1. ¿Ambe ka ambejtsï jorhenguarhiski engajtsï ueenaka Biblieri ambe jorhenguarhini?

 ¿MIÁSÏNTSÏ ambe engajtsï xáni jorhenguarhika engajtsï ueenaka Biblieri ambe jorhenguarhini? Jamberijtsï ísku pakarapka engajtsï mítepka eska Tata Diosï jatsikuarheska nombri ma. Ka jamberijtsï kánikua sési pʼikuarherapka míteni eska no jarhaska infiernu ma nani enga Tata Diosï no sési úkuani jarhajka kʼuiripuechani. Ka ístujtsï kánikua sési pʼikuarherapka engajtsï jorhenguarhipka eskaksï imeecha engajtsï uarhiranchaaka tsíntaaka ka eskajtsï uaaka imeecha jingoni jarhani Paraisurhu.

2. Aparte dejtsï jorhenguarhini Biblieri ambe, ¿ambe máteru ambejtsï úski para xarhatani eskajtsï uékasïreenga úni ambe enga sési jaka? (Efesu 5:1, 2).

² Engajtsï na jorhenguarhipani japka Tata Diosïiri Karakatani niáraskajtsï sánderu xénchani Tata Diosï Jeobani. Ka inde ambe úspti eskajtsï uékapiringa ísï úni eskajtsï na jorhenguarhini japka. Ueenaspkajtsï imani ambe úni enga sési jaka jimbokaksïni Biblieri prinsipiuecha jarhuataska. Ístujtsï ueenaspka ménderueni jámani ka eratseni jimbokajtsï uékasïreenga Tata Diosïni jaiapanherantani. Ísï eska sapi ma na májkueni jámajka eska taati jémba, chájtujtsï ueenaska májkueni úni eska chaari Taati auandarhu anapu enga kánikua xénchpetiika (arhinta je Efesu 5:1, 2).

3. ¿Náki kurhamarhikuechanchi úpirini úkuarhiani?

³ Úpiringachi kurhamarhikuarhini: “¿Iásï sánderuni xénchasïnia Tata Diosï Jeobani eska jiáni engani itsï atakuarhika? ¿Sánderuni ísï eratsesïnia ka jámani eska Tata Diosï Jeoba, ka sánderia jiáni engani jatsijka parani uékperakua xarhatakuani kúnguarhikuarhu anapu erachiichani?”. Engachi nóteru xáni xénchpejkia ju je no chkétakuarhini. Primeru siglurhu anapu erachiichaksï indeni ambe úkuarhinchaspti. Peru Jesúsi no uandaspti eskaksï nóteru méni úpiringia xénchpeni, ka májkueni eratsesïndi juchaari ambe (Jaŋ. 2:4, 7). Ima mítesti eskachi uaaka ménderu ísï xénchpeni eska jiáni engachi ueenaka Biblieri ambe jorhenguarhini.

4. ¿Ambechi exeni jaua ini jorhenguarhikua jimbo?

 ⁴ Ini jorhenguarhikua jimbo, orhetachi exeaka ambechi uaa úni parachi sánderu xénchani Tata Diosï Jeobani ka ístu máteruechani. Ka tátsekuachi exeni jauaka néna engajtsïni marhuacheaka juchantsïni ka ístu máteru kʼuiripuechani engachi xénchpeaka.

5, 6. a) ¿Ambe ka ambe nitamakuarhispi Pablu enga marhuakuni japka Tata Diosï Jeobani? b) ¿Ambe jarhuataspi para seguiriini marhuakuni?

⁵ Apostoli Pablu kánikua sési pʼikuarherasïreendi marhuakuni Tata Diosï Jeobani, nájkiruka no méntkisï fásiliipka. Mémindu iauanisï niraspti biajarini nájkiruka no fásiliipka. Indeni biajicharhu ménichani peligru pasariispti “iurhekuecharhisï” ka ístu “kuarhukpitiichani jingoni”. Ka ménichani imeeri enemiguechaksï kánikua no sési kámaspti (2 Kor. 11:23-27). Ka ístu, imeeri erachiichaksï no méntkisï agradeserikusïreendi ambe enga ima xáni ueenga para jarhuataani (2 Kor. 10:10; Filip. 4:15).

⁶ ¿Ambe jarhuataspi Pabluni para seguiriini marhuakuni Tata Diosïni? Ima uánikua ambe jorhenguarhispti na enga jásïika Tata Diosï Jeoba jimboka jorhenguarhisïreenga Tata Diosïiri Karakatani ka ístu imani ambe jimbo enga nitamakuarhipka. Seguru jarhaspti eska Tata Diosï Jeoba xénchasïreenga (Rom. 8:38, 39; Efes. 2:4, 5). Pablu niáraspti kánikua xénchani Tata Diosïni. Ka indeni ambe jimbo marhuakuaspti Tata Diosïiri míndakateechani ka seguiriispti marhuakuani (Ebr. 6:10).

7. ¿Ambejtsïni jarhuataa sánderu xénchani Tata Diosï Jeobani?

⁷ Parachi niárani sánderu xénchani Tata Diosïni, jatsiskachi para sési jorhenguarhini Tata Diosïiri Karakatani. Engachi Bibliani arhintani jauaka, ju je jánguarhintani exeni ambe engajtsïni jorhendajka Tata Diosï Jeobaeri ambe. Jatsiskachi para kurhamarhikuarhini: “¿Nénaksï xarhatasïni i karakateecha eskarini Tata Diosï Jeoba xénchasïnga? ¿Ka nénajtsïni jarhuatasïni sánderu xénchani Tata Diosï Jeobani?”.

8. ¿Nénajtsïni jarhuatasïni kómarhikua parachi niárani sánderu xénchani Tata Diosïni?

⁸ Máteru ambe engajtsïni jarhuataaka sánderu xénchani Tata Diosï Jeobani jindeesti pauani pauani aiangukuarhini na engachi pʼikuarherajka kómarhikua jimbo (Sal. 25:4, 5). Ka Tata Diosï Jeobajtsïni mókuchiantauati juchaari kómarhikuechani (1 Juanu 3:21, 22). Asia anapu pirenchi ma, uandaspti: “Ueenakuarhu, xénchasïreenga Tata Diosï Jeobani imani ambe jimbojku engani Bibliarhu jorhenguarhienga. Peruni niáraspka sánderu xénchani engani exepka eskarini mókuchiantaspka kómarhikuechani, ka inde amberini jarhuataspti parani imani ambe úni enga Tata Diosï jaiapanhintajka”.

9. ¿Néna xarhataspi Timoteu eska xénchaasïreenga erachiichani?

⁹ Máru uéxurhinisï tátsekua enga Pablu kristianu úkuarhipka, mítespti ambakiti tumbini ma enga Timoteu arhinheenga. Ima xénchasïreendi Tata Diosï Jeobani ka ístu máteru kʼuiripuechani. Ma tiempisï tátsekua, Pablu i ambe arhiaspti Filipusï anapuechani Timoteueri ambe: “Jimboka no nema jarhaska ixú enga ísï jámajka eska inde, jimboka inde kánikua uandanhiasïnga chánksïni jimbo” (Filip. 2:20, TNM). Pablu no uandaspti eska Timoteu sési organisarisïreenga ambe ma o eska sési arhijtsïkpisïreenga. Ambe enga Pablu exepka Timoteueri, jindeespti eska kánikua xénchaasïreenga erachiichani. Seguru eskaksï kúnguarhikuecha uékani jarheengia eska Timoteu pʼorhembiapiringa (1 Kor. 4:17).

10. ¿Nénaksï xarhataspi Anna ka imeeri uámba eskaksï xénchaasïreenga erachiichani?

¹⁰ Juchajtuchi jirinhakuntasïnga néna engachi uaaka jarhuataani erachiichani (Ebr. 13:16). ¿Miásïntsï Annani engachi máteru jorhenguarhikua jimbo uandaka? Ísï tátsekua enga  kʼéri ma janipka ka tarhiani, ima ka imeeri uámba nirasptiksï erachiichani máru exeani. Exesptiksï eska erachiicheeri kʼumanchikua techu uekorhespka, ísï jimbo erachiicheeri takusï iámu jásï jarhaspti. Ísï jimbo, nóksï jatsispti ambe jukantani. Anna uandantasïndi ambe engaksï úpka: “Juchiniuchi páspka imeecheeri takusï ambe ka tátsekuachi jupakata pákuantaspka, plancharikata ka tsikakukata. No kʼéri ambeespti ambe engachi úpka, peru inde ambe ústi eskachi iásï kánikua sési pájperaaka”. Ísï jimbo, ambe enga jarhuatapka Annani ka imeeri uámbani para erachiichani jarhuataani, jindeesti jimbokaksï kánikua xénchpesïnga (1 Juanu 3:17, 18).

11. a) ¿Nénaksï pʼikuarherasïni máteruecha engachi xarhatakuajka eskachi xénchaasïnga? b) Eska na arhijka Proverbios 19:17, ¿na pʼikuarherasïni Tata Diosï engachi xarhatakuajka máteruechani eskachi xénchaasïnga?

¹¹ Engachi sési kaajka máteruechani ka uékperakua jingoni, xarhatanchi jarhasïnga eskachi májkueni eratsesïnga ka jámani eska Tata Diosï Jeoba. Ka máteruechaksï exesïndi ambe engachi újka. Jamberichi no méni uaaka míteni na engaksï xáni agradesidu jaka máteruecha imani ambe jimbo engachi újka. Pirenchi engachi párrafu 8 jimbo uandaka, mintsita jingoni miáuasïndi iámindu imeechani engaksï jarhuataka, ima uandasïndi: “Kánikua diosmaiamukua arhiasïnga imani pirenchiichani engajtsïni peenga aianhpini. Kánikuajtsïni sési kámasïreendi, jurhasïreendijtsïni jirinhantani ka pʼímarhisïreendijtsïni parani nirani imeecha jingoni tʼireni, ka tátsekuajtsïni nirasïreendi pántani. Iásï kurhangusïnga eska inde ambe úkua jukeenga para imeecha, joperujtsïni mintsita jingoni jarhuatasïreendi”. Ísïisti, nójtsïni iáminduecha diosmaiamukua arhiati imani ambe jimbo engachi újka. Pirenchi, ístu i ambe uandasïndi imeecheeri engaksï jarhuataka: “Tsitipiringa úni ambe ma iámindu imeecha jimbo engajtsïni jarhuataka, peruni no iáminduechani miiukuaska. Joperu Tata Diosï Jeoba kʼóru mítesti nani engaksï irekaka ka kurhakusïnga eska ima maiamuantauaka jíndeni jimbo”. Jo, Tata Diosï  Jeoba exesïndi asta sánderu sapichu ambe engachi újka máteruechani jimbo. Ima ísï exesïndi indeni ambe komu kʼéri sakrifisiu ma ka eska ambe ma enga jatsika para maiampintani (arhinta je Proverbios 19:17).

12. ¿Nénaksï uaa erachiicha engaksï itsï atakuarhikia uékperakua xarhatakuani kúnguarhikuarhu anapu erachiichani? (Ístu exea je imajeniichani).

¹² Engajtsï chá erachi máeka, ¿nénajtsï uaa xarhatani eskajtsï xénchaasïnga kúnguarhikuarhu anapu erachiichani? Jarhuatapariani. Tumbi ma enga Jordan arhinhajka, arhispti orhejtsïkutini ma eska arhipiringa ambe enga úpiringa úni para sánderu jarhuataani erachiichani. Orhejtsïkuti felisitarispti iámindu imani ambe jimbo enga úpkia úni ka ístu arhispti ambe enga úpiringa sánderu sési úni. Pori ejemplu, arhispti eska xarheni niárapiringa Kʼumanchikua Reinuerirhu ka eska saludariuapiringa erachiichani, eska komentaripiringa tánguarhikuecharhu, ka eska jánguarhintapiringa méntkisï uérani aianhpini imeeri grupu jingoni, ka eska exepiringa ambe enga úpiringa sánderu úni para jarhuataani erachiichani. Enga Jordan ísï úpka eska na arhinhapka, no solu jarhuataspti para listu jarhania para jiókuarhiani sánderu responsabilidadiichani, ístu jarhuataspti para sánderu xénchaani erachiichani. Ístu jorhenguarhispti eska enga erachi ma sierbo ministeriali únhajka, no jiáni ueenani jarhasïndi jarhuataani máteruechani, sánderu sési, seguirisïndi ísï úni (1 Tim. 3:8-10, 13).

13. ¿Ambe jarhuataspi Christianini para ménderu orhejtsïkutiini?

¹³ ¿Ióntkijtsï orhejtsïkutiispi o sierbo ministeriali? Tata Diosï Jeoba no mirikurhisïndi ambe engajtsï xáni úka uékperakua jimbo (1 Kor. 15:58). Ka jingontku exesïndi na engajtsï seguiriini jaka uékperakua xarhatani. Erachi ma enga Christian arhinhajka, kánikua komu pʼikuarheraspti enga arhinhapka eska nóteru orhejtsïkutiipiringia. Peru no chkétakuarhispti, ima mismu uandasïndi: “Uandaspka eska nájkirukani nóteru orhejtsïkutiipkia, seguiriipiringa  jánguarhintani jarhuajpeni, jimbokani xénchasïnga Tata Diosï Jeobani”. Ísï tátsekua ménderuni niáraspka orhejtsïkutiini. Christian uandasïndi: “No seguru jarhaspka sini jiókuarhipirini indeni responsabilidadini. Peruni eratsespka eska enga Tata Diosï Jeoba uékeenga eskani ménderu orhejtsïkutiipiringa, jiókuarhipiringa, jimbokani kánikua xénchasïnga imani ka ístu erachiichani”.

14. ¿Ambechi jorhenguarhisïni ima ambeeri enga Georgia anapu pirenchi uandaka?

¹⁴ Tata Diosï Jeobaeri marhuariichachi ístu xénchaasïnga máteru kʼuiripuechani, nájkirukaksï no Testigueka (Mat. 22:37-39). Pori ejemplu, pirenchi Elena enga república de Georgia anapueka, uandasïndi: “Ueenani, uérasïreenga aianhpini, jimbokani xénchasïreenga Tata Diosï Jeobani, peru engani sánderuni xénchapani japka juchiiti Taati auandarhu anapuni, ístuni sánderu xénchaasïreenga kʼuiripuechani. Jánguarhintasïreenga eratsentani náki uandanhiateechanksï jatsiapi ka ambeeriksï uékapirini uandontskuarheni. Engani sánderu eratseantauenga kʼuiripuechani, sánderuni uékasïreenga jarhuataani” (Rom. 10:13-15).

15, 16. Ísï eska na xarharajka imajeniicharhu, ¿nénajtsïni marhuachesïni engachi uékperakua xarhatakuajka máteruechani?

¹⁵ Engachi jucha xarhatakuajka erachiichani eskachi xénchaasïnga, máteru kʼuiripuechajtuksï kánikua marhuanchasïndi. Pandemia COVID-19 jimbo, Paolo ka imeeri témba jarhuataasptiksï uánikua erachiichani engaksï jatiriipkia paraksï úni aianhpini imeecheeri tableta ka  telefonu jingoni. Pirenchi ma kánikua úkua jukanchasïreendi ini ambe úrani, peru tátsekua úspti jorhenguarhini ka imeeri familiariichani pʼímarhiaspti paraksï konektarikuarhini para tata Jesukristueri uarhikuani miántani. 60 kʼuiripuechaksï konektarikuarhispti bideokonferensia jimbo. Ísï jimbo, pirenchi ka imeeri parientichaksï kánikua marhuanchaspti ambe engaksï Paolo ka imeeri témba úpka. Pirenchi ini ambe karakuspti Paoloni: “Diosmaiamu jimbokajtsïni jorhendaska juchantsïni engachi jatiriikia. No méni mirikurhiaka na engajtsïni xáni jarhuataka Tata Diosï Jeoba ni na engajtsïni chá xáni tekaantskua xarhatacheka”.

¹⁶ I járhati eksperiensiecha jingoni, Paolo ambakiti ambe jorhenguarhispti. Úspti exeni eska sánderu jukaparhakueska uékperakua xarhatakuani máteruechani ka eska kánikua ambe míteni o uánikua ambe jorhenani úni. Ima ísï uandasïndi: “Sirkuitueri orhejtsïkutiispka ma tiempu. Jamberiksï erachiicha nóteru miáuajtia arhijtsïkperateechani engani nitamataraaka, joperuksï kʼóru miásïndi ambe engani xáni úka para jarhuataani”.

17. Ístu, ¿néni marhuakusïni engachi uékperakua xarhatakuajka máteruechani?

¹⁷ Engachi xarhatajka eskachi xénchaasïnga máteruechani, juchajtuchi kánikua marhuanchasïnga. Eksperiensia ma enga Nueva Zelanda úkuarhika xarhatasïndi eska inde ambe ísïiska. Sábadu ma jimbo, Jonathan exespti prekursorini ma enga jandiajku jámani japka aianhpini ka ima jurhiatikua kánikua aparhikuarhispti. Ísï jimbo, uandaspti eska pámbetapiringa sábadu xatiniichani. Ima no méni eratsespti eska imantu marhuakupiringa inde ambe. Jonathan uandasïndi: “Jiánisï no tsitisïreenga aianhpini, peru engani exepka na enga sési jorhentpienga i prekursori ka na enga sési nikuenga, ueenaspka tsitini aianhpini. Niáraspka kánikua sési pájperani indeni erachi jingoni ka jarhuatasptireni parani tsitini aianhpini ka parani sánderu sési pájperani Tata Diosï Jeoba jingoni”.

18. ¿Ambe uékasïni Tata Diosï Jeoba eskachi uaaka?

¹⁸ Tata Diosï Jeoba uékasïndi eskachi sánderu xénchaaka imani ka ístu máteruechani. Ísï eskachi na exekia, parachi sánderu xénchani Tata Diosï Jeobani jatsiskachi para arhintani imeeri Karakatani, eratsentani ambe engachi arhintaaka ka pauani pauani kómarhini. Ka parachi xarhatakuani juchaari erachiichani eskachi xénchaasïnga, jatsiskachi para jirinhakuntani néna jarhuataani. Engachi sánderu xénchaska Tata Diosï Jeobani ka ístu juchaari erachiichani, sánderuchi sési pájperaaka imeecha jingoni. ¡Jo, uaakachi para méntkisï sési pájperani Tata Diosï Jeoba jingoni ka erachiicha jingoni!