarhuataski ióntki Tata Diosïiri iretani paraksï májku k’éri jarhani?

⁷ Jarhasti máteru ambe enga xarhatajka eska Bibliarhu jarhaska Tata Diosïiri jánhaskakua ka jindeesti jimboka jarhuatasïnga imeeri iretani májku k’éri jarhani. Engaksï israeliteecha imani Echeri jimbo niárapka engaksï aiaminhapka, táchani lugaricha jimboksï pakaraspti irekani ka mámaru ambeksï ánchikuarhisïreendi, máruksï kurucha  pʼimatiispti, máteruechaksï animaliichani kaasïreendi ka máteruechaksï echerini ánchitaasïreendi. Ísï jimbo, ima israeliteecha engaksï irekapka ma parti paisirhu, úpirindiksï sóntku mirikurhiani máteruechani engaksï máteru parti jimbo irekapka. Peru Tata Diosï Jeoba úspti eskaksï iáminduecha someni tánguarhipiringa paraksï kurhaani imeeri Uandakuani ka paraksï sánderu ambe jorhenguarhini (Deut. 31:10-13; Neh. 8:2, 8, 18). Eranhaska je na enga xáni sési pʼikuarhereenga ambakiti israelita ma enga Jerusaléni nireenga ka uánikua israeliteecha jingoni exejperani engaksï ístu nireenga paraksï májku k’éri kómarhini Tata Diosï Jeobani. Ísï úparini, Tata Diosï Jeoba jarhuataaspti parakaksï májku k’éri japiringa. Ísï ióni jimbo, primeru siglurhu niáraspti jarhani kúnguarhikua kristiana ka jima mámaru jásï kʼuiripuechaksï jarhaspti, acheetiicha ka uarhiitiicha, máruksï jatsikuarherispti ka máteruecha nómbe, ístuksï táchani járhati idiomechani uandasïreendi. Peru jimbokaksï iáminduecha tsitisïreenga ambe enga uandeenga Tata Diosïiri Karakata, májku k’ériksï marhuakusïreendi Tata Diosï Jeobani. Ka imeecha engaksï apenasi ueeneenga tánguarhini, úsïreendiksï kurhanguni Tata Diosïiri Uandakuani jimbokaksï máteru kristianuecha jarhuataasïreenga ka jimbokaksï tánguarhisïreenga (Uku. 2:42; 8:30, 31).

8. ¿Iásï néna úrasïni Tata Diosï Jeoba Bibliani paraka imeeri ireta májku k’éri jauaka?

⁸ Iásïjtu, Tata Diosï Jeoba seguiriixati úrani Bibliani para jorhendani imeeri iretani ka para májku k’éri jarhani. Bibliarhu jarhasti iámindu ambe engachi uétarhinchajka para míteni Tata Diosïiri ambe. Ístu, kristianuechachi someni nirasïnga tánguarhikuecharhu ka k’éri tánguarhikuecharhu,  jimini Bibliani arhintasïngachi, jorhenguarhisïngachi Biblieri ambe ka niárasïngachi sánderu ambe míteni Biblieri ambe. Ísïisti, Tata Diosï Jeoba úrasïndi Bibliani parakaksï imeeri marhuariicha ‘májku k’éri marhuakuaka’ (Sof. 3:9).

9. ¿Náki kualidadinchi uétarhinchasïni parachi úni kurhanguni ambe enga Biblia uandajka? (Lukasʌ 10:21).

⁹ Ju je exeni máteru ambe enga xarhatajka eska Tata Diosï Jeoba kánikua jánhastiiska. Ima úspti eska uánikua Biblieri partiichaksï ísï karanhapiringa parakaksï ima kʼuiripuechajku engaksï kaxumbitiika úpiringa kurhanguni (arhinta je Lukasʌ 10:21). Biblia libru máesti engaksï iápurisï anapu kʼuiripuecha arhintajka. Acheeti ma enga Biblieri ambe mítekuka, uandaspti eska Biblia “no solu jindeeska libru ma engaksï kʼuiripuecha sánderu arhintajka, sino ístu eska jindeeska libru ma engaksï kʼuiripuecha sánderu sési jorhenguarhijka”. Peru solu kaxumbitiichajkuksïsï újti kurhanguni ka úni eska Biblia na arhijka (2 Kor. 3:15, 16).

10. ¿Ambe máteru ambe jimbochi úsïni exeni eska Biblia xarhatasïnga na enga xáni jánhastiika Tata Diosï Jeoba?

¹⁰ Ju je exeni máteru ambe enga jimbo Biblia xarhatajka Tata Diosï Jeobaeri jánhaskakuani. Ima úrasïndi Biblia no solu para uánikuechani jorhendaani, sino ístu parajtsïni mándani arhini jorhendani ka sési pʼikuastantani. Engachi arhintajka imeeri Uandakuani, exesïngachi eska Tata Diosï Jeoba uandanhiasïnga mándani juchantsïni jimbo (Is. 30:21). Seguru eska jiáni engachi uandanhiata ambe jatsipka, arhintaspkachi Biblieri tekstu ma engajtsïni kánikua jarhuatapka. Peru enga Biblia karanhaka para xáni uánikua kʼuiripuecha, ¿andisï ima ambe enga arhijka útasï marhuani jaki ka andisï újki jarhuatani mándani kʼuiripuni imani ambe jingoni enga nitamakuarhini jarhajka? Jimboka ima enga kararkuarhika Bibliani kánikua jánhastiiska (2 Tim. 3:16, 17).

11. Enga Biblia karanhapka, ¿néna xarhataspi Tata Diosï eska májkueni kaasïnga iáminduechani?

¹¹ Máteru kualidadi enga Tata Diosï Jeoba sánderu xarhatajka jindeesti jurhimbikua (Deut. 32:4). Nema enga jurhimbikua jingoni jámajka májkueni kaasïndi iáminduechani, ka Tata Diosï Jeoba ísï úsïndi (Uku. 10:34, 35; Rom. 2:11). Ka inde ambeksïsï xarhatajti ima idiomecha enga Tata Diosï erakuaka paraka Biblia karanhapiringa. Orheta 39 Biblieri libruecha sáno iáminduechaksï ebreu jimbo karanhaspti, idioma enga Tata Diosïiri ireta kurhanguenga imani tiempu jimbo. Peru imani tiempu jimbo engaksï ueenapka kristianuecha jarhani, uánikua kʼuiripuechaksï griegu uandasïreendi. Ísï jimbo, últimu 27 Biblieri libruechaksï griegu jimboksï karanhaspti. Tata Diosï Jeoba sési exespti eska imeeri Uandakua mámaru idiomeecha jimbo karanhapiringa. Ka ini jurhiatikuecha jimbo, sáno 8,000 miioni kʼuiripuechachi irekaska Echerirhu ka táchani járhati idiomechanchi uandasïnga. Nájkiruka ísïika, ¿néna jimbochi úsïni míteni iáminduecha Tata Diosï Jeobani?

12. ¿Néna ísï úkuarhixaki eska na uandajka Daniel 12:4 ini últimu jurhiatikuecha jimbo?

¹² Tata Diosï Jeoba profeta Danielini úraparini aiatspespti eska últimu jurhiatikuecha jimbo, “jurhimbikua ambe” ʻkánikua mítenhapiringaʼ, i ambe arhikuekasïndi eskaksï uánikua kʼuiripuecha kurhangupiringa ambe enga Biblia uandajka (arhinta je Daniel 12:4). Ma ambe enga újka eska i ambe ísï úkuarhiaka jindeesti eska Biblia ka Biblieri publikasionichaksï mámaru járhati idiomecha jimbo únhasïnga, tradusirinhani ka etsakunhani. Ka desde iónisïa, Biblia jindeesti enga sánderu tradusirinhajka ka etsakunhani. Uánikua Biblieri traduksionicha engaksï ataranhantajka, kánikuaksï jukaparhasti. Joperu Tata Diosï Jeobaeri ireta tradusirintastia Bibliani, iámu o ma parti, jukari 240 idiomecha jimbo ka iámindu kʼuiripuechaksï úsïndi jatsini Biblia ma no ma sentabu maiampiparini. Ini ambe jimbo, uánikua kʼuiripuecha engaksï táchanisï anapueka jiókuarhixatiksï “ambakiti aianhperakuani Diosïiri Juramukueri” ante de kʼamarani i tiempu (Mat. 24:14). Jeoba Tata Diosï máesti enga jurhimbikua jingoni kámpijka ka ima uékasïndi eskaksï iámindu kʼuiripuecha imani míteaka Bibliani arhintaparini. ¿Andisï ísï újki? Jimbokajtsïni kánikua xénchasïnga.

13. ¿Andichisï uandajki eska Biblia xarhatasïnga na enga xáni xénchpejka Tata Diosï? (Juanu 21:25).

¹³ Biblia ístu xarhatasïndi eska ima enga kararkuarhika Bibliani kánikua xénchpesïnga (1 Juanu 4:8). Ju je eratsentani ambe ka ambe kararkuarhiski Tata Diosï Bibliarhu ka ambe nómbe. Imajtsïni aiangusti ambe engachi uétarhinchajka parachi úni imeeri amigueni, parachi sési irekani ka parachi irekani para méntkisï. Peru jimbokajtsïni Tata Diosï Jeoba xáni xénchasïnga, nójtsïni aiangusti imani ambe engachi no uétarhinchajka (arhinta je Juanu 21:25).

14. ¿Ístu Biblia néna xarhatasïni na engajtsïni xáni xénchajka Tata Diosï?

¹⁴ Ístu Tata Diosï Jeobajtsïni xarhatachesïndi eskajtsïni xénchasïnga engajtsïni no uánikua leiichani íntskuaka parajtsïni arhini ambe engachi jatsika para úni ka ambe nómbe. Sánderu sési, úrasïndi kʼuiripuecheri ejempluechani, ambakiti profesiechani ka ambakiti konsejuechani parajtsïni jarhuatani ambakiti ambe erakuni úni. Ini ambe jimbo, Biblia úsïndi eskachi xénchaaka Tata Diosïni ka eskachi mintsita jingoni kurhajchaaka.

15. a) ¿Néna xarhatasïni Biblia eska Tata Diosï Jeoba kánikua uandanhiasïnga juchantsïni jimbo? b) ¿Néni eratsentaxaki nanaka sapichu, erachi enga sapichku jaka ka pirenchi enga jatiriikia engaksï imajeniicharhu xarharajka? (Gén. 39:1, 10-12; 2 Rey. 5:1-3; Luk. 2:25-38).

¹⁵ Biblia xarhatasïndi eska Tata Diosï Jeoba kánikua uandanhiasïnga juchantsïni jimbo. ¿Andichisï ísï uandajki? Jimboka imeeri Uandakuarhu uánikua ejempluechaksï jarhaska kʼuiripuecheri engaksï “májku jásïipka eska jucha” oksï májkueni ambe pʼikuarherani (Sant. 5:17). Ka sánderu jukaparhakua ambe, engachi exejka na enga kaapka indeni kʼuiripuechani engaksï ísïipka eska jucha, sánderuchi sési kurhangusïnga eska “Tata Diosï [Jeoba] kánikua kóntpintasïnga ka pʼamojpeni” (Sant. 5:11).

16. ¿Ambejtsïni jorhendasïni Tata Diosï Jeobaeri ambe, ambe enga Biblia uandajka imeecheri engaksï no sési ambe úpka? (Isaías 55:7).

 ¹⁶ Biblia ístujtsïni xarhatachesïndi máteru ambe enga Tata Diosï Jeoba újka parajtsïni xarhatacheni na engajtsïni xáni xénchajka. Imeeri Karakatarhu, imajtsïni aiachisïndi eskajtsïni no méni jurajkuaka engachi úska ambe ma enga no sési jaka. Israeliteechaksï mémindu pekadu ambe niátasïreendi, peru enga Tata Diosï Jeoba exeenga eskaksï mintsita jingoni móantasïreenga ima puákuantasïreendi (arhinta je Isaías 55:7). Ka kristianuecha engaksï primeru siglurhu irekapka ístuksï mítespi na enga xáni xénchauenga Tata Diosï Jeoba. Pori ejemplu, Tata Diosïiri jarhuajperata jimbo, apostoli Pablu arhiaspti imeeri erachiichani eskaksï puákuntapiringa ka sési pʼikuastantani acheetini ma enga ísku jándikua ambe niátapka ka enga tátsekua móantapka (1 Kor. 5:1-5; 2 Kor. 2:6, 7). Kánikuajtsïni sési pʼikuastantasïndi míteni eska Tata Diosï Jeoba no jurajkuasïreenga imeeri marhuariichani engaksï no sési ueenga ambe ma. Sánderu sési, uékperakua jingoni jarhuataasïreendi, jurhimberantaani ka pʼímarhiasïreendi parakaksï kʼuanhatsentapiringa imani jingoni. Ka májkueni ambe aiakusïndi iásï náki uéjki kʼuiripuni enga pekariuaka ka móantani (Sant. 4:8-10).

17. ¿Andisï Biblia xáni ambakiti regalu máe?

¹⁷ Tata Diosï Jeobajtsïni sési jásï regalu ma íntskusti. ¿Andichisï uandajki eska imeeri Uandakua ambakiti regalu máeska? Jimboka ísï eskachi na exekia, Bibliajtsïni jorhendasïndi eska Tata Diosï jurhimbikua jingoni kámpisïnga, eska jánhastiiska ka eskajtsïni kánikua xénchasïnga. Ístu, i librujtsïni xarhatachesïndi eska Tata Diosï Jeoba uékasïnga eskachi míteaka ka eskachi imeeri amigueuaka.

18. ¿Nénachi xarhatasïni eskachi agradesidu jarhaska Bibliani jimbo enga xáni ambakiti regalu máeka?

¹⁸ Jatsiskachi para kánikua jukaparharani Tata Diosïiri Uandakuani. I jindeesti sánderu “ambakiti intsïmperakua” ma engajtsïni ima íntskuka (Sant. 1:17). Ísï jimbo, ju je méntkisï xarhatakuni Tata Diosï Jeobani na engachi xáni agradesidu jaka ini regalu jimbo. Ka ísïchi úsïnga engachi arhintajka Tata Diosïiri Karakata ka engachi eratsentajka ísï tátsekua engachi na kómarhijkia. Uaakachi seguru jarhani eska Tata Diosï enga kararkuarhika Bibliani újchakuraaka na engachi xáni jánguarhintajka para ini ambe úni ka parachi exentani ‘Tata Diosïiri mímixekuani’ (Prov. 2:5).