Joperu no májkueniispti ambe engaksï nitamakuarhipka Nikolási ka Seline, jimboka Francia anapu Beteli arhiaspka eskaksï máteru kúnguarhikuarhu nipiringa marhuani. I temungurhiri uandantasïndi ambe engaksï nitamakuarhipka: “Engachi niárapka kánikuachi tsípixapka, joperuchi tátsekua uénaspka úkua jukanchani jimbokachi jirinhantasïreenga juchaari amiguechani. Nóchi úxapka sési pájperani jima anapu erachiicha jingoni”. a Ísï jimbo, ¿ambeksïni jarhuataa orhepani uérani ka tsípikua jingoni marhuani máteru kúnguarhikuarhu? ¿Nénaksï uaa jarhuataani máteru erachiicha? ¿Ka nénaksïni jarhuataa engajtsï máteruechani jarhuataaska?

Kuatru prinsipiuecha engaksïni jarhuataaka tsípikua jingoni marhuani

1. Mintsika je Tata Diosï Jeobani. (Sal. 37:5). Kazumi, Japoni anapu pirenchi ma, 20 uéxurhini páxaptia imeeri kúnguarhikuarhu, joperu jatsipti para mótsini enga imeeri uámba máteru nanisï axanhapka para ánchikuarhini. ¿Ambe úspi ima para “Jeobaeri jájki jimbo peerani imeeri xanharuni”? Uandantasïndi: “Aianguspka Tata Diosï Jeobani na engani jandiajku pʼikuarhereenga, uandanhiani ka no nani máru pʼikuarherani. Ka imarini méntkisï íntskuspti uinhapikua engani uétarhincheenga”.

¿Ambeksïni jarhuataa parajtsï sánderu mintsikani Tata Diosï Jeobani? Mintsikakua ísïisti eska tsïtsïki ma, uétarhisïndi itsï ka nutrientiichani para úni tsikini ka uinhapini. Nikolási, engachi máteru párrafu jimbo uandapka, eratsentaspti Abraániiri, Jesúsiiri ka Pablueri ejempluni, imeechaksï uánikua ambe úspti paraksï úni ambe enga Tata Diosï uéjka, i ambe jarhuataspti Nikolásini paraka mintsikapiringa eska Tata Diosï Jeoba jarhuatapiringa imani. Engajtsï chá pʼindeka jandiajku jorhenguarhini, jarhuataatiksïni parajtsï orhepani uérakuni ambe uéjki engajtsï nitamakuarhiaka, ka ístujtsï jorhenguarhiaka uánikua ambe engaksïni jarhuataaka jima kúnguarhikuarhu.

 2. Asï jáma je terukutantani (Ecl. 7:10). Julesi uandantasïndi na enga pʼikuarherapka enga Benini uératini Estados Unidos mótsipka, ka kuenta íntskukuarhespti eskaksï kʼuiripuecha ménderueniispka: “Ísï pʼikuarherasïreenga enajkini jatsipi parani aianguani iámu ambe juchiiti ambe, imeechani engani míteauenga”. Jimboka ima no pʼindespka indeni ambe úni no agustu pʼikuarherasïreendi, ka ueenaspti nóteru xáni kúrhiania erachiichani jingoni. Peru enga ueenapka sánderu sési míteani erachiichani, ménderueni exesptia ambe: “Kuenta íntskukuarhespka eskaksï iámindu kʼuiripuecha májkueniiska parhakpinirhu. Joperu eskachi no májkueni járhati pʼindekuechani jatsiaska. Jatsiskachi para uékaani kʼuiripuechani ísï eskaksï na jásïiuaka”. Ísï jimbo, asï terukutantani je indeni kúnguarhikuani imani kúnguarhikua jingoni engajtsï antesi japka. Anne-Lise prekursora ma, uandantasïndi: “No mótsispka máteru kúnguarhikuarhu ma parani májkueni ambe úni, sino parani jimbanhi ambe úni”.

Orhejtsïkutiichajtuksï no jatsisti para terukutantani indeni kúnguarhikuani imani kúnguarhikua jingoni engaksï antesi japka. Erachiichaksï úpirindi máru ambe ménderueni úni, joperu inde ambe no arhikuekasïndi eska no sési jarhaska. Orheta uétarhisïndi sési míteani jima anapu pʼindekuechani, ante de ambe ma arhiani (Ecl. 3:1, 7b). Ka sánderu sésiisti ejemplu jingoni uandani ante de uékani eskaksï erachiicha imani ambe uaaka eska jucha na eratsejka (2 Kor. 1:24).

3. Jánguarhinta je jarhuajpeni kúnguarhikuarhu (Filip. 1:27). Ísïisti eska no fásiliiska máteru kúnguarhikuarhu ma jimbo marhuani, joperu kánikua jukaparhakuesti eskachi jánguarhintaaka tánguarhikuecharhu nirani, kʼumanchikua reinuerirhu, jimboka ¿nénajtsïni uaa erachiicha jarhuatani engachi kasi no méni exeauaka, ochi no imeecha jingoni jarhani? Lucinda, uandantasïndi ambe engaksï úpka ima ka imeeri tsimani nanakeecha engaksï Sudáfrica mótsipka: “Ísïchi úspka eskachi na arhinhapka, jánguarhispkachi jarhuajpeni imani kúnguarhikuarhu, aianhpini iámindu erachiicha jingoni ka komentarini tánguarhikuecharhu. Ístuchi arhiaspka eskaksï úpiringa juchiniu tánguarhini parachi jima uératini, uerani aianhpini”.

Engajtsï chá jánguarhintaska indeni kúnguarhikuani anapu erachiicha jingoni ánchikuarhini, “májku kʼérijtsï ánchikuarhini jauaka para mintsikani indeni ambakiti aianhperakuani”. Anne-Lise engachi antesi uandapka, uandantasïndi eskaksï orhejtsïkutiicha arhispka eska jánguarhintapiringa iámu erachiicha jingoni uerani aianhpini. Ima uandasïndi: “Kuenta íntskukuarhespka eska indeni ambe úni kánikua marhuasïnga para no jandiajku pʼikuarherani”. Engajtsï chá arhiaska eskajtsï uékasïnga jarhuajpeni limpiesarhu, ka eskajtsï ístu uaaka jarhuajpeni imani ambe jingoni enga kʼumanchikua reinuerirhu uétarhiaka, erachiichaksï exeati eska chá pʼindexakaia kúnguarhikuarhu. Engajtsï chá jánguarhintaska májku kʼéri ánchikuarhini erachiichani jingoni, nójtsï ióndaaka pʼindeni imani kúnguarhikuarhu enga ísïika eska chaari familia.

4. Jatsia je máteru amiguechani (2 Kor. 6:11-13). Ambe engaksïni jarhuataka parajtsï úni jatsiani máteru amiguechani jindeesti uandanhiani  máteruecha jimbo. Ísï jimbo ante de ueenani tánguarhikua ka enga na kʼamarakia, arhuta je tiempu parajtsï erachiicha jingoni uandontskuarheni ka parajtsï sánderu sési míteani. Asï mirikurhia je imeeri nombriichani. Engajtsï chá sési kámpiska ka sési uandajpini ka no mirikurhiani erachiicheeri nombriichani, imeechaksï agustu pʼikuarheraati ka uékaatiksï chaari amigueni.

Asï uéka je sési pakarani máteruecha jingoni, jurajku je eskaksïni erachiicha míteaka na engajtsï jásïika. Ju je ísï úni eska Lucinda na uandajka: “Ueenaspkachi pʼímarhiani erachiichani juchaari kʼumanchikuarhu ka ini ambe jimbo iásïchi ambakiti amiguechani jatsiaskia”.

“SÉSI JIÓKAA JE MÁTERUECHANI”

Máru erachiichaksï no xáni agustu pʼikuarherasïndi kʼumanchikua reinueri ma jimbo nirani engaksï no nemani mítejka. Ísï jimbo enga nema mótsiaka chaari kúnguarhikuarhu ¿ambejtsï uaa úni parajtsï jarhuatani? Apostoli Pablu uandaspti: “Ísï eskaksïni Kristu na sési jiókaka chánksïni, chájtu sési jiókaa je máteruechani” (Rom. 15:7). Orhejtsïkutiichaksï uaati májkueni úni eska Jesúsi, ka jarhuataani paraksï agustu pʼikuarherani (exe je rekuadruni “ Ambe úni para máteru kúnguarhikua jimbo mótsini”). Ka iáminduechaksï uaati jarhuajpeni asta sapirhatiicha parakaksï imeecha engaksï apenasi mótsika kúnguarhikuarhu agustu pʼikuarheraaka.

Para jarhuataani máteruechani paraksï agustu pʼikuarherani, uaakachi pʼímarhiani juchaari kʼumanchikuarhu ka arhiani eskachi uaaka jarhuataani. Pori ejemplu, pirenchi ma arhutaspti tiempu paraka ima pirenchi enga apenasi mótsipka, miiupiringa jima ka ístu jorhendaspti náki kamionini jatani enga uékapiringa nani nirani. Pirenchi uandasïndi eska kánikua sési p’ikuarheraspka ambe enga úpka pirenchi imani jimbo.

JARHUATASÏNDIJTSÏNI SÁNDERU SÉSI PÁJPERANI TATA DIOSÏNI JINGONI

Engajtsï uékani jaka kúnguarhikuarhu ma mótsini, jamberijtsï chéaka ka uandanhiani. Joperu eranhaska je pájaruni ma, ima no tekaani jarhasïndi uerani xerekuaru para ueenani karani jimboka chésïnga,  peru enga na jorhenguarhijka karani nóteru chésïndia. Májkueni jatsiskajtsï para ísï úni eska pájaru ma, jurajkuni uandanhiateechani ka ístu no chéni sánderu marhuakuni Tata Diosï Jeobani ka sánderu ambe úni imani jimbo. Nikolási ka Seline uandasïndiksï: “Máteru kúnguarhikua jimbo mótsini uánikua ambekini jorhendasïndi. Pori ejemplu, kánikuajtsïni jarhuatasti máteru kualidadichani jatsiani, engachi jánguarhintapka máteru kʼuiripuecha jingoni jarhani ka máteru lugaricharhu. Jean-Charles, engachi máteru párrafu jimbo uandapka, uandantasïndi na enga marhuakuka imeeri familiani: “Kánikua marhuakuaspti juchaari sapiichani jimbokaksï sánderu sési pájperasïreengia Tata Diosïni jingoni. Máru mesiichani jimbojku juchaari nanaka sapichu ueenaspti partichani nitamataraani kúnguarhikuarhu engachi entre semana jimbo jatsiajka ka juchaari tataka aianhpiri úkuarhispti.

¿Ka engaksï no úska mótsini máteru kúnguarhikuarhu nani enga uétarhini jaka aianhpiricha? Asï uandanhia je, ambe engachi exeni jaka ini artikulurhu uaatiksïni máru ambe marhuacheni ka ísïjtsï pʼikuarherani enajkijtsï apenasi ueenani jaki máteru kúnguarhikuarhu marhuani. Mintsika je Tata Diosï Jeobani ka jánguarhinta je kúnguarhikuarhu anapu erachiicha jingoni uérani aianhpini ka u je eskaksï máteruecha chaari amigueuaka o sánderu sési pájpera je imeecha jingoni engajtsï jatsiakia. ¿Nénajtsï úpirini jarhuatani erachiichani engaksï apenasi niáraka chaari kúnguarhikuarhu? Engajtsï ini ambe úska jarhuatatiksïni sánderu sési pájperani Tata Diosï jingoni, jimboka xénchperakua jindeeska engaksï sánderu xarhatajka Tata Diosïiri marhuariicha (Juanu 13:35). Engachi ísï úska uaakachi seguru jarhani eska “ima kánikua jaiapanhentasïndi ini ambe” (Ebr. 13:16).

Nájkiruka úkua jukajka, uánikua erachiichaksï niárastia agustu jarhani ka kánikuaksï sési pʼikuarherani máteru kúnguarhikuarhu jarhani. ¡Chájtujtsï uaaka ísï úni! Anne-Lise uandantasïndi: “Mótsini máteru kúnguarhikuarhu jarhuatastirini parani sánderu sési pájperani máteruechani jingoni”. Ka Kazumi uandantasïndi eska iásï kʼóru seguru jarhaskia “eskakeni Tata Diosï Jeoba jarhuatasïnga engari mótsijka támisï marhuani ka ískukini pakatasïndi na engakeni jarhuatajka”. Ka Jules uandantasïndi: “Uánikua amiguechani jatsiaskia ka nóteruni jandiajku pʼikuarherasïngia. Iásï kánikua sési pʼikuarherasïnga ini kúnguarhikuarhu ka kánikua no sési pʼikuarherapiringa engani mótsipiringa”.