1. ¿Ambe arhiaspi Jesúsi imeeri chúxapatiichani káni enga kʼamarapiringa i tiempu engachi jimbo irekani jaka ka náki konseju íntsaaspi?

 MÁRU jurhiatikuecha ante de Jesúsi uarhini, tʼámu imeeri chúxapatiichaksï kurhamarhispti ambe úkuarhini japirini enga kʼamarani japiringia “i tiempu” (Mat. 24:3). Jamberiksï i Jesúsiiri chúxapatiicha uékeendi míteni nénaksï úpirini kuenta íntskukuarheni káni kʼamajkunhapirini Jerusaléni ka imeeri templu. Enga Jesúsi mókukuantapka, no solu arhiaspti eska Jerusaléni ka imeeri templu kʼamajkunhapiringa, sino ístu arhiaspti ambe enga úkuarhini japiringa enga kʼamarani japiringia i tiempu engachi jimbo irekani jaka. Ka enga uandani japka na enga jatini kʼamarapiringa i tiempu engachi jimbo irekani jaka, arhiaspti: “Ka ima jurhiatikua ka ima ora, no nema mítesti ni sikiera ánjeliicha engaksï auandarhu jaka ka nijtu Diosïiri Uájpa sino solu Diosï Taati”. Ka tátsekua arini konseju íntsaaspti: “Jingontku ja je” (Mar. 13:32-37).

2. ¿Andiksïsï jatsipi para jingontku jarhani primeru siglurhu anapu kristianuecha?

² Engaksï primeru siglurhu anapu kristianuecha engaksï judiuepka uékapiringa tsípiti pakarani, jatsisptiksï para méntkisï jingontku jarhani. Jesúsi arhiaspti imeeri chúxapatiichani nénaksï úpirini kuenta íntskukuarheni eska axuterku jarhaspkia para Jerusaléni ka imeeri templu kʼamajkunhani, arhiaspti: “Engajtsï chá exeaka ireta Jerusalénini sondaduecha uirhiperatini jarhani, jimajkani míte je eska ora niáraskia para ima xerenhantani”. Ka engaksï exepiringa eska i ambe úkuarhixapkia, jatsipirindiksï para juáteecharhisï nirani sïpakuarhini ísï eska Jesúsi na arhiapka (Luk. 21:20, 21). Imeecha engaksï úpka ambe enga Jesúsi arhiapka, sïpakuarhisptiksï ante de Roma anapuechaksï kʼamajkuni Jerusalénini ka tsípitiksï pakaraspti.

3. ¿Ambechi exea ini jorhenguarhikua jimbo?

³ Juchachi irekaxaka últimu jurhiatikuechani jimbo i parhakpiniiri  enga xáni no sési jánhaskuarhini jaka. Ísï jimbo, májkueni eskaksï primeru siglurhu anapu kristianuecha, juchajtuchi jatsiska para sési eratsentani ambe ma ka jingontkuchi jarhani. Ini jorhenguarhikua jimbo, exenchi jauaka nénachi jatsiski para exeni ambe enga parhakpinirhu úkuarhini jaka. Ístuchi exeaka ambe engachi uaaka úni parachi jucha mismu exekuarhini na engachi jámani jaka ka parachi sési úrani tiempu enga pakarani jaka.

4. ¿Andichisï uéjki míteni ambe enga úkuarhini jaka parhakpinirhu?

⁴ Jarhasti ma ambe engachi jimbo uéjka míteni ambe enga xáni úkuarhini jaka parhakpinirhu ka jindeesti jimbokaksï kumplirikuarhixaka Biblieri profesiecha. Pori ejemplu, Jesúsi uandaspti uánikua ambe engajtsïni jarhuatajka míteni eska axuterku jarhaskia paraka kʼamajkunhaaka Noambakitiiri parhakpini (Mat. 24:3-14). Apostoli Pedru ístu uandaspti eskachi jingontku japiringa exeni na engaksï kumplirikuarhini japiringa Biblieri profesiecha, jimboka i ambejtsïni jarhuatapiringa sánderu mintsikani Tata Diosïni (2 Ped. 1:19-21). Ka últimu libru Biblieri ísï ueenasïndi arhini: “I jindeesti tata Jesukristueri jánhastpikua enga Diosï íntskuka imani para jánhastaani imeeri jántspiriichani indeni ambe enga úkuarhiaka no ióni jimbo” (Jaŋ. 1:1). Ísï jimbo, no no sési jarhasti engachi uéjka míteni ambe enga xáni úkuarhini jaka parhakpinirhu ka na enga i ambe úni jaka eskaksï kumplirikuarhiaka Biblieri profesiecha. Ka jamberichi tsitijka iiri ambe uandontskuarheni máteru erachiichani jingoni.

5. ¿Ambe jingonchi jatsiski para xéparini jámani engachi Biblieri profesiecheeri ambe uandontskuarheni jauaka? (Ístu exea je imajeniichani).

⁵ Engachi uandontskuarheni jauaka néna engaksï kumplirikuarhini jaka Biblieri profesiecha, jatsiskachi para xéparintku jámani. ¿Andi? Jimbokachi no uékasïnga imani ambe uandani engachi jucha eratsejka ka enga uaaka eska kúnguarhikua arhukurhiaka. Pori ejemplu, jamberichi úpiringa kurhaani eskaksï parhakpini anapu juramutiicha uandaxaka ambe engaksï uaaka paraksï sési peentani ambe ma, paraka pínandikua jauaka ka paraksï iáminduecha sési irekani. Enbesi dechi kurhamarhikuarhini sini úkuarhixaki ambe enga 1 Tesalonika 5:3 uandajka, jatsiskachi para sési mítetini jarhani ambe enga Tata Diosïiri kúnguarhikua uandakia. Engachi ima ambeeri uandontskuarheaka ambe enga juchaari publikasionicharhu arhijka, jarhuajpenchi jauaka paraka iámu kúnguarhikua májku kʼéri jauaka ka májku ambe eratseni (1 Kor. 1:10; 4:6).

6. ¿Ambechi jorhenguarhisïni imani ambe jingoni enga 2 Pedru 3:11-13 arhijka?

⁶ (Arhinta je 2 Pedru 3:11-13). Ambe enga apostoli Pedru uandapka, jarhuatasïndijtsïni eratsentani andichisï uéjki míteni ambe engaksï uandajka Biblieri profesiecha. Arhisïndijtsïni eskachi jatsiska para “jingontku jarhani ka prebenirikuarhin[chi] jarhani para[chi] erontani” Tata Diosï Jeobaeri jurhiatikuani. ¿Andi? No jindeesti jimbokachi uékasïnga míteni na jatini o ambe ora juaa Tata Diosï Armajedonini, sino jimbokachi uékasïnga sési úrani tiempuni enga pakarani jaka parachi úkuecha jingoni xarhatani eskachi pímbinhasïiska ka eskachi janhanharhisïnga Tata Diosïni (Mat. 24:36; Luk. 12:40). I ambe arhikuekasïndi eskachi jatsiska para sési jámani ka eska iámindu ambe engachi újka Tata Diosï Jeoba jimbo, jindeeska jimbokachi kánikua xénchasïnga. Ka parachi úni ini ambe, jatsiskachi para exekuarhini na engachi jámajka.

7. ¿Ambechi jatsiski para úni parachi juchajkumindu exekuarhini? (Lukasʌ 21:34).

⁷ Jesúsi no solu arhiaspti imeeri chúxapatiichani eskaksï jingontku japiringa imani ambe jingoni enga parhakpinirhu úkuarhini japiringa, sino eskaksï ístu imeechajkumindu exekuarhini japiringa. Ka Lukasʌ 21:34 xarhatasïndi eska i ambe ísïiska (arhinta je). Jimini Jesúsi ini ambe arhiaspti  imeeri chúxapatiichani: “Exekuarhiparini chájkumindu”. Jimajkani, ¿ambe arhikuekasïni juchajkumindu exekuarhini jarhani? Arhikuekasïndi jingontku jarhani imani ambe jingoni enga uaaka eskachi nóteru sési pájperaakia Tata Diosï Jeoba jingoni ka eskachi jánguarhintaaka no no sési jásï ambe niátani. Engachi ísï úska, Tata Diosïjtsïni seguiriini jauati xénchani (Prov. 22:3; Jud. 20, 21).

8. ¿Pablu náki konseju íntsaaspi kristianuechani?

⁸ Apostoli Pablu arhiaspti kristianuechani eskaksï jatsispka para imajkuminduksï exekuarhini. Pori ejemplu, Éfesu anapu kristianuechani karakuaspti: “Kuidadu jingoni jáma je, ka no komueska imeecha engaksï no sáni eratsekua jukaka, sino komueska imeecha engaksï sési eratsejka” (Efes. 5:15, 16). Satanási mámaru ambe úsïndi parachi jucha nóteru sési pájperania Tata Diosïni jingoni. Ísï jimbo, Bibliajtsïni arhisïndi eskachi míteaka ambe enga uéjka Tata Diosï Jeoba eskachi uaaka ka ísïchi uaaka kuájchakukuarhini engajtsïni Satanási uékani jauaka no sési ambe úchini (Efes. 5:17).

9. ¿Nénachi uaa míteni ambesï uéjki Tata Diosï Jeoba eskachi uaaka?

⁹ Biblia no uandasïndi iámindu ambeeri enga uaaka úni eskachi nóteru sési pájperaakia Tata Diosï Jeoba jingoni. Ísï jimbo, sáno méntkisïchi jucha jatsisïnga para exeni ambe úni imani ambe jingoni enga Biblia no meru uandajka ambe engachi jatsika para úni. Ka parachi úni sési míteni ambe engachi jatsika para úni, jatsiskachi para kurhanguni ambesï uéjki Tata Diosï Jeoba eskachi uaaka. Ka ¿nénachi úsïni indeni ambe? Engachi jorhenguarhijka imeeri Uandakuani ka engachi eratsentajka ambe engachi arhintajka. Engachi sánderu sési kurhanguaka ambe enga jaiapanhentajka Tata Diosï Jeoba ka engachi sánderu jánguarhintaska parachi májkueni eratseni eska Kristu, sánderu fásiliuati ísï jámani eska imeecha “engaksï sési eratsejka” ka uaakachi ísï úni nájkiruka Bibliarhu no jauaka lei ma enga uandaaka ambe engachi jatsika para úni (1 Kor. 2:14-16). Ísïisti, ménichani fásiliisti exeni ambe engachi no jatsika para úni, peru ménichani nómbe.

10. ¿Náki jindeeski máru ambe engachi no jatsika para úni?

¹⁰ Máru ambe engachi no jatsika para úni jindeesti koketearini, jukari kauikua ambe arhani o jukari tʼireni, imani uandakuechani úraani engaksï no sési pʼikuastpejka, ístu atajperakueri ambe exeni o pornografia ambe (Sal. 101:3). Juchaari enemigu, Noambakiti, méntku jánguarhintani jarhasïndi úni ambe ma parachi nóteru sési pájperania Tata Diosï Jeoba jingoni (1 Ped. 5:8). Engachi no jingontku jámaska, ima uaati úni eskachi juchaari mintsitarhu úndaaka enbidia pʼikuarherani, no jurhimbikua jingoni jámani, jukari jatsikuarhikuekani, kurhunhpini, kʼéramakuarhini ka jatanhetspini (Gal. 5:19-21). Jamberichi ueenakuarhu no xáni ísï pʼikuarheraaka, joperu engachi no jánguarhintaska nóteru ísï eratsenia ka pʼikuarherani inde ambejtsïni kánikua no sési úchiati (Sant. 1:14, 15).

11. ¿Náki jindeeski ambe ma enga no fásiliika para exeni eska no sési jarhaska ka andichisï no jatsi para indeni ambe úni?

¹¹ Ju je eratsentani ambe ma enga no fásiliika exeni eska no sési jarhaska: imeechani kúrhiani engaksï no sési jámajka. Ju je eranhaskani eskachi ánchikuarhitarhu kompanieruni ma jatsiska enga no Testigueka. Ka jimbokachi uékasïnga eska ima sési ambe uandaaka Jeobaeri testiguecheri ambe, sésichi kámasïnga ka jarhuatasïngachi. Ka jamberichi ménichani imani jingoni tʼirejka, peru tátsekuachi sáno méntkisï imani jingoni tʼiresïngia. Ménichani ima ísku jándikueri ambe uandasïndi ka ueenani juchachi no sési pʼikuarherasïnga ka nóchi terukukusïnga, joperuchi tátsekua pʼindesïngia ka nóteruchi no sési pʼikuarherasïngia. Ma jurhiatikua engachi na kʼamarajkia ánchikuarhini, imajtsïni pʼímarhisïndi parachi nirani ambe ma arhani ka juchachi nirasïnga. Tátsekuachi májkueni eratsesïngia eska ima. ¿Náchi xáni ióndaa májkueni jámani eska ima? Ísïisti eskachi kristianuecha iáminduechani sési kaasïnga ka  janhanharhiani, joperu ju je miáni eska ima kʼuiripuecha engachi kúrhiajka úpiringaksï úni eskachi májkueni jámaaka ka eratseni eska imeecha (1 Kor. 15:33). Engachi ísï úska eska Jesúsi na uandapka ka exekuarhinchi na engachi jámajka, nóchi xáni kúrhiauaka imeechani engaksï no janhanharhiajka Tata Diosï Jeobaeri juramukuechani (2 Kor. 6:15). Engachi exeska eska ambe ma no sési jarhaska, nóchi uaaka indeni ambe.

12. ¿Náki ánchikuarhitaksï jatsispi para úni Jesúsiiri chúxapatiicha ante de kʼamajkunhani Jerusaléni ka imeeri templu?

¹² ¿Ískuksï pakarapirini Jesúsiiri chúxapatiicha enga jamberi Jerusaléni ka templu kʼamajkunhapiringa? Nómbe. Jesúsi arhiaspti eskaksï jatsispka para ánchikuarhita ma úni. Arhiaspti eskaksï jatsispka para aianhpini ambakiti aianhperakuani ʻJerusaléni, Judea, Samariaʼ “ka iápuru parhakpinirhu asta jima enga sánderu iauaniika” (Uku. 1:6-8). Kʼéri ánchikuarhitaksï ma jatsispti. Joperu engaksï kánikua jánguarhintapiringa indeni ánchikuarhitani úni, sésiksï úrani japirindi imeecheri tiempu.

13. ¿Andichisï jatsi para sési úrani juchaari tiempu? (Kolosasi 4:5).

¹³ (Arhinta je Kolosasi 4:5). Parachi juchajku mismu exekuarhini, uétarhisïndi eskachi exeaka na engachi úrani jaka juchaari tiempu. Ísï eska na arhijka Eclesiastés 9:11, iáminduechachi úpiringa úkuarhinchani ambe ma engachi no erokuarhini jarhajka, astachi úpiringa ma repentku uarhini.

14, 15. ¿Ambechi uaa úni parachi sési úrani juchaari tiempu? (Ebreu 6:11, 12; ístu exe je imajenini).

 ¹⁴ Uaakachi sési úrani juchaari tiempu engachi imani ambe úska enga Tata Diosï Jeoba uékajka ka engachi jánguarhintaska sánderu sési pájperani imani jingoni (Juanu 14:21). Ísï jimbo, jatsiskachi para ísï úni eska i Biblieri konseju na uandajka: “Uinhapinta je ka asï jáma je chérakuarheni, sino méntku jauena je úni Diosïiri úkuani” (1 Kor. 15:58). Ísï jimbo, no arhiparini enga i parhakpini niáraaka kʼamajkunhani ochi niárani uarhini, nóchi pʼamondakuarhini jauaka eratseparini eskachi úpiringa sánderu marhuakuni Tata Diosï Jeobani (Mat. 24:13; Rom. 14:8).

¹⁵ Ísï eska na aiatspepka Jesúsi, ima seguiriixati iásï jamberi orhejtsïkuani imeeri chúxapatiichani engaksï aianhpini jámajka Tata Diosïiri Reinueri ambe iámu parhakpinirhu. Jesúsi úrasïndi Tata Diosï Jeobaeri kúnguarhikuani parajtsïni jorhendani néna aianhpini ambakiti aianhperakuani ka íntskusïndijtsïni ambe engachi xáni uétarhinchajka parachi ísï úni (Mat. 28:18-20). Ambe engachi jucha jatsika para úni, jindeesti jánguarhintani aianhpini ka jorhendaani máteruechani ka jingontku jarhani enga jamberi Tata Diosï kʼamajkuaka ini parhakpinini. Ka seguruchi jauaka “asta kʼamarhutani jamberi” eska ísï úkuarhiaka eskachi na erokuarhini jaka engachi ísï úska eska na arhijka Ebreu 6:11, 12 (arhinta je).

16. ¿Ambechi eratsetixaki úni?

¹⁶ Tata Diosï Jeoba uandastia na enga jatini kʼamajkuaka Noambakitiiri parhakpinini. Enga niáraaka inde jurhiatikua, ima uaati eskaksï kumplirikuarhiaka Biblieri profesiecha. Ka nájkirukachi ménisï ísï exeaka eska inde jurhiatikua ióndaxaka niárani, Tata Diosï Jeobaeri jurhiatikua “no ióndaati janoni” (Hab. 2:3). Ísï jimbo, eratsetixakachi ísï úni eska na uandajka Miqueas 7:7: “Méntkisï jingontkuni jauaka Jeobaeri ambe jimbo, tékaantskua jingoni erokaaka Tata Diosïni enga juchiiti pʼímutantspitiika”.