Andajpenuska 1954, jini Saint Paul (Minnesota) enga Estados Unidos jaka, juchiti familia katolikuespti ka nójtuchi jatsikuarherispka níjtuchi pobripi. Jí segunduespka iúmu sapiicheri. Engani tataka sapichu máepka, eskuela katoliku ma jimbo nirasïrenga ka saserdotini jarhuatasïrenga peruni no uánikua ambe mítespka Bibliaeri. Nájkirukani jakajkuenga eska jarhaska Tata Diosï ma enga iámindu ambe kueraapka, ji nóteruni mintsikasïrenguia Iglesiani.

Engani ma uéxurhini páni japkia eskuelarhu Facultad de Derecho William Mitchell jimbo, uámutachesptijtsïni temungurhiri ma engaksï Jeobaeri testiguepka. Jimbokani jupaxapka, arhisptijtsïni eskaksï ménderu kʼuanhatsentapiringa. Engaksï kʼuanhatsentapka, tsimani ambe kurhamarhiaspka: “¿Andisï no sési úrichani sánderu sési nikuajki eska ambakiti kʼuiripuechani?” ka “¿Ambe uétarhisïni para tsípikua jingoni irekani?”. Íntskusptijtsïni libruni La verdad que lleva a vida eterna ka Traducción del Nuevo Mundo de las Santas Escrituras enga xunhapiti táparhapka. Ístuni jiokuarhispka parajtsïni Bibliaeri ambe jorhendani. Niáraspka uánikua ambe míteni. Kánikua tsitispka jorhenguarhini eska Tata Diosïri Reinu jindeska juramukua engaksï kʼuiripuecha  xáni uétarhinchajka ka enga sési peentaaka iámindu ambe Echerirhu. Niáraspka kurhanguni eskaksï méntku no ma ambe marhuaska parhakpini anapu juramuticha ka eskaksï solu úska eska kʼuiripu kómu nitamakuarhiaka, eska no jurhimbikua jingoni kánhaaka ka eska no sési jásï ambe úkuarhinchaaka.

Aiakukuarhispka Jeobani 1982 jimbo ka imani mismu uéxurhini itsï atakuarhispka Kʼéri tánguarhikuarhu Distritueri “Verdad del Reino” enga úkuarhipka estadiurhu St. Paul Civic Center. Ísï máteru semana jimbo, jimini kʼuanhatsentaspka parani eksameni ma úntani parani úni abogadueni. Ka oktubrini mítespka eskani sési uéraspka eksaminirhu.

Imani kʼéri tánguarhikuarhu, Mike Richardsonini mítespka enga Brooklyn (Nueva York) anapu Betelirhu marhuani japka ka aiangusptirini eska indeni Beteli jimbo, uénakuarhixapka ánchikuarhita ambe jarhani enga legalesiri ambe exepiringa. Miántaspka ambe enga eunuku Etiopía anapu uandapka, Ukuecha 8:36 jimbo, ka kurhamarhikuarhispka: “¿Amberini pʼíngusïni parani úni jimini ánchikuarhini?”. Ísï jimbo, uininharhitaspka solisitudi ma para Beteli marhuani.

Juchiti tátichaksï no tsitispti engani Jeobaeri testigu úkuarhipka. Juchiti tátirini kurhamarhispti nénarini marhuachepirini ánchikuarhini para Watchtower. Ji arhispka eskani jísïni uékani japka jima ánchikuarhini ka eskani mándani kutsï tumina sáni intsïnhani japiringa ísï eskaksï máteru betelitecha.

Jimbokani uénaspkia ánchikuarhini jusgadurhu ma, no úspka jirejiresï nirani Beteli marhuani, asta 1984 jimbo uénaspka Brooklyn anapu Betelirhu marhuani. Arhinhaspka parani ánchikuarhini jima enga legalesiri ambe exeenga. Kánikuarini jarhuataspti jusgadurhu ánchikuarhini jimbokani uánikua ambe jorhenguarhispka.

Nobiembrini 1983, Jeobaeri testiguechaksï saloni Stanley piáspti jini Jersey City (Nueva Jersey). Erachichaksï permisu kurhajkuarhispti paraksï ménderu jatsikuntani lusi ka itsï imani salonirhu. Engaksï jima anapu juramutichani jingoni tánguarhipka, erachichaksï arhiaspti eskasksï Jeobaeri testiguecha uékasïrenga úrani imani salonini para kʼéri tánguarhikuechani uáni. Peru uénaspti problema ma jarhani. Jima anapu Lei uandasïrendi eskaksï sentrurisï no jatsispka para jarhani kʼumanchikuecha para tánguarhini. Ka jimboka ima saloni sentrurisï jápka nani engaksï uánikua negosiuecha japka, nójtsïni íntskuspti sésikua. Erachichaksï ménderu kurhamarhispti juesini sinksï úpirini ísï úni peru ima no jiárhitaaspti.

Primeru semana engani Beteli japkia, erachichaksï ménderu niraspti permisu kurhajkuarhini peru iásï kʼéri jusgadu federal de distrito jimbo.  Jimbokani ji tsimani uéxurhini jima ánchikuarhispka imani jusgadurhu enga Saint Paul (Minnesota) japka, sési míteaspka inde járhati problemechani. Abogadu ma enga juchantsïni jingoni nípka, uandaspti eska saloni Stanley úrakuarhispka para uánikua ambe, komu pelikula ambe exeni ka asta kústakua ambe enga ísï mítekateka komu rock. Jimajkani, ¿andisï no sési japirini tánguarhikua ma úni para Tata Diosïri ambe kurhaani? Tribunal exespti ini problemani ka arhispti Jersey City anapu juramutichani eskaksï no sési úxapka jimbokachi jatsispka sésikua parachi Tata Diosïni kómarhini ka arhiaspti eskajtsïni íntsaapiringa imani permisuechani engachi kurhajkuarheani japka. Jiájkani uénaspka exeni eska Jeoba újchakurasïnga na enga imeri kúnguarhikua úraajka leichani paraka ánchikuarhita seguiriuaka úkuarhini. Kánikua tsípixapka engani úpka sanititu jarhuajpini.

Erachichaksï no jamberi ma uéxurhini jimbo, kánikuaksï sési jájkuntaspti imani salonini. Ochu de septiembri 1985, engaksï na kʼamarapkia erachicha Galaadiri jorhentperakua klase 79, jima úkuarhispti tánguarhikua ka niáraspti ísï mítekuarhini komu Jersey City anapu Kʼumanchikua engaksï Kʼéri tánguarhikuecha úkuarhijka. Kʼéri kóntperata máespti para ji, Reinueri ambe jimbo jarhuajpini imani grupu jingoni enga legalesiri ambe exenga, ka inde amberini sánderu sési pʼikuastaspti eska náki uéjki ánchikuarhita engani úpiringa úni komu abogadu ante de Beteli marhuani. No eranhaskasïrenga eskarini Jeoba íntsaapiringa máteru uánikua kóntperatechani komueska i.

Uéxurhini 1980 ísï, uánikua doktoricha ka ospitalicharhu nóksï kasu úkuasïrendi erachichani engaksï no uékenga iurhiri jatantani. Ka sánderuksï úkua jukanchasïrendi embarasadecha, jimbokaksï juesicha uandasïrenga eskaksï afuersa jatsispti para iurhiri jatantani jimboka engaksï no ísï úpiringa charhaku uerandujupindi pakarapiringa.

Jurhiatikua 29 de disiembri 1988, pirenchi Denise Nicoleau uénaspti kánikua iurhiri tsïtani enga na kánguarhipkia charhakuni. Nóteru xáni emoglobina kámaxaptia ka doktori arhispti eska jurajkupiringa paraksï iurhiri jatsirantani. Peru pirenchi no uékaspti. Pauandikua tsípku, ospitali juesini ma kurhakuspti sésikua para úni pirenchini iurhiri jatsirantani. Juesi jirejiresï uandaspti eska jo ka nóksï jamberi kurhamarispti pirenchini o uámbani.

Biernesï 30 de disiembri, doktorichaksï iurhiri jatsirantaspti pirenchini nájkiruka uámba no uékenga ni máteru parienticha. Ístu, inchateruksï jupiaspti máru pirenchiri familiarichani ka orhejtsïkutichani. Uandasptiksï eskaksï imecha no jurajkuaxapka paraksï doktoricha iurhiri jatsirantani pirenchini. Jini Nueva York ísï, sábadu tsípa 31 de disiembrini iámu notisiecharisï uéraxapti ambe enga úkuarhipka.

Niraspkachi sánderu kʼéri jusgadurhu ma ka lunesï tsípa uandontskuarhespka juesi Milton Mollen  jingoni enga exeni japka juchari problemani. Aianguspka ambe enga úkuarhipka ka ístuni arhispka eska máteru juesi juramuspka ambe ma ka no jamberi kurhanguarhini. Juesi Mollen arhisptirini eskani inchatiru imeri ofisinarhu nipiringa parani sánderuni aianguni ambe enga úkuarhipka ka exeni náki leichanksï úpirini úraani. Pámbesptirini Philip Brumley enga juchiti superintendentipka. Juesi ístu arhispti ospitalirhu anapu abogaduni eska nipiringa. Uénaspkachi sáni uinhachani. Erachi Brumley karachesptirini ambe ma kuadernurhu enga arhienga: “Asï xáni uinhacha”. Ambakiti konseju máespti jimbokani uénaxapkia ikiani jimbokani uékasïrenga xarhatani eska no ísïspka ambe enga máteru abogadu uandani japka.

Enga na ma ora nitamapkia, juesi Mollen uandaspti eska pauandikua tsípa juchari ambe orheta exepiringa. Engachi na uéntani japkia juesiri ofisinarhu, ima uandaspti eska ospitalirhu anapu abogadu kánikua úkua jukanchapiringa xarhatani eska ísïspka ambe enga ima uandenga. Ísï pʼikuarheraspka enajkirini Jeoba arhini japi eskachi úpiringa andani imani juisiuni. Ambakiti ambespti exeni eskajtsïni Jeoba juchantsïni úraxapka para úni ambe enga ima uéjka.

Iauani chúrikua jamberichi exespka nénachi úpirini sési peentani imani uandanhiatani. Ka jimboka jusgadu no iauani jarhaspka jima uératini enga Brooklyn anapu Beteli japka, sáno iámindu erachicha engaksï jindeni jingoni ánchikuarienga xanharakuarhipasptiksï para jima niárani. Engaksï na kurhaapkia ambe engachi uandapka, tʼámu juesicha engaksï juchari problemani exeni japka, uandasptiksï eskaksï doktoricha no méni jatsispka para pirenchini iurhiri jatsirantani. Juesichaksï pirenchini Nicoleau kuájpispti ka uandasptiksï eska kánikua no sési jarhaska juramuni ambe ma ka no orheta pʼamenchatini kurhamarhini ambe uékasïni eska úminhaaka, jimbokaksï ísï, no janhanharhiani jarhasïnga imani leichani engaksï kʼuiripuechani kuájpiajka.

Ísï tátsekua, sánderu kʼéri jusgadu enga Nueva York japka, ístu uandaspti eska pirenchi Nicoleau jatsipirindi para máteru jásï sïpiata intsïnhani ka no iurhiri jatsirantani. I jindespti primeru xanhari engani jarhuajpipka andani kʼérati jusgaduecharhu jini Estados Unidos paraksï Testiguecha no jatantani iurhiri, ka ístuni máteru tanimu xanhari jarhuajpispka (exe je rekuadruni “ Na engachi úpka andani kʼérati jusgaduecharhu”). Ístuni ánchikuarhispka Beteli  máteru abogaduecha jingoni parachi exeani máteru uandanhiatechani, komu engaksï temungurhiricha jurajperajka, né jingonksï pakaraa sapiicha, kʼumanchikuecheri ka echericheri ambe ka ístu para konstruksioniri ambe.

Engani mítepka Deniseni, diborsiada jarhaspti ka tanimu sapiichani kánguarhiasïrendi. Ánchikuarhisïrendi ka ístu prekursoreni. Ískurini pakataspti exeni na enga xáni sési marhuakuenga Jeobani nájkiruka xáni no sési ambe nitamakuarhipka. Uéxurhini 1992, niraspkachi Kʼéri tánguarhikuarhu Distritueri “Portadores de Luz” jini Nueva York ka arhispka eskani uékasïrenga sánderu sési míteni. Ísï ma uéxurhini tátsekua, niáraspkachi tembuperani ka ji ménichani jarhuajpisïrenga Beteli. Para ji, Jeobaeri intsïmperakua máesti témbani ma jatsini enga xáni sési marhuakujka Jeobani ka xáni tsípikua jingoni irekani. Eska na uandajka Proverbios 31:12, Deniserini méntkisï ambakiti ambe íntskusïndi desde engachi uénaka márku irekani.

Engachi tembuperapka, Deniseri sapiichaksï 11, 13, ka 16 jatirispti. Jimbokani uékasïrenga ambakiti táti máeni para imecha, jánguarhintaspka úni ambe engani xáni arhintenga juchari publikasionicharhu para imecha engaksï no imeri sapiichani tʼarhexerajka. Iámu ini tiempu jimbo, niáraspkachi uandanhiatechani jatsiani, peruni sési pʼikuarherasïnga engajtsïni sapiicha niáraka ísï exeni komu táti uékpiti ma ka amigu ma engaksï mintsinharhijka. Méntkisïchi sési erokaasïrenga imeri amiguechani ka kánikuachi tsitisïrenga engaksï uánikua uátsïcha ka tumbiicha jurhenga kʼumanchikuarhu.

Uéxurhini 2013, Denise ka ji mótsispkachi Wisconsin parachi juchari tátichani kuidariuani. Peruni no erokuarhisïrenga eskani seguiripiringa jarhuajpini Beteli. Ménichani pʼímarinhasïrenga parani seguirini leicheri ambe arhistakuani erachichani.

Septiembrini 2018, exespka eskani someni jatsisïrenga parani orheta jujumeni ante de uandani. Doktoririni no úspti arhini andisïni ísï jujumeeni. Tátsekua máteru doktoririni arhispti eskani imani doktorini jingoni nipiringa enga éjpueri ambe exejka. Eneruni 2019, i doktoririni arhispti eskani jamberi pʼamenchakua ma kámaxapka enga kasi no nema pʼirajka ka enga arhinhajka parálisis supranuclear progresiva (PSP).

Tanimu jurhiatikua tátsekua engani ielurhu ísï jámani japka, tsʼuruaspka ka kuarhajkuspka. Desde iónisï, tsitisïnga ielurhu ísï jámani. Jimbosïni kuenta íntskukuarhipka eskani nóteru úsïrenguia sési manakuarhini. Sóntkuni niáraska sánderu uinhamu jarhani ka i pʼamenchakua úxati eskani úkua jukanchaaka uandani, manakuarhini ka kunajkani ambe ma.

Kʼéri kóntperata máesti engani úka Jeobaeri kúnguarhikuani jarhuatani komu abogadu ma paraka Reinueri ambe orhepani uérapiringa. Ka ístu, kʼéri kóntperata máesti engani úka karaani uánikua artikuluechani para rebistecha engaksï doktoricha, abogaduecha ka juesicha arhiantajka. Ístu, uánikua arhijtsïkperata ambe nitamataraaspka iápuru parhakpinirhu para kuájpiani Jeobaeri testiguechani ka xarhatani eskaksï imecha uáka erakuni eskaksï operarinhaaka ka máteru jásï sïpiata ambeksï intsïnhani ka nóksï iurhiri jatsiranhantani. Peru nájkirukani iámindu ini ambe úka, eska na uandajka Lukasʌ 17:10, ji solu jántspiri máeska ka no ma ambe jukanchasïnga, solu úska ambe engani jatsipka para úni.