Ueenaspka terekuarhini jimbokani no eratsesïreenga eska juchiiti amigu mítepiringa relijioniiri ambe. Ka kurhamarhispka: “¿Amberi míteski tʼu Biblieri ambe?”. Ima ísku pakaraspti. Joperureni tátsekua arhispti eska amamba Jeobaeri testiguespka ka eska jorhendaspka máru ambe Biblieri. Uékaspka sánderuni míteni ka arhispka eskarini aiangupiringa sánderu ambe.

Iauani chúrikua jamberichi uandontskuarhespka. Juchiiti amigurini aianguspti eska Biblia uandasïnga eska Satanásisï juramuni jaka parhakpinirhu (Juanu 14:30). Jamberijtsï chá mítekia ini ambe, peruni ji no mítespka ka i amberini kánikua ísku pakataspti. Méntkisï kurhandispka eska Tata Diosï ma enga sési kámpijka ka enga jurhimbitiika, eska imasï juramuni japka parhakpinirhu. Peru inde ambe no terukuntasïreendi imani ambe jingoni engani exepka. Nájkirukani 26 uéxurhintku jatiriipka, uánikua ambe exespkia engareni uandanhiateenga.

Juchiiti taati pilotuespti Fuerza Aérea Estados Unidos anapueri. Ísï jimbo, desde engani sapiipka mítespka eska japiringa guerra nukleari ma. Ejersitu listu jarhasptia para na uéjki jatini kʼuanijpani bomba nukleari ma. Engani unibersidadirhu nirani japka California, kánikua no sési jánhaskuarhispti jimboka guerra jarhaxapka Vietnam. Marchecharhisï nirasïreenga engaksï estudiantiicha ueenga. Polisiechajtsïni nirasïreendi andanguni chkariicha jingoni, ka jucha sïpakuarhisïreenga nájkirukachi no ueenga sési jirejtani ka nijtu exeni gasi lakrimojenu jimbo. Imani tiempu jimbo, kánikua no sési jánhaskuarhispti ka kánikua úkua jukaspti. Uándikuasïreendiksï politikuechani, kʼuiripuechaksï marcheechani uaasïreendi ka uarhipesïreendiksï. Kʼuiripuechaksï mámaru ambe uandasïreendi ka ji nóteruni jánhaskasïreengia ambe úni.

Uéxurhini 1970 jimbo, niraspka ánchikuarhini Kosta norti de Alaska, ka jima kánikua sentabu andaspka. Tátsekua Londres (Inglaterra) niraspka, jima motu ma piákuarhispka ka surirhisï niraspka no míteparini nani engani niárapiringa. África niáraspka máru mesiicha jimbo. Engani nirani japka, uánikua kʼuiripuechani míteaspka engaksï májkueni eska ji, uékeenga sïpakuarhini iámindu ima ambeeri enga úkuarhini japka ka libreenksï.

 Iámindu ambe engani exepka ka engani kurhaapka, úspti eskani jakajkupiringa ambe enga Biblia uandajka, eska ini parhakpinirhu juramuxaka espiritu ma enga no ambakeka. Peruni útasï uékaxapka míteni ambe úxapi Tata Diosï.

Máru kutsï tátsekua mítespka ini ambe. Ka tiempu jingoni, niáraspka míteani ka kánikua xénchaani uánikua acheetiichani ka uarhiitiichani engaksï no méni jurajkuka Tata Diosï jurhimbitini, ambe uéjkiksï nitamakuarhini jarhani.

Engani kʼuanhatsentapka Londres, uandajpaspka juchiiti amigueri amambani ka imarini Biblia ma íntskuspti. Tiempu jingoni, Ámsterdam niraspka (Países Bajos). Ma jurhiatikua, Bibliani arhintaxapka xanharu ma jimbo enga lámpara ma japka ka Jeobaeri testigu ma jimeesïsï nitamaspti, ka arhisptirini eskarini úpiringa sánderu ambe jorhendani Biblieri ambe. Tátsekua, engani Dublín japka (Irlanda), niraspka Jeobaeri testiguecheeri Betelirhu. Ka engani jima japkia uámutaspka puertani, inchaatanhaspka ka jima mítespka erachini Arthur Matthews, erachi ma enga kánikua eksperiensia jatsipka. Arhispka eskani uékasïreenga Biblieri ambe jorhenguarhini ka imarini uékaspti jorhendani.

Kánikua tsitisïreenga ambe engani jorhenguarhini japka ka méntkisï arhiantani jarhasïreenga libruechani ka rebisteechani engaksï Jeobaeri testiguecheeriipka. Ka ístuni kánikua tsitisïreenga Bibliani arhintani. Tánguarhikuecharhu, ískuni pakarasïreenga exeni eskaksï sapiicha jamberi kurhangusïreenga ambe engaksï i parhakpini anapu jorhenatiicha iónisï kurhamarhikuarhikia, komu: ¿Andisï xáni no sési jánhaskuarhini jaki? ¿Neeski Tata Diosï? Ka, ¿seguiriini jarhasïni irekani nema enga uarhijkia? Iámindu juchiiti amiguechaksï Jeobaeri testiguespti ka jindeespti jimbokani no nemani mítespka paisirhu. Imeechajtsïni jarhuataspti xénchani Tata Diosï Jeobani ka uékani úni imani ambe enga ima jaiapanhintajka.

Itsï atakuarhispka 1972 jimbo. Ka ma uéxurhini tátsekua prekursori úkuarhispka ka mótsispka kúnguarhikua sapichu ma jimbo enga Newry (Irlanda del Norte) japka. Jima kʼumanchikua sapichu ma rentariispka enga tsakapueriipka ka enga iauanisï japka juátarhu ma. Jima no iauani, uakasïichaksï máru jámasïreendi ka jima nirasïreenga jorhenguarhiani diskursuechani. Engaksï xaxani jarheenga tʼirekuani, ísï xarharasïreendi enajkijtsïni jingontku kurhajchani jarheeni. Ísïisti, nóksï jamberi mintsirasïreendi, perujtsïni kánikua jarhuatasïreendi parani jorhenguarhini kʼuiripuechani exeani engani arhijtsïkpini japiringia. Uéxurhini 1974 jimbo, ueenaspka marhuani komueska prekursori espesiali ka Nigel Pitt niáraspti jindeeni juchiiti kompanieru ka asta iásï jamberi seguirixati juchiiti amigueni.

Imani tiempu jimbo, kánikua no sési jánhaskuarhixapti Irlanda del Norte. Máru kʼuiripuechaksï uandasïreendi eska jimini “bombaecheeri ka balaecheeri echeri  máespka”. Kʼuiripuechaksï pauani pauani uarhiperasïreendi xanharuecharhisï, pistola jimboksï atajperasïreendi ka máru lugariicharhu, bombaechanksï chararaasïreendi. Iámindu i ambe relijioni ka politika jimbosï ísï úkuarhini japti. Joperu protestantiicha ka katolikuechaksï mítespti eskachi Jeobaeri testiguecha, no inchamukusïnga politikarhisï. Ísï jimbochisï úpka agustu aianhpini ka nóchi ambe ma úkuarhinchani. Mémindu, ima kʼuiripuecha engachi aianguauenga Biblieri ambe, aiangusïreendijtsïni nani ka na jandora no sési ambe úkuarhipirini parachi no jimeesïsï nirani.

Peruchi ménisï niáraspka sáno no sési ambe úkuarhinchani. Ma jurhiatikua, niraspka aianhpini ireta sapichu ma jimbo Dennis Carrigan jingoni enga ístu prekursoriipka. Jima nóksï jarhaspti Jeobaeri testiguecha ka ma xanharkuchisï nípka. Uarhiiti ma uandaspti eskachi jucha sondadu britanikuespka engachi inbestigariini jámani japka, ka jamberi jindeepti jimbokachi jucha no ísï uandasïreenga eska Irlanda anapuecha. Kánikuachi chéxapka. Mítespkachi eska engachi sési uandajpaapiringa sondaduechani, úpirindijtsïni uándikuni ójtsïni pistola jimbo atani jurhintskuarhu. Dennis ka ji, autobusinchi erokaxapka ka nóteru nema jarhasptia jima, ístu kánikua tsʼirakuarhixapti. Jiájkani exespkachi eska karru ma niáraxapka imani kafeteria jimbo enga uarhiiti uandapka eskachi jucha sondaduespka. Uarhiiti uéraspti ka ueenaspti uandontskuarheni tsimani acheetiicha jingoni engaksï karrurhu jatarini japka ka tʼantsirasptijtsïni kánikua ikiaparini. Tátsekua, ima acheetiichaksï iatsitakuarhujtsïni andarhieraspti karru jingoni ka ueenasptijtsïni kurhamarhini na jandoraksï uérasïreeni autobusiicha. Enga na niárapkia autobusi, uandontskuarhesptiksï choferi jingoni, peruchi no úspka kurhaani ambe engaksï uandani japka. Juchajkuchisï nirani japka autobusirhu, ísï jimbochisï seguru japka eskajtsïni uékasïreenga iretarhu uéakumanisï páni parajtsïni no sési ambe úchini. Peru no ma ambe úkuarhispti. Engani na kétsepkia autobusirhu, kurhamarhispka choferini: “¿Ambeksï uékasïreeni ima acheetiicha?”. Ka imajtsïni arhispti: “Asï uandanhia je. Ji aianguaskia neeskijtsï chá. Nóksïni ambe ma úchiati”.

Uéxurhini 1976 jimbo, kʼéri tánguarhikua distritueri a ma jimbo enga Dublín úkuarhipka, mítespka Pauline Lomaxini, prekursora espesiali ma enga Inglaterra anapueka ka enga Dublín nípka. Pirenchi máespti enga sési marhuakuenga Tata Diosïni, kaxumbitiispti ka ambakiti kʼuiripu máespti. Ima ka imeeri ermanu jémba, Ray, desde sapichkuksï ueenaspti míteni Tata Diosïiri ambe. Ma uéxurhini tátsekua, Pauline ka ji tembuperaspkachi ka seguiriispkachi marhuani komueska prekursori espesialiicha Ballymena (Irlanda del Norte).

Ma tiempu jimbo, marhuaspkachi komu sirkuitueri orhejtsïkutiicha Belfast, Londonderry ka máteru lugariicharhu engaksï kánikua peligrosuepka. Ískujtsïni pakatasïreendi exeni na engaksï juchaari erachiicha xáni mintsikeenga Tata Diosï Jeobani ka eska paraksï úni marhuakuni imani, jatsispkaksï para jurajkuni ambe engaksï jakajkuenga, nóteru kurhunhpinia ka nijtu no sési ambe eratsenia máteruecheeri. Xarharasïreendi eska Tata Diosï újchakuraasïreenga ka kuájchakuani.

Irlanda irekaspka 10 uéxurhini. Ka 1981 jimbo, pʼímarhisptijtsïni parachi nirani klase 72 Galaadiiri Jorhentperakuarhu. Enga na kʼamakurhipkia i eskuela, axanhaspkachi Sierra Leona (África Occidental).

Kʼumanchikuarhuchi ma irekaspka máteru 11 misioneruecha jingoni engaksï ambakiti kʼuiripuepka. Máechakua kosina jarhaspti, tanimu baniuecha, tsimani baniuecha para jikuani, ma telefonu, ma labadora ka ma sekadora. Ka lusi méntku nirani jarhasïreendi. Techurhu, uánikua jaiakiichaksï jámasïreendi, ka kʼumanchikuarhu kétsekua akuitsiichaksï inchasïreendi.

Nájkirukachi no kánikua ambe jatsikuarhepka, sésichi pʼikuarherasïreenga aianhpini jámani. Kʼuiripuechaksï janhanharhisïreendi Bibliani ka jingontkujtsïni kurhajchasïreendi. Uánikuechaksï jorhenguarhispti Bibliani ka  niárasptiksï Jeobaeri testigu úkuarhini. Jima anapu kʼuiripuechajtsïni arhisïreendi “tata Robert”, ka Paulineni, “nana Robert”. Peru ísï tátsekua, ueenaspka sánderuni ánchikuarhini Beteli jingoni, ka indeni ambe jimbo nóteruni xáni uérasïreengia aianhpini. Jimajkani kʼuiripuechaksï ueenaspti arhini Paulineni “nana Pauline” ka jíndeni “tata Pauline”. Pauline kánikua tsitispti engajtsïni ísï arhienga.

Uánikua jima anapu erachiichaksï pobriispti, peru Tata Diosï Jeoba méntkisï íntsaaspti ambe engaksï uétarhincheenga, ka ménichani úspti ambe ma engaksï erachiicha no erokuarhienga (Mat. 6:33). Miásïnga pirenchini ma enga xántku sentabu jatsipka para ima jurhiatikua anapu tʼirekua piárani para ima ka imeeri sapiicha. Pirenchi iámu sentabu íntskuspti erachini ma enga malaria pʼamenchani japka ka enga no jatsipka sentabu para medisina ambe piákuarhini. Ima mismu jurhiatikua, uarhiiti ma niraspti pirenchiiri kʼumanchikuarhu ka maiamuspti paraka pirenchi tepejtsïkupiringa. Mémindu úkuarhisïreendi i jásï ambe.

Nuebe uéxurhinchi jarhaspka Sierra Leona. Perujtsïni tátsekua arhispti eskachi Nigeria anapu Betelirhu nipiringia, ima kʼéri Beteli máespti. Jima seguiriispka ofisinarhu ma ánchikuarhini májkueni eskani na ueenga Sierra Leona, peru Pauline iásï máteru ambe úsïreendia ka kánikua úkua jukanchaspti indeni ambe úni. Antesi 130 ora aianhpisïreendi mándani mesi ka jarhuataasïreendi kʼuiripuechani parakaksï niárapiringa Jeobaeri testigu úkuarhini, ka iásï, pauani pauani kuarturhu ma jarhasïreendia takusï ambe sïrintani. Úkua jukanchaspti pʼindeni indeni ambe úni, peru tátsekua niáraspti kurhanguni eskaksï erachiicha kánikua jukaparharasïreenga ambe enga ima ueenga ka jánguarhintasïreendi para máteru beteliteechani uinhaperantaani.

Nigeria anapuechaksï máteru járhati pʼindekuechanksï jatsiaspti ka jucha jatsispka para uánikua ambe jorhenguarhini imeecheeri ambe. Miásïnga eska ma xanhari erachi ma páspka juchiiti ofisinarhu pirenchini ma enga apenasi niárapka Beteli. Ji jájki íntskuspka parani uandajpani, peru ima tinguixurhispti. Ískuni pakaraspka ka jirejiresï miántaspka ambe enga uandajka Ukuecha 10:25, 26 ka Jaŋaskuecha 19:10, ka kurhamarhikuarhispka: “¿Ambe uaa? ¿Arhia ambe ma?”. Peruni tátsekua eratsentaspka: “Enga pʼímarhinhaka Beteli, jindeesti jimboka míteskia ambe enga Biblia uandajka”.

Kánikua kʼuratseparini, seguiriispka uandontskuarhekuni ka tátsekua jánguarhintaspka míteni andisï pirenchi ísï úpi. Ka jorhenguarhispka eska pirenchi ísï úspka jimboka pʼindekua máespka enga máru lugariicharhu paisirhu ísï únheenga. Tatakeechajtuksï tinguixurhisïreendi. Ka ísïksï úsïreendi para respetu xarhatani ka no paraksï kʼéri ambe arhini nemani. Ka asta Bibliarhu jarhastiksï máru ejempluecha engaksï xarhatajka eska  i ambe ísïiska (1 Sam. 24:8). ¡Xáni sési engani no ma ambe arhipka pirenchini enga úpiringa no sési pʼikuastani!

Míteaspkachi uánikua Nigeria anapu erachiichani ka pirenchiichani engaksï desde iónisï xarhatapkia na engaksï xáni mintsikeenga Tata Diosïni. Ma jindeespti Isaiah Adagbona. b Ima mítespti Tata Diosïiri ambe enga tumbiipka, peru tátsekua lepra pʼiraspti. Ka jimaksï páspti engaksï leprosuecha irekapka, imajkusï Jeobaeri testiguepti jima. Nájkirukaksï no sési kámeenga, jarhuataaspti jukari 30 kʼuiripuechani engaksï lepra pʼamencheenga paraksï Jeobaeri testigu úkuarhini ka jarhuajpespti paraka kúnguarhikua ma japiringa jima.

Uéxurhini 1996 axanhaspkachi Kenia parachi jima anapu Betelirhu marhuani. I primeru uelteespti engani kʼuanhatsentapka imani paisi jimbo engani antesi uandaka. Engachi Betelirhu irekani japka, niárasïreendiksï changuecha máru engaksï arhinhajka serkopiteko berde. Engaksï pirenchiicha fruta peenga changuechaksï sïpakuasïreendi. Ma jurhiatikua, pirenchi ma mítatini jurajkuspti imeeri kuarturhu anapu bentanani. Ka enga kʼuanhatsentapka, exeantaspti uánikua changuechani arhanksï jarhani pirenchiiri tʼirekuani. Pirenchi uinhachaspti ka sóntku uéntaspti imeeri kuarturhu. Changuechajtuksï uinhachaspti ka chérakuarhesptiksï ka bentanarhisïksï uéntaspti.

Pauline ka ji ueenaspkachi marhuani kúnguarhikua ma jimbo enga suajili uandanheenga. Ka sánisï tátsekua, arhisptijtsïni eskani nitamatarapiringa Estudio de Libro de Congregación (enga iásï arhinhajka Biblieri jorhenguarhikua kúnguarhikua jingoni). Peruni ji no úsïreenga sési uandani suajili, jimbosïni antesi prepararikuarhienga parani úni sési arhiantani kurhamarhikuechani. Peru enga nema no imani ambe mókunteenga enga karakata jarheenga, no úsïreenga kurhanguni. Kánikuani no sési pʼikuarherasïreenga jimbokani no kurhangukuasïreenga erachiichani. Perujtsïni ísku pakataspti engajtsïni tekaantskua jingoni ka kaxumbikua jingoni jurajkuenga parani tánguarhikuani nitamatarani.

Nóchi jamberi ma uéxurhini jarhaspka Kenia. Ka 1997 jimbo, pʼímarhinhaspkachi Brooklyn (Nueva York) parachi jima anapu Betelirhu marhuani. Iásïchi paisirhu ma jarhaspkia enga kʼuiripu uánikua ambe jatsikuarhienga ka inde ambe úpirindi uandanhiata máeni (Prov. 30:8, 9). Peru ixú anapu erachiichajtuksï kánikua mintsikasïndi Tata Diosïni. Nóksï úrasïndi imeecheri tiempu, nijtu ambe engaksï jatsikuarheka paraksï riku úkuarhini, sino paraksï jarhuajpeni imani ánchikuarhita jimbo enga Tata Diosï Jeobaeri kúnguarhikua újka.

Iámu i tiempu jimbo, exeskachia eskaksï erachiicha no méni jurajkusïnga Tata Diosïni ambe uéjkiksï nitamakuarhini jarhani: Irlanda, nájkiruka kánikua no sési jánhaskuarhini japka, África, nájkirukaksï pobriika ka iauanisïksï irekani, ka Estados Unidos, nájkirukaksï jatsikuarheriika. Tata Diosï Jeoba kánikua sési pʼikuarherajti enga exejka eskaksï imeeri marhuariicha xarhatasïnga eskaksï kánikua xénchasïnga ambe uéjkiksï nitamakuarhini jarhani.

Tiempu sóntku nirasïndi, o ísï eska na arhijka Job 7:6, “sánderu sóntku nitamasïndi ka eska na enga manakuarhijka pʼikukua ma enga nema úrani jarhajka”. Iásïchi marhuaxaka Betelirhu nani engaksï Jeobaeri testiguecheeri ánchikuarhitani exejka Warwick (Nueva York), ima kʼuiripuecha jingoni engaksï kánikua xénchperajka. Kánikuachi tsitisïnga ka kánikuachi sési pʼikuarherasïnga jarhuatani juchaari Juramutini, tata Jesukristuni, ima enga no ióni jimbo uánikua kóntperateechani íntsauaka imeechani engaksï no méni jurajkuaka Tata Diosïni (Mat. 25:34).