1. ¿Ambechi arhikuekasïni engachi jurhimbikueri ambe uandajka?

“¿NÉNARI niáraski jorhenguarhini jurhimbikuani?”. “¿Kʼuiripeskiri indeni ambe jorhenguarhiparini?”. “¿Na xániri páxakia jurhimbikua ambe míteni?”. Jamberichi niáraka ini ambe kurhamarhinhani o juchachi kurhamarhiani máteruechani i ambe. Peru ¿ambechi arhikuekasïni engachi jurhimbikueri ambe uandajka? Arhikuekasïngachi ambe engachi jakajkujka ka ambe engachi újka para Tata Diosïni marhuakuni ka na engachi irekajka. Engachi uandajka eska nema jurhimbikuarhu jarhaska, arhikuekasïngachi eska míteska ambe enga Biblia jorhentpijka ka eska ísï úsïnga eskaksï Bibliaeri konsejuecha na uandajka. Ísï jimbo, no jakajkusïndi chkuanderakua ambe engaksï relijioni no jurhimbiticha jorhentpijka ka tsípikua jingoni irekasïndi nájkiruka kʼamanharhintstika (Juanu 8:32).

2. Eska na arhijka Juanu 13:34, 35, ¿ambe úsïni eskaksï uánikuecha uékaaka jurhimbikueri ambe míteni?

² ¿Ambe úski eskachi uékapiringa jurhimbikueri ambe míteni? Jamberi jindepti ambakiti jángua engaksï Jeobaeri testiguecha xarhatajka (1 Ped. 2:12). O jamberi uékperakua engaksï xarhatajka. Indeni ambeksïsï sánderu exepti uánikuecha engaksï uénapka nirani Kʼumanchikua Reinuerirhu ma jimbo ka sánderuksï i ambe miásïndi ka eska ambe uéjki enga jiáni arhijtsïkperanhapka. Ka i ambejtsïni no ísku pakatasïndi, jimboka Jesusi uandaspka eskaksï kʼuiripuecha niárapiringa exeni eskaksï iámindu imeri chúxapaticha uékperapiringa (arhinta je Juanu 13:34, 35). Peru engachi uéjka eska juchari jakajkukua sánderu kʼéaka jatsiskachi para ístu sánderu ambe úni.

3. ¿Ambe úpirini úkuarhini enga juchari jakajkukua uaxastakata jauaka imani uékperakua jimbo engaksï erachicha xarhatajka?

³ Nóchi solu jatsiska para jakajkuni Tata Diosïni jimbokaksï ambakiti kristianuecha uékperasïnga. ¿Andi? Ju je uandani eska erachi ma, orhejtsïkuti ma o prekursori ma, kánikua no sési ambe niátasïnga, ojtsïni no sési pʼikuastani o apostata úkuarhini ka uandani eska  no ísïska ambe engachi jakajkujka. ¿Ambechi úpirini enga i ambe úkuarhipiringa? ¿No sésichi pʼikuarherapirini ka nóteru marhuakunia Jeobani? I ambejtsïni jorhendasïndi eska engachi uéjka eska juchari jakajkukua kʼéaka, jatsiskachi para ambakiti pájperakua ma jatsini Jeoba jingoni ka no imani ambe jimbo engaksï máteruecha újka. Juchari jakajkukua ísïsti komueska kʼumanchikua ma enga no jatsika para uaxastakata jarhani imani ambe jimbo engachi pʼikuarherajka o ambe engachi eratsejka, sino imani ambe jimbo engachi jorhenguarhijka ka seguru jarhani eska ísïska. Jatsiskachi para jucha mismu exeni eska ísïska ambe enga Biblia jorhentpijka Jeobaeri ambe (Rom. 12:2).

4. Eska na uandajka Mateu 13:3-6, 20, 21, ¿ambeksï úkuarhinchasïni máru engaksï tsʼéjkukuechani nitamakuarhiajka?

⁴ Jesusi uandaspti eskaksï máru “tsípikua jingoni” jiókuarhipiringa jurhimbikuani, peru eskaksï nóteru jakajkupiringuia enga uandanhiata ambe japiringa (arhinta je Mateu 13:3-6, 20, 21). Jamberiksï no kurhangujti eskaksï para Jesusiri chúxapatiini niáraka no sési nitamakuarhini ka tsʼéjkukua ambe jatsini (Mat. 16:24, TNM). Oksï ísï eratseni eska kristianu ma, no méni jatsiasïnga uandanhiatechani ka méntkisï sési irekani. Peru ini parhakpini jimbo no nema úsïndi no ma uandanhiata jatsini. Juchari irekua uáti mójtakurhini ka úni eskachi ma tiempu no xáni tsípikua jingoni irekaaka (Sal. 6:6; Ecl. 9:11).

5. ¿Nénaksï xarhatasïni sáno iámindu Jeobaeri marhuaricha eskaksï seguru jarhaska eska ísïska ambe engaksï jakajkujka?

⁵ Sáno iámindu Jeobaeri marhuarichaksï xarhatasïndi eskaksï seguru jarhaska eska ísïska ambe engaksï jakajkujka. ¿Andi? Jimboka imecheri jakajkukua májkueni jarhasïnga nájkiruka erachi ma no sési pʼikuastaajka o úni ambe ma enga no sési jaka (Sal. 119:165). Méni engaksï újka orhepani uérakuni tsʼéjkukuani ma, imecheri jakajkukua niárasïndi sánderu kʼéni ka nóksï jámasïndi jurajkuni Jeobani (Sant. 1:2-4). ¿Nénachi uá kʼéri jakajkukua ma jatsini?

6. ¿Ambe jimbo uaxastakata jarhaspi primeru siglurhu anapu kristianuecheri jakajkukua?

⁶ Primeru siglurhu anapu Jesusiri chúxapaticheri jakajkukua, uaxastakata jarhaspti imani ambe jimbo enga Tata Diosïri Karakata uandajka ka ambe enga Jesusi jorhentpipka, enga jindeka ‘ambakiti aianhperakua eskamindu na jurhimbikueka’ (Gal. 2:5). I jurhimbikua ambe, iámindu imani ambe arhikuekasïndi engachi xáni jakajkujka kristianuecha ka ístu ambe enga xáni Jesusi úka para íntspini imeri tsípikuani juchantsïni jimbo ka imeri tsíntskueri ambe. Apostuli Pablu sési mítespti eska i ambe ísïspka. ¿Andi? Jimboka úrasïrenga Tata Diosïri Karakatani para jánhastpini “eska uétarhisïrenga eska ima enga jindepka Diosïri Míndakata tekaantapiringa ka uarhini, ka ménderu tsíntani uarhiricharhu” (Uku. 17:2, 3). Primeru kristianuechaksï jiókuarhispti ini jorhentperakuani ka kurhajkuarhisptiksï espiritu santueri jarhuajperata paraksï úni kurhanguni Tata Diosïri Karakatani. Jirinhantasptiksï sánderu ambe paraksï seguru jarhani eskaksï ima jorhentperakuecha Tata Diosïri Karakatarhu pʼitakata jarhaspka (Uku. 17:11, 12; Ebr. 5:14). Imecheri jakajkukua no solu uaxastakata jarhaspti imani ambe jimbo engaksï imecha pʼikuarherenga ni ambe engaksï eratsenga, ka nóksï marhuakusïrendi Jeobani solu jimbokaksï sési pʼikuarherasïrenga máteru kristianuecha jingoni jarhani. Sánderu sési, imecheri jakajkukua uaxastakata jarhaspti Tata Diosïri jurhimbikua ambe jimbo (Kol. 1:9, 10).

7. ¿Nénajtsïni marhuachia jakajkuni ambe enga Biblia jorhentpijka?

⁷ No méni mójtakurhisïndi ambe enga Biblia jorhentpijka (Sal. 119:160). Por ejemplu, no mójtakurhisïndi Bibliaeri jorhentperakua ambe jiáni engajtsïni erachi ma no sési pʼikuastajka o enga no sési ambe niátajka. Níjtu jiáni engachi uandanhiata ambe jatsijka. Ísï jimbo, jatsiskachi para sési míteni ambe enga Biblia jorhentpijka ka seguruchi jarhani eska inde ambe ísïska. Ísï eska anhatapu ma  enga no kuarhatsejka jiáni enga kʼéri janijka jimboka iauani inchaskuaska imeri sïranguechani, juchari jakajkukua enga uaxastakata jauaka imani ambe jimbo enga Biblia jorhentpijka, májkuentsïni jarhuataati orhepani uérani engachi no sési nitamakuarhiaka. ¿Nénachi uá sánderu seguru jarhani eska jurhimbitkueska ambe engachi jakajkujka?

8. Eska na uandajka 2 Timoteo 3:14, 15, ¿néna niáraspi Timoteu seguru jarhani eska ísïspka ambe enga jakajkuenga?

⁸ Timoteu seguru jarhaspti eska ísïspka ambe enga jakajkuenga. ¿Néna niáraspi seguru jarhani? (arhinta je 2 Timoteo 3:14, 15). Imeri nándi ka imeri mama kʼéri, jorhendasptiksï pímbinhasï karakateri ambe. Peru ístu ima mismu jánguarhintaspti arhutani tiempu para jorhenguarhini. Ka inde ambe jimbo, niáraspti jakajkuni ambe enga sési jimbo mítepka. Tátsekua, Timoteu, amamba ka imeri mama kʼéri, niárasptiksï jorhenguarhini ambe enga Kristu jorhentpipka. Ísïsti, ísku pakatapti Timoteuni ima uékperakua engaksï Jesusiri chúxapaticha xarhatenga ka mintsita jingoni uékasïrendi erachichani jingoni jarhani ka kuájchakuani (Filip. 2:19, 20). Peru imeri jakajkukua no uaxastakata jarhaspti ambe enga máteruecha jimbo pʼikuarherenga, sino ambe enga jorhenguarhienga Tata Diosïri Karakatarhu enga uénga eska sánderu ambakiti pájperakua ma jatsipiringa Jeoba jingoni. Juchajtuchi jatsiska para jorhenguarhini ambe enga Biblia uandajka Jeobaeri ambe ka sési eratsentani parachi exeni eska ísïska ambe engachi jorhenguarhini jaka.

9. ¿Ambe tanimu amberichi jatsiski para seguru jarhani?

⁹ Uénani jámani, jatsiskachi para seguru jarhani ari tanimu amberi engaksï kánikua jukaparhakueka. Orheta, eska Jeoba jindeska Kuerajpiri iámindu amberi (Éx. 3:14, 15; Ebr. 3:4; Jaŋ. 4:11). Tsimani, eska Biblia uandasïnga ambe enga Tata Diosï uéjka eskaksï kʼuiripuecha míteaka (2 Tim. 3:16, 17). Ka tanimu, eska Jeoba kúnguarhikua ma jatsiska enga imani kómarhijka, engaksï jindeka Jeobaeri testiguecha, ka enga Kristu orhejtsïkujka (Is. 43:10-12; Juanu 14:6; Uku. 15:14). Parachi seguru jarhani eska i tanimu ambe ísïska, no uétarhisïndi eskachi uánikua ambe míteaka Bibliaeri ambe. Ambe engachi kʼóru jatsika para úni, jindesti sési eratsentani iámu ambe parachi seguru jarhani eska ísïska ambe engachi jakajkujka (Rom. 12:1).

10. Aparte de jurhimbikueri ambe míteni, ¿ambeteruchi jatsiski para úni?

¹⁰ Engachi na seguru jarhajkia eska ísïska ambe engachi jakajkujka Jeobaeri ambe, Bibliaeri ka Tata Diosïri ireteri ambe, jatsiskachi para míteni néna xarhatakuani máteruechani Biblia jingoni eska i ambe ísïska. ¿Andi? Jimbokachi kristianuecha jatsiska para máteruechani jorhendaani jurhimbikueri ambe engachi jucha jorhenguarhijka (1 Tim. 4:16). * Ka engachi jánguarhintajka máteruechani jarhuataani paraksï jakajkuni eska ísïska ambe enga Biblia uandajka, juchari jakajkukua sánderu kʼésïndi.

11. ¿Nénachi uá májkueni úni eska Pablu engachi jorhendani jauaka nemani Bibliaeri ambe?

¹¹ Enga apostuli Pablu jorhentpienga, jánguarhintasïrendi jorhendaani “Jesukristueri ambe, terukutantsparini Moisesiri leini jingoni, ka uandajtsïkpiticheri karakatechani jingoni” (Uku. 28:23). ¿Nénachi uá májkueni úni eska Pablu engachi jorhendani jauaka nemani Bibliaeri ambe? Nóchi solu jatsiska para arhini ambe enga Biblia uandajka. Jatsiskachi para jarhuatani sési eratsentani ambe enga jorhenguarhini jaka Bibliaeri ambe jimboka ísï uáka Jeobani andarhierani. Nóchi uékasïnga eska jorhenguarhiaka jimbokajtsïni kʼéri ambe exesïnga, sino eska ima mismu seguru jauaka eska ísïska ambe enga jorhenguarhini jaka juchari Táti uékpitiri ambe.

12, 13. ¿Ambeksï uá úni táticha paraksï jarhuataani imecheri sapiichani méntkisï jurhimbikuarhu jarhani?

¹² Táticha, chájtsï uéjka eskaksï chári sapiicha méntkisï jurhimbikuarhu jauaka. Jamberijtsï eratsejka eska engaksï imecha ambakiti amiguechani jatsiauaka kúnguarhikuarhu, imecheri jakajkukua sánderu kʼéaka. Peru parakaksï chári sapiicha seguru jauaka eska ísïska ambe engaksï jakajkujka, no solu uétarhisïndi eskaksï ambakiti amiguechani jatsiauaka. Uétarhisïndi eskaksï imecha ambakiti pájperakua ma jatsiaka Tata Diosï jingoni ka eskaksï seguru jauaka eska ísïska ambe enga Biblia jorhentpijka.

¹³ Engajtsï cha uéjka jorhendaani chári sapiichani Tata Diosïri jurhimbikueri ambe, jatsiskajtsï para cha uénani ambakiti jorhenguarhiricheni Bibliaeri. Arhuta je tiempu parajtsï eratsentani imani ambe engajtsï jorhenguarhijka. Ísïjtsï uáka jorhendaani chári sapiichani paraksï májkueni úni. Exeraa je néna úrani ambe engachi xáni jatsika para Bibliani jorhenguarhini ísï eskajtsï na újka imani kʼuiripuecha jingoni engajtsï Bibliaeri ambe jorhendaajka. Engajtsï ísï uáka, jarhuataantsï jauaka chári sapiichani paraksï xénchani Jeobani ka eskaksï mintsikaaka jántspirini enga mintsinharhikueka ka jánhastiini enga Jeoba úrajka parajtsïni jorhendani ambe ma (Mat. 24:45-47). Asï solu jorhendaa je chári sapiichani ambe enga ma orheta jatsika para jorhenguarhini Bibliaeri ambe. Seguni na engaksï xáni jatirika ka na engaksï xáni uáka  jorhenguarhini, jarhuataa je paraksï Tata Diosïri ambe míteni “asta imani jamberi enga sánderu úkua jukaka”, ísï úparini, imechaksï niáraati kʼéri jakajkukua ma jatsini (1 Kor. 2:10).

14. ¿Andichisï jatsipirini para jorhenguarhiani Bibliarhu anapu profesiechani? (Exe je rekuadruni “ ¿Míteskichi néna jorhentpiani ini profesiechani?”).

¹⁴ Profesiechaksï ístu kánikua jukaparhakua ambesti Tata Diosïri Karakatarhu ka jarhuatasïndijtsïni parachi sánderu mintsikani Jeobani. ¿Náki profesiechaksï úski eska sánderu kʼéaka juchari jakajkukua? Jamberiksï jindeti imecha engaksï últimu jurhiatikuecheri ambe uandajka (Mat. 24:3, 7; 2 Tim. 3:1-5). Peru ístu máteru profesiecha engaksï úkuarhikia, uátijtsïni jarhuatani para juchari jakajkukua sánderu kʼéni. Por ejemplu, ¿úsïnchi uandantani nénaksï úkuarhiski ka nénaksï úkuarhixaki iásï ima profesiecha engaksï Daniel kapituluecha 2 ka 11 jimbo uandaajka? * Enga juchari jakajkukua sési uaxastakata jauaka imani ambe jimbo enga Biblia jorhentpijka, uákachi orhepani uérakuni náki uéjki tsʼéjkukuani. Ju je exeni máru erachicheri ejemplu engaksï no sési kánhapka Alemania jiánisï enga úkuarhini jápka Segunda Kʼéri Uarhiperakua Interu Parhakpinirhu. Nájkirukaksï erachicha no iámindu ambe kurhanguenga i profesiecheri engaksï últimu jurhiatikuecheri ambe uandenga, mintsita jingonksï jakajkusïrendi ambe enga Tata Diosïri Karakata uandajka.

15-17. ¿Néna jarhuataaspi erachichani Bibliaeri ambe jorhenguarhini engaksï násicha no sési kaapka?

¹⁵ Engaksï násicha juramuni jápka Alemania, uánikua erachichanksï ónhaaspti paraksï uinhamu ánchitanhani. Hitler ka Heinrich Himmler, enga kʼéri ambepka ejersiturhu, kurhunhiasïrendiksï Jeobaeri testiguechani. Pirenchi ma uandantaspti eska Himmler arhiaspka máru pirenchichani engaksï ónhakata jápka: “¡Engajtsï cha ísï jakajkujka, chári Jeoba uáti auandarhu juramuni, peru ixú Echerirhu juchasïni juramuni jaka! ¡Exeakajtsïa né sánderu ióni tekaantaa, cha o jucha!”. ¿Ambe jarhuataaspi erachichani paraksï no méni jurajkuni Jeobani?

¹⁶ Ima Bibliaeri Jorhenguarhitichaksï mítespti eska Tata Diosïri Reinu 1914 jimbo uénaspka juramuni. Mítesptiksïa eskaksï niárapiringa no sési kánhani. Jeobaeri ireta mítespti eska no ma parhakpini  anapu juramuti úpiringa ójkutani para úkuarhini ambe enga Tata Diosï uéjka. Hitler no úpirindi kʼamajkuni Tata Diosïri iretani, níjtu úpirini uaxastani juramukua ma enga kénditapiringa Tata Diosïri Reinuni. Erachichaksï sési mítetixapti eska Hitleriri juramukua no ióni marhuapiringa.

¹⁷ ¡Ka ísïspti ambe engaksï eratsenga! No ióni jimbo, násicheri juramukua niáraspti kʼamakurhini ka Heinrich Himmler —acheeti enga uandapka eska Echerirhu imechaksïsï juramuni japka— sïpakuarhispti. Enga sïpakuarhini japka, mítentaspti erachini ma enga Lübke arhikuarhienga ka enga antesi ónhakata japka. Nóteru jánhaskaparini ambe úni, Himmler arhispti erachini: “Bibliaeri Jorhenguarhiri, ¿iásï ambe úkuarhiaia?”. Erachi Lübke arhispti eskaksï Jeobaeri testiguecha tʼuini mítespkia eska násicheri juramukua no ióni marhuapiringa ka eskaksï imecha niárapiringa uéntani kárselirhu. Himmler —acheeti enga xáni no sési uandenga Jeobaeri testiguecheri ambe — ísku pakaraspti. Sánisï tátsekua, uandikukuarhispti. ¿Ambechi jorhenguarhisïni? Eska Bibliaeri ambe jorhenguarhini, asta profesiechani jamberi, jarhuataakajtsïni parachi no méni jurajkuni Jeobani ka úni eskachi méntkisï mintsikaaka imani jiáni engachi tsʼéjkukua ambe nitamakuarhini jauaka (2 Ped. 1:19-21).

18. Eska na uandajka Juanu 6:67, 68, ¿andichisï uétarhinchajki “míteni ambe enga ísïka ka enga sésika para úni”, ísï eska Pablu na uandapka?

¹⁸ Iáminduechachi jatsiska para xarhatani imani uékperakuani engaksï jimbo mítenhantajka jurhimbiti kristianuecha. Peru ístuchi uétarhinchasïnga “míteni ambe enga ísïka ka enga sésika para úni” (Filip. 1:9). Engachi no ísï úska, úpiringachi jurajkutakuarheni eskachi “sánisï ambe jimbo umbarhinhaaka ka jakajkutaranhanchi nákinterku ma jásï jorhenguani engaksï kʼuiripuecheri eratsekua jimbo úkateka”, por ejemplu apostatecheri (Efes. 4:14). Primeru sigluni engaksï uánikua Jesusiri chúxapaticha jurajkupka Jesusini, apostuli Pedru uandaspti eska Jesusi jatsiaspka “uandakuechani engaksï jindeka para tsípikua méntkisï jatsini” (arhinta je Juanu 6:67, 68). Nájkiruka jiánisï Pedru nótki sési kurhanguenga ambe engaksï xáni arhikuekenga ima uandakuecha, no jurajkuspti Jesusini jimboka kurhangusïrenga ambe enga ísïpka Kristueri ambe. Engachi juchajtu jánguarhintaaka sánderu seguru jarhani eska ísïska ambe enga Biblia jorhentpijka, méntkisïchi mintsikaaka Jeobani nájkirukachi tsʼéjkukua ambe jatsiaka ka jarhuatauakachi máteruechani paraksï imechajtu kʼéri jakajkukua ma jatsini (2 Juanu 1, 2).