1. ¿Ambe úpirini úkuarhini enga andaperakua ambe japiringa?

INI parhakpini jimbo, uánikua kʼuiripuechaksï jánguarhintasïndi úni ambe enga uétarhiaka paraksï xarhatani eskaksï sánderu kʼéri ambeeska eska máteruecha. Pori ejemplu, achamasï ma enga negosiu ma jatsika, úpirindi no sési úkuani máteruechani nomasi para imeeri negosiu sánderu kʼéni. O chʼanari ma úpirindi no sési úkuni máteru chʼanarini nomasi para úni andani. Ka ístu tumbi ma enga uékajka ambakiti unibersidadirhu ma inchani, úpirindi trampa úni para úni imani unibersidadini jimbo nirani enga uéjka. Kristianuechachi míteska eska i ambe no sési jarhaska jimboka jindeeska “mintsita tamapueri úkuecha” (Gal. 5:19-21). Joperu, ¿úpirini úkuarhini eskaksï máru Tata Diosï Jeobaeri marhuaricha sánderu kʼéri pʼikuarherapiringa ka úni eskaksï máteruecha májkueni pʼikuarheraaka no kuenta íntskukuarheparini? Jukaparhakuesti eskachi mókuntaaka ini kurhamarhikuani, jimboka inde ambe úpiringa úni eskachi no uaaka sési pájperani kúnguarhikuarhu.

2. ¿Ambechi exea ini jorhenguarhikua jimbo?

² Ini jorhenguarhikua jimbo uandaakachi ima amberi enga uaaka úni eskachi jucha uékaaka sánderu kʼéri ambeeni eska máteruecha, ístuchi jorhenguarhiaka ambe engaksï úpka máru ióntki anapu ambakiti kʼuiripuecha engajtsïni xarhatacheaka na engaksï imeecha no méni uékapka sánderu kʼéri ambeeni eska máteruecha. Joperuchi orheta exeaka ambe jimbochisï újki ambe ma.

3. ¿Ambe ka ambechi jatsiski para kurhamarhikuarhini?

³ Sési jarhasti eskachi someni exekuarhini jauaka, ambe jimbochisï újki ambe ma. Uaakachi kurhamarhikuarhini: “¿Jatsiski parani máteruecha jingoni terukukuarhintani parani sési  pʼikuarherani? ¿Ambesï újki eskani uékaaka marhuani kúnguarhikuarhu? ¿Jindeeski parani xarhatani eskani sánderu kʼéri ambeeska eska máteruecha o sánderu kʼéri ambeeni eska erachi o pirenchi ma? ¿O jindeeski parani úni sánderuni sési marhuakuni Tata Diosï Jeobani?”. ¿Andisï xáni jukaparhakue mókuantani ini kurhamarhikuechani. Ju je exeni ambe enga Biblia uandajka.

4. Eska na uandajka Galasia 6:3, 4, ¿andichisï no jatsi para terukukuarhintani máteruechani jingoni?

⁴ Bibliajtsïni arhisïndi eskachi no jámaaka máteruecha jingoni terukukuarhintani (arhinta je Galasia 6:3, 4). ¿Andi? Jimboka engachi terukukuarhintaska máteruecha jingoni, uaakachi sánderu kʼéri pʼikuarherani ka í ambe uaati eskachi kʼéramakuarhiaka. Ka engachi menusi pʼikuarheraska, í ambe uaati úni eskachi chkétakukuarhiaka. Ka no ma í jásï ambe xarhatasïndi eskachi eratsekua jukariska (Rom. 12:3). Pirenchi ma enga Grecia anapueka ka enga Katarina * arhinhajka, uandasïndi: “Ji pʼindespkia terukukuarhintani máteru pirenchicha jingoni engaksï sánderu sési jáxepka eska ji, engaksï sánderu sési aianhpienga ka engaksï sánderu sési pájpereenga máteruecha jingoni. Ka í ambe úsïreendi eskani ji ísï pʼikuarherapiringa eskani no ma ambe jukaparhakuespka”. Ju je miáni eskajtsïni Tata Diosï Jeoba xénchasïnga jimbokachi jucha xénchasïnga imani ka jimbokachi kurhajchasïnga imeeri Uájpani ka no jimbokachi sési jáxeska, o jimbokachi úsïnga sési uandontskuarheni o sési pájperani máteruecha jingoni (Juanu 6:44; 1 Kor. 1:26-31).

5. ¿Ambejtsï jorhenguarhisïni chá imani ambe jingoni enga úkuarhinchapka erachi ma enga arhinhajka Hyun?

⁵ Ístuchi jatsiska para kurhamarhikuarhini: “¿Ísïjtsïni exesïni máteruecha eska nema enga jirejiresï sési pájperantajka máteruecha jingoni o eskani méntkisï arhijperani jarhasïnga nema jingoni?”. Ju je exeni ambe enga úkuarhinchapka erachi ma enga arhinhajka Hyun, enga Korea del Sur irekaka. Ma tiempu, ima ikiakuasïreendi imeechani engaksï pribilejiuechani jatsiapka kúnguarhikuarhu. Ima uandantasïndi: “Uandatsiasïreenga ka no méni jiókuarhisïreenga ambe engaksï imeecha uandeenga”. ¿Ambe úkuarhispi? Uandasïndi: “Ambe engani ji úni japka, úspti eska kúnguarhikuarhu no úpiringa sési pájperanhani”. Uánikua imeeri amiguechaksï jarhuataspti paraka kurhangupiringa eska jatsispka para mójtakukuarhini. Hyun mójtakukuarhespti ka iásï, ambakiti orhejtsïkuti máestia. ¿Ambechi jorhenguarhisïni? Engachi kuenta íntskukuarheska eskachi andaperani jámaxaka máteruecha jingoni, o eskachi úxaka eska kúnguarhikuarhu no uaaka sési pájperanhani, jatsiskachi para sóntku mójtakukuarhini.

6. Eska na arhijka Galasia 5:26, ¿ambe uaa úni eskachi andaperaaka máteruecha jingoni?

⁶ (Arhinta je Galasia 5:26). ¿Ambe uaa úni eskachi jucha uékaaka andaperani máteruecha jingoni? Ma ambe jindeesti enga nema kʼéramakuarhijka. Enga nema ísï exekuarhijka, sánderu kʼéri pʼikuarherasïndi eska máteruecha ka no uandanhiasïndi máteruechani jimbo. Máteru ambe jindeepirindi enbidia. Ima enga enbidiariuajka máteruechani, tsitisïndi imani ambe jatsini engaksï máteruecha jatsijka, joperu ístu uékasïndi eskaksï máteruecha no ma ambe ma jatsiaka. Ísï jimbo, enbidiarini nemani arhikuekasïndi eskachi kurhunhisïnga. Ka juchachi no méni uékapiringa xásï kʼuiripu máeni.

7. ¿Náki ejemplujtsïni xarhatachesïni na enga no sésiika enbidia pʼikuarherani ka kʼéramakuarhini?

⁷ Kʼéramakuarhini ka enbidia pʼikuarherani, úpirindi ísïini eska ima basura enga jánharhitajka gasolina enga abioni ma jatantajka, abioni úpirindi kárani, peru ima basura úpirindi sánhani arhini mikaani manguerechani nani enga ísï nirajka gasolina. I ambe úpirindi úni eskaksï  motoricha sánhani arhipiringa patakuarhini ka ante de kétseni, abioni úpirindi uekorhentani. Sáno májkueni, jamberi nema úpirindi sáni ióni páni jarhania marhuakuani Tata Diosï Jeobani, joperu úpirindi no sési úkuarhinchani enga enbidia pʼikuarherapiringa ka kʼéramakuarhini (Prov. 16:18). Jurajkupirindi Tata Diosï Jeobani, no sési úkuarhinchapirindi ima ka máteruechantu no sési úkuapirindi. ¿Ambechi uaa úni parachi no kʼéramakuarhini ni enbidia pʼikuarherani?

8. ¿Ambejtsïni jarhuataa parachi no kʼéramakuarhini?

⁸ Uaakachi no kʼéramakuarhini engachi úska ambe enga apostuli Pablu arhiapka Filipusï anapuechani: “Asï jáma je úni ni ma ambe enbidia jimbo o teparakuarhikua jimbo, sino kaxumbikua jingoni, ka sánderu kʼéri ambe exeani máteruechani ka eska chájkumindu” (Filip. 2:3). Engachi eratseska eskaksï máteruecha sánderu kʼéri ambeeska, nóchi méni jámaaka andaperani imeecha jingoni engaksï sánderu sési jorhenaka úni ambe ma eska jucha, sinochi sési pʼikuarheraaka imeechani jimbo. I ambe kánikua jukaparhakuesti, sánderu jiáni engaksï ima erachicha engaksï jorhenaka sési úni ambe ma, úrani jaka imani ambe paraksï kʼéri ambe arhini Tata Diosï Jeobani. Ka engaksï ima erachicha engaksï sési újka ambe ma, ísïksï uaaka eska Pablu na uandapka, ambakiti ambejtsïni exechiati juchantsïni. Ísïchi uaaka sési pájperani iáminduecha ka márku jarhani kúnguarhikuarhu.

9. ¿Ambejtsïni jarhuataa parachi no enbidia pʼikuarherani?

⁹ ¿Ambejtsïni jarhuataa parachi no enbidia pʼikuarherani? Kaxumbitini, jatsiskachi para jiókuarhini eskachi no úsïnga iámindu ambe sési úni. Engachi kaxumbitiska nóchi jámaaka uékani xarhatakuani máteruechani eskachi sánderu sési úsïnga ambe ma. Sánderu sési, jánguarhintaakachi jorhenguarhini imeecheri engaksï sánderu sési újka ambe ma eska jucha. Pori ejemplu, enga erachi ma sési arhijtsïkpijka kúnguarhikuarhu, jánguarhintaakachi kurhamarhini néna prepararikuarhisïni ka enga pirenchi ma sánderu sési úmantajka eska jucha, uaakachi kurhamarhini ambe ka ambe jatsikusïni. Ka enga tumbi ma no újka uánikua amiguechani jatsiani, sési jauati enga kurhamarhiska nemani enga amiguechani jatsiaka, ambe ka ambe úsïni para úni jatsiani amiguechani. Iámindu i ambejtsïni jarhuataati parachi no enbidia pʼikuarherani ka parachi jorhenguarhini sánderu sési úni ambe ma.

10. ¿Ambe nitamakuarhispi Gedeóni?

¹⁰ Ju je exeni ambe enga úkuarhinchapka Gedeóni enga Manasésiri triburhu anapuepka ka acheeticha engaksï Efraíniri triburhu anapuepka. Tata Diosï Jeobaeri jarhuajperata jimbo, Gedeóni ka imeeri 300 kʼuiripuecha engaksï imani jingoni jámeenga, andasptiksï guerrani ma engaksï jimbo úpiringa kʼéramakuarhini. Efraíniri triburhu anapuechaksï niraspti uandontskuarheni Gedeónini jingoni, joperu no paraksï ambakiti ambe arhini, sino paraksï no sési arhini. Péringaksï no sési pʼikuarherani japka jimboka Gedeóni no pʼímarhiaspka parakaksï nipiringa Tata Diosïri enemiguecha jingoni uarhipeni. Xánksï no sési pʼikuarheraxapti na engaksï pakarapiringa imeecha, engaksï no exeni japka ambe enga sánderu jukaparhakuepka. Gedeóni úspti ambe ma paraka kʼéri ambe arhinhapiringa Tata Diosï Jeobaeri nombri ka para kuájchakuni imeeri iretani (Juec. 8:1).

11. ¿Néna mókukuaspi Gedeóni Efraíni anapu achamasïchani?

¹¹ Kaxumbikua jingoni, Gedeóni arhiaspti Efraíni anapu acheetichani: “¿Ka ambe úskia ji imani xáni kʼéri ambe jingoni engajtsï chá úka?”. Tátsekua, arhiaspti na enga Tata Diosï Jeoba újchakuraapka imeechani. I ambe úspti eskaksï imeecha nóteru ikiapiringia (Juec. 8:2, 3). Ístu, Gedeóni tekaantaspti paraka Tata Diosïri ireta úpiringa sési pájperani.

12. ¿Ambechi uaa jorhenguarhini Efraíniri tribueri ka Gedeóniri ambe?

¹² ¿Ambechi jorhenguarhisïni ini ejemplu jingoni? Efraíniri tribueri, jorhenguarhisïngachi eskachi jatsiska para méntkisï sánderu jukaparharani kʼéri ambe arhini Tata Diosï Jeobani ka no jucha sési pakarani. Ka Gedeóniri ambe, familiarhu anapu orhejtsïkuticha ka orhejtsïkutichaksï uaati jorhenguarhini, eska enga nema arhiaska ambe ma imani ambe jimbo engaksï ima úka, eskaksï jatsiska para jánguarhintani para ísï exeni ambe ma eska ima erachi na exejka. Ístuksï jatsisti para méntkisï sési arhini imani ambe jimbo enga sési úni jaka. Para i ambe úni uétarhisïndi kaxumbitini, sánderia jiáni enga xarharajka eska ambe enga máteru uandani jaka no ísïiska. Joperu sánderu jukaparhakuesti eska kúnguarhikuarhu pínandikua jauaka ka eska xarhatakuani eska ambe engachi jucha uandani jaka ísïiska.

13. ¿Náki uandanhiata jatsispi Ana ka ambe úspi?

¹³ Ju je exeni Anaeri ejempluni. Uámbuchatixapti lebita ma jingoni enga Elkaná arhinheenga, ka ima kánikua xénchasïreendi Anani. Joperu Elkaná, jatsispti máteru uarhiitini enga Peniná arhinheenga. Elkaná sánderu xénchasïreendi Anani ka eska Penináni. Joperu “Peniná kánguarhiasïreendi sapiichani ka Ana nómbe”. Peniná, “méntkisï teresmarhusïreendi para no sési pʼikuastani”, ‘Ana pʼiarasïreendi uerani ka no ma ambe tʼiresïreendi’ (1 Sam. 1:2, 6, 7). Nájkiruka Ana i ambe nitamakuarhini japka, Biblia no nani uandasïndi eska jámapiringa no sési ambe úkuntani Penináni. Sánderu sési, mintsita  jingoni aiangukuarhispti Tata Diosï Jeobani ka mintsikaspti eska ima úpiringa jarhuatani. Nóchi míteska sini Peniná mójtakuarhipi o nómbe. Ambe engachi kʼóru míteka, jindeesti eska Ana niáraspka sési pʼikuarherantani, jimboka Biblia uandasïnga eska nóteru ‘kómu nínharhixapkia’ (1 Sam. 1:10, 18).

14. ¿Ambechi jorhenguarhisïni Anaeri ambe?

¹⁴ ¿Ambechi jorhenguarhisïni Anaeri ambe? Enga nema andaperani uékani jauaka juchantsïni jingoni, ju je miáni eska juchaari jájki jimbo jarhaska ambe engachi uaaka úni. Nóchi jatsiska para arhijperani jámani jarhani. Ka nóchi jámaaka no sési ambe úkuntani, sánderu sési, jánguarhintaakachi puátsperantani (Rom. 12:17-21). Nájkiruka máteru kʼuiripu no mójtakurhiaka, juchachi uaaka agustu pʼikuarherani.

15. ¿Ambe ka ambe jimboksï májkuenispi Apolosi ka Pablu?

¹⁵ Últimu, ju je exeni ambe engachi jorhenguarhijka Apolosiri ka apostuli Pablueri ambe. Tsimarhanksï kánikua mítespti Tata Diosïri Karakatechani ka ambakiti jorhentpirichesptiksï. Ístu, tsimarhanksï uánikua kʼuiripuechani jarhuataspti paraksï Jesúsiri chúxapatini. Joperuksï no méni jámaspti andaperani.

16. ¿Na jásï kʼuiripuespi Apolosi?

¹⁶ Apolosi, Alejandría andajpenuspti, jiánisï i ireta kánikua mítekatespti jimbokaksï kʼuiripuecha jima nirasïreenga jorhenguarhini. Péringa Apolosi sési arhijtsïkpienga ka sési míteaspti Tata “Diosïri Karakatechani” (Uku. 18:24). Enga Apolosi Korintu nípka ma tiempu, máru erachichaksï ueenaspti xarhatani eskaksï sánderu jaiapanhentasïreenga imani ka eska máteru erachichani, komueska Pabluni (1 Kor. 1:12, 13). ¿Jaiapanhentaspi Apolosi i ambe? Nómbe. Sánisï tátsekua enga Apolosi nintapka Korintu uératini, Pablu mémindu arhispti eska kʼuanhatsentapiringa (1 Kor. 16:12). Pablu no méni indeni ambe arhipirindi Apolosi enga exepiringa eska úxapka eska kúnguarhikua no márku japiringa.  Apolosi úxapti imani ambe enga jorhenapka úni para ambakiti ambe úni: para aianhpini ambakiti ambe ka para uinhaperaantani erachichani. Ístu, uaakachi seguru jarhani eska Apolosi kaxumbitispka. Bibliarhu no nani arhisïndi eska ima ikiaspka enga Ákila ka Prisila ‘janhastapkaksï sánderu sési Tata Diosïri xanharuni’ (Uku. 18:24-28).

17. ¿Ambe úspi Pablu paraka pínandikua japiringa kúnguarhikuarhu?

¹⁷ Apostuli Pablu sési mítetixapti ambakiti ánchikuarhitani enga Apolosi úni japka. Joperu no uandanhiasïreendi eskaksï kʼuiripuecha eratsepiringa eska Apolosi sánderu sési úsïreenga ambe ma. Imani ambe jingoni enga Pablu karakuapka Korintu anapuechani, úsïngachi exeni eska Pablu kaxumbitispka ka eska kurhangutspisïreenga. No méni uékaspti kʼéri pʼikuarherani engaksï máteruecha arhienga: “Ji Pablueriska”. Sánderu sési, méntkisï uékaspti eska Tata Diosï Jeoba ka tata Jesukristu kʼéri ambeksï exenhapiringa (1 Kor. 3:3-6).

18. Eska na uandajka 1 Korintu 4:6, 7, ¿ambechi uaa jorhenguarhini Apolosiri ka Pablueri ambe?

¹⁸ ¿Ambechi jorhenguarhisïni Apolosiri ka Pablueri ambe? Eska iámindu ánchikuarhita engachi újka Tata Diosï Jeobani jimbo ka ístu engachi jarhuatajka nemani para itsï atakuarhini, úsïnga úkuarhini Tata Diosï Jeobaeri kóntperata jimbo. Máteru ambe engachi jorhenguarhijka, jindeesti eska engachi kʼérati ánchikuarhitechani jatsiauaka kúnguarhikuarhu, sánderuchi jatsiska para jánguarhintani paraka kúnguarhikuarhu sési pájperanhaaka ka eska márku jauaka. Orhejtsïkuticha ka orhejtsïkuticheri jarhuajpiricha i ambeksï úsïndi engaksï úrajka Tata Diosïri Karakatani paraksï konsejuechani íntspiani ka engaksï no imeecha uéjka sési pakarani sino engaksï májkueni újka eska tata Jesukristu. ¡Xáni engachi sési pʼikuarherajka i járhati erachichani jatsiani! (Arhinta je 1 Korintu 4:6, 7).

19. ¿Ambechi uaa úni mándani arhi jucha? (Ístu exe je rekuadruni “ Ju je no méni jámani andaperani”).

¹⁹ Tata Diosï Jeobajtsïni ambakiti kóntperatechani íntsaasti engachi uaaka úraani para máteruechani jarhuataani (1 Ped. 4:10). Jamberichi ísï pʼikuarherajka enajkichi no káni jarhuajpejki. Joperu sapichitu ambe engachi uaaka paraka kúnguarhikua márku jauaka úpirindi ísïini eska takusï ma engachi sïrikuni jarhajka ka enga tátsekua niárajka sési jásï xukuparhakua máeni. Ísï jimbo, ju je jánguarhintani parachi no méni jámani andaperani ka parachi úni eska méntkisï pínandikua jauaka kúnguarhikuarhu ka eska májku kʼéri jauaka (Efes. 4:3).