Jesúsi jorhentpispti eskachi jatsiska para iáminduecha jingoni sési pájperani. Peru ma xanhari arhiaspti imeeri apostolichani: “Asï jáma je tantiarini eskani ji jurhaska paraka pínandikua jauaka parhakpinirhu. No jurhaskani paraka pínandikua jauaka, sino espadasïni juáka, jimbokani jurhaska paraka ma uájpa ikiakuaka imeeri tátembani, ka ístu ma nanaka ikiakuni imeeri amambani, ka tarhamba ikiakuni imeeri tarham[piri]ni” (Mat. 10:34, 35). ¿Ambeksï arhikuekasïni i uandakuecha?

Jesúsi no uékasïreendi eskaksï familiecha no sési irekapiringa, peru mítespti eska ima ambe jimbo enga ima jorhentpipka, niárapiringaksï no sési pájperani. Imeecha engaksï uékajka Jesúsiri chúxapati úkuarhini ka itsï atakuarhini jatsistiksï para mítetini jarhani eska uaaka i ambe úkuarhini familiarhu. Jo ísïisti, uaatiksïni úkua jukachini jarhani enga chaari acheeti, chaari uarhiiti o familiarhu anapu ma no uéjka eskajtsï chá Jesúsiri chúxapati máeuaka.

Biblia arhiasïndi kristianuechani: “Sési pájpera je iámindu kʼuiripuechani jingoni” (Rom. 12:18). Ambe enga Jesúsi jorhentpipka, para máru familiecha uaati ísïini komu “espada” ma. I ambe úkuarhisïndi enga familiarhu, ma kʼuiripujku jorhenguarhini jarhajka Jesúsiri ambe, máruksï no jaiapanhentasïndi ka no sésiksï kámasïndi imani enga jorhenguarhini jarhajka. Imeeri parienticha —“kʼumanchikuarhu anapuecha”— niárasïndiksï ikiakuni jimboka jorhenguarhixaka jurhimbikua ambe (Mat. 10:36).

Jesúsiri chúxapaticha engaksï imani familiaricha jingoni irekaka engaksï máteru relijioniriika, ménichanksï jatsisïndi para xarhatani nénksï sánderu uékasïni sési pʼikuastani, Tata Diosï Jeobani ka Jesúsini o imeecheri familiarichani. Jamberi imeeri familiarichaksï méntku arhini jauati eska niuaka imani kʼuínchikuecharhu engaksï imeecheri relijioni úntajka. Enga ísï úkuarhiaka, jatsisti para erakuni néni uékasïni jaiapanherantani. Jesúsi uandaspti: “Ima enga sánderu uékaaka tátembani o amambani ka eska jíndeni, no jukanchasïndi juchiitini” (Mat. 10:37). Jesúsi no arhikuekaxapti eska para úni imeeri chúxapatiini, nóteruchi xénchaapiringia juchaari taatichani. Ambe enga arhikuekani japka jindeesti, eska uétarhisïnga exeni ambe sánderu jukaparhakueski tsípikuarhu. Seguirisïngachi xénchani juchaari familiarichani nájkirukaksï no uékaaka parachi Tata Diosïni kómarhini, ka kurhangusïngachi eska sánderu jukaparhakueska Tata Diosï Jeobani xénchani.

Ísïisti, enga familiari ma no uékajka eskachi marhuakuaka Tata Diosïni, kánikuachi no sési pʼikuarherasïnga. Peru Jesúsiri chúxapatichachi jatsiska para méntkisï miáuani ini uandakuechani: “Ima enga no jiókuarhiska imeeri chkarini enga jindeeka para no sési nitamakuarhini, ka jurhandeni chúxapuni, no jukanchasti juchiiti chúxapatini” (Mat. 10:38, TNM). Jimajkani kristianuechachi míteska eska para Jesúsiri chúxapati máeni, ménisïchi jatsiska para kómu nitamakuarhini, jimbokajtsïni ménisï juchaari familiaricha no sésijtsïni kámaaka. Peruchi erokuarhisïnga eska juchaari sési jángua, jarhuatauaka paraksï ima ménderueni eratseni ka jiókuarhinksï ambe enga Biblia jorhentpijka (1 Ped. 3:1, 2).