SEMANA 28
Tata Diosïri Reinu juramuxatiia
“Iámindu Juramukua i parhakpini anapu, juchaari Tateeristia ka imeeri míndakateri” (JAŊ. 11:15).
PIREKUA 22 ¡Juue Tata Diosïri Reinu!
AMBE ENGACHI EXEAKA *
1. ¿Ambeerichi seguru jarhaski, ka andi?
¿ÚKUA jukanchasïntsï exeni eska sési niántaaka ambe enga xáni úkuarhini jaka parhakpinirhu? Uánikua familiechaksï nóteru uékperasïndia ísï eska antesi. Kʼuiripuechaksï sánderu no sési jámasïndi atajpini ka nóksï uandanhiasïndi máteruecha jimbo. Ka uánikua kʼuiripuechaksï úkua jukanchasïndi mintsikaani imeechani engaksï juramukua jatsika. Joperu i ambejtsïni exerasïndi eska ambakiti ambe jauaka para sánderu orhepatini. ¿Andi? Jimboka kʼuiripu meru ísï jámasïnga eska na uandajka profesia ma ʻúltimu jurhiatikuecheriʼ enga 2 Timoteo 3:1-5 jimbo jaka. No ma kʼuiripu enga ambakiti mintsita jukaka uaati uandani eska no ísï úkuarhixaka eska na uandajka i profesia. Ka i ambe xarhatasïndi eska tata Jesukristu Reiiskia Tata Diosïri Reinurhu. Joperu jarhastiksï máteru profesiecha engaksï uandajka i Reinueri ambe. Iásï, ju je exeni máteru profesiechani engaksï úkuarhikia ini últimu jurhiatikuecha jimbo ka engajtsïni jarhuatajka sánderu mintsikani Tata Diosïni.
Ísï eska rompekabeseeri particha na sési jatanhentajka, ístuksï i profesiecha engaksï libru de Daniel ka Jaŋaskuecha jimbo jaka sésiksï jateentasïndi ka jarhuatasïndijtsïni exeni eska nóteru ióni jimbo Tata Diosï Jeoba uaakia ambe engajtsïni aiachika (Exe je párrafu 2).
2. ¿Ambechi exeni jaua ini jorhenguarhikua jimbo, ka andi? (Uanda je ambe enga xarharajka dibujurhu enga ueenakuarhu jaka rebistarhu).
2 ¿Ambechi exeni jaua ini jorhenguarhikua jimbo? Orheta, exeakachi profesia ma engajtsïni jarhuatajka kurhanguni na enga jatini uaxastanhapka Tata Diosïri Reinu. Tátsekua, exeauakachi máru profesiechani engajtsïni jarhuataaka exeni eska Jesúsi Reiiskia Tata Diosïri Reinurhu auandarhu. Ka últimu, exeauakachi profesiechani engaksï uandajka na engaksï kʼamajkunhaaka imeecha engaksï no sáni jiókuarhijka Tata Diosïri Reinuni. Ísï eskaksï rompekabeseeri particha na sési jatanhentajka, profesiechajtuksï májkueni sési jateentasïndi ka jarhuatasïndijtsïni exeni eska nóteru ióni kuerataxakaia paraka Tata Diosï Jeoba uaaka ambe engajtsïni aiachika.
NÉNACHI MÍTESKI KÁNI UAXASTANHASKI TATA DIOSÏRI REINU
3. Eska na uandajka profesia enga Daniel 7:13, 14 jimbo jaka ¿ambeerichi uaa seguru jarhani?
3 Daniel 7:13, 14 jimbo, uandasïndi profesia ma engajtsïni jarhuatajka seguru jarhani eska tata Jesukristusï jindeepiringa sánderu ambakiti Rei Tata Diosïri Reinurhu. Uandasïndi eska iápuru nasionirhu anapuecha tsípikua jingoni marhuakupiringa ka eska no japiringa máteru gobiernu enga niárapiringa kénditani. ¿Ka káni ueenapirini juramuni Jesúsi? Eska na uandajka máteru profesia Danieliri, jiáni ueenapirini juramuni engaksï na kʼamarapiringia siete tiempuecha. ¿Nénachi uaa míteni káni úkuarhispi i xáni ambakiti ambe?
4. Daniel 4:10-17, ¿nénajtsïni jarhuatasïni míteni káni ueenapirini juramuni Jesúsi? (Ístu exe je notani).
4 (Arhinta je Daniel 4:10-17). Siete tiempuechaksï 2,520 uéxurhini arhikuekasïndi. Inde uéxurhinichaksï ueenaspti 607 jimbo ante de Jesúsi, jiáni engaksï Babilonia anapuecha kénditapka últimu reiini enga Tata Diosï Jeobani jimbo japka jini Jerusaléni. Ka inde tiempu kʼamaraspti 1914 jimbo enga Tata Diosï Rei úpka imani “enga sésikua jatsika para juramuni” imeeri Reinurhu, Jesúsini (Ezeq. 21:25-27). *
5. ¿Nénajtsïni marhuachesïni kurhanguni profesiani siete tiempuecheri?
5 ¿Nénajtsïni jarhuatasïni i profesia? Kurhanguni ini profesiani siete tiempuecheri, úsïndi eskachi seguru jauaka eska Tata Diosï Jeoba meru ísï úsïnga eska na aiatspijka. Ima uandaspti káni enga uaxastapiringa Reinuni. Ka enga niárapka inde tiempu, ísï úspti. Ísï jimbo, uaakachi seguru jarhani eska ima kumpliriuaka máteru profesiechani jiáni enga ima uandarini jakaia. Ísï jimbo, Tata Diosï Jeobaeri jurhiatikua “no ióndaati janoni” (Hab. 2:3).
NÉNACHI MÍTESKI ESKA KRISTU JURAMUXAKAIA TATA DIOSÏRI REINURHU
6. a) ¿Náki pruebechaksï xarhatasïni Echerirhu eska Kristu juramuxakaia auandarhu? b) Profesia enga Jaŋaskuecha 6:2-8 jimbo jaka, ¿néna xarhatasïni eska i ambe ísïiska?
6 Ante de Jesúsi kʼamarani imeeri ánchikuarhitani ixú Echerirhu, uandaspti máru ambe enga parhakpinirhu úkuarhini japiringa enga jarhuataapiringa imeeri chúxapatichani míteni káni enga ueenapiringa juramuni auandarhu. Pori ejemplu, uandaspti guerrecheri ambe, kʼarhingueri ambe ka jenchekuecheri ambe. Ístu uandaspti eska “naninterkisï” japiringa kʼérati pʼamenchakuecha, komu pʼamenchakua COVID-19. Iámindu i ambe jindeepirindi “mínda” ma enga xarhatapiringa eska tata Jesukristu juramuni japiringia auandarhu (Mat. 24:3, 7; Luk. 21:7, 10, 11). Ka jukari 60 uéxurhini tátsekua enga na uarhipkia ka kʼuanhatsentani auandarhu, Jesúsi arhispti apostoli Juanuni eska i ambe meru ísï úkuarhipiringa (arhinta je Apocalipsis 6:2-8, TNM). Iámindu i ambe enga xáni úkuarhini jaka jiáni ueenasti enga Jesúsi niáraka Reiini Tata Diosïri Reinurhu 1914 jimbo.
7. ¿Andisï xáni no sési jánhaskuarhini jaki Echerirhu desde jiáni enga Jesúsi ueenaka juramuni?
7 ¿Andisï sánderu no sési jánhaskuarhini jaki Echerirhu desde jiáni enga Jesúsi ueenaka juramuni? Jaŋaskuecha 6:2 jukaparhakua ambejtsïni aiangusïndi. Enga Jesúsi na Rei únhapkia, ambe enga orheta úpka jindeespti uarhipeni guerrarhu ma. ¿Neecha jingoni? Noambakiti ka imeeri demoniuecha jingoni. Seguni ambe enga uandajka Jaŋaskuecha kapitulu 12, Satanasi tsïtaspti ka imeeri demoniuecha jingoni kʼuanijpanhaspti Echerirhu. Jimboka kánikua ikiaxapka, ueenaspti no sési kaani kʼuiripuechani. Jimbosï Biblia uandajti: “Lastima chá engajtsï parhakpinirhu ka kʼéri japondarhu irekani jaka” (Jaŋ. 12:7-12).
No sési járhati notisiechaksï úsïndi eskachi no sési pʼikuarheraaka, joperu engachi exejka eskaksï Biblieri profesiecha ísï úkuarhixakaia, úsïndi eskachi seguru jauaka eska Tata Diosïri Reinu juramuxakaia. (Exe je párrafu 8).
8. ¿Nénajtsïni marhuachesïni exeni na engaksï kumplirikuarhini jaka profesiecha engaksï Reinueri ambe uandajka?
8 ¿Nénajtsïni jarhuatasïni i profesiecha? Ambe enga xáni úkuarhini jaka parhakpinirhu ka na engaksï jámajka kʼuiripuecha, xarhatasïndiksï eska Jesúsi Reiiskia. Ísï jimbo, nóchi no sési pʼikuarherasïnga exeni engaksï kʼuiripuecha kurhunhperajka ka imeechajku pendienti pákuarhini. Sánderu sési, miántasïngachi eska na engaksï jámajka kumplirini jarhasïngaksï ambe enga Biblia uandajka. ¡Meru xarharasïndi eska Tata Diosïri Reinu juramuxakaia! (Sal. 37:1). Ístu, erokuarhixakachi eska sánderu no sési jánhaskuarhipaaka enga na niárapani jauakia Armajedoni (Mar. 13:8; 2 Tim. 3:13). Juchaari Taati auandarhu anapu kánikuajtsïni xénchasïndi ka jarhuatasïndijtsïni kurhanguni andichisï irekani jaki tiempu ma jimbo enga kánikua no sési jánhaskuarhini jaka. ¿A no eskachi uánikua ambe jatsiska engachi jimbo diosmaiamukua íntskuntaaka?
NÉNAKSÏ KʼAMAJKUNHAA TATA DIOSÏRI REINUERI ENEMIGUECHA
9. Profesia enga Daniel 2:28, 31-35 jimbo jaka, ¿ambe uandasïni últimu kʼéri juramukueri ka káni ueenaski jarhani?
9 (Arhinta je Daniel 2:28, 31-35). Iásïchi exexaka na enga kumplirikuarhini jakaia i profesia. Tsánharhikua ma jimbo, Nabukodonosori exespti ambe enga úkuarhipiringa “últimu jurhiatikuecha jimbo” ísï tátsekua enga Jesúsi na ueenapiringia juramuni. Ixú Echerirhu, niárapirindi jarhani últimu kʼéri juramukua ma enga Biblia uandajka ka enga Jesúsiri enemigu máeka. I kʼéri juramukua, enga jindeeka monumentueri jantsiricha ka engaksï tiámu ka atsïmuerika, juramuxatia. Ka ueenasti juramuni Primera Guerra Mundiali jimbo jiáni enga Reino Unido ka Estados Unidos márku úkuarhintapka. Monumentu enga Nabukodonosori exepka, tsimani ambe jimbo xarhatasïndi eska í k’éri juramukua ménderueniska ióntki anapu juramukuecha jingoni.
10. a) ¿Ambe uandasïni Danieliri profesia enga xarhatajka eska Reino Unido ka Estados Unidos jindeeska kʼéri juramukua? b) ¿Ambe jingonchi jatsiski para jingontku jámani? (Exe je rekuadruni “ ¿Jingontkujtsï jámaxaki?”).
10 Ma ambe enga xarhatajka eska i kʼéri juramukua, enga Reino Unido ka Estados Unidosini arhikuekajka, no májkueniska eska máteru juramukuecha, jindeesti jimboka no oru o plata jingoni úkata jarhaska, sino tiámu ka atsïmu jingoni jeuekuarhitixati. Atsïmu kʼuiripuni arhikuekasïndi (Dan. 2:43, nota). Juchachi exesïnga eskaksï kʼuiripuecha botarisïnga, kʼérati marchechanksï uaasïndi, kurhajkuarhisïndiksï eskaksï respetarinhaaka imeecheri derechuecha ka sindikatuechanksï jatsiasïndi, ka ini ambe jingoni nóksï jurajkusïndi eska í kʼéri juramukua uaaka ambe enga uékaaka.
11. ¿Ambe máteru ambejtsïni jarhuatasïni sánderu seguru jarhani eskachi últimu jurhiatikuecha jimbo irekaxaka?
11 Máteru ambe jindeesti eskaksï monumentueri jantsiricha arhikuekasïnga ini k’éri juramukuani enga jindeeka Reino Unido ka Estados Unidos, ka i jindeesti últimu k’eri juramukua enga Biblia uandajka eska japiringa. I ambe arhikuekasïndi eska tátsekua nóteru jauakia máteru juramukua. Armajedonirhu, Tata Diosïri Reinu kʼamajkuati ini juramukuani ka ístu máteruechani (Jaŋ. 16:13, 14, 16; 19:19, 20). *
12. ¿Ambe máteru ambe uandasïni Danieliri profesia, ka nénajtsïni sési pʼikuastantasïni ka erokuarhikua májtsïni íntskuni?
12 ¿Nénajtsïni jarhuatasïni i profesia? Danieliri profesia uandantasïndi sánderu ambe enga xarhatajka eskachi últimu jurhiatikuecha jimbo irekaxakaia. Jukari 2,500 uéxurhini, Danieli uandantaspti eska enga Babilonia na kʼamajkunhapiringia máteruksï kuatru kʼérati juramukuecha japiringa engaksï no sési kámapiringa Tata Diosïri iretani. Ístu, uandaspti eska k’éri juramukua enga jindeeka Reino Unido ka Estados Unidos, jindeepiringa últimu kʼéri juramukua ima kuatrueri engaksï japiringa. I ambejtsïni sési pʼikuastantasïndi ka erokuarhikua májtsïni íntskusïndi, jimbokachi míteska eska nóteru ióni jimbo Tata Diosïri Reinu kʼamajkuauaka juramukuechani ka eska ima juramuakia parhakpinirhu (Dan. 2:44).
13. ¿Néksï jindeeski “rei ochu” ka “diesi reicha” engaksï Jaŋaskuecha 17:9-12 jimbo uandaajka ka néna úkuarhiski i profesia?
13 (Arhinta je Jaŋaskuecha 17:9-12). Primera Guerra Mundiali jimbo, kánikua no sési jánhaskuarhispti ka inde ambe úspti eska máteru profesia niárapiringa úkuarhini enga últimu jurhiatikuecheri ambe uandajka. Iámu parhakpinirhu anapu juramutichaksï uékasïreendi eska pínandikua japiringa, ísï jimboksïsï uaxastapti grupuni ma enga ísï mítekatepka komu Sociedad de Naciones 1920 jimbo, peru oktubrini 1945 jimbo inde grupu niáraspti arhinhani Naciones Unidas. Biblia uandasïndi eska i organisasioni jindeeska “rei ochu”. No k’éri juramukua máesti, jimboka imeeri juramukua ka ambe enga újka úni máteru juramukuecha jimboeska. Biblia arhiasïndi ini juramukuechani “diesi reicha”.
14, 15. a) ¿Ambe uandasïni Jaŋaskuecha 17:3-5 ʻKʼéri Babilonieriʼ ambe? b) ¿Ambe úkuarhixaki relijioni no jurhimbiticha jingoni?
14 (Arhinta je Jaŋaskuecha 17:3-5). Tata Diosï Jeoba jánhaskakua ma jimbo exeraspti apostoli Juanuni uarhiiti ísku jándini ma enga arhinhajka “Kʼéri Babilonia”. I uarhiiti arhikuekaasïndi iámu parhakpinirhu anapu relijioni no jurhimbitichani. ¿Néna kumplirikuarhiski i jánhaskakua? Relijioni no jurhimbitichaksï uánikua uéxurhini márkuksï ánchikuarhistia i parhakpinirhu anapu juramukuecha jingoni ka niárasïndiksï újchakuraani. Joperu nóteru ióni jimbo, Tata Diosï Jeoba eratsetarauati juramutichani parakaksï uaaka ambe enga ima uéjka. ¿Ambe úkuarhia? “Diesi reicha” o juramukuecha, no sésiksï káuati relijioni no jurhimbitichani ka kʼamajkuauatiksï (Jaŋ. 17:1, 2, 16, 17).
15 ¿Nénachi míteski eska nóteru ióni jimbo kʼamajkunhaakia “Kʼéri Babilonia”? Ma ambe engajtsïni jarhuatajka míteni jindeesti miántani eska Babiloniani kʼéri iurhekua Éufratesi kuájchakusïreenga. Libru Jaŋaskuecha uandasïndi eska ima xáni uánikua kʼuiripuecha engaksï apoiarijka Kʼéri Babiloniani ísïiskaksï komueska “itsïicha” engaksï kuájchakujka imani (Jaŋ. 17:15). Peru ístu uandasïndi eskaksï inde “itsïicha” kʼarhipiringa ka inde ambe arhikuekasïndi eskaksï uánikua kʼuiripuecha nóteru apoiariuapiringia relijioni no jurhimbitichani (Jaŋ. 16:12). I profesia úkuarhixatiia: uánikua kʼuiripuechaksï jurajkuastia relijioni no jurhimbitichani ka máteru naniksï jirinhantaxati jarhuajperata paraksï úni orhepani uérakuani uandanhiatechani.
16. ¿Nénajtsïni marhuachesïni kurhanguni profesiani enga uandajka Naciones Unidasiri ambe ka na enga kʼamajkunhaaka Kʼéri Babilonia?
16 ¿Nénajtsïni jarhuatasïni i profesiecha? Enga únhaka grupu Naciones Unidas ka engaksï kʼuiripuecha nóteru apoiariuajkia relijioni no jurhimbitichani, xarhatasïndi eskachi últimu jurhiatikuechani jimbo irekaxakaia. Ísïisti, “itsïicha” engaksï kuájchakujka Kʼéri Babiloniani kʼarhixatiksïa, joperu no inde ambesï uaati eskaksï relijioni no jurhimbiticha nóteru jauakia. Eskachi na exekia, Tata Diosï Jeoba eratsetarauati ʻdiesi reichaniʼ engaksï arhikuekajka juramutichani engaksï Naciones Unidasini apoiarijka parakaksï uaaka imani ambe enga ima uéjka. Nasionichaksï ma repentku kʼamajkuauati relijioni no jurhimbitichani ka i ambe ísku pakatauati iámindu kʼuiripuechani (Jaŋ. 18:8-10). * Enga Kʼéri Babilonia kʼamajkunhaaka, parhakpini anapuechaksï kánikua no sési pʼikuarheraati ka jamberi i ambe uaati eskaksï problemecha jauaka. Joperu jucha engachi marhuakujka Tata Diosï Jeobani sésichi pʼikuarherani jauaka jimbokaksï nóteru jauakia relijioni no jurhimbiticha engaksï Tata Diosïri enemigueka desde iónisïa. Ka ístu jimboka nóteru ióni kueratani jauatia parachi pʼímutanhantani i parhakpini jimbo (Luk. 21:28).
MINTSIKA JE ESKAKSÏNI TATA DIOSÏ KUÁJCHAKUAKA SÁNDERU ORHEPATINI
17, 18. a) ¿Ambechi jatsiski para úni parachi sánderu mintsikani Tata Diosïni? b) ¿Ambechi jorhenguarhini jaua máteru jorhenguarhikua jimbo?
17 Danieli uandaspti: “Jurhimbiti jánhaskakua kánikua úkuarhintaati”. Ka ísï úkuarhixati. Iásïchi sánderu sési kurhanguasïngia profesiechani engaksï i jurhiatikuecheri ambe uandajka (Dan. 12:4, 9, 10). Profesiechaksï meru ísï úkuarhixati ka inde ambe úsïndi eskachi mintsita jingoni janhanharhiaka Tata Diosï Jeobani ka imeeri Karakatani (Is. 46:10; 55:11). Ísï jimbo, ju je seguirini sánderu mintsikani Tata Diosïni. ¿Nénachi uaa ísï úni? Engachi jánguarhintaska Biblieri ambe jorhenguarhini ka engachi jarhuataaska máteruechani Tata Diosï Jeobaeri amigu úkuarhini. Juchaari Tata Diosï kuájchakuauati iámindu imeechani engaksï mintsikajka imani ka “íntsaani jaua[ti] pínandikua para méntkisï” (Is. 26:3).
18 Máteru jorhenguarhikua jimbo exeakachi máru profesiechani engaksï kúnguarhikua kristianeri ambe uandajka ini últimu jurhiatikuecha jimbo. Exeakachi eskaksï i profesiecha sési terukuntasïnga máteru profesiecha jingoni engaksï últimu jurhiatikuecheri ambe uandajka. Ístuchi exeni jauaka máteru ambe enga xarhatajka eska Jesúsi, juchaari Rei auandarhu anapu, orhejtsïkuaxaka imeeri marhuarichani engaksï no méni jurajkujka.
PIREKUA 61 ¡Ju je aianhpini!
^ Irekaxakachi tiempu ma jimbo enga kʼéri ambe úkuarhini jaka. Ísï eskaksï na uandajka máru Biblieri profesiecha, Tata Diosïri Reinu uaxastakata jarhastia. I jorhenguarhikua uandaani jauati máru profesiechani engaksï indeeri ambe uandajka ka i ambejtsïni jarhuataati parachi sánderu mintsikani Tata Diosï Jeobani, no jukari uandanhiani ka mintsikanchi imani iásï ka sánderu orhepatini.
^ Exe je libruni Tsípikua jingoni ireka je, jorhenguarhikua 32, puntu 4. Ístu exe je bideuni Tata Diosïri Juramukua 1914 jimbo ueenasti juramuni enga jw.org jimbo jaka.
^ Exentaakajtsï sánderu informasioni Danieliri profesieri ambe rebistarhu La Atalaya 15 de juniu de 2012 pájinecharhu 14 a 19.
^ Uaakajtsï exentani sánderu informasioni ambe enga úkuarhiaka sánderu orhepani kapitulu 21 librueri El Reino de Dios ya está gobernando.
