IÁMINDUECHACHI míteska eska ini últimu jurhiatikuecha jimbo, Jeoba orhejtsïkuxaka imeri iretani ka eska íntsaaxaka ambe engaksï uétarhinchajka paraksï ambakiti pájperakua ma jatsini imani jingoni (2 Tim. 3:1). Peru mándani arhinchi jatsiska para kurhajchani. Sáno májkueni ambechi nitamakuarhixaka eska israelitecha engaksï desierturhu irekani japka. Imaksï jatsispti para jirejiresï úni ambe ma engaksï trompetecha kurhaakuarhienga.

Jeoba arhispti Moisesini eska tsimani trompetechani plateri uápiringa martiiu jingoni para iretani tántani ka xereantani kʼumanchikuechani sïkuiriri (Núm. 10:2). Saserdotichaksï jatsispti para mámaru kústaani trompetechani parakaksï israelitecha mítepiringa ambe úni (Núm. 10:3-8). Iásï, Tata Diosïri marhuarichajtuchi kurhaasïnga na engaksï mámaru kurhaakuarhijka trompetecha. Ju je exeni tanimu ambe engaksï sáno terukuntajka na engaksï kurhaakuarhienga ióntki anapu trompetecha: engachi pʼímarhinhajka kʼéri tánguarhikuecharhu, engaksï orhejtsïkutichani arhistakuajka paraksï sánderu sési úni imecheri ánchikuarhitani ka enga mójtakurhijka ambe ma kúnguarhikuarhu.

Enga Jeoba uékenga eska iámu ireta tánguarhipiringa jimesïsï enga jindepka para tabernakulurhu inchani, imani ladu jimbo enga jurhiata andarajka, saserdotichaksï tsimani trompetechani kústaasïrendi (Núm. 10:3). Iámindu tribuecha engaksï tʼápurisï arhukukata japka ma uirhipandani tabernakulurhu, sésiksï kurhangusïrendi andiksïsï kústanheni trompetecha. Jamberiksï ima israelitecha engaksï no iauani irekenga, sóntkuksï niárendi tabernakulurhu. Peru jamberi imecha engaksï sánderu iauanisï irekenga, sánderuksï ióndendi ka jánguarhintani para niárani. Néna uéjkini, Jeoba uékasïrendi eskaksï iáminduecha tánguarhipiringa ka eskaksï kurhaapiringa ambe enga ima arhistakuapiringa.

Ini jurhiatikuecha jimbo, ístuchi pʼímarhinhasïnga parachi kʼérati tánguarhikuecharhu nirani. Peruchi no nirasïnga tabernakulurhu ma, sino kʼéri tánguarhikuecharhu rejioniri ka máteru tánguarhikuecharhu nani engachi jukaparhakua ambe jorhendanhajka. Iámu parhakpinirhu, Tata Diosïri marhuaricha engaksï nirajka ini kʼéri tánguarhikuecharhu, tsípikua jingonksï májkueni ambe jorhenguarhisïndi. Paraksï úni tánguarhini, máruksï iauani uératini jurhasïndi ka máteruechaksï nómbe. Peru iáminduecha engaksï jiókuarhijka pʼímarperatani, exesïndiksï eska sési jarhaska jánguarhintani tánguarhini.

¿Nénaksï jámasïni imecha engaksï iauanisï irekajka jima uératini enga úkuarhijka kʼéri tánguarhikua ma? Teknolojia jimbo, uánikua i erachichaksï úsïndi májkueni ambe jorhenguarhini ka ísïksï pʼikuarherasïndi enajkiksï jima jaki nani enga úkuarhini jaka kʼéri tánguarhikua. Por ejemplu, enga Estados Unidos anapu Beteli uératini nípka erachi ma para Benín anapu Betelini pʼorhembini, nitamatarasptiksï programani jini Arlit (Níger), ireta sapichu ma nani engaksï mínecha jaka, jini Sahara anapu desierturhu. Jimaksï 21 erachicha  tánguarhispti ka ístu máteru kʼuiripuecha. Nájkirukaksï iauani japka jima uératini engaksï 44,131 tánguarhitini japka, ísïksï pʼikuarheraxapti enajkiksï imecha jingoni japi. Erachi ma karaspti: “Uékasïngachi mintsita jingoni diosmeiamukua arhiani erachichani engaksï úka eskachi úpiringa exeni i tánguarhikuani. I ambejtsïni ménderu xarhatachesti na engajtsïni xáni xénchajka”.

Engaksï saserdoticha ma trompetajku kústenga, imechajkuksïsï nirendi kʼumanchikuarhu para tánguarhini engaksï jefiipka mili kʼuiripuecheri (Núm. 10:4). Jima, Moisesi arhiasïrendi ambe engaksï jatsipka para úni ka ístu jorhendaasïrendi néna sánderu sési úni ánchikuarhitani imecheri tribuechani jimbo. Engachi jucha jindepiringa ma inde jefi, ¿a no eskachi jánguarhintapiringa jima jarhani parachi jorhenguarhini?

Iásï, orhejtsïkutichaksï no jindesti kúnguarhikuarhu anapu jefiicha, níjtuksï ísï jámajki enajkiksï imecha juramukuapirindi Tata Diosïri karichichani engaksï kuidariuajka (1 Ped. 5:1-3). Peru kánikuaksï jánguarhintasïndi para sési orhejtsïkuani kúnguarhikuarhu anapuechani. Ísï jimbo, tsípikua jingonksï nirasïndi engaksï pʼímarhinhajka paraksï jorhenguarhini nénaksï sánderu sési úni imecheri ánchikuarhitani, por ejemplu engaksï nirajka Jorhentperakuarhu para Reinueri Ánchikuarhita. Ísïksï jorhenguarhisïndi néna sánderu sési ánchikuarhini kúnguarhikuarhu. Ini ambe jimbo engaksï orhejtsïkuticha arhistaminhajka, imecha mismu, erachicha, ka pirenchichaksï úsïndi sánderu andarhierani Jeobani. Ka nájkirukachi no méni nirani jaka i jásï jorhentperakua ma jimbo, uákachi kánikua jorhenguarhini imeri ambe engaksï orhejtsïkuticha jorhenguarhikia.

Ménisïksï saserdoticha uánikua xanhari kústasïrendi trompetani. Ísïksï aianhpisïrendi eska Jeoba uékasïrenga eska ireta iámindu ambe tántapiringa para mótsini (Núm. 10: 5, 6). Engaksï ini ambe uénga, xarharasïrendi eskaksï iáminduecha sési mítesïrenga ambe úni, peru uétarhisïrendi eskaksï iáminduecha kánikua jánguarhintapiringa. Jamberiksï máru úkua jukanchendi ini ambe úni. ¿Andi?

Jamberiksï máru ísï exendi eskaksï jukari someni kústasïrenga trompetani ka jiáni engaksï no erokuarhienga. Biblia uandasïndi eska ménisï, nube chúrikuajku anhaxurhisïrenga asta pauandikua jamberi ka eska ménisï, tsimani jurhiatikua, ma kutsï o sánderu ióni anhaxurhisïrenga astaka ménderu manakuarhipiringa (Núm. 9:21, 22). ¿Ka namuni xanhari mótsespi ireta? Números kapitulu 33 uandasïndi eska ireta mótsispka ma kuarenta lugarisï.

Jamberi ménisï, máru israelitechaksï jima niárendi nani enga kʼumandini jarhenga, ambe ma enga kánikua sési pʼikuastauenga desierturhu, jima enga no ma ambe japka (Deut. 1:19). Ísï jimbo, jamberiksï úpirindi eratseni eska no sési japiringa jima uératini mótsini.

Jiáni engaksï ísï someni kústenga trompetani, iámu ireta kurhaasïrendi peruksï no iáminduecha májku tiempu jimbo uénasïrendi xanharani. Jamberiksï máru israelitecha kuatantendi erokuarhini astakaksï uénapiringa xanharani. Enga trompeta someni kurhaakuarhienga, arhikuekasïrendi eskaksï ima tribuecha uénapiringa xanharani engaksï esterisï japka: Juda, Isakari ka Sabuloni (Núm. 2:3-7; 10:5, 6). Engaksï na i tribuecha nipiringuia, saserdotichaksï ménderu kústasïrendi trompetani parakaksï tanimu tribuecha engaksï surirhu ísï japka uénapiringa xanharani. Ka ísïksï úsïrendi astaka na iámu ireta nipiringuia.

Jamberichi úkua jukanchapka jiókuarhini ambe ma enga mójtakurhika Jeobaeri kúnguarhikuarhu. Jamberichi jukari uandanhiapka eratseparini eska uánikua ambe mójtakurhixaka engachi no erokuarhijka. O jamberichi sési pʼikuarherenga máru ambe jingoni enga antesi úkuarhienga ka no uékani eska i ambe mójtakurhipiringa. Néna uéjkini, jamberichi ísï exepka enajkichi no úpirini ísï úni ka sánchi ióndani pʼindeni. Peruchi míteska eskachi jatsiska para ísï úni. Engachi jánguarhintaaka, exeakachi na engajtsïni újchakurhaaka Jeoba.

Moisesiri jurhiatikuecha jimbo, Jeoba uánikua acheetichani, uarhiitichani ka sapiichani orhejtsïkuaspti desierturhu ísï. Uarhipirindiksï enga Jeoba no kuájchakuapiringa ka orhejtsïkuani. Ini últimu jurhiatikuecha jimbo enga xáni no sési jánhaskuarhini jaka, Jeobajtujtsïni orhejtsïkuxati parachi ambakiti pájperakua ma jatsini imani jingoni. Ísï jimbo, ju je kánikua jánguarhintani májkueni úni eska israelitecha engaksï sóntku uénga imani ambe seguni na enga kurhaakuarhienga trompeta.