1. ¿Ambe ka ambe úski Tata Diosï Jeoba mándani juchantsïni jimbo?

JU JE eratsentani néna engachi niáraka Jeobaeri testigueni. Orheta, nemajtsïni aianguspti ambakiti aianhperakuani, jamberi juchaari taati, ánchikuarhitarhu o eskuelarhu anapu kompanieru ma, o Testigu ma enga aianhpini jámani japka kʼumanchikuecharhu (Mar. 13:10). Tátsekua, nema kánikua tiempu úrasti ka jánguarhintasti parajtsïni jorhendani Biblieri ambe. Indeni ambe jimbo, niáraskachi xénchani Tata Diosï Jeobani ka jorhenguarhiskachi eskajtsïni ima xénchasïnga. Tata Diosï Jeobajtsïni andaparhaterasti jurhimbikuarhu ka iásï, Jesúsiri chúxapatiskachia ka sánderu orhepani uaakachi irekani para méntkisï (Juanu 6:44). Mintsita jingonchi agradesidu jarhaska enga Tata Diosï Jeoba úraka nemani parajtsïni jorhendani jurhimbikuani ka engajtsïni jurajkuka parachi imani marhuakuni.

2. ¿Ambechi exea ini jorhenguarhikua jimbo?

² Iásï engachi mítekia jurhimbikuani, kʼéri kóntperatachi ma jatsiska para jarhuataani máteruechani paraksï nirani juchantsïni jingoni imani xanharu jimbo enga pájpijka tsípikuarhu para méntkisï. Para máru erachicha fásilisti kʼumanchikuecha jimbo nirani aianhpini, joperuksï úkua jukanchasïndi aiatspeni ka jorhentpini Biblieri ambe. ¿Májkuenchi úkuarhinchasïni jucha? Enga ísïika, seguru eskajtsïni jarhuataaka máru konsejuecha engaksï ini jorhenguarhikua jimbo jaka. Exeakachi ambe úsïni eskachi uékaaka jarhuajpeni Jesúsiri chúxapatichani uaani, ístuchi exeaka ambechi uaa úni engajtsïni ambe ma ójkutani jauaka parachi nemani Biblieri ambe jorhendani. Joperu orhetachi exeaka andichisï jatsi para jorhentpini ka no solu aianhpini.

3. ¿Andichisï aianhpijki?

³ Enga Jesúsi Echerirhu japka, arhiaspti imeeri chúxapatichani  eskaksï tsimani ambe úpiringa ánchikuarhitarhu enga íntsaapka. Orheta, arhiaspti eskaksï aianhpepiringa ambakiti aianhperakuani Tata Diosïri Juramukueri ka exeraaspti na engaksï úpiringa (Mat. 10:7; Luk. 8:1). Ka arhiaspti ambe engaksï úpiringa enga nema uékapiringa kurhaani Tata Diosïri Juramukueri ambe ka ambe engaksï úpiringa engaksï no uékapiringa (Luk. 9:2-5). Ístu, uandaspti asta nani jamberi aianhpinhapirini, jimboka aiakuaspti imeeri chúxapatichani eskaksï “iápuru parhakpinirhu” aianhpepiringa (Mat. 24:14; Uku. 1:8). No arhiparini siengaksï kʼuiripuecha uékapiringa kurhaani o nómbe, jatsisptiksï para aianguani Tata Diosïri Juramukueri ambe ka ambe enga i Juramukua uaaka.

4. Eska na arhijka Mateu 28:18-20, ¿ambechi máteru ambe jatsiski para úni aparte de aianhpini?

⁴ ¿Ambe máteru ambe juramukuaspi Jesúsi imeeri chúxapatichani? Arhiaspti eskaksï jorhendaapiringa kʼuiripuechani paraksï úni iámindu ambe enga Jesúsi juramupka. Joperu, ¿primeru siglu jimbojku aianhpinhapirini ka jorhentpinhani? Nómbe. Jesúsi uandaspti eska i ambakiti ánchikuarhita asta juchaari jurhiatikuecha jimbo úkuarhini japiringa, astaka jamberi “kʼamaraaka parhakpini” (arhinta je Mateu 28:18-20). Péringa Jesúsi juramupka i ambe jiáni enga jukari 500 imeeri chúxapatichani xarhakuapka (1 Kor. 15:6). Ka enga jánhastapka Juanuni, uandaspti eska uékasïreenga eskaksï iámindu imeeri chúxapaticha jarhuataapiringa kʼuiripuechani parakaksï jorhenguarhipiringa Tata Diosï Jeobaeri ambe (Jaŋ. 22:17).

5. ¿Náki ejemplu úraspi apostuli Pablu 1 Korintu 3:6-9 jimbo para xarhatani eska uétarhisïnga aianhpini joperu ístu jorhentpini?

⁵ Apostuli Pablu uandaspti eska Jesúsiri chúxapatichani uaani, ísïiska komueska plantechani tsikiraani ka ísï xarhataspti eska no solu uétarhisïnga semiia jatsikuni. Ari ambe miátantaaspti Korintu anapuechani: ‘Ji jindeeska engani júskaka, ka Apolosi jindeesti enga itsï jatsikuka ka chá jindeeska Tata Diosïri tarheta enga ima ánchikuarhijka’ (arhinta je 1 Korintu 3:6-9). Jucha engachi Tata Diosïri tarhetarhu ánchikuarhijka, nóchi solu júskaasïnga semiiechani, sinochi itsï jatsikuasïnga ka jingontkuchi exeani jarhasïnga parakaksï uaaka kʼéni (Juanu 4:35). Joperuchi míteska eska Tata Diosïsï újka eskaksï semiiecha andaraaka ka kʼéni.

6. ¿Ambe ka ambechi jatsiski para úni jorhentpiricha?

⁶ Jirinhaantaxakachi imeechani engaksï ‘tsípikua jingoni xarhatajka eskaksï uékasïnga irekani para méntkisï’ (Uku. 13:48, TNM). Parakaksï niáraaka Jesúsiri chúxapatini, jatsiskachi para jarhuataani 1) kurhanguni, 2) jiókuarhini ka 3) eskaksï ísï uaaka eskaksï na jorhenguarhini jaka Bibliarhu (Juanu 17:3; Kol. 2:6, 7; 1 Tes. 2:13). Iámindu kúnguarhikuarhu anapuechaksï uaati jarhuataani engaksï xarhatakuaska eskaksï xénchaasïnga ka engaksï sési eroaska tánguarhikuecharhu (Juanu 13:35). Ístu, jorhentpiri jatsisti para úrani tiempu ka uinhapikua para jarhuatani jorhenguarhirini jurajkuni jakajkukua ambe ka pʼindekuechani enga kánikua jakajkuajka ka uaani (2 Kor. 10:4, 5). Jarhuatani nemani para jurajkuni iámindu i ambe paraka niáraaka itsï atakuarhini kánikua tiempu pásïndi, joperuchi no tsïtani uéraaka.

7. ¿Andichisï jarhuajpejki aianhpini ka Jesúsiri chúxapatichani uaani?

⁷ ¿Andichisï jarhuajpejki aianhpini ka Jesúsiri chúxapatichani uaani? Primeru, jimbokachi xénchasïnga Tata Diosï Jeobani. Engachi jánguarhintajka xáni eskachi xáni uaaka para aianhpini ka Jesúsiri chúxapatichani uaani ísï eskachi na juramuminhaka, xarhatasïngachi eskachi xénchasïnga Tata Diosïni (1 Juanu 5:3). Ju je ini ambe eratseni: úskachi kʼumanchikuechani jimbo nirani aianhpini jimbokachi xénchasïnga Tata Diosï Jeobani. ¿Fásilispi ísï úni? Jamberi nómbe. Seguru eskachi chépka engachi primeru xanhari uámutapka kʼumanchikuarhu ma para  aianhpini. Joperuchi úspka indeni ambe úni jimbokachi míteska eska Jesúsi i ambesï uékajka. Jamberichi nóteru chéjkia uérani aianhpini. Joperu jorhendani nemani Biblieri ambe jamberi újti eskachi chéni pʼikuarheraaka. Engachi kurhakuska Tata Diosï Jeobani eskajtsïni jarhuataaka parachi no chéni ka balori jukani parachi arhini nemani eskachi uaaka jorhendani Biblieri ambe, imajtsïni uaati jarhuatani parachi uékani Jesúsiri chúxapatichani uaani.

8. Eska na arhijka Markusʌ 6:34, ¿ambechi máteru ambe jimbo jorhendaasïni kʼuiripuechani?

⁸ Tsimani úni jámani, jorhentpisïngachi jurhimbikuani, jimbokachi xénchaasïnga kʼuiripuechani. Ma xanhari, Jesúsi ka imeeri chúxapatichaksï kánikua kuataratixaptia jimbokaksï chúskutaspka aianhpini, ísï jimboksïsï jirinhapti nani engaksï úpiringa mintsikuarhini. Joperu uánikua kʼuiripuechaksï jima eroaxaptia. Jimboka Jesúsi pʼamojkuaspka, “seguirispti mámaru ambe jorhendaani” (arhinta je Markusʌ 6:34). ¿Andisï Jesúsi xáni jánguarhintapi jorhendaani? Jimboka exespka na engaksï jánguarhintani japka ima kʼuiripuecha ka uékasïreendi jarhuataani. Mítespti eskaksï kánikua kómu nitamakuarhixapka ka eskaksï uétarhinchaxapka kurhaani eska jarhaspka ambakiti erokuarhikua ma. Iásïjtuksï kʼuiripuecha uétarhinchaxati erokuarhikua ma nájkirukaksï ísï xarharaaka eskaksï tsípixaka. Ísïistiksï eska karichicha engaksï tsínchitini jámani jaka ka engaksï no nemani jatsika para eranguani. Apostuli Pablu, uandaspti eskaksï no Tata Diosï jingoni jarhaska ka eskaksï no jatsiska erokuarhikua ma (Efes. 2:12). Imani xanharunksï jimbo niraxati enga tsínchikuarhu pájpijka (Mat. 7:13). Engachi eratsentajka na engaksï xáni uétarhinchajka kʼuiripuecha míteni Tata Diosïri ambe, uékperakua ka pʼamojperakua úsïndi eskachi jarhuatauaka. Ka sánderu ambakiti ambe engachi uaaka úni imeechani jimbo jindeesti Biblieri ambe jorhendaani.

9. Eska na arhijka Filipusʌ 2:13, ¿nénajtsïni uaa jarhuatani Tata Diosï Jeoba?

⁹ Jimbokachi míteska eska kánikua tiempu uétarhisïnga, jamberichi no tekaajka arhini nemani eskachi uaaka Biblieri ambe jorhendani. Enga ísïika, ju je aiangukuarhini Tata Diosï Jeobani na engachi pʼikuarherajka ka kurhakuni eskajtsïni jarhuataaka parachi jucha uékani jorhendani nemani (arhinta je Filipusʌ 2:13). Apostuli Juanujtsïni aiachisïndi eska Tata Diosï mókuantauaka kómarhikuechani engaksï terukuntaaka imani ambe jingoni enga ima uéjka (1 Juanu 5:14, 15). Ísï jimbo, uaakachi seguru jarhani eskajtsïni Tata Diosï Jeoba jarhuataaka parachi uékani Jesúsiri chúxapatichani uaani.

10, 11. ¿Andichisï ménisï no tekaajki jorhendani nemani Biblieri ambe?

¹⁰ Míteskachi eska kánikua jukaparhakueska Jesúsiri chúxapatichani uaani, joperu jarhasti máru ambe engajtsïni ójkutajka ka engajtsïni jamberi no jurajkujka úni ambe engachi xáni uékapiringa. Ju je exeni máru ambe engajtsïni úpiringa ójkutani ka nénachi uaa orhepani uérakuani.

¹¹ Ísïchi exesïnga eskachi nóteru uaakia úni ambe ma jimbokachi nitamakuarhixaka ambe ma. Máru aianhpirichaksï jatiriskia oksï pʼamenchakua ambe kánguarhisïndi. Engajtsï indeni ambe nitamakuarhini jaka, eratsenta je ambe engajtsïni jorhendaka pʼamenchakua COVID-19: eskachi uaaka jorhentpini Biblieri ambe telefonu o interneti jimbo. Ísï jimbo, juchajtuchi uaaka ueenani jorhendani nemani juchiniu uératini. Ka jarhasti máteru ambe. Máru kʼuiripuechaksï uékasïndi jorhenguarhini Biblieri ambe joperuksï no úsïndi ima jandora engaksï erachicha aianhpijka. ¿Uaachi aiakukuarheni jorhendaani káni engaksï imeecha uaaka, jamberi xarhentku o chúrikisï? Jesúsi chúrikua jorhendaspti Nikodemuni jimboka Nikodemu ísï uékaspka (Juanu 3:1, 2).

12. Engachi no seguru jauaka eskachi uaaka jorhentpini, ¿náki tanimu ambejtsïni jarhuataa parachi seguru jarhani eskachi uaaka?

¹² Ísïchi exesïnga eskachi no uaaka jorhendani nemani Biblieri ambe. Jamberichi ísï eratsejka  eskachi no xáni ambe míteska o eskachi jatsiska para sánderu sési jorhentpini. Enga ísïika, ju je tanimu ambe exeni engajtsïni jarhuataaka seguru jarhani eskachi uaaka jorhentpini. Orheta, Tata Diosï Jeoba exesïndi eskachi uaaka jorhendani máteru nemani (2 Kor. 3:5). Tsimani úni jámani, Jesúsi, enga ‘iámindu juramukua intsïnhaka auandarhu ka ístu parhakpinirhu’ juramuchisïndijtsïni eskachi jorhentpiaka (Mat. 28:18). Ka tanimu úni jámani, nóchi jandiajku jarhaska, májkueni eska Jesúsi, uaakachi mintsikani eskajtsïni Tata Diosï Jeoba jarhuataaka míteni ambe engachi uandaaka (Juanu 8:28; 12:49). Ístu, uaakachi uandontskuarheni erachi jingoni enga grupuni orhejtsïkujka aianhpikuarhu, prekursori o aianhpiri ma jingoni enga sési jorhentpijka parajtsïni jarhuatani ueenani nemani Biblieri ambe jorhendani. Engachi pámbetaska jorhendani nemani Biblieri ambe, uaakachi jorhenguarhini sánderu sési jorhentpini.

13. ¿Andichisï jatsi para ménderueni jorhentpinia?

¹³ Ísïchi exesïnga eska úkua jukasïnga ménderueni jorhentpini ka jimbanhi erramientechani úraani. Iásïchi ménderueni jorhentpisïngia, sánderuchi úrasïngia libruni Tsípikua jingoni ireka je. Joperu uétarhisïndi eskachi sési prepararikuarhiaka ka eskachi ménderueni jorhentpiakia eska antesi. Nóteruchi uánikua párrafuechani arhiataasïgia ka sánderuchi uandontskuarhesïgia jorhenguarhiri jingoni, sánderuchi úraasïngia bideuechani ka imani ambe enga juchaari pájinarhu jaka internetirhu ka ístu imani ambe enga JW Library^® jimbo jaka. Engachi exejka eskachi no úsïnga úraani ini erramientechani, ju je arhini nemani parajtsïni arhistachini néna úraani. No fásilisti mójtakuni ambe engachi pʼindepkia úni, joperu Tata Diosï Jeobaeri jarhuajperata jimbo ka juchaari erachicheri, uaakachi pʼindeni ísï úni ka jamberichi sánderu sési pʼikuarheraaka Biblieri ambe jorhentpini. Prekursori ma uandaspti eska na engachi jorhentpijkia iásï, “kánikua sési pʼikuastasïnga jorhenguarhirini ka ístu jorhentpirini”.

14. a) ¿Ambechi jatsiski para miántani enga jimeesïsï engachi jucha irekaka no fásilika aianhpini? b) ¿Nénajtsïni uinhaperantasïni 1 Korintu 3:6, 7?

¹⁴ Ísïchi exesïnga eska jimeesïsï engachi jucha irekaka, no fásiliska ueenani jorhendani nemani Biblieri ambe. Jamberiksï máru kʼuiripuecha no tsitijti kurhaani ambe engachi aianhpijka o astaksï no uékani eskachi jimeesïsï aianhpiaka. ¿Ambejtsïni jarhuataa parachi seguirini eratseni eska inde kʼuiripuecha ma jurhiani uékaaka jorhenguarhini? Ju je miáni eska ini parhakpinirhu mámaru ambe úkuarhixaka ka eska kʼuiripuecheri irekua uaaka mójtakurhini ka imeecha engaksï ióntki no ma ambe uékeenga tátsekuaksï kuenta íntskukuarheati eskaksï uétarhinchasïnga Tata Diosïni (Mat. 5:3, TNM). Máru engaksï no jiókuarhiauenga juchaari publikasionichani niárastiksï uékani jorhenguarhini Biblieri ambe. Ístuchi míteska eska Tata Diosï Jeobaeriska pʼikuntskua (Mat. 9:38). Uékasïndi eskachi seguiriuaka júskani, joperu imasï újti eska semiia andaraaka para tsikini (1 Kor. 3:6, 7). Ístujtsïni kánikua uinhaperantasïndi míteni eska nájkirukachi iáiasï no nemani jorhendani jaka, Tata Diosï Jeobajtsïni újchakurasïndi jimbokachi jánguarhintasïnga ka no jimbokachi uánikua publikasionichani íntspiasïnga o uánikua kʼuiripuechani jorhendaani. *

15. ¿Néna pʼikuarherasïni Tata Diosï Jeoba enga kʼuiripu ma uéjka jorhenguarhini Biblieri ambe ka enga ísï újka eska na jorhenguarhini jaka?

¹⁵ Tata Diosï Jeoba kánikua sési pʼikuarherasïndi enga kʼuiripu ma jiókuarhijka ambe enga Biblia jorhentpijka ka enga í kʼuiripu uandontskuarhekuajka máteruechani íri ambe (Prov. 23:15, 16). Seguru eska sési pʼikuarherasïnga ambe enga úkuarhini jaka ini jurhiatikuecha jimbo. Pori  ejemplu, nájkiruka pʼamenchakua COVID-19 japka 2020 jimbo, jorhendaaspkachi Biblieri ambe 7,705,765 kʼuiripuechani ka 241,994 niárastiksï aiakuni imeecheri tsípikuani Tata Diosï Jeobani ka itsï atakuarhistiksï. Ka iásïksï ícha máteruechani jorhendauati Biblieri ambe ka uáuatiksï máteru Jesúsiri chúxapatichani (Luk. 6:40). Engachi jarhuajpejka ini ánchikuarhitarhu, kánikuachi tsíperasïnga Tata Diosï Jeobaeri mintsitani.

16. ¿Náki metachi úpirini jatsikukuarhini?

¹⁶ Uétarhisïndi eskachi kánikua jánguarhintaaka parachi jarhuatani nemani xénchani juchaari Taati auandarhu anapuni, joperu Tata Diosï Jeobaeri jarhuajperata jimbochi uaaka jarhuajpeni Jesúsiri chúxapatichani uaani. ¿Andichisï no jatsikukuarhijki meta parachi ueenani jorhendani nemani? Méntkisï enga sési jauaka, uaakachi arhiani imeechani engachi míteaka eskachi uaaka Biblieri ambe jorhendaani. Engachi ísï úska, jamberijtsïni ísku pakataati ambe engajtsïni arhiaka. Uaakachi seguru jarhani eskajtsïni Tata Diosï Jeoba újchakuraaka ambe engachi xáni uaaka.

17. ¿Nénachi pʼikuarheraa engachi uaaka jorhendani nemani Biblieri ambe?

¹⁷ Kʼéri kóntperata máesti aianhpini ka jorhentpini jurhimbikua ambe. Ánchikuarhita máesti engajtsïni kánikua tsíperajka. Apostuli Pablu enga uánikua Tesalonika anapuechani jarhuataapka parakaksï Jesúsiri chúxapatipiringa, uandaspti na enga pʼikuarherapka: “¿Ambeeski enga jucha mintsikani jaka? ¿Ka ambeeski juchaari tsípikuarhita ka kanakua enga jimbo jucha sési korhokaaka enga junguaka juchaari tata Jesukristu? Chámindu jindeeska enga jimbo jucha tsípini pʼikuarherajka ka sési korhokani” (1 Tes. 2:19, 20; Uku. 17:1-4). Iásï uánikua kristianuechaksï májkueni pʼikuarherasïndi. Pirenchi ma enga arhinhajka Stéphanie, enga imeeri uámba jingoni jarhuataaka uánikuechani itsï atakuarhini, uandasïndi: “No jarhasti sánderu kʼéri tsípikuarhita ma eska jarhuataani kʼuiripuechani paraksï aiakukuarheni Tata Diosï Jeobani”.