1. ¿Ambe úski Tata Diosï Jeoba mándani juchantsïni jimbo?

TATA Diosï Jeobasï úti eskachi jucha andaparhakuerapiringa imeeri kúnguarhikua jimbo (Juanu 6:44). Ju je eratsentani ambe arhikuekasïni i ambe. Enga Jeoba jingontku exeani japka iámindu kʼuiripuechani engaksï ini parhakpini jimbo irekaka, exespti ambe ma juchaari incharini: ambakiti mintsita ma enga úpiringa xénchani imani (1 Crón. 28:9). Jeobajtsïni mítesti, kurhanguchisïndijtsïni ka xénchasïndijtsïni. ¿A no eskajtsïni i ambe kánikua sési pʼikuastasïnga?

2. ¿Ambe uandaski Jesúsi, parajtsïni jarhuatani kurhanguni eskajtsïni Tata Diosï Jeoba mándani arhini juchantsïni xénchasïnga?

² Tata Diosï Jeoba, kánikuaksïni xénchasïndi ka ístu kánikua xénchaasïndi mándani juchaari erachichani. Jesúsi uandantasti ambe ma, parachi jucha úni kurhanguni i ambe. Enga karichi eranguti ma 100 karichichani kaajka ka tsïtani ma, ¿ambe uaa? Jesúsi uandaspti: “¿No jurajkuapirini máteru nobentainuebe karichichani korralirhu para nirani juátarhisï jirinhantani imani enga tsïtapiringa”? Enga exentaaka, no ikiauati imani jingoni, sánderu sési, sési pʼikuarheraati. ¿Ambe arhikuekasïni? Eska para Tata Diosï Jeoba, mándani karichi jukaparhakueska. Jesúsi uandasti: “Chaari Taati auandarhu anapu nómindu uékasïndi eska ma íni jásï sapichu tsïnchiaka” (Mat. 18:12-14).

3. ¿Ambechi exea íni jorhenguarhikua jimbo?

³ Nóchi uékasïnga uandani o úni ambe ma, enga no sési pʼikuastauaka juchaari erachichani. Íni jorhenguarhikua jimbo, mókuantauakachi íni kurhamarhikuechani: ¿nénachi jámaa parachi no no sési pʼikuastaani máteruechani? ka ¿ambechi uaa engajtsïni nema no sési pʼikuastaska juchantsïni? Peru ju je orheta uandani “ma sapichuni” enga Mateu kapitulu 18 jimbo jaka.

4. ¿Néksï jindeeski ʻma sapichuʼ?

⁴ ʻMa sapichuʼ jindeestiksï iámindu Jesúsiri chúxapaticha. No arhiparini na engaksï xáni jatiriuaka, iáminduechaksï ísïisti “eska  sapiicha” jimbokaksï jurajkutakuarhesïnga para ima jorhendaani (Mat. 18:3). Nájkirukaksï uápuru nanisï anapueuaka ka mámaru járhati pʼindekuechanksï jatsiani, ka mámaru ambeksï tsitini ka mámaru jáxenksï, iáminduksï mintsinharhisïndi tata Jesukristuni. Ka ima, kánikua xénchaasïndi iáminduechani (Mat. 18:6; Juanu 1:12).

5. ¿Néna pʼikuarherasïni Tata Diosï Jeoba enga nema no sési kaajka o no sési úkuni imeeri marhuarini ma?

⁵ Tata Diosï Jeoba kánikua jukaparharaasïndi iámindu íchani engaksï jindeeka ʻma sapichuʼ. Parachi úni kurhanguni na enga exeajka, ju je eratsentani na engachi exeajka jucha sapiichani. Para jucha, kánikuaksï jukaparhakuesti. Uékasïngachi kuájchakuani jimbokaksï ima nótki xáni uinhapesïnga, ka nijtuksï xáni ambe míteni eskaksï kʼératicha. Ísïisti, juchachi no tsitisïnga eskaksï nemani no sési kámaaka, peruchi sánderu no sési exesïnga engaksï sapini ma no sési kámajka ka niáranchi jamberi ikiani. Tata Diosï Jeoba sáno májkueni úsïndi. Ima kuájchakuasïndi imeecheri jántspirichani. Ka enga nema no sési úkuajka o no sési kaani, no sési exesïndi ka asta niárani jamberi ikiani (Is. 63:9; Mar. 9:42).

6. Eska na uandajka 1 Korintu 1:26-29, ¿néna exeasïni kʼuiripu Jesúsiri chúxapatichani?

⁶ ¿Ambe jimbojtuksï Jesúsiri chúxapatichani ísï exeasïni eska ʻma sapichuʼ? Kʼuiripu, ¿neechani exeasïni komu jukaparhakua ambe? Jatsikuarherichani, imeechani engaksï kánikua mítekateka ka imeechani engaksï uinhapikua jatsika. Peru sáno iámindu Jesúsiri chúxapaticha, nóksï ísïisti. Ísï jimbo, kʼuiripuechaksï ísï exeasïndi komu ʻma sapichuʼ, jo, komu nema engaksï no jukaparhakueka (arhinta je 1 Korintu 1:26-29). Peru Tata Diosï Jeoba, no ísï exeasïndi.

7. ¿Néna uékasïni Tata Diosï Jeoba eskachi exeauaka juchaari erachichani?

⁷ Tata Diosï Jeoba xénchaasïndi iámindu imeeri jántspirichani no arhiparini engaksï ióni páni jakaia marhuakuni o nótki xáni. Enga Tata Diosï Jeoba xáni jukaparharaajka juchaari erachichani juchajtuchi jatsiska para ísï úni. Uékasïngachi ʻxénchaani iámindu ermanuechaniʼ, ka no máruechantku (1 Ped. 2:17). Jatsiskachi para jánguarhintani ambe uéjki úni parachi kuájchakuani juchaari erachichani. Engachi kuenta íntskukuarhiska eskachi no sési pʼikuastaska erachini ma, nóchi jatsiska para eratseni eska jukari sóntku no sési exesïnga ambe ma ka eska jatsiska para mirikurhini. ¿Ambe úpirini úni eskaksï máru sóntku no sési exeaka ambe ma? Ménisï jindeesïndi na engaksï tʼarhexeranhaka ka jimbokaksï menusi pʼikuarherasïnga eska máteruecha. O ménisï, jindeesïndi jimbokaksï no kánikua ióni páxaka jorhenguarhini Biblieri ambe ka nóksï kurhangusïndi útasï eskachi no perfektueska. No arhiparini ambe enga jimboeuaka, jatsiskachi para jánguarhintani sési peentani ambe ma. Ístu, enga nema jukari sóntku no sési exejka ambe ma, jatsisti para jiókuarhini eska no sési jarhaska ka eska jatsiska para mójtakurhini. Kánikua jukaparhakuesti eska ísï uaaka para ima sési jarhani ka ístu máteruecha.

8. ¿Ambe úspi eskaksï ménderueni eratsepiringa Jesúsiri chúxapaticha?

⁸ ¿Andisï Jesúsi uandapi ʻma sapichueriʼ? Imeeri chúxapatichaksï kurhamarhispti: “¿Né sánderu kʼéri ambeeski auandarhu anapu juramukuarhu?” (Mat. 18:1). Imani jurhiatikuecha jimbo, uánikua judiuechaksï kánikua jukaparharasïrendi enga mítekatepiringa ka jatsikuarherini. Achamasï ma enga mítekuka uandasïndi: “Kʼuiripuechaksï kánikua tsitisïreendi eskaksï máteruecha míteapiringa, eskaksï sési kámaapiringa, eskaksï jaiapanheantaapiringa ka eskaksï janhanharhiapiringa”.

9. ¿Ambeksï jatsispi para úni Jesúsiri chúxapaticha?

⁹ Jesúsi mítespti eskaksï imeeri chúxapaticha jatsispka para kánikua jánguarhintani paraksï no ísïini eskaksï naepka máru judiuecha. Ima arhiaspti: “Ima enga sánderu kʼéri ambeeka chánksïni jingoni, ísï jamee komueska ima enga sánderu sapichitu ambeeka. Ka ima enga juramukua  jatsika, ísï jamee komueska ma jántspiri” (Luk. 22:26). Parachi ísï jámani eska ima enga sánderu “sapichitu” ambeeka, jatsiskachi para eratsentani eskaksï máteruecha sánderu kʼéri ambeeska eska jucha (Filip. 2:3). Engachi sánderu jánguarhintaska ísï eratseni, menusichi no sési pʼikuastauaka máteruechani.

10. ¿Náki konseju íntspiski Pablu engachi jatsika para jukaparharani?

¹⁰ Iámindu erachicha ka pirenchicha sánderuksï kʼéri ambeesti juchantsïni jingoni, ambe ma jimbo. Ka i ambe fásilisti para exeni engachi imani ambe exekuauaka enga ambakiti ambeeka. Jatsiskachi para kánikua jukaparharani ambe enga apostuli Pablu arhiapka Korintu anapuechani: “¿Néndi tántiarisïni tʼu eskakeni sánderu kʼéri ambe exesïnga ka eska máteruni? ¿Ori ambe jatsiski tʼu engari no intsïnhaka? Jimajkani engari intsïnhaka, ¿andisïri teparakuarhijki komusiekari no intsïnhapiringa?” (1 Kor. 4:7). Ísï jimbo, ju je no uékani eska juchajku exenhaaka o sánderu kʼéri pʼikuarherani eska máteruecha. Enga erachi ma ambarhati arhijtsïkperatechani nitamataraajka o pirenchi ma uánikuechani jorhendaani jarhani Biblieri ambe, Tata Diosï Jeobasï jatsiti para kʼéri ambe exenhani ini ambe jimbo.

11. ¿Ambechi jorhenguarhisïni ima uandantskua jingoni enga Jesúsi uandapka juramutiri ka jántspiriri?

¹¹ Enga Jesúsi na arhiapkia imeeri chúxapatichani eskaksï no jámapiringa no sési pʼikuastaani máteruechani, aianguaspti uandantskua ma juramutiri ma imeeri jántspiri ma jingoni. Jántspiri kánikua kánguxapti juramutini enga no méni úpiringa maiamuntani, peru juramuti tekaakuntaspti jántspirini. Sánderu tátsekua, i mismu jántspiri no uékaspti tekaakuntani máteru jántspirini sáni enga kánguni japka. Jimbosï, juramuti ónhatarkuarhipti imani jántspirini enga no sáni pʼamojkpitiipka. ¿Ambechi jorhenguarhisïni? Jesúsi uandaspti: “Ístuksïni úchiati juchiiti Taati auandarhu anapu engajtsï no mintsita jingoni puákuantaska chaari ermanutichani” (Mat. 18:21-35).

12. Engachi no tekaakuntajka nemani, ¿nénachi no sési úkuasïni máteruechani?

¹² Ambe enga ima jántspiri úpka no sési úkuspti imani, peru ístu máteruechani. Para ueenani, no sési kámaspti imeeri pámpirini ka “ónhatarkuarhini astaka maiamuntapiringa iámindu eska xáni kánguenga”. Ka, ístu, no sési úkuaspti máteru jántspirichani engaksï exeni japka ambe úkuarhini japka. Jesúsi uandaspti: “Engaksï na exepka máteru jántspiricha, kánikuaksï uandanhiaspti” (Mat. 18:29-31). Májkueni, ambe engachi jucha újka, ístu uaati no sési úkuani máteruechani. Engajtsïni nema no sési kámaska ka juchachi no tekaakuntani, ¿ambe uaa úkuarhini? Orheta, no sésichi úkusïnga imani jimbokachi no tekaakuntasïnga ka nóchi xarhatakusïnga eskachi xénchasïnga, ka asta niáranchi jamberi nóteru uandajpania. Ka ístu, no sésichi úkuasïnga erachichani kúnguarhikuarhu jimbokaksï ima no sési pʼikuarheraaka engaksï exeaka eskachi jucha no úsïnga sési pájperani imani jingoni engajtsïni no sési úchika.

13. ¿Ambechi jorhenguarhisïni imani ambe jingoni enga prekursora ma nitamakuarhiska?

¹³ Tekaakuantani juchaari erachichani sésijtsïni úchisïndi juchantsïni ka ístu úsïndi eska máteruecha sési pʼikuarheraaka. Ísï úkuarhinchasti pirenchi ma, engachi Crystal arhiraaka. Ima miásïndi na enga xáni no sési pʼikuastenga pirenchi ma kúnguarhikuarhu: “Imeeri uandakuechaksï xáni no sési pʼikuastasïreendi eska kuchiiu jingoni atakuarhini. Engachi uérenga aianhpini, ji no jamberi uékasïnga ima mismu karru jimbo nirani enga ima nirenga. Ueenaspka kómu pʼikuarherani ka nóteru tsípikua jingoni jámania”. Crystal exesïrendi eska no no sési jarhaspka ísï pʼikuarherani. Peru erakuspti no jatanhetspini ka nijtu jukari uandanhiani imani jimbo. Sánderu sési, kaxumbikua jingoni úspti ambe enga uandeenga jorhenguarhikua “Perdonemos de corazón”, enga La Atalaya del 15 de octubre de 1999 jimbo japka. Ísï jimbo, tekaakuntaspti pirenchini. Uandasïndi: “Iásï kurhangusïngia eskachi iáminduecha jatsiska  para pauani pauani jánguarhintani ísïini eska Tata Diosï Jeoba ka eskajtsïni Tata Diosï Jeoba pauani pauani tekaachintasïnga juchantsïni. Sánderuni agustu pʼikuarherasïngia ka ménderuni tsípikua jingoni jámasïngia”.

14. a) Eska na uandajka Mateu 18:21, 22, ¿ambe úkua jukanchasïreeni apostuli Pedru, ka ambejtsï jorhenguarhisïni chá na enga mókukuntapka Jesúsi? b) ¿Ambejtsïni uaa jarhuatani engachi jucha májkueni nitamakuarhiaka?

¹⁴ Míteskachi eskachi jatsiska para tekaatsperantani, jimboka i ambesï jurhimbikueka. Peru ménisï útasï ísï úkua jukaati ísï úni. Ménisï apostuli Pedrujtu niáraspti ísï úkuarhinchani (arhinta je Mateu 18:21, 22). ¿Ambejtsïni uaa jarhuatani? Orheta, eratsentani na engajtsïni xáni uánikua xanhari Tata Diosï Jeobajtsïni tekaachentakia juchantsïni (Mat. 18:32, 33). Nóchi jukanchaska eskajtsïni tekaachentaaka, perujtsïni ima méntkisï tekaachintasïndi (Sal. 103:8-10). Ístu, “uétarhisïndi eskachi juchajtu ísï uékperaaka máteru ka máteruni jingoni”. Ísï jimbo, tekaatsperantani no jindeesti ambe ma engachi uaaka erakuni sini ísï úni o nómbe; jatsiskachi para ísï úni juchaari erachicha jingoni (1 Juanu 4:11). Máteru ambe engajtsïni jarhuataaka jindeesti eratsentani ambe úkuarhisïni engachi tekaatsperantajka. Jarhuatasïngachi imani kʼuiripuni engajtsïni no sési kámaaka, jarhuajpesïngachi parachi márku jarhani kúnguarhikuarhu, kuájchakusïngachi juchaari pájperakua Jeoba jingoni ka sésichi pʼikuarherantasïnga (2 Kor. 2:7; Kol. 3:14). Máteru ambe engajtsïni jarhuataaka, jindeesti kómarhini Tata Diosï Jeobani, jimboka Tata Diosï Jeobasï uéjka eskachi jucha sési pájperantaaka. Ju je no jurajkuni eska Noambakiti uaaka eskachi jucha no uaaka sési pájperani juchaari erachicha jingoni (Efes. 4:26, 27). Uétarhinchasïngachi Tata Diosï Jeobaeri jarhuajperatani parachi no jámani imani ambe úni enga Noambakiti uéjka.

15. Eska na uandajka Kolosasi 3:13, ¿ambechi uaa úni enga erachi o pirenchi ma uaaka ambe ma engajtsïni no sési pʼikuastaaka?

¹⁵ ¿Ka ambechi uaa enga erachi ma úska ambe ma engajtsïni kánikua no sési pʼikuastajka juchantsïni? Enga ísï úkuarhiaka, ju je jánguarhintani parachi  seguirini sési pájperani. Kómarhiakachi Tata Diosï Jeobani ka aiangukuarhiakachi na engachi pʼikuarherajka. Kurhakuakachi eska újchakuraaka imani engajtsïni no sési pʼikuastajka ka eskajtsïni jarhuataaka parachi imani ambakiti ambe exekuni enga Jeoba exekuka ka enga jimbo jukaparharajka (Luk. 6:28). Engachi no úska tekaakuntani, ju je eratsentani nénachi uaa sési uandontskuarheni imani jingoni. Méntkisï sánderu sésisti eratseni eska no uékaska merujtsïni no sési pʼikuastani (Mat. 5:23, 24; 1 Kor. 13:7). Engachi uandontskuarheni jauaka imani jingoni, ju je eratsentani eskajtsïni no meru uékaska no sési pʼikuastani. Peru ¿enga no uékaskia sési pájperantani juchantsïni jingoni? Bibliajtsïni arhisïndi: “Tekaatsperanta je ka puátsperantani”. Ju je no eratseni eskachi nóteru uaakia úni ambe ma (arhinta je Kolosasi 3:13). Sánderu jukaparhakua ambe, ju je no jatanhekuni, jimboka i ambe úpiringa no sési úkuni juchaari pájperantani Tata Diosï Jeobani jingoni. Ju je no méni jurajkuni eska ambe ma uaaka úni eskachi jucha nóteru marhuakuakia Tata Diosï Jeobani. Ísïchi xarhataaka eska sánderu jukaparhakua ambe para jucha jindeeska xénchani Tata Diosï Jeobani (Sal. 119:165).

16. ¿Náki responsabilidadichi jatsiski mándani jucha?

¹⁶ ¡Na engachi xáni jukaparharajka “májku úkuarhintatini” jarhani ka Tata Diosï Jeobani marhuakuni enga jindeeka “solu máechakua karichi eranguti”! (Juanu 10:16). Libru Organizados para hacer la voluntad de Jehová, pájinarhu 165, uandasïndi: “Juchaari responsabilidadi jindeesti úni eskaksï erachicha márku úkuarhintatini jauaka”. Ka ístu uandasïndi: “Sánderuchi sési pájperaaka juchaari erachicha jingoni engachi jánguarhintaska méntkisï ísï exeani eska Jeoba na exeajka”. Imajtsïni iáminduechani ísï exesïndi komueska ʻsapichituʼ ka kánikuajtsïni jukaparharasïndi. Ka ísïchisï jatsika para exeani juchaari erachichani. Ima exesïndi ka jukaparharasïndi iámu ambe engachi újka para jarhuataani ka kuidariuani (Mat. 10:42).

17. ¿Ambechi eratsetixaki úni?

¹⁷ Kánikuachi xénchaasïnga juchaari erachichani. Ísï jimbo, sésichi eratsekata jatsiska “jánguarhini no ma ambe jimbo ikiatani ma ermanuni o pekadu úrani” (Rom. 14:13). Ju je méntkisï eratseni eskaksï juchaari erachicha sánderu kʼériska eska jucha ka mintsita jingoni tekaakuantani. Ju je no jurajkuni eska ambe enga uaaka erachi ma, uaaka úni eskachi jucha jurajkuaka Tata Diosï Jeobani. Sánderu sési, ju je “méntku jauenani úni jarhani ambe engachi jimbo sési pájperani jauaka ka uinhaperperantanchi” (Rom. 14:19).