SEMANA 29
PIREKUA 121 Jánguarhintaaka pʼíngukuarhini
Ju je jingontku jarhani parachi úni orhepani uérakuni tsʼéjkukuani
“Jingontku ja je ka méntku únda je kómarhini parajtsï úni orhepani uérakuni tsʼéjkukuani” (MAT. 26:41).
AMBE ENGACHI JORHENGUARHIAKA
Ju je jánguarhintani parachi no no sési ambe niátani, joperu ístu ju je no úni imani ambe engajtsïni úpiringa ísï niátatarani.
1, 2. a) ¿Ambe arhiaspi Jesúsi imeeri chúxapatiichani? b) ¿Andiksïsï no úpi orhepani uérakuni tsʼéjkukuani? (Ístu exea je imajeniichani).
“CHAARI mintsita uékasïndi úni ambe enga sési jaka, joperu chaari kuerpu no úsïndi pʼíngukuarhini” (Mat. 26:41b). a Ini uandakuecha jingoni, Jesúsi xarhataspti eska kurhangusïreenga eskachi kʼuiripuecha no perfektueska ka eskachi ménichani no úsïnga sési úni ambe ma, joperu ístujtsïni arhisti eskachi jatsiska para jingontku jarhani parachi no jámani jukari mintsinharhikuarhini. Ante de Jesúsi ini ambe uandani, imeeri chúxapatiichaksï uandaspti eskaksï méntku no méni jurajkupiringa (Mat. 26:35). Sési ambeksï uékasïreendi úni, joperuksï no mítespti eska ménisï ma niárasïnga sóntku chkétakuarhini enga tsʼéjkukua ma jarhajka. Jimbosï Jesúsi arhiapti: “Jingontku ja je ka méntku únda je kómarhini parajtsï úni orhepani uérakuni tsʼéjkukuani” (Mat. 26:41a).
2 Engaksï jupikapka Jesúsini, ¿ambeksï úspi imeeri chúxapatiicha? Nóksï úspti jingontku jarhani paraksï orhepani uérakuni tsʼéjkukuani. Ka imani ambeksï úspti engaksï uandapka eskaksï no méni úpiringa ka jurajkusptiksï Jesúsini (Mat. 26:56).
Jesúsi arhiaspti imeeri chúxapatiichani eskaksï no kʼuípiringa ka eskaksï jingontku japiringa paraksï no tsʼéjkunhani, joperu imeechaksï jurajkusïndi. (Exea je párrafuechani 1 ka 2).
3. a) Parachi seguiriini sési marhuakuni Tata Diosï Jeobani, ¿andichisï no jatsi para jukari mintsinharhikuarhini? b) ¿Ambechi exeni jaua ini jorhenguarhikua jimbo?
3 Juchajtuchi no jatsiska para jukari mintsinharhikuarhini. No nema uékasïndi úni imani ambe engachi jimbo úpiringa jurajkuni Tata Diosï Jeobani. Joperuchi no perfektueska ka úpiringachi no sési ambe niátani (Rom. 5:12; 7:21-23). Ma repentkuchi úpiringa tsʼéjkukua ma jatsini ka úkua jukani orhepani uérakuni. Joperu parachi seguiriini sési marhuakuni Tata Diosï Jeobani ka Jesúsini, jatsiskachi para kurhajchani tata Jesukristueri konsejuni ka jingontku jarhani parachi úni orhepani uérakuni tsʼéjkukuani. I jorhenguarhikuajtsïni jarhuataati. Orheta exeaka ambe ka ambe jimbochi jatsiski para sánderu jingontku jarhani. Ka tátsekua, exeni jauakachi néna engachi uaaka jingontku jarhani tsʼéjkukuecha jimbo. Ka últimu, exeni jauakachi néna engachi uaaka seguiriini jingontku jarhani.
¿AMBE KA AMBECHI JIMBO JATSISKI PARA SÁNDERU JINGONTKU JARHANI?
4, 5. ¿Andichisï jatsi para jingontku jarhani parachi no no sési ambe úni nájkiruka sapichu ambeuaka?
4 Nájkirukaksï máru pekaduecha no xáni kʼératiika, úpirindiksï úni eskachi nóteru xáni sési pájperapiringia Tata Diosï Jeoba jingoni. Ístuksï úpirindi úni eskachi niárapiringa sánderu no sési ambe niátani.
5 Iáminduechachi jatsiasïnga tsʼéjkukuechani, joperu no májkueni járhati. Ísï jimbo, mámaru jásï tsʼéjkukuechanchi jatsiasïnga. Pori ejemplu, nema úpirindi kánikua jánguarhintani jarhani para no ísku jándikua ambe niátani. O jamberiksï máteruecha pʼindeti pornografia ambe exeni o masturbarikuarhini. Ka máteruechajtuksï jánguarhintani jati para no chérhiani kʼuiripuechani, no sóntku ikiani o paraksï no jandiajku uékani juramukuarhini. I ambe xarhatasïni eska ísïiska ambe enga Santiagu uandapka eska “inde ambe enga mándani kʼuiripu tsitijka, inde ambesï tsʼéjkujti jimboka antsitasïnga ka ísku ambe ma únchatarasïndi” (Sant. 1:14).
6. ¿Ambechi jatsiski para jingontku exeni?
6 ¿Chá úsïni exeni náki jindeeski tsʼéjkukua engajtsï sánderu úkua jukanchajka orhepani uérakuni? No sési jarhasti eratseni eskachi no jatsiasïnga tsʼéjkukuechani o eskachi uinhapiti jarhaska parachi úni orhepani uérakuani (1 Juanu 1:8). Ísï jimbosï apostoli Pablu uandapti eska asta imeecha jamberi engaksï “újka ambe enga espiritu santu” uandajka, jatsistiksï para jingontku jarhani paraksï no tsʼéjkunhani (Gal. 6:1). Jimajkani jatsiskachi para sési exeani náki tsʼéjkukuechanchi úpirini úkua jukanchani orhepani uérakuani (2 Kor. 13:5).
7. ¿Ambechisï jatsi para sánderu kuájchakuni? Uanda je ejemplu ma.
7 Engachi na míteakia náki tsʼéjkukuechanchi sánderu úkua jukanchasïni orhepani uérakuani, ¿ambechi jatsipirini para úni? ¡Sánderu jánguarhintani uinhapiti jarhani! Eratsi je ini ambe: imani tiempu jimboisï enga Biblia karanhaaka, ireteechaksï bardeechani jukasïreendi. Jiájkani, ¿naniisïksï sánderu fásili úpirini inchaakuni enemiguecha? ¿A no eska puerteecharhisï? Jimboksïsï jimeesïsï jatsiendi para sánderu kuájchakuni. Sáno májkueni, juchajtuchi jatsiska para kuájchakukuarhini ima ambeeri engachi sánderu úkua jukanchajka orhepani uérakuni (1 Kor. 9:27).
NÉNA ENGACHI UAAKA JINGONTKU JARHANI
8, 9. ¿Ambe jatsipirini para úni inde tumbi enga Proverbios kapitulu 7 jimbo uandajka paraka no niárapiringa no sési ambe niátani? (Proverbios 7:8, 9, 13, 14, 21).
8 ¿Nénachi uaa kuájchakukuarhini tsʼéjkukuecha jingoni? Ju je exeni ambe engajtsïni jorhendajka Proverbios kapitulu 7. Jimini tumbiiri ma uandasïndi enga kʼéri pekadu ma úpka uarhiiti ísku jándi ma jingoni. Bersikulu 22 uandasïndi eska tumbi “ma repentku” chúngumaspka imani uarhiitini. Joperu bersikuluecha engaksï antesi jaka xarhatasïndiksï eska tumbi sánhani arhispka mámaru ambe úni astaka kʼéri pekadu ma úpka.
9 ¿Ambe ka ambe úspi? Orheta, chúrikisï ‘imani xanharu jimbo niraxapti enga no iauani japka ima eskina enga ima uarhiiti jarhenga’. Tátsekua, xanharaspti para jima niárani enga ima uarhiiti irekapka (arhinta je Proverbios 7:8, 9). Ka enga na exepkia uarhiitini, no kʼuanhatsentaspti, sánderu sési, jurajkukuarhispti eska uarhiiti putimukupiringa ka aianguni pínandikueri kéjtsïtakuecheri ambe enga íntspipka paraka tumbi ísï exepiringa uarhiitini eska ambakiti kʼuiripu máespka (arhinta je Proverbios 7:13, 14, 21). Enga tumbi no indeni ambe úpiringa, no niárapirindi indeni tsʼéjkukuani jatsini nijtu no sési ambe niátani.
10. Májkueni eska inde tumbi enga Proverbios uandajka, ¿néna úpirini ma niárani májkueni no sési ambe úni?
10 Náki uéjki erachi o pirenchi ma úpirindi indeni ambe úkuarhinchani. Enga no sési ambe niátapiringa jamberi ísï pʼikuarherapirindi eska ma repentku ísï úska o uandani: “No míteska andisïni ísï ú”. Joperu enga eratsentaska, jamberi kuenta íntskukuarheati eska mámaru ambe úspka paraka niárapiringa indeni tsʼéjkukuani jatsini, komu imani amiguechani jatsiani engaksï no sési jaka, ikichakueni jásï ambe jingoni tsípikuarhini o imani lugariicha jimbo nirani enga no sési únhaajka o interneti jimbo inchani imani pájinecharhu engaksï no sési jaka. Jamberi nóteru kómarhiendia Tata Diosïni, ni arhintani Bibliani, o nirani tánguarhikuecharhu o aianhpini. Ka eska na uandajka Proverbios inde tumbiiri ambe, jamberi no iámindu ambe “ma repentku” úkuarhipti sino sánhani arhini.
11. Engachi no uéjka no sési ambe niátani, ¿ambechi jatsiski para úni?
11 ¿Ambejtsïni jorhendasïni inde ambe? Eskachi no solu jatsiska para no no sési ambe niátani, ístuchi jatsiska para no ueenani úni imani ambe engajtsïni no sési ambe niátataraaka. Ka meru indeni ambesï uandapti Salomóni enga na uandantapkia tumbiiri ka uarhiiti ísku jándiiri ambe. Míteparini ini uarhiitini, uandaspti: “Asï tsinchi imeeri xanharuecha jimbo” (Prov. 7:25). Ka ístu arini konsejuni íntspispti: “Iauani jarharitini ja imani uarhiitini ka asï andamukuera imeeri kʼumanchikuarhu” (Prov. 5:3, 8). I ambe arhikuekasïndi eskachi no jatsiska para andarhierani imani ambe enga uaaka úni eskachi no sési ambe niátaaka. b Pori ejemplu nóchi jatsiska para jima jarhani o úni imani ambe enga para máru kristianuecha no no sési jaka joperu enga úpiringa tsʼéjkukua máeni para jucha (Mat. 5:29, 30).
12. ¿Ambe erakuspi úni Jobu, ka néna jarhuataspi para ima méntkisï jingontku jarhani? (Job 31:1).
12 Parachi no úni imani ambe engachi jimbo uaaka no sési ambe niátani, ju je ísï úni eska Jobu. Ima sési exerixaptia ambe enga úpiringa para no ikichakueni jásï ambe eratseni máteru nanakecheri ambe. Uandaspti: “Pakatperakua ma úska juchiiti éskuecha jingoni” (arhinta je Job 31:1). Ísï úni eska na uandarini japkia, jarhuatapirindi paraka no méni niárapiringa ísku jándikua ambe úni. Juchajtuchi uaaka májkueni úni eska Jobu para no úni imani ambe engajtsïni uaaka pekadu ma niátatarani.
13. ¿Andichisï jatsi para kuájchakuni juchaari eratsekuani? (Ístu exea je imajeniichani).
13 Ístuchi jatsiska para xéparini jámani imani ambe jingoni engachi eratsejka (Éx. 20:17). Máruksï uandasïndi eska no sési jarhaska ikichakueni jásï ambe úni joperu eska no ma ambe úkuarhiaka engachi solu eratseska indeni ambe. Joperu no sési jarhasti ísï uandani, jimboka enga ma sánhani arhijka no sési ambe eratseni, sánderu sóntku uékasïndi ísï úni. Pori ísï arhini, juchachi mismu peerakuarhini jarhasïnga tsʼéjkukuani ka tátsekuachi jatsini para pʼíngukuarhini jarhani. Ísïisti, ménichanchi ísku jatini niárasïnga no sési ambe eratseni. ¿Ambechi jatsiski para úni enga ísï úkuarhiaka? Ju je sóntku kénditani indeni ambe ka imani ambe eratseni enga sési jaka. Inde ambejtsïni jarhuataati no méntku eratseni jarhani no sési jásï ambe ka ísïchi uaaka pʼíngukuarhini parachi no kʼéri pekadu ma niátaaka (Filip. 4:8; Kol. 3:2; Sant. 1:13-15).
Ju je méntku no úni imani ambe enga uaaka eskachi no sési ambe niátaaka. (Exe je párrafu 13).
14. ¿Ístujtsïni ambe jarhuataa parachi úni jingontku jarhani ka no niátani no sési jásï ambe?
14 ¿Ambejtsïni jarhuataa parachi jingontku jarhani ka no no sési ambe niátani? Jatsiskachi para meru seguru jarhani eska kurhajchaani Tata Diosï Jeobaeri leiichani méntkisï sési jarhasïnga ka eskajtsïni jarhuatasïnga. Jamberichi ménisï úkua jukanchajka úni ka eratseni imani enga Tata Diosï Jeoba uéjka eskachi uaaka, joperu engachi jánguarhintaska úni ambe enga ima uéjka, kánikuachi sési pʼikuarheraaka.
15. ¿Nénajtsïni jarhuatasïni sési jásï ambe eratseni?
15 Jatsiskachi para sési jásï ambe eratseni ka jorhenguarhini tsitini imani ambe enga sési jaka joperu ikichani imani ambe enga no sési jaka (Amós 5:15). Engachi ísï úska, sánderuchi uékaaka imani ambe úni enga sési jaka ka no imani ambe engajtsï pekadu ma úraaka. Ka ístuchi sánderu uinhapiti jauaka parachi úni orhepani uérakuni náki uéjki tsʼéjkukuani enga jauaka sánderu orhepatini ka na uéjki jatini.
16. Jánguarhintani sési marhuakuni Tata Diosï Jeobani, ¿nénajtsïni jarhuatasïni parachi jingontku jarhani? (Ístu exe je imajenini).
16 ¿Ambechi jatsiski para úni parachi méntkisï sési jásï ambe eratseni? Jánguarhintani eskachi xáni uaaka sési marhuakuni Tata Diosï Jeobani. Pori ejemplu, engachi tánguarhikuecharhu o aianhpikuarhu jarhajka, jánguarhintani jarhasïngachi jaiapanherantani Tata Diosï Jeobani ka ísï no fásiliuati eskachi tsʼéjkukua ma jatsiaka (Mat. 28:19, 20; Ebr. 10:24, 25). Arhintani ka jorhenguarhini Tata Diosïiri Uandakuani ka eratsentani ambe enga arhijka, ístujtsïni jarhuataati parachi sánderu xénchani ambe enga sési jaka ka kurhunhini ambe enga no sési jaka (Jos. 1:8; Sal. 1:2, 3; 119:97, 101). Ka miánta je eska Jesúsi ini konsejuni íntspiska: “Méntku únda je kómarhini parajtsï úni orhepani uérakuni tsʼéjkukuani” (Mat. 26:41). Engachi arhutajka tiempu parachi kómarhini juchaari Taati auandarhu anapuni, kánikuajtsïni jarhuatasïndi ka sánderuchi uékasïnga sési pʼikuastani imani (Sant. 4:8).
Engachi jánguarhintaska sési marhuakuni Tata Diosï Jeobani, inde ambejtsïni jarhuataati parachi no no sési ambe úni. (Exe je párrafu 16). c
JU JE MÉNTKISÏ JINGONTKU JARHANI
17. ¿Náki tsʼéjkukuani méntku úndaspi jatsini Pedru?
17 Jamberichi uaaka orhepani uérakuani máru tsʼéjkukuechani, joperu jauatiksï máteruecha engaksï sánderu úkua jukaaka. Ini ambesï úkuarhinchapti apostoli Pedru enga chérhiapka kʼuiripuechani. Ima tanimu uelta uandaspti eska no mítespka Jesúsini (Mat. 26:69-75). Sánderu tátsekua, no sáni chéparini uandantaspti kʼérati juesiichani japarini. Ini ambe jingoni xarhataxapti eska nóteru chésïreengia (Úku. 5:27-29). Joperu Pedru ménderu niáraspti chéni jiáni enga nóteru tʼirespkia imani kristianuecha jingoni engaksï no judiuepka ‘jimboka chérhiaspka imeechani engaksï pasïri pʼikujtsïkupka tsʼiuerakuani’ (Gal. 2:11, 12). Nóchi míteska sini ma jurhiani niárapi méntku nóteru sáni chénia.
18. ¿Ambechi úpirini úkuarhinchani máru tsʼéjkukuecha jingoni?
18 Sáno májkueni, jamberi juchajtuchi jatsiaka para ménderu uéntani orhepani uérakuni tsʼéjkukuani ma engachi eratseenga eska nóteru japiringia. Erachi ma uandantasïndi: “Diesi uéxurhini nóteruni exespkia pornografia ka seguru jarhaspka eskani nóteruni ísï úpiringia. Peru inde tsʼéjkukua útasï jima jarhaspti, ísïispti komu kʼuíni jarhani, komu animali apejpiti ma enga erokuarhini jarhajka para no sési ambe útspini”. Ka erachi kánikua sési úspti enga no kuatantapka. Kurhanguspti eska para úni orhepani uérakuni ini tsʼéjkukuani, jatsispka para jánguarhintani úni ambe ma pauani pauani, ka asta jiáni jamberi enga xáni irekapiringa ini parhakpinirhu. Imeeri témba ka orhejtsïkutiichaksï jánguarhintasïndi jarhuatani para ima no exeni pornografia ambe.
19. ¿Ambechi uaa úni engachi jatsika útasï ambe ma engachi no úni jaka jurajkuni?
19 Engachi jatsika ambe ma engachi no úni jaka jurajkuni, ¿ambechi jatsiski para úni parachi no pekadu ma niátani? Úni ambe enga Jesúsi uandapka: “Jingontku ja je”. Asta jiáni jamberi engajtsï pʼikuarheraaka eska iámindu ambe sési jarhaska, seguirii je jánguarhintani parajtsï no jima jarhani o imani ambe úni engaksïni no sési ambe niátataraaka (1 Kor. 10:12). Seguirii je imani ambe úni engaksïni jarhuatakia. Proverbios 28:14 uandasïndi: “Ima enga méntkisï jingontku jarhajka tsípikuarhisïndi” (2 Ped. 3:14).
NÉNAJTSÏNI JARHUATASÏNI ENGACHI JÁNGUARHINTAJKA JINGONTKU JARHANI
20, 21. a) ¿Nénajtsïni jarhuataa engachi méntkisï jingontku jauaka? b) Engachi jucha jánguarhintaaka, ¿ambe uaa Tata Diosï Jeoba? (2 Korintu 4:7).
20 ¿Sésichi úni jarhasïni jánguarhintani jingontku jarhani para no niárani no sési ambe úni? Engachi pekadu ambe uaaka jamberichi ‘ma ratku tsípikuarhiaka’ joperu engachi ísï irekaska eska Tata Diosï Jeoba na uéjka sánderuchi sési pʼikuarheraaka (Ebr. 11:25; Sal. 19:8). Ka jimbokajtsïni Tata Diosï Jeoba ísï kueraaska, uaakachi úni imani ambe enga ima jaiapanhintajka (Gén. 1:27). Solu ísïchisï uaaka jatsini sési jásï ma konsiensia ka irekani para méntkisï (1 Tim. 6:12; 2 Tim. 1:3; Judasï 20, 21).
21 Ísïisti eska kuerpu no úsïnga pʼíngukuarhini, joperu inde ambe no arhikuekasïndi eska ma nóteru ambe ma uaakia úni. Tata Diosï Jeoba méntkisï listu jarhasïndi parajtsïni jarhuatani (arhinta je 2 Korintu 4:7). Joperu uétarhisïndi eskachi exeaka eskajtsïni ima íntskusïnga uinhapikua enga no ma kʼuiripu újka jatsini. Joperu juchajtuchi jatsika para jánguarhintani para jatsini máteru jásï uinhapikua, enga jindeeka, jánguarhintani pauani pauani para no úni imani ambe enga no sési jaka. Engachi ísï úska, uaakachi seguru jarhani eskajtsïni Tata Diosï Jeoba íntskuaka sánderu uinhapikua engachi kurhakuaka kómarhikua jimbo (1 Kor. 10:13). Tata Diosï Jeobaeri jarhuajperata jimbo uaakachi méntkisï jingontku jarhani ka no úni imani ambe enga no sési jaka.
PIREKUA 47 Ju je pauani pauani kómarhini Jeobani
a Jukaparhakua ambe: Uandakua “chaari mintsita” enga Mateu 26:41 jimbo jaka, uinhapikuani arhikuekasïndi engajtsïni mámaru pʼikuastajka ka enga újka eskachi uaaka ambe ma ísï eskachi na uéjka; uandakua “chaari kuerpu” arhikuekasïndi eskachi no perfektueska ka eskachi pekadu ambe úsïnga. Ísïisti, jamberichi uéjka imani ambe úni enga sési jaka, joperu engachi no jingontku jarhaska niáraakachi imani ambe úni enga Biblia uandajka eska no sési jarhaska.
b Enga kʼuiripu ma kánikua no sési ambe niátaka ka uékani eska nema jarhuataaka, uaati exentani jarhuajperata librurhu Tsípikua jingoni ireka je, jorhenguarhikua 57, puntuecha 1-3, ka jorhenguarhikuarhu “Ju je no mirikurhini ambe enga úkuarhiaka sánderu orhepani”, enga rebista Aianhpiri jimbo jaka nobiembri de 2020, pájineecha 27-29, párrafuecha 12-17.
c AMBE ENGAKSÏ XARHATAJKA IMAJENIICHA: Erachi ma arhintasïndi mándani jurhiatikua anapu tekstuni, enga ánchikuarhitarhu mintsikuarhini jarhajka arhintasïndi Bibliani ka nirasïndi tánguarhikuecharhu entre semana xatinichani.
