1. ¿Andisï xáni sési jaki eskachi prepararikuarhiaka ante de no sési ambe úkuarhini?

 ENGA nema prepararikuarhijka, jarhuatasïndi para no no sési ambe úkuarhinchani. Pori ejemplu, enga desastre ma úkuarhijka, ima kʼuiripuecha engaksï sési prepararikuarhijka úsïndiksï tsípiti pakarani ka jarhuataani máteruechani. Ka ísï eska na uandapka grupu ma enga kʼuiripuechani jarhuataajka Europa, enga nema kánikua sési prepararikuarhijka jarhuatasïndi para tsípiti pakarani.

2. ¿Andichisï jatsi para preparadu jarhani jiáni enga kánikua no sési nitamakuarhinhaaka? (Mateu 24:44).

² Ma repentku ueenaati kánikua no sési nitamakuarhinhani (Mat. 24:21). Peru i kánikua ménderueniuati eska desastrecha, jimbokachi jucha mítetixaka eska niáraaka ísï úkuarhini. Ka ma 2,000 uéxurhinisïstia enga Jesúsi arhiapka imeeri chúxapatiichani ambe engaksï jatsipka para úni paraksï preparadu jarhani para i jurhiatikua (arhinta je Mateu 24:44). Engachi jucha úska ambe enga i konseju uandajka, sánderu fásiliuati eskachi tsípiti pakaraaka indeni jurhiatikuechani jimbo enga xáni no sési jánhaskuarhiaka ka uaakachi jarhuataani máteruechani paraksï imeechajtu tsípiti pakarani (Luk. 21:36).

3. ¿Andichisï jatsi para tekaantstiini, pʼamojpeni ka xénchpeni parachi preparadu jarhani jiáni enga kánikua no sési nitamakuarhinhaaka?

³ Jiáni enga kánikua no sési nitamakuarhinhaaka uétarhinchauakachi tanimu kualidadiichani. ¿Ambechi uaa engachi arhinhaska eskachi aianhpiaka eska Tata Diosï jusgariuauaka kʼuiripuechani ka máteru kʼuiripuechajtsïni no sési kámani? (Jaŋ. 16:21). Uétarhiati eskachi tekaantstiuaka parachi kurhajchani Tata Diosï Jeobani ka mintsikani eskajtsïni ima kuájchakuaka. ¿Ambechi uaa engaksï juchaari erachiicha tsïtaaka máru ambe oksï no ma ambe jingoni pakarani? (Hab. 3:17, 18). Uétarhiati eskachi pʼamojkuauaka para jarhuataani ka parachi íntsaani ambe engaksï uétarhinchaaka. ¿Ka ambechi uaa engajtsïni grupu ma nasionicheeri ueenaaka no sési kámani ka engachi jamberi jatsiaka para ma tiempu, juchaari erachiichani jingoni irekani jima enga no káni ambandiaka? (Ezeq. 38:10-12). Uétarhiati  eskachi mintsita jingoni xénchauaka juchaari erachiichani.

4. ¿Andisï Biblia uandajki eskachi jatsiska para sánderu tekaantstiini, pʼamojpeni ka xénchpeni?

⁴ Tata Diosïiri Karakatajtsïni arhisïndi parachi sánderu tekaantstiini, pʼamojpeni ka xénchpeni. Lukasʌ 21:19 uandasïndi: “Chaari tekaantskua jimbo, chájtsï andajkuarhiaka pʼímutantaani chaari almeechani”. Ka Kolosasi 3:12 ini konsejujtsïni íntskusïndi: “Mintsita jingoni pʼamojpera je”. Ka 1 Tesalonika 4:9, 10 arhisïndi: “Jimbokajtsï chámindu jorhendanhaska Diosïni jimbo eskajtsï uékperaaka máteru ka máteruni jingoni. [...] Peru jíksïni kómarhisïnga ermanuecha, eskajtsï sánderu ka sánderu uékperaaka”. I uandakuechaksï jindeespti para ima kʼuiripuecha engaksï xarhatani japkia tekaantskua, pʼamojperakua ka xénchperakua, joperuksï jatsispti paraksï sánderu xarhataani ini kualidadiichani. Ka juchajtuchi májkueni ambe jatsiska para úni. ¿Ambejtsïni jarhuataa ísï úni? Ini jorhenguarhikua jimbo, exeakachi ambe enga jarhuataapka primeru kristianuechani ini kualidadiichani xarhataani ka na engachi uaaka májkueni úni parachi tʼuini preparadu jarhania jiáni enga kánikua no sési nitamakuarhinhaaka.

5. ¿Ambeksï úspi primeru siglurhu anapu kristianuecha paraksï úni tekaantani?

⁵ Primeru siglurhu anapu kristianuechaksï jatsispti para tekaantstiini (Ebr. 10:36). Májkueni eskaksï máteru kʼuiripuecha, imeechajtuksï jatsiaspti problemeechani engaksï sáno iámindu kʼuiripuecha jatsiajka, joperuksï ístu jatsiaspti máteru járhati problemeechani imeecheeri jakajkukua jimbo. Judiueri relijioniiri orhejtsïkutiicha ka ístu Roma anapu juramutiicha, uánikuechanksï no sési kaasïreendi ka ístuksï imeecheeri familia no sési kaasïreendi (Mat. 10:21). Ka ménichani, kristianuechaksï jatsispti para jingontku jarhani apostateecha jingoni, iichaksï uékasïreendi támisï páni kúnguarhikuani chkuanderakua ambe jorhentpiparini (Uku. 20:29, 30). Nájkirukaksï ísï nitamakuarhini japka, kristianuechaksï úspti tekaantani (Jaŋ. 2:3). ¿Ambe jarhuataaspi? Eratsentasptiksï ambe enga Biblia uandajka imeecheeri ambe engaksï tekaantapka, komu Jobu (Sant. 5:10, 11). Kómarhisptiksï Tata Diosï Jeobani paraka uinhapikua íntsaapiringa (Uku. 4:29-31). Ka méntkisïksï miáspti eska ima kóndeantapiringa engaksï tekaantapiringa (Uku. 5:41).

6. ¿Ambechi uaa jorhenguarhini ima ambeeri enga Merita úpka para úni tekaantani?

⁶ Juchajtuchi uaaka tekaantani engachi pʼindeska eratsentani ima ejempluecheeri engaksï tekaantskua xarhatapka engaksï Bibliarhu ka juchaari publikasionicharhu jaka. I ambe jarhuataspti Albania anapuni pirenchini ma enga Merita arhinhajka para ima úni orhepani uérani nájkiruka imeeri familia no sési kámeenga. Pirenchi uandasïndi: “Engani arhintapka Bibliarhu Jobueri ambe, mintsitarhurini niárachespti. I achamasï kánikua kómu nitamakuarhispti..., ka no mítespti andisï ísï nitamakuarhini japi. Nájkiruka Jobu indeni ambe nitamanchapka, ísï uandaspti eska na arhijka Job 27:5: ʻ¡Jiájkani jamberi marhuakuaka Tata Diosïni iámu mintsita jingoni astakani uarhiaka!ʼ. I ambe úspti eskani eratsentapiringa eska ambe engani ji nitamakuarhini japka no xáni kʼéri ambeespka ka eska ambe enga Jobu nitamakuarhipka”.

7. Nájkirukachi iáiasï no jatsika kʼéri problema ma, ¿ambechi jatsiski para úni desde iáiasï?

⁷ Mémindu uénhekuarhini Tata Diosï Jeoba jingoni, jarhuataatijtsïni parachi úni tekaantani (Filip. 4:6; 1 Tes. 5:17). Jamberijtsï chá iáiasï no jatsika kʼéri problema ma, ¿joperu ambejtsï úsïni engajtsï ikiani jarhajka, no jánhaskani jarhani ambe úni ojtsï kuataratini jarhani? ¿Kurhakusïntsï Tata Diosï Jeobani eskaksïni jarhuataaka? Enga chá pʼindeka kurhakuni Tata Diosïni eskaksïni jarhuataaka orhepani uérakuani pauani pauani anapu problemechani, májkuentsï uaaka sánderu orhepatini enga na sánderu no sési jánhaskuarhini jauakia. Segurujtsï jauaka eska Tata Diosï sési míteska na jatinksïni jarhuataa ka néna (Sal. 27:1, 3).

8. ¿Nénajtsïni xarhatachesïni pirenchiiri ejemplu eska tekaantani iásï jarhuataakajtsïni tekaantani sánderu orhepatini? (Santiagu 1:2-4; ístu exe je imajenini).

⁸ Engachi desde iásï úska tekaantani problemeechani engachi jatsiajka, sánderu segurueuati  eskachi uaaka tekaantani jiáni enga kánikua no sési nitamakuarhinhaaka (Rom. 5:3). ¿Andichisï ísï uandajki? Uánikua erachiichaksï uandasïndi eska méni engaksï tekaantajka problema ma, sánderuksï uinhapiti jarhasïndi paraksï úni tekaantani máteru problemani engaksï jatsijka. Engaksï Tata Diosï Jeobaeri jarhuajperata jimbo újka tekaantani uandanhiata ma, imeechaksï sánderu mintsikasïndi eska ima uékasïnga jarhuataani ka indeni ambe jimbo, imeechaksï úsïndi tekaantani máteru problemani engaksï jatsijka (arhinta je Santiagu 1:2-4). Albania anapu prekursora ma enga Mira arhinhajka uandasïndi eska inde ambe ísïiska. I pirenchi uandasïndi eska ménichani ísï exesïnga enajki no nema xáni uánikua problemechani jatsiajki ísï eska ima. Enga ísï pʼikuarherani jarhajka, ima eratsentasïndi na enga xáni jarhuatakia Tata Diosï Jeoba ini últimu 20 uéxurhiniicha jimbo ka ima mismu arhikuarhisïndi: “Asï jurajku Tata Diosïni, asï ísku jatini tsïtaa iámindu ini uéxurhiniichani engari marhuakukia Tata Diosï Jeobani ka iámindu ambe engari imeeri jarhuajperata jimbo úkia orhepani uérakuni”. Chájtujtsï uaaka eratsentani iámindu ambe enga Tata Diosï Jeoba úkia paraksïni jarhuatani tekaantani. Iámu chaari mintsita jingoni mintsika je eska méni engajtsï tekaantajka problema ma, Tata Diosï exesïnga ka eskaksïni ima kóndentaaka (Mat. 5:10-12). Ka jiáni enga kánikua no sési nitamakuarhinhaaka, preparadujtsï jauakia parajtsï seguiriini tekaantani.

9. ¿Néna xarhataspi Antiokía de Siria anapu kúnguarhikua eska pʼamojpesïreenga?

⁹ Ju je eratsentani ambe engaksï nitamakuarhipka Judea anapu kristianuecha jiáni enga kʼarhingua japka. Engaksï Antiokía de Siria anapuecha mítepka ini ambe, imeechaksï pʼamojkuaspti ka úsptiksï ambe ma: ʻEratsesptiksï tántani eskaksï xáni sáni jatsikuarhepka, paraksï axakuani erachiichani engaksï Judea japkaʼ (Uku. 11:27-30). Nájkiruka ima erachiicha engaksï no sési nitamakuarhini japka iauani irekapka, Antiokía anapu erachiichaksï listu jarhaspti paraksï jarhuataani (1 Juanu 3:17, 18).

10. ¿Nénachi uaa xarhatani eskachi pʼamojkuasïnga juchaari erachiichani engaksï no sési nitamakuarhini jarhajka? (Ístu exe je imajenini).

¹⁰ Juchajtuchi uaaka pʼamojperakua xarhatani engachi mítejka eskaksï máteru kristianuecha no sési nitamakuarhixaka. Úpiringachi arini ambe úni parachi sóntku jarhuataani: arhiani orhejtsïkutiichani eskachi uékasïnga jarhuajpeni, ístuchi uaaka donasioni íntspini ka kómarhijpikuani imeechani engaksï no sési nitamakuarhini jaka (Prov. 17:17). b Pori ejemplu, 2020 jimbo, jukari 950 Grupuechaksï únhaspti para imeechani Jarhuataani engaksï no sési nitamakuarhini japka COVID-19 jimbo. Kánikuachi diosmaiamukua arhiasïnga iámindu imeechani engaksï ánchikuarhipka ini grupuecha jimbo. Na engaksï xáni pʼamojkuajka erachiichani ka pirenchiichani úspti eskaksï pákuapiringa ambe engaksï uétarhinchani japka ka ístuksï jarhuataaspti paraksï seguiriini marhuakuni Tata Diosïni. Ka jimeesïsï enga uétarhini japka, arreglariuantasptiksï kʼumanchikuechani o ménderu uaantani ka ístu imani kʼumanchikuechani para tánguarhini (terukutanta je 2 Korintu 8:1-4 jingoni).

11. ¿Nénachi kʼéri ambe arhisïni juchaari Taati auandarhu anapuni engachi pʼamojkuajka máteruechani?

¹¹ Máteru kʼuiripuechaksï exesïndi ambe engachi xáni újka para xarhatakuani juchaari erachiichani eskachi pʼamojkuasïnga. Pori ejemplu 2019 jimbo, urakani Dorian xerentaspti Kʼumanchikua Reinuerini ma, Bahamas. Engaksï erachiicha úntani japkia Kʼumanchikua Reinuerini, arhisptiksï acheetini ma enga konstruksioniiri ambe exejka eska arhiapiringa na enga xáni kobrariuapiringa para ánchikuarhita ma úkuani, acheeti arhiaspti: “Uékasïnga jarhuatani chaari kúnguarhikuani, jarhuataakaksïni makineechani jingoni, ánchikuarhiriichani jingoni ka materiali ambe jingoni. Ískujtsïni  pakatasïnga na engajtsï kaajka chaari amiguechani”. Sáno iámindu kʼuiripuechaksï no mítesti Tata Diosï Jeobani, joperu uánikuechaksï exesïndi ambe engachi újka Jeobaeri testiguecha. Kʼéri kóntperata máesti eska ambe engachi újka pʼamojperakua jimbo jarhuataasïnga máteruechani paraksï míteni Tata Diosïni “enga xáni kánikua pʼamojpejka” (Efes. 2:4).

12. ¿Andijtsïnisï prepararijki pʼamojpeni iásï para jiáni enga kánikua no sési nitamakuarhinhaaka? (Jaŋaskuecha 13:16, 17).

¹² ¿Andichisï jatsi para pʼamojperakua xarhatani jiáni enga kánikua no sési nitamakuarhinhaaka? Jimboka Biblia uandasïnga eska imeecha engaksï no apoiariuauaka gobiernuechani, problemechanksï jatsiauaka iásï ka ístu jiáni enga kánikua no sési nitamakuarhinhaaka (arhinta je Jaŋaskuecha 13:16, 17). Jamberiksï erachiicha uétarhinchaati eskachi jarhuatauaka imani ambe jingoni engaksï sánderu uétarhinchajka. Enga juchaari rei, tata Jesukristu, junguaka para jusgariuani kʼuiripuechani, uékasïngachi eska exeaka eskachi úxaka ambe ma para pʼamojkuani máteruechani, ka eskajtsïni arhiaka: “Pʼí je auandarhu anapu Reinuni” (Mat. 25:34, TNM; 25:35-40).

13. ¿Ambeksï úspi primeru siglurhu anapu kristianuecha paraksï sánderu xénchperani? (Romanos 15:7, TNM).

¹³ Primeru siglurhu, iámindu kʼuiripuechaksï mítespti eskaksï kristianuecha xénchperasïreenga. ¿Joperu fásiliipi para imeecha xénchperani? Ju je eratsentani Roma anapu kúnguarhikuani. Jimaksï mámaru járhati erachiicha jarhaspti, máruksï judiuespti engaksï ísï tʼarhexepka eska Moisésiiri Lei na uandeenga, joperu ístuksï jarhaspti máteru erachiicha engaksï máteru nasionicharhu anapuepka ka engaksï máteru jásï pʼindekuechani jatsiapka. Jamberiksï máru erachiicha jántspiriipti ka máteruecha nómbe ka ístuksï jamberi máru erachiicha jatsiapti jántspiriichani. ¿Peru ambe jarhuataapirini sánderu xénchperani nájkirukaksï iáminduecha ménderueniipka? Apostoli Pablu arini konseju íntsaaspti: “Sési jiókaa je máteruechani” (arhinta je Romanos 15:7, TNM). ¿Ambe arhikuekaxapi? Uandakuecha engaksï ixú tradusirikuarhijka “sési jiókaa je máteruechani”, arhikuekasïndi sési erokani nemani o intsïmpitiini, ísï komueska kʼuiripu ma enga sési erokajka imeo máteru nemani o enga ísï kámajka komueska imeeri amiguni ma. Pori ejemplu, Pablu arhispti Filemónini na enga jatsipka para kámani imeeri jántspirini enga Onesimu arhinheenga ka enga Filemóniiri kʼumanchikuarhu uératini sïpakuarhipka, arhispti: “Sési eronta” (Filem. 17). Ka Prisila ka Ákila sési erokaspti Apolosini nájkiruka ima no xáni uánikua ambe mítepka kristianuecheeri ambe ísï eska imeecha, ka pásptiksï imeecha jingoni (Uku. 18:26). Nájkirukaksï iámindu i kristianuecha kánikua ménderueni jásïipka, nóksï jurajkuspti eska i ambe úpiringa eskaksï nóteru sési pájperapiringia, sánderu sési, úsptiksï kánikua sési pájperani.

14. ¿Nénaksï xarhataspi Anna ka imeeri uámba eskaksï xénchaasïreenga máteruechani?

¹⁴ Juchajtuchi ístu uaaka xarhatani eskachi xénchaasïnga juchaari erachiichani engachi sési jiókaaska ka engachi imeecheeri amigu úkuarhiska. Sáno méntkisï, inde ambe uaati eskajtsïni imeechajtu sési kámaaka (2 Kor. 6:11-13). Ju je exeni ambe engaksï úkuarhinchapka Anna ka imeeri uámba engaksï misioneruepka África Occidental. Sánisï tátsekua engaksï axanhapka máteru paisi jimbo, ueenaspti jarhani COVID-19, ka nóteruksï úsptia tánguarhini erachiichani jingoni. ¿Ambe úspi i temungurhiri para xarhatakuani erachiichani eskaksï xénchaasïreenga? Bideu jimboksï uandajpaaspti paraksï arhiani eskaksï uékaxapkia míteani. I ambe mintsitarhu niárakuaspti erachiichani ka ueenasptiksï uandajpani telefonu jimbo ka mensaji axakuani Annani ka imeeri uámbani. ¿Andiksïsï xáni jánguarhintapi i misioneruecha para sánderu sési míteani ka sési kaani kúnguarhikuarhu anapuechani? Anna uandasïndi: “Juchiiti mintsitarhu pásïnga na engajtsïni xáni xénchapka erachiicha jíndeni ka ístu juchiiti familiani jiáni engachi sési o no sési ambe nitamakuarhini jarheenga. Ini ambe eratsentani jarhuatastirini parani úni ambe ma parani xarhatakuani máteruechani eskani xénchaasïnga”.

15. ¿Ambejtsïni jorhendasïni Vanessaeri ejemplu na engachi jatsika para xénchaani erachiichani? (Ístu exe je imajenini).

 ¹⁵ Uánikua kúnguarhikuecharhu, mámaru járhati erachiicha ka pirenchiichaksï jarhasti engaksï kánikua ménderueni tʼarhexeka. ¿Ambejtsïni jarhuataa sánderu xénchaani erachiichani? Exeani imeecheeri ambakiti kualidadiichani. Nueva Zelanda anapu pirenchi ma enga Vanessa arhinhajka, úkua jukanchasïreendi sési pájperani máru erachiichani jingoni kúnguarhikuarhu jimboka no tsitisïreenga na engaksï jásïipka. Peru enbesi de jarhariani, sánderu imeecha jingoni jarhasïreendi. Enga ísï úpka exespti ambe enga Tata Diosï Jeoba tsitijka ima erachiicheeri ambe. Ima uandasïndi: “Jimboka juchiiti acheeti sirkuitueri orhejtsïkuti únhaska, uánikua erachiicha jingonchi kúnguarhisïnga ka mándani erachi ménderueni jásïisti. Joperu iásï sánderu fásiliisti para ji sési pájperani máteruechani jingoni. Kánikua tsitisïnga engaksï iámindu erachiicha ménderueni jásïika ka ístu Tata Diosï Jeoba kánikua tsitisïndi indeni ambe, jimboka ima mismu juaasïnga imeeri iretarhu mámaru járhati kʼuiripuechani”. Jimajkani, ¿nénachi uaa xarhatani eskachi xénchaasïnga juchaari erachiichani? Engachi jánguarhintaska ísï exeani eska Tata Diosï Jeoba na exeajka (2 Kor. 8:24).

16. ¿Andisï xáni jukaparhakueua eskachi xénchperaaka jiáni enga kánikua no sési nitamakuarhinhaaka? (Exe je imajenini).

¹⁶ Jiáni enga kánikua no sési nitamakuarhinhaaka, kánikua jukaparhakueuati eskachi xénchauaka erachiichani. ¿Nénajtsïni kuájchakua Tata Diosï Jeoba jiáni enga kánikua no sési nitamakuarhinhaaka? Ju je eratsentani ambe enga Tata Diosï Jeoba arhipka imeeri iretani paraksï úni tsípiti pakarani jiáni enga Babilonia kʼamajkunhapiringa: “Juchiiti ireta, inchanta chiiti kuartuecharhu engaksï incharini jaka ka míkaa puerteechani engaksï tátsepani jaka. Jirikuarhi ma ratu astaka nitamaakia k’éri ikiatapu” (Is. 26:20). Jamberichi juchajtu jatsiaka para májkueni úni jiáni enga kánikua no sési nitamakuarhinhaaka. Uandakuecha “kuartuecharhu engaksï incharini jaka”, úpirindiksï kúnguarhikuechani arhikuekaani. Imani tiempuni jimbo engachi májku kʼéri jauaka juchaari erachiichani jingoni, Tata Diosïjtsïni kuájchakuati ísï eskajtsïni na aiachikia. Ísï jimbo, no solu uétarhisïndi tekaakuantani juchaari erachiichani, jatsiskachi para meru xénchaani. Engachi no ísï úska, jamberichi no uaaka tsípiti pakarani.

17. ¿Ambechi uaa úni engachi desde iásï ueenaska prepararikuarhini para jiáni enga kánikua no sési nitamakuarhinhaaka?

¹⁷ Tata Diosï Jeobaeri jurhiatikua jimbo kánikua no sési jánhaskuarhiati para iámindu kʼuiripuecha (Sof. 1:14, 15). Ka ístu para Tata Diosï Jeobaeri marhuariicha kánikua úkua jukaati, joperu engachi desde iásï ueenaska prepararikuarhini nóchi xáni uandanhiauaka ka uaakachi jarhuataani máteruechani. Tekaantskua jingoni, uaakachi orhepani uérakuni náki uéjki problemani engachi niáraaka jatsini. Ka engachi pʼamojkuauaka erachiichani, uaakachi jarhuataani imani ambe jingoni engachi uaaka ka íntsaani ambe engaksï imeecha uétarhinchaaka. Ka engachi xénchaaska erachiichani, uaakachi májku kʼéri jarhani. Tata Diosï Jeobajtsïni kóndentaati íntskuparini tsípikua para méntkisï parhakpinirhu ma enga nóteru no sési ambe úkuarhiakia ka engachi nóteru méni miántaakia no sési jásï ambe engachi nitamakuarhika (Is. 65:17).