SEMANA 32
Ísï eska Tata Diosï Jeoba, ju je kurhanguni ka no méntku inchandimentani
“Eskaksï iámindu kʼuiripuecha exeaka eskajtsï chá kurhangusïnga ka eskajtsï méntku no inchandimesïnga” (FILIP. 4:5).
PIREKUA 89 Jeoba újchakurasïndi imani enga kurhandirajka
AMBE ENGACHI EXEAKA a
¿Ná jásï anhatapujtsï tsitipirini jindeeni? (Exe je párrafu 1).
1. ¿Andichisï kristianuecha jatsi para ísïini eska máru anhatapuecha? (Ístu exe je imajenini).
“ENGA anhatapu ma újka kʼuntsïkurhini, tarhiata no úsïndi kuarhakuni”. I uandakuechaksï xarhatasïndi na engaksï járhaka máru anhatapuecha, nájkiruka uinhamu tarhiani jauaka íchaksï no kuarhakurhisïndi jimbokaksï úsïnga kʼuntsïkurhini. Pori ísï arhini, juchajtuchi jatsiska para kʼuntsïkurhini. I ambe arhikuekasïndi eskachi jatsiska para kurhanguni ka no inchandimentani enga ambe ma mójtakurhiaka juchaari irekuarhu parachi úni seguiriini tsípikua jingoni marhuakuni Tata Diosï Jeobani. ¿Nénachi uaa ísï úni? Engachi jirinhakuntaska néna ménderueni úni ambe ma enga juchaari irekua mójtakurhiaka ka engachi respetariiska na engaksï máteruecha eratsejka ka ambe engaksï erakujka úni.
2. ¿Náki kualidadichajtsïni jarhuata enga mójtakurhiska ambe ma juchaari irekuarhu, ka ambechi exea ini jorhenguarhikua jimbo?
2 Iáminduecha engachi marhuakujka Tata Diosï Jeobani, uékasïngachi kurhanguni ka no inchandimentani. Ístuchi uékasïnga kaxumbitiini ka pʼamojpitiini. Ini jorhenguarhikua jimbochi exeaka na engaksï máru kristianuecha úka orhepani uérani enga imeecheeri irekua niáraka mójtakurhini ka ístu na engachi uaaka juchajtu májkueni úni. Peru orhetachi exeaka Tata Diosï Jeobaeri ka Jesúsiiri ejempluni, jimbokaksï imeecha kurhangusïnga ka nóksï inchandimentasïndi.
TATA DIOSÏ JEOBA KA JESÚSI KURHANGUSÏNDIKSÏ KA NÓKSÏ INCHANDIMENTASÏNDI
3. ¿Nénachi míteski eska Tata Diosï Jeoba kurhangusïnga ka eska no inchandimentasïnga?
3 Biblia uandasïndi eska Tata Diosï Jeoba ʻkʼerenda máeskaʼ jimboka ima uiuinhasï jarhaska ka sési anhaxurhitini (Deut. 32:4). Peru ístu kurhangusïndi ka no inchandimentasïndi. ¿Andichisï ísï uandajki? Juchaari Tata Diosï ménderueni úsïndi ambe ma enga na mójtakurhipani jarhajka ambe ma parhakpinirhu paraka niáraaka úkuarhini ambe enga ima eratsetini jaka úni. Ka jimbokajtsïni Tata Diosï ísï kueraaska eska ima na jásïika, juchajtuchi úsïnga ménderueni úni ambe ma enga juchaari irekua ma repentku mójtakurhijka. Tata Diosï Jeobajtsïni íntsaasti prinsipiuechani engajtsïni jarhuatajka parachi ambakiti ambe úni náki uéjki problemachi jatsini. Néna enga újka Tata Diosï ambe ma ka imeeri prinsipiuecha, xarhatasïndiksï eska ima, Tata Diosï máeska enga uandajka na enga úkuarhiaka ambe ma, peru ístu eska kurhangusïnga ka no inchandimentasïndi paraka ambe ma meru ísï úkuarhiaka.
4. Uandanta je ejemplu ma enga xarhatajka eska Tata Diosï Jeoba kurhangusïnga ka eska no inchandimesïnga (Levítico 5:7, 11).
4 Tata Diosï Jeobaeri juramukuechaksï perfektuesti ka nójtsïni jukari ambe kurhachesïndi. Ima no uinhamarhikuasïndi kʼuiripuechani nijtu uandajki eska ambe ma meru jatsiska para ísï úkuarhini. Ju je exeni ejemplu ma enga xarhatajka na enga kaapka Tata Diosï Jeoba israeliteechani ka enga xarhatajka eska ima kurhangusïnga ka eska no inchandimentasïnga. Indeni ejempluecha jingoni enga Levítico 5:7, 11 uandajka (arhinta je) xarhatasïndi eska Tata Diosï Jeoba jurajkusïreenga eskaksï kʼuiripuecha imani ambe kéjtsïtapiringa ambe engaksï úpiringa. Ima no uandasïreendi eskaksï rikuecha ka pobriicha jatsispka para májkueni ambe kéjtsïtakuni.
5. Uandanta je ejemplu ma enga xarhatajka eska Tata Diosï Jeoba kaxumbitiiska ka máteru enga xarhatapka eska pʼamojpitiiska.
5 Jimboka Tata Diosï Jeoba kaxumbitiiska ka pʼamojpitiini, ima kurhangusïndi ka no inchandimesïndi. Pori ejemplu, jiáni enga uékani japka Sodoma anapuechani kʼamajkuani xarhataspti eska kaxumbitiispka. Ánjeliichani máru úraspti paraksï arhini Lotini eska juátarhisï nipiringa sïpakuarhini. Peru Loti, kánikua chésïreendi jimeesïsï nirani. Jimbosï mintsita jingoni kurhakupti Tata Diosïni eska jurajkupiringa eska ima ka imeeri familia Soári nipiringaksï, ireta sapichu ma jimbo enga Tata Diosï ístu eratsetini japka kʼamajkuni. Tata Diosï Jeoba úpirindi inchandimentani ka arhini Lotini eska jatsispka para meru ísï úni eska ima na uandapkia. Peru no ísï úspti, ima jurajkuspti eska Loti úpiringa ambe enga uékeenga, nájkiruka indeni ambe jimbo Tata Diosï no kʼamajkupiringa Soárini (Gén. 19:18-22). Uánikua uéxurhini tátsekua Tata Diosï pʼamojkuaspti Nínibe anapuechani. Axaspti profeta Jonásini para arhiani eskaksï imeecha ka ireta kʼamajkunhapiringa, jimbokaksï kánikua no sési úriispka. Peru engaksï Nínibe anapuecha móantapka, Tata Diosï Jeoba pʼamojkuaspti ka no kʼamajkuspti iretani (Jon. 3:1, 10; 4:10, 11).
6. ¿Náki ejempluechaksï xarhatasïni eska Jesúsi, ísï eska Tata Diosï Jeoba, kurhangusïnga ka eska no inchandimesïnga?
6 Májkueni eska Tata Diosï Jeoba, Jesúsijtu kurhangusïndi ka no inchandimesïndi. Ka xarhataspti indeni ambe enga Echerirhu jámani japka aianhpini. Nájkiruka ima axanhapka para Tata Diosïiri ambe jorhendaani ʻIsraeli anapu karichiichani engaksï tsïnchetini japka’, ma uelta jarhuataspti uarhiitini ma enga no israeliteepka. Uarhiiti mintsita jingoni kurhakuspti eska ambakerantapiringa imeeri uájpani, enga noambakitiiri espiritu iatiru no sési kámeenga. Jesúsi pʼamojkuspti indeni uarhiitini ka ambakerantaspti uájpani (Mat. 15:21-28). Ju je exeni máteru ejemplu. Ísï no ióni jimbo enga Jesúsi na ueenapkia aianhpini, ima uandaspti: “Nákinterku nema engareni negariuaka [...], jíjtuni negariuaka” (Mat. 10:33). Peru, ¿Jesúsi nóteru jiókaspia Pedruni jimboka tanimu xanhari uandaspka eska no mítespka? Nómbe. Jesúsi mítespti eska Pedru sési jimbo móantaspka ka eska kánikua mintsikasïreenga Tata Diosïni. Enga Jesúsi na tsíntapkia, xarhakuspti Pedruni ka jamberi arhipti eska puákuntaspkia ka eska xénchasïreenga (Luk. 24:33, 34).
7. Eska na arhijka Filipenses 4:5, TNM, ¿nénachi uékasïni eskajtsïni míteaka?
7 Exeskachia eska Tata Diosï Jeoba ka Jesúsi kurhangusïngaksï ka eskaksï no inchandimesïnga. ¿Ka juchaia? Tata Diosï Jeoba erokuarhisïndi eskachi juchajtu májkueni uaaka (arhinta je Filipenses 4:5, TNM). Uaakachi ini ambe kurhamarhikuarhini: “¿Máteruechaksï eratsesïni eskani kurhangusïnga ka eskani no inchandimesïnga, ka eskani jiókuarhisïnga ambe engaksï máteruecha uandajka? ¿Ojtsïni ísï míteski eskani méntkisï uékasïnga eska iámindu ambe sési úkuarhiaka ka eskani méntkuni no kurhangusïnga? ¿Méntkuni inchandimentasïni paraka ambe ma ísï úkuarhiaka eskani ji na sési exejka? O engaksï máteruecha uandajka na engaksï exejka ambe ma, ¿kurhajchaasïni ka úsïni ambe engaksï uandajka?”. Engachi kurhangujka ka nóchi inchandimentani, májkuenchi úni jarhasïnga eska Tata Diosï Jeoba ka Jesúsi. Iásï ju je exeni tsimani ambe nani enga uétarhijka eskachi kurhanguaka ka no inchandimentani: jiáni enga mójtakurhijka ambe ma juchaari irekuarhu, ka ístu engachi no májkueni eratsejka eska máteruecha ka nijtuchi májkueni ambe erakuni úni.
JU JE KURHANGUNI KA NO INCHANDIMENI ENGA MÓJTAKURHIAKA AMBE MA JUCHAARI IREKUARHU
8. ¿Ambejtsïni uaa jarhuatani parachi kurhanguni ka no inchandimeni enga mójtakurhiska ambe ma juchaari irekuarhu? (Ístu exe je notani).
8 Enga juchaari irekua mójtakurhiaka, uétarhisïndi eskachi kurhanguaka ka no inchandimentani. Jamberichi niáraaka ma repentku pʼamenchani, ochi no jatsini sentabu o gobiernu jimbochi no sési nitamakuarhini jarhani. Juchaari irekua uaati mátirku mójtakurhini ka i ambe uaati eskachi problemeechani jatsiauaka engachi no erokuarhini japka (Ecl. 9:11; 1 Kor. 7:31). Ístuchi úpiringa kánikua úkua jukanchani engajtsïni Tata Diosï Jeobaeri kúnguarhikua arhipiringa eskachi máteru ambe uaakia o eskachi máteru nanisï marhuauakia. Ambe uéjki úkuarhini, ambe engajtsïni kánikua jarhuataaka parachi jiókuarhini i ambe, jindeesti ari tʼámu ambe: 1) jiókuarhini eska iásï ménderueniuakia ambe ma, 2) eratsentani ambe enga úkuarhiaka sánderu orhepatini, 3) eratsentani ambakiti ambe engachi jatsika juchaari tsípikuarhu ka 4) jarhuataani máteruechani. b Ju je exeni máru ejempluechani engaksï xarhatajka eska i ambe kánikua jarhuajpesïnga.
9. ¿Ambe ka ambe úspi temungurhiri ma engaksï misionerueka paraksï úni orhepani uérakuani imani uandanhiateechani engaksï no erokuarhienga?
9 Jiókuarhini eska iásï ménderueniuakia ambe ma. Emanuele ka Francesca misioneruestiksï, ka máteru paisi jimboksï axanhasti. Engaksï na niárapkia, sóntkuksï ueenaspti jima anapu idioma jorhenguarhini ka míteani jima anapu erachiichani. Peru jiájkani ueenakuarhispti pandemia COVID-19 ka nóteruksï úsptia erachiicha jingoni kúnguarhini. Ístu, Francescaeri amamba ma repentku uarhispti ka ima uékasïreendi iámu imeeri mintsita jingoni imeeri familia jingoni jarhani, peru pandemia jimbo no úspti nirani exeani. ¿Ambe jarhuataspi pirenchini enga xáni no sési nitamakuarhini japka? Orheta, Emanuele ka Francesca tsimarhanksï kómarhispti ka kurhakusptiksï Tata Diosï Jeobani eska jánhastaapiringa parakaksï úpiringa pauani pauani orhepani uérani. Tata Diosï Jeoba mókukuantaspti kómarhikuechani ka kúnguarhikuani úraspti para íntsaani ambe engaksï xáni uétarhincheenga ka meru jiáni engaksï uétarhinchani japka. Pori ejemplu, kánikua uinhaperantaaspti ambe enga erachi ma uandaka bideurhu ma: “Engachi sóntku jiókuarhiska na engachi iásï irekani jaka, sánderu fásiliuati eskachi sési pʼikuarheraaka, uaakachi Jeobani marhuakuni ka jarhuataani máteruechani”. c Segundu, jánguarhintasptiksï sánderu sési jorhentpini telefonu jimbo ka ueenasptiksï Biblieri ambe jorhendani kʼuiripuni ma. Ka terseru, jurajkusptiksï eskaksï erachiicha jarhuataapiringa ka uinhaperantaani ka kánikuaksï agradeserikuaspti erachiichani indeni ambe jimbo. Ka ma uéxurhini pirenchi ma pauani pauani axakuasïreendi mensaji ma Biblieri karakata ma jingoni. ¿Ambechi jorhenguarhisïni? Eska engachi jiókuarhiska na engachi irekani jaka iásï, sánderuchi sési pʼikuarheraaka imani ambe jimbo engachi újka úni.
10. ¿Ambe úspi pirenchi ma enga imeeri tsípikua ma repentku mójtakurhipka?
10 Eratsentani ambe enga úkuarhiaka sánderu orhepatini ka ambakiti ambe engachi jatsika juchaari tsípikuarhu. Christina, pirenchi ma enga Rumania anapueka ka enga Japóni irekaka, kánikua no sési pʼikuarheraspti enga arhinhapka eska imeeri kúnguarhikua enga inglési jimboepka nóteru japiringia. Peru ima no eratsentani pakaraspti inde ambeeri enga úkuarhipka. Sánderu sési, jánguarhintaspti máteru kúnguarhikua jimbo jarhuajpeni enga japonesi uandanheenga ka kánikua tsípikua jingoni aianhpini indeni idioma jimbo. Pirenchi kurhakuspti uarhiitini ma enga jingoni ánchikuarhipka eska jarhuatapiringa paraka úpiringa sánderu sési uandani japonesi, úraparini Bibliani ka foietuni Tsípikua jingoni ireka je, ka uarhiiti jarhuataspti. Christina úspti sánderu sési uandani japonesi ka ístu ima uarhiiti uékaspti sánderu ambe jorhenguarhini Biblieri ambe. ¿Ambechi jorhenguarhisïni? Eska engachi eratsentaska ambe enga úkuarhiaka sánderu orhepani ka ambakiti ambe engachi jatsika juchaari irekuarhu, ima ambe enga mójtakurhiaka uaati úni eskachi kóntperateechani jatsiauaka engachi no erokuarhiauenga.
11. ¿Ambe úspi temungurhiri ma enga úkua jukanchani japka sentabu jimbo?
11 Jarhuataani máteruechani. Temungurhiri ma enga jima irekaka nani engachi no jurajkunhajka aianhpini, kánikuaksï úkua jukanchaspti jiáni enga indeni paisi jimbo kánikua úkua jukapka sentabu andani. ¿Ambe jarhuataaspi enga inde ambe úkuarhipka? Orheta, jánguarhintasptiksï arisku sáni irekani. Ka ístu, nóksï sánderu arhispti problemeechani eratseantani. Sánderu sési, jánguarhintasptiksï sánderu uérani aianhpini para jarhuataani máteruechani (Uku. 20:35). Erachi uandaspti: “Jimbokachi kánikua okupadu jarhaspka aianhpikuarhu, nóchi xáni tiempu jatsisïreenga parachi problemeechani eratseantani jarhani, ka sánderu tiempuchi jatsisïreenga parachi imani ambe úni enga Tata Diosï uékajka”. ¿Ambechi jorhenguarhisïni? Eska enga juchaari irekua mójtakurhiska, ju je miáni eska kánikua jukaparhakueska jarhuataani máteruechani, ka uaakachi ísï úni engachi aianhpiaka.
12. ¿Nénajtsïni uaa jarhuatani Pablueri ejemplu kurhangutspini engachi aianhpini jauaka?
12 Aianhpikuarhu kánikua jukaparhakuesti eskachi kurhangutspiaka jimbokachi uandontskuarhesïnga imani kʼuiripuecha jingoni engaksï mámaru ambe jakajkujka Tata Diosïiri ambe, engaksï máteru naniisï anapueka ka engaksï táchani jásï tʼarhexeranhaka. Ísï jimbo, apostoli Pablueri ejemplujtsïni jarhuataati jimboka ima kurhangukuasïreenga mámaru járhati kʼuiripuechani. Jesúsi apostoli úspti “no Israeli anapuecheeri” (Rom. 11:13). Ka paraka ima úpiringa ini ánchikuarhitani úni, aianguaspti Tata Diosïiri ambe judiuechani, grieguechani, jorhenatiichani, imeechani engaksï echerini ánchiteenga, juramutiichani ka reiichani. Ka para Pablu mintsitarhu niárakuani xáni mámaru járhati kʼuiripuechani, jánguarhintaspti iáminduechani ʻterukukuantaniʼ (1 Kor. 9:19-23). Enga aianhpini jarheenga, apostoli Pablu exesïreendi naniksï anapuespi kʼuiripuecha ka ambe engaksï jakajkuenga. ¿Ka ambechi uaa úni jucha? Uaakachi kurhangukuani kʼuiripuechani ka eratsentani na engachi uaaka aianguani Tata Diosïiri ambe parachi úni jarhuataani, engachi ísï úska sésijtsïni nicheati.
JU JE RESPETARINI NA ENGAKSÏ ERATSEJKA MÁTERUECHA
Engachi kurhangujka ka nóchi inchandimentani, respetarinchi jarhasïnga ambe engaksï máteruecha eratsejka. (Exea je párrafu 13).
13. ¿Ambe úpirini úkuarhini engachi jucha no respetariska ambe engaksï máteruecha uandajka? (1 Korintu 8:9).
13 Engachi kurhangujka ka nóchi inchandimeni, sánderu fásiliisïndi respetariini na engaksï máteruecha eratsejka. Pori ejemplu, máru pirenchiichaksï tsitisïndi atanharhintani, peru máteruecha nómbe. Ka máru kristianuechaksï sési exesïndi alkoli sáni arhani, peru máteruechaksï no arhasïndi. Iáminduechachi uékasïnga kuidarikuarhini parachi no pʼamenchani, peruchi no iáminduecha májkueni ambe erakusïnga parachi kuidarikuarhini. Engachi jucha eratseska eska sánderu sési jarhaska ambe engachi jucha újka ka inchandimentanchi paraksï máteruechajtu májkueni úni, úpiringachi úni eskaksï máteruecha no sési exeaka i ambe, ka inde ambe úpirindi úni eska kúnguarhikuarhu nóteru sési pájperanhaakia. ¿A no eskachi méntku no sáni uékapiringa indeni ambe úni? (Arhinta je 1 Korintu 8:9; 10:23, 24). Ísï úni eskaksï Biblieri prinsipiuecha na uandajka, jarhuataatijtsïni parachi jucha sésku exeni ambe ma ka paraka kúnguarhikuarhu pínandikua jauaka. Ju je exeni tsimani ejempluechani engajtsïni jarhuataaka ísï úni.
Engachi kurhangujka ka nóchi inchandimentani, respetarinchi jarhasïnga ambe engaksï máteruecha eratsejka. (Exea je párrafu 14).
14. ¿Náki Biblieri prinsipiuechajtsïni jarhuataa parachi exeni na engachi jatsika para xukuparhani ka arreglarikuarhini?
14 Xukuparhakua ka na engachi arreglarikuarhijka. Tata Diosï Jeobajtsïni no íntsaasïndi juramukuechani parajtsïni arhini na engachi jatsika para xukuparhani, perujtsïni prinsipiuechani íntsaasïndi engajtsïni jarhuatajka exeni na engachi jatsika para xukuparhani. Na engachi xukuparhajka jatsisti para kʼéri ambe arhini Tata Diosïni, ka eskachi xarhataaka eskachi ima jásï kʼuiripueska engachi kurhangujka, engachi “ambakiti eratsekua” ma jukaka ka ʻkaxumbitiiniʼ (1 Tim. 2:9, 10; 1 Ped. 3:3). Ísï jimbo, nóchi uékasïnga eskajtsïni máteruecha méntku exeni jauaka juchaari xukuparhakua jimbo. Biblieri prinsipiuechajtuksï uaati jarhuataani orhejtsïkutiichani paraksï no imeecha juramuni na engaksï jatsika para máteruecha xukuparhani ka újtsïntani. Pori ejemplu, kúnguarhikua ma jimbo máru tumbiichaksï kánikua sapirhatitu kámasïreendi jauirini ka nóksï sési újtsïntasïreendi jimboka inde jindeespka moda. Orhejtsïkutiichaksï uékasïreendi jarhuataani ini tumbiichani, peru paraksï no juramukuani na engaksï meru jatsipka para újtsïntani, ¿ambeksï úpirini úni para jarhuataani? Sirkuitueri orhejtsïkuti arhiaspti orhejtsïkutiichani eskaksï ari ambe arhiapiringa erachiichani: “Engari plataformarhu jauaka ka máteruechaksïni sánderu arini jarhani exeni na engari xarharajka, ¿jindee jimbokaksï exexaka na engari mórhekuarhitini jaka o na engari arreglarikuarhitini jaka?”. I ambe marhuakuaspti orhejtsïkutiichani paraksï jarhuataani tumbiichani ka nóksï imeecha juramuni na engaksï jatsipka para arreglarikuarhini. d
Engachi kurhangujka ka nóchi inchandimentani, respetarinchi jarhasïnga ambe engaksï máteruecha eratsejka. (Exea je párrafu 15).
15. ¿Náki Biblieri juramukuecha ka prinsipiuechajtsïni jarhuatasïni engachi exeni jarhajka náki tratamientu úrani para kuidarikuarhini? (Roma 14:5).
15 Ambe engachi újka para kuidarikuarhini. Mándani kristianu jatsisti para jandiajku erakukuarhini ambe úni para kuidarikuarhini (Gal. 6:5). Engachi tratamientu ma erakuni jauaka, jatsiskachi para exeni ambeksï uandasïni Biblieri juramukuecha iurhiriiri ambe, sïkuamikueri ka máteru ambeeri (Uku. 15:20; Gal. 5:19, 20). Peru para máteru ambe, mándanchi jatsiska para erakuni ambe engachi uaaka. Máru kristianuechaksï doktori jingoni nirasïndi ka máteruechaksï sánderu naturali ambe úrasïndi. Jamberichi jucha eratsejka eska tratamientu ma kánikua marhuasïnga o eska no marhuasïnga, peruchi jucha jatsiska para jurajkuani erachiichani eskaksï ima erakukuarhiaka náki tratamientu úrani. Jimbosï xáni sésiiti eskachi méntku miáni jauaka i ambe: 1) eska Tata Diosïiri Reiunujkusï uaaka kénditani pʼamenchakuechani para méntkisï (Is. 33:24); 2) mándani kristianu jatsisti para sésimindu eratsekata jatsini ambe enga sánderu sésiika para ima (arhinta je Roma 14:5); 3) nóchi jusgariuasïnga máteruechani imani ambe jimbo engaksï erakuka úni, nijtuchi imani ambe újki enga no sési úkuauaka imeechani (Rom. 14:13), ka 4) kristianuechaksï kánikua xénchperasïndi ka sánderuksï jukaparharasïndi eska kúnguarhikua májku kʼéri jauaka ka eska ima ambe engaksï imeecha eratsejka eska sési jarhaska (Rom. 14:15, 19, 20). Engachi méntku miáni jauaka i ambe, sánderuchi sési pájperaaka juchaari erachiicha jingoni ka jarhuajpenchi jauaka paraka pínandikua jauaka kúnguarhikuarhu.
Engachi kurhangujka ka nóchi inchandimentani, respetarinchi jarhasïnga ambe engaksï máteruecha eratsejka. (Exea je párrafu 16).
16. ¿Nénaksï uaa orhejtsïkutiicha kurhanguni ka nóksï inchandimentani máteru orhejtsïkutiicha jingoni?
16 Orhejtsïkutiichaksï jatsisti para kurhanguni ka nóksï inchandimentani paraksï ambakiti ejemplu máeni (1 Tim. 3:2, 3). Orhejtsïkuti ma no erokuarhisïndi eskaksï máteruecha méntkisï jiókuarhiaka ambe enga ima uandaaka solu jimboka ima sánderu kʼériiska. Mítesti eska Tata Diosï Jeobaeri espiritu uaaka náki uéjki orhejtsïkutini ma úrani, paraka uandaaka ambe ma enga jarhuajpeaka para ambe ma sési uérani. Ka enga no uanajchakunhajka Biblieri prinsipiu ma, orhejtsïkutiicha engaksï kurhangujka ka engaksï no inchandimentajka, apoiarisïndiksï ambe engaksï iámindu orhejtsïkutiicha uandaaka eska úkuarhiaka, nájkirukaksï imeecha ménderueni exeaka ambe ma.
KÓNTPERATEECHANI ENGACHI JATSIAJKA ENGACHI KURHANGUJKA KA NO INCHANDIMENI
17. ¿Náki kóntperateechanchi jatsiasïni engachi kurhangujka ka no inchandimeni?
17 Engachi kurhangujka ka nóchi inchandimentani, uánikua kóntperateechanchi jatsiasïnga. Pori ejemplu, sánderuchi sési pájperasïnga erachiichani jingoni ka jarhuajpesïngachi paraka kúnguarhikuarhu pínandikua jauaka. Ístu, kánikuachi sési pʼikuarherasïnga enga Tata Diosï Jeobaeri iretarhu mámaru jásï kʼuiripuechachi jaka ka mámaru járhati pʼindekuecha jingoni. Ka nájkirukachi iáminduecha mámaru jásïika, kánikuachi sési pʼikuarherasïnga májku kʼéri kómarhini Tata Diosïni. Ka ambe engajtsïni sánderu sési pʼikuastajka, jindeesti eskachi májkueni úxaka eska Jeoba, Tata Diosï ma enga kurhangujka ka enga no inchandimejka.
PIREKUA 90 Ju je uinhaperperantani máteru ka máteruni jingoni
a Tata Diosï Jeoba ka Jesúsi kurhangusïndiksï ka nóksï inchandimentasïndi ka imeechaksï uékasïndi eskachi juchajtu májkueni uaaka. I ambejtsïni jarhuataati parachi jucha úni ménderueni úni ambe ma enga juchaari irekua ma repentku mójtakurhiaka. Pori ejemplu, engachi pʼamenchaaka o engachi problema ambe jatsiaka sentabu ambe jimbo. Ístu, engachi kurhangujka ka nóchi inchandimentani, jarhuajpeni jauakachi paraka kúnguarhikuarhu sési pájperanhaaka ka májku kʼérichi jarhani.
b Exe je artikuluni “Cómo adaptarse a los cambios”, númeru 4, rebisteeri ¡Despertad! 2016 anapu.
c Parajtsï exeni bideuni Entrebista erachini Dimitri Mijáilov, kara je jw.org jimbo jima enga jindeeka para jirinhantani ambe ma.
d Exentaakajtsï sánderu informasioni xukuparhakueri ambe ka na enga uaaka ma arreglarikuarhini, jorhenguarhikua 52 librueri Tsípikua jingoni ireka je.
