JIMA enga ióntki Babiloniepka, arkeologuechaksï pʼitaskuantaspti uánikua tabikiichani engaksï úranhapka para ini iretani úni. Arkeologu Robert Koldewey uandaspti eskaksï i tabikiicha únhaaspka jorneecharhu “engaksï siudadirhu uéramanisï japka, nani enga ambakiti atsïmu japka” ka kánikua chkari para kurhirani.

Arkeologuechaksï uánikua ambe exentaspti enga xarhatajka eskaksï imeecha engaksï gobiernurhu ánchikuarhienga Babilonia, úraaspkaksï indeni jorneechani paraksï úni ambe ma enga kánikua no sési japka. Paul-Alain Beaulieu enga Asiriologieri ambe jorhentpijka Universidad de Toronto, uandasïndi: “Uánikua Babilonia anapu karakateechaksï [...] uandasïndi eska rei juramuspka eskaksï kurhiraapiringa imani kʼuiripuechani engaksï no kurhajcheenga o engaksï no janhanharhiauenga jima anapu diosïichani”. Ka karakata ma enga jiáni karanhapka enga rei Nabukodonosori irekapka, uandasïndi ambe engaksï úkuarhinchapiringa máru kʼuiripuecha: “Kʼamajkua je, kurhiraa je, [...] kʼuanijpa je jornarhu […], eskaksï sïraata úkuarhintaaka. Eskaksï sesesi kʼamajpiaka chpirirhu”.

Iámindu i ambe úsïndi eskaksï imeecha engaksï Bibliani arhintajka eratsentaaka ambe enga uandajka Daniel kapitulu 3. I kapitulu uandasïndi eska rei Nabukodonosori kʼéri monumentu ma úspka orueri, Duraeri pákua jimbo enga Babilonia uéramanisï japka. Tanimu tumbiicha engaksï ebreuepka Sadraki, Mesaki ka Abednegu, nóksï uékaspti tinguixurhikuni ini monumentuni. I ambe úspti eska rei Nabukodonosori kánikua ikiapiringa, enga jamberi juramupka “eskaksï siete uelta sánderu jurheperapiringa jornani” ka eskaksï jima kʼuanijpaapiringa ini tanimu tumbiichani. Joperu ánjeli uinhapiti ma pʼímutaantaspti paraksï no uarhini (Dan. 3:1-6, 19-28).

Tabikiicha engaksï Babilonia exenhantapka, ístuksï xarhatasïndi eska Biblia mintsinharhikueska. Uánikua ini tabikiicha jimbo, karakataksï jarhasti uánikua pirekuecha para rei. Ma i karakateecheri uandasïndi: “Nabukodonosori, Babilonia anapu rei [...]. Ji úska palasiuni parani ixú irekani [...]. Eskaksï desendientiicha juramuaka ixú para méntkisï”. I karakata sáno májkueniisti indeni jingoni enga Daniel 4:30 uandajka, nani enga Nabukodonosori kʼéramakuarhipka ini ambe uandaparini: “¿No i jindeeski kʼéri Babilonia engani ji mismu úka juchiiti juramukua ka uinhapikua jingoni, paraksï reiicha irekani ka parani ji kʼéri ambe arhinhani?”.