1. ¿Tata Diosï Jeoba na xáni jukaparharasïni juchaari tsípikuani?

 ERANHASKA je eskaksïni amigu ma kʼumanchikua ma intsïkuarhiska. No káni sési atantskata jarhasti ka tsʼorhenasïndi. Nájkiruka kʼumanchikua ísï jaka, uánikua miioni dolari jukaparhasti. Seguru eskajtsï chá jukaparharapiringa ka kuájchakuni indeni kʼumanchikuani. Sáno májkueni, Tata Diosï Jeobajtsïni ambakiti regalu ma íntskusti: tsípikuani. Ka xáni jukaparharasïndi juchaari tsípikuani enga íntspika imeeri Uájpani parajtsïni pʼímutantani (Juanu 3:16).

2. Ísï eska na arhijka 2 Korintu 7:1, ¿ambe erokuarhisïni Tata Diosï Jeoba eskachi uaaka?

² Tata Diosï Jeobasï újti eska tsípikua jauaka (Sal. 36:9). Apostoli Pablu indeni ambesï arhikuekani japti enga uandapka: “Jimbokachi imani jimbosï irekani jaka, ka jámanchi jarhani ka jindeenchi” (Uku. 17:25, 28). Ísï jimbochisï uaaka uandani eska tsípikua Tata Diosïiri regalu máeska. Imajtsïni xénchperakua jingoni íntskusti ambe engachi uétarhinchajka parachi tsípiti jarhani (Uku. 14:15-17). Joperu Tata Diosï Jeoba no uaati milagru ambe parachi jucha tsípiti jarhani, sánderu sési, erokuarhisïndi eskachi jánguarhintaaka xáni eskachi xáni uaaka parachi no xáni pʼamenchani ka sési jarhani imani jingoni (arhinta je 2 Korintu 7:1). ¿Andichisï jatsi parachi jánguarhintani no xáni pʼamenchani ka kuájchakuni juchaari tsípikuani ka nénachi uaa ísï úni?

3. ¿Ambe jimbochisï jánguarhintajki parachi no xáni pʼamenchani?

³ Ambe ma engachi jimbo uéjka kuidarikuarhini parachi no xáni pʼamenchani, jindeesti jimbokachi uékasïnga sánderu ambakiti ambe íntskuni Tata Diosï Jeobani (Mar. 12:30). Jimbokachi uékasïnga íntskuntani juchaari “kuerpuechani Diosïni komueska ma kéjtsïtakua enga tsípitiika ka pímbinhasïini ka enga Diosï jaiapanhentajka”, nóchi úsïnga imani ambe engachi jucha míteka eskajtsïni no sési úchiaka (Rom. 12:1). Ísïisti, nájkirukachi kánikua jánguarhintaaka, ménisïchi  niáraaka pʼamenchani. Joperuchi jánguarhintasïnga xáni eskachi xáni uaaka parachi no xáni pʼamenchani, jimbokachi uékasïnga xarhatakuni juchaari Taati auandarhu anapuni eskachi kánikua agradesidu jarhaska jimbokajtsïni íntskuska tsípikua.

4. ¿Ambe uékasïreeni úni rei Dabidi?

⁴ Rei Dabidi kánikua jukaparharasïreendi tsípikuani enga Tata Diosï íntskupka, ísï jimbosï karapti: “¿Para ambe marhuaua engani ji uarhiaka? ¿Uaakini tʼupuri kʼéri ambe arhini? ¿Uaa uandantani na engari xáni jurhimbitiika?” (Sal. 30:9). Jamberi Dabidi karapti ini ambe sánititu ante de uarhini. Joperu ima uékasïreendi ióni irekani, xáni eska xáni úpiringa para seguiriini kʼéri ambe arhini Tata Diosï Jeobani. Ísïisti, iáminduechachi uékasïnga májkueni úni.

5. Nájkirukachi kánikua jatiriuakia ochi pʼamenchani jarhani, ¿ambechi uaa úni?

⁵ Engachi kánikua jatiriikia ochi pʼamenchani jarhani, jamberichi nóteru uaakia úni imani ambe engachi antesi ueenga ka jamberi inde ambe uaati eskachi no sési pʼikuarheraaka ka kómu pʼikuarherani. Joperuchi jatsiska parachi seguiriini jánguarhintani kuidarikuarhini parachi no xáni pʼamenchani. ¿Andi? Jimboka nájkirukachi jatiriuakia ochi pʼamenchani jarhani, útasïchi úsïnga kʼéri ambe arhini Tata Diosï Jeobani májkueni eska rei Dabidi. Ka kánikuajtsïni sési pʼikuastasïndi míteni eskajtsïni juchaari Tata Diosï xénchasïnga ka eskajtsïni jukaparharasïnga nájkirukachi no perfektueka (Mat. 10:29-31). Ka nájkirukachi niáraaka uarhini, imajtsïni aiachisïndi eskajtsïni tsítantaaka (Job 14:14, 15). Ísï jimbo, engachi jamberi tsípiti jauaka jatsiskachi para kuidarikuarhini parachi no xáni pʼamenchani ka kuájchakuni juchaari tsípikuani.

6. Engachi exeni jauaka ambe ka na engachi xáni auaka ambe ma, ¿ambe erokuarhisïni Tata Diosï Jeoba eskachi uaaka?

⁶ Biblia no jindeesti libru ma enga medisineeri ambe uandajka, nijtujtsïni arhijki ambe engachi jatsika para arhani. Joperu kʼórujtsïni arhisïndi ambe enga uandajka Tata Diosï inde ambeeri. Pori ejemplu, íntskusïndijtsïni ini konseju: “Késtata chiiti kuerpurhu imani ambe enga no sési útspijka” (Ecl. 11:10). Máru ambe engajtsïni no sési úchijka ka enga Biblia uandajka eska no sési jarhaska, jindeesti jukari arhani ambe ma ka kauini (Prov. 23:20). Ísï jimbo, engachi exeni jauaka ambe ka na engachi xáni auaka ambe ma, Tata Diosï Jeoba erokuarhisïndi eskachi jorhenaaka pʼíngukuarhini (1 Kor. 6:12; 9:25).

7. ¿Nénajtsïni jarhuatasïni ambe enga Proverbios 2:11 arhijka parachi úni kuidarikuarhini?

⁷ Engachi uéjka xarhatani eskachi agradesidu jarhaska tsípikua jimbo engajtsïni Tata Diosï íntskuka, jatsiskachi para sési eratsentani ambe engachi uaaka (Sal. 119:99, 100; arhinta je Proverbios 2:11). Pori ejemplu, jatsiskachi para sési eratsentani ambe engachi auaka. Engachi anhenchajka ambe ma, joperu engajtsïni no sési úchijka, sánderu sési jauati eskachi no auaka indeni ambe. Ístuchi míteska eskachi jatsiska para sési mintsikuarhini, someni ejersisiu úni, jánguarhintani limpiueni ka pímbinhasï jatsini juchaari kʼumanchikuani.

8. ¿Biblia néna xarhatasïni eska Tata Diosï Jeoba uékasïnga eskachi jingontku jámaaka parachi no no sési ambe úkuarhinchani?

⁸ Tata Diosï Jeoba íntsaaspti leiichani israeliteechani parakaksï no no sési ambe úkuarhinchapiringa kʼumanchikuarhu ka ánchikuarhitarhu (Éx. 21:28, 29; Deut. 22:8). Enga kʼuiripu ma no uékaparini uándikupiringa máteru kʼuiripuni, kánikua no sési nikusïreendi (Deut. 19:4, 5). Ka lei uandasïreendi eska kastigarinhapiringa ima enga no sési úkupiringa charhakuni ma enga nótki andajpenuni japiringa, nájkiruka no uékaparini ísï úpiringa (Éx. 21:22, 23). Biblia sési xarhatasïndi eska Tata Diosï Jeoba uékasïnga eskachi jingontku jámaaka parachi no no sési ambe úkuarhinchani.

9. ¿Ambechi uaa úni parachi no no sési ambe úkuarhinchani? (Ístu exea je imajeniichani).

⁹ Xarhatasïngachi eskachi agradesidu jarhaska tsípikua jimbo engajtsïni Tata Diosï  íntskuka,  engachi úska ambe ma parachi no no sési ambe úkuarhinchani kʼumanchikuarhu ka ánchikuarhitarhu. Pori ejemplu, jimeesïsïchi patsasïnga ambe ma enga atajka, kimiku o medisina ambe nani engaksï sapiicha no uaaka pʼíkuni. Ka engachi nóteru úrajkia indeni ambe, jimachi tsïtasïnga nani enga no nemani uaaka no sési úkuni. Ístuchi xéparini jámasïnga chpiri ambe jingoni, itsïini jásï ambe jingoni enga aparhijka ka erramienteecha jingoni ka engachi úrani jarhajka ini ambe pendientichi jarhasïnga. Ístuchi no manejarisïnga engachi pastiia ambe arhajka enga uaaka úni eskachi no uaaka sési manejarini, engachi alkoli ambe arhajka o engachi no sési mintsikuarhijka, nijtuchi jájkirhu kámani jarhajki telefonuni engachi manejarini jarhajka.

10. ¿Ambechi uaa úni antesi ka jiáni enga úkuarhini jauaka ambe ma engajtsïni uaaka no sési úchini?

¹⁰ Ísïisti, nóchi méntkisï uaaka úni ambe ma parachi no ma ambe úkuarhinchani, komu jiáni engaksï desastre naturaliicha ambe úkuarhijka, epidemiecha ka engaksï kʼuiripuecha uarhiperajka. Peru enga i ambe úkuarhiaka, uaakachi seguru jarhani ka nóchi ambe ma úkuarhinchani, engachi kurhandiska engachi arhinhaaka eskachi no uéraaka o eskachi máteru naniisï niuaka sïpakuarhini ka ístu úni  máteru ambe engajtsïni juramutiicha arhiaka (Rom. 13:1, 5-7). Joperu ístuchi uaaka tʼuini preparadu jarhania máru ambe jimbo enga úkuarhijka. Ísï jimbo, sésichi úsïnga engachi újka ambe engajtsïni juramutiicha arhijka parajtsïni jarhuatani tʼuini listu jarhani. Pori ejemplu, jamberi kánikua marhuauati patsani itsï, tʼirekua ambe enga no ambendurhikuarhijka ka jatsini botikini ma primerosi auksiliosiiri.

11. ¿Ambechi jatsiski para úni enga epidemia ma jauaka?

¹¹ ¿Ka ambechi jatsiski para úni jiáni enga epidemia ma jauaka jimeesïsï engachi jucha irekaka? Úni ambe engaksï juramutiicha uandajka, komu jupajkukuarheni, no xáni andarhieraani kʼuiripuechani, kubreboka úrani ka kuarentena úni. Engachi ísï úska, xarhatanchi jauaka eskachi kánikua jukaparharasïnga tsípikuani engajtsïni Tata Diosï íntskuka.

12. Enga no sési ambe úkuarhijka, ¿nénajtsïni jarhuatasïni Proverbios 14:15 parachi míteni néni kasu úkuni?

¹² Enga no sési ambe úkuarhijka ménisïchi kurhajchaasïnga juchaari amiguechani, besinuechani o notisiecharhu uandanksï jarhani ambe ma enga no ísïika. Enbesi dechi jakajkuni iámindu ambe engaksï uandajka, jatsiskachi para kurhaani ima ambe enga mintsinharhikueka, komu ambe engaksï uandajka juramutiicha ka doktoriicha (arhinta je Proverbios 14:15). Ístu, Grupu enga Orhejtsïkuajka iámindu kúnguarhikuechani ka Beteliicha, kánikuaksï jánguarhintasïndi paraksï imani informasionini úrani enga jurhimbitiika ante deksï uandani ambe enga úkuarhiaka tánguarhikuecha jingoni ka aianhpikua jingoni (Ebr. 13:17). Engachi ísï úska eskajtsïni imeecha na arhijka, kuájchakukuarhisïngachi ka máteruechantuchi kuájchakuasïnga paraksï no xáni pʼamenchani ka jamberichi uaaka úni eska sési ambe uandanhaaka Jeobaeri testiguecheri ambe (1 Ped. 2:12).

13. ¿Nénachi xarhatasïni eskachi jukaparharasïnga tsípikuani engachi kurhajchajka ambe enga Tata Diosï Jeoba uandajka iurhiriiri ambe?

¹³ Uánikua kʼuiripuechaksï mítesti eskaksï Jeobaeri testiguecha pímbinhasï exesïnga iurhirini. Ka jimbokachi kurhajchasïnga ambe enga Tata Diosï Jeoba uandajka iurhiriiri ambe, nóchi jiókuarhisïnga iurhiri jatantani ka ísïchi úsïnga nájkirukachi uinhamu pʼamenchani jauaka (Uku. 15:28, 29). Joperu inde ambe no arhikuekasïndi eskachi uékasïnga uarhini, sánderu sési, kánikuachi jukaparharasïnga tsípikuani jimboka Tata Diosïiri regalu máeska. Ísï jimbo, nirasïngachi ambakiti doktoriichani jingoni engajtsïni uékaaka jarhuatani parachi sési pʼikuarherantani no iurhiri úraparini.

14. ¿Ambechi uaa úni parachi no niárani tratamientu ma uétarhinchani jimbokachi úkuarhinchaska ambe ma?

¹⁴ Engachi kuidarikuarhiska indeni ambe úparini engachi exekia ini jorhenguarhikua jimbo, jamberichi no uétarhinchaaka eskachi jauaka tratamientu ma jimbo o eskachi operarinhaaka jimbokachi uinhamu pʼamenchaxaka. Joperu ¿engachi arhinhakia eskachi operarinhaaka? Enga inde ambe úkuarhiska, nóchi ióndaaka ambakentani engachi jucha antesi sési kuidarikuarhiska. Ístu, engachi jánguarhintaska paraka juchaari kʼumanchikuarhu ka jima engachi ánchikuarhijka segurueuaka ka engachi méntkisï úska ambe engaksï uandajka leicha para imeecha engaksï manejariijka, inde ambejtsïni marhuacheati parachi no niárani aksidenti ambe úkuarhinchani ka jatsinchi para operarinhani.

15. a) ¿Andisï xáni jukaparhakue eskachi méntkisï kámaaka dokumentuni enga uandajka ambe engachi uéjka eskaksï doktoriicha uaaka ka eska útasï marhuani jauaka? (Ístu exea je imajeniichani). b) Ísï eska na uandajka bideurhu, ¿ambechi uaa úni parachi sési mítetini jarhani iámindu ambe iurhiriiri ka ísïchi úni ambakiti ambe erakuni?

¹⁵ Máteru ambe engachi uaaka úni parachi xarhatani eskachi jukaparharasïnga tsípikuani, jindeesti uininharhitantani dokumentuni enga uandajka ambe engachi uéjka eskaksï doktoriicha uaaka (tarjeta enga uandajka eskachi no jiókuarhisïnga iurhiri jatantani) ka ístu engachi méntkisï kámaaka indeni sïrandani. b I dokumentu marhuasïndi parajtsï uandani ambe engajtsï eratsejka iurhiriiri ambe ka máteru tratamientuecheeri ambe. ¿Chaari tarjeta útasï marhuaxaki? Engajtsï jatsika  para uininharhitantani o mójtakuni ambe ma, asï iónda je ísï úni. Engachi karakata jatsiakia ambe engachi uékajka, inde ambejtsïni jarhuataati parachi no ísku jatini tiempu tsïtani engachi aianguani jauaka juchaari doktoriichani ambe engachi eratsetini jaka ka ísïchi sánderu sóntku atenderinhaaka. Ístu, marhuauati parachi no imani ambe intsïnhani engajtsïni uaaka no sési úchini. c

16. ¿Ambejtsï uaa úni engajtsï no míteka néna uininharhitantani sïrandani enga uandajka ambe engajtsï uéjka eskaksï doktoriicha uaaka?

¹⁶ Nájkirukachi sapichku jaka ochi no pʼamenchani jarhani, iáminduechachi uaaka no sési ambe úkuarhinchani o pʼamenchani (Ecl. 9:11). Ísï jimbo, sési jarhasti eskachi jatsiaka dokumentuni enga uandajka ambe engachi uéjka eskaksï doktoriicha uaaka. Peru engajtsï no míteka néna uininharhitantani ini sïrandani, asï uandanhia je. Kúnguarhikuarhu anapu orhejtsïkutiichaksï sánderu sési mítesti ini sïrandani ka uaatiksïni jarhuatani. Joperuksïni imeecha no arhiati ambe engajtsï jatsika para úni, jimbokajtsï chásï jatsika para exeni ambe engajtsï uéjka (Gal. 6:4, 5). Ambe engaksï orhejtsïkutiicha uaaka úni jindeesti jarhuatanksïni kurhanguni ambe enga sïranda arhijka ka jarhuatanksïni uininharhitantani sïrandani imani ambe jingoni engajtsï chá erakukia.

17. ¿Nénachi uaa xarhatani eskachi ima jásï kʼuiripueska engaksï kurhangujka?

¹⁷ Sáno méntkisï engachi exeni jarhajka náki tratamientu úrani engachi pʼamenchani jarhajka úrasïngachi ambe engachi jorhenguarhikia Bibliarhu (Uku. 24:16; 1 Tim. 3:9). Ísï jimbo, engachi eratsejkia ambe engachi uaaka ka uandontskuarheni máteruecha jingoni indeeri ambe, sési jauati eskachi jánguarhintaaka ísï úni eska na arhijka Filipenses 4:5, TNM: “Eskaksï iámindu kʼuiripuecha exeaka eskajtsï chá kurhangusïnga”. Engachi no jámaska jukari kuidarikuarhini parachi no pʼamenchani ka engachi no arhiajka máteruechani eskaksï májkueni ambe uaaka eska jucha, xarhatani jarhasïngachi eskachi ima jásï kʼuiripueska engaksï kurhangujka. Xénchaasïngachi ka janhanharhiasïngachi juchaari erachiichani, nájkirukaksï imeecha no májkueni ambe erakuaka úni eska jucha (Rom. 14:10-12).

18. ¿Nénachi uaa xarhatani eskachi agradesidu jarhaska tsípikua jimbo enga regalu máeka?

¹⁸ Ísï eskachi ueenakuarhu na uandaka, Tata Diosï Jeoba jindeesti enga újka eska tsípikua jauaka. Ka uaakachi xarhatakuni eskachi agradesidu jarhaska engachi kuidariiska juchaari tsípikuani, enga Tata Diosïiri intsïmperakua máeka, ka engachi sánderu ambakiti ambe íntskuska imani (Jaŋ. 4:11). Ísïisti, iásïksï uánikua pʼamenchakuecha jarhasti ka uandanhiateecha, joperu Tata Diosï Jeoba no uékasïreendi eskachi jucha ísï irekapiringa. Sánderu sési, ima no ióni jimbo uaati eskachi jucha irekaaka parhakpini ma jimbo enga nóteru jauakia kómu nitamakua ambe ni uarhikua (Jaŋ. 21:4). Enga jamberi niáraaka ima jurhiatikua, ju je jukaparharani juchaari tsípikuani ka ju je úrani parachi marhuakuni imani engajtsïni tsípikua íntskuka, juchaari Taati auandarhu anapuni enga kánikua xénchpetiika, Tata Diosï Jeoba.