1. Eclesiastés 7:20 jimbo, ¿ambe uandaspi rei Salomóni enga meru ísïika?

 REI SALOMÓNI uandaspti: “No ma kʼuiripu jarhas[ti] echerirhu enga jurhimbitiika ka enga méntkisï ambakiti ambe úni jauaka ka no pekarini” (Ecl. 7:20). ¡I ambe meru ísïisti! Iáminduechachi pekadoriska (1 Juanu 1:8). Ísï jimbo, iáminduechachi uétarhinchasïnga eskajtsïni Tata Diosï puáchentaaka ka ístu máteruecha.

2. ¿Nénachi pʼikuarherasïni engajtsïni juchaari amigu ma puáchentajka?

² ¿Ménisïchi no sési pʼikuastaski juchaari amiguni ma? Iáminduechachi ísï úkuarhinchaska. Joperuchi mintsita jingoni arhispka eskajtsïni puáchentapiringa parachi seguirini imeeri amigueni. ¿Nénachi pʼikuarheraspi engajtsïni juchaari amigu puáchentapka? ¿A no eskachi kánikua sési pʼikuarheraspka? Seguru eska jo.

3. ¿Ambeerichi uandani jaua ini jorhenguarhikua jimbo?

³ Iáminduechachi uékasïnga kánikua sési pájperani Tata Diosï Jeoba jingoni, peruchi someni úsïnga o uandani ambe ma enga ima no jaiapanhentajka. Jiájkani, ¿andichisï uaa seguru jarhani eskajtsïni ima uékasïnga puáchentani? ¿Andichisï uandajki eska na engajtsïni puáchentajka Tata Diosï Jeoba no májkueniska eska kʼuiripuecheri? Ka últimu, ¿neechani puákuantasïni Tata Diosï?

4. ¿Andichisï uaa seguru jarhani eska Tata Diosï Jeoba puátspentasïnga?

⁴ Tata Diosïri Karakatarhu, Tata Diosï Jeobajtsïni arhisïndi eska  uékasïnga puátspentani. Pori ejemplu, juáta Sinaírhu, Tata Diosï Jeoba arhispti Moisésini na jásï Tata Diosï máeski. Ánjelini ma úraparini, arhispti: “Jeoba, Jeoba, Tata Diosï pʼamojpiti ma ka enga sési kámpijka, enga no sóntku ikiajka ka enga kánikua uékpijka ka jurhimbitiini, enga ambakiti uékperakua xarhatakuajka uánikuechani, enga puákuntajka imani enga no sési ambe újka ka imani enga no janhanharhijka leini ka imani enga pekarijka” (Éx. 34:6, 7). Jeoba, Tata Diosï máesti enga sési kámpijka ka enga pʼamojpijka ka enga méntkisï uékajka puákuntani imani enga sési jimbo moántajka (Neh. 9:17; Sal. 86:15).

5. Eska na uandajka Salmo 103:13, 14, ¿nénajtsïni kámasïni Tata Diosï Jeoba jimbokajtsïni sési míteska?

⁵ Tata Diosï Jeobajtsïni sési mítesti juchantsïni jimbokajtsïni ima kueraaska. ¿A no eskajtsïni ísku pakatasïnga engachi eratsejka eska ima sési míteska mándani kʼuiripuni enga ini parhakpini jimbo jaka? (Sal. 139:15-17). Ístu, sési mítesti eskachi kéritanhaska juchaari taaticheri pekaduni. Joperu ístu, mítesti eskachi xásï kʼuiripu máeska imani ambe jimbo engachi nitamakuarhika. Indeni ambe jingoni enga Tata Diosï Jeoba míteka juchaari ambe, úsïndi eskajtsïni pʼamojkuaka (Sal. 78:39; arhinta je Salmo 103:13, 14).

6. ¿Néna xarhataskia Tata Diosï Jeoba eskajtsïni uékasïnga puáchentani?

⁶ Tata Diosï Jeoba xarhatastia eskajtsïni uékasïnga puáchentani. Ima mítesti eska Adániri kulpa jimbo juchachi pekadoriska ka niárasïngachi uarhini (Rom. 5:12). Ka nóchi ambe ma úpiringa úni parachi pʼímutantaani máteruechani ka ni parachi jucha pʼímutantskuarhini pekadueri ka uarhikueri (Sal. 49:7-9). Peru Tata Diosïjtsïni pʼamojkusti ka ústi ambe ma parajtsïni pʼímutantani. Ísï eska na arhijka Juanu 3:16, Tata Diosï Jeobajtsïni xáni uékasti enga axapka imeeri máechakua Uájpani paraka uarhipiringa juchantsïni jimbo (Mat. 20:28; Rom. 5:19). Jesúsi uarhispti iámindu kʼuiripuecha jimbo para pʼímutantaani iámindu imeechani engaksï mintsikaaka imani (Ebr. 2:9). ¿Úsïnchi eranhaskani na enga xáni no sési pʼikuarherapka Tata Diosï Jeoba enga exepka imeeri Uájpani xáni kómu uarhini? Engajtsïni Tata Diosï no uékapiringa puáchentani no jurajkupirindi eska imeeri Uájpa uarhipiringa.

7. Uanda je máru kʼuiripuechani enga Biblia uandaajka enga Tata Diosï Jeoba mintsita jingoni puákuantapka.

⁷ Biblia uánikuecheri uandasïndi enga Tata Diosï iámu mintsita jingoni puákuantapka (Efes. 4:32). ¿Miásïntsï nemani? Jamberijtsï rei  Manasésini eratseni jaka. Ima kánikua no sési úrispti ka kʼérati pekaduechani uaaspti para no sési pʼikuastani Tata Diosï Jeobani. Úspti eskaksï kʼuiripuecha no jurhimbiti diosïchani kʼéri ambe arhiapiringa ka kurhiraaspti uájpeechani para ini diosïchani kéjtsïtakuani. Ka no sáni kʼuratseparini incharaspti diosï úkatani ma Tata Diosï Jeobaeri pímbinhasï templurhu. Biblia i ambe uandasïndi imeeri ambe: “Kánikua no sési jásï ambe úspti Tata Diosï Jeobani japarini para ikiatani” (2 Crón. 33:2-7). Peru enga Manasési sési jimbo móantapka, Tata Diosï Jeoba mintsita jingoni puákuantaspti ka jurajkuspti paraka ménderu reipiringa (2 Crón. 33:12, 13). Máteru ejemplu jindeesti rei Dabidi. Imajtu kʼérati pekaduechani uaaspti komu ísku jándikua ambe ka uándikpispti. Peru enga Dabidi jiókuarhipka eska no sési úspka ka enga mintsita jingoni móantapka, Tata Diosï Jeoba ístu puákuntaspti (2 Sam. 12:9, 10, 13, 14). Ísï jimbo, uaakachi seguru jarhani eska Tata Diosï meru uékasïndi puátspentani. Ka eskachi na exeaka iáiasï, Tata Diosï Jeoba no májkueni puátspentasïndi eska kʼuiripuecha.

8. ¿Andisï Tata Diosï Jeoba jindee sánderu ambakiti juesi ka inde ambe néna úsïni eska ima uékaaka puátspentani?

⁸ Tata Diosï Jeoba jindeesti interu parhakpini anapu Juesi (Gén. 18:25). Ambakiti juesi ma, uétarhisïndi sési míteani leichani. Ka Tata Diosï Jeoba sési míteasti leichani jimboka no solu jindeeska juchaari Juesi, ístu jindeesti ima enga Leichani Peeraajka (Is. 33:22). No nema sánderu sési mítesti ambe enga sési jaka ka ambe enga no sési jaka ísï eska Tata Diosï Jeoba. Ístu, ambakiti juesi ma jatsisti para sési mítetini jarhani iámindu ambe ante de uandani ambe enga úkuarhiaka. Ísï jimbo, Tata Diosï Jeoba jindeesti sánderu ambakiti Juesi enga jaka jimboka ima iámindu ambe míteska.

9. ¿Ambe ka ambe exesïni Tata Diosï Jeoba para úni puákuntani nemani o nómbe?

⁹ Tata Diosï no ísï jusgarpisïndi eska kʼuiripu ma na újka. Enga ima jatsijka para nemani jusgarini, sési mítesïndi andisï ísï ú (Gén. 18:20, 21; Sal. 90:8). No jusgarpisïndi imani ambe jimbojku engaksï kʼuiripuecha exejka o kurhandijka. Ima sési mítesïndi eska kʼuiripu ma niárasïnga úni ambe ma jimboka taati jémbeechani pʼiuaska, na enga kʼuiriperanhaka, nani enga irekaka ka ambe enga eratsejka ka pʼikuarherani. Ístu, Tata Diosï Jeoba exesïndi ambe enga juchaari mintsitarhu jaka, i ambe arhikuekasïndi andichisï újki ambe ma ka ambe engachi jucha tsitijka. Ima méntku iámindu ambe exesïndi (Ebr. 4:13). Ísï jimbo, Tata Diosï Jeoba puátspentasïndi jimboka meru sési mítesïnga ambe enga úkuarhijka.

10. ¿Andichisï uaa uandani eska Tata Diosï Jeoba méntkisï jurhimbikua jingoni úsïnga ambe ma? (Deuteronomio 32:4).

¹⁰ Tata Diosï Jeoba méntkisï jurhimbikua jingoni úsïndi ambe ma. Ima iáminduechani májkueni kaasïndi. Enga Tata Diosï puákuntajka nemani no méni exesïndi na enga jáxeka ima kʼuiripu, sini jatsikuarheriski, kʼéri ambeeni o jimboka jorhenaska úni ambe ma (1 Sam. 16:7; Sant. 2:1-4). Tata Diosï Jeobani no nema úsïndi afuersa úrani ambe ma nijtu maiamuni paraka uaaka ambe ma (2 Crón. 19:7). Ima no méni úsïndi ambe ma ikiatapu jimbo o jimboka jukari pʼamojkuni jauaka nemani (Éx. 34:7). Ísïisti, Tata Diosï Jeoba jindeesti sánderu ambakiti Juesi enga jaka jimboka ima sési mítetixaka na engachi jásï kʼuiripueka ka ambe engachi nitamakuarhini jarhajka (arhinta je Deuteronomio 32:4).

11. ¿Andisï no nema jaki enga ísï puátspentajka eska Tata Diosï Jeoba?

¹¹ Imeecha engaksï karapka Karakata Ebreuechani, mítesptiksï eska no nema jarhaska enga ísï puátspentajka eska Tata Diosï Jeoba. Karakata ma uandasïndi eskaksï ménichani úraspka  uandakua ma enga ebreu jimbo jiájkani úrakuarhienga enga Tata Diosï puákunteenga pekadorini ma. Ístu uandasïndi eska i uandakua no méni úrakuarhesïreenga jiáni enga kʼuiripu ma puákunteenga máteruni. Solu Tata Diosï Jeoba úsïndi meru puákuntani pekadorini ma enga sési jimbo móantajka. ¿Ka nénachi pʼikuarherasïni engajtsïni Tata Diosï Jeoba puáchentajka?

12, 13. a) ¿Néna pʼikuarherasïni kʼuiripu ma enga Tata Diosï Jeoba puákuntajka? b) ¿Méntku miáni jarhasïni Tata Diosï Jeoba ambe enga no sési úpka kʼuiripu ma?

¹² Engachi jiókuarhiska eskajtsïni Tata Diosï Jeoba puáchentaskia, sésichi pʼikuarheraaka, nóchi uandanhiani jauaka ka ambakiti konsiensiachi ma jatsiaka. Ka soluchi uaaka ísï pʼikuarherani engajtsïni Tata Diosï Jeoba puáchentaaka (Uku. 3:19). Engajtsïni ima puáchentajka, úsïngachi ménderu imeeri amigueni. Ísïisïndi enajkichi no méni pekaripirini.

¹³ Enga Tata Diosï Jeoba na puákuntajkia nemani, no méntku miátantani jarhasïndi o kastigarini jarhani imani ambe jimbo enga úpka (Is. 43:25; Jer. 31:34). “Ísï eska na xáni iauani jaka nani enga uérajka jurhiata asta nani enga inchajtsïkujka”, Tata Diosï Jeobajtu ísï xáni iauani peerasïndi juchaari pekaduechani (Sal. 103:12). * Engachi eratsejka na enga xáni puátspentajka Tata Diosï úsïndi eskachi agradesidu jauaka imani jingoni ka eskachi janhanharhiaka (Sal. 130:4). Peru Tata Diosï Jeoba, ¿neechani ísï puákuantasïni?

14. Asta ixú jamberi ¿ambechi jorhenguarhiskia na enga puátspentajka Tata Diosï Jeoba?

¹⁴ Eskachi na jorhenguarhikia, Tata Diosï Jeoba puákuntasïndi nemani no arhiparini na uéjki xáni no sési ambe niátani. Ístuchi jorhenguarhiska eska Tata Diosï Jeoba jindeeska juchaari kueraajpiri, ima enga Leichani Peeraajka, ka Juesi ka eska úrasïnga iámindu ini ambe para uandani sini puákunta nemani o nómbe. Jiájkani, ¿ambe exesïni Tata Diosï Jeoba?

15. Eska na uandajka Lukasʌ 12:47, 48, ¿ambe exesïni Tata Diosï Jeoba parajtsïni puáchentani?

¹⁵ Ma ambe enga Tata Diosï Jeoba exejka, jindeesti sini ima enga no sési niátapka míteparini ísï úxapka. Ka Jesúsi ini ambe uandaspti ixú Lukasʌ 12:47, 48 (arhinta je). Enga kʼuiripu ma míteparini újka ambe ma enga Tata Diosï no jaiapanhentajka, kʼéri pekadu ma úni jarhasïndi. Ka  Tata Diosï Jeoba úpirindi no puákuntani ini kʼuiripuni (Mar. 3:29; Juanu 9:41). Joperu engachi kuenta íntskukuarheska eskachi no sési ambe úska, ¿uaajtsïni puáchentani Tata Diosï Jeoba? Jo. Jimboka ístu jarhaska máteru ambe enga ima exejka.

16. ¿Ambe arhikuekasïni moántani ka andisï xáni jukaparhakue ísï úni?

¹⁶ Tata Diosï Jeoba ístu exesïndi sini ima enga no sési ambe niátaka mintsita jingoni móantaskia. ¿Ambe arhikuekasïni móantani? Arhikuekasïndi ménderueni jámania, ménderueni eratseni o imani ambe úni enga sési jaka. Ístu, kʼuiripu enga móantajka kánikua no sési pʼikuarherasïndi imani ambe jimbo enga úpka o jimboka no úspka ambe enga jatsipka para úni. Ka ísï pʼikuarherasïndi no solu jimboka no sési úspka, sino ístu jimboka nóteru sési jarhaspkia Tata Diosï Jeoba jingoni ka inde ambe úspti eska no sési ambe niátapiringa. Ju je ménderu eratsentani rei Manasésini ka rei Dabidini. Nájkirukaksï kʼérati pekaduechani uaapka, Tata Diosï puákuantaspti jimbokaksï mintsita jingoni móantaspka (1 Rey. 14:8). Ísï jimbo, Tata Diosï imeechani puákuantasïndi engaksï úkuecha jingoni xarhatajka eskaksï móantaskia. No solu uétarhisïndi eskachi no sési pʼikuarheraaka imani ambe jimbo engachi no sési úka, uétarhisïndi eskachi uaaka ambe ma. * Ka inde ambe jindeesti máteru ambe enga Tata Diosï Jeoba exejka.

17. ¿Ambe arhikuekasïni mójtakuarhini, ka nénajtsïni jarhuatasïni parachi nóteru no sési jásï ambe únia? (Isaías 55:7).

¹⁷ Máteru jukaparhakua ambe enga Tata Diosï Jeoba exejka, jindeesti eska ma kʼuanhatsentaaka o mójtakukuarhini. Enga kʼuiripu ma mójtakukuarhijka nóteru no sési ambe niátasïndia ka ísï irekasïndi eska Tata Diosï na uékajka (arhinta je Isaías 55:7). Kʼuiripu enga mójtakukuarhijka, jatsisti para ménderueni eratseni ka jurajkuni eska Tata Diosï Jeoba jarhuataka para sési ambe úni (Rom. 12:2; Efes. 4:23). Jatsisti para nóteru eratsenia no sési jásï ambe nijtu no sési ambe niátani (Kol. 3:7-10). Peru ju je no mirikurhini eskajtsïni Tata Diosï Jeoba úsïnga puáchentani ka kénditacheani pekaduechani engachi mintsikaska Jesúsiri uarhikuani. Enga Tata Diosï Jeoba exejka eskachi jánguarhintaxaka para ménderueni jámani, puáchentasïndijtsïni  pekaduechani Jesúsiri uarhikua jimbo (1 Juanu 1:7).

18. ¿Ambechi jorhenguarhiskia na enga Tata Diosï Jeoba puátspentajka?

¹⁸ Ju je miántani máru jukaparhakua ambe engachi exekia ini jorhenguarhikua jimbo. Ísïisti, no nema jarhasti iámu parhakpinirhu enga ísï puátspentajka eska Tata Diosï Jeoba. ¿Andichisï ísï uandajki? Primeru, jimboka ima méntkisï uékasïnga puátspentani. Segundu, jimbokajtsïni sési míteska ka imajkusï míteti sinchi meru mintsita jingoni móantaskia. Ka terseru, jimboka engajtsïni Tata Diosï Jeoba puáchentajka, nójtsïni méntku miátantani jarhasïndi ambe engachi úka. Ka indeni ambe jimbo, úsïngachi ambakiti konsiensia ma jatsini ka imajtsïni jaiapanhentasïndi.

19. ¿Andichisï uaa sési pʼikuarherani jarhani nájkirukachi seguirini jauaka no sési ambe niátani pekadueri kulpa jimbo?

¹⁹ Ísïisti, engachi jamberi imperfektueuaka seguirinchi jauaka no sési ambe niátani. Peru kánikuajtsïni sési pʼikuastasïndi ambe enga uandajka Perspicacia para comprender las Escrituras, bolumeni 1, pájina 209: “Jimboka Tata Diosï Jeoba míteska eskaksï imeeri marhuaricha niárasïnga no sési jásï ambe tsitini, íchaksï no uétarhisïndi méntku no sési pʼikuarherani jarhani imani ambe jimbo engaksï no sési úka pekadueri kulpa jimbo (Sl 103:8-14; 130:3). Engaksï jánguarhintani jaka ísï irekani eska Tata Diosï na jaiapanhentajka, uaatiksï sési pʼikuarherani jarhani (Flp 4:4-6; 1Jn 3:19-22)”. ¡Xáni engajtsïni sési pʼikuastajka i uandakuecha!

20. ¿Ambechi exeni jaua máteru jorhenguarhikua jimbo?

²⁰ Kánikuachi jukaparharasïnga engajtsïni Tata Diosï Jeoba puáchentajka engachi mintsita jingoni móantajka. Joperu, ¿nénachi uaa májkueni úni eska ima? Na enga puátspentajka Tata Diosï Jeoba, ¿néna sáno májkueniski na engachi puátspentajka jucha, joperu ístu ambe jimbo no májkueniski? ¿Ka andisï xáni jukaparhakue eskachi sési kurhanguaka i ambe? Máteru jorhenguarhikua jimbochi exeaka ini ambe.