SEMANA 30
PIREKUA 36 Ju je kuájchakuni juchari mintsitani
Ambe engachi jorhenguarhijka Israeli anapu reiicheeri
“Chájtsï ménderu exeaka eska no májkueniska jurhimbiti ma ka no sési úri ma, ima enga marhuakujka Tata Diosïni ka ima enga no marhuakujka” (MAL. 3:18).
AMBE ENGACHI JORHENGUARHIAKA
Exeakachi na enga Tata Diosï Jeoba jusgariauenga Israeli anapu reiichani ka na engajtsïni inde ambe jarhuataaka kurhanguni ambechi jatsiski para úni ini jurhiatikuechani jimbo parachi jaiapanherantani Tata Diosï Jeobani.
1, 2. ¿Ambe uandantasïni Biblia máru Israeli anapu reiicheeri?
BIBLIA jukari 40 achamasïichani uandasïndi engaksï Israeli juramupka, ka sésijtsïni aiangusïndi na engaksï irekapka ka ambe engaksï úpka. a Pori ejemplu, uandantasïndi eskaksï máru ambakiti reiicha no sési ambe niátaspka. Ju je exeni Dabidiiri ambe. Míteskachi eska ima ambakiti rei máeska, jimboka Tata Diosï Jeoba uandaspka: “Imarini mintsita jingoni kurhajchasïreendi jíndeni jimboka imani ambejkusï ueendi enga ji sési exejka” (1 Rey. 14:8). Joperu niáraspti ísku jándikua ambe niátani uarhiti ma jingoni enga uambuchatini japka, ka ústi eska imeeri uámba guerrarhu ma uándikunhapiringa (2 Sam. 11:4, 14, 15).
2 Ka ístuksï jarhaspti reiicha engaksï no ambakepka joperu engaksï ambakiti ambe úpka. Exeakachi Reoboamiiri ambe. Míteskachi eska Tata Diosï Jeoba ísï exespka komueska rei ma enga jurajkupka imani jimboka ‘imani ambe úspka enga no sési japka’ (2 Crón. 12:14). Joperu enga Tata Diosï Jeoba arhipka eska no uarhiperapiringa Israeli anapu 10 tribuecha jingoni ka eska jurajkuapiringa eskaksï imeecha erakupiringa imeecheeri reini, ima kurhajchaspti Tata Diosï Jeobani. Ístu úspti eska uánikua ireteecha uinhapiti japiringa para kuájchakuni iámu Israelini imeeri ikiatspitiicheeri (1 Rey. 12:21-24; 2 Crón. 11:5-12).
3. ¿Ambechi úpirini kurhamarhikuarhini, ka ambechi exea ini jorhenguarhikua jimbo?
3 Jiájkani engaksï iámindu reiicha niárapka sési ambe úni joperu ístu no sési ambe, ¿andisï Tata Diosï Jeoba uandeeni eskaksï máru sési marhuakuspka ka máteruecha nómbe? Míteni mókuntskuani, jarhuataatijtsïni kurhanguni nénachi uaa jaiapanherantani Tata Diosï Jeobani. Ini jorhenguarhikua jimbo, exenchi jauaka tanimu ambe enga Tata Diosï Jeoba exeenga para úni jusgariuani Israeli anapu reiichani: sinksï mintsita jingoni xénchasïreeni, sinksï móantasïreeni imeecheeri pekaduecha jimbo ka sinksï ísï kómarhisïreeni Tata Diosï Jeoba eska ima na jaiapanhenteenga.
XÉNCHASÏREENDIKSÏ TATA DIOSÏ JEOBANI IÁMU MINTSITA JINGONI
4. ¿Andiksïsï no májkueniipi ima reiicha engaksï no méni jurajkupka Tata Diosïni, imeecha jingoni engaksï jurajkupka?
4 Ima reiicha engaksï no méni jurajkupka Tata Diosï Jeobani xénchasïreendiksï iámu mintsita jingoni. b Pori ejemplu, ambakiti rei Jeosafati “jirinhantaspti Tata Diosï Jeobani iámu imeeri mintsita jingoni” (2 Crón. 22:9). Ka Biblia ini ambe uandasïndi Josíasiiri ambe: “No ma rei jarhaspti antesi enga ísïika eska ima, enga andarhientapka Jeobani iámu imeeri mintsita jingoni (2 Rey. 23:25). Joperu rei Salomóni, no sési jásï ambe niátaspti jiáni enga kʼamarhuni jámeengia imeeri juramukua, “no marhuakuspti Tata Diosï Jeobani iámu imeeri mintsita jingoni” (1 Rey. 11:4). Ka ístu Abiyami, máteru rei enga no kurhajchapka, Biblia ini ambe uandasïndi: “No marhuakuspi imeeri Tata Diosï Jeobani iámu imeeri mintsita jingoni” (1 Rey. 15:3).
5. ¿Ambe arhikuekasïni marhuakuni Tata Diosï Jeobani iámu mintsita jingoni?
5 ¿Ambe arhikuekasïni iámu mintsita jingoni marhuakuni Tata Diosï Jeobani? Arhikuekasïndi eskachi xénchasïnga ka respetariini ka no soluchi ísï úsïnga jimbokachi míteska eskachi jatsiska para ísï úni o eska sési jarhaska. Ístu arhikuekasïndi eskachi jatsiska para jánguarhintani méntkisï xénchani Tata Diosï Jeobani.
6. ¿Ambechi jatsiski para úni parachi xénchani Tata Diosï Jeobani iámu mintsita jingoni? (Proverbios 4:23; Mateu 5:29, 30).
6 ¿Nénachi uaa májkueni úni eska ima reiicha engaksï no méni jurajkupka Tata Diosï Jeobani ka iámu mintsita jingonksï xénchani? Uaakachi májkueni úni engachi kénditaska iámu ambe enga uaaka úni eskachi nóteru iámu mintsita jingoni marhuakuakia ni xénchani Tata Diosï Jeobani. Pori ejemplu, jatsiskachi para jingontku jámani imani ambe jingoni engachi exejka o úni, no jukari uékani jatsikuarhikuekani ka ístu jingontku erakuani juchaari amiguechani. Ísï jimbo, engachi exeaka eskachi nóteru xáni xénchasïngia Tata Diosï Jeobani, jatsiskachi para sóntku mójtakuni na engachi eratsejka ka jámani paraka inde ambe no uaaka eskachi nóteru xénchaakia Tata Diosï Jeobani (arhinta je Proverbios 4:23; Mateu 5:29, 30).
7. ¿Andichisï no jatsi para jiókuarhini imani ambe enga uaaka úni eskachi nóteru xénchaakia Tata Diosï Jeobani?
7 Ísï jimbo, ju je seguiriini marhuakuni Tata Diosï Jeobani iámu mintsita jingoni. Engachi no jingontku jauaka, úpiringachi eratseni eskajtsïni parhakpini anapu ambe no no sési úchiakia jimbokachi okupadu jarhaska Tata Diosïni marhuakuni. Parachi úni sánderu sési kurhanguni, eranhaska je eskajtsï limpiariskia chaari kʼumanchikuani, ¿a no eskachi no mítatini jurajkuapiringa bentaneechani nijtu puerteechani paraka tʼupuri no inchaaka? I ambejtsïni jorhendasïndi eska no solu uétarhisïnga marhuakuni jarhani Tata Diosïni para úni méntkisï sési pájperani imani jingoni, sino ístu uétarhisïndi eskachi no jurajkuaka eska parhakpini anapu ambe ísï inchaaka juchaari mintsitarhu komueska tʼupuri enga kʼumanchikuarhu inchajka ka úni eskachi nóteru iámu mintsita jingoni xénchaakia Tata Diosï Jeobani (Éfes. 2:2).
MÓANTASPTIKSÏ IMEERI PEKADUECHEERI
8, 9. ¿Ambe úspi rei Dabidi ka Esekíasi engaksï jurhimberanhantapka? (Ístu exe je imajenini).
8 Eskachi na exekia, rei Dabidi kʼéri pekadu ma niátaspti. Joperu enga Natáni nípka uandontskuarhekuni, Dabidi kaxumbikua xarhataspti ka móantaspti (2 Sam. 12:13). Ambe enga karapka Salmo 51 jimbo, xarhatasïndi eska sésimindu móantaspka. No ísku úkuarhixapti nomasi para Natáni jingoni sési pakarani ka para no kastigarinhani (Sal. 51:3, 4, 17, enkabesamientu).
9 Ístu rei Esekíasi niáraspti no sési ambe niátani. Biblia uandasïndi: “Imeeri mintsita niáraspti kʼéramakuarhini, ka inde ambe úspti eska Tata Diosï ikiapiringa imani jingoni, Judá jingoni ka Jerusaléni jingoni” (2 Crón. 32:25). ¿Joperu andisï ueenapi kʼéramakuarhini? Jamberi jimboka Tata Diosï Jeoba íntskuspka jatsikuarhekua ambe, jarhuataspti andaani Asiria anapuechani o jamberi jimboka ambakerantaspka enga kʼéri pʼamenchakua ma kamani japka. Jamberi iámindu inde ambe úpti eska exeraapiringa ambe enga xáni jatsikuarhepka Babilonia anapuechani. Jimbosï profeta Isaíasi jatsipti para arhini eska Tata Diosï Jeoba ikiaxapka imani jingoni (2 Rey. 20:12-18). Májkueni eska Dabidi, Esekíasi xarhataspti kaxumbikua ka móantaspti (2 Crón. 32:26). Ka indeni ambe jimbo, Tata Diosï Jeoba uandaspti eska ima ‘imani ambe úsïreenga ambe enga sési japka para Tata Diosï Jeoba’ (2 Rey. 18:3).
Rei Dabidi ka rei Esekíasi, xarhatasptiksï eskaksï kaxumbitiispka ka móantasptiksï engaksï jurhimberanhantapka pekaduechani jimbo. (Exea je párrafuechani 8 ka 9).
10. ¿Ambe úspi rei Amasíasi engaksï arhipka eska no sési jarhaspka ambe enga úni japka?
10 Peru Amasíasi Judá anapu rei, úspti ambe enga sési japka “peru no iámu mintsita jingoni” (2 Crón. 25:2). ¿Ambe no sési úspi? Ísï tátsekua enga Tata Diosï Jeoba na jarhuatapkia andaani edomiteechani, Amasíasi ueenaspti jima anapu diosïichani kómarhiani. c Tátsekua enga Tata Diosïiri profeta ma nípka arhini eska no sési jarhaspka ambe enga úni japka, rei Amasíasi no kasu úkuspti ka no kurhajchaspti (2 Crón. 25:14-16).
11. Eska na arhijka 2 Korintu 7:9, 11, ¿ambechi jatsiski para úni parajtsïni Tata Diosï Jeoba puáchentani? (Ístu exea je imajeniichani).
11 ¿Ambechi jorhenguarhisïni i ejempluecheeri? Eskachi jatsiska para móantani juchaari pekaduecheeri ka nóteru imani ambe úni. Ka engajtsïni orhejtsïkutiicha niárapiringa jurhimberantani asta imani ambe jimbo enga para jucha no xáni jukaparhakueuaka, ¿ambechi uaa? Nóchi jatsiska para eratseni eskajtsïni Tata Diosï Jeoba nóteru xénchasïngia o eskajtsïni orhejtsïkutiicha uékasïnga no sési pʼikuastani. Jimboka asta ima reiicha engaksï ambakiti ambe ueenga uétarhinchasptiksï konseju ka eskaksï jurhimberanhantapiringa (Ebr. 12:6). Ísï jimbo, engachi arhinhaska eskachi no sési úxaka ambe ma, ¿ambechi jatsiski para úni? 1) kaxumbikua xarhatani, 2) mójtakuni ambe enga xáni uétarhiaka ka 3) seguiriini marhuakuni Tata Diosï Jeoba iámu mintsita jingoni. Engachi móantaaka juchaari pekaduecheeri, Tata Diosï Jeobajtsïni puáchentaati (arhinta je 2 Korintu 7:9, 11).
Engachi jurhimberanhantaska, jatsiskachi para 1) kaxumbikua xarhatani, 2) mójtakuni ambe enga xáni uétarhiaka ka 3) seguiriini marhuakuni Tata Diosï Jeobani iámu mintsita jingoni. (Exe je párrafu 11). f
SÉSIKSÏ MARHUAKUSPTI TATA DIOSÏNI
12. ¿Ambeksï jánguarhintasïreeni úni ambakiti reiicha ka engaksï no úpka máteru reiicha?
12 Ambakiti reiichaksï kómarhisïreendi Tata Diosï Jeobani ísï eska ima na jaiapanhenteenga ka úsïreendiksï eska iámu ireta májkueni úpiringa. Ka eskachi na exekia imeechajtuksï ménichani no sési ambe úspti, joperuksï Tata Diosï Jeobantkusï kómarhiendi ka jánguarhintasïreendiksï eskaksï nóteru japiringia diosï úkateecha iretarhu. d
13. ¿Andisï Tata Diosï Jeoba ísï exepi Akabi komueska rei ma enga no sési ambe niátapka?
13 ¿Andisï Tata Diosï Jeoba jusgariuapi máru reiichani? Nájkirukaksï no sési ambe ueenga, ménisïksï niáraspti sáni no sési pʼikuarherani. Pori ejemplu enga rei Akabi mítepka eska Naboti imeeri kulpa jimbo uándikunhaspka, ima sáni xarhataspti kaxumbikua ka no sési pʼikuarheraspti (1 Rey. 21:27-29). Ístu uaaspti uánikua ireteechani ka uánikua guerrechani andaaspti (1 Rey. 20:21, 29; 22:39). Joperu Akabi úspti ma ambe ka no méni móantaspti, imeeri uarhiitini kurhajchaspti ka úspti eskaksï kʼuiripuecha diosï úkateechani kómarhiapiringa (1 Rey. 21:25, 26).
14. a) ¿Andisï Tata Diosï Jeoba ísï exepi rei Reoboamini komueska rei ma enga no sési ambe úpka? b) ¿Ambeksï úspi uánikua reiicha engaksï no kurhajchapka Tata Diosï Jeobani?
14 Ju je exeni rei Reoboamiiri ambe enga ístu no kurhajchapka Tata Diosï Jeobani. Eskachi na exekia párrafu 2 jimbo, ima uánikua ambakiti ambe úspti. Joperu enga kʼéri rei máepkia, nóteru kurhajchasptia Tata Diosïiri Leini ka ueenaspti diosï úkateechani kómarhiani (2 Crón. 12:1). Ka jiáni uératini, méni diosï úkatechani kómarhiasïreendi ka méni Tata Diosï Jeobani (1 Rey. 14:21-24). No solu rei Reoboami ka Akabi, jurajkusptiksï relijioni jurhimbitini. Ístuksï uánikua reiicha niáraspti nóteru kurhajchania Tata Diosï Jeobani ka ueenasptiksï diosï úkateechani kómarhiani ka úsptiksï eskaksï máteruechajtu májkueni úpiringa. Ísï jimbo, para Tata Diosï Jeoba sési exeni reini ma, rei jatsisïreendi para ísï kómarhini jarhani Tata Diosï eska ima na uékeenga.
15. ¿Andisï Tata Diosï Jeoba xáni jukaparharajki eskachi sési marhuakuaka?
15 ¿Andisï xáni jukaparhakuepi para Tata Diosï Jeoba eskaksï sési marhuakupiringa? Orheta, paraksï jarhuataani kʼuiripuechani ísï kómarhini Tata Diosï Jeobani eska ima na jaiapanhenteenga, jimboka engaksï kʼuiripuecha kómarhiauenga máteru diosï úkatechani, i ambe úsïreendi eskaksï ístu máteru kʼérati pekaduechani niátaapiringa ka no sésiksï kaani máteruechani (Os. 4:1, 2). Ístu, jimbokaksï israeliteecha ka reiicha aiakukuarhetixapka solu Tata Diosï Jeobani kómarhini ka engaksï tátsekua niáreenga diosï úkateechani kómarhiani, Biblia uandasïndi eska inde ambe ísïispka enajkiksï ísku jándikua ambe niáteeni (Jer. 3:8, 9). Enga kʼuiripu ma ísku jándikua ambe niátajka, kánikua no sési úkusïndi imeeri uámbani o témbani. Májkueni, enga nema aiakukuarhejkia Tata Diosï Jeobani ka tátsekua imani ambe úni enga relijioni no jurhimbiti újka, májkueni no sési pʼikuastasïndi Tata Diosï Jeobani (Deut. 4:23, 24). e
16. ¿Andisï para Tata Diosï Jeoba no májkuenii ambakiti kʼuiripu ma ka eska no sési úri ma?
16 ¿Ambechi jorhenguarhisïni? Eskachi no ma ambe uaaka enga relijioni no jurhimbitiirika, sino eskachi jatsiska para ísï kómarhini Tata Diosï eska ima na jaiapanhentajka ka jánguarhintani marhuakuni. Profeta Malakíasi no sáni chéparini uandaspti eska Tata Diosï Jeoba sési míteska né ambakiti kʼuiripu máeski ka né nómbe. Ima uandaspti: “Chájtsï ménderu exeaka eska no májkueniiska jurhimbiti ma ka no sési úri ma, ima enga marhuakujka Tata Diosïni ka ima enga no marhuakujka” (Mal. 3:18). Uékasïngachi eskajtsïni Tata Diosï Jeoba ísï exeaka eska ambakiti kʼuiripu ma, jimbochisï jatsikachi para jingontku jámani jimbokachi imperfektueska ka niárasïngachi no sési ambe niátani asta jamberi jurajkuni Tata Diosïni. Ka kʼéri pekadu máesti jurajkuni Tata Diosï Jeobani.
17. ¿Andichisï jatsi para jingontku erakuni né jingoni tembuchani o uambuchani?
17 Engari tumbiika ka uékandi jarhani tembuchani. Ambe enga Malakíasi uandapka uaatikeni jarhuatani sési erakuni né jingoni tembuchani. Eranhaska i ambe, kʼuiripu ma uaati ambakiti kualidadichani jatsiani, joperu no marhuakuni jarhani Tata Diosïni, ¿Tata Diosï Jeoba ísï exea eska ambakiti kʼuiripu máeska? (2 Kor. 6:14). Engari imani jingoni tembuchaska, ¿jarhuataakini parari sánderu andarhierani Tata Diosï Jeobani? Miánta, nájkirukaksï Salomóniiri témbeecha ambakiti kualidadichani jatsiapka, nóksï marhuakusïreendi Tata Diosï Jeobani. Ka úsptiksï eska Salomóni sánhani arhipiringa máteru diosïichani kómarhiani (1 Rey. 11:1, 4).
18. ¿Ambeksï jatsiski para taatiicha jorhendaani uájpeechani?
18 Taatiichaksï uaati úraani Bibliarhu anapu reiicheeri ejempluni para jarhuataani uájpeechani parakaksï imeecha uékaka marhuakuni Tata Diosï Jeobani. Kánikua jukaparhakuesti eskaksï kurhanguaka eska ima reiicha enga Tata Diosï Jeoba jaiapanheantauenga, imeechesptiksï engaksï Tata Diosï Jeobantku kómarhienga ka engaksï jarhuateenga iretani májkueni úni. Jorhendaa je chaari uájpeechani uandakua ka úkuecha jingoni andisï xáni jukaparhakue arhintani Biblia, tánguarhikuecharhu nirani ka uérani aianhpini (Mat. 6:33). Ísï jimbo, uájpeechaksï jatsisti para ambakiti pájperakua ma jatsini Tata Diosï Jeoba jingoni ka marhuakunksï jimbokaksï ísï uékasïnga úni ka no jimbokaksï taati jémbeecha Jeobaeri testigueska. Engaksï no ísï úpiringa, tiempu jingoni úpirindiksï jurajkuni Tata Diosï Jeobani.
19. Ima enga niáraka jurajkuni Tata Diosï Jeobani, ¿uaa nema ménderu marhuakuni? (Ístu exe je rekuadruni “ Chájtsï uaaka kʼuanhatsentani Tata Diosï Jeoba jingoni”).
19 Enga nema niárajka jurajkuni Tata Diosï Jeobani, ¿arhikuekasïni eska nóteru méni uaakia imeeri amigueni? Nómbe, jimboka uaaka móantani ka ménderu sési pájperantani Tata Diosï Jeoba jingoni. Joperu paraka inde ambe úkuarhiaka, jatsisti para kaxumbitiini ka jiókuarhi orhejtsïkutiicheri jarhuajperata (Sant. 5:14). Enga jánguarhintaska na uéjki no fásiliini, kánikua marhuauati para ménderu sési pájperantani Tata Diosï Jeoba jingoni.
20. Engachi májkueni ambakiti ambe úska eska ambakiti reiicha, ¿nénajtsïni exea Tata Diosï Jeoba?
20 Jiájkani, ¿ambechi jorhenguarhiski Israeli anapu reiicheeri? Eskachi uaaka ísïini komueska ima ambakiti reiicha engachi iámu mintsita jingoni xénchaska Tata Diosï Jeobani. Ju je móantani imani ambeeri engachi no sési niátapka ka mójtakurhini. Ístu nóchi jatsiska para mirikurhini eska ambe enga sánderu jukaparhakueka, jindeeska Tata Diosï Jeobantku marhuakuni. Engajtsï chá no méni jurajkuska Tata Diosï Jeobani, imajtu uandaati eska chá ambakiti kʼuiripu máeska.
PIREKUA 45 Ambe enga eratsejka juchiti mintsita
a Ini jorhenguarhikua jimbo, i uandakua Israeli anapu reiicha, imeechanisï arhikuekaani jati engaksï Tata Diosï Jeobaeri iretani juramukupka. Máruksï juramukuaspti tsimani tribuechani engaksï Judáeri reinu jimbo japka, ka máteruechaksï 10 tribuechani juramukuaspti ka máteruecha iámu 12 tribuechani.
b JUKAPARHAKUA AMBE: Biblia someni úrasïndi uandakuani mintsita para xarhatani na enga jásï kʼuiripu máeka nema, ambe enga eratsejka, tsitijka ka na enga jámajka.
c Ióntki, peekaksï no Israeli anapu reiicha pʼindepka imani iretarhu anapu diosïichani kómarhiani engaksï andauenga.
d Rei Asá kʼérati pekaduechani uaaspti (2 Crón. 16:7, 10). Joperu Biblia uandasïndi eska ima úspka ambe enga Tata Diosï jaiapanhenteenga. Ísïisti, ueenani jámani no jiókuarhispti eska jurhimberanhantapiringa, joperu jamberi tátsekua moántapti. Para Tata Diosï Jeoba, sánderu ambakiti ambeespti imeeri kualidadicha ka eska ima ambe enga no sési niátapka. Asá, Tata Diosï Jeobantkusï kómarhipti ka ístu jánguarhintaspti kénditaani diosï úkateechani jiáni enga juramuni japka ka kánikua sési úspti indeni ambe jimbo (1 Rey. 15:11-13; 2 Crón. 14:2-5).
e Exesïngachi eska Tata Diosï Jeoba kánikua jukaparharasïnga engachi imantku kómarhijka (Éx. 20:1-6).
f AMBE ENGAKSÏ XARHATAJKA IMAJENIICHA: Orhejtsïkuti ma enga sapichku jaka, arhixati erachini ma eska uandanhiaxaka imani jimbo jimboka jukari alkoli arhasïnga. Erachi xarhatasïndi eska kaxumbitiiska, jiókuarhisïndi konsejuni, mójtakusïndi máru ambe ka seguirisïndi marhuakuni Tata Diosï Jeobani.
