1. ¿Náki konsejuchi exentasïni Filipusʌ 2:3 jimbo, ka nénajtsïni marhuachesïni inde ambe úni?

JEOBAERI marhuarichachi kaxumbitiska ka kurhajchasïngachi ambe engajtsïni ima juramuchijka jimbokachi kurhangusïnga eska ima sési mítesti ambe enga sánderu sésiika para jucha (Efes. 4:22-24). Kaxumbikua úsïndi eskachi uáka ambe enga ima uéjka ka no ambe engachi jucha uéjka ka eratseni eskaksï máteruecha sánderu kʼéri ambeska eska jucha. I ambe úsïndi eskachi ambakiti pájperakua ma jatsiaka Jeoba jingoni ka juchari erachicha jingoni (arhinta je Filipusʌ 2:3).

2. a) ¿Ambe uandaspi apostuli Pablu? b) ¿Ambechi exea ini jorhenguarhikua jimbo?

² Peru engachi no jingontku jarhaska, uákachi ísï jámani eska kʼuiripu enga Noambakitiri parhakpinirhu jaka engaksï kʼéramakuarhijka ka nóksï pendienti páni máteruecha jimbo. * Peekaksï máru primeru siglurhu anapu kristianuecha úpiringa indeni ambe úkuarhinchani jimboka apostuli Pablu arini konseju íntsaaspka Roma anapu kúnguarhikuarhu anapuechani: “Jíksïni iáminduechani arhisïnga eskajtsï no jámaaka sánderu kʼéri ambe exekuarhini ka eskajtsï na jindeka, sino eska mándani arhini kaxumbikua jingoni eratsentaaka imeri mismu ambe” (Rom. 12:3). Eskachi na exejka, Pablu uandaspti eskachi jatsiska para sánisï jukaparharakuarhini. Peru kaxumbikuajtsïni jarhuataati parachi no kʼéri ambe exekuarhini. Ini jorhenguarhikua jimbochi exeni  jauaka tanimu ambe nani engajtsïni kaxumbikua jarhuataaka parachi no kʼéri ambe exekuarhini: temungurhirikuarhu, kúnguarhikueri ánchikuarhita ambe jimbo ka redesi sosialicharhu.

3. a) ¿Andiksïsï niárajki arhijperani temungurhiricha? b) ¿Ambeksï úsïni máru enga i ambe úkuarhijka?

³ Jeoba uékasïndi eskaksï temungurhiricha tsípikua jingoni irekaaka. Peru jimbokachi iáminduecha kʼamanharhintstiska, nóchi méntkisï úsïnga iámindu ambe jimbo terukutani máteruecha jingoni. Pablu uandaspti eska imecha engaksï tembuchaaka o uambuchani niáraaka uandanhiatechani jatsiani (1 Kor. 7:28). Máru kristianuechaksï ísï exesïndi enajkiksï méntkisï arhijperani jarhajki imeri uarhiiti o acheeti jingoni ka jamberiksï niárajti eratseni eskaksï no jatsispka para imani jingoni uambuchani o tembuchani. Engaksï ísï eratseakia eska parhakpini anapuecha, uénaatiksï imecheri ambejku jimbo pendienti páni ka eratseni eska sánderu sésiska méntku jurajperani.

4. ¿Ambechi no jatsiski para eratseni?

⁴ Nóchi jatsiska para eratseni eska juchari temungurhirikua no marhuaska. Míteskachi eska Biblia uandasïnga eskaksï temungurhiricha jiántkusï uáka jurajperani enga acheeti o uarhiiti ísku jándikua ambe uáka (Mat. 5:32). Ísï jimbo, engachi imani uandanhiatechani jatsiauaka enga Pablu uandaapka, nóchi jatsiska para kʼéri exekuarhini ka kurhamarhikuarhini: “¿Sési pʼikuarherasïni ji ini temungurhirikua jingoni? ¿Ísïrini xénchasïni eskani ji na jukanchaka? ¿Sánderuni tsípikua jingoni irekapirini máteru kʼuiripu jingoni?”. Nema enga ísï eratsejka, no pendienti pásïndi máteruecha jimbo. I parhakpini jorhentpisïndi eskachi jatsiska para úni ambe engajtsïni juchari mintsita arhijka ka eskachi exeaka nénachi uá jucha tsípikua jingoni irekani nájkirukachi jatsiaka para méntku jurajperani juchari uarhiiti o acheeti jingoni. Peru imecha engaksï újka ambe enga Tata Diosï jorhentpijka, nóksï solu pendienti  pásïndi para imechajku sési uérani sino ístuksï pendienti pásïndi máteruecha jimbo (Filip. 2:4). Jeoba uékasïndi eskachi kuájchakuaka juchari temungurhirikuani ka no eskachi jámaaka jurajperani (Mat. 19:6). Ima uékasïndi eskachi ísï eratseaka eska ima na uéjka ka no ambe engachi jucha uéjka.

5. Eska na uandajka Efesu 5:33, ¿nénaksï jatsiski para kámberani temungurhiricha?

⁵ Acheeti ka uarhiiti jatsistiksï para uékperakua ka janhanharhikua jingonksï kámberani (arhinta je Efesu 5:33). Bibliajtsïni jorhendasïndi eska sánderu jukaparhakueska íntspini ka eska intsïnhani ambe ma (Uku. 20:35). Para uékperakua ka janhanharhikua xarhatatsperani, tsimarhanksï jatsisti para kaxumbitini. I ambe jarhuatauati paraksï no imecheri ambejku pendienti páni sino imeri acheetiri o uarhiitiri ambe jimbo (1 Kor. 10:24).

6. ¿Ambechi jorhenguarhisïni ima amberi enga Steven ka Stephanie uandajka?

⁶ Uánikua temungurhiricha engaksï Jeobani marhuakujka, sánderuksï tsípikua jingoni irekasïndi jimbokaksï kaxumbitiska. Por ejemplu, erachi ma enga Steven arhinhajka, uandasïndi: “Engaksï jorhenguarhiaka márku ánchikuarhini, uátiksï jarhuajperani ka sánderia enga uandanhiata ambe jauaka. Nóksï eratseati ‘¿ambe sánderu sésiski para ji?’, sánderu sési eratseati ‘¿ambe sánderu sésiski para jucha?’”. Imeri témba enga Stephanie arhinhajka, sáno májkueni eratsesïndi. Ima uandasïndi: “No nema uékasïndi irekani nema jingoni enga no újka sési pájperani. Engachi no úni jarhajka terukutani ambe ma jimbo, jánguarhintasïngachi exeni andi. Jiájkani, kómarhisïngachi Jeobani, jirinhantasïngachi informasioni ka uandontskuarhesïngachi. Jánguarhintasïngachi sési péntani uandanhiatani ka no jucha arhijperani jarhani”. Temungurhirichaksï uáti tsípikua jingoni irekani enga acheeti ka uarhiiti no kʼéri ambe exekuarhiska.

7. ¿Néna jatsiski para pʼikuarherani erachi ma enga ánchikuarhita ma intsïnhaska kúnguarhikuarhu?

⁷ Para jucha kʼéri kóntperata máesti marhuakuni Jeobani na engachi xáni uáka (Sal. 27:4; 84:10). Sésisti enga erachi ma uékaaka sánderu ambe úni Jeobaeri kúnguarhikuarhu. Biblia uandasïndi: “Enga nema uékajka jindeni ma arhistatspiti, ambakiti úkuesti enga uékajka úni” (1 Tim. 3:1). Peru enga ánchikuarhita ma intsïnhaska kúnguarhikuarhu, no jatsisti para kʼéri ambe exekuarhini (Luk. 17:7-10). Ambe enga jatsika para úni, jindesti kaxumbikua jingoni marhuakuani máteruechani (2 Kor. 12:15).

8. ¿Ambechi jorhenguarhisïni Diótrefesiri, Usiasiri ka Absaloniri ejemplueri ambe?

⁸ Biblia uandasïndi máru kʼuiripuecheri engaksï niárapka kʼéri exekuarhini. Por ejemplu, Diótrefesi no kaxumbitispti ka tsitisïrendi kʼéri ambeeni kúnguarhikuarhu (3 Juanu 9). Usiasi xarhataspti eska kʼéri ambe exekuarhisïrenga enga uékapka úni ambe ma enga Jeoba no sésikua íntskupka (2 Crón. 26:16-21). Absaloni kánikua jánguarhintaspti paraka kʼuiripu sési exepiringa jimboka uékasïrenga reini (2 Sam. 15:2-6). Eskaksï na xarhatajka i ejempluecha, Jeoba no sáni jaiapanhiantasïndi kʼuiripuechani engaksï uéjka eskaksï kʼéri ambe exenhaaka (Prov. 25:27). No sésiksï kʼamarasïndi imecha engaksï tsitijka eskaksï kʼéri ambe exenhaaka ka uánikua ambeksï uékani jatsini (Prov. 16:18).

9. ¿Náki ejemplujtsïni xarhatacheski Jesusi?

⁹ Peru Jesusijtsïni ambakiti ejemplu ma xarhatachesti. Biblia uandasïndi eska nájkiruka ima ‘ísïpka eska Acha Diósï no jámaspka imani ónharhini ka uékani méntkuenini eska Acha Diósï’ (Filip. 2:6, Táta Diósïri Uandakua Tata Jesukristueri Aiatsperakua [TDU]). Nájkiruka Jesusi, Jeobaeri Uájpeka ka kánikua uinhapitini, no méni kʼéri ambe exekuarhisïndi. Arhiaspti imeri chúxapatichani: ‘Jimboka ima enga sánderu sapichitu  ambeka chánksïni jingoni, ima sánderu kʼéri ambeuaka’ (Luk. 9:48). Kánikua sési pʼikuarherakuarhisïndi marhuani prekursoricha jingoni, orhejtsïkuticheri jarhuajpiricha jingoni, orhejtsïkuticha jingoni ka sirkuitueri orhejtsïkuticha jingoni engaksï májkueni kaxumbitika eska Jesusi. Engachi Jeobaeri marhuaricha kaxumbitijka, xarhatasïngachi eska Tata Diosïri ireta uékperasïnga (Juanu 13:35).

10. ¿Ambechi jatsipirini para úni engachi ísï exeni jaka enajki no sési úkuarhini jaki ambe ma kúnguarhikuarhu?

¹⁰ ¿Ambechi jatsipirini para úni engachi ísï exeni jaka enajki uandanhiata ambe jaki kúnguarhikuarhu ka ísïchi exeni enajki no sési úkuarhini jaki ambe ma? Ju je no uandauandamini, sánderu sési, kaxumbitini ka kurhajchaani imechani engajtsïni orhejtsïkujka (Ebr. 13:17). ¿Nénachi uá ísï úni? Ju je kurhamarhikuarhini: “¿Xánksï kʼéri ambeski uandanhiatecha engani exeajka? Enga uétarhini jaka sési péntani ambe ma, ¿uétarhisïni iáiasï sési peentani? ¿Jíski engani jatsika para sési peentani? Parani mátirku uandani, ¿ambesïni uéjki ji: eska iámu kúnguarhikua májku kʼéri jauaka o eskani ji kʼéri ambe exenhaaka?”.

11. Eska na uandajka Efesu 4:2, 3, ¿ambe úkuarhia engachi kaxumbikua jingoni marhuakuska Jeobani?

¹¹ Jeoba sánderu jukaparharasïndi kaxumbikuani ka eska jorhenani úni ambe ma ka márku jarhani ka eska sóntku úni ambe ma. Ísï jimbo, ju je jánguarhintani kaxumbikua jingoni marhuakuni Jeobani. Ísïchi jarhuajpiaka paraka kúnguarhikua májku kʼéri jauaka (arhinta je Efesu 4:2, 3). Ju je aianhpini na engachi xáni uáka. Ju je ambakiti ambe úni máteruecha jimbo. Ka ju je iáminduechani sési kaani, no solu imechani engaksï kʼéri ánchikuarhita ambe jatsika kúnguarhikuarhu (Mat. 6:1-4; Luk. 14:12-14). Engachi iámu ini ambe úska, máteruechaksï no solu exeati ambe engachi újka úni, sino ístu eskachi kaxumbitiska.

12. ¿Ambe uandasïni Biblia amiguecheri ambe?

¹² Jeoba uékasïndi eskachi sési nitamakuarhiaka juchari amiguecha ka familia jingoni (Sal. 133:1). Jesusi niáraspti ambakiti amiguechani jatsiani (Juanu 15:15). Ístu Biblia uandasïndi na enga xáni marhuajka ambakiti amiguechani jatsiani (Prov. 17:17; 18:24). Ka ístujtsïni arhisïndi eskachi no jatsiska para méntkisï uékani jandiajku jarhani (Prov. 18:1). Uánikuechaksï eratsesïndi eskaksï redesi sosialicha marhuasïnga para uánikua amiguechani jatsiani ka para no jandiajku pʼikuarherani. Peru engachi ini ambe úrajka, jatsiskachi para jingontku jámani.

13. ¿Andiksïsï máru kʼuiripuecha engaksï redesi sosialichani úraajka úpirini no sési pʼikuarherani ka jandiajku?

¹³ Uandanhasïndi eska imecha engaksï ióni exeani jarhajka fotuechani ka ambe engaksï máteruecha karhatajka redesi sosialicha jimbo, uákaksï sánderu no sési ka jandiajku pʼikuarherani. ¿Andi? Ma ambe úpirindi jindeni jimbokaksï kʼuiripuecha imani fotuechani karhataasïnga engaksï sánderu tsitiajka, por ejemplu, nani engaksï sánderu sési xarharajka, ístu imecheri amiguecheri ka imani xáni sési járhati lugaricheri engaksï nika miiuni. Imecha engaksï ini fotuechani exeajka, úpirindiksï eratseni eskaksï imecha no xáni tsípikuarhisïnga níjtuksï xáni sési nitamakuarhini eska máteruecha. Pirenchi ma enga 19 jatirika, uandasïndi: “Uénaspka kánikua no sési pʼikuarherani engani exenga na engaksï máteruecha sési nitamakuarhienga fin de semana jimbo ka ji kuatantasïrenga juchiniujkuni jarhani”.

14. ¿Nénajtsïni jarhuatasïni 1 Pedru 3:8 parachi sési úraani redesi sosialichani?

¹⁴ Ísïsti, uákachi sési úraani redesi sosialichani para familiani ka amiguechani uandajpaani. Peru, ¿exeskichia eska sáno iámindu ambe enga kʼuiripu karhatajka redesi sosialicharhu jindeska paraksï máteruecha exeni ambe engaksï xáni újka? Ísï xarharasïndi enajkiksï uékajki eskaksï kʼéri ambe exenhaaka. Máruksï no sési jásï ambe karasïndi imecheri o máteruecheri fotuecheri ambe. I ambe no sáni terukuntasïndi imani ambe jingoni engaksï kristianuecha jatsika para xarhatani, por ejemplu kaxumbikua ka kurhangukuani máteruechani (arhinta je 1 Pedru 3:8).

15. ¿Nénajtsïni jarhuatasïni Biblia parachi no jámani sési xékuarhini?

¹⁵ Engachi úraajka redesi sosialichani, ju je kurhamarhikuarhini:  “¿Ambe karasïni ka náki fotuechani ka bideuechani karhataasïni redesi sosialicharhu? ¿Úpirini ísï xarhatani eskani sési xékuarhixaka? ¿Uá eskaksï máteruecha enbidia pʼikuarheraaka?”. Biblia uandasïndi: “Jimboka iámindu ambe enga parhakpinirhu jaka komueska enga mintsita tamapu tsitijka, ka engaksï kʼuiripuecha xáni exenchajka, ka teparakuarhikua ambe, nómindu Diosï Tátini jimboeska, sino parhakpini anapu ambesti” (1 Juanu 2:16). Kristianuechachi no uétarhinchasïnga eskajtsïni máteruecha kʼéri ambe exeaka. Sánderu sési, úsïngachi ambe enga Biblia uandajka: “Nómindu tsitini kʼéri ambe úkuarhini ka nójtu jámani ikiatsperani ka níjtu tsititspini [ambe ma]” (Gal. 5:26). Engachi kaxumbitiuaka, nóchi kʼéri pʼikuarheraaka eska parhakpini anapuecha.

16. ¿Andichisï no uéjki kʼéramakuarhini?

¹⁶ Jatsiskachi para kaxumbitini, jimboka imecha engaksï kʼéramakuarhijka nóksï sési eratsentasïnga ambe ma (Rom. 12:3). Úsïndiksï eska arhijperata ambe jauaka ka nóksï pendienti páni máteruecha jimbo. Ístu sáno méntkisï, no sésiksï nitamakuarhisïndi ka ístuksï no sési úkuasïndi máteruechani ima ambe jimbo engaksï eratsejka ka úni. Engaksï no mójtakuaka na engaksï eratsejka, Noambakiti uáti eska imecheri eratsekua ambenarhikuarhiaka ka tsïjpini (2 Kor. 4:4; 11:3). Peru kʼuiripuecha engaksï kaxumbitika, sésiksï eratsentasïndi ambe ma. Nóksï kʼéri ambe exekuarhisïndi sino ísï eska na jindeka, ka kurhangusïndiksï eskaksï máteruecha sánderu kʼéri ambeska uánikua ambe jimbo (Filip. 2:3). Ístuksï mítesti eska Tata Diosï “no jiókuarhiasïnga imechani engaksï teparakuarhijka, peru imechani engaksï kaxumbitika kóndiantasïndi” (1 Ped. 5:5). Imecha engaksï sési eratsentajka iámu ambe jimbo, jánguarhintasïndiksï para Tata Diosï jiókuarhiani.

17. ¿Ambechi jatsiska para úni engachi uéjka méntkisï kaxumbitini?

¹⁷ Engachi uéjka méntkisï kaxumbitini, jatsiskachi para úni ambe enga Biblia uandajka: “Nóterujtsï ísï jámaakia eskajtsï ióntki na jámempka, iásïjtsï ménderueni jáxentaskia”. Para ísï úni, uétarhisïndi eskachi kánikua jánguarhintaaka, jimbokachi jatsiska para jorhenguarhini Jesusiri ejempluni ka eskachi jánguarhintaaka ísï úni eska ima (Kol. 3:9, 10, TDU; 1 Ped. 2:21). Peru kánikua jukaparhakuesti eskachi ísï uáka. Engachi jánguarhintaaka kaxumbitini, juchari familia sánderu tsípikua jingoni irekaati, kúnguarhikuarhu anapuechaksï sánderu májku kʼéri jauati ka uákachi sési úraani redesi sosialichani. Ka sánderu jukaparhakua ambe, Jeobajtsïni újchakuraati ka kóndintani.