Papa orhejtsïkutiispti Iglesiarhu Unida Canadá anapueri. Ísï jimbo, mándani dominguechani tsípa axasïreendijtsïni jíndeni ka juchiiti ermanani parachi Biblieri ambe jorhenguarhini enga jindeepka solu para sapiicha. Ka ménderuchi a las 11 nirasïreenga papani jingoni iglesiarhu. Ka inchatiruechani nirasïreengachi mamani jingoni Kʼumanchikua Reinuerirhu. Exesïreengachi eskaksï i tsimani relijioniicha kánikua ménderueniispka.

Mama aianguaspti ambe enga jorhenguarhini japka Bob Hutcheson ka imeeri témbani. Imeechaksï kánikua sési pájperasïreendi ka ístuksï niáraspti Jeobaeri testigu úkuarhini. 1958 jimbo Bob ka Marion pásptijtsïni jíndeni ka imeeri tanimu uájpeechani Kʼéri tánguarhikua Internasionalirhu ma enga arhinheenga “Voluntad Divina”, enga ochu jurhiatikua duraripka ka enga Nueva York úkuarhipka. Iásï kurhangusïnga iámindu ambe engaksï jatsipka para úni parajtsïni pájtani ka kánikua jukaparharasïnga indeni ambe jimbokani jiáni kánikua tsípikuarhispka.

Engani tumbi sapichu máepka, kampurhuchi irekaspka ka jimachi uánikua animaliichani jatsiaspka. Ji tsitisïreenga kuidariuani. Kánikua tsitisïreenga beterinaria jorhenguarhini. Mama aianguspti ambe engani uékani japka úni kúnguarhikuarhu anapu orhejtsïkutini ma. Erachi uandontskuarhespti jíndeni jingoni ka iatsitakuarhureni miátantaspti eskachi “últimu jurhiatikuechani jimbo” irekaxaka ka kurhamarhisptireni ambe úpirini úkuarhini na engani pájpereenga Tata Diosï Jeoba jingoni engani ísï ióni nipiringa unibersidadirhu (2 Tim. 3:1).  Eratsentaspka ambe engareni arhipka ka uandaspka eskani no nipiringa unibersidadirhu.

Peru ji no mítespka ambe úpirinia engani na kʼamarapiringa sekundaria. Mándani fini de semana uérasïreenga aianhpini, joperuni no káni tsitisïreenga ísï úni ka eratsesïreenga eskani no méni úpiringa prekursoriini. Juchiiti papa ka juchiiti tíu engaksï no Testiguepka, uékasïreendiksï eskani pauani pauani ánchikuarhipiringa kʼéri empresarhu ma enga seguruecheeri ambe exeenga enga Toronto japka. Juchiiti tíu, kʼéri ambeespti indeni empresarhu ka ji jiókuarhispka indeni ánchikuarhitani.

Indeni ánchikuarhita jimbo, jatsisïreenga para ióni pakarani ka chúskutasïreenga imani kʼuiripuecha jingoni jarhani engaksï no Testiguepka. Inde ambe úspti eskani nóteruni xáni nipiringia tánguarhikuecharhu nijtu aianhpini. Ka jiánisï juchiiti papa kʼéri jingoni irekaspka enga ístu no Jeobaeri testiguepka. Peru enga ima na uarhipkia, jatsispka para jirinhani nani irekani.

Bob ka Marion imeecha engajtsïni pájtapka kʼéri tánguarhikuarhu 1958 jimbo, ísïisptiksï komueska juchiiti taatiicha. Arhisptijtsïni eskani úpiringa imeecha jingoni nirani irekani ka jarhuatasptijtsïni parani sési pájperani Tata Diosï Jeoba jingoni. 1960 jimbo, itsï atakuarhispka Johnini jingoni enga imeecheeri uájpa máepka. Ka jimboka John prekursori úkuarhipka, inde amberini jarhuataspti parani ji sánderu uérani aianhpini, erachiichaksï exespti eskani sánderu jánguarhintaxapka ka tiempu jingoni, arhisptijtsïni eskani úpiringa orhejtsïkutiini tánguarhikueri Irekua ka Aianhpikua.

Uéxurhini 1966 jimbo, tembuchaspka Randi Berge jingoni, ambakiti prekursora ma, enga uékeenga jima marhuani nani engaksï aianhpiriicha uétarhienga. Erachi enga juchaari sirkuitueri orhejtsïkutiipka, uékasïreendijtsïni jarhuatani ka arhisptijtsïni eskachi mótsipiringa kúnguarhikuarhu ma jimbo enga Orillia (Ontario) japka. ¡Tántaspkachi juchaari ambe ka niraspkachi!

Randi kánikua tsitisïreendi aianhpini ka inde ambe úspti eskani jíjtuni tsitipiringa ísï úni. Ísï jimbo, ísï no ióni jimbo engachi na niárapkia Orillia, prekursori úkuarhispka ka uandaspka eskani jánguarhintapiringa parani sánderu sési jorhentpini. Bibliani úrani ka jarhuataani máteruechani paraksï míteni jurhimbikua ambe, úspti eskani ji kánikua sési pʼikuarherapiringa. Ka kʼéri kóntperata máespti engani úka jarhuatani Orillia anapu temungurhiri ma parakaksï mójtakukuarhipiringa ka paraksï aiakukuarheni Tata Diosï Jeobani.

Ma xanhari engani Toronto nípka, mítespka Arnold MacNamaraini, erachi ma enga Beteli marhuani japka. Imarini kurhamarhispti sinchi uékapirini prekursori espesialiini. Sóntkuni arhispka: “Jo, peru asïjtsïni Quebec axa”. Ísï uandaspka jimbokaksï Canadá anapuecha engaksï inglési uandeenga, no sési ambeksï uandasïreenga Quebec anapuecheeri engaksï fransési uandeenga. Jiánisï, Quebec kʼuiripuechaksï marcheechani uaasïreendi paraksï arhini gobiernuni eskaksï nóteru uékasïreengia paraka Canadá juramukuapiringa.

Arnold arhisptirini: “Beteli solu prekursori espesialiichani axaaxati Quebec”. Jiókuarhispka indeni ambe jimbokani mítespka eska Randi uékasïreenga jima marhuani. Tátsekua kuenta íntskukuarhespka eska ambe engachi úpka kánikua sési jarhaspka.

Engachi na kʼamarapkia kursu ma para fransési jorhenguarhini enga sinko semana durariipka, axasptijtsïni jíndeni ka Randini Rimouskini, máteru temungurhiri ma jingoni. Rimouski, ma 540 kilometrisï pakarasïreendi (336 miia) noreste de Montreal. Nótkini úsïreenga sési uandani fransési ka inde ambe xarharaspti engani arhiantapka máru anunsiuechani tánguarhikuarhu. Uandaspka eska máteru kʼéri tánguarhikua jimbo uánikua “erachi abestrusiicha” jupiringa, parani arhikuekani eskaksï uánikua “erachiicha Austria anapuecha” jupiringa.

Rimouski, nóchi solu irekaspka temungurhiri ma jingoni. Ístuksï jima irekaspti tʼámu pirenchiicha engaksï uátsïipka ka engaksï kánikua tsitienga aianhpini ka ístu familia Huberdeaus jingoni, engaksï tsimani nanaka sapirhatiichani káuenga. I familia rentariispti kʼumanchikua ma engaksï siete kuartuecha japka ka iáminduechachi jarhuajperasïreenga renteeri maiampini. Arhisïreengachi “Casa Blanca” jimboka uérakisï urapiti atantskata jarhaspka ka pilariichajtuksï úrapitiispti. Jimachi 12 irekaspka ka ménichani 14. Ka jimbokachi Randi jingoni prekursori espesialiispka, xarhentkuchi ueenasïreenga aianhpini asta chúrikua jamberi. Kánikuachi jukaparharasïreenga enga méntkisï jarheenga nema engajtsïni pámbepiringa nájkiruka inchatiruechani kánikua tsʼirakuarhini jarheenga inbiernu jimbo.

Niáraspkachi kánikua sési pájperani imani prekursoriicha jingoni engaksï xáni ánchikuarhiriipka; ísïispkachi komueska kʼéri familia ma. Ménichanisïchi kurhikasïreenga parachi sáni májku kʼéri sési nitamakuarhini ka míndaspkachi ma jurhiatikua parachi pierogiichani uaani engaksï empanadeeni járhapka ka imani ambechi jatsiakuntasïreenga ambe engachi jucha anhencheenga. Uánikua xanhari, sábadu chúrikuechani piresïreengachi ka uarhani enga jamberi erachi ma kústani jarheenga.

Uánikuechaksï ueenaspti jorhenguarhini Biblieri ambe Rimouski. Sinko uéxurhini jimbo, uánikuechaksï itsï atakuarhispti ka inde ambejtsïni kánikua sési pʼikuastaspti, ka kúnguarhikuarhuksï niáraspti jarhani 35 aianhpiriicha.

Uánikua ambechi jorhenguarhispka Quebec: úspkachi sánderu sési aianhpini. Ístuchi exespka na engajtsï Tata Diosï jarhuatapka aianhpikuarhu ka úspti eskachi no ma ambe kueratanchapiringa. Ístu, niáraspkachi sánderu sési míteani imani kʼuiripuecha engaksï fransési uandajka ka niáraspkachi tsitini imeecheeri idiomani ka ambe engaksï ueenga. I ambe úspti eskachi tsitipiringa míteani máteru járhati kʼuiripuechani (2 Kor. 6:13).

Ísï tátsekua, Betelijtsïni kurhamarhispti sinchi úpirini mótsini Tracadie ireta ma enga kosta esterhisï pakareenga Nueva Brunswick. Nóchi erokuarhixapka indeni ambe. Nótki xáni ióniispti engachi kontratu ma úpka para máteru kʼumanchikuani rentariini. Ístu, máru oreecha jimbojkuni ánchikuarhisïreenga komueska maestru eskuelarhu ma, ka ístu uánikua imeecha engachi Biblieri ambe jorhendaani japka, nótki xáni ióniispti engaksï ueenapka uérani aianhpini; ka ístu jima Kʼumanchikua Reinueri ma únhaxapti. Ísï jimbo, kánikuachi úkua jukanchaspka exeni ambechi úpirini.

Méntkuchi ma fini de semana kómarhispka Tata Diosïni i ambeeri. Niraspkachi Tracadie ka exespkachi eska kánikua  ménderueniispka eska Rimouski. Peruchi uandaspka eska jimbokajtsïni Tata Diosïsï axani japka, nipiringachi. Tsʼéjkuspkachi Tata Diosï Jeobani ka exespkachi eska imajtsïni ambatskachipaxapka xanharuni (Mal. 3:10). Ka jimboka Randi kánikua sési pájperasïreenga Tata Diosï jingoni, no tsitisïreendi uánikua ambe jatsikuarheni ka iámindu ambe tsípikua jingoni úsïreendi, nóchi úkua jukanchaspka mótsini.

Tracadie solu ma orhejtsïkutiisï japti, Robert Ross. Ima ka imeeri témba Linda, jimaksï niraspti marhuani komueska prekursoriicha ka jimaksï pakaraspti enga na andajpenupkia imeecheeri orheta sapi. Nájkirukaksï kánikua úkua ambe jatsipka paraksï imeeri sapini kuidarini, kánikuajtsïni uinhaperantaspti jimbokaksï sési kámpisïreenga, jánguarhintasïreendiksï ka kánikuaksï tsitisïreendi aianhpini.

Engachi na tsimani uéxurhini páni japkia Tracadie, aiangunhaspkachi ambe ma engachi no erokuarhini japka: marhuani komueska sirkuitueri orhejtsïkuti. Siete uéxurhini pʼorhembiaspka imani kúnguarhikuechani engaksï inglesi uandeenga, ka tátsekuachi Quebec axanhaspka sirkuiturhu ma enga fransési uandanheenga. Jima, distritueri orhejtsïkuti Léonce Crépeault, felisitarisïreendirini engani na diskursu ma nitamatareengia. a Peru tátsekuarini arhisïreendi: “¿Amberi uaa úni parakaksï chiiti diskursuecha uaaka sánderu jarhuajpeni?”. Engareni erachi ísï jarhuatapka, úspka sánderuni sési nitamataraani diskursuechani ka eskaksï marhuakuapiringa máteruechani.

Kánikua tsípikua jingoni miántasïnga kʼéri tánguarhikua internasionalini enga arhinheenga “Fe Victoriosa” enga Montreal úkuarhipka 1978 jimbo. Ánchikuarhisïreenga Departamenturhu enga Tʼirekueri ambe exenheenga ka erokuarhixapkachi eskaksï 80,000 kʼuiripuecha japiringa. Peru jiáni, ménderueni únhapirindia ambe ma, iámindu ambe mójtakukuarhispti: mákineecha, ambe enga tʼirenhapiringa ka na enga úmanhantapiringa. 20 kʼérati refrijeradoriichanchi jatsiaspka para tʼirekua patsani, peruksï ménichani xerekuarhesïreendi. Ka ístuchi no úpiringa xarhentku inchani estadiurhu parachi tʼuini listu jatsinia iámindu ambe. Ma jurhiatikua ante de kʼéri tánguarhikua úkuarhini, imani estadiu jimbo chʼananhaspti. Engachi úpkia inchani, tʼuini terujkani chúriisptia. Ante de erandeni, tʼuinchi jatsipiringia para listu jatsiani jorneechani parachi tsípa anapu tʼirerpini. Kánikuachi kuataratini pakaraspka, peruni jorhenguarhispka ima erachiicheeri engaksï xáni uinhamu ánchikuarhipka jimbokaksï kánikua eksperiensia jatsispka ka iámindu ambeksï tsípikua jingonksï úsïreendi. I ambe úspti eskachi kánikua sési pájperapiringa ka útasïni jatsiaska amiguechani engani jiáni míteapka. Kʼéri kóntperata máespti engani úpka ini kʼéri tánguarhikuarhu jarhani Quebec, indeni lugari jimbo nani engajtsïni juchaari enemiguecha kánikua no sési kámeenga 1940 jimbo ísï a 1960.

 Uánikua ambe jorhenguarhispka máteruecheeri engaksï ístu orhejtsïkuauenga kʼérati tánguarhikuechani engaksï Montreal úkuarhipka. Ma xanhari David Splane enga iásï Grupurhu jaka enga Orhejtsïkuajka iámindu kúnguarhikuechani, orhejtsïkuspti kʼéri tánguarhikuani ma. Tátsekua, engani ji jatsipkia inde jásï ánchikuarhita David kánikuarini jarhuataspti.

Marhuaspka 36 uéxurhini komueska sirkuitueri orhejtsïkuti. Ka tátsekua 2011 jimbo, pʼímarhinhaspka parani jorhentpiriini Jorhentperakuarhu para Kúnguarhikuarhu anapu Orhejtsïkutiicha. Tsimani uéxurhini jimbojku, Randi ka ji 75 kameecha jimbochi pakaraspka. Úkua jukaspti, peru kánikua marhuaspti inde ambe. Enga na kʼamareengia ma semana, orhejtsïkutiichaksï kánikua agradesidu pʼikuarherasïreendi, jimbokaksï exesïreenga eska Grupu enga Orhejtsïkuajka iámindu kúnguarhikuechani kánikua uandanhiasïreenga parakaksï imeecha sési pájperapiringa Tata Diosï jingoni.

Tátsekuajtsïni arhispti parakani jorhentpipiringa Jorhentperakuarhu para Aianhpiriicha Reinueri. Uánikua xanhari, jorhenguarhiriichaksï kánikua kuataratini pʼikuarherasïreendi engaksï exeenga iámindu ambe engaksï jatsienga para úni: siete ora jarhani klaserhu, tanimu ora mándani pauani para tareaechani uaantani ka kuatru o sinko asignasioniichani preparariuani mándani semana. Máteru jorhentpiri ka ji méntkisïchi arhiasïreenga eskaksï solu úpiringa indeni ambe Tata Diosï Jeobaeri jarhuajperata jingoni. No méni mirikurhiaka na engaksï ísku pakareenga engaksï exeenga, eska engaksï jurajkuenga eska Tata Diosï jarhuataapiringa, sánderu uánikua ambeksï úsïreenga úni eska na engaksï xáni eratsekata jatsienga.

Enga mama ísï jarhuataapka imeechani enga Biblieri ambe jorhendaani japka, jarhuataspti papani, paraka ima ménderueni exepiringia jurhimbikuani. Tanimu jurhiatikua tátsekua enga mama uarhipkia, papajtsïni ísku pakataspti: Kʼumanchikua Reinuerirhu niáraspti para kurhaani arhijtsïkperatani enga nitamataranhapiringa. Ka jima uératini, no ma tánguarhikuarhu kuerataspti 26 uéxurhini jimbo. No méni itsï atakuarhispti, perujtsïni orhejtsïkutiicha aianguspti eska ima méntkisï orheta niárasïreenga Kʼumanchikua Reinuerirhu.

Juchiiti mama ambakiti ejemplu máespti para juchiiti tanimu ermaneecha ka para ji. Juchiiti ermaneecha ka imeecheeri uámbeechaksï sési marhuakuxati Tata Diosï Jeobani. Tsimaniksï Beteli marhuaxati: ma Portugal ka máteru Haití.

Iásï Randi ka ji prekursori espesialiiskachi Hamilton (Ontario). Engani sirkuitueri orhejtsïkutiipka, kánikuachi tsitisïreenga erachiichani jingoni nirani kʼuiripuechani pʼorhembiani ka Biblieri ambe jorhendaani. Peru iásï, kánikuachi sési pʼikuarherasïnga engachi újka jucha jorhendaani kʼuiripuechani ka exeni na engaksï jánguarhintani jaka marhuakuni Tata Diosïni. Ístuchi úsïnga sánderu sési míteani kúnguarhikuarhu anapu erachiichani, ka kánikuajtsïni uinhaperantasïndi exeni na enga Tata Diosï Jeoba jarhuataajka ambe uéjkiksï nitamakuarhini jarhani.

Engachi eratseantajka iámindu imeechani engajtsïni jarhuatapka, kánikuachi agradesidu pʼikuarherasïnga. Peru juchajtuchi kánikua pendienti pásïnga para jarhuatani máteruechani, parakaksï uaaka sánderu marhuakuni Tata Diosïni (2 Kor. 7:6, 7). Pori ejemplu, familiarhu ma, pirenchi ka imeeri tsimani uájpeechaksï prekursoriispti. Kurhamarhispka pirenchiiri uámbani sini imajtu uékapirini prekursoriini. Peru ima uandaspti eska imeeri familiani jarhuataxapka paraksï úni prekursoriini. Kurhamarhispka: “¿Nóri ísï exesïni eska Tata Diosï Jeoba uaaka sánderu sési kuidariuani eska tʼu?”. Pʼímarhispka paraka imajtu prekursoriipiringa, ka ísï úni sési pʼikuarherani ísï eska imeeri familia. Seisi mesi ísï tátsekua, imajtu prekursoriisptia.

Randi ka ji, seguiriiuakachi aianguani imeechani engaksï tátsekua irekaaka, ʻxáni ambakiti ambeeriʼ enga Tata Diosï Jeoba úka, ka erokuarhisïngachi eskaksï imeechajtu májkueni tsípikuarhiaka marhuakuni Tata Diosï Jeobani ísï eska jucha (Sal. 71:17, 18).