1. ¿Ambe uékasïni Tata Diosï eska úkuarhiaka ini jurhiatikuechani jimbo?

 TATA DIOSÏ uékasïndi eska iámu parhakpinirhu aianhpinhaaka ambakiti aianhperakua Reinueri ambe (Mar. 13:10; 1 Tim. 2:3, 4). I ánchikuarhita Tata Diosï Jeobaeristi ka kánikua jukaparhakuesti para ima, ísï jimbosï erakuti imeeri Uájpani para orhejtsïkuni Ka jimbokajtsïni Jesúsi orhechepani jaka aianhpikuarhu, uaakachi seguru jarhani eska enga na kʼamaraakia parhakpini, Tata Diosï sési pʼikuarheraati imani ambe jingoni enga xáni úkuarhiaka (Mat. 24:14).

2. ¿Ambechi exeni jaua ini jorhenguarhikua jimbo?

² Ini jorhenguarhikua jimbo, exenchi jauaka eska Jesúsi úraxaka “jántspirini enga mintsinharhikueka” ka jánhastiini parajtsïni jorhendani Tata Diosïri ambe ka parajtsïni organisarini parachi aianhpini iámu parhakpinirhu, i jindeesti sánderu kʼéri ánchikuarhita enga úkuarhini jaka (Mat. 24:45). Ístuchi exeni jauaka ambe engachi mándani arini uaaka úni parachi Jesúsini apoiarini ka ístu jántspirini enga mintsinharhikueka.

3. ¿Náki juramukua intsïnhaski Jesúsi?

³ Jesúsi orhejtsïkuxati aianhpikuani. ¿Nénachi míteski? Ante de auandarhu nirani, juáta Galilea jimbo tánguarhintaspti máru imeeri chúxapatichani jingoni engaksï no méni jurajkupka, ka arhiaspti: “Iámindu juramukua intsïnhaskani auandarhu ka ístu parhakpinirhu”. Ka ístu uandaspti: “Ísï jimbo ni je jorhendaani iámindu kʼuiripuechani” (Mat. 28:18, 19). Ísï jimbo, máteru ambe enga Jesúsi intsïnhaka, jindeesti juramukua para orhejtsïkuni aianhpikuani.

4. ¿Andichisï uaa seguru jarhani eska Jesúsi seguirixaka orhejtsïkuni aianhpikuani?

⁴ Jesúsi uandaspti eska aianhpikua ka ánchikuarhita para Jesúsiri chúxapatichani uaani, iámindu nasionicharhu úkuarhipiringa ka eska ima imeeri chúxapatichani jingoni japiringa méntkisï  “astaka jamberi kʼamaraaka parhakpini” (Mat. 28:20). I uandakuechaksï xarhatasïndi eska Jesúsi orhejtsïkuni japiringa aianhpikuani asta ini jurhiatikuecha jimbo.

5. ¿Nénachi jarhuajpexaki paraka ísï úkuarhika eska na uandajka Salmo 110:3?

⁵ Jesúsi seguru jarhaspti eska últimu jurhiatikuecha jimbo, uánikua ánchikuarhiricha japiringa. Mítespti eska ísï úkuarhipiringa eska na uandajka ari profesia: “Chiiti ireta tsípikua jingoni aiatspikuarhiati imani jurhiatikua jimbo engari orhekupauaka chiiti ejersituechani” (Sal. 110:3). Engajtsï chá aianhpini jaka ambakiti aianhpikueri ambe, apoiarixakajtsï Jesúsini ka jántspirini enga mintsinharhikueka ka ísïjtsï jarhuajpexaka paraka ísï úkuarhiaka eska i profesia na uandajka. Nájkirukachi úni jaka aianhpini, ístu jarhasti máru ambe engajtsïni ójkutajka.

6. ¿Ambejtsïni úpirini ójkutani parachi no úni aianhpini?

⁶ Ma ambe engajtsïni ójkutajka parachi no úni aianhpini jindeesti eskajtsïni kʼuiripuecha no jurajkusïnga parachi ísï úni. Apostatecha, politikuecha ka relijioniri orhejtsïkutichaksï chkuanderakua ambe uandasïndi juchaari ánchikuarhiteri ambe. Engaksï juchaari parienticha, imeecha engachi míteaka ka imeecha engachi jingoni ánchikuarhijka jakajkuaka indeni ambe, jamberijtsïni arhiati eskachi nóteru marhuakuakia Tata Diosï Jeobani ka eskachi nóteru aianhpiakia. Máru paisicha jimbo, juchaari enemiguechajtsïni arhisïndi eskajtsïni no sési ambe úchiaka, no sésijtsïni kámasïndi, jupikantsïni ka ónhani. I ambejtsïni no ísku pakatasïndi jimboka Jesúsi uandaspka: “Kʼuiripuechaksïni no exenchaati juchiiti nombri jimbo” (Mat. 24:9). Engajtsïni kʼuiripuecha kurhunhijka, xarhatasïndi eskachi májkueni úxaka eska Jesúsi ka eskajtsïni Tata Diosï Jeoba jaiapanhentasïnga (Mat. 5:11, 12). Noambakiti úxati eskachi no jurajkunhaaka parachi aianhpini, joperu ima no uaati Jesúsini jingoni. Tata Jesukristueri jarhuajperata jingoni, interu parhakpinirhu mítekuarhixati Tata Diosïri Reinueri ambe.

7. ¿Náki pruebechantsï exeaxaki chá eskaksï úkuarhixaka eska Jaŋaskuecha 14:6, 7 na uandajka?

⁷ Máteru ambe engajtsïni ójkutajka, jindeesti xáni uánikua idiomecha engaksï jaka. Enga Jesúsi jánhastapka apostoli Juanuni, xarhatakuspti eska inde ambe no ójkutakua máepiringa para aianhpinhani ambakiti aianhperakuani (arhinta je Jaŋaskuecha 14:6, 7). ¿Nénachi úski orhepani uérakuni indeni ójkutakuani? Ma ambe engachi úka jindeesti jatsini informasioni enga Bibliarhu pʼitakata jaka juchaari pájinarhu jw.org jimbo jukari 1,000 idiomecha jimbo. Ístu, Grupu enga Orhejtsïkuajka iámindu kúnguarhikuechani, sésikua íntspisti paraka tradusirikuarhiaka jukari 700 idiomecha jimbo libru Tsípikua jingoni ireka je engachi úrajka para jorhentpini. Ístuksï jarhasti bideuecha para kándicha ka publikasionicha braile jimbo para imeecha engaksï no újka exeni. Ísï, sánderu uánikua kʼuiripuechaksï úxati jorhenguarhini Reinueri ambe. Exexakachi eska Biblieri profesiechaksï meru ísï úkuarhixaka, kʼuiripuechaksï “iámindu idiomecheri engaksï iretecharhu uandanhajka”, jorhenguarhixatiksï uandani ‘pímbinhasï idiomaniʼ, enga jindeeka jurhimbikua enga Bibliarhu jaka (Zac. 8:23; Sof. 3:9). Iámindu ambe úxati ísï úkuarhini, jimboka tata Jesukristu kánikua sési orhejtsïkuxaka.

8. ¿Ambe ka ambe xáni úkuarhiskia iásï jamberi aianhpikua jimbo?

⁸ Ini jurhiatikuechani jimbo, 240 paisicha ka territoriuecha jimbo, jukari 8 miioni kʼuiripuechaksï niárastiksïa Tata Diosï Jeobaeri kúnguarhikuarhu jarhani. ¡Ka mándani uéxurhini uánikuechaksï itsï atakuarhisïndi! Joperu ambe enga sánderu jukaparhakueka no jindeesti na engaksï xáni itsï atakuarhijka, sino eskaksï i jimbanhi Jesúsiri chúxapaticha xarhataasïnga imani kualidadichani enga Tata Diosï jaiapanheantajka. Biblia arhisïndi eska inde ambe  arhikuekasïnga “jimbanhi kʼuiripu máeni” (Kol. 3:8-10, TNM). Uánikuaksï nóteru ísku jándikua ambe niátasïndia, niksï atajpini jámani, nijtuksï menusi újpini, oksï eratseni eska imeeri paisi sánderu ambakitiska. Ísï úkuarhixati eska Isaías 2:4 na uandajka: “Nóteruksï jorhenguarhiatia uarhiperani”. Jimbokachi jánguarhintasïnga para jimbanhi kʼuiripu máeni, úsïngachi eskaksï kʼuiripuecha tsitiaka Tata Diosïri kúnguarhikua jingoni úkuarhini ka xarhatasïngachi eskachi ísï úsïnga eskajtsïni juchaari orhejtsïkuti tata Jesukristuni na arhijka (Juanu 13:35; 1 Ped. 2:12). Ka no ma ambe ísku jatini úkuarhixati; Jesúsijtsïni jarhuataxati.

9. Eska na uandajka Mateu 24:45-47, ¿ambe uandaspi Jesúsi eska úkuarhini japiringa últimu jurhiatikuecha jimbo?

⁹ (Arhinta je Mateu 24:45-47). Jesúsi uandaspti eska últimu jurhiatikuechani jimbo erakupiringa “jántspirini enga mintsinharhikueka” ka jánhastiini, parajtsïni jorhendani Tata Diosïri ambe. Ísï jimbo, i jántspiri kánikua ánchikuarhini japirindi ini jurhiatikuecha jimbo. Ka meru ísï úxati. Jesúsi úraxati grupu sapichuni ma engaksï erakukateka paraksï jorhendaani Biblieri ambe jiáni “engaksï uétarhinchaaka” Tata Diosïri marhuarichani ka imeechani engaksï uéjka míteni Tata Diosïni. Íksï achamasïcha no uandasïndi eskaksï imasï “juramujka na enga[ksï] jatsika para jakajkuni” máteruecha (2 Kor. 1:24). Sánderu sési, uandasïndiksï eska tata Jesukristu jindeeska “orhejtsïkuti ka juramuti” imeeri iretarhu (Is. 55:4).

10. ¿Náki libru engaksï imajenicharhu jaka jarhuataskiksïni parajtsï ueenani marhuakuni Tata Diosï Jeobani?

¹⁰ Uéxurhini 1919 uératini, jántspiri enga mintsinharhikueka uánikua publikasionichani petaasti parakaksï kʼuiripuecha ueenaka jorhenguarhini ambakiti ambe enga Tata Diosïrika. Uéxurhini 1921 jimbo, jántspiri petaspti inglesi jimbo libruni El Arpa de Dios para imani ambe jorhentpini enga ma orheta jatsika para jorhenguarhini Biblieri ambe. Engaksï tiempuecha na  mójtakukuarhipani japka, petaapaxapti máteru libruechani. ¿Chá náki jingontsï niáraski míteni ka xénchani juchaari Taati auandarhu anapuni? Jamberi ini libruni ma jingoni: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Ambemindusï jorhentpejki Biblia? o ¿Ambejtsïni jorhendasïni Biblia? Ojtsï jamberi úrani jakaia jimbanhi libruni enga arhinhajka Tsípikua jingoni ireka je. I libruecha petanhasti parajtsïni jarhuatani Jesúsiri chúxapatichani uaani ka méntkisïksï jiáni petanhasti engaksï meru uétarhini jarhajka.

11. ¿Andisï xáni jukaparhakue eskachi iáminduecha jorhenguarhiaka Tata Diosïri ambe?

¹¹ No solu imeecha engaksï Biblieri ambe jorhenguarhijka jatsistiksï para sési jorhenguarhini Tata Diosïri ambe, sino iáminduecha. Apostoli Pablu karaspti: “Peru inde tʼirekua enga xaxanhajka, jindeesti para imeecha engaksï kʼératikia [o engaksï eratsekua jukarikia]”. Ístu uandaspti eska engachi uaaka ambe engachi jorhenguarhiaka, inde ambejtsïni jarhuataati parachi “úni míteni ambe enga jindeeka ambakiti ambe ka ambe enga no sésiika” (Ebr. 5:14). Iásï engaksï kʼuiripuecha kánikua no sési jásï ambe niátajkia, jamberi i ambe uaati eskachi kánikua úkua jukanchaaka kurhajchaani Tata Diosï Jeobaeri juramukuechani. Joperu Jesúsi úxati eskachi jorhendanhaaka Biblieri ambe parakachi seguiriuaka mintsikani Tata Diosïni. Jántspiri enga mintsinharhikueka úxati ka etsakuxati ini jorhentperakuani ísï eska Jesúsi na arhijka.

12. ¿Ambe ka ambechi úskia para janhanharhini Tata Diosïri nombrini ísï eska Jesúsi na úpka?

¹² Ísï eska Jesúsi na úpka, juchajtuchi janhanharhixaka Tata Diosïri nombrini (Juanu 17:6, 26). Pori ejemplu, 1931 jimbo niáraskachi ísï arhinhani eska Biblia na uandajka: Jeobaeri testiguecha. Ísïchi xarhataxaka eskachi uékasïnga ísï mítekateni eska Tata Diosï na arhinhajka ka inde ambe kánikua jukaparhakuesti para jucha (Is. 43:10-12). Ka oktubrini indeni mismu uéxurhini jimbo, Tata Diosïri nombri ueenasti xarharani  primeru pájinarhu ini rebista jimbo enga inglesi jimbo uérapka. Ístu, Biblia Traducción del Nuevo Mundo jatsikunhantasti Tata Diosïri nombrini jima enga jatsika para jukani Bibliarhu. I ambe méntku ménderuenisti eskaksï na újka relijionicha engaksï kristianu arhikuarhijka, jimbokaksï imeecha pʼikuntasïnga uánikua Bibliecharhu Tata Diosïri nombrini.

13. ¿Andijtsïsï seguru jaki eska Jesúsi úraxaka iásï ʻjántspirini enga mintsinharhikuekaʼ ka jánhastiini? (Juanu 6:68).

¹³ Jesúsi úraxati ʻjántspirini enga mintsinharhikuekaʼ ka jánhastiini parakaksï imeeri chúxapaticha niáraaka ambakiti kúnguarhikua máeni ixú Echerirhu ka para jarhuataani máteru kʼuiripuechani kómarhini Tata Diosïni ísï eska ima na uéjka. ¿Nájtsï exesïni chá ini kúnguarhikuani? Jamberijtsï ísï pʼikuarherajka eska Pedru enga arhipka Jesúsini: “¿Néni niua andarhierani? Tʼuri jatsiaska uandakuechani engaksï jindeeka para tsípikua méntkisï jatsini” (Juanu 6:68). ¿Ambe úkuarhipirini juchantsïni jingoni engachi no mítepiringa Tata Diosïri kúnguarhikuani? Tata Jesukristu ini kúnguarhikuani úrasïndi parajtsïni sési jorhendani Tata Diosïri ambe ka parachi ambakiti jorhentpiricheni. Ístujtsïni jarhuatasïndi parachi jimbanhi kʼuiripu máeni ka úni eska Tata Diosï Jeoba tsípini pʼikuarheraaka (Efes. 4:24, TNM).

14. Tata Diosï Jeobaeri kúnguarhikuarhu jarhani, ¿nénaksïni jarhuataski ini jurhiatikuechani jimbo enga COVID-19 jaka?

¹⁴ Engaksï kʼérati uandanhiatecha jarhajka, Jesúsijtsïni jánhaskakua jingoni arhisïndi ambe engachi jatsika para úni. Ka úskachi exeni eska i ambe meru ísïiska jiáni enga pandemia COVID-19 ueenapka jarhani. Parhakpinirhu, uánikua kʼuiripuechaksï no mítespti ambe úni, joperu Jesúsi úspti eskachi arhinhapiringa ambe engachi úpiringa para sési kuájchakukuarhini.  Arhinhaspkachi eskachi ómukuarhipiringa jimeesïsï engaksï uánikua kʼuiripuecha jámani japiringa ka eskachi jarharperatini jámapiringa. Orhejtsïkutichaksï arhinhaspti eskaksï uandajpaapiringa erachichani paraksï exeni ambe engaksï uétarhinchani japiringa ka ístu parakaksï no jurajkupiringa Tata Diosïni (Is. 32:1, 2). Ka aianhperakuecha engajtsïni íntsaapka Grupu enga Orhejtsïkuajka iámindu kúnguarhikuechani, ístujtsïni arhistachisti sánderu ambe ka uinhaperantastijtsïni.

15. ¿Ambe máteru ambechi arhinhaspi eskachi úpiringa pandemia jimbo, ka nénajtsïni marhuacheski?

¹⁵ Pandemia jimbo, ístuchi arhinhaspka ambe engachi úpiringa parachi jatsiani tánguarhikuechani ka para aianhpini. Jirejiresïchi ueenaspka jatsiani juchaari tánguarhikuechani bideoiamada jimbo ka ueenaspkachi aianhpini karta ka telefonu jimbo. Tata Diosï Jeoba újchakurasti na engachi xáni jánguarhintaka. Uánikua betelichaksï uandantasti eskaksï iásï sánderu uánikua aianhpiricha jarhaskia. Ka ístu, ini tiempu jimbo uánikua erachichaksï niárasti jatsiani ambakiti eksperiensiechani (exe je rekuadruni “ Tata Diosï Jeoba újchakurasïndi aianhpikuani”).

16. ¿Ambeerichi uaa seguru jarhani?

¹⁶ Jamberiksï máru erachicha eratsepti eskajtsïni Tata Diosïri kúnguarhikua jukari kuidarixapka pandemieri. Joperu uánikua uelta xarharastia eska ambe engachi arhinhapka, kánikua sési jarhaspka (Mat. 11:19). Engachi eratsentaska na engajtsïni xáni uékperakua jingoni arhistachijka Jesúsi, uaakachi seguru jarhani eska ambe uéjki jarhani sánderu orhepatini, Tata Diosï Jeoba ka imeeri Uájpa juchantsïni jingoni jauati (arhinta je Ebreu 13:5, 6).

17. ¿Nénajtsï pʼikuarherasïni míteni eskaksïni Jesúsi orhejtsïkuxaka?

¹⁷ ¡Kánikuachi tsípini pʼikuarherasïnga míteni eska tata Jesukristu orhejtsïkuxaka ini ánchikuarhitani! Kúnguarhikua ma jimbochi jarhaska enga no jurajkujka eskachi arhukurhitini jauaka jimbokachi eratseaka eska juchaari paisi sánderu ambakitiska, o juchaari pʼindekuecha o idioma jimbo. Tata Diosïjtsïni sési jorhendaaxati imeeri ambe ka parachi úni sési aianhpini. Iáminduechachi seguirixaka jorhenguarhini jimbanhi kʼuiripu máeni ka xénchaani máteruechani. ¡Kánikuachi sési pʼikuarherasïnga tata Jesukristuni jingoni enga juchaari orhejtsïkutika!