“UÉKPERAKUA engajtsïni erachicha xarhatachepka, ískurini pakataspti”. Pirenchi ma enga Lisa * arhinhajka uandasïndi eska indeni ambesï sánderu tsitispka jurhimbikueri ambe. Ka Anne sáno májkueni uandasïndi. Ima miásïndi: “Engani míteapka Testiguechani, sánderuni tsitispka na engaksï xáni sési kámpienga ka eska ambe engaksï jorhentpienga”. Nájkirukaksï iásï i pirenchicha tsitijkia Bibliani arhintani ka eratsentani ambe engaksï arhintajka, na engaksï xáni sési kaapka erachicha ka uékperakua engaksï xarhatakuapka kánikua jarhuataaspti.

¿Nénachi uaa sési kaani máteruechani parakaksï sési pʼikuarherantaaka? Exeakachi tsimani ambe engajtsïni jarhuataaka ísï úni: ambe engachi uandajka ka ambe engachi újka. Tátsekua, exeakachi neechanchi jatsiski para sési kaani ka uékperakua jingoni.

Proverbios kapitulu 31 uandasïndi, eska ambakiti uarhiiti ma “méntkisï uékperakua jingoni uandasïn[ga]” (Prov. 31:26). I uarhiiti jánguarhintasïndi eska ambe enga uandaaka ka na enga uandaaka, uékperakua jingoniuaka. Taatichajtuksï jatsisti para méntkisï uékperakua jingoni uandani. Sáno iámindu taatichaksï mítesti eska engaksï uinhamarhikuaska sapiichani ka no sési arhiani, no sésiksï pʼikuastauati ka indeni ambe jimbo, sapiichaksï no uékaati kurhandini. Joperu engaksï sési arhiaska ka uékperakua jingoni, jamberiksï sapiicha kurhandiati ka uékaatiksï kurhajchaani.

Iá sea engachi taatika o nómbe, ¿ambechi uaa úni parachi méntkisï uékperakua jingoni uandani? Ambe enga uandajka Proverbios 31:26 jarhuatasïndijtsïni exeni ambe engachi uaaka úni, jimini uandasïndi: “Jánhaskakua jingoni uandasïndi”. I ambe arhikuekasïndi eskachi jatsiska para méntkisï sési eratseni ambe engachi uandaaka ka na engachi uandaaka. Jiáni enga arhirperata ma jauaka, sési japirindi eskachi kurhamarhikuarhipiringa: “I ambe engani uandaaka, ¿sési pʼikuastaua máteruechani o sánderuni ikiataua?” (Prov. 15:1). Ísï jimbo, kʼuiripu ma enga jánhaskatiika, méntkisï eratsentasïndi ante de uandani.

Máteru proberbiu uandasïndi: “Enga nema no eratseparini uandajka ísïisïndi komueska espada jingoni chʼurhurpini jarhani” (Prov. 12:18). Engachi eratsentaska na engachi pʼikuastauaka máteruechani imani ambe jingoni engachi uandaaka ka na engachi kurhachakukuarhiaka, sánderuchi jingontku uandaaka. Engachi méntkisï uékperakua jingoni uandaska, nóchi jámaaka uinhamarhikuani máteruechani o no sési pʼikuastaani (Efes. 4:31, 32). Enbesi dechi no sési eratseni imeecheri ambe o no sési arhiani, jatsiskachi para sési kaani ka sési uandajpaani. Ka Tata Diosï Jeobajtsïni ejemplu íntskusïndi i ambeeri. Enga imeeri marhuari Elíasi kánikua chéni japka, ánjelini ma úraparini Tata Diosï Jeoba sési pʼikuastantaspti jimboka sési uandontskuarhekuspka ka iatsitakuarhu (1 Rey. 19:12). Joperuchi no solu uandakuecha jingoni jatsiska para xarhatani eskachi sési kámpisïnga. Ístuchi jatsiska para úkuecha jingoni xarhatani. Ju je exeni na engachi uaaka ísï úni.

Engachi sési kámpijka ka sési uandajpini, májkuenchi úni jarhasïnga eska Tata Diosï Jeoba (Efes. 4:32; 5:1, 2). Lisa engachi primeru párrafurhu uandaka, exesti na engachi Testiguecha sési kámpijka. Uandasïndi: “Engachi juchiiti familia jingoni jatsipka parachi sóntku mótsini máteru nani, tsimani temungurhiricha engaksï Testigueka, permisuksï  kurhajkuarhispti imeecheri ánchikuarhitarhu parajtsïni jarhuatani jatsirantani ambe ma. Ka para jiánisï, ji nótkini jorhenguarhixapka Biblieri ambe”. Engaksï erachicha ísï xáni sési kámapka Lisani, inde ambe úspti eska uékapiringa jorhenguarhini Biblieri ambe.

Anne, engachi ístu primeru párrafurhu uandaka, ístu exespti na engaksï sési kámpijka Testiguecha. Ima uandasïndi: “Jimboka parhakpinirhu kánikua no sési jánhaskuarhixaka, nóteruni nemani mintsikasïreengia; kánikua úkua jukanchasïreenga mintsikaani kʼuiripuechani”. Ístu uandasïndi: “Engani míteapka Jeobaeri testiguechani no mintsinharhiasïreenga. Kurhamarhikuarhisïreenga andijtsïnisï xáni sési kámeeni. Peru engani kuenta íntskukuarhepka eska pirenchi engareni jorhendani japka Biblieri ambe mintsita jingonirinisï ísï kámeenga, úspti eskani mintsinharhipiringa”. ¿Néna jarhuataspi i ambe Anneni? Ima uandasïndi: “Sánderu orhepatini, uénaspka sánderuni jukaparharani ambe engani jorhenguarhini japka”.

Kánikua jukaparhakuesti eskachi exeaka eska ambe engaksï sánderu tsitipka pirenchicha jindeespka na engaksï xáni sési kámpijka Testiguecha. Ka i ambe úspti eskaksï imeecha uékapiringa jorhenguarhini jurhimbikueri ambe. Enga kúnguarhikua uékperakua jingoni kaapka ka sési, úspti eskaksï i pirenchicha mintsinharhipiringa Tata Diosï Jeobani ka erachichani.

Máruksï no úkua jukanchasïndi tsípenharhini ka sési kaani máteruechani jimbokaksï ísï pʼinderakata jarhaska. Ka i ambe sési jarhasti. Joperu engachi ísï kámpiska nomasi jimbokachi ísï pʼinderanhaska, nóchi ísï uékpini jauaka eska Tata Diosï (terukutanta je Ukuecha 28:2 jingoni).

Espiritu santu úsïndi eskaksï kʼuiripuecha uaaka mintsita jingoni pʼamojpini ka sési kámpini (Gal. 5:22, 23). Ísï jimbo, parachi úni xarhatani indeni ambe ka májkuenchi úni eska Tata Diosï Jeoba ka Jesúsi, kánikua jukaparhakuesti eskachi jurajkuaka eskajtsïni espiritu santu jarhuataaka ambakiti ambe eratseni ka úni. Ístu, jimbokachi tata Jesukristueri chúxapatiska, mintsita jingonchi uandanhiasïnga kʼuiripuechani jimbokachi xénchaasïnga imeechani ka ístu Tata Diosïni. Engachi uékperakua jimbo újka ambe ma, jimajkani mintsita jingonchi sési kámpisïnga ka pʼamojpini ka Tata Diosï Jeoba kánikua jaiapanhentasïndi ini ambe.

Sáno méntkisï sánderu fásilisïndi sési kaani imeechani engajtsïni ístu sési kámajka o imeechani engachi jucha xénchaajka (2 Sam. 2:6). Ka ma ambe jimbo engachi xarhatajka eskachi xénchaasïnga, jindeesti engachi diosmaiamukua arhiajka (Kol. 3:15). Joperu, ¿ambe úkuarhisïni engachi eratsejka eska nema no jukanchaska eskachi sési kámaaka?

Ju je eratsentani ini ambe: Tata Diosï Jeoba sési kaasïndi asta imeechani engaksï no jukanchaka eskaksï sési kánhaaka ka no nema ísï xáni sési kámpisïndi eska ima. Bibliajtsïni ambakiti ambe jorhendasïndi íri ambe. Karakata Griegaecha jimbo someni uandasïndi eska Tata Diosï kóndeantaasïnga kʼuiripuechani. ¿Néna xarhatasïni i ambe?

Ju je eratseantani imani xáni uánikua kʼuiripuechani enga Tata Diosï Jeoba kóndeantajka íntskuapariani ambe engaksï uétarhinchajka (Mat. 5:45). Asta ante dechi jucha míteni, Tata Diosïjtsïni tʼuini xarhatachesptia eskajtsïni pʼamojkusïnga (Efes. 2:4, 5, 8). Pori ejemplu, íntspisti iámindu kʼuiripuechani jimbo ambe enga sánderu jukaparhakua ambeeka para ima: imeeri máechakua Uájpani. Ka apostoli Pablu karaspti eskachi uaaka jatsini ambakiti ambe jimbokajtsïni “ima xáni kánikua kóndentaska” (Efes. 1:7). Ístu, nájkirukachi ménichani no sési ambe niátajka ka no sési pʼikuastani Tata Diosïni, imajtsïni seguirini jarhasïndi arhistachini. Ísï komueska janintserakua na iatsitakuarhu andatserajka uitsakuarhu, ístujtsïni Tata Diosï Jeoba iatsitakuarhu jorhendasïndi ka iatsitakuarhujtsïni arhini ambe ma (Deut. 32:2). Nóchi méni uaaka maiamuntani na engajtsïni xáni sési kámajka Tata Diosï. Ka míteskachi eska engajtsïni Tata Diosï no pʼamojkupiringa, nóchi jatsipiringa ambakiti erokuarhikua ma (terukutanta je 1 Pedru 1:13 jingoni).

¿A no eska na enga xáni sési kámpijka Tata Diosï Jeoba úsïnga eskachi uékaaka sánderu andarhierani ka eskachi juchajtu ísï kámpiaka? Ísï jimbo, ju je pauani pauani jánguarhintani májkueni kaani kʼuiripuecha eska Tata Diosï, sési ka uékperakua jingoni ka no solu márku kʼuiripuechani, sino iáminduechani (1 Tes. 5:15). Ísï eska chpiri na jorhepirpintajka jiáni enga tsʼirakuarhini jarhajka, engachi juchajtu sési kámpiska sésichi pʼikuastauaka iáminduechani. Juchaari familiaricha, kúnguarhikuarhu anapu erachicha, ánchikuarhitarhu anapu kompanieruecha ka eskuelarhu anapuecha ka besinuecha sésiksï pʼikuarheraati juchantsïni jingoni jarhani.

¿Jaki familiarhu o kúnguarhikuarhu nema enga uétarhinchani jaka eskachi sési kámaaka o eskachi ambakiti ambe arhiaka? Jamberi kúnguarhikuarhu anapu erachi ma uétarhinchani jati eskachi jarhuataaka kuidarini imeeri kʼumanchikuani o imeeri jardinini o parachi nirani ambe ma piákuni. ¿Ka nénachi uaa xarhatani eskachi xénchaasïnga kʼuiripuechani engachi aianhpini jámani jauaka? Engachi jarhuataska imeechani engaksï uétarhinchani jauaka.

Ju je májkueni úni eska Tata Diosï Jeoba ka eska ima ambe engachi uandaaka ka úni xarhataaka eskachi “méntkisï uékperakua” jingoni kámpisïnga.