1. ¿Andiksïsï ménichanisï jandiajku pʼikuarherajki máru Tata Diosï Jeobaeri marhuaricha?

SÁNO iáminduechachi ménisï niáraska jandiajku pʼikuarherani. Máruksï ma ratkuksïsï ísï pʼikuarherajti ka máteruechaksï ióni jamberi. Máruksï jandiajku pʼikuarherasïndi nájkirukaksï uánikuecha jingoni jarhajka. Ka máruksï úkua jukanchasïndi pʼindeni máteru kúnguarhikuarhu engaksï mótsijka. Ka máteruecha engaksï pʼindepka imeecheri familia jingoni jarhani, kánikuaksï jandiajku pʼikuarherasïndi engaksï iauanisï mótsijka. Jarhastiksï máru engaksï uarhiranchaka nemani engaksï kánikua uékenga ka kánikuaksï jirinhantasïndi. Ka máru erachicha, sánderia imeecha engaksï jimbanhika, jandiajkuksï pʼikuarherasïndi jimbokaksï imeecheri familia o amiguecha engaksï no Testigueka, nóteruksï uékasïndia kurhiani oksï no sési kaasïndi.

2. ¿Náki kurhamarhikuechanchi mókuantaua ini jorhenguarhikua jimbo?

² Tata Diosï Jeobajtsïni sési mítesti ka kurhanguchisïndijtsïni. Ísï jimbo, ima mítesti na engachi jatini jandiajku pʼikuarherajka ka uékasïndijtsïni jarhuatani. Ini jorhenguarhikua jimbo, mókuantauakachi arini kurhamarhikuechani: ¿nénajtsïni jarhuatasïni Tata Diosï Jeoba parachi no jandiajku pʼikuarherani?, ¿ambechi uaa úni engachi jandiajku pʼikuarherani jauaka? ka ¿ambechi uaa úni para jarhuataani kúnguarhikuarhu anapu erachichani engaksï jandiajku pʼikuarherajka?

3. ¿Néna xarhataspi Tata Diosï Jeoba eska pendienti jarhaspka Elíasini jimbo?

³ Tata Diosï Jeoba uékasïndi eskaksï imeeri marhuaricha méntkisï sési irekaaka. Ima no iauani jarhasti mándani arhini juchantsïni jingoni ka mítesïndi na engachi jatini chkétakuarhijka (Sal.  145:18, 19). Ju je exeni na enga Tata Diosï jarhuatapka profeta Elíasini. I ambakiti Tata Diosïri marhuari jiánisï irekaspti enga no sési jánhaskuarhini japka jini ireka Israeli. Tata Diosïri kʼérati enemiguechaksï no sési kaasïreendi imeeri marhuarichani ka Elíasinksï uékasïrendi uándikuni (1 Rey. 19:1, 2). Elíasi eratsesïrendi eska imaterkuespkia Tata Diosï Jeobaeri profeta enga pakarani japka ka jimbosï chkétakuarhipti (1 Rey. 19:10). Jirejiresï Tata Diosï Jeoba úspti ambe ma para jarhuatani Elíasini, axaspti ánjelini ma para arhini eska no jandiajku jarhaspka ka eskaksï útasï jarhaspka uánikua israelitecha engaksï sési marhuakuni japka Tata Diosïni (1 Rey. 19:5, 18).

4. ¿Néna xarhatasïni Markusʌ 10:29, 30 eska Tata Diosï Jeoba uandanhiasïnga imeechani jimbo engaksï imeecheri familiaricha ka amiguecha no jarhuataajka?

⁴ Tata Diosï Jeoba mítesti eskachi uánikua ambe jurajkuska parachi úni marhuakuni. Jamberijtsïni juchaari familiaricha o amiguecha engaksï no marhuakujka Tata Diosïni, nóterujtsïni uékajtia jarhuatani. Ma xanhari, apostuli Pedru arhispti Jesúsini, jamberi jimboka sáni uandanhiani japka: “Eraa, jucha jurajkuska iámindu ambe paraksïni chúxapani, jimajkani ¿ambechkaderuchi andaa?” (Mat. 19:27). Uékperakua jingoni Jesúsi arhiaspti imeeri chúxapatichani eskaksï kúnguarhikuarhu anapuecha, ísïipiringa eska imeecheri familia (arhinta je Markusʌ 10:29, 30). Ka juchaari Tata Diosï Jeoba aiantspisïndi eska jarhuatauaka imeechani engaksï marhuakujka (Sal. 9:10). Ju je exeni ambechi uaa úni parachi úrani ini ambe jiáni engachi jandiajku pʼikuarherani jauaka.

5. ¿Andisï sésii eratsentani na engajtsïni jarhuatani jaka Tata Diosï Jeoba?

⁵ Eratsentani na engajtsïni jarhuatani jaka Tata Diosï Jeoba (Sal. 55:22). I ambejtsïni jarhuataati parachi exeni eskachi no jandiajku jarhaska. Carol, * pirenchi ma enga nótki uambuchani jaka ka enga imajku jindeeka Testigu imeeri familiarhu, uandasïndi: “Ambe engareni jarhuatajka parani no jandiajku pʼikuarherani, jindeesti eratsentani na engareni Tata Diosï Jeoba jarhuatakia jiáni engani uandanhiatechani jatsiapka. I ambe úsïndi eskani mintsikaaka eskarini ima méntkisï jarhuataaka”.

6. ¿Néna uaa uinhaperantaani 1 Pedru 5:9, 10 imeechani engaksï jandiajku pʼikuarherajka?

⁶ Eratsentani na enga Tata Diosï Jeoba  jarhuataani jaka máteru erachichani engaksï jandiajku pʼikuarherajka (arhinta je 1 Pedru 5:9, 10). Hiroshi, erachi ma enga iónisï imajku Jeobaeri testigueka imeeri familiarhu, uandasïndi: “Kúnguarhikuarhu fásilisti exeni eskaksï iáminduecha jatsiasïnga uandanhiatechani, míteni eskaksï iáminduecha jánguarhintaxaka para sési marhuakuni Tata Diosï Jeobani, uinhaperantasïndijtsïni juchantsïni engachi no jatsika juchaari familiani jurhimbikuarhu”.

7. ¿Nénaksïni jarhuatasïni chánksïni kómarhikua?

⁷ Ju je pʼindeni kómarhini, arhintani Bibliani ka tánguarhini. Kánikua jukaparhakuesti eskachi uénhekuarhiaka ka eskachi aianguaka Tata Diosï Jeobani na engachi pʼikuarherajka (1 Ped. 5:7). Ju je exeni ambe enga uandantajka Massiel, pirenchi ma enga sapichku jaka, enga imeeri familia nóteru kasupkia jiáni enga ima uénapka marhuakuni Tata Diosï Jeobani: “Ma ambe engarini jarhuataka parani nóteru jandiajku pʼikuarherania, jindeesti mintsita jingoni kómarhini Tata Diosï Jeobani. Ima ísïisti komueska juchiiti Taati. Pauani pauani kómarhisirenga uánikua uelta ma jurhiatikua jimbo ka aiangukuarhisïreenga na engani pʼikuarhereenga”.

8. ¿Nénaksïni jarhuatasïni arhintani ka eratsentani Tata Diosïri Karakatani?

⁸ Ístu kánikua jukaparhakuesti pauani pauani arhintani Tata Diosïri Karakatani ka eratseantani ejempluechani engajtsïni xarhatachejka na engajtsïni xáni xénchajka Tata Diosï Jeoba. Bianca, pirenchi ma enga pauani pauani jatsijka para tekaantani enga imeeri familia no sési ambe arhijka, uandasïndi: “Kánikuarini jarhuatasïndi arhintani ka eratseantani Biblieri anapu istoriechani ka eksperiensiechani Tata Diosï Jeobaeri marhuaricheri engaksï sáno májkueni ambe nitamakuarhika eska ji”. Máru erachichaksï memoria jimbo jorhenguarhiasïndi karakatechani engaksï uinhaperpintajka, komueska Salmo 27:10 ka Isaías 41:10. Máteruechaksï úraasïndi grabasionichani engaksï prepararikuarhini jauaka para tánguarhikuecha o Biblieri arhintskuani kurhaani. Exestiksï eska i ambe jarhuataasïnga paraksï no xáni jandiajku pʼikuarherani.

9. ¿Nénaksïni jarhuatasïni chánksïni nirani tánguarhikuecharhu?

⁹ Jatsiskachi para jánguarhintani parachi nirani tánguarhikuecharhu, jimbokajtsïni uinhaperantasïnga ka ístuchi úsïnga sési míteani erachicha (Ebr. 10:24, 25). Massiel engachi párrafu 7 jimbo exeka, uandantasïndi: “Nájkirukani no kánikua uandaripka, uandaspka eskani jánguarhintapiringa iámu tánguarhikuecharhu nirani ka komentarini. I amberini jarhuatasti parani sési pʼikuarherani kúnguarhikuarhu anapu erachicha jingoni”.

10. ¿Andisï xáni jukaparhakue eskachi ima erachicheri amigueuaka engaksï sési marhuani jaka?

¹⁰ Ju je imeecheri amigueni engaksï sési marhuakuni jaka Tata Diosïni. Ju je ima erachicheri amigueni engaksï ambakiti ejemplu máeuaka  para jucha, nájkirukaksï no májku jatiriuaka o májku lugari anapueni eska jucha. Bibliajtsïni miátantasïndi eskaksï “jatiricha jánhastiiska” (Job 12:12). Peru ístu erachicha engaksï jatirikia uánikua ambeksï uaati jorhenguarhini tumbiicheri. Dabidi sánderu sapichuespti eska Jonatani, joperuksï niáraspti kánikua sési pájperani (1 Sam. 18:1). Tsimarhanksï jarhuajperaspti paraksï Tata Diosï Jeobani marhuakuni, nájkirukaksï kʼérati uandanhiatechani jatsiapka (1 Sam. 23:16-18). Irina, pirenchi ma enga imajku Testigueka imeeri familiarhu, uandasïndi: “Juchaari kúnguarhikuarhu anapu erachicha uaatiksï niárani jindeeni komueska taaticha o ermanuecha. Tata Diosï Jeoba uaati úraani parakaksï ísïiuaka eska juchaari familia”.

11. ¿Ambechi uaa úni parachi ambakiti amiguechani jatsiani?

¹¹ Jamberi para máru, no xáni fásiliti jimbanhi amiguecha jatsiani, sánderia engaksï no xáni uandarika. Ju je exeni ambe enga uandantajka Ratna, pirenchi ma enga no sési kánhapka jiáni enga jorhenguarhipka jurhimbikua ambe. Uandasïndi: “Exespka eskani uétarhinchasïreenga eskajtsïni kúnguarhikuarhu anapu erachicha jarhuatapiringa”. Jamberichi úkua jukanchajka aiangukuarhini nemani na engachi pʼikuarherajka, joperu ísïchisï uaaka sési pájperani nemani jingoni. Juchaari amiguechajtsïni uékasïndi uinhaperantani ka jarhuatani, joperuchi jatsiska para aianguani néna engajtsïni uaaka jarhuatani.

12. ¿Nénajtsïni jarhuatasïni parachi úni ambakiti amiguechani jatsiani engachi uérajka aianhpini?

¹² Uérani aianhpini máteru erachicha jingoni, úsïndi eskachi ambakiti pájperakua ma jatsiaka imeecha jingoni. Carol engachi párrafu 5 jimbo exeka, uandasïndi: “Úska jatsiani ambakiti amiguechani jimbokani uérasïreenga aianhpini pirenchicha jingoni ka ístu engani ueenga máteru ambe parani Tata Diosïni marhuakuni ka desde iónisïa Tata Diosï Jeoba úraastia ini amiguechani parajtsïni jarhuatani”. Ísïisti, kánikuajtsïni marhuachesïndi ima erachicha jingoni sési pájperani engaksï sési marhuani jaka. Tata Diosï Jeoba uraasïndi parajtsïni jarhuatani engachi no sési nitamakuarhini jarhajka, komu jiáni engachi jandiajku pʼikuarherajka (Prov. 17:17).

13. ¿Ambechi jatsiski para úni iáminduecha?

¹³ Iáminduechachi uaaka úni eska kúnguarhikuarhu sési pájperanhaaka ka xénchperanhani. Ísï, no nema jandiajku pʼikuarheraati (Juanu 13:35). Ambe engachi uandaaka ka úni, uaati eskaksï máteruecha sési pʼikuarheraaka. Pirenchi ma miásïndi: “Engani jorhenguarhika jurhimbikuani, kúnguarhikua niáraspti jindeeni juchiiti familia. Engajtsïni no jarhuatapiringa, no méni niárapiringa Jeobaeri testigueni”. ¿Ambechi uaa úni paraksï imeecha engaksï jandiajku jaka jurhimbikuarhu sési pʼikuarheraaka kúnguarhikuarhu?

14. ¿Nénachi uaa imeecheri amiguecheni engaksï jimbanhika kúnguarhikuarhu?

¹⁴ Ju je jánguarhintani amigu úkuarhi jimbanhicha jingoni. Uaakachi ísï úni engachi sési erokaaska jimbanhichani kúnguarhikuarhu (Rom. 15:7). Joperu no nomasi uétarhisïndi sési uandajpaani, sino niárani imeecheri amiguecheni. Ísï jimbo, ju je sési kaani ka xarhatani eskachi uandanhiasïnga imeecha jimbo ka jánguarhintani kurhangukuani ambe engaksï nitamakuarhini jaka, peru jingontku parachi no jámani inchaakukuani imeecheri irekuarhu. Máruksï úkua jukanchasïndi uandani na engaksï pʼikuarherajka. Ísï jimbo, jingontkuchi jámaaka paraksï no ísï pʼikuarherani eskachi jucha afuersa uékasïnga eskajtsïni aianguaka ambe engaksï pʼikuarherajka. Sánderu sési, ju je uékperakua jingoni kurhamarhikuechani úkuani ka jingontku kurhajchani. Úpiringachi uénani kurhamarhiani nénaksï niáraski ima míteni Tata Diosï Jeobani.

15. ¿Nénaksï uaa erachicha engaksï sánderu ióni páni jakaia marhuakuni Tata Diosï Jeobani, jarhuataani máteru erachichani kúnguarhikuarhu?

 ¹⁵ Engaksï orhejtsïkuticha ka imeecha engaksï ióni páni jakaia marhuakuni Tata Diosï Jeobani, uandanhiajka máteruecha jimbo, kúnguarhikua sánderu andarhierasïndi Tata Diosï Jeobani. Melissa enga imeeri amamba jurhimbikuarhu kʼuiriperaka, uandasïndi: “No úpiringa ji uandakuechani jingoni diosmaiamukua arhiani iámindu imani erachichani engajtsïni ísï kámaka eska imeecheri uájpa, méntkisï engani uétarhinchajka nemani jingoni uandontskuarheni, nema jima jarhasïndi parareni kurhajchani”. Ju je exeni ambe enga uandantajka Mauricio, tumbi ma enga jandiajku pʼikuarherapka jiáni enga imeeri jorhentpiri jarharipka kúnguarhikuani. “Ma ambe engareni sánderu jarhuatapka, jindeespti eskaksï orhejtsïkuticha uandanhiasïrenga jíndeni jimbo, jánguarhintasïrendiksï uandontskuarheni jíndeni jingoni, pámbetasïrendijtsïni aianhpikuarhu ka aiangusïrendijtsïni jukaparhakua ambe engaksï jorhenguarhienga Bibliarhu ka astaksï nirasïrendi chʼanani jíndeni jingoni”. Iásï Melissa ka Mauricio, Beteliksï marhuaxatiia.

16, 17. ¿Nénachi uaa jarhuataani máru erachichani?

¹⁶ Ju je jarhuajpeni (Gal. 6:10). Leo, misioneru ma enga iauanisï marhuani jaka, uandasïndi: “Sáno méntkisï, ambe engari uétarhinchajka nomasi jindeesti eskaksïni sési kámaaka jiáni engari uétarhinchani jauaka. Miásïnga ma xanhari engani aksidentarikuarhipka juchiiti karru jingoni. Engani na niántapkia juchiiniu, útasï kánikua chéxapka. Joperureni temungurhiri ma pʼímarhispti parani imeecho nirani tʼireni. No miásïnga ambe jingontsïni tʼireraspi, joperuni no méni mirikurhiska na engajtsïni uékperakua jingoni kurhajchapka. Engachi na kʼamarapkia uandontskuarheni, sánderuni sési pʼikuarherantaspkia”.

¹⁷ Iáminduechachi tsitiasïnga k’éri tánguarhikuechani ka jindeesïndi jimbokachi úsïnga erachicha jingoni jarhani ka uandontskuarheni imeeri ambe engachi jima jorhenguarhika. Peru ju je exeni ambe enga uandajka Carol, engachi máteru párrafurhu uandaka: “No fásilisïndi para ji k’éri tánguarhikuecharhu jarhani, nájkirukaksï uánikua kʼuiripuecha jarhajka, sáno iáminduechaksï imeecheri familiecha jingoni jarhasïndi. Ka ji jiánisïni sánderu jandiajku pʼikuarherajka”. Para máru erachicha ka pirenchicha kánikua úkua jukasïndi nirani k’éri tánguarhikua ma jimbo engaksï apenasi uarhiranchajka uámbani o témbani. ¿Míteskichi nemani enga ísï nitamakuarhinchani  jaka? ¿Úpirinchi pʼímarhini para juchaari familia jingoni jarhani enga kʼéri tánguarhikua ma úkuarhiaka?

18. ¿Nénachi uaa sési kaani máteruechani ísï eska na uandajka 2 Korintu 6:11-13?

¹⁸ Ju je márku jarhani. Ju je jánguarhintani erachicha ka pirenchicha jingoni jarhani, sánderu imeecha jingoni engaksï úpiringa jandiajku pʼikuarherani. Uékasïngachi “interu mintsita jingoni” sési kaani íchani (arhinta je 2 Korintu 6:11-13). Melissa engachi párrafu 15 jimbo uandaka, miántasïndi: “Kánikuachi tsitisïrenga engajtsïni máteru familiecha pʼímarhienga parachi imeecho nirani o parachi imeecha jingoni uérani nanisï”. ¿Jarhaski nema juchaari kúnguarhikuarhu engachi úpiringa pʼímarhini juchiiniu?

19. ¿Káni sánderu jukaparhakueski eskachi máru erachicha jingoni jauaka?

¹⁹ Jarhastiksï máru jurhiatikuecha engaksï erachicha sánderu jukaparharapiringa parachi jucha imeecha jingoni jarhani. Para máru erachicha, úkua jukasïndi ima jurhiatikuecha engaksï familiaricha engaksï no Testiguejka kʼuínchikuechani uántajka. Para máteruecha, jarhasïndiksï máru jurhiatikuecha engaksï sánderu no sési pʼikuarherajka, komu ima jurhiatikua engaksï uarhiranchapka nemani. Engachi tiempu arhutajka para i erachicha jingoni jarhani, xarhatakuasingachi eskachi meru uandanhiasïnga ícha jimbo (Filip. 2:20).

20. ¿Nénajtsïni uaa jarhuatani engachi jandiajku pʼikuarheraaka ambe enga Jesúsi uandapka ixú Mateu 12:48-50 jamberi?

²⁰ Mámaru ambe jarhasti engachi jimbo úpiringa jandiajku pʼikuarherani. Peruchi no jatsiska para mirikurhini eska Tata Diosï Jeoba sési míteska na engachi pʼikuarherajka. Ka sáno méntkisï, úraasïndi juchaari erachichani parajtsïni íntskuni ambe engachi uétarhinchajka (arhinta je Mateu 12:48-50). ¿Nénachi uaa xarhatani eskachi jukaparharasïnga i ambe? Engachi jánguarhintaska jarhuataani juchaari erachichani. No arhiparini na engachi pʼikuarheraaka ménisï, nóchi méni jandiajku jauaka, jimboka Tata Diosï Jeoba juchantsïni jingoni jarhaska, imajtsïni no méni jurajkuati.