1. ¿Ambe úspi Tata Diosï Jeoba ísï tátsekua engaksï Adáni ka Eba pekaripka? (Génesis 3:15).

 ÍSÏ TÁTSEKUA engaksï Adáni ka Eba pekaripka, profesia ma jimbo enga kánikua jukaparhakueka, Tata Diosï Jeoba aiakuaspti ambe ma imeecheri uájpeechani. Uaakachi exeni ambe enga ima uandapka ixú Génesis 3:15 jimbo (arhinta je).

2. ¿Andisï xáni jukaparhakue profesia enga Génesis 3:15 jimbo jaka?

² I profesia, primeru librurhu jarhasti Bibliarhu. Ka ambe engaksï iámindu máteru libruecha uandajka terukuntasïndiksï ini profesia jingoni. Májkueni eska libru ma jimbo náksï mátakuarhitini jarhajka iámindu pájinecha, inde uandakuecha engaksï Génesis 3:15 jimbo jaka, úsïndi eskaksï iámindu máteru libruecha engaksï Bibliarhu anapueka, terukuntaaka ka májku amberiksï uandani. ¿Ambe jorhentpisïni inde profesia? Eska Tata Diosï axapiringa nemani parajtsïni pʼímutantani ka kʼamajkuni Noambakitini ka iámindu imeechani engaksï imani jingoni úkuarhijka. * ¡I kánikua ambakiti ambeesti para iámindu jucha engachi Tata Diosï Jeobani xénchajka!

3. ¿Ambechi exeni jaua ini jorhenguarhikua jimbo?

³ Ini jorhenguarhikua jimbo, exenchi jauaka ¿neeskiksï imeecha enga Génesis 3:15 uandajka?, ¿néna kumplirikuarhixaki i profesia? ka ¿nénajtsïni jarhuatasïni iásï?

4. ¿Neeski “akuitsi”, ka nénachi míteski i ambe?

⁴ Génesis 3:14, 15 jimbo, uandasïndi “akuitsini” ma ka imeeri ʻdesendensianiʼ ka ístu uandasïndi “uarhiitini” ma ka imeeri ʻdesendensianiʼ. Bibliani jimbo, úsïngachi míteni neeskiksï ícha enga i profesia uandajka. * Orhetachi exeaka neeski “akuitsi”.  No jindeesti sési jimbo akuitsi ma jimboka akuitsi ma no úpiringa kurhanguni ambe enga Tata Diosï Jeoba arhipka jardini de Edénirhu eska úkuarhinchapiringa. Sánderu sési jindeepirindi nema enga úpiringa eratseni. Ka Bibliajtsïni sési exerasïndi neeski ima. Jaŋaskuecha 12:9 arhisïndi eska “ióntki anapu akuitsi” jindeeska Noambakiti ka Satanasi. ¿Ka neeski akuitsiri desendensia?

5. ¿Néksï jindeeski akuitsiri desendensia?

⁵ Ménichani Biblia úrasïndi uandakuani “desendensia” para imeechani arhikuekaani engaksï ísï jámajka ka eratseni eska nema ka engachi jamberi úpiringa uandani eskaksï imeeri uájpeeska. Ísï jimbo, akuitsiri desendensia jindeestiksï espirituecha ka kʼuiripuecha engaksï no xénchajka Tata Diosï Jeobani ka ni imeeri iretani, ísï eska na újka Satanasi. Ixúksï kuenta úkuarhisïndi ima ánjelicha engaksï nóteru uékapkia marhuakuni Tata Diosïni Noéri jurhiatikuecha jimbo ka ístu ima kʼuiripuecha engaksï no sési úrika ka engaksï májkueni jámajka eska Noambakiti enga jindeeka imeecheri taati (Gén. 6:1, 2; Juanu 8:44; 1 Juanu 5:19; Jud. 6).

6. ¿Andisï Eba no jindee ima ʻuarhiitiʼ enga Génesis 3:15 uandajka?

⁶ Iásï, ju je exeni né jindeeski ima ʻuarhiitiʼ. ¿Úpirini Ebaeni? Nómbe. Ju je exeni. Profesia uandasïreendi eska uarhiitiri desendensia chʼatajtsikupiringa akuitsini. Ka eskachi na exekia, akuitsi jindeesti Noambakiti. Ísï jimbo, Ebaeri desendienti má, k’uiripu no perfektu ma, no úpirindi uándikuni Noambakitini. Jimajkani, máteru nemani arhikuekendi.

7. ¿Nénajtsïni jarhuatasïni Jaŋaskuecha 12:1, 2, 5, 10 parachi úni míteni né jindeeski uarhiiti enga Génesis 3:15 uandajka?

⁷ Últimu libru Biblieri, aiangusïndijtsïni né jindeeski uarhiiti enga Génesis 3:15 uandajka (arhinta je Jaŋaskuecha 12:1, 2, 5, 10). No jindeesti uarhiiti ma enga kʼuiripueka. Luna imeeri jantsirirhu kétsekua jarhasti ka imeeri éjpurhu korona ma jukarixati enga 12 jóskuechani  jukaaka. Ístu, sapini ma kánguarhisïndi enga kánikua jukaparhakueka, enga arhikuekajka Tata Diosïri Reinuni. Jimboka Tata Diosïri Reinu auandarhu jarhaska, jimajkani uarhiitijtu auandarhu jarhasti. Ísï jimbo, i uarhiiti arhikuekaasïndi ánjelichani engaksï no méni jurajkujka Tata Diosïni ka engaksï auandarhu irekaka (Gal. 4:26).

8. ¿Né jindeeski uarhiitiri desendensia enga sánderu jukaparhakueka ka káni niáraspi jindeeni uarhiitiri desendensia? (Génesis 22:15-18).

⁸ Tata Diosïri Karakatajtsïni ístu jarhuatasïndi kurhanguni né jindeeski sánderu jukaparhakua uarhiitiri desendensieri. I desendensia Abraánini jimbo jupirindi (arhinta je Génesis 22:15-18). Ka i profesia ísï úkuarhispti jimboka Jesúsi, Abraániri desendienti máespka (Luk. 3:23, 34). Joperu i desendensia no né uéjki kʼuiripu máepirindi, sino nema enga úpiringa chʼatajtsïkuni Noambakitini ka kʼamajkuni para méntkisï. Ísï jimbo, enga Jesúsi 30 uéxurhinisï jatiripkia, Tata Diosï erakuspti espiritu santu jimbo paraka niárapiringa imeeri Uájpeeni. Ka jiáni niáraspti jindeeni uarhiitiri desendensia, ima enga sánderu jukaparhakuepka (Gal. 3:16). Enga Jesúsi na uarhipkia ka tsíntani, Tata Diosï íntskusti tʼíntskua ka úspti “eska kʼéri ambe arhinhapiringa”, íntskuspti juramukua “auandarhu ka ístu parhakpinirhu” ka ístu íntskuspti juramukua para xereantani “Noambakitiri úkuechani” (Ebr. 2:7; Mat. 28:18; 1 Juanu 3:8).

9, 10. a) ¿Ístuksï neecha kuenta úkuarhisïni uarhiitiri desendensiarhu, ka kánksï niáraspi jima kuenta úkuarhini? b) ¿Ambechi exea iáiasï?

⁹ Joperuksï ístu uarhiitiri desendensiarhu japirindi máteru kʼuiripuecha. Enga apostoli Pablu karakuapka kristianu erakukatechani engaksï judiuepka ka máteru nasionirhu anapuechani, uandaspti neechaksï jindeepirini i kʼuiripuecha engaksï ístu uarhiitiri desendensiepiringa, arhiaspti: “Engajtsï kristuerika, sési jimbo jindeeskajtsï Abraániri desendienti jémbeecha ka chaaristi erensia eskajtsï na aiaminhapka” (Gal. 3:28, 29). Enga Tata Diosï erakujka kristianuni ma espiritu santu jimbo, ima kʼuiripu niárasïndi kuenta úkuarhini uarhiitiri desendensia jingoni. Jimajkani, uarhiitiri desendensia jindeesti tata Jesukristu ka 144,000 kʼuiripuecha engaksï imani jingoni juramuaka (Jaŋ. 14:1). Iámindu iicha, jánguarhintasïndiksï ísï eratseni ka ísï jámani eska Tata Diosï Jeoba enga jindeeka imeecheri Taati.

¹⁰ Úskachia míteni néksï jindeeski imeecha enga Génesis 3:15 uandajka. Iásïchi exeaka ambe enga úni jaka Tata Diosï Jeoba para kumplirikuarhini ambe enga ima uandaka, ka tátsekuachi exeaka na engajtsïni jarhuatajka iásï i profesia.

11. ¿Néna atanhaspi “irandurhakuarhu” uarhiitiri desendensia?

¹¹ Génesis 3:15 uandasïndi eska akuitsi atapiringa “irandurakuarhu” uarhiitiri desendensiani. I ambe jiáni úkuarhispti enga Noambakiti úpka eskaksï judiuecha ka romanuecha uándikupiringa Tata Diosïri Uájpani (Luk. 23:13, 20-24). Enga nema irandurakuarhu atakuarhijka no úsïndi xanharani ma tiempu. Sáno májkueni, ma tiempu jimbo Jesúsi no ma ambe úspti úni jimboka uarhirixapka ka sáno tanimu jurhiatikua jarhaspti tumbarhu (Mat. 16:21).

12. ¿Káni ka néna chʼatajtsïkunha akuitsi?

¹² Paraka úkuarhipiringa ambe enga Génesis 3:15 uandajka, Jesúsi jatsipirindi para tsípiti jarhani jimboka profesia uandasïreenga eska uarhiitiri desendensia chʼatajtsïkupiringa akuitsini. Ísï jimbo, Jesúsi tsítanhantapirindi. ¡Ka ísï úkuarhispti! Tanimu jurhiatikua tátsekua enga Jesúsi uarhipkia, tsítanhantaspti komueska espiritu ma enga nóteru méni uarhipiringia. Ka enga niáraakia ima jurhiatikua enga Tata Diosï uandakia, chʼatajtsïkuati Noambakitini, kʼamajkuati para méntkisï (Ebr. 2:14). Imeecha  engaksï tata Jesukristuni jingoni juramuaka, jarhuataatiksï kʼamajkuani imeechani engaksï xáni ikiakujka Tata Diosïni, imeechani engaksï akuitsiri desendensiani arhikuekajka (Jaŋ. 17:14; 20:4, 10). *

13. ¿Nénajtsïni jarhuatasïni enga kumplirikuarhini jaka i profesia?

¹³ Engajtsï chá marhuakuni jaka Tata Diosïni, kánikuaksïni jarhuatani jati chaari irekuarhu na enga kumplirikuarhini jaka i profesia. Jesúsi jurhasti Echerirhu komueska kʼuiripu ma ka sési xarhatasti na enga jásïika imeeri Taati (Juanu 14:9). Imeeri ejemplu jingoni jarhuatastijtsïni parachi úni míteni ka xénchani Tata Diosï Jeobani. Ístujtsïni jarhuatasïndi imani ambe jingoni enga jorhentpika ka na enga orhejtsïkujka Tata Diosïri kúnguarhikuani. Jesúsijtsïni jorhendasti parachi ísï irekani eska Tata Diosï na jaiapanhentajka. Iáminduechantsïni marhuachesïndi enga Jesúsi irandurakuarhu atanhapka o enga uándikunhapka. Enga Jesúsi tsíntapka, íntspispti imeeri iurhirini komueska kéjtsïtakua ma enga marhuajka parajtsïni pʼikurhiantani “iámindu pekaduechani” (1 Juanu 1:7).

14. ¿Nénachi míteski eska profesia enga Tata Diosï Jeoba uandapka jardini de Edénirhu no jirejiresï úkuarhipiringa?

¹⁴ Ambe enga Tata Diosï Jeoba uandapka jardini de Edénirhu, xarhatasïreendi eska i profesia no jirejiresï úkuarhipiringa. Jatsipirindi para tiempu nitamani paraka xarharapiringa uarhiitiri desendensia, paraka Noambakiti úpiringa tánaani imeechani engaksï imani apoiaripiringa ka parakaksï ikiatperapiringa i tsimani grupuecha. ¿Nénajtsïni jarhuatasïni míteni i ambe? Jarhuatasïndijtsïni parachi jingontku jámani: i parhakpini enga Noambakiti juramukuni jaka, no xénchaapirindi Tata Diosïri marhuarichani. Uánikua uéxurhini tátsekua, Jesúsijtu arhiaspti imeeri chúxapatichani eskaksï no sési kánhapiringa (Mar. 13:13; Juanu 17:14). Ka juchachi exexaka na enga úkuarhini jaka i parti i profesieri ka sánderia desde 100 uéxurhini para ixúani. ¿Andichisï ísï uandajki?

15. a) ¿Andijtsïnisï xáni ikiachejki parhakpini iásï? b) ¿Andichisï no jatsi para chérhini Noambakitini?

¹⁵ Sánisï tátsekua enga Jesúsi Juramuti Mesíasi únhapka 1914 jimbo, petantaspti Noambakitini auandarhu uératini. Iásï, Noambakiti solu úsïndi no sési útspini ixú Echerirhu ka erokuarhixati para kʼamajkunhani (Jaŋ. 12:9, 12). Joperu no ísku jarhasti. Kánikua ikiaxati ka kánikua jánguarhintaxati para no sési úkuni Tata Diosïri iretani (Jaŋ. 12:13, 17). Jimbojtsïnisï i parhakpini xáni no xénchajti. Peruchi no jatsiska para chérhini Noambakitini ni imeechani engaksï imani kurhajchajka. Sánderu sési, uaakachi májkueni mintsinharhini eska apostoli Pablu enga karapka: “Enga [Tata] Diosï juchantsïni jingonika, jimajkani ¿néjtsïni uaa no sési úchini?” (Rom. 8:31). Uaakachi kánikua mintsinharhini Tata Diosï Jeobani jimboka ísï eskachi na exekia, uánikua ambe enga Génesis 3:15 uandajka, úkuarhistia.

16-18. ¿Néna jarhuataskia Curtisini, Ursula ka Jessicani kurhanguni ambe enga arhikuekajka Génesis 3:15?

¹⁶ Ambe enga Tata Diosï Jeoba aiatspipka Génesis 3:15 jimbo, jarhuatasïndijtsïni parachi úni orhepani uérakuani náki uéjki uandanhiatechani engachi jatsiauaka. Curtis, erachi ma enga misiunerueka Guam, uandasïndi: “Ménisï niáraska uandanhiatechani jatsiani ka ini ambe jimbo úkua jukanchasïreenga seguirini marhuakuni Tata Diosï Jeobani. Peru eratsentani ambe enga uandajka Génesis 3:15 jarhuatasïndirini parani seguirini mintsinharhini juchiiti Taati auandarhu anapuni”. Curtis uékaxatiia eska niáraaka ima jurhiatikua enga Tata Diosï kʼamajkuauaka iámindu juchaari uandanhiatechani.

¹⁷ Pirenchi Ursula enga Baviera (Alemania) anapueka uandasïndi eska kurhanguni ambe  enga uandajka Génesis 3:15 jarhuataspka paraka seguru japiringa eska Biblia Tata Diosïri Karakateska. Ma ambe enga kánikua jarhuatapka, jindeespti kurhanguni eskaksï uánikua Biblieri profesiecha terukuntasïnga imani ambe jingoni enga Génesis 3:15 uandajka. Ima uandasïndi: “Mintsitarhurini niárachesti engani kurhanguka eska Tata Diosï Jeoba sóntku úska ambe ma parakachi jucha úpiringa erokuarhikua ma jatsini”.

¹⁸ Jessica, pirenchi ma enga Micronesia anapueka, uandasïndi: “Útasïni miásïnga na engani pʼikuarherapka engani kuenta íntskukuarhepka eskani exentaspkia jurhimbikuani. ¡Úkuarhixapti ambe enga Génesis 3:15 uandajka! Kurhanguni ambe enga i profesia uandajka miátantasïndirini eska na engachi irekani jaka iásï, no jindeeska na enga Tata Diosï Jeoba uékeenga eskachi irekapiringa. Ka i profesia jarhuatasïndirini seguru jarhani eska marhuakuni Tata Diosï Jeobani úsïnga eskachi sési irekuarhiaka iásï ka eskachi ambakiti irekua ma jatsiaka sánderu orhepatini”.

19. ¿Andichisï uaa seguru jarhani eska últimu parti i profesieri niáraaka kumplirikuarhini?

¹⁹ Eskachi na exekia, Génesis 3:15 kumplirikuarhixatiia. Sésichi míteskia né jindeeski uarhiitiri desendensia ka akuitsiri desendensia. Jesúsi enga jindeeka sánderu jukaparhakua uarhiitiri desendensieri, nóteru atakata jarhastia irandurakuarhu ka iásï jindeestia Juramuti ma enga no méni uarhiaka ka enga kánikua uinhapikua jatsika. Ístu, andanguxatiksïa imeecha engaksï ístu kuenta úkuarhijka uarhiitiri desendensiarhu. Úkuarhistia primeru parti i profesieri ka seguruchi jarhaska eska últimu parti ístu niáraaka ísï úkuarhini: ¡akuitsi chʼatajtsïkunhaati! Enga Noambakiti kʼamajkunhaaka, imeecha engaksï no méni jurajkuaka Tata Diosïni kánikuaksï sési pʼikuarheraati. Enga jamberi niáraaka ima jurhiatikua, ju je no kuatantani. Jatsiskachi para mintsinharhini juchaari Tata Diosïni. Ima újchakurauati ‘iámindu nasionichaniʼ uarhiitiri desendensiani úraparini (Gén. 22:18).