1. ¿Ambe ka ambejtsïni úpirini chérani?

 JU JE eratseantani arini ejempluechani. Néstor ka imeeri uarhiiti María, uékasïreendiksï jimeesïsï marhuani nani enga sánderu uétarhini japka para aianhpinhani. * Joperuksï para ísï úni, jatsisptiksï para arisku sáni irekani. Ka chésïreendiksï ísï irekani. Eratsesïrendiksï eskaksï no úpiringa tsípikua jingoni irekani engaksï arisku sáni irekuarhipiringa. Biniami erachi máesti enga paisi ma jimbo irekani jaka nani engachi no jurajkunhajka aianhpini. Enga Jeobaeri testigu úkuarhipka, kuenta íntskukuarhespti eska imajtu no sési kánhapiringa. Nájkiruka chéni japka, jarhaspti máteru ambe enga sánderu chéreenga: ambe enga uandapiringa imeeri familia engaksï mítepiringa eska ima máteru relijionirhu jarhaspkia. Últimu, ju je exeni Valeriaeri ejempluni, ima kánseri exeminhantaspti. Valeria uékasïreendi kurhajchani ambe enga Biblia uandajka iurhiriri ambe ka kánikua úkua jukanchaspti para exentani doktorini ma enga uékapiringa operarini no iurhiri jingoni. Ka indeni ambe jimbo, ima chésïreendi uarhini.

2. ¿Andichisï jatsi para jánguarhintani no jukari chéni?

² ¿Ménisïjtsï niáraski májkueni pʼikuarherani eskaksï i erachicha engachi máteru párrafurhu uandaaka? Uánikuechachi niáraska ísï pʼikuarherani. Joperu engachi jukari chéska, inde ambe uaati úni eskachi imani ambe erakuaka úni enga uaaka eskachi nóteru sési pájperaakia Tata Diosï Jeoba jingoni. Ka i ambesï meru uékajti Satanasi. Ima uékasïndi eskachi chéaka parakachi nóteru kurhajchaakia Tata Diosï Jeobaeri juramukuechani, komu ima enga uandajka eskachi jatsiska para aianhpini ambakiti aianhperakuani (Jaŋ. 12:17). Ísïisti, Satanasi kánikua no ambakisti, no sáni pʼamojpisïndi  ka kánikua uinhapisti. Joperu jarhasti ambe ma engajtsïni uaaka kuájchakuni imeeri. ¿Ambeeski?

3. ¿Ambejtsïni jarhuata parachi úni orhepani uérakuni imani ambe engajtsïni chérajka?

³ Satanasijtsïni no uaati chérani engachi seguru jarhaska eskajtsïni Tata Diosï Jeoba kánikua xénchasïnga ka eska juchantsïni jingoni jarhaska (Sal. 118:6). Pori ejemplu, ima enga karapka Salmo 118, kánikua no sési ambe nitamakuarhispti. Uánikua enemiguechani jatsiaspti, ka máruksï kánikua juramukua jatsispti (bersikuluecha 9 ka 10). Ka ménichani niáraspti jukari uandanhiani (bersikulu 13). Ka ístu, Tata Diosï Jeoba jurhimberantaspti (bersikulu 18). Nájkiruka ini ambe nitamakuarhipka, imeeri pirekuarhu uandaspti: “No chéaka”. ¿Andisï ísï uandapi? Jimboka sési mítetixapka eska nájkiruka imeeri Taati auandarhu anapu jurhimberantapka, ístu kánikua xénchasïreenga. Inde salmista seguru jarhaspti eska ambe uéjki enga úkuarhipiringa, imeeri Tata Diosï enga kánikua xénchpetika, jima japiringa para jarhuatani (Sal. 118:29).

4. Engachi seguru jarhajka eskajtsïni Tata Diosï Jeoba xénchasïnga, ¿ambe ka ambeerichi no chéa?

⁴ Iámindu kristianuechachi jatsiska para seguru jarhani eskajtsïni Tata Diosï Jeoba xénchasïnga mándani arini. Engachi seguru jauaka íri ambe, jarhuataatijtsïni parachi: 1) no chéni eratseparini eskachi no uaaka kéndani juchaari familiani, 2) no chérhiani máteru kʼuiripuechani ka 3) no chérhini uarhikuani. Erachicha engachi primeru párrafurhu uandaaka, ústiksï nóteru chénia jimbokaksï seguru jarhaspka eska Tata Diosï Jeoba xénchaasïreenga.

5. ¿Ambe úpirini uandanhiatani familieri orhejtsïkutichani? (Exe je fotuni enga ueenakuarhu jaka rebistarhu).

⁵ Kristianuecha engaksï familieri orhejtsïkutiika, mítestiksï eskaksï jatsiska para kéndani imeeri familiani (1 Tim. 5:8). Engajtsï chá familieri orhejtsïkutika, jamberijtsï uandanhiani japka eskajtsï tsïtapiringa chaari ánchikuarhitani ini pandemia jimbo, o eratseni eskajtsï no úpiringa kéndani chaari familiani ojtsï no úni renta maiampini. Ka jamberijtsï eratseni eska engajtsï tsïtapiringa ánchikuarhitani, jamberijtsï no úpiringa exentani máteruni. O májkueni eska Néstor ka María engachi antesi uandaaka, jamberijtsï eratsenga eskajtsï no úpiringa arisku sáni irekuarhini. Ini ambe úraparini Satanasi ústia eskaksï uánikuecha nóteru marhuakuakia Tata Diosï Jeobani.

6. ¿Satanasi ambe uékasïni eskachi eratseaka?

⁶ Satanasi uékasïndi eskachi eratseaka eska Tata Diosï Jeoba no uandanhiasïnga mándani juchantsïni jimbo ka eskajtsïni no jarhuataaka jiáni engachi uétarhinchani jauaka parachi úni kéndani juchaari familiani. Engachi niáraska ísï eratseni, úpiringachi uandani eskachi no uaaka jurajkuni juchaari ánchikuarhitani nájkirukachi úni jauaka ambe ma enga Tata Diosï no jaiapanhentajka.

7. ¿Ambejtsïni aiachisïni Jesúsi?

⁷ No nema sánderu sési mítesti Tata Diosïni eska Jesúsi. Jimbojtsïnisï újti arhini ini ambe: “Chaari Taati tʼuini mítetini jarhasïn[d]ia ambe engajtsï uétarhinchajka engajtsï útasï nótki kurhajkuarhijka” (Mat. 6:8). Jesúsi ístu mítesti eska Tata Diosï Jeoba jingontku jarhaska parajtsïni íntskuni ambe engachi uétarhinchajka. Ka jimboka ima jindeeska i familieri orhejtsïkuti, uaakachi seguru jarhani eska ima ísï uaaka eska na kurhakuajka iámindu familieri orhejtsïkutichani ixú 1 Timoteo 5:8 jimbo.

8. a) ¿Ambejtsïni jarhuata engachi ísï exeaka enajkichi no uaa familiani kéndani? (Mateu 6:31-33). b) ¿Nénachi uaa májkueni úni eska temungurhiri enga foturhu jaka?

⁸ Engachi seguru jauaka eskajtsïni Tata Diosï Jeoba xénchasïnga juchantsïni ka juchaari familiani, mintsikaakachi eskajtsïni ima íntskuaka ambe engachi uétarhinchani jauaka (arhinta je Mateu 6:31-33). Tata Diosï uékasïndijtsïni íntskuni ambe engachi uétarhinchajka ka ísï úsïndi jimbokajtsïni xénchasïnga ka uánikua ambejtsïni  íntskusïndi. Enga Echerini kueraapka, no solu úspti imani ambe enga újka eskachi tsípiti jauaka. Ístu, kánikua xénchperakua jingoni uánikua sési jásï ambe úspti parakachi úpiringa sési pʼikuarherani ka tsípikua jingoni irekani (Gén. 2:9). Ka nájkirukachi ménisï sántku ambe jatsiaka parachi nitamakuarhini, ju je diosmaiamukua arhini Tata Diosï Jeobani jimbokajtsïni jarhuataska jatsini ambe engachi uétarhinchani japka ka jimbokajtsïni seguirini jarhasïnga íntskuni “tʼirekua engachi uétarhinchajka pauani pauani” (Mat. 6:11). Ka jatsiskachi para miáni eska ambe engajtsïni Tata Diosï Jeoba íntskuaka iásï ka sánderu orhepatini, sánderu jukaparhakua ambeeska eska ambe uéjki engachi uaaka jatsikuarheni iásï. Néstor ka María ústiksï exeni eska i ambe meru ísïiska (Is. 65:21, 22).

9. ¿Ambeksïni jorhendasïni Néstoriri ka Maríaeri ejemplu?

⁹ Néstor ka María engaksï Colombia anapueka nóksï ambe ma kueratanchasïreendi. Imaksï uandantasïndi: “Uékasïreengachi sántku ambe jingoni irekani parachi úni sánderu aianhpini, joperuchi chésïreenga jimbokachi eratsesïreenga eskachi no úpiringa tsípikua jingoni irekani sántku ambe jingoni”. ¿Ambe jarhuataaspi paraksï nóteru ísï pʼikuarherania? Eratsentasptiksï na enga uánikua xanhari Tata Diosï Jeoba xarhatakuapkia eska kánikua xénchaasïreenga. Mintsikasptiksï eska Tata Diosï Jeoba méntkisï kuidariuapiringa. Ístu jurajkuasptiksï imeecheri ánchikuarhitechani nájkirukaksï sési andeenga, íntspikuarhisptiksï imeecheri kʼumanchikuani ka mótsisptiksï máteru nanisï engaksï sánderu uétarhini japka aianhpiricha. ¿Nénaksï pʼikuarherasïni engaksï ísï úka? Néstor uandasïndi: “Úskachia exeni eska meru ísï úkuarhisïnga eska na uandajka Mateu 6:33. Nóchi méni kueratanchaska ambe ma. Ka iásï, sánderuchi tsípikua jingoni irekaskia”.

10. ¿Andijtsïnisï no ísku pakatajki engaksï kʼuiripuecha chérhiajka máteruechani?

¹⁰ Desde ióni, kʼuiripuechaksï kánikua no sési útsperasïndi (Ecl. 8:9). Pori ejemplu, máru engaksï juramukua jatsika no sésiksï kaasïndi máteruechani ka máteruechaksï no sési ambe niátasïndi, oksï atajpini jámani, eskuelarhu anapu kompanieruechaksï no sési arhijperasïndi ka máteruechaksï asta niárasïndi no sési kámani imeecheri familiani. ¡Jimbosï kʼuiripu chérhiajti máteru kʼuiripuechani! ¿Ambe úsïni Satanasi enga exejka eskaksï kʼuiripuecha chérhiasïnga máteruechani?

11, 12. ¿Ambe úsïni Satanasi enga jucha chérhiajka kʼuiripuechani?

¹¹ Engachi chérhiajka kʼuiripuechani, Satanasi  úrasïndi indeni ambe parachi nóteru aianhpinia o parachi nóteru kurhajchania Tata Diosïri máteru juramukuechani. Ima úsïndi eskajtsïni máru juramuticha nóteru jurajkuakia parachi aianhpini ka eskajtsïni no sési kámaaka (Luk. 21:12; Jaŋ. 2:10). Ini parhakpinirhu enga Noambakitiri jájki jimbo jaka, uánikua kʼuiripuechaksï chkuanderakua ambe uandasïndi Jeobaeri testiguecheri ambe. Kʼuiripuecha engaksï jakajkuajka indeni chkuanderakuechani jamberijtsïni teresmarhuati ka astajtsïni jamberi atani (Mat. 10:36). Ka nójtsïni ísku pakatasïndi inde ambe enga Satanasi újka jimboka desde primeru siglurhu úsïreengia indeni ambe (Uku. 5:27, 28, 40).

¹² Satanasi no gobiernuechantkusï úraajti parajtsïni chérani. Ménichanisï kʼuiripu chésïndi ambe enga uandaaka imeeri familia enga ima Testigu úkuarhiska ka Satanasi ístu úrasïndi inde ambe. Máruksï sánderu chésïndi ini ambe jimbo ka eska engaksï ataapiringa. Jimbokaksï kánikua xénchaasïnga imeecheri familiarichani, uékasïndiksï eskaksï imajtu ma jurhiani niáraaka míteni ka xénchani Tata Diosï Jeobani, jimboksïsï no sési pʼikuarherajti engaksï kurhaajka eskaksï no sési ambe uandasïnga Tata Diosï jurhimbitiri ka imeeri marhuaricheri ambe. Peru ménichani, familiaricha engaksï no tsitienga Tata Diosïri ambe, niárasïndiksï testigu úkuarhini. Joperu enga juchaari familiarhu anapu ma nóteru uékaakia juchantsïni jingoni pájperani, ¿ambechi uaa?

13. ¿Andisï xáni jukaparhakue eskachi seguru jauaka eskajtsïni Tata Diosï Jeoba xénchasïnga engajtsïni juchaari familia nóteru uékaakia uandajpani? (Salmo 27:10).

¹³ ¡Kánikuajtsïni sési pʼikuastasïndi ambe enga arhijka Salmo 27:10! (Arhinta je). Engachi no mirikurhiska na engajtsïni xáni xénchajka Tata Diosï Jeoba, sésichi pʼikuarheraaka nájkiruka juchaari familia nóteru ambe ma uékaakia juchantsïni jingoni ka uaakachi seguru jarhani eskajtsïni ima kóndentaaka jimbokachi tekaantaska. No nema jarhasti engajtsïni sánderu sési kuidariuaka eska Tata Diosï Jeoba, imajtsïni íntskuati ambe engachi uétarhinchani jauaka, sésijtsïni pʼikuastaati ka uaati eskachi sési pájperaaka imani jingoni. Indeni ambesï exeti Biniami engachi párrafu 1 jimbo uandaka.

14. ¿Ambeksïni jorhendasïni Biniamiri ejemplu?

¹⁴ Biniami, Jeobaeri testigu úkuarhispti nájkiruka mítepka eskaksï juramuticha no sési kámapiringa. Ima uandantasïndi: “Juramutichajtsïni kánikua no sési kámaspti. Peru ambe engareni sánderu chéreenga jindeespti na engajtsïni kámapiringa juchiiti parienticha. Kánikua chésïreenga no sési pʼikuastani juchiiti taatini ka eskarini juchiiti familia nóteru janhanharipiringia jimbokani Testigu úkuarhispka”. ¿Ambe jarhuataspi para nóteru chénia? Seguru jarhani  eska Tata Diosï Jeoba xénchasïnga ka eska ima méntkisï kuájchakuasïnga imeechani engaksï xénchajka. Biniami uandantasïndi: “Eratsentaspka imani ambe enga Tata Diosï Jeoba úka para jarhuataani imeechani engaksï tekaantani jaka nájkirukaksï uandanhiata ambe jatsiaka sentabu ambe jimbo, engaksï no sési exenhajka ka engaksï máteru kʼuiripuecha no sési kaajka. Mítespka eska engani no méni jurajkupiringa Tata Diosï Jeobani, imarini újchakurapiringa. Uánikua xanharijtsïni ónhasti ka astajtsïni ataspti. Engani xáni no sési nitamakuarhini japka, úspka exeni eska engachi no méni jurajkuska Tata Diosï Jeobani, imajtsïni kánikua jarhuatasïnga”. Para Biniami, Tata Diosï niáraspti ísïini eska ambakiti Taati ma ka erachicha komueska imeeri familia.

15. ¿Andisï no no sési jaki chérhini uarhikuani?

¹⁵ Biblia uandasïndi eska uarhikua ikiatspiti máeska (1 Kor. 15:25, 26). Eratseni eskachi úpiringa uarhini úpirindijtsïni kánikua uandanhiatani ka sánderu enga jucha o juchaari familiari ma uinhamu pʼamenchani jauaka. ¿Andichisï chérhijki uarhikuani? Jimbokajtsïni Tata Diosï Jeoba kueraaska parakachi tsitipiringa irekani para méntkisï (Ecl. 3:11). Joperu chérhini sánisï uarhikuani uaatijtsïni kuájchakuni. Pori ejemplu uaatijtsïni jarhuatani parachi sési tʼireni, parachi ejersisiu úni, parachi no úni imani ambe engajtsïni niárapiringa no sési úchini, para doktori jingoni nirani ka enga uétarhiaka, medisina ambe arhani.

16. ¿Ambe úsïni Satanasi enga exejka eskachi chésïnga uarhini?

¹⁶ Satanasi mítesti eskachi kánikua jukaparharasïnga tsípikuani. Jimbosï uandajti eskachi uaaka ambe uéjki —astachi jurajkuni Tata Diosï Joebani— solu parachi tsípiti jarhani (Job 2:4, 5). ¡Joperu inde ambe no ísïisti! Jimboka Satanasi juramukua jatsiska uarhikueri, exesïndi eska jucha chésïnga uarhini ka úrasïndi indeni ambe parachi jurajkuni Tata Diosï Jeobani (Ebr. 2:14, 15). Ménichani, Satanasi úraasïndi máru kʼuiripuechani parajtsïni no sési ambe úchini ka arhintsïni eskajtsïni uándikuaka engachi no jurajkuska Tata Diosïni. O jamberi engachi jucha uinhamu pʼamenchani jauaka, uaati úrani indeni ambe parakachi jurajkuaka Tata Diosï Jeobani. Jamberijtsïni doktoricha o juchaari familiaricha engaksï no Testigueka, méntkujtsïni arhini jauaka eskachi jatantaaka iurhiri, ambe ma enga Tata Diosï no jaiapanhentajka. O jamberijtsïni nema uaati méntku arhini jarhani parakachi jiókuarhiaka tratamientu ma enga kristianu ma no jatsika para jiókuarhini.

17. Ísï eska na arhijka Roma 8:37-39, ¿andichisï no jatsi para chéni uarhini?

¹⁷ No nema uékasïndi uarhini, peru engachi niárapiringa uarhini, míteskachi eskajtsïni Tata Diosï Jeoba seguirini jauaka xénchani (arhinta je Roma 8:37-39). Engaksï Jeobaeri amiguecha uarhijka, ima seguirini jarhasïndi miáuani, ísï enajkiksï útasï tsípiti jaki (Luk. 20:37, 38). Ka ima uékaxati tsítantaani (Job 14:15). Tata Diosï Jeoba kánikua maiampisti parachi úni jatsini tsípikua para méntkisï (Juanu 3:16). Sésichi mítetixaka na engajtsïni xáni xénchajka ka kuidarini. Ísï jimbo, nóchi jurajkusïnga Tata Diosï Jeobani nájkirukachi pʼamenchani jauaka ochi arhinhani eskachi uándikunhaaka. Sánderu sési, jurajkusïngachi eskajtsïni sési pʼikuastantaaka, eskajtsïni íntskuaka jánhaskakua ka uinhapikua. Inde ambeksïsï úti Valeria ka imeeri uámba (Sal. 41:3).

18. ¿Ambeksïni jorhendasïni Valeriaeri ejemplu?

¹⁸ Enga Valeria 35 jatiripkia, exeminhantaspti kánseri ma enga kánikua no sési útspijka. Ju je exeni eska miántani eskajtsïni Tata Diosï Jeoba xénchasïnga jarhuataspka paraka no chérhipiringa uarhikuani. Ima uandantasïndi: “Ískuchi pakaraspka juchiiti acheeti jingoni engani aiangunhapka eskani kánseri pʼamenchaxapka. Arhinhaspka eskani uétarhinchaxapka operasioni ma enga kánikua úkua jukapka. Niraspka uánikua  doktorichani exeani perurini no ma uékaspti operarini no iurhiri jingoni. Kánikua chéxapka, peru jimbokani uékasïreenga kurhajchani Tata Diosïni, ¡no méni jiókuarhipiringa iurhiri jatantani! Desde iónisï, Tata Diosï Jeobareni xarhatachestia eskarini kánikua xénchasïnga..., iásï jísïni jatsipka para xarhatakuni na engani xáni xénchajka. Méni engajtsïni aianguenga eska ambe ma no sési uéraspka, sánderuni uinhapiti pʼikuarherasïreenga parani no jurajkuni eskarini Satanasi andapiringa. Uékasïreenga sési pʼikuastani Tata Diosï Jeobani. Ísï Tátsekua, operarisptijtsïni no iurhiri jingoni ka iámu ambe sési uéraspti. Nájkirukani útasï pʼamenchani jaka, Tata Diosï Jeobajtsïni méntkisï íntskuni jarhasïndi ambe engachi uétarhinchajka. Pori ejemplu, ma semana antedejtsïni arhini eskani kánseri kámasïreenga, tánguarhikuarhuchi jorhenguarhispka artikuluni ‘Afrontemos con valentía los golpes de la vida’. * I jorhenguarhikua, kánikuajtsïni jarhuataspti ka méminduchi arhintaspka. I járhati artikuluecha jimbo, ka engachi no méni jurajkupka aianhpini ni tánguarhikuecharhu nirani, kánikuajtsïni jarhuataspti parachi no jukari uandanhiani jarhani ka parachi ambakiti ambe erakuni úni”.

19. ¿Ambe úkuarhia no ióni jimbo?

¹⁹ Interu parhakpinirhu, uánikua erachichaksï jarhasti engaksï úkia orhepani uérakuani kʼérati uandanhiatechani ka Tata Diosï Jeobaeri jarhuajperata jingoni únksï andani Noambakitini (1 Ped. 5:8, 9). Chájtujtsï uaaka májkueni úni. Nóteru ióni jimbo, Tata Diosï Jeoba arhiati Jesúsini ka imeechani engaksï imani jingoni juramuni jauaka eska niáraskia ora para “xereantani Noambakitiri úkuechani” (1 Juanu 3:8). Enga i ambe na úkuarhiakia, Tata Diosïri marhuaricha engaksï Echerirhu irekaaka, exeatiksï na enga úkuarhiaka i profesia: ʻNókini ambe ma chéraati, nijtu jaua ambe ma engari jimbo chéakaʼ (Is. 54:14; Miq. 4:4). Enga jamberi niáraaka ima jurhiatikua, ju je jánguarhintani parachi orhepani uérakuni imani ambe engajtsïni chérajka.

20. ¿Ambejtsïni jarhuata orhepani uérakuni imani ambe engajtsïni chérajka?

²⁰ Jatsiskachi para sánderu mintsikani eska Tata Diosï Jeoba xénchaasïnga ka eska kuájchakuasïnga imeeri marhuarichani. ¿Ambejtsïni jarhuata parachi ísï úni? Eratsentani na enga Tata Diosï Jeoba kuidariuakia imeeri marhuarichani ka indeeri ambe uandontskuarheni máteruecha jingoni. Ístu, ju je méntkisï miáni jarhani na engajtsïni Tata Diosï Jeoba jarhuatakia engachi kʼérati uandanhiatechani jatsiapka. Imeeri jarhuajperata jingoni uaakachi orhepani uérakuni imani ambeni engajtsïni chérajka (Sal. 34:4).