1, 2. ¿Andiksïsï kristianuecha sáno májkuenii eska kʼéri edifisiu ma enga Tokio jaka? (1 Corintios 15:58, TNM).

 UÉXURHINI 1978 jimbo, ueenaspti únhani kʼéri edifisiu ma Tokio (Japón) enga 60 pisueriipka. Engaksï kʼuiripuecha jimeesïsï nitameenga, kurhamarhikuarhisïreendiksï sini ima edifisiu no xerekuarhentapirini enga uinhamu jenchepiringa. ¿Peru ambeksï úspi injenieruecha paraka inde edifisiu no xerekuarhentapiringa? Sésiksï uaxastaspti, ka ístu eska úpiringa manakuarhini sáni paraka no xerekuarhentapiringa enga uinhamu jenchepiringa. Pori ísï arhini, kristianuechachi májkueniiska eska inde kʼéri edifisiu. ¿Andi?

² Májkueni eska i edifisiu kristianu ma jatsisti para uiuinhasï jarhani, joperu ístu eska uaaka ixúani ka ixúani manakuarhini. Pori ejemplu, jatsisti para uiuinhasï ka sési anhaxurhitini jarhani para méntkisï úni ambe enga Tata Diosï Jeoba uandajka ka ístu kurhajchaani imeeri Leiichani (arhinta je 1 Corintios 15:58, TNM). Jatsisti para listu jarhani para ʻkurhajchaniʼ Tata Diosïni ka méntkisï ísï úni eskaksï imeeri prinsipiuecha na uandajka. Joperu ístu jatsisti para ʻkurhanguniʼ eska méntkisï enga uaaka o enga uétarhiaka, uaaka ménderueni úni ambe ma, pori ísï arhini ixúani ka ixúani manakuarhini (Sant. 3:17, Táta Diósïri Uandakua Tata Jesukristueri Aiatsperakua). I ambejtsïni jarhuataati parachi no méntku inchandimentani meru ísï uékani úni ambe ma ka níjtu ísku exeani Tata Diosïiri juramukuechani. Ini jorhenguarhikua jimbo, exeakachi nani ka nanichi jatsiski para uiuinhasï jarhani. Ístuchi exeaka sinko ambe enga Satanási úrajka parachi no kurhajchani Tata Diosïni ka na engachi uaaka orhepani uérakuni indeni ambe.

3. ¿Náki leichantsïni íntsaasïni Tata Diosï Jeoba ixú Ukuecha 15:28, 29 jimbo?

³ Tata Diosï Jeobajkusï sésikua jatsiti para Leiichani uaani ka úsïndi eska imeeri ireta sési kurhanguauaka (Is. 33:22). Pori ejemplu, primeru siglurhu anapu grupu enga orhejtsïkuauenga iámindu kúnguarhikuechani, uandaspti tanimu ambe nani engaksï jatsipiringa para uiuinhasï jarhani o kurhajchaani Tata Diosïiri Leichani. Uandaspti  eskachi no jatsiska para 1) kómarhiani diosï úkateechani o kʼuiripuechani, ka eska Tata Diosï Jeobantkuchisï jatsika para kʼéri ambe arhini, 2) eskachi jatsiska para kánikua pímbinhasï exeni iurhirini ísï eska Tata Diosï Jeoba ka 3) méntkisï kurhajchani ambe enga Biblia uandajka parachi no ísku jándikua ambe niátani (arhinta je Ukuecha 15:28, 29). ¿Ambechi uaa úni iásï parachi kurhajchani ambe enga Tata Diosï Jeoba uandajka i tanimu ambeeri?

4. ¿Ambe arhikuekasïni Tata Diosï Jeobantku kómarhini? (Jaŋaskuecha 4:11).

⁴ Nóchi kómarhiasïnga diosï úkateechani ni kʼuiripuechani; Tata Diosï Jeobantkuchisï kómarhijka. Tata Diosï juramukuasti israeliteechani eskaksï imantku kʼéri ambe arhipiringa (Deut. 5:6-10). Ka enga Noambakiti tsʼéjkupka Jesúsini, ima uandaspti eskachi Tata Diosï Jeobantkuchisï jatsika para kómarhini (Mat. 4:8-10). Ísï jimbo, nóchi kómarhiasïnga imajeniichani engaksï relijioniicha úraajka. Ístu, nóchi kʼéri ambe arhiasïnga kʼuiripuechani; nóchi diosï erataasïnga relijionirhu anapu orhejtsïkutiichani, politikuechani, imeechani engaksï famosueka deportiicharhu, imeechani engaksï pelikulecharhu xarharajka o pireriichani. Sánderu sési, Tata Diosï Jeobantkuchisï apoiarijka imani enga kueraaka iámindu ambe ka imantkuchisï kʼéri ambe arhijka (arhinta je Jaŋaskuecha 4:11).

5. ¿Andichisï kurhajchajki leini enga tsípikueri ka iurhiri ambe uandajka?

⁵ Ju je jukaparharani tsípikuani ka iurhirini komueska ambe ma enga kánikua pímbinhasïika. ¿Andi? Jimboka Tata Diosï Jeoba uandasïnga eska iurhiri tsípikuani arhikuekasïnga, ka tsípikua sési jásï regalu máesti engajtsïni ima íntskuka (Lev. 17:14). Enga Tata Diosï Jeoba primeru uelta jurajkupka eskaksï kʼuiripuecha apiringa animaliicheeri kʼuiripetani, juramukuaspti eskaksï no apiringa iurhiri (Gén. 9:4). Tátsekua Moisésiiri Lei jimbo, ménderu juramukuaspti israeliteechani eskaksï no jámapiringa iurhiri arhani (Lev. 17:10). Ka primeru siglurhu, úspti eska grupu enga orhejtsïkuauenga iámindu kúnguarhikuechani arhiapiringa iámindu kristianuechani eskaksï no jámapiringa iurhiri arhani (Uku. 15:28, 29). Juchajtuchi kurhajchasïnga leini jiáni engachi exeni jarhajka náki tratamientu úrani engachi pʼamenchani jarhajka. b

6. ¿Ambejtsïni jarhuataa parachi kurhajchaani Tata Diosï Jeobaeri juramukuechani engaksï ísku jándikueri ambe uandajka?

⁶ Kánikuachi jánguarhintasïnga parachi kurhajchani ambe enga Tata Diosï Jeoba uandajka ísku jándikueri ambe (Ebr. 13:4). Apostoli Pablu ini konsejujtsïni íntskusïndi: “Ú je eska uarhiaka iámindu parhakpini anapu ambe enga chaari mintsitarhu jaka”. Ini xáni ambakiti uandakuecha jingontsïni arhisïndi eskachi uaaka ambe enga xáni uétarhiaka parachi kénditani no sési jásï ambe engachi tsitijka. Pori ejemplu, nóchi exesïnga o imani ambe úni enga úpiringa eskachi ísku jándikua ambe niátaaka (Kol. 3:5; Job 31:1). Ka engachi uékani jarhajka úni ambe ma enga no sési jaka, sóntkuchi jánguarhintasïnga máteru ambe eratseni o úni, parachi no úni imani ambe enga uaaka eskachi nóteru sési pájperaakia Tata Diosï jingoni.

7. ¿Ambechi eratsetixaki úni, ka andi?

⁷ Tata Diosï Jeoba uékasïndi eskachi “mintsita jingoni” kurhajchaaka (Rom. 6:17). Imeeri juramukuechaksï jindeesti parajtsïni méntkisï sési nicheni juchantsïni ka nóchi uaaka mójtakuani (Is. 48:17, 18; 1 Kor. 6:9, 10). Uékasïngachi jánguarhintani xáni eskachi xáni uaaka parakajtsïni Tata Diosï sési exeaka, ka májkuenchi úni eska salmueri karari ma na uandapka: “Méntkisï jánguarhintaaka kurhajchaani chiiti juramukuechani asta kʼamarhutani jamberi” (Sal. 119:112). Ísïisti, Satanási jánguarhintaati parajtsïni chkérani parachi nóteru uiuinhasï jarhania. ¿Ambe ka ambe úrasïni ima parajtsïni chkérani?

8. ¿Andisï Satanási jánguarhintajki parachi no sési kánhani?

⁸ Úsïndi eskachi no sési kánhaaka. Satanási úsïndi eskachi no sési kánhaaka ka eskachi no sési  pʼikuastanhaaka para úni eskachi nóteru uiuinhasï jauakia. Ambe enga ima uéjka, jindeesti eskachi jucha méntku nóteru sési pájperaakia Tata Diosï Jeoba jingoni (1 Ped. 5:8). Primeru siglurhu anapu kristianuechanksï arhiaspti eskaksï no sési úkuapiringa, atasptiksï ka uándikuasptiksï, jimboka i kristianuechaksï uékasïreendi kurhajchani Tata Diosïni (Uku. 5:27, 28, 40; 7:54-60). Ka ini jurhiatikuecha jimbo, Satanási ístu úsïndi eskachi no sési kánhaaka. Pori ejemplu, na engaksï xáni no sési kánhani jaka juchaari erachiicha Rusia anapuecha ka máteru naniisï anapuecha, xarhatasïndi eska i ambe ísïiska. Ístu, kʼuiripuechaksï mámaru ambe úsïndi paraksï no sési kaani uánikua juchaari erachiichani.

9. Uandanta je ejemplu ma enga xarhatajka andichisï jatsi para jingontku jarhani, imani ambe jingoni engachi no erokuarhini jarhajka.

⁹ Imani ambe úrasïndi engachi jucha no erokuarhini jarhajka. Satanási no solu úsïndi eskachi no sési kánhaaka, sino ístu máteru ambe úsïndi parajtsïni enganiarini (Efes. 6:11). Ju je exeni ambe enga nitamakuarhipka Robert jiáni enga kʼéri operasioni ma úminhapiringa. Ima mátirku arhiaspti doktoriichani eska no jatantapiringa iurhiri. Doktori enga operaripiringa arhispti eska respetaripiringa ambe enga Robert uandapka. Peru ima chúrikua ante de operarinhani, enga na níntapkia imeeri familia, ima enga anestesia jatsikupiringa niraspti exeni ka arhispti eskaksï no jatsirantapiringa iurhiri, joperu eskaksï jima jatsipiringa enga ma repentku uétarhipiringa. Jamberi eratsepti eska jimboka Robertiiri familia nóteru jima jarhaspkia, ima uékapiringa iurhiri jatantani. Peru Robert eratsetixaptia no jatantani iurhiri ambe uéjki úkuarhini.

10. ¿Andijtsïnisï uaa kánikua no sési úchini ísï eratseni eska parhakpinirhu anapuecha? (1 Korintu 3:19, 20).

¹⁰ Uékasïndi eskachi májkueni eratseaka eska parhakpini anapuecha. Engachi jucha ueenaska májkueni eratseni eska imeecha, úpiringachi jurajkuni Tata Diosï Jeobani ka nóteruchi kurhajchania imeeri juramukuechani (arhinta je 1 Korintu 3:19, 20). Sáno méntkisï, “parhakpini anapu jorhengua” úsïndi eskachi jucha imani ambe uaaka engachi tsitijka, peru enga Tata Diosï no sési exejka. Ju je exeni ambe enga úkuarhinchapka Pérgamu ka Tiatira anapu kúnguarhikua. Máru kristianuechaksï májkueni eratsesïreendia eska imeecha engaksï ísku jándikua ambe niáteenga ka engaksï diosï úkateechani kómarhiauenga. Jesúsi uinhamu xukaaspti ini tsimani kúnguarhikuechani jimbokaksï ísku jándikua ambe niátaxapka (Jaŋ. 2:14, 20). Ka ini jurhiatikuechani jimbo, kʼuiripuechaksï uékasïndi eskachi juchajtu májkueni eratseaka eska imeecha. Jamberiksï juchaari familiariicha o imeecha engachi jucha míteaka, arhiatijtsïni eskachi uaaka ambe engajtsïni juchaari mintsita arhijka ka eskachi no kurhajchauaka Tata Diosï Jeobaeri juramukuechani. Jamberijtsïni arhijti eska no no sési jarhaska úni ambe engachi jucha uékaaka ka eskaksï Biblieri juramukuecha nóteru marhuasïngia iásï.

11. ¿Ambechi no jatsiski para úni?

¹¹ Jamberichi ménichani eratsejka eskajtsïni Tata Diosï Jeoba jatsipiringa parajtsïni sánderu sési arhistachini ima ambeeri engachi jatsika para úni. Jamberichi asta jucha mismu uékapiringa jukari ambe jatsikuntani ima ambeeri enga ʻkarakata jakaiaʼ (1 Kor. 4:6). Jesúsiiri jurhiatikuecha jimbo, relijioniiri orhejtsïkutiichaksï pekarispti engaksï indeni ambe úpka. Imeechaksï jukari ambe jatsikuntaspti Leirhu, ima ambe engaksï imeecha újtsïkukuarhepka, ka inde ambe úspti eskaksï kʼuiripuecha úkua jukanchapiringa kurhajchani Tata Diosïni (Mat. 23:4). Joperujtsïni Tata Diosï Jeoba imeeri Karakatani jimbo ka imeeri kúnguarhikuani jimbo arhisïndijtsïni ambe engachi meru jatsika para úni. No uétarhisïndi eskachi jucha sánderu ambe jatsikuntaaka (Prov. 3:5-7). Ísï jimbo, juchachi no jukari ambe jatsikuntasïnga ambe enga Bibliarhu karakata jaka ka nijtuchi újtsïkukuarheajki leiichani solu para máteruechani arhiani ambe engaksï jatsika para úni.

12. ¿Ambe úrasïni Satanási paraksï kʼuiripuecha chkuanderakua ambe jakajkuni?

¹² Chkuanderakua ambe úrasïndi. Satanási úraasïndi jorhenguarhikuechani ka “chkuanderakua  ambe [...] enga no marhuajka” para enganiariuani kʼuiripuechani ka paraksï arhukurhitini jarhani (Kol. 2:8). Pori ejemplu, primeru siglurhu Satanási úraspti ambe engaksï kʼuiripuecha jorhentpienga ka ístu judiuecheeri jorhenguarhikuechani engaksï no Bibliarhu pʼitakata japka. Ístu, úspti eskaksï kʼuiripuecha jakajkupiringa eskaksï kristianuecha jatsispka para útasï úni ambe enga Moisésiiri Lei uandeenga. Inde chkuanderakua ambe úspti eskaksï kʼuiripuecha nóteru kasu úpiringa ambakiti jánhaskakuani enga Tata Diosï Jeoba íntspijka. Iásïjtu, Satanási úraasïndi notisiechani ka redesi sosialiichani para chkuanderakua ambe etsakuni engaksï politikuecha uandajka. Pandemia COVID-19 jimbo uánikua chkuanderakua ambe uandanhaspti. c Joperu ima Jeobaeri testiguecha engaksï úpka ambe enga organisasioni uandapka, nóksï xáni uánikua problemeechani jatsiaspti ka nijtuksï xáni uandanhiapi eska imeecha engaksï jakajkupka ini chkuanderakuechani (Mat. 24:45).

13. ¿Andichisï no jatsi para jurajkuni eskajtsïni ambe ma ójkutaaka parachi imani ambe úni enga sánderu uétarhijka?

¹³ Úrasïndi imani ambe enga no xáni jukaparhakua ambeeka. Nóchi jatsiska para mirikurhini ambesï sánderu uétarhijka eska ma uaaka (Filip. 1:9, 10). Ima ambe engachi pauani pauani újka komu tʼireni, itsïmani, tsípikuarhini ka ánchikuarhini, úpirindijtsïni ójkutani parachi nóteru exenia ambe enga meru jukaparhakueka (Luk. 21:34, 35). Ístu, pauani pauanchi kurhaasïnga ka exeni eskaksï kʼuiripuecha marcheechani uaasïnga ka na engaksï méntku arhirperani jarhajka politikuecha. Nóchi jatsiska para jurajkuni eska i ambejtsïni ójkutaaka, jimboka inde ambe úpiringa úni eskachi ueenapiringa apoiariuani indeni kʼuiripuechani juchaari eratsekuarhu uératini. Satanási úrasïndi ini sinko ambe engachi exekia parachi nóteru uékania úni imani ambe enga sési jaka. Peru ju je exeni ambe engajtsïni jarhuataaka parachi úni orhepani uérakuni ini ambe ka parachi méntkisï uiuinhasï jarhani.

14. ¿Ambejtsïni jarhuataa méntkisï uiuinhasï jarhani parachi no jurajkuni Tata Diosï Jeobani?

¹⁴ Ju je eratsentani andichisï aiakukuarhi ka itsï atakuarhini. Úspkachi ini ambe jimbokachi uékasïreenga apoiarini Tata Diosï Jeobani. Miánta je ambe engaksïni jarhuataka parajtsï seguru jarhani eska i jindeeska jurhimbikua. Chájtsï niáraska míteni Tata Diosï Jeobani ka ísï exeni komueska chaari Taati auandarhu anapu, ístujtsï niáraska janhanharhini ka xénchani. Sánhantsï arhiska mintsikani ka  i ambeksïni jarhuatasti parajtsï móantani chaari pekaduecheeri. Chájtsï jurajkuska imani ambe enga Tata Diosï Jeoba kurhunhijka ka ueenaspkajtsï úni imani ambe enga ima sési exejka. Ístujtsï kánikua sési pʼikuarheraspka exeni na engaksïni Tata Diosï Jeoba puáchentaka (Sal. 32:1, 2). Ueenaspkajtsï tánguarhikuecharhu nirani ka aianguani máteruechani ambakiti ambe engajtsï jorhenguarhini japka. Iásï engajtsï aiakukuarhekia Tata Diosïni ka itsï atakuarhini, jámaxakajtsï indeni xanharu jimbo enga tsípikuarhu pájpejka ka eratsetixakajtsï méntkisï jimini jámani (Mat. 7:13, 14).

15. ¿Nénajtsïni jarhuatasïni jorhenguarhini Tata Diosïiri Uandakuani ka eratsentani ambe engachi arhintajka?

¹⁵ Ju je jorhenguarhini Tata Diosïiri Uandakuani ka eratsentani indeeri ambe. Paraka anhatapu ma uiuinhasï jauaka, uétarhisïndi eskaksï sïranguecha iauani inchatseaka. Sáno májkueni, juchajtuchi uétarhinchasïnga iauani inchaskuani juchaari sïranguechani, i ambe arhikuekasïndi eskachi jatsiska para kánikua mintsikani Tata Diosïiri Uandakuani parachi uiuinhasï jarhani. Enga anhatapu ma na sánhani arhini jarhajka kʼéni, imeeri sïranguechajtuksï kʼésïndi ka iauanksï inchatsesïndi. Engachi jucha jorhenguarhijka ka eratsentani Bibliani, sánderuchi mintsikasïnga Tata Diosïni ka sánderuchi seguru jarhasïnga eska ambe engajtsïni Tata Diosï jorhendajka sánderu ambakiti ambeeska (Kol. 2:6, 7). Ju je eratsentani na enga ióntki marhuakuapka Tata Diosï Jeobaeri marhuariichani engaksï imeecha úpka ambe enga ima arhiapka, engaksï kurhajchapka imeeri konsejuechani ka na enga kuájchakuapka. Pori ejemplu, enga Esekieli jánhaskakua ma exepka, jingontku exespti na enga ánjeli ma sési tsʼéritani japka templuni. I jánhaskakua, úspti eska Esekieli sánderu mintsikapiringa Tata Diosïni. Ístujtsïni ambakiti ambe jorhendasïndi na engachi jatsika para kurhajchaani Tata Diosï Jeobaeri juramukuechani parachi ísï kómarhini eska ima na uéjka (Ezeq. 40:1-4; 43:10-12). d Juchantsïntujtsïni kánikua marhuachesïndi engachi arhutajka tiempu parachi jorhenguarhini ka eratsentani ima ambeeri enga úkua jukaka para kurhanguni Bibliarhu.

16. ¿Néna jarhuataspi Robertini uiuinhasï mintsita ma jatsini? (Salmo 112:7).

¹⁶ Ju je úni eska juchaari mintsita uiuinhasï jauaka. Pirekua ma jimbo, rei Dabidi uandaspti eska méntkisï xénchapiringa Tata Diosï Jeobani. I ambe uandaspti: “Oh Tata Diosï, juchiiti mintsita uiuinhasï jarhasti” (Sal. 57:7). Juchajtuchi uaaka úni eska juchaari mintsita uiuinhasï jauaka ka eska mintsikaaka Tata Diosï Jeobani (arhinta je Salmo 112:7). Ju je exeni ménderu Robertiiri ejemplu,  imeeri engachi párrafu 9 jimbo uandaka. ¿Ambe jarhuataspi para méntku iámu imeeri mintsita jingoni mintsikani Tata Diosïni? Engaksï arhipka eskaksï jimajkisï jatsipiringa iurhiri enga ma repentku uétarhipiringa, ima uandaspti eska enga uétarhipiringa para iurhiri jatantani, eska ima sóntku uéntapiringa ospitalirhu uératini. Robert uandantasïndi: “Sési mítetixapkia ambe engani úpiringa. No sáni chéxapka ambe enga úpiringa úkuarhini”.

17. ¿Ambechi jorhenguarhisïni Robertiiri ejemplu jingoni? (Ístu exea je imajeniichani).

¹⁷ Robert no erokuarhispti astaka ospitalirhu japiringa para ima uiuinhasï jarhani. Ima tʼuini úspti ambe ma paraka méntkisï kurhajchapiringa Tata Diosïni. Orheta, mintsita jingoni uékasïreendi sési pʼikuastani Tata Diosï Jeobani. Segundu, ima jorhenguarhisptia Bibliarhu ka juchaari publikasioniicharhu na enga exejka Tata Diosï Jeoba tsípikuani ka iurhirini. Ka últimu, seguru jarhaspti eska Tata Diosï Jeoba kóndentapiringa enga ima kurhajchaapiringa imeeri juramukuechani. Májkueni eska Robert juchajtuchi uaaka úni eska juchaari mintsita uiuinhasï jauaka náki uéjki tsʼéjkukua ma engachi jatsiaka.

18. ¿Ambejtsïni jorhendasïni Barakiiri ejemplu? (Ístu exe je dibujuni enga ueenakuarhu jaka i rebistarhu).

¹⁸ Ju je mintsikani Tata Diosï Jeobani. Ju je eratsentani juesi Barakini ka na enga xáni sési nikupka enga kurhajchapka Tata Diosï Jeobani. Imani jurhiatikuecha jimbo israeliteechaksï no listu jarhaspti paraksï nirani uarhipeni. Nóksï jatsiaspti eskuduechani ni lanseechani. Nájkiruka ísïipka, Tata Diosï Jeoba arhispti Barakini eska nipiringa uarhipeni Sísara jingoni ka imeeri ejersitu jingoni enga Kanaáni anapuepka. Imeechaksï sési preparadu jarhaspti ka uánikua armeechanksï jatsiaspti (Juec. 5:8). Profetisa Débora arhispti Barakini eska kétsentapiringa juáta Tabori uératini para pákua niántani ka jima uarhipeni Sísara jingoni ka imeeri 900 karru guerreriicha jingoni. Nájkiruka sánderu úkua jukapiringa para israeliteecha jima uarhipeni enga pareju jándepka imani sondaduecha jingoni engaksï karruechani káuenga, Baraki kurhajchaspti Tata Diosïni. Engaksï jamberi sondaduecha kétseni japka juátarhu uératini, Tata Diosï Jeoba úspti eska uinhamu janipiringa. Karruechaksï atsïmurhu mátsespti ka Tata Diosï Jeoba úspti eska Baraki andapiringa (Juec. 4:1-7, 10, 13-16). Ka Tata Diosï Jeoba májkueni uaati úni juchantsïni jingoni. Engachi jucha mintsikaska ka engachi úska ambe engajtsïni arhijka imeeri organisasioni jimbo, uaakachi andani (Deut. 31:6).

19. ¿Andijtsïsï uéjki méntkisï uiuinhasï jarhani?

¹⁹ Enga jamberi i parhakpini kʼamaraaka, jatsiakachi para seguiriini jarhani jánguarhintani méntkisï uiuinhasï jarhani (1 Tim. 6:11, 12; 2 Ped. 3:17). Méntkuchi no sáni uékasïnga eskajtsïni chkéraaka na engajtsïni no sési kámajka kʼuiripuecha, ima ambe engachi no erokuarhini jarhajka, na engaksï eratsejka kʼuiripuecha, chkuanderakua ambe ka ni ima ambe enga no jukaparhakua ambeeka (Efes. 4:14). Ju je méntkisï uiuinhasï jarhani ka sési anhaxurhitini. Ka ístu méntkisï eratsetini jarhani xénchani Tata Diosï Jeobani ka kurhajchaani imeeri leichani. Joperuchi ístu jatsiska para kurhanguni ka no jukari ambe uékani úni. Máteru jorhenguarhikua jimbo, exeakachi eska Tata Diosï Jeoba ka Jesúsi ambakiti ejemplu máeskaksï jimbokaksï imeecha kurhangusïnga ka nóksï inchandimentasïndi.