“Engachi uénapka juchiti primu jingoni arhijperani, jupipchakuspka ka uénaspka pirajchakuni. Uékasïrenga uándikuni” (Paul).

“Juchenio, kánikua ikiasïrenga ambe uéjki jimbo. Xerentasïrenga ambe uéjkini” (Marco).

Jamberichi jucha no niátajka indeni ambe. Joperu ménisïchi úkua jukanchasïnga pʼíngukuarhini. ¿Andi? Jimbokajtsïni Adani kéritaska kʼamanharhintskua (Rom. 5:12). Ísï eska Paul ka Marco, máruksï kánikua úkua jukanchasïndi pʼíngukuarhini ka máteruechaksï úkua jukanchasïndi paraksï nóteru chénia o imani ambe eratseni enga no sési pʼikuastaajka. Ka máteruechaksï úkua jukanchasïndi paraksï no ísku jándikua ambe niátani, kauini o droga ambe úrani.

Imecha engaksï no újka pʼínguni ambe engaksï eratsejka, tsitini ka úni, niárasïndiksï no sési ambe úkuarhinchani. ¿Ambechi uá úni parachi no ini ambe nitamakuarhini? Jorhenguarhini pʼíngukuarhini. Parachi ísï úni, ju je exeni tanimu kurhamarhikuechani. Orheta ¿ambe arhikuekasïndi pʼíngukuarhini? Tsimani, ¿andichisï jatsi para pʼíngukuarhini? Ka tanimu ¿nénachi uá xarhatani ini ambe enga espiritu santu úrpijka? (Gal. 5:22, 23). Tátsekuachi exeaka ambe engachi jatsika para úni engachi exejka eskachi ménisï úkua jukanchasïnga pʼíngukuarhini.

Kʼuiripu ma enga újka pʼíngukuarhini, no jirejiresï niátasïndi ambe enga pʼikuarherani jarhajka. Sánderu sési, pʼíngukuarhisïndi para no úni o uandani ambe enga Tata Diosï no jaiapanhintajka.

Jesusijtsïni, xarhatachisti imeri ejemplu jingoni ambe enga arhikuekajka pʼíngukuarhini. Biblia uandasïndi: “Enga no sési arhinhenga, ima no méni mókukuarhisïrendi. Ka enga no sési kánhenga, ima no kuájpikuarhisïrendi, sino eiangukuarhisïrendi imani enga jurhimbitku jusgarpijka” (1 Ped. 2:23). Tata Diosïri Uájpa úspti pʼíngukuarhini jiáni engaksï chkarirhu tiripapkia ka engaksï imeri ikiatspiticha teresmarhuni japka (Mat. 27:39-44). Ístu pʼíngukuarhispti jiáni engaksï relijioniri orhejtsïkuticha uékenga “uandarani ma ambe engaksï jimbo úpiringa kʼamanharhintskua exekuni” (Mat. 22:15-22). Ka ambakiti ejemplu ma íntspispti jiáni engaksï máru judiuecha tsakapuecha jingoni uékenga atani. No uékaspti no sési úkuantani, sánderu sési jirikuarhespti ka uéntaspti templurhu (Juanu 8:57-59).

¿Uáchi májkueni úni eska Jesusi? Jo, uákachi nájkiruka no xáni sési eska ima. Apostuli Pedru karaspti: ‘Kristujtu ísï tekaantasti juchantsïni jimbo íntskuparintsïni ejemplu parakachi ísï jámapiringa eska ima na jámenga’ (1 Ped. 2:21). Nájkirukachi kʼamanharhintstika, uákachi jánguarhintani xáni eskachi uáka parachi májkueni úni eska Jesusi. ¿Andichisï jatsi para ísï úni?

Engachi uéjka eskajtsïni Jeoba jaiapanhentaaka, jatsiskachi para pʼíngukuarhini. Nájkirukachi ióni páni jauakia Jeobani marhuakuni ka no méni jurajkuni, engachi no pʼíngukuarhiska imani ambe jimbo engachi uandajka o úni, úpiringachi tsïtani  imani ambakiti pájperakuani engachi Jeoba jingoni jatsika.

Ju je exeni ambe enga Moisesi úpka, ima “jindespti enga sánderu kánikua kaxumbitipka ka eska iámindu kʼuiripuecha engaksï echerirhu japka” imani jurhiatikuecha jimbo (Núm. 12:3). Uánikua uéxurhini tekaantasptia na engaksï israelitecha uandauandamenga. Peru ma jurhiatikua, no úspti pʼíngukuarhini ka ikiaspti israelitecha jingoni jimbokaksï uandauandamexapka jimbokaksï no jatsispka itsï. Kánikua ikiaparini arhiaspti: “¡Iásï, kurhaa je, no kurhandirecha! ¿Ini kʼerendarhu jimbojtsïsï uéjki eskaksïni jucha itsï petachiaka?” (Núm. 20:2-11).

Moisesi no úspti pʼíngukuarhini. No kʼéri ambe arhispti Jeobani enga milagru ma jimbo itsï íntsaapka israelitechani (Sal. 106:32, 33). Ísï jimbo, Jeoba no jurajkuspti eska Moisesi inchaakupiringa Echerirhu engaksï Aiaminhapka (Núm. 20:12). Ka enga ísï no úpka pʼíngukuarhini, asta ima jurhiatikua jamberi pʼamondakuarhipti enga uarhipka (Deut. 3:23-27).

¿Ambechi jorhenguarhisïni? Eska, nájkirukachi ióni páni jauakia Jeobani marhuakuni, nóchi méni jatsiska para uinhamarhikuani imechani engajtsïni ikiatajka o engaksï uétarhinchajka eskaksï jurhimberanhantaaka (Efes. 4:32; Kol. 3:12). Ísïsti eska ménisï sánderu úkua jukasïnga tekaantani engachi sánderu jatirijkia. Peru ju je miáni Moisesini. Nóchi uékasïnga tsïjpani ini xáni ióni engachi páni jaka Jeobani marhuakuni jimbokachi ma repentku no úska pʼíngukuarhini. Jiájkani, ¿nénachi jorhenguarhia pʼíngukuarhini?

Ju je kómarhini eskajtsïni íntskuaka espiritu santu. Jatsiskachi para ísï úni jimboka pʼíngukuarhini ambe máeska enga espiritu santu úrpijka, ka Jeoba íntsaasïndi imechani engaksï kurhakujka (Luk. 11:13). Espiritu santueri jarhuajperata jimbo, Jeobajtsïni íntskusïndi uinhapikua engachi xáni uétarhinchajka parachi pʼíngukuarhini (Filip. 4:13, TNM). Ístu, jarhuatasïndijtsïni parachi máteru ambe xarhatani, komu uékperakua engajtsïni jarhuataaka pʼíngukuarhini (1 Kor. 13:5).

Ju je no jiókuarhini imani ambe enga uáka úni eskachi úkua jukanchaaka pʼíngukuarhini. Ju je no exeani imani pájinechani Internetiri ni imani ambe jingoni tsípikuarhini engajtsïni no sési ambe úraaka (Efes. 5:3, 4). Peru no indeni ambejku, jatsiskachi para no méni jiókuarhini iámindu ambe engajtsïni úpiringa no sési úrani (Prov. 22:3; 1 Kor. 6:12). Por ejemplu, kʼuiripu ma enga no újka pʼíngukuarhini para ikichakueni jásï ambe niátani, no jatsipirindi para arhiantani libru ambe o pelikula  ambe exeni enga tatakeri ma uandajka enga xénchajka nanakani ma o máteru i jásï ambe.

Jamberichi úkua jukanchaaka ini ambe úni. Peru engachi jánguarhintaaka, Jeobajtsïni íntskuati uinhapikua parachi pʼíngukuarhini (2 Ped. 1:5-8). Jarhuataatijtsïni pʼínguni ambe engachi eratsejka, na engachi uandajka ka ambe engachi újka. Ka úsïngachi ísï uandani, jimboka Paul ka Marco engachi uénakuarhu uandaapka, nóteruksï kurhurjaxesïndia. Ju je exeni erachiri ejemplu ma enga no uénga pʼíngukuarhini jiáni enga karruni xanhatatani jarhenga. Asta niárasïrendi no sési arhirperani máteruecha jingoni. ¿Ambe úski para mójtakurhini? Erachi uandantasïndi: “Pauani pauani mintsita jingoni kómarhisïrenga. Arhiantasïrenga jorhenguarhikuechani engaksï uandenga néna pʼíngukuarhini ka jorhenguarhiasïrenga karakatechani engajtsïni jarhuatapiringa. Nájkirukani iónisï úkua jukanchakia, kánikuarini jarhuatasïndi pauani pauani eratseni eskani jatsiska para no ikiani. Ka engani niuaka nani, jánguarhintasïnga xarhintkuni uérani parani no jirejiresï jámani jarhani”.

Ménisïchi no úsïnga pʼíngukuarhini. Enga inde ambe úkuarhiaka, jamberichi ísï pʼikuarheraaka enajki ambechi no uá Jeobani kómarhini. Peruchi uétarhinchasïnga sánderu kómarhini. Ju je jirejiresï ísï úni. Ju je kómarhini Jeobani eskajtsïni puáchentaaka, eskajtsïni jarhuataaka ka ju je jánguarhintani nóteru niátani imani mismu ambe (Sal. 51:9-11). Ima kurhauati engachi mintsita jingoni kómarhiska parajtsïni pʼamojperakua xarhatachini (Sal. 102:17). Apostuli Juanujtsïni miátantasïndi eska Tata Diosïri Uájperi iurhirijtsïni ‘pʼíkurhiantasïnga iámindu pekaduechani’ (1 Juanu 1:7; 2:1; Sal. 86:5). Ju je no méni mirikurhini eskajtsïni Jeoba arhisïnga eskachi jatsiska para méntku úndani puátspintani. Ka ísïchi uáka mintsikani eskajtsïni imajtu májkueni puáchintaaka (Mat. 18:21, 22; Kol. 3:13).

Jeoba no sési pʼikuarheraspti jiáni enga Moisesi sántku no úpka pʼíngukuarhini jini desierturhu. Joperu puákuntaspti. Ka Biblia uandasïndi eska Moisesi ambakiti ejemplu máeska jimboka kʼéri jakajkukua ma jatsispka (Deut. 34:10; Ebr. 11:24-28). Ísïsti, Jeoba no jurajkuspti Moisesini eska inchaakupiringa Echerirhu engaksï Aiaminhapka, peru íntskuati sésikua para sánderu orhepani Paraisurhu irekani para méntkisï. Ka juchajtuchi uáka jatsini indeni kóntperatani engachi jánguarhintaaka pʼíngukuarhini (1 Kor. 9:25).