Darlaston (Inglaterra) andajpenuska 1935 jimbo, iretarhu ma engaksï uánikua fabrikecha jaka, jima kánikua sïraata jarhasïrendi fabrikechani jimbo. Engani kuatru uéxurhinisï jatiripka juchiiti taatichaksï uénaspti Biblieri ambe jorhenguarhini Jeobaeri testiguecha jingoni. Engani 14 o 15 uéxurhinisï jatiripka, niáraspka seguru jarhani eska i jindeespka jurhimbikua ka 1952 jimbo itsï atakuarhispka engani 16 uéxurhini jatiripka.

Jiánisï, uénaspka ánchikuarhini kʼéri fabrika ma jimbo nani engaksï ueenga erramientechani ka ambe ma para karruecha. Uénasptijtsïni jorhendani para kʼéri responsabilidadi ma jatsini empresarhu ka kánikua tsitixapka ini ambe.

Ma jurhiatikua, sirkuitueri orhejtsïkutirini kurhamarhispti sini úpirini nitamatarani tánguarhikua enga Estudio de Libro de Congregación arhinheenga ka enga entre semana úkuarhienga juchiiti kúnguarhikuarhu enga Willenhall japka. Inde amberini úkua jukachespti, jimboka imani jurhiatikuechani jimbo ji tsimani kúnguarhikuecharhu nirasïreenga. Entre semana kúnguarhikua ma jimbo nirasïreenga enga no iauani japka jima engani ánchikuarhienga, jini Bromsgrove enga 32 kilometrisï (20 millas) iauani japka juchiniu uératini. Ka fini de semana jimbo, juchiiti taaticha jingoni nirasïreenga kúnguarhikua ma jimbo enga Willenhall japka.

Jimbokani uékasïreenga sánderu jarhuajpeni Tata Diosï Jeobaeri kúnguarhikuarhu, úspka ambe engareni sirkuitueri orhejtsïkuti arhipka, nájkiruka i ambe arhikuekapiringa jurajkuni juchiiti ánchikuarhitani engani xáni tsitienga. Jurajkuni eskarini Tata Diosï úrapiringa, úspti eskani sánderu marhuakupiringa imani ka no méni pʼamondakuarhisïnga engani ísï úka.

Engani nireenga kúnguarhikuarhu enga ireta Bromsgrove japka, mítespka Annenini, pirenchi ma enga kánikua sési jáxepka ka enga kánikua sési marhuakuni japka Tata Diosï Jeobani. Tembuperaspkachi 1957 jimbo. Jiáni uératini, tsimarhanchi kʼérati kóntperatechani jatsiaska komu úni marhuani eska prekursori regularicha, prekursori espesialiinchi, sirkuitueri orhejtsïkutiini ka Beteli marhuani. Anne ústi eskani kánikua tsípikua jingoni irekaaka.

Uéxurhini 1966 jimbo niraspkachi Galaadi, klase 42 jimbo. ¡Kánikuachi tsitispka! Axanhaspkachi Malaui, nani enga kʼuiripu kánikua sési kámpijka ka sési erokpini. Eratsesïrengachi eskachi ióni japiringa jima, peru no ísï úkuarhispti.

Niáraspkachi Malaui 1 de febreruni 1967 jimbo. Ma mesijtsïni jorhendaspti jima anapu idiomani uandani ka tátsekuajtsïni axaspti komu distritueri orhejtsïkuti. Jeep Kaiser ma jimbochi jámasïreenga. Erokuarhisïreengachi eskachi úpiringa iápurisï kámani ini karruni asta riuecharhisï. Peru no ísïispti, jimboka jimeesïsïjku úsïreendi jámani enga itsï no xáni jauamhipka. Ménichanisï pakarasïreengachi kʼumanchikuecha jimbo engaksï echeriri úkatepka ka engaksï paja jukajtsïenga. Enga janienga, lonachi ma ójtsïtasïreenga paraka itsï no inchapiringa. Engachi ueenapka misionerueni úkuachi jukanchaspka, ¡peruchi kʼóru kánikua tsitispka!

Abrilini jimbo kurhaaspka eska no sési ambe úkuarhixapka paisirhu. Radiurhu kurhaaspka Malaui anapu presidentini, doktori Hastings Bandani, enga uandeenga eskaksï Jeobaeri testiguecha no maiampisïreenga impuestuechani ka eskachi politikarhu inchamukusïreenga. Joperu i ambe méntku no ísïispti. Iáminduechachi mítespka eska ambe enga ikiateenga, jindeespti eskachi no inchamukusïreenga politikarhu ka engachi no piáuenga tarjetechani parachi imeeri partidu jingoni úkuarhini.

Para septiembrinisï, periodikuechaksï uandasïreendi eska presidenti uandasïreenga eskaksï juchaari erachicha iápurisï uaasïreenga problemechani. Tánguarhikua ma jimbo, presidenti uandaspti eska imeeri gobiernu sóntku úpiringa ambe ma para kénditaani Jeobaeri testiguechani. Ka ísï úkuarhispti 20 de oktubrini 1967 jimbo. Ísï tátsekua, máru polisiechaksï ka inmigrasioniri ofisialichaksï Beteliksï niraspti paraksï míkani ka paraksï iámindu misioneruechani petaantani paisirhu.

Tanimu jurhiatikua ónhakata jarhaspka, tátsekuachi axanhaspka imani paisi jimbo enga Mauricio arhinhajka, imani paisini jimbo Gran Bretaña juramusïreendi. Peru jima anapu juramutichajtsïni no jurajkuspti parachi jima pakarani, jimbojtsïnisï Tata Diosï Jeobaeri kúnguarhikua Rodesia axapti (enga iásï jindeeka Zimbabue). Engachi jima niárapka inmigrasioniri ofisialijtsïni ma ikiatinkujtsïni erokaspti ka nójtsïni jurajkuspti  eskachi inchapiringa, arhisptijtsïni: “Petanhantaskajtsïa Malaui uératini. Nóksïni jurajkusti parajtsï Mauricio pakarani ka iásïjtsï ixú jurhaskia eratseparini eskajtsï sési jauaka ixú”. Anne uénaspti uerani. ¡Ísï xarharasïreendi enajkijtsïni no nani uékeeni! Jiánisï, ambe engantkuni uékeenga jindeespti Inglaterra kʼuanhatsentani. Tátsekuajtsïni jurajkuspti parachi ima chúrikua Beteli pakarani, peru eskachi pauandikua jatsispka para imeecheri kuartelirhu nirani. Kánikuachi kuataratixapkia, peruchi seguirispka jurajkuni eskajtsïni Tata Diosï Jeoba jarhuatapiringa. Pauandikua inchatiru úkuarhispti ambe ma engachi no erokuarhini japka: jurajkusptijtsïni eskachi Zimbabue pakarapiringa komueska turistecha. No méni mirikurhiaka na engani pʼikuarherapka ima jurhiatikua. Seguru jarhaspka eskajtsïni Tata Diosï Jeoba orhechepaxapka.

Beteli enga Zimbabue jaka, arhisptijtsïni eskani ánchikuarhipiringa Grupurhu enga exejka na enga Aianhpinhani jaka para exeni ánchikuarhita enga úkuarhienga Malaui ka Mozambique. Malaui anapu erachichaksï kánikua no sési kánhaxapti, joperuksï tekaantaxapti. Ístu Juchiiti ánchikuarhita jindeespti tradusiriuantani informichani engaksï sirkuitueri orhejtsïkuticha axauenga. Ma xanhari, iauani chúrikua pakaraspka informi ma tradusirini. Engani arhintapka na engaksï xáni no sési kánhani japka juchiiti erachicha ka pirenchicha, uénaspka uerani. * Peru ístureni mintsitarhu niárachespti na engaksï tekaantani japka, engaksï ísï no jurajkuni japka Tata Diosïni ka na engaksï xáni mintsinharhienga (2 Kor. 6:4, 5).

Kánikuachi jánguarhintaska paraka Malaui anapu erachicha úpiringa seguirini jorhenguarhini Tata Diosïri ambe ka ístu imeecha engaksï Mozambique mótsipka jimbokaksï no sési kánhaxapka Malaui. Erachicha engaksï tradusiriueenga idioma Chichewa jimbo, idioma enga sánderu uandanhajka Malaui, Zimbabueksï mótsispti, echerirhu ma enga erachi ma íntspipka. I erachi ofisina ma úspti ka kʼumanchikuechani parakaksï traduktoricha jima pakarapiringa. Ísïksï úspti seguirini publikasionichani tradusiriuantani.

Uánikua ambechi úska parakaksï sirkuitueri orhejtsïkuticha engaksï Malaui japka, úpiringaksï nirani mándani uéxurhini Zimbabue kʼéri tánguarhikuarhu enga chichewa jimbo úkuarhienga. Jimaksï intsïnhasïreendi boskejuechani engaksï kʼéri tánguarhikuarhu nitamatarauenga. Engaksï na kʼuanhatsentani jarhengia Malaui, aianguasïrendiksï erachichani ambe engaksï xáni jorhenguarhienga kʼéri tánguarhikuarhu. Ma indeni uéxurhinicha jimbo úspkachi eska úkuarhipiringa Eskuela para Reinueri Ánchikuarhita jini Zimbabue para uinhaperantaani ini xáni ambakiti sirkuitueri orhejtsïkutichani.

Febreruni 1975 jimbo, niraspka Mozambique parani Malaui anapu erachichani pʼorhembiani engaksï jima japka nani engaksï kʼuiripuecha kuájchakukuarhijka. Íksï erachicha ísï úxapti eska Tata Diosïri kúnguarhikua na uandajka, jarhasptiksïa orhejtsïkuticha. Ka íksï jimbanhi orhejtsïkuticha úspti eskaksï japiringa arhijtsïkperatecha para iáminduecha, eskaksï tánguarhintapiringa para arhintani mándani jurhiatikua anapu tekstuni ka paraksï jorhenguarhini rebista Aianhpiri jingoni ka astaksï uaasïreendi kʼéri tánguarhikuechani. Ini lugaricha jimbo erachichaksï májkueni úsïreendi eska kʼéri tánguarhikua ma jimbo, jarhasptiksï erachicha engaksï sési jántskantaeenga, máteruecha engaksï tʼirekua etsakueenga, ka ístu máru engaksï kuáripka. Ískurini pakataspti na engaksï xáni sési ánchikuarhini japka i erachicha Tata Diosï Jeobaeri kóntperata jimbo. ¡Kánikuarini uinhaperantaspti i ambe!

Uéxurhini 1979 jimbo ísï, Zambia anapu Beteli uénaspti exeni Malaui anapu ánchikuarhitani. Peruni ji útasï mintsitarhu paasïreenga Malaui anapu erachichani ka seguirixapka kómarhijpikuani, ka uánikuechajtuksï májkueni úxapti ka májkueni pʼikuarherani eska ji. Jimbokani Grupurhu jarhaspka enga Zimbabue anapu Betelini Orhejtsïkuenga, mémindu tánguarhintaspka erachicha jingoni engaksï Beteli de Estados Unidos anapueka nani engaksï Jeobaeri ánchikuarhitani exejka. Ka imani tánguarhikuechani jimbojtuksï nirasïreendi erachicha engaksï Malaui, Sudáfrica ka Zambia anapu aianhpikuani orhejtsïkuenga. Ka méntkisï engachi tánguarhienga iiri ambechi uandontskuarhesïreenga: “¿Nénachi uaa útasï jarhuataani Malaui anapu erachichani?”.

Sánderu orhepatini, nóterujtsïni xáni no sési kámasïreendia ka erachicha engaksï Malaui uératini sïpakuarhipka sánhani arhisptiksï kʼuanhatsentani. Imeecha engaksï Malaui pakarapka nóteruksï xáni no sési kánhasïrendia. Ístu, paisicha engaksï jimeesïsï japka sánhani arhisptijtsïni jurajkuni parachi úni juchaari ánchikuarhitani  ka nóteruchi xáni no sési kánhasïrengia, ka 1991 jimbo Mozambique májkueni úspti eska máteru paisicha. Peruchi útasï kurhamarhikuarhixapka: “¿Kánksï jurajkunhaa Malaui anapu erachicha paraksï úni sési marhuakuni Tata Diosïni?”.

Malaui niáraspti uánikua ambe mójtakurhini politikaeri ambe, ka 1993 jimbo gobiernujtsïni jurajkusptia parakachi ménderu úpiringa úni juchaari ánchikuarhitani imani paisi jimbo. Sánisï tátsekua, misioneru ma kurhamarhisptireni: “¿Malauiri kʼuanhatsentaa?”. Ji 59 uéxurhini jatirispkia, jimbosïni arhipka: “¡Nómbe, jukarini tʼarhepiskia parani ménderu kʼuanhatsentani!”. Joperu ima mismu jurhiatikua, mensajirini ma niárachespti Grupueri enga Orhejtsïkuajka iámindu kúnguarhikuechani ka pʼímarhixaptijtsïni parachi kʼuanhatsentani Malaui.

Kánikuachi tsitisïreenga Zimbabue marhuani, jimbosï no fásilipti erakuni ambe úni. Jimachi agustu jarhaspka ka uánikua amiguechanchi jatsiaspkia. Ka Grupu enga Orhejtsïkuajka iámindu kúnguarhikuechani kánikua tékaantskuajtsïni xarhatachespti ka arhisptijtsïni eskachi úpiringa Zimbabue pakarani engachi jucha ísï uékapiringa. Sánderu fásilipirindi jima pakarani, nani engachi jucha tsitienga. Peruni miántaspka Abraániri ka Saraeri ejempluni, na enga imeecha nájkirukaksï jatiripkia jurajkusptiksï imeecheri kʼumanchikuani paraksï ísï úni eska Tata Diosï Jeoba na kurhakuapka (Gén. 12:1-5).

Erakuspkachi imani ambe úni engajtsïni Tata Diosïri kúnguarhikua arhipka, ka kʼuanhatsentaspkachi Malaui 1 de febreruni 1995 jimbo, 28 uéxurhini nitamasptia engachi primeru xanhari nípka imani paisini jimbo. Ka Grupu ma úkuarhispti para Betelini Orhejtsïkuni, ini grupuni jimbo tanimu erachichachi jarhaspka ka sánisï tátsekua, organisarixapkachia na enga úkuarhipiringa Jeobaeri testiguecheri ánchikuarhita imani paisini jimbo.

Kánikuani sési pʼikuarheraspka exeni na enga Tata Diosï Jeoba úpka eskaksï xáni sóntku uánikua erachicha japiringa. Uéxurhini 1993 ka 1998 jamberi, uánikua erachichaksï jarhasptia: ¡orhetachi 30,000 aianhpirichespka ka tátsekua jukari 42,000 ísïspkachia! * Jimboka sánderu ánchikuarhita jarhaspkia, Grupu enga Orhejtsïkuajka iámindu kúnguarhikuechani uandaspti eska jimbanhi Beteli ma únhapiringa. Piáspkachi echeri ma enga 12 ektarea kʼépka (30 acres) ireta ma jimbo enga Lilongüe arhinheenga, ka arhisptijtsïni eskani imani Grupurhu japiringa enga Konstruksioniri ambe exenga.

Maiuni 2001 jimbo, erachi Guy Pierce, enga Grupurhu japka enga Orhejtsïkuajka iámindu kúnguarhikuechani, nitamataraspti arhijtsïkperata ma para  jimbanhi Betelini dedikarini. Jukari 2,000 Malaui anapu erachichaksï niraspti imani tánguarhikua jimbo. Sáno iáminduecha jukariksï 40 uéxurhini páxaptia engaksï itsï atakuarhipka. I erachicha ka pirenchichaksï kánikua tekaantaspti jiáni engaksï no sési kánhani japka. Nóksï kánikua ambe jatsikuarhespti, peruksï kánikua mintsikasïreendi Tata Diosïni ka ambakiti pájperakuaksï ma jatsispti imani jingoni. Ka iásïksï kánikua tsípiparini, miiuxaptiksï jimbanhi Betelini. Reinueri pirekuechanksï pirepariani jámasïreendi iámu Beteli jimbo ísï eskaksï África anapuecha na pirejka, i ambe mintsitarhurini niárachespti. Ambe engaksï erachicha nitamakuarhipka xarhataspti eska Tata Diosï Jeoba újchakuraasïnga iámindu imeechani engaksï tekaantajka ka mintsikani imani.

Enga na kʼamaranhapkia Beteli únhani, axanhaspka para Kʼumanchikua Reinuerichani dedikariuani. Malaui anapu kúnguarhikuecha programarhuksï ma jimbo jarhaspti engaksï sóntku úpiringa úminhani Kʼumanchikua Reinuerichani, jimbokaksï paisi ma jimbo jarhaspka engaksï no xáni jatsikuarheripka. Antesi kʼumanchikuechanksï jimbo tánguarhisïreendi engaksï anhatapueri úkatepka. Pʼatamu jingoni ójtsïtasïreendiksï techuechani, ka atsïmu jingonksï uaasïreendi kʼérati bankechani paraksï jima uaxakani. Iásïksï erachicha tabikichani uaasïreendi paraksï úni sési járhati kʼumanchikuechani uaani engaksï jimbo úpiringa tánguarhini. Joperu erachichaksï útasï sánderu tsitisïreendi bankecha jimbo uaxakani ka eska siiechani jimbo jimbokaksï ima mismu uandasïreenga, “sánderuchi uánikua jatanhesïnga bankecha jimbo”.

Ístuni kánikua tsitisïnga exeni na enga Tata Diosï Jeoba jarhuataajka kʼuiripuechani parakaksï niáraaka imani marhuakuni. Kánikua tsitisïreenga exeani África anapu tumbiichani, na engaksï méntkisï tsípikua jingoni uékeenga jarhuajpeni ka sóntkuksï jorhenguarhisïreendi ambe engaksï Jeobaeri kúnguarhikuarhu arhinheenga. Jimbokaksï sési jorhendakata jarhaspka, úsïreendiksï Betelirhu ka kúnguarhikuecharhu sánderu kʼérati ánchikuarhitechanksï jatsiani. Ístu, jimbanhi sirkuitueri orhejtsïkuticha kánikuaksï uinhaperantasïreendi erachichani. Uánikuaksï tembuchatiisptia ka paraksï úni sánderu marhuakuni Tata Diosï Jeobani nóksï kánguarhiaspti sapiichani, nájkiruka ireta o imeecheri familia ménisïksï arhiauenga eskaksï kánguarhiapiringa.

Engachi 52 uéxurhini andangutapkia jini África, uénaspka máru pʼamenchakuechani jatsiani. Grupu enga Betelini orhejtsïkujka uandaspti eskachi Gran Bretaña anapu Beteliru axanhapiringa ka Grupu enga Orhejtsïkuajka iámindu kúnguarhikuechani sési exespti i ambe. Kánikuachi no sési pʼikuarheraspka jurajkuni ini asignasionini engachi xáni tsitienga, peru erachicha engaksï Gran Bretaña anapu Betelirhu marhuajka kánikuajtsïni uékperakua jingoni kuidarisïndi iásï engachi jatiriikia.

Seguru jarhaska eska sánderu ambakiti ambe engani erakuka úni juchiiti tsípikuarhu jindeeska jurajkuni eskarini Tata Diosï Jeoba úrapiringa. Engani imani ambe úpiringa engani ji tsitienga, jamberireni no xáni sési nichepirindi. Tata Diosï Jeoba mítespti ambe engani uétarhincheenga parakarini méntkisï sési nichepiringa (Prov. 3:5, 6). Engani tumbiipka kánikua tsitisïreenga míteni néna ánchikuarhisïreeni kʼéri empresa ma. Peru ánchikuarhini Tata Diosï Jeobaeri kúnguarhikua jingoni ústi eskani kánikua sési pʼikuarherapiringa. Marhuakuni Tata Diosï Jeobani úspti ka útasï úxati eskani kánikua sési pʼikuarheraaka ka tsípikua jingoni irekuarhini.