1. ¿Néna pʼikuarherasïni Jeoba enga kʼuanhatsentajka karichi ma enga tsïnchitini japka?

ESKACHI na exekia máteru jorhenguarhikua jimbo, Jeoba ísïsti eska ambakiti karichi eranguti ma enga uékperakua jingoni kuájchakuajka imeri karichichani ka enga jirinhantajka imani enga tsïnchitini jaka. Ma xanhari, Jeoba arhiaspti imani israelitechani engaksï jurajkupka: “Andarhentajtsïni je ka jíjtuksïni andarhentaaka chánksïni”. Ka míteskachi eska iásï jamberi májkueni pʼikuarherasïnga jimboka ima uandasïnga: “No mójtakurhisïnga” (Mal. 3:6, 7). Ístu, Jesusi uandaspti eska Jeoba ka ánjelichaksï kánikua tsípisïnga enga kʼuanhatsentajka karichi ma enga tsïnchitini japka (Luk. 15:10, 32).

2. ¿Ambechi exea ini jorhenguarhikua jimbo?

² Ini jorhenguarhikua jimbo, exeanchi jauaka tanimu Jesusiri uandantskuechani engajtsïni jorhendajka nénachi uá jarhuataani imechani engaksï jarharika Jeobani. Exeakachi ambe engachi jatsika para úni para jarhuataani kʼuanhatsentani Jeoba jingoni ka andichisï jatsi para jánguarhintani jarhuataani.

3, 4. ¿Andisï ima uarhiiti enga Jesusi uandantapka ixú Lukasʌ 15:8-10 jimbo, xáni jánguarhintapi jirinhantani sentabuni?

³ Para exeantani imechani engaksï uéjka kʼuanhatsentani Jeoba jingoni, uétarhisïndi kánikua jánguarhintani. Lukasïri karakata jimbo uandasïndi ejemplu ma enga Jesusi úrapka, uarhiitiri ma enga kánikua jánguarhintapka jirinhantani sentabu ma enga drakma arhinhenga. Ambe enga Jesusi uékenga jorhentpini ixú, jindespti eska uarhiiti kánikua jánguarhintaspka jirinhantani imani sentabuni (arhinta je Lukasʌ 15:8-10).

⁴ Peeka Jesusiri jurhiatikuecha jimbo, jiáni enga uátsï ma uambuchenga, amamba íntskusïrendi diesi drakmechani. Ka jamberi ima uarhiiti enga Jesusi uandapka, tsïtapti ini jásï sentabu ma enga plateripka. Eratseparini eska kétsekua andatseraska, lampara ma étskusïndi  aseiti jingoni ka iápurisï erajtatarasïndi, peru no exentasïndi. Jamberi ima lampara no andajkuarhijti iápurisï tʼíntskani para úni exentani sentabuni. Ísï jimbo, uarhiiti eratsesïndi iatsitakuarhu kʼarhatani iámu kʼumanchikuarhu. Ka enga na kʼamarajkia, tʼupurirhu exesïndi eska mereaxaka ambe ma: ¡Exentasïndi sentabuni enga xáni jukaparharajka! Jesusi uandasïndi eska uarhiiti xáni sési pʼikuarherasïnga ka tsípini, enga jamberi uandajpaajka imeri amigaechani ka besinechani para aianguani eska exentaskia sentabuni.

5. ¿Andisï uétarhijki jánguarhintani parachi exeantaani imechani engaksï jarharika kúnguarhikuani?

⁵ I ejemplu enga Jesusi úrapka, jorhendasïndijtsïni eska uétarhisïnga kánikua jánguarhintani para exentani ambe ma engachi tsïtaka. Ka májkueni ambe úkuarhisïndi engachi jirinhantaajka imechani engaksï jarharika kúnguarhikuani. Jamberiksï ióni páni jatiia engaksï nóteru jaka kúnguarhikuarhu. Jamberiksï iásï jimesïsï irekati engaksï erachicha no míteaka. Peru jamberiksï máru iáiasï uékani jati Jeoba jingoni kʼuanhatsentani. Uékasïndiksï ménderu Jeobani marhuakuni erachicha jingoni, peruksï uétarhinchasïndi eskachi jarhuatauaka.

6. ¿Nénaksï uá iámindu kúnguarhikuarhu anapuecha jarhuajpini para jirinhantaani imechani engaksï jarharika kúnguarhikuani?

⁶ ¿Néchaksï uá jarhuajpini para jirinhantaani imechani engaksï jarharika kúnguarhikuani? Iámindu kúnguarhikuarhu anapuecha, imecheri familia, orhejtsïkuticha, prekursoricha ka aianhpiricha. ¿Jarhaski nema juchari familiarhu o amigu ma enga jarharika kúnguarhikuani? ¿Exentaskichi nemani enga jarharika kúnguarhikuani jiáni engachi aianhpini jámani japka xanharu jimbo o kʼumanchikuecharhu? Jiájkani, enga ima uékaska eska nema pʼorhembiaka, ju je arhini eskachi uáka kúnguarhikuarhu anapu orhejtsïkutichani íntsaani, peru ísï úparini eska gobiernu na uandaaka.

7. ¿Ambejtsï jorhenguarhisïni ini ambe jingoni enga erachi Thomas uandantajka?

⁷ ¿Ambeksï uá úni orhejtsïkuticha para úni exeantani imechani engaksï uéjka Jeoba jingoni kʼuanhatsentani? Ju je exeni ambe enga uandajka España anapu orhejtsïkuti ma enga Thomas arhinhajka. * Ima jarhuataastia jukari kuarenta Testiguechani paraksï kʼuanhatsentani kúnguarhikuarhu. Ima uandasïndi: “Orheta uandontskuarhesïnga erachicha ka pirenchicha jingoni engaksï úpiringa míteni naniksï irekaxaki iásï imecha engaksï jarharika kúnguarhikuani. Ístu kurhamarhiasïnga aianhpirichani sinksï miásïni erachini ma enga nóteru nirajkia tánguarhikuecharhu. Sáno iáminduechaksï tsípikua jingoni uékasïndi jarhuajpini. Tátsekua, engani na nirajkia pʼorhembini erachini o pirenchini, kurhanguarhiasïnga uájpechani ka parientichani. Máru i erachichaksï paasïrendi uájpechani tánguarhikuecharhu ka máruksï jamberi niáraspti aianhpiricheni. Ístuchi uáka jarhuataani imechani paraksï Jeoba jingoni kʼuanhatsentani.

8. Eska na uandajka Lukasʌ 15:17-24, ¿néna kámaspi táti, uájpani enga moantapka?

⁸ ¿Nénachi jatsiski para kaani imechani engaksï uéjka Jeoba jingoni kʼuanhatsentani? Ju je exeni ambechi uá jorhenguarhini uandantskueri uájperi enga tsïnchintapka (arhinta je Lukasʌ 15:17-24). Jesusi uandantaspti eska ima tumbi niárasïnga sési eratsentani ka eska kʼuanhatsentasïnga imeri kʼumanchikuarhu. Táti jemba uiriipasïndi kúntani ka uékperakua jingoni kamajchakusïndi para xarhatakuni eska útasï xénchasïnga. Tumbi kánikua no sési pʼikuarherasïndi imani ambe jimbo enga úka ka eratsesïndi eska nóteru jukanchaskia arhinhani eska imeri uájpeska. Táti pʼamojkusïndi jimboka exesïnga eska mintsita jingoni moantaskia. Ísï jimbo, kʼuínchikua ma úntasïndi ka juramusïndi eskaksï jatsikuntaaka sánderu ambakiti xukuparhakua ma. Ini ambe úparini xarhatakusïndi eska no ísï exesïnga komueska imeri ánchikuarhiri ma sino komu imeri kʼumanchikuarhu anapu ma enga kánikua xénchajka.

9. ¿Ambechi jatsiski para xarhatakuani imechani engaksï jarharika kúnguarhikuani parachi jarhuataani kʼuanhatsentani? (Exe je rekuadruni “ Néna jarhuataani imechani engaksï uéjka kʼuanhatsentani”).

 ⁹ Jeoba xásïsti eska i uandantskuarhu anapu táti. Xénchaasïndi imechani engaksï jarharika kúnguarhikuani ka uékasïndi eskaksï imani jingoni kʼuanhatsentaaka. Ka engachi juchajtu májkueni uáka eska ima, uákachi jarhuataani paraksï kʼuanhatsentani. Ka parachi ísï úni, jatsiskachi para tekaantstini, uékpitiini ka kurhangutspini. ¿Andisï jukaparhakue i ambe xarhatani ka nénachi uá ísï úni?

10. ¿Andichisï uétarhinchajki tekaantskua parachi úni jarhuatani nemani enga jarharika kúnguarhikuani?

¹⁰ Uétarhisïngachi tekaantskua xarhatani, jimboka ima kʼuiripu kánikua tiempu uétarhinchaati para ménderu ambakiti pájperakua ma jatsini Jeoba jingoni. Uánikua erachicha engaksï ióni jarharipka kúnguarhikuani, uandasïndiksï eska ante deksï kʼuanhatsentani Jeobaeri kúnguarhikuarhu, orhejtsïkuticha ka máteru kúnguarhikuarhu anapu erachichaksï uánikua xanhari niraspti pʼorhembiani. Asia anapu pirenchi ma enga Nancy arhinhajka, uandasïndi: “Kúnguarhikuarhu anapu pirenchi ma enga juchiti amigueka, kánikuarini jarhuatasti. Ísïreni xénchasïrendi enajki ji jindepirini imeri jingonikua kʼéri. Imarini miátantasïrendi ambakiti ambe engachi márku nitamakuarhipka. Engani aiangukuarhienga na engani pʼikuarherenga, tekaantskua jingondini kurhajchasïrendi ka arhistachesïrendini ambe engani úpiringa úni. Ambakiti amiga maéspti ka méntkisïrini jarhuataspti”.

11. ¿Andisï uétarhijki kurhangukuni nemani enga ikiani jaka?

¹¹ Kurhangukuani máteruechani, ísïsti komueska sïpiata ambe engajtsïni jarhuatajka jiáni engachi no sési pʼikuarherani jarhajka. Máruksï jarharisti kúnguarhikuani jimboka kúnguarhikuarhu anapu erachi ma no sési pʼikuastaspka ka útasïksï  ikiaxati ka no sési pʼikuarherani. Jimboksïsï no uéjti Jeoba jingoni kʼuanhatsentani. Jamberiksï eratsejti eskaksï no sési kánhaska. Ka jamberiksï uétarhinchajti eska nema kurhajchauaka ka kurhangukuani na engaksï pʼikuarherajka (Sant. 1:19). Pirenchi ma enga María arhinhajka ka enga ióni jarharipka kúnguarhikuani, uandasïndi: “Uétarhinchasïrenga eskarini nema kurhajchapiringa, nemani engarini jarhuatapiringa ka nema engani jingoni úpiringa uerani”.

12. ¿Néna úsïni Jeoba eskachi andarhieraaka imani?

¹² Biblia uandasïndi eska Jeoba imeri uékperakuani úrasïnga parachi andarhierani. ¿Néna úsïni i ambe? Ju je ejemplu ma peerani. Eranhaska je eskajtsï kʼéri posurhu ma uekanheska. Posu xáni jauanhesti engajtsï no uáka jandiajku uénhintani. Jiántkujtsïsï uáka uénhintani engaksïni nema sïndari ma jingoni pʼinhantaaka ka jimaksïni páni nani engajtsï uáka sési jarhani. Jeoba arhiaspti israelitechani engaksï jarharipka eska ima uékperakua jingoni úspka eskaksï ménderu andarhientapiringa (Os. 11:4). Jeoba májkueni ambe pʼikuarherasïndi imecha jimbo engaksï nóteru marhuakujkia ka engaksï uánikua uandanhiatechani jatsiajka ka no sésiksï pʼikuarherani. Ísïsti enajkiksï imecha posurhu ma uekanhetini jaki enga kánikua jauanhika. Jeoba uékasïndi eskaksï imecha míteaka eska ima kánikua xénchaasïnga ka uékasïndi eskaksï ménderu andarheraaka imani. Ka imajtsïni uáti úrani parachi xarhatakuani imeri uékperakua.

13. ¿Néna xarhatasïni ambe enga Pablo nitamakuarhika eska juchari uékperakua uáka jarhuataani imechani engaksï jarharika kúnguarhikuani paraksï kʼuanhatsentani?

¹³ Kánikua jukaparhakuesti eskaksï erachicha engaksï jarharika kúnguarhikuani míteaka eska Jeoba xénchaasïnga ka juchajtu ísï. Pablo engachi imeri ambe uandapkia máteru jorhenguarhikuarhu, jukari treinta uéxurhini jarharispti kúnguarhikuani. Ima uandantasïndi: “Ma  jurhiatikua engani jucheniu uérani japka, pirenchi ma enga jatirikia uandajpasptirini ka kánikua uékperakua jingondini uandontskuarhechispti. Uénaspka uerani ísï eska sapi ma. Arhispka eska ísï xarharasïrenga enajki ambe Jeoba axapi para jíndeni jingoni uandontskuarheni. Jiáni eratsespka ménderuni kʼuanhatsentani Jeoba jingoni”.

14. Eska na uandajka Lukasʌ 15:4, 5 ¿ambe úsïni karichi eranguti enga exentajkia karichini enga tsïnchipka?

¹⁴ Engaksï na kʼuanhatsentajkia, i erachichaksï útasï uétarhinchani jarhasïndi eskachi jarhuatauaka ka uinhaperantaani. Jamberiksï útasï kánikua no sési pʼikuarherani jauati, ísï komueska ima uájpa enga tsïnchintapka enga Jesusi uandantapka. Ka jimbokaksï Noambakitiri parhakpini jimbo junguaxaka, nóksï jatsisïndi ambakiti pájperakua ma Jeoba jingoni. Ísï jimbo, jatsiskachi para jarhuataani paraksï ménderu uénani mintsikani Jeobani. Jesusi uandasïndi eska enga karichi eranguti exentajka imani karichini enga tsïtapka, kamanharhisïndi ka máteru karichicha jingoni pántasïndi. Karichi eranguti úrastia tiempu ka uinhapikua para jirinhantani. Peru ístu mítesti eska jatsiska para jarhuatani jimboka ima no uáka jandiajku kʼuanhatsentani (arhinta je Lukasʌ 15:4, 5).

15. ¿Nénachi uá jarhuataani imechani engaksï uékani jaka Jeoba jingoni kʼuanhatsentani? (Exe je rekuadruni “ Ambakiti jarhuajperata ma”).

¹⁵ Jamberichi jatsiaka para kánikua tiempu ka uinhapikua úrani parachi jarhuataani imechani engaksï jarharika kúnguarhikuani paraksï ménderu ambakiti pájperakua ma jatsini Jeoba jingoni (Rom. 15:1). Ambe engajtsïni jarhuataaka ini ambe úni, jindesti Jeobaeri espiritu, imeri Karakata ka publikasionicha engajtsïni imeri kúnguarhikua íntsaajka. ¿Nénachi uá jarhuataani? Ambakiti orhejtsïkuti ma uandasïndi: “Engaksï uéjka kʼuanhatsentani, sáno iáminduechaksï uétarhinchasïndi eska aianhpiri ma jarhuatauaka jorhenguarhini  Bibliani”. * Ísï jimbo, engajtsïni orhejtsïkuticha arhiaka parachi jarhuatani nemani enga jarharika kúnguarhikuani, ju je tsípikua jingoni ísï úni. I mismu orhejtsïkuti ístu uandasïndi: “Imecha engaksï jarharika kúnguarhikuani, uétarhinchasïndiksï eska aianhpiri ambakiti amigu máeuaka para imecha, nemani engaksï uáka mintsikani”.

16. ¿Nénachi míteski eskajtsïni ánjelicha jarhuatasïnga?

¹⁶ Jarhastiksï uánikua eksperiensiecha engaksï xarhatajka eskajtsïni ánjelicha jarhuatasïnga exeantaani imechani engaksï uékani jaka kʼuanhatsentani Jeoba jingoni (Jaŋ. 14:6). Por ejemplu, Silvio enga Ecuador anapueka, kómarhispti Jeobani paraka jarhuatapiringa kʼuanhatsentani kúnguarhikuarhu. Enga útasï kómarhini japka, tsimani orhejtsïkutichaksï uamutakuspti. Jiánksï mismu uénaspti jarhuatani ísï eska Silvio na uétarhinchani japka.

17. ¿Nénachi pʼikuarherasïni engachi jarhuatajka nemani para Jeoba jingoni kʼuanhatsentani?

¹⁷ Jarhuatani nemani para Jeoba jingoni kʼuanhatsentani, uáti eskachi kánikua sési pʼikuarheraaka. Ju je exeni ambe enga uandajka Salvador, prekursori ma enga jánguarhintajka jarhuataani imechani engaksï jarharika kúnguarhikuani: “Ménisï niárasïnga uerani xáni tsípini. Kánikua sési pʼikuarherasïnga eratseni na enga Jeoba pʼímutantajka Noambakitiri parhakpinirhu uératini imeri karichini ma enga xáni xénchajka ka engani ji újka jarhuatani Jeobani (Uku. 20:35).

18. Engajtsï cha jarharika Jeobaeri kúnguarhikuani, ¿amberijtsï uá seguru jarhani?

¹⁸ Engajtsï cha jarharika Jeobaeri kúnguarhikuani, uákajtsï seguru jarhani eskaksïni Tata Diosï útasï xénchasïnga ka uékasïndi eskajtsï kʼuanhatsentaaka. Ísïsti, parajtsï ísï úni, jatsiakajtsï para máru ambe úni. Peru miá je imani tátini enga Jesusi uandantskuarhu úrapka. Jeoba erokuarhixati eskajtsï kʼuanhatsentaaka imeri familia jingoni ka uékperakua jingonksïni jióntaati.