1. ¿Nénachi jatsiski para exeni kómarhikuani?

 IMA enga Kueraaka Echerini ka auandani, kʼéri kóntperatajtsïni ma íntskusti: úsïngachi uandontskuarhekuni imani engachi kómarhijka. Ju je eratsentani ambe enga arhikuekajka i ambe. Úsïngachi mintsitarhu uératini uandontskuarhekuni juchaari Tata Diosï Jeobani na uéjki jatini ka na uéjki idioma jimbo ka nóchi jatsiska para sita ma úni. Úsïngachi kómarhini juchaari Taatini engajtsïni xáni xénchajka nájkirukachi ospitalirhu jauaka o engachi ónhakata jauaka kárselirhu mintsikaparini eskajtsïni ima kurhajchaaka. ¿A no eskachi kánikua jukaparharasïnga ini xáni k’éri kóntperatani?

2. ¿Néna xarhataspi rei Dabidi eska para ima k’éri kóntperata máespka kómarhini Tata Diosïni?

² Para rei Dabidi k’éri kóntperata máespti kómarhini Tata Diosïni. Pirekua ma jimbo, arhispti Tata Diosï Jeobani: “Eska juchiiti kómarhikua ísïiuaka chiiti orhepatini jimbo eska insiensu enga sési úkata jaka” (Sal. 141:1, 2). Jiáni enga Dabidi irekapka úrakuarhesïreendi pímbinhasï insiensu para k’éri ambe arhini Tata Diosï Jeobani ka saserdotichaksï kánikua kuidadu jingoni úsïreendi insiensuni (Éx. 30:34, 35). Enga rei Dabidi insiensueri ambe uandani japka, arhikuekaxapti eska jatsispka para sési eratsentani ambe enga arhipiringa imeeri Taati auandarhu anapuni imeeri kómarhikuecha jimbo. Ka juchajtuchi májkueni uékasïnga úni jimbokachi uékasïnga eska Tata Diosï Jeoba jaiapanhentauaka juchaari kómarhikuechani.

3. ¿Nénachi jatsiski para kómarhini Tata Diosï Jeobani, ka andi?

³ Juchaari kómarhikuecha jimbo, jatsiskachi para kánikua janhanharhikua jingoni uandajpani Tata Diosïni. Ju je eratsentani imani jánhaskuechani engaksï Isaíasi, Esekieli, Danieli ka Juanu jatsiapka. Nájkirukaksï no májkuenika, jarhasti máru ambe engaksï jimbo terukuntajka: xarhatasïndiksï Tata Diosï Jeobani komueska k’éri Juramuti ma. Isaíasi exespti Tata Diosï Jeobani  “k’éri uaxantskuarhu ma enga iótakuarhu ka karhakua japka” (Is. 6:1-3). Esekieli exespti eska Tata Diosï uaxakatixapka imeeri auandarhu anapu karrurhu ka imeeri uirhipandani t’íntskua ma jarhaspti enga ísïipka “komueska arkoirisi” (Ezeq. 1:26-28). Danieli exespti “imani enga kánikua jatirikia” xukuparhakua urapiti jukarini ka uaxakatini jarhani tronurhu ma nani enga chpiri uéreenga (Dan. 7:9, 10). Ka Juanu exespti Tata Diosï Jeobani tronu ma jimbo uaxakatini jarhani, ka imeeri uirhipandani jimbo jarhaspti ambe ma enga xáxepka eska arkoirisi “enga ísï meremerejkuenga komueska esmeralda” (Jaŋ. 4:2-4). Eratsentani na enga xáni kʼérika Tata Diosï Jeoba, miátantasïndijtsïni eska kʼéri kóntperata máeska imani kómarhini ka eska kánikua jukaparhakueska janhanharhikua jingoni ísï úni. ¿Joperu ambechi uaa arhini juchaari kómarhikuecharhu?

4. ¿Ambechi jorhenguarhisïni ima ambeeri enga orheta uandajka kómarhikua padrenuestrueri? (Mateu 6:9, 10).

⁴ (Arhinta je Mateu 6:9, 10). Enga Jesúsi Juátarhu Arhijtsïkpipka jorhendaaspti imeeri chúxapatichani parakaksï ísï kómarhipiringa eska Tata Diosï na jaiapanhentajka. Ísï tátsekua enga na arhiapkia “ísï kómarhi je”, orheta imani ambe uandaspti enga Tata Diosï eratseni jaka úni: eska pímbinhasïaka imeeri nombri; eska juuaka Tata Diosïri Reinu enga kʼamajkuauaka Tata Diosïri enemiguechani ka eska úkuarhiaka ima ambe enga Tata Diosï eratseni jaka úni Echerirhu ka ístu para kʼuiripuecha. Engachi juchaari kómarhikuecharhu íri ambe uandaska, xarhatasïngachi eskachi jukaparharasïnga imani ambe enga Tata Diosï uéjka úni.

5. ¿Andichisï míte eska no no sési jarhaska kurhajkuarhini ambe engachi uétarhinchajka?

⁵ Ístu máteru ambe enga Jesúsi jorhentpipka imani kómarhikua jimbo, jindeesti eska no no sési jarhaska kurhajkuarhini ambe engachi uétarhinchajka. Ísï jimbo, uaakachi kurhakuni Tata Diosï Jeobani eskajtsïni pauani pauani íntskuaka tʼirekua, eskajtsïni tekaachiantauaka pekaduechani, eskajtsïni jarhuataaka parachi no no sési ambe niátani ka eskajtsïni kuájchakuaka Noambakitiri (Mat. 6:11-13). Engachi ini ambe kurhakujka Tata Diosï Jeobani, xarhatakunchi jarhasïnga eskachi mintsinharhisïnga ka eskachi uékasïnga eskajtsïni jaiapanhentaaka.

6. ¿Jatsipirinchi para imani ambejku kurhajkuarhini enga Jesúsi uandapka kómarhikua padrenuestrurhu?

⁶ Jesúsi no uandaspti eskaksï imeeri chúxapaticha  imani ambejku kurhajkuarhipiringa enga uandapka imani kómarhikuarhu. Enga Jesúsi máteru kómarhikuechani uaapka, imeeri ambe uandaspti enga uandanhiatani japka (Mat. 26:39, 42; Juanu 17:1-26). Ka juchajtuchi uaaka kómarhini Tata Diosïni ambe uéjki jimbo engachi uandanhiani jauaka. Pori ejemplu, engachi eratseni jauaka úni ambe ma, uaakachi kurhakuni Tata Diosïni eskajtsïni íntskuaka jánhaskakua ka eskajtsïni sési kurhangutaraaka ambe engachi jatsika para úni (Sal. 119:33, 34). Engachi responsabilidadi ma intsïnhaaka ka nóchi míteni néna úni, uaakachi kurhakuni Tata Diosï Jeobani eskajtsïni íntskuaka jánhaskakua ka eskajtsïni jarhuataka parachi sési kurhanguni iámu ambe (Prov. 2:6). Taatichaksï uaati kómarhijpikuani imeecheri sapiichani ka sapiicha imeecheri taatichani. Ístu, iáminduecha uaaka ka jatsiskachi para kómarhijpikuani imeechani engachi jorhendaajka Biblieri ambe ka ístu imeechani engachi aianguajka Biblieri ambe. Peru kómarhikua úni, no jindeesti nomasi kurhajkuarhini jarhani.

7. ¿Andichisï jatsi para kʼéri ambe arhini Tata Diosï Jeobani juchaari kómarhikuecharhu?

⁷ Ístuchi jatsiska para no méni mirikurhini kʼéri ambe arhini Tata Diosï Jeobani juchaari kómarhikuecharhu. Imajkusï jukanchati eskachi kʼéri ambe arhiaka méntkisï. Salmueri karari ma uandaspti: “Ambakitiskari ka jingontkuri jarhaska para puátspentani”. Ka ístu uandaspti: “Tata Diosï máeskari enga kánikua pʼamojpitiika, enga sési kámpijka, enga no sóntku ikiajka ka enga ambakiti uékperakua xarhatatspejka ka enga no méni jurajpejka” (Sal. 86:5, 15). Ísï jimbo, uánikua ambe jarhasti engachi jimbo uaaka kʼéri ambe arhini Tata Diosï Jeobani imani ambe jimbo enga újka ka na enga jásïika.

8. ¿Ambe jimbochi jatsiski para diosmaiamukua arhini Tata Diosïni engachi kómarhini jauaka? (Salmo 104:12-15, 24).

⁸ Juchaari kómarhikuecharhu kʼéri ambechi arhisïnga Tata Diosï Jeobani joperu ístuchi uékasïnga diosmaiamukua íntskuntani iámindu ambakiti ambe jimbo engajtsïni íntskujka; pori ejemplu, xáni uánikua ka sési járhati tsïtsïkicha jimbo, xáni áspiti tʼirekua jimbo ka jimbokachi ambakiti amiguechani jatsiaska. Iámindu i ambe ka máteru ambe engajtsïni íntskujka juchaari Taati engajtsïni xáni xénchajka, úsïndi eskachi tsípikua jingoni irekuarhiaka (arhinta je Salmo 104:12-15, 24). Peru sánderu ambakiti ambe jimbo engachi diosmaiamukua íntskuntajka,  jindeesti ima xáni uánikua ambe jimbo engajtsïni íntskujka parachi jorhenguarhini imeeri ambe ka jimbokajtsïni aiachisïnga eska sánderu orhepatini ambakiti ambe jauaka.

9. ¿Ambechi uaa úni parachi no méni mirikurhini diosmaiamukua íntskuntani Tata Diosï Jeobani? (1 Tesalonika 5:17, 18).

⁹ Fasilisti eskachi mirikurhiaka diosmaiamu íntskuntani Tata Diosï Jeobani iámindu imani ambe jimbo enga újka juchantsïni jimbo. ¿Ambechi uaa úni parachi no méni mirikurhini? Uaakachi karani iámindu ambe engachi kurhakuka ka tátsekua eratsentani na engajtsïni mókuchintakia Tata Diosï. Ka tátsekuachi uaaka kómarhikua ma úni parachi diosmaiamu íntskuntani (arhinta je 1 Tesalonika 5:17, 18). Engajtsïni máteruecha diosmaiamukua arhijka, sésichi pʼikuarherasïnga ka exesïngachi eskajtsïni xénchasïnga. Ka Tata Diosï Jeobajtu májkueni sési pʼikuarherasïndi engachi jucha méntkisï miájka diosmaiamu íntskuntani jimbokajtsïni mókuchiantaska juchaari kómarhikuechani (Kol. 3:15). Joperu jarhasti máteru ambe engachi jimbo jatsika para diosmaiamukua íntskuntani Tata Diosïni ka i ambe kánikua jukaparhakuesti. Ju je exeni ambeeski.

10. ¿Andichisï jatsi para diosmaiamukua arhini Tata Diosï Jeobani enga axaka Jesúsini ixú Echerirhu? (1 Pedru 2:21).

¹⁰ (Arhinta je 1 Pedru 2:21). Jatsiskachi para diosmaiamu arhini Tata Diosï Jeobani enga axaka imeeri Uájpani parajtsïni jorhendani. Engachi jorhenguarhijka na enga irekapka Jesúsi, uánikua ambechi jorhenguarhisïnga Tata Diosïri ambe ka ambe engachi jatsika para úni parajtsïni ima jaiapanhentani. Engachi mintsinharhiska Jesúsiri uarhikuani, uaakachi ambakiti pájperakua ma jatsini Tata Diosï Jeoba jingoni (Rom. 5:1).

11. ¿Andichisï kómarhijki Tata Diosïni Jesúsiri nombrini jimbo?

¹¹ Diosmaiamukuachi íntskuntasïnga Tata Diosï Jeobani jimbokachi úsïnga kómarhini imeeri Uájpeeri nombri jimbo. Tata Diosï, Jesúsini úrasïndi parajtsïni íntskuni ambe engachi kurhakujka. Engachi kómarhijka Tata Diosïni imeeri Uájpeeri nombri jimbo, Tata Diosï Jeobajtsïni kurhajchaati ka mókuchiatijtsïni. Jesúsi uandasti: “Ambe uéjkijtsï kurhajkuarhini juchiiti nombri jimbo, jíksïni íntskuaka paraka Taati, kʼéri ambe arhinhaaka Uájpani jimbo” (Juanu 14:13, 14, TNM).

12. ¿Ambe máteru ambe jimbochi jatsiski para diosmaiamukua arhini Tata Diosï Jeobani imeeri Uájpani jimbo?

¹² Jimboka Jesúsi uarhiska juchantsïni jimbo, Tata Diosï Jeobajtsïni úsïndi puácheantani juchaari pekaduechani. Biblia uandasïndi eska Jesúsi jindeeska “kʼéri saserdoti” ka eska uaxakaskia “Tata Diosïri kʼéri uaxantskuarhu jurhijkandani jimbo” (Heb. 8:1, TNM). Ístu uandasïndi eskachi jatsiska “ma engajtsïni kuájpintajka Diosï Taatini japarini, ka jindeesti Jesukristu” (1 Juanu 2:1). Kánikuachi diosmaiamukua íntskuntasïnga Tata Diosï Jeobani engajtsïni íntskuka Kʼéri Saserdotini engajtsïni pʼamojkujka, enga kurhangujka na engachi xáni újka úni ka engajtsïni kómarhijpecheni jaka (Rom. 8:34; Ebr. 4:15). Enga Jesúsi no uarhipiringa juchantsïni jimbo, nóchi úpiringa kómarhini Tata Diosï Jeobani jimbokachi imperfektueska. Nóchi úsïnga uandakuecha jingoni diosmaiamukua arhini Tata Diosïni engajtsïni íntskuka ini xáni ambakiti regaluni: imeeri Uájpani enga xáni xénchajka.

13. ¿Néna xarhataspi Jesúsi ima chúrikua antede uarhini, eska xénchaasïreenga imeeri chúxapatichani?

¹³ Ima chúrikua ante de uarhini, Jesúsi ióni kómarhijpikuaspti imeeri chúxapatichani ka kurhakuspti imeeri Taatini eska kuájchakuapiringa (Juanu 17:15). ¡Inde ambe xarhataspti na enga xáni xénchauenga imeeri chúxapaticha! Nájkiruka no ióni jimbo kʼéri tsʼéjkukua ma nitamakuarhipiringa, kánikua uandanhiaxapti imeeri apostolicha jimbo.

14. ¿Nénachi xarhatasïnga eskachi xénchaasïnga juchaari erachichani?

 ¹⁴ Májkueni eska Jesúsi, juchachi no nomasi kurhajkuarhisïnga imani ambe engachi uétarhinchani jarhajka. Sánderu sési, pʼindeskachi kómarhijpikuani juchaari erachichani. Engachi ísï újka, kurhajchani jarhasïngachi imani juramukuani enga Jesúsi íntspipka parachi xénchperani máteruni ka máteruni jingoni, ka xarhatakunchi jarhasïnga Tata Diosï Jeobani na engachi xáni xénchaajka juchaari erachichani (Juanu 13:34). Ístuchi míteska eska engachi kómarhijpikuajka máteru erachichani, nóchi ísku tiempu tsïtani jarhasïnga, jimboka Bibliajtsïni arhisïnga eska kánikuamendu marhuasïnga enga “ma ambakiti kʼuiripu kómarhijka [Tata] Diosïni” (Sant. 5:16).

15. ¿Andiksïsï uétarhinchajki juchaari erachicha eskachi kómarhijpikuauaka?

¹⁵ Juchaari erachichaksï uétarhinchasïndi eskachi kómarhijpikuauaka jimbokaksï uánikua uandanhiatechani jatsiasïnga. Uaakachi kurhakuni Tata Diosï Jeobani eska jarhuatauaka parakaksï uaaka tekaantani engaksï pʼamenchani jauaka, engaksï desastre naturali ma nitamakuarhini jauaka, guerrecha jimbo o engaksï no sési kánhani jauaka. Ístuchi uaaka kómarhijpikuani erachichani engaksï kánikua ánchikuarhijka para jarhuajpeni jimeesïsï enga no sési ambe úkuarhijka. Jamberijtsï chá míteka nemani enga i ambe nitamakuarhini jaka. ¿Andijtsïsï no uandajki imeeri nombrini engajtsï kómarhijpikuni jauaka? Engachi kurhakujka Tata Diosï Jeobani eska jarhuatauaka erachichani, xarhatanchi jarhasïnga eskachi meru xénchaasïnga imeechani.

16. ¿Andichisï jatsi para kómarhijpikuani imani erachichani engajtsïni orhejtsïkujka?

¹⁶ Erachicha engaksï orhejtsïkujka kúnguarhikuani ístuksï kánikua sési pʼikuarherasïndi engachi kómarhijpikuajka jimbokaksï i kómarhikuecha jarhuataasïnga. Ísï pʼikuarheraspti apostoli Pablu. Ima karaspti: “Kómarhijpechejtsïni [je] eskani intsïnhaaka uandakua para no sáni chéparini uandantani ini ambakiti aianhperakuani enga no nema mítepka” (Efes. 6:19). Iásïjtuksï jarhasti uánikua erachicha engajtsïni orhejtsïkujka ka engaksï uinhamu ánchikuarhijka. Engachi kurhakuska Tata Diosï Jeobani eska újchakuraaka ambe engaksï újka i erachicha, xarhatanchi jarhasïnga eskachi xénchaasïnga.

17, 18. ¿Kánchi úpirini arhinhani eskachi kómarhiaka máteruechani japarini, ka ambechi jatsiski para miáni jarhani?

¹⁷ Ménisïchi úpiringa arhinhani eskachi kómarhiaka  máteruechani japarini. Pori ejemplu, pirenchi ma enga Biblieri ambe jorhendani jaka nemani, úpirindi kurhakuni imani pirenchini enga pámbetaka eska kómarhikua ma uaaka. Jamberi pirenchi enga pámbetaka no sési míteti jorhenguarhirini ka jamberi sánderu sési exeati ima úni kómarhikuani engaksï na kʼamaraakia jorhenguarhini. Ísï úparini uaati imani ambe uandani kómarhikuarhu enga jorhenguarhiri uétarhinchani jauaka.

¹⁸ Erachi ma úpirindi arhinhani eska kómarhikua ma uaaka tánguarhikuarhu para uérani aianhpini o tánguarhikua ma jimbo. Erachicha engaksï ini kóntperatani jatsika, jatsistiksï para miáni para ambe marhuaua ima tánguarhikua. Kómarhikuechaksï no jindeesti para konseju íntskuni kúnguarhikuani ni para aianhpini ambe ma. Para sáno iámindu tánguarhikuecha, sinku minutujkuesïndi para pirekua ka kómarhikua. Jimajkani, erachi enga kómarhikua uaaka, no jatsisti para ióparharani kómarhikuani ka sánderu enga jindeuaka para tánguarhikua ma ueenani (Mat. 6:7).

19. ¿Ambejtsïni jarhuata listu jarhani para ima jurhiatikua enga Tata Diosï jusgarpiaka?

¹⁹ Axuterku jarhastia ima jurhiatikua enga Tata Diosï Jeoba jusgarpiaka. Jimbochisï jatsika para sánderu jukaparharani kómarhini Tata Diosïni. Enga Jesúsi ima jurhiatikueri ambe uandani japka, uandaspti: “Jimajkani jingontku je, ka méntku jauenani kómarhini para eskajtsï exenhaaka eskajtsï jukanchaska kuájpinhani para iámindu indeni no sési jásï ambe jingoni enga jatsika para úkuarhini” (Luk. 21:36). Engachi méntkisï kómarhini jauaka Tata Diosïni, méntkisïchi mintsikaaka ka listuchi jauaka para ima jurhiatikua enga Tata Diosï jusgarpiaka.

20. ¿Ambechi uaa úni parakaksï juchaari kómarhikuecha ísïiuaka eska insiensu enga sési jájkundejka?

²⁰ ¿Ambechi exeski ini jorhenguarhikua jimbo? Kánikuachi jukaparharasïnga kómarhini Tata Diosï Jeobani. Sánderu jukaparhakua ambe engachi jatsika para uandani juchaari kómarhikuecharhu, jindeesti ima ambe enga xarhataaka eskachi uékasïnga eska úkuarhiaka ambe enga Tata Diosï eratsetini jaka úni. Ístuchi diosmaiamukua íntskuntasïnga Tata Diosï Jeobani imeeri Uájpani jimbo, imeeri Reinuni jimbo ka kómarhijpikuasïngachi erachichani. Ka ístuchi uaaka kurhakuni Tata Diosïni eskajtsïni íntskuaka ambe engachi uétarhinchani jauaka ka eskajtsïni jarhuataaka mintsikani. Engachi sési eratsentaska ambe engachi uandaaka juchaari kómarhikuecharhu, xarhatanchi jauaka eskachi kánikua jukaparharasïnga kómarhini Tata Diosïni. Para ima, juchaari uandakuechaksï ísïiuati komueska insiensu enga kánikua sési jájkundejka ka ʻkánikuaksï sési pʼikuastaati imaniʼ (Prov. 15:8).