Ambe enga kurhanguarhijka ima enga arhintajka
¿Neeski “uarhiiti” enga Isaías 60:1 uandajka, ka ambe arhikuekasïni enga uandajka “jauara” ka “tʼíntska”?
Isaías 60:1 arhisïndi: “Jauara uarhiiti, ka tʼíntska jimboka chiiti t’íntskua janoskia. Jimboka Tata Diosï Jeoba k’eri ambeeska, imakeni tʼíntskachixati”. Kontekstu xarhatasïndi eska “uarhiiti” Sioniiska o Jerusaléni, enga jiánisï Judá anapu kapitaliipka (Is. 60:14; 62:1, 2). a Jerusaléni arhikuekasïndi iámindu Israeli anapu ireteechani. Joperu ¿kaani ka néna ueenaski jauarani Jerusaléni ka ueenani tʼíntskani? ¿Ambe enga Isaíasi uandapka arhikuekasïndi eska ménderu kumplirikuarhiaka? Ju je exeani mókuntskuechani.
¿Káni ka néna ueenaski jauarani Jerusaléni ka ueenani tʼíntskani? Buenu, judiuechaksï jupikakata jarhaspti 70uéxurhini Babilonia. Ka indeni tiempu jimbo, Jerusaléni ka templu xerentskataksï jarhaspti. Joperu jiáni enga meduecha ka perseechaksï inchaakupka Babilonia, iámindu israeliteechaksï intsïnhaspti sésikua paraksï kʼuanhatsentani imeecheeri echeri jimbo ka ménderuksï ueenani sési kómarhini Tata Diosï Jeobani (Esd. 1:1-4). Desdeuéxurhini 537 jimbo ante de Jesúsi, máru judiuecha engaksï 12 triburhu anapuepka ka sésiksï marhuakuni jarhani Tata Diosï Jeobani, kʼuanhatsentasptiksï (Is. 60:4). Ueenasptiksï kéjtsïtakuechani úkuani Tata Diosï Jeobani, ménderu úntani templuni ka kʼuínchikuechani uaantani (Esd. 3:1-4, 7-11; 6:16-22). Ísï jimbo, ménderu xarharaspti na enga xáni k’eri ambeeka Tata Diosï Jeoba, jimboka tʼíntskaspka Jerusaléni o imeeri iretarhu. Jima anapuechajtuksï niáraspti ísïini eska tʼíntskua ma para máteru ireteecha, ima ireteecha engaksï no mítepka Tata Diosï Jeobani ka pápkʼandekuarhuksï jarhani.
Joperu profesia enga Isaíasi uandapka ma partijkusï kumplirikuarhipti Jerusaléni. Uánikua israeliteechaksï nóterukurhajchasptia Tata Diosï Jeobani (Neh. 13:27; Mal. 1:6-8; 2:13, 14; Mat. 15:7-9). Astaksï no jakajkuspti Mesíasini enga jindeeka tata Jesukristu (Mat. 27:1, 2). Ka uéxurhini 70 jimbo, Jerusaléni ka imeeri templu ménderuksï xerenhantaspti.
Tata Diosï Jeoba uandarixaptia eska i ambe ísï úkuarhipiringa (Dan. 9:24-27). I ambe xarhatasïndi eska Tata Diosï Jeobano erokuarhisïreenga eska Jerusaléni iámu profesiani kumpliripiringa enga Isaías kapitulu 60 uandajka.
¿Isaíasiiri profesia ménderu kumplirikuarhia? Jo. Joperu iásï, i “uarhiiti” imanisï arhikuekajti “Jerusalénini enga karhakua jaka”. Joperu, ¿nákiiski Jerusaléni enga karhakua jaka? Jindeesti Tata Diosï Jeobaeri kúnguarhikua enga auandarhu jaka. Apostoli Pablu uandaspti iiri ambe: “Imasï jindeeti juchaari naandi” (Gal. 4:26). Imeeri uájpeechaksï jindeesti Jesúsi ka 144,000 erakukateecha engaksï auandarhu irekaaka ka Pablu indeechani jingoni kuenta úkuarhisïndi. Erakukateechaksï jindeesti “pímbinhasï ireta ma”, o “Tata Diosïiri Israeli” (1 Ped. 2:9; Gal. 6:16).
¿Ambe arhikuekasïni eska jauaraspka Jerusaléni enga karhakua jaka ka tʼíntskani? Imanisï arhikuekajti enga ixú Echerirhu úraapka uájpeechani engaksï erakukateeka. Ju je terukutantani ambe enga Isaíasi uandapka kapitulu 60 jimbo imani ambe jingoni engaksï imeecha nitamakuarhipka.
Kristianu erakukateechaksï jatsispti para jauarani jimbokaksï pápkʼandekuarhu jarhaspka indeni jimbo engaksï uánikua apostateecha niárapka jarhani jiáni engaksï na iámu apostoliicha uarhipkia (Mat. 13:37-43). Ísïksï niáraspti jupikakata jarhani kʼéri Babilonia jimbo enga jindeeka interu parhakpini anapu relijioni no jurhimbiti. Ka jupikakataksï jarhaspti astaka “kʼamakurhipiringa ma tiempu”, ka i tiempu ueenakuarhispti 1914 jimbo (Mat. 13:39, 40). Ísï tátsekua, 1919 jimbo, jurajkunhasptiksï ka jirejiresïksï ueenaspti tʼíntskani. ¿Néna? Engaksï jánguarhintapka aianhpini ambakiti aianhperakuani. b Ka desde jiáni uératini, uánikua kʼuiripuechaksï jurhasïndi inde tʼíntskuarhu, ka ístuksï jurhasïndi imeecha engaksï kuenta úkuarhijka Tata Diosïiri Israeli jingoni engaksï ístu jindeeka “reiicha” enga Isaías 60:3 uandajka (Apok. 5:9, 10).
Sánderu orhepatini kristianu erakukateechaksï sánderu xarhataatia Tata Diosï Jeobaeri tʼíntskuani. Engaksï nóteru jauakia ixú echerirhu niáraatiksï jindeeni “jimbanhi Jerusaléni” o Kristueri nobia, engaksï jindeeka 144,000 reiicha ka saserdotiicha (Apok. 14:1; 21:1, 2, 24; 22:3-5).
Jimbanhi Jerusaléni jarhuajpeati paraka úkuarhiaka ambe enga Isaías 60:1 uandajka (terukutanta je Isaías 60:1, 3, 5, 11, 19, 20 Apokalipsisi 21:2, 9-11, 22-26 jingoni). Ísï eska Jerusaléni na jindeepka kapitali Israeliiri, Jimbanhi Jerusaléni ka Jesúsi jindeuatiksï juramutiicha jimbanhi parhakpiniiri. ¿Ka ambe arhikuekasïni Apokalipsisi enga uandajka eska Jimbanhi Jerusaléni ‘auandarhu uératini kétsexapka, jima uératini enga Tata Diosï jaka’? Arhikuekasïndi eska méntkisï pendienti jauaka Echerirhu anapuecha jimbo. Biblia arhisïndi eska indeni ireta jimbo, iápurisï anapu kʼuiripuechaksï “uaati jámani imeeri tʼíntskua jimbo” ka eskajtsï pʼímutantskateuaka pekadueri ka uarhikueri (Apok. 21:3, 4, 24). Imani profesiechani jimbo enga Isaíasi ka máteru profeteecha uandaapka, niáraati ima jurhiatikua “enga sési peenhantaaka iámindu ambe” (Úku. 3:21). I ambe jiáni ueenaspti sési peenhantani enga Jesúsi juramuti únhapka ka jiáni kʼamakurhiati enga ima na kʼamarakia Juramuni Mili Uéxurhini.
a Biblia, Traducción del Nuevo Mundo Isaías 60:1 úrasïndi uandakua “uarhiiti” ka no “Sioni” o “Jerusaléni” májkueni eskaksï na újka máteru traduksionicha. ¿Andi? Jimboka ebreu jimbo uandakua “jauara”, “tʼíntska” ka “tʼíntskachixati” uarhiitini ma arhikuekasïndi. Ísï jimbo, uandakua “uarhiiti” jarhuatasïni imani enga arhintani jauaka paraka sánderu sési kurhanguaka ambe enga arhikuekajka i bersikulu.
b Esekieli 37: 1-14 ka Apokalipsisi 11: 7-12 uandasïndiksï na enga ménderu ueenapka jarhani tʼíntskua 1919 jimbo. Esekieliiri profesia uandasïndi eskaksï iámindu kristianu erakukateecha engaksï xáni ióni jupikakata japka, ménderuksï ueenapiringa tʼíntskani engaksï na jurajkunhapiringia. Ka profesia enga Apokalipsisi jimbo uandajka arhikuekasïndi grupu sapichuni ma kristianu erakukateecheeri engaksï orhejtsïkujka ánchikuarhitani engaksï ménderu ueenapiringa tʼíntskani jimbokaksï no úspka marhuakuni Tata Diosï Jeobani imani tiempu jimbo engaksï onhakata japka. Ka 1919 jimbo, i grupu niáraspti ísï mítekateeni komueska “jántspiri enga mintsinharhikueka ka jánhastiini” (Mat. 24:45; exe je libruni La adoración pura de Jehová: ¡por fin restaurada!, páj. 118).
