1. Engaksï uánikua kʼuiripuecha kurhanguarhipka ambeksï jatsispi para úni, ¿ambeksï mókuminhaspi?

UÁNIKUA kʼuiripuechaksï niraspti Jerusaléni. Uápuru paisicharhu anapuesptiksï ka táchani jásï idiomechanksï uandaasïreendi. Indeni jurhiatikua jimbo, k’éri ambe úkuarhispti: ma repentku máru judiuechaksï ueenaspti imani kʼuiripuecheri idiomechani jimbo uandani. Joperu ambe enga sánderu jukaparhakuepka, jindeespti ambe engaksï uandapka ima judiuecha ka ambe enga arhiapka apostuli Pedru iáminduechani. Máru ambe enga ima arhiapka jindeespti eskaksï úpiringa p’ímutantskateeni engaksï jakajkupiringa tata Jesukristuni. Ima uandakuechaksï, mintsitarhu niárakuaspti ka kurhanguarhisptiksï: “¿Ambechi uaa jucha?”. Ka Pedru mókukuaspti: “Bautisarikuarhi je iáminduecha” (Uku. 2:37, 38).

2. ¿Ambechi exea ini jorhenguarhikua jimbo? (Exe je fotuni enga ueenakuarhu jaka ini rebistarhu).

² Ambe enga tátsekua úkuarhipka, ískujtsïni pakatasïndi: ima jurhiatikua, ma 3,000 kʼuiripuechaksï ísï itsï atakuarhispti ka ísïksï niáraspti Kristueri chúxapati úkuarhini. Ixú ueenaspti úkuarhini k’éri ánchikuarhita enga Jesúsi íntsaapka imeeri chúxapatichani ka enga iásï jamberi úkuarhini jaka. Iásï, no solu uétarhiati namunitku orecha para jarhuatani nemani paraka niáraaka itsï atakuarhini. Jamberi ióndaati para nema niárani ísï úni. Imeecha, engaksï jorhendani jaka nemani Biblieri ambe, sésiksï mítetixati eska uétarhisïnga kánikua jánguarhintani para úni Jesúsiri chúxapatichani uaani. Ini jorhenguarhikua jimbo, exeakachi ambe engachi uaaka úni para jarhuataani jorhenguarhirichani paraksï niárani itsï atakuarhini.

3. Eska na uandajka Mateu 28:19, 20, ¿ambe jatsiski para úni jorhenguarhiri para niárani itsï atakuarhini?

³ Ante de itsï atakuarhini, jorhenguarhiri jatsisti para úni ambe enga Biblia jorhentpijka (arhinta je Mateu 28:19, 20). Enga ísï újka, ísïsïndi eska ima acheeti jánhaskati enga Jesúsi uandapka enga kʼerenda ma jimbo kánikua jarhakupka para úni imeeri kʼumanchikuani (Mat. 7:24, 25; Luk. 6:47, 48). Ju je exeni iásï tanimu ambe engachi uaaka úni para jarhuatani jorhenguarhirini úni ambe enga jorhenguarhini jaka.

4. ¿Ambechi uaa úni para jarhuatani jorhenguarhirini para niárani itsï atakuarhini? (Ístu exe je rekuadruni “ Jarhuata je jorhenguarhirini para jatsiani metechani ka eska niáraaka ísï úni”).

⁴ Ju je jarhuatani jorhenguarhirini para jatsiani metechani. ¿Andisï xáni jukaparhakue? Ju je eratseni arini ejempluni: engachi iauanisï uékaaka nirani karru jimbo, jamberichi anhaxurhipaaka máru lugaricharhu enga ambakiti ambe jaka para exeni. Engachi ísï úska nóchi xáni iauani exeaka jima engachi uékani jaka niárani. Sáno májkueni, enga jorhenguarhiri ma jatsikukurhijka meta ma ka no ióni jimbo niárani ísï úni, kuenta íntskukuarhisïndi eska ístu uaaka niárani itsï atakuarhini. Uaakachi úrani rekuadruni “U je ini ambe”, librueri Tsípikua jingoni ireka je para jarhuatani jorhenguarhirini jatsikukurhiani metechani. Engachi na kʼamaraakia jorhenguarhikua ma, ju je arhini néna jarhuataa i jorhenguarhikua paraka niáraaka úni imeeri metani. Engachi uékaaka arhini eska ístu uaaka jatsikukurhiani máteru metechani, uaakachi karani jima enga arhijka “Máteru ambe engajtsï uaaka úni”. Ju je méntkisï úrani ini partini para exeni jorhenguarhirini jingoni ambe enga uaaka úni no ióni jimbo ka sánderu orhepani.

5. Eska na arhijka Markusʌ 10:17-22, ¿ambe arhispi Jesúsi achamasïni ma enga jatsikuarheripka, ka andi?

⁵ Jarhuata je jorhenguarhirini para mójtakukuarhini (arhinta je Markusʌ 10:17-22). Jesúsi arhispti achamasïni enga jatsikuarheripka eska atarantapiringa imani ambe enga xáni  jatsikuarhepka nájkiruka mítepka eska úkua jukanchapiringa (Mar. 10:23). ¿Andisï ísï arhipi? Jimboka xénchasïrenga. Jamberichi ménisï no tekaani jauaka arhini jorhenguarhirini eska jatsiska para úni ambe enga jorhenguarhini jaka, jamberi jimbokachi eratseaka eska no preparadu jarhaska. Ísïisti, tiempu pásïndi para ma nóteru únia imani ambe enga no sési jaka (Kol. 3:9, 10). Joperu engachi no ióndaska uandontskuarhekuni indeeri ambe, sánderu sóntku mójtakukurhiati. Engachi ísï úska, xarhatakunchi jauaka eskachi xénchasïnga (Sal. 141:5; Prov. 27:17).

6. ¿Andisï xáni jukaparhakue eskachi kurhamarhiaka jorhenguarhirini na exesïni imani ambe enga jorhenguarhini jaka?

⁶ Jukaparhakuesti eskachi kurhamarhiaka jorhenguarhirini, na exesïni imani ambe enga jorhenguarhini jaka. I ambejtsïni jarhuataati exeni ambe enga kurhangujka ka jakajkuni. Engachi pʼindeska ini ambe kurhamarhini, sánderuchi no úkua jukanchaaka uandontskuarheni kʼérati uandanhiatecheri ambe sánderu orhepatini. Libru Tsípikua jingoni ireka je, uánikua kurhamarhikuechani jukaasti engajtsïni jarhuatajka míteni na enga jorhenguarhiri exejka ambe ma. Pori ejemplu, jorhenguarhikua 4 arini kurhamarhikua jukasti: “¿Néna pʼikuarherajki Tata Diosï Jeoba engajtsï chá úrajka imeeri nombrini?”. Ka jorhenguarhikua 9 ari kurhamarhikua jukasti: “¿Ambe ka ambejtsï uékapirini arhini Tata Diosïni chaari kómarhikuecharhu?”. Ueenani jámani, jamberi jorhenguarhiri úkua jukanchaati i járhati kurhamarhikuechani mókuantani. Uaakachi jarhuatani paraka eratsentaaka úrapariani Biblieri karakatechani ka imajenichani engaksï jorhenguarhikuarhu jaka.

7. ¿Nénachi uaa úraani eksperiensiechani para jarhuatani jorhenguarhirini?

⁷ Enga jorhenguarhiri na kuenta íntskukurhiakia ambe enga jatsika para úni, ju je eksperiensiechani aianguani para jarhuatani ísï úni. Por ejemplu, enga jorhenguarhiri no káni nirajka tánguarhikuecharhu, uaakachi exerani bideuni Tata Diosï Jeoba uandanhiasïndi jíndeni jimbo enga partirhu jaka “Ístu exe je ini ambe” enga jorhenguarhikua 14 jimbo jaka. Uánikua jorhenguarhikuecha librueri Tsípikua jingoni ireka je, jukaasti eksperiensiechani partirhu “Jorhenguarhi je sánderu ambe” o “Ístu exe ini ambe”. * Ju je no terukutantani jorhenguarhirini máteru kʼuiripuni jingoni, arhiparini: “Enga ima úska, tʼujturi uaaka”. Ju je jurajkukuni eska ima mismu exeaka eska uaaka ísï úni. Ju je imeeri ambe uandani enga jarhuataka bideueri anapu kʼuiripuni para ísï úni eska Biblia na jorhentpijka, komu karakata ma enga jukaparhakueka o ambe ma enga ima úka. Méntkisï engachi uaaka, ju je exerani na enga Tata Diosï Jeoba jarhuataka imani kʼuiripuni.

8. ¿Nénachi uaa jarhuatani jorhenguarhirini paraka xénchaaka Tata Diosï Jeobani?

⁸ Ju je jarhuatani jorhenguarhirini paraka xénchaaka Tata Diosï Jeobani. Ju je exeni na engachi jatini uaaka uandontskuarhekuni na enga jásïika Tata Diosï Jeoba. Ju je jarhuatani jorhenguarhirini paraka exeaka eska Tata Diosï Jeoba felisiska ka eska méntkisï imeecha jingoni jarhasïnga engaksï xénchajka (1 Tim. 1:11, TNM; Ebr. 11:6). Ju je exerani na enga marhuakuaka enga ísï úska eska na jorhenguarhini jaka. Ka eska i ambe xarhatasïnga eska Tata Diosï Jeoba xénchasïnga (Is. 48:17, 18). Enga sánderu xénchaaka Tata Diosï Jeobani, sánderu uékaati mójtakurhini (1 Juanu 5:3).

9. Eska na arhijka Markusʌ 10:29, 30, ¿ambe jarhuataa kʼuiripuni ma paraka uaaka jurajkuni máru ambe enga úkua jukaka ka niárani itsï atakuarhini?

⁹ Paraka jorhenguarhiri ma niáraaka itsï atakuarhini, jatsisti para jurajkuni máru ambe.  Májkueni eska achamasï jatsikuarheri engachi párrafu 5 jimbo uandaka, jamberi máru jorhenguarhirichaksï jatsiati para jurajkuni jatsikuarhekua ambe, o asta ánchikuarhita ambe enga no terukuntaaka imani jingoni enga Tata Diosïri Karakata arhijka. Jamberiksï jatsiati para nóteru kúrhiania imani kʼuiripuechani engaksï no xénchajka Tata Diosï Jeobani. Ka máteruechanksï jamberi imeecheri parienticha nóteru xénchauatia jimbokaksï no uékaasïnga Jeobaeri testiguechani. Jesúsi uandaspti eskaksï máru kʼuiripuecha úkua jukanchapiringa ini ambe úni, joperu arhiaspti eska Tata Diosï Jeoba kóndintaapiringa imeeri marhuarichani familiani ma jingoni enga xénchpetika imeeri kúnguarhikuarhu (arhinta je Markusʌ 10:29, 30). ¿Nénachi uaa jarhuatani jorhenguarhirini paraka marhuakuaka i ambakiti regalu?

10. ¿Ambechi jorhenguarhisïni imani ambeeri enga Manuel uandajka?

¹⁰ Ju je amigu úkuarhini jorhenguarhiriri. Kánikua jukaparhakuesti eskachi xarhatakuaka eskachi uandanhiasïnga imani jimbo. Ju je exeni ambe enga uandajka erachi ma enga Manuel arhinhajka, enga México anapueka, imani tiempueri enga Bibliani jorhenguarhini japka: “Ante dechi ueenani Biblieri ambe jorhenguarhini, juchiiti jorhentpiririni méntkisï kurhamarhisïreendi na jarhaspi. Inde amberini sési pʼikuastasïreendi ka úsïreendi eskani aiangukuarhipiringa iámindu ambe. Exesïreenga eska meru uandanhiasïreenga jíndeni jimbo”.

11. ¿Andisï sési jaki eskachi juchaari jorhenguarhirini jingoni jauaka?

¹¹ Ísï eska Jesúsi na imeeri chúxapaticha jingoni jarheenga, ju je juchajtu májkueni úni juchaari jorhenguarhirini jingoni (Juanu 3:22). Enga ima mójtakukuarhini jaka ka engachi exeska eska sési jauaka, uaakachi pʼímarhini para jurhani juchiniu tʼireni o parachi májku k’éri exeni programani JW Broadcasting. Seguru eska ima kánikua agradesidu jauaka engachi pʼímarhiska jiáni engaksï imeeri parienticha ka amiguecha kʼuínchikua ambe jatsini jauaka, jimboka jiáni úpirindi jandiajku pʼikuarherani jarhani. Kazibwe enga Uganda irekaka, uandasïndi: “Imani tiempuni engani juchiiti jorhenguarhirini jingoni jarheenga,  kánikua jorhenguarhispka Tata Diosï Jeobaeri ambe, ísï komueska jiáni engachi Biblieri ambe jorhenguarhienga. Exeska na enga xáni uandanhiajka Tata Diosï Jeoba imeeri marhuarichani jimbo ka na engaksï xáni tsípikua jingoni irekajka. Jíjtuni ísï uékasïreenga irekani”.

12. ¿Andisï sési jaki eskajtsïni máteru aianhpiricha niuaka pámbetani engachi niuaka jorhentpini Biblieri ambe?

¹² Ju je pʼímarhiani máteru erachichani parajtsïni pámbetani Biblieri ambe jorhentpini. Jamberi ménichanchi, ísï exeaka eska sánderu fásiliska jandiajku nirani jorhentpini o imani jingoni engajtsïni sáno méntkisï pámbetajka. Joperu sánderu jarhuataati jorhenguarhirini engajtsïni máteru aianhpiricha pámbetaska. Dimitri enga Moldavia irekaka, uandantasïndi: “Aianhpiricha engaksï pámbeteenga juchiiti jorhentpirini, mámaruksï jorhentpisïrendi. Ka i amberini jarhuatasti parani ísï úni eskani na jorhenguarhini japka. Ístu, engani primeru xanhari nípka tánguarhikuarhu, no xáni kʼuratsespka jimbokani uánikua pirenchichani ka erachichani míteaspkia”.

13. ¿Andichisï jatsi para jarhuatani jorhenguarhirini tánguarhikuecharhu nirani?

¹³ Ju je jarhuatani jorhenguarhirini paraka niuaka tánguarhikuecharhu. ¿Andi? Jimboka juramukua máeska Tata Diosï Jeobaeri ka jimbokachi ísïsï kómarhijka (Ebr. 10:24, 25). Ístu, kúnguarhikuarhu anapu erachicha ísïistiksï komu juchaari familia. Engachi imeecha jingoni jarhajka tánguarhikuecharhu, ísïisïndi komueska májku k’éri ambakiti ambe arhani jarhani. Engachi jarhuataska jorhenguarhirini nirani tánguarhikuecharhu, jarhuatanchi jauaka para ima niárani itsï atakuarhini. Joperu jamberi jauati ambe ma enga no jurajkuaka ísï úni. ¿Nénachi uaa úrani libruni Tsípikua jingoni ireka je parachi jarhuatani?

14. ¿Nénachi uaa jarhuatani jorhenguarhirini tánguarhikuecharhu nirani?

¹⁴ Uaakachi úrani jorhenguarhikua 10 librueri Tsípikua jingoni ireka je para jarhuatani jorhenguarhirichani tánguarhikuecharhu nirani. Ante de petanhani i libru, arhiasptiksï máru aianhpirichani eskaksï ini jorhenguarhikuani exepiringa jorhenguarhiricha jingoni ka kánikua sési nikuaspti. Ísïisti, nóchi jatsiska para jorhenguarhikuarhu 10 jimbo niárani parachi jiáni pʼímarhini. Ju je no ióndani ka méntku pʼímarhini jarhani tánguarhikuecharhu. Jorhenguarhirichaksï mámaru járhatiisïndi ka mámaru járhati uandanhiatechanksï jatsiasïndi. Ísï jimbo, ju je exeni ambe engaksï uétarhinchajka mándani arhini ka eratsentani nénachi uaa jarhuataani. Ju je no no sési pʼikuarherani engaksï no sóntku niraska tánguarhikuecharhu, sánderu sési, ju je no kuatantani ka seguirini jarhani pʼímarhiani.

15. ¿Ambe jimbo úpirini chéni jorhenguarhiri?

¹⁵ Engachi miántajka jiáni engachi Biblieri ambe jorhenguarhini japka, ¿chésïrenchi Jeobaeri testigu úkuarhini? Jamberichi eratsenga eskachi no méni úpiringa kʼumanchikuecharhu aianhpini. O jamberichi cheenga engajtsïni juchaari familia o amiguecha niárapiringa no sési kámani. Enga ísïika, uaakachi kurhangukuni juchaari jorhenguarhirini. Jesúsi uandaspti eskaksï máru kʼuiripuecha niárapiringa ísï pʼikuarherani, joperu arhiaspti imeeri chúxapatichani eskaksï no chépiringa marhuakuni Tata Diosï Jeobani (Mat. 10:16, 17, 27; 10: 28, Táta Diósïri Uandakua Tata Jesukristueri Aiatsperakua). ¿Néna jarhuataspi Jesúsi imeeri chúxapatichani paraksï no chéni? Ka ¿nénachi uaa juchajtu májkueni úni?

16. ¿Nénachi uaa jorhendani jorhenguarhirini paraka aianguauaka máteruechani ambe enga jorhenguarhini jaka?

¹⁶ Ju je sánhani arini arhistakuni jorhenguarhirini paraka ima uaaka aianguani máteruechani ambe enga jorhenguarhini jaka. Seguru eskaksï Jesúsiri chúxapaticha chépka enga ima  axaapka paraksï nirani aianhpini. Joperu ima jarhuataaspti enga arhiapka neechanksï aianhguapirini ka ambe engaksï uandapiringa (Mat. 10:5-7). ¿Nénachi uaa májkueni úni eska Jesúsi? Engachi jarhuataska jorhenguarhirini exeni neechani uaa aianguani. Uaakachi kurhamarhini sini míti nemani enga marhuakuaka ambe ma enga Biblia jorhentpijka. Tátsekua, ju je jarhuatani jorhenguarhirini paraka uaaka sési aianguni kʼuiripuni indeeri ambe. Jiáni enga sési jauaka, uaakachi imani jingoni jorhenguarhini úraparini partichani “Máruksï i ambe uandasïndi” ka “Máruksï i ambe kurhanguarhisïndi”, librueri Tsípikua jingoni ireka je. Engachi jorhenguarhini jauaka jorhenguarhiri jingoni néna aianhpini, ju je arhistakuni néna úrani Bibliani paraka sési ka iatsitakuarhu aianhpiaka.

17. ¿Nénachi uaa úrani Mateu 10:19, 20, 29-31 para jarhuatani jorhenguarhirini mintsikani Tata Diosï Jeobani?

¹⁷ Ju je jarhuatani jorhenguarhirini paraka mintsikaaka Tata Diosï Jeobani. Jesúsi arhiaspti imeeri chúxapatichani eska Tata Diosï Jeoba xénchaasïreenga ka eska jimbosï jarhuataapiringa (arhinta je Mateu 10:19, 20, 29-31). Ju je miátantani jorhenguarhirini eska ístu Tata Diosï Jeoba imani jingoni jauaka. Uaakachi jarhuatani paraka mintsikaaka Tata Diosï Jeobani engachi kómarhiska imani jingoni ambe enga uéjka úni jorhenguarhiri. Franciszek enga Polonia irekaka, uandasïndi: “Enga juchiiti jorhentpiri kómarhikuechani uaauenga, uánikua xanhari uandasïrendi ambe engani ji uékenga úni. Engani exepka eska Tata Diosï Jeoba mókukuntasïreenga, jíjtuni jirejiresï ueenaspka kómarhini. Ka exespka na engareni Tata Diosï Jeoba jarhuatapka jiáni engani permisu kurhajkuarhipka jimbanhi ánchikuarhitarhu parani nirani tánguarhikuecharhu ka k’éri tánguarhikuarhu”.

18. ¿Néna pʼikuarherasïni Tata Diosï Jeoba enga exejka ambe engaksï xáni újka imeecha engaksï jorhendani jaka nemani Biblieri ambe?

¹⁸ Joperu engachi iásï no nemani jorhendani jakaia Biblieri ambe, ¿uaachi jarhuataani jorhenguarhirichani parakaksï niáraaka itsï atakuarhini? Jo. Joperu ¿néna? Engachi pámbetaaska máteruechani Biblieri ambe jorhentpini. Ísïisti, Tata Diosï Jeoba kánikua uandanhiasïndi imani kʼuiripuechani jimbo engaksï jorhenguarhini jaka Biblieri ambe. Ístu, jukaparharasïndi engachi jarhuataajka jorhenguarhirichani andarhierani imani ka kánikuajtsïni xénchasïndi indeni ambe jimbo (Is. 52:7).