SEMANA 28
PIREKUA 123 Ju je méntkisï kurhajchani Jeobaeri juramukuani
¿Néna míteni sini jurhimbikua ambeeski o chkuanderakua ambe?
“Uíuinhasï ja je, sési jónguarhi je jurhimbikua ambe” (ÉFES. 6:14).
AMBE ENGACHI JORHENGUARHIAKA
Jorhenguarhiakachi exeni jurhimbikua ambe enga Tata Diosï Jeoba jorhentpijka ka imani chkuanderakuechani enga Satanási úrajka ka juchaari ikiatspitiicha.
1. ¿Chá néna pʼikuarherasïni míteni jurhimbikua ambe?
TATA DIOSÏ JEOBAERI marhuariichachi jukaparharasïnga jurhimbikua ambe enga Bibliarhu jaka ka niárasïngachi mintsikani imani ambe engachi arhintajka (Rom. 10:17). Seguruchi jarhaska eska Tata Diosï Jeoba uaxastaska kúnguarhikuani ka inde “kúnguarhikua kuájpisïndi jurhimbikua ambeni ka úsïndi eska uíuinhasï jauaka” (1 Tim. 3:15). Ka tsípikua jingonchi kurhajchasïnga imeechani engajtsïni orhechepajka, jimbokajtsïni sési aiangusïnga jurhimbikua ambe enga Bibliarhu jaka ka ístujtsïni arhisïndi ambechi uaa úni parachi ísï jámani eska Tata Diosï Jeoba na uéjka (Ebr. 13:17).
2. Eska na arhijka Santiagu 5:19, ¿ambeksï uaa úkuarhinchani Tata Diosï Jeobaeri marhuariichani?
2 Nájkirukachi jiókuarhikia jurhimbikuani ka ístuchi míteni eskachi jatsiska para kurhajchani Tata Diosï Jeobaeri kúnguarhikuani, engachi no jingontu jámaska úpiringachi chkuanderakua ambe jakajkuni (arhinta je Santiagu 5:19). Satanási kánikua tsitipirindi eskachi nóteru mintsikapiringia ambe enga Biblia uandajka o eskachi nóteru kurhajchapiringia ambe engajtsïni arhijka Tata Diosï Jeobaeri kúnguarhikua (Éfes. 4:14).
3. ¿Andisï jukaparhakue eskachi imani ambe uaaka enga jurhimbikueka? (Éfes. 6:13, 14).
3 (Arhinta je Éfesu 6:13, 14). No ióni jimbo Noambakiti úrauati mámaru járhati chkuanderakuechani para támisï jánhastani juramutiichani ka nóterujtsïni jurajkunia marhuakuni Tata Diosï Jeobani (Apok. 16:13, 14). Ístuchi míteska eska Satanási sánderu jánguarhintaaka támisï jánhastani Tata Diosï Jeobaeri marhuariichani (Apok. 12:9). Jimbosï xáni jukaparhakueti eskachi jorhenguarhiaka exeni nákiiski jurhimbikua ambee ka chkuanderakua ambe ka ístu eskachi jorhenguarhiaka imani ambe úni enga jurhimbikueka (Rom. 6:17; 1 Ped. 1:22). Jukaparhakuesti eskachi ini ambe uaaka parachi úni tsípini pakarani jiáni enga no sési nitamakuarhinhaaka.
4. ¿Ambechi exeni jaua ini jorhenguarhikua jimbo?
4 Ini jorhenguarhikua jimbo, exeni jauakachi tsimani kualidadiichani engachi uétarhinchajka para exeni eska ísïiska, ambe enga uandajka Biblia ka para jiókuarhini ambe engajtsïni Tata Diosï Jeobaeri kúnguarhikua arhijka. Ístuchi tanimu ambe exeni jauaka engachi jatsika para úni parachi no jurajkuni jurhimbikuani.
KUALIDADIICHA ENGACHI UÉTARHINCHAJKA PARA ÚNI EXENI AMBE ENGA JURHIMBIKUA AMBEEKA
5. ¿Nénajtsïni jarhuatasïni chénharhini Tata Diosï Jeobani parachi úni míteni ambe enga jurhimbikueka?
5 Chénharhini Tata Diosï Jeobani. Chénharhini Tata Diosï Jeobani arhikuekasïndi eskachi kánikua xénchasïnga ka eskachi no méni úpiringa ima ambe enga imani no jaiapanhintajka. Uékasïngachi exeni ambe enga sési jaka ka ambe enga no sési jaka, ambe enga jurhimbitiika ka ambe enga chkuanderakua ambeeka, parakajtsïni Tata Diosï Jeoba jaiapanhentaaka (Prov. 2:3-6; Ebr. 5:14). Jatsiskachi para sánderu xénchani Tata Diosï Jeobani ka no kʼuiripuechani jukari chérhiani, jimboka imeecha sánderu tsitisïnga ambe enga Tata Diosï Jeoba no jaiapanhintajka.
6. ¿Ambeksï úspi 10 espiecha engaksï ísï chérhiapka kʼuiripuechani?
6 Engachi sánderu chérhiapiringa kʼuiripuechani ka eska Tata Diosï Jeobani, úpiringachi jakajkuni imani ambe engaksï kʼuiripuecha uandajka ka enga no terukuntajka imani ambe jingoni engajtsïni Tata Diosï Jeoba jorhendajka. Ju je eratseantani, 12 espiechani engaksï nípka exeni imani echerini enga Tata Diosï Jeoba aiakuapka israeliteechani. Joperu 10 espiechaksï sánderu chérhiaspti Kanaáni anapuechani ka eska Tata Diosï Jeobani chénharhini, ka uandasptiksï: “Nóchi uaaka nirani imani kʼuiripuecha jingoni, jimbokaksï sánderu uinhapitiiska eska jucha” (Núm. 13:27-31). Ísïispti Kanaáni anapuechaksï sánderu uinhapitiispti eskaksï israeliteecha. Joperu engaksï uandapka eskaksï no úpiringa andani, mirikurhixaptiksï Tata Diosï Jeobani. Imeechaksï no miáspti ambe enga Tata Diosï Jeoba uékeenga eskaksï úpiringa. Israeliteechaksï jatsipti para miántani ambe enga Tata Diosï úpkia imeecha jimbo. Ísïksï úpirindi exeni eskaksï kananeuecha no úpiringa andani Tata Diosïni, imani enga iámindu ambe újka úni. Peru Josué ka Kalebi ménderuenksï exesïreendi, imeechaksï mintsikasïreendi Tata Diosïni ka uékasïreendiksï eska ima jaiapanhentapiringa. Ísï jimbo, arhiasptiksï iretarhu anapuechani: “Enga Tata Diosï Jeoba tsípini jaka juchantsïni jingoni, imajtsïni meru páati imani echeri jimbo ka íntskuatijtsïni, jo, imani echerini enga kánikua lechi ka tékolmena japoka” (Núm. 14:6-9).
7. ¿Ambejtsïni jarhuataa parachi sánderu chénharhini Tata Diosï Jeobani? (Ístu exe je imajenini).
7 Ambe ma engajtsïni jarhuataaka sánderu chénharhini Tata Diosï Jeobani, jindeesti méntkisï miáni ambe enga ima jaiapanhentajka ante dechi erakuni úni ambe ma (Sal. 16:8). Engajtsï arhintani jauaka Biblieri istoria ma, kurhamarhikuarhi je: “Engani ji jima japiringa, ¿ambe úpirini?”. Pori ejemplu, eranhaska je eskajtsï kurhaaxaka ambe engaksï 10 espiecha uandani jaka. ¿Jakajkupirintsï ambe engaksï uandani jaka ka jurajkupirintsï eskaksïni chétapu andapiringa? ¿Ojtsï xarhatapirini na engajtsï xáni xénchajka Tata Diosï Jeobani ka eskajtsï uékasïnga jaiapanherantani? Iámindu ima israeliteechaksï no jakajkuspti eska Josué ka Kalebi jurhimbitkuksï uandaxapka. ¿Ambe úkuarhispi engaksï indeni ambe úpka? Nóksï úspti inchani imani Echerirhu engaksï aiaminhapka (Núm. 14:10, 22, 23).
¿Chá neechani jakajkukuapirini? (Exe je párrafu 7).
8. ¿Andichisï jatsi para kaxumbitiini?
8 Kaxumbikua. Tata Diosï Jeoba aianguasïndi jurhimbikua ambe kaxumbitiichani (Mat. 11:25). Engachi ueenapka jorhenguarhini jurhimbikua ambe, xarhataspkachi kaxumbikua ka jurajkuspkachi eskajtsïni máteruecha jarhuatapiringa (Úku. 8:30, 31). Joperu jatsiskachi para jingontku jámani parachi no kʼéramakuarhini. Engachi kʼéramakuarhiska, uaakachi ísï eratseni eskaksï juchaari eratsekuecha sánderu jukaparhakueska, eskaksï Bibliarhu anapu prinsipiuecha o eska imani instruksionicha engajtsïni Tata Diosï Jeobaeri kúnguarhikua íntskujka.
9. ¿Ambejtsïni jarhuataa parachi seguiriini jarhani kaxumbitiini?
9 ¿Ambejtsïni jarhuataa parachi seguiriini jarhani kaxumbitiini? Miántani eskachi no ma ambe míteska Tata Diosï Jeobani japarini (Sal. 8:3, 4). Ístuchi uaaka kómarhini parajtsïni jarhuatani kaxumbitiini ka jurajkukuarhini eskajtsïni máteruecha jorhendaaka. Tata Diosï Jeobajtsïni jarhuataati sánderu jukaparharani imeeri eratsekuechani engajtsïni jorhendajka imeeri Karakatarhu ka imeeri kúnguarhikuani jimbo ka no imani ambe engachi jucha eratsejka. Engajtsï Bibliani arhintani jauaka, jirinhanta je imani ambe enga xarhatajka eska Tata Diosï Jeoba tsitisïnga enga nema kaxumbitiijka ka eska no sáni jaiapanhentasïnga imani kʼuiripuni enga kʼéramakuarhijka, sési exekuarhijka ka no uékani eskaksï máteruecha arhiaka ambe ma. Ísï jimbo, engajtsï intsïnhaska k’éri responsabilidadi ma, jánguarhinta je méntkisï kaxumbikua xarhatani.
JU JE MÉNTKISÏ JURHIMBIKUARHU JÁMANI
10. ¿Neechani úraskia Tata Diosï Jeoba para orhejtsïkuani ka arhiani ambe engaksï jatsika para úni imeeri marhuariicha?
10 Mintsika je méntkisï ambe engajtsïni arhijka Tata Diosï Jeobaeri organisasioni. Ióntki Tata Diosï Jeoba Moisésini úraspti ka ísï tátsekua Josuéni paraksï arhiani israeliteechani ambe engaksï jatsipka para úni (Jos. 1:16, 17). Israeliteechani sési nikuasïreendi engaksï kurhajchauenga imani achamasïichani enga Tata Diosï Jeoba erakuauenga para arhiani ambe engaksï jatsipka para úni. Uánikua uéxurhini ísï tátsekua enga na japkia kúnguarhikua, Tata Diosï 12 apostoliichani úrasïreendi para arhiani ambe engaksï úpiringa (Úku. 8:14, 15). Ka ísï tátsekua, Jerusaléni anapu orhejtsïkutiichajtuksï ueenaspti jarhuataani. Ka jimbokaksï erachiicha kurhajchasïreenga ini achamasïichani engaksï mintsinharhikuepka, “kúnguarhikuarhu anapuechaksï sánderu jakajkusïreendia ka pauani pauani sánderuksï uániixaptia” (Úku. 16:4, 5). Ini jurhiatikuechani jimbo, Tata Diosï Jeoba ístujtsïni íntsasïndi kóntperateechani engachi újka ambe engajtsïni arhijka imeeri organisasioni. Joperu, ¿néna pʼikuarherapirini engachi no uékapiringa kurhajchaani imani erachiichani enga ima erakuaka parajtsïni orhejtsïkuni? Parachi míteni, ju je miántani ambe enga úkuarhipka jiáni engaksï israeliteecha nirani japka imani Echerini jimbo engaksï aiaminhapka.
11. ¿Ambeksï úkuarhinchaspi ima kʼuiripuecha engaksï no uékapka kurhajchani imani enga Tata Diosï Jeoba erakupka para orhekupani? (Ístu exe je imajenini).
11 Engaksï israeliteecha nirani japka imani Echerini jimbo engaksï aiaminhapka, máru kʼéri achamasïichaksï úndaspti uandauandamini ka kurhamarhikuarhini sini Tata Diosï Jeoba Moisésintkusï íntskupi juramukua. Uandaxaptiksï: “Iámu ireta pímbinhasïisti [ka no solu Moisési, sino] iámindu indeecha, ka Tata Diosï Jeoba indeecha jingoni jarhasti” (Núm. 16:1-3). Ísïisti eska iámu ireta pímbinhasïspka para Tata Diosï Jeoba, joperu ima Moisésinisï erakupti paraka orhekupapiringa iretani (Núm. 16:28). Ísï jimbo, engaksï imeecha no sési ambe uandani japka Moisésiiri ambe, nóksï imanisï arhini japti sino Tata Diosï Jeobani. Nóksï exexapti ambe enga Tata Diosï uékeenga, sino ambe engaksï imeecha uékeenga, ¿ambeksï uékasïreeni? sánderu juramukua jatsini ka mítekateenksï. Tata Diosï Jeoba uándikuaspti iámindu imeechani engaksï ueenapka indeni ambe uandani ka ístu uánikua israeliteechani engaksï imeecha jingoni úkuarhipka (Núm. 16:30-35, 41, 49). Uaakachi seguru jarhani eska iásïjtu Tata Diosï Jeoba no jaiapanhentasïnga imeecha engaksï no kurhajchajka ambe enga imeeri organisasioni uandajka.
¿Chá né jingoni úkuarhipirini? (Exe je párrafu 11).
12. ¿Andichisï uaa mintsikani Tata Diosï Jeobaeri organisasionini?
12 Uánikua ambe jarhasti engachi jimbo uaaka mintsikani Tata Diosï Jeobaeri organisasionini. Engaksï imeecha engaksï orhejtsïkujka organisasioni, exejka eskachi jatsiska para sánderu sési kurhanguni Biblieri jorhenguarhikua ma o mójtakuni ambe ma juchaari ánchikuarhitarhu, sóntkuksï mójtakusïndi ambe enga uétarhijka (Prov. 4:18). Ísïksï úsïndi jimbokaksï uéksïnga jaiapanherantani Tata Diosï Jeobani. Ístuksï, kánikua jánguarhintasïndi para imani ambe erakuni úni ambe enga Tata Diosïiri Karakatarhu jaka ka iámindu imeeri marhuariichaksï jatsisti para májkueni úni.
13. ¿Ambeeski ‘ambakiti uandakuecha’ ka ambechi jatsiski para úni?
13 “Asï jáma jurajkuani indeni ambakiti uandakuechani engaksï jakaia” (2 Tim. 1:13). ¿Ambeeski ‘ambakiti uandakuecha’? Jindeesti ima ambe enga Biblia jorhentpijka (Juanu 17:17). Ambe engachi jakajkujka jindeesti jimbokachi niáraska jorhenguarhini Biblieri ambe. Tata Diosï Jeobaeri organisasionijtsïni jorhendasïndi, parachi úni ambe engajtsïni ima arhijka. Engachi méntkisï ísï úska ambe engajtsïni ima jorhendajka sésijtsïni nicheati.
14. ¿Nénaksï jurajkuspi máru kristianuecha “ambakiti uandakuechani”?
14 ¿Ambe úpirini úkuarhini engachi jurajkupiringa “ambakiti uandakuechani”? Ju je exeni ambe enga úkuarhipka primeru siglurhu. Máru kristianuechaksï uandaxapti eska Tata Diosï Jeobaeri jurhiatikua janospkia ka iápurisïksï jámaxapti indeni ambe uandaparini. Jamberiksï kʼuiripuecha eratsepti eska apostoli Pablu, karaspka karta ma nani enga uandeenga eska ísïispka. Máru Tesalónika anapu kristianuechaksï no exespi sini jurhimbikua ambeespi o chkuanderakua ambe. Ísï jimbo, jakajkusptiksï ambe engaksï kurhaapka ka imeechajtuksï úndaspti májkueni uandani. Nóksï jakajkupirindi inde ambe, engaksï miántapiringa imani ambe enga Pablu jorhendaapka jiáni enga imeecha jingoni japka (2 Tes. 2:1-5). Apostoli Pablu arhiaspti eskaksï no jakajkupiringa iámu ambe engaksï kurhaani japka. Ka parakaksï no ménderu ini ambe úkuarhinchani, máteru karta jimbo enga karakuapka ini uandakuecha jingoni kʼamaraspti: “Ji Pablu, jíksïni karachixaka ini uandajperatani engaksïni axacheni jaka. Ka méntkisï ísï karasïnga parakajtsï chá míteaka eskaksïni jísï karachini jaka” (2 Tes. 3:17).
15. ¿Ambechi uaa úni parachi no jakajkuni imani ambe enga ísï xarharajka eska ísïiska? Uanda je ejemplu ma. (Ístu exea je imajeniichani.)
15 ¿Ambejtsïni jorhendasïni ambe enga Pablu karakuapka Tesalónika anapuechani? Engachi niáraska kurhaani ambe ma engajtsïni ísku pakataaka joperu no terukuntani imani ambe jingoni engachi jorhenguarhijka Bibliarhu, jatsiskachi para jánhaskakua jingoni jámani. Ióntki jini Unión Soviética, jarhasptiksï máru kʼuiripuecha engaksï juchaari ikiatspitiipka ka axakuasptiksï karta ma juchaari erachiichani nani engaksï arhiauenga eskaksï úpiringa máteru organisasioni úkuarhini ka i karta ísï xarharasïreendi enajki Kuerpu Gobernanti axakuapi. Nájkiruka ísï xarhareenga eska karta jima uéraspka, uánikua erachiichaksï exespka eska chkuanderakua máespka. Uánikuechaksï kuenta íntskukuarhespti eska no terukuntasïreenga imani ambe jingoni enga Biblia jorhentpijka. Ka ini jurhiatikuecha jimbojtu, juchaari ikiatspitiichaksï ménichanisï mámaru ambeksï úrasïndi parajtsïni támisï jánhastani ka úni eskachi arhukurhiaka. Joperu parachi úni kuájchakukuarhini ka ‘no jámani jurajkutakuarheni parajtsïni támisï jánhastani’, jatsiskachi para exeni eska iámindu ambe engachi kurhaajka o arhintajka terukuntasïnga jurhimbikua ambe jingoni enga Biblia jorhentpijka (2 Tes. 2:2; 1 Juanu 4:1).
Asï jáma je jakajkuni chkuanderakua ambe enga ísï xarharajka enajki jurhimbikua ambee. (Exe je párrafu 15). a
16. Eska na arhijka Roma 16:17, 18, ¿andichisï no jatsi para kúnguarhini imeecha jingoni engaksï nóteru uéjkia úni jurhimbikua ambe?
16 Asï jarharia je imeechani engaksï no méni jurajkujka Tata Diosï Jeobani. Tata Diosï uékasïndi eskachi iámindu imeeri marhuariicha májku k’éri kómarhiaka ka uaakachi ísï úni engachi méntkisï jurhimbikua ambe úska. Imeecha engaksï nóteru uéjkia úni ambe enga jurhimbikueka, úsïndiksï eska kúnguarhikua arhukurhitini jauaka. Jimbojtsïnisï Tata Diosï Jeoba arhijti eskachi no kúnguarhiaka imeecha jingoni parajtsïni no támisï jánhastani (arhinta je Roma 16:17, 18).
17. ¿Nénajtsïni marhuachesïni sési jorhenguarhini jurhimbikua ambe ka únchi ambe enga Biblia uandajka?
17 Engachi sési jorhenguarhijka jurhimbikua ambe ka úni ambe enga Biblia uandajka, nóchi méni jurajkuaka Tata Diosï Jeobani ka sánderuchi mintsikakua jatsiaka (Éfes. 4:15, 16). Ka nóchi jakajkuaka imani chkuanderakuechani ka jorhentperakuechani enga Satanási úrajka ka ísïchi uaaka seguru jarhani eskajtsïni Tata Diosï Jeoba kuájchakuaka jiáni enga no sési jánhaskuarhiaka. Ju je méntkisï jurhimbikua ambe úni ka “ima Tata Diosï enga pínandikua íntspijka” chánksïni jingoni jauati (Filip. 4:8, 9).
PIREKUA 122 ¡Ju je uinhapiti jarhani!
a AMBE ENGAKSÏ XARHATAJKA IMAJENIICHA: Demostrasioni máesti. Uánikua uéxurhiniistia engaksï Unión Soviética anapu erachiicha intsïnhapka imani kartani enga ísï xarhareenga enajki Kuerpu Gobernanti axakuapi joperu enga juchaari ikiatspitiicheripka. Ini jurhiatikuecha jimbo, juchaari ikiatspitiichaksï úrasïndi internetini paraksï Tata Diosï Jeobaeri organisasioniiri ambe uandani parajtsïni támisï jánhastani.
