1. ¿Ambe aiakuasïni Tata Diosï Jeoba imeechani engaksï mintsita jingoni móantajka?

 TATA Diosï Jeoba jindeesti juchaari Kueraajpiri, ima enga Leichani Peeraajka ka Juesi, peru ístu jindeesti juchaari Taati auandarhu anapu enga kánikua xénchpetika (Sal. 100:3; Is. 33:22). Ísï jimbo, engachi pekadu ma újka ka engachi mintsita jingoni móantajka, ima no solujtsïni puáchentasïndi, sino ístu uékasïndi ísï úni (Sal. 86:5). Profeta Isaíasini úraparini, Tata Diosï Jeoba aiachistijtsïni ambe ma engajtsïni uinhaperantajka. Uandaspti: “Nájkirukaksï chaari pekaduecha ísïiuaka komueska charhapiti ambe, urapintaatiksï komueska niebi” (Is. 1:18).

2. ¿Ambechi jatsiski para úni engachi uéjka sési pájperani máteruechani jingoni?

² Jimbokachi pekadoriska, iáminduechachi úsïnga ochi uandasïnga ambe ma enga no sési pʼikuastaajka máteruechani (Sant. 3:2). Peruchi uaaka sési pájperani máteruecha jingoni engachi jorhenhaska puátspentani (Prov. 17:9; 19:11; Mat. 18:21, 22). Engajtsïni nema úchiska ambe ma enga no xáni kʼéri ambeeka, Tata Diosï Jeoba uékasïndi eskachi puákuntaaka (Col. 3:13, TNM). Ka jatsiskachi para ísï úni jimbokajtsïni Tata Diosï kánikua tekaachintasïnga juchantsïni (Is. 55:7).

3. ¿Ambechi exeni jaua ini jorhenguarhikua jimbo?

³ Ini jorhenguarhikua jimbo, exeakachi eska nájkirukachi jucha  imperfektueka, uaakachi puákuantani máteruechani májkueni eska Tata Diosï Jeoba. ¿Náki pekaduechanchi jatsiski para aianguani orhejtsïkutichani? ¿Andisï uéjki Tata Diosï eskachi puátsperantaaka? ¿Ka ambechi uaa jorhenguarhini ima erachicheri engaksï kánikua no sési nitamakuarhika máteruecheri pekaduecha jimbo?

4. a) ¿Ambe jatsiski para úni kristianu ma enga kʼéri pekadu ma uaaka? b) ¿Ambeksï jatsiski para úni orhejtsïkuticha?

⁴ Enga nema kʼéri pekadu ma újka, uétarhisïndi eska aianguauaka orhejtsïkutichani. 1 Korintu 6:9, 10 uandaasïndi máru pekaduechani engaksï kánikua no sési jaka. Enga nema i járhati pekaduechani uaajka, xarhatasïndi eska no janhanharhisïnga Tata Diosïri leini. Enga kristianu ma i járhati pekaduechani uaajka, jatsisti para kómarhini Tata Diosï Jeobani para kurhakuni eska puákuntaaka ka ístu aianguani kúnguarhikuarhu anapu orhejtsïkutichani (Sal. 32:5; Sant. 5:14). ¿Ambeksï jatsiski para úni orhejtsïkuticha? Tata Diosï Jeobajkusï újti puákuntani nemani enga pekadu ma újka ka Jesúsiri uarhikua jimbo úsïndi ísï úni. * Joperu Tata Diosï sésikua íntsaasti orhejtsïkutichani paraksï Tata Diosïri Karakata jingoni exeni sini ima enga pekadu ma úka uaa útasteru kúnguarhikuarhu jarhani o nóteria (1 Kor. 5:12). Aparte deksï máteru ambe exeni, orhejtsïkutichaksï ístu arini ambe kurhamarhikuarhisïndi: ¿uékaspi no sési ambe niátani?, ¿jískaspi ambe enga úka?, ¿ióni no sési ambe niátaspia? Ka sánderu jukaparhakua ambe: ¿xarhataski eska meru móantaskia?, ¿ambe xarhatasïni eska Tata Diosï puákuntaskia? (Uku. 3:19).

5. ¿Néna marhuakusïni kúnguarhikuani ambe engaksï orhejtsïkuticha újka?

⁵ Engaksï orhejtsïkuticha uandontskuarhejka imani jingoni enga no sési ambe niátaka, ambe engaksï uéjka jindeesti ísï úni eska Tata Diosï Jeoba na uandakia eska úkuarhiaka imani kʼuiripu jingoni (Mat. 18:18, TNM). ¿Néna marhuakusïni i ambe kúnguarhikuani? Enga pekadori no móantajka nóteru úsïndia kúnguarhikuarhu jarhani. Ka enga petanhantajka, Tata Diosï Jeobaeri marhuarichaksï kuájchakunhasïndi (1 Kor. 5:6, 7, 11-13; Titu 3:10, 11). Ístu, i ambe jarhuatasïndi imani enga pekadu úka para móantani ka paraka uaaka ambe ma para Tata Diosï puákuntani (Luk. 5:32). Orhejtsïkutichaksï kómarhijpikusïndi imani kʼuiripuni enga móantajka ka kurhakusïndiksï Tata Diosïni eska jarhuataaka para ménderu sési pájperantani imani jingoni (Sant. 5:15).

6. Uandanta je sini Tata Diosï Jeoba puákuntasïni nemani enga petanhantajka kúnguarhikuarhu.

⁶ Ju je eratsentani nemani enga no sési ambe niátaka ka enga no móantajka enga orhejtsïkuticha jingoni uandontskuarhejka. Enga inde ambe úkuarhiska, petanhantaati kúnguarhikuarhu. Ka enga no kurhajchaaka paisirhu anapu leichani, orhejtsïkutichaksï no uaati jarhuatani imani ambe jimbo enga úka. Ka Tata Diosï Jeoba sésikua íntsaasti juramutichani paraksï jusgarini ka kastigarini nákinterku nemani enga no kurhajchaaka leini, ia sea enga ima kʼuiripu móantaaka o nómbe (Rom. 13:4). Joperu enga ima kʼuiripu kuenta íntskukuarhejka eska no sési jarhaska ambe enga úka ka mintsita jingoni móantani ka ménderueni eratsenia ka jámani, Tata Diosï Jeoba puákuntaati (Luk. 15:17-24). Ka ísï uaati nájkiruka kʼérati pekaduechani uaaka (2 Crón. 33:9, 12, 13; 1 Tim. 1:15).

7. ¿Ambe arhikuekasïni puákuntani nemani engajtsïni no sési ambe úchika?

⁷ ¡Kánikuachi sési pʼikuarherasïnga engachi no jucheeka engachi jatsika para uandani sini Tata Diosï Jeoba puákuntaa nemani enga pekadu ma úka! Joperuchi kʼóru jatsiska para úni ambe ma. ¿Ambeeski? Jamberi nema engajtsïni kánikua no sési úchika arhijti eskachi  tekaakuntaaka ka puákuntani o jamberijtsïni no ma ambe arhini. Nájkiruka ísï úkuarhiaka, jatsiskachi para puákuntani, i ambe arhikuekasïndi eskachi no jatsiska para jatanhekuni ni ikiakuni imani kʼuiripuni. Joperu jamberichi úkua jukanchaaka ka tiempu uétarhini para ini ambe úni ka sánderia engajtsïni kánikua no sési pʼikuastapka ambe engachi úminhapka. Rebista La Atalaya 15 de septiembri enga 1994 jimbo uérapka, uandasïndi: “Puákuntani pekadorini ma, no arhikuekasïndi eska no no sési jarhaspka ambe engajtsïni úchipka. Para kristianu ma, puátspentani arhikuekasïndi iámu ambe jurajkukuni Tata Diosï Jeobani mintsikaparini eska ima sési peentaaka iámu ambe. Iámu parhakpinirhu, imajkusï jindeeti Juesi enga jurhimbiti újka iámindu ambe ka justisia uaati jiáni enga sánderu sési jauaka”. ¿Andisï Tata Diosï uéjki eskachi puátspentaaka ka eskachi mintsikaaka eska ima uaaka justisia?

8. ¿Nénachi xarhatasïni eskachi agradesidu jarhaska Tata Diosï Jeobaeri pʼamojperakua jimbo?

⁸ Engachi puátspentajka xarhatasïngachi eskachi agradesidu jarhaska Tata Diosï Jeobaeri pʼamojperakua jimbo. Ejemplu ma jingoni, Jesúsi terukutantaspti Tata Diosï Jeobani patroni ma jingoni enga puákuntapka imeeri jántspirini ma enga kánikua sentabu kánguni japka ka enga no ueenga maiamuntani. Joperu ima jántspiri no pʼamojkuspti imeeri kompanieruni ma enga no xáni kánikua sentabu kánguenga (Mat. 18:23-35). ¿Jesúsi ambe uékasïreeni jorhentpini? Eska engachi meru agradesidu jauaka Tata Diosï Jeobaeri pʼamojperakua jimbo, inde ambe uaati eskachi uékaaka puákuantani máteruechani (Sal. 103:9). Iónistia enga rebista Aianhpiri uandapka eska no arhiparini na engachi xáni puákuantajka máteruechani, no méni májkueniuati na engajtsïni xáni puáchentajka Tata Diosï Jeoba ka na engajtsïni xáni pʼamojperakua xarhatachejka Kristuni jimbo.

9. ¿Tata Diosï Jeoba neechani pʼamojkuasïni? (Mateu 6:14, 15).

⁹ Engachi puátspentaska, ístujtsïni Tata Diosï Jeoba puáchentaati. Ima pʼamojkuasïndi imeechani engaksï ístu pʼamojpijka (Mat. 5:7; Sant. 2:13). Jesúsi xarhataspti eska i ambe meru ísïiska enga jorhendaapka imeeri chúxapatichani kómarhini Tata Diosïni (arhinta je Mateu 6:14, 15). Ka sáno májkueni ambechi jorhenguarhisïnga imani ambe jingoni enga Tata Diosï Jeoba arhipka imeeri marhuari Jobuni. I Tata Diosïri marhuari, tekaantaspti jiáni engaksï i tanimu acheeticha Elifasi, Bildadi ka Sofari nóksï sési pʼikuastapka imani ambe jingoni engaksï arhipka. Tata Diosï arhispti Jobuni eska kómarhijpikuapiringa. Ka enga Jobu ísï úpka, Tata Diosï Jeoba újchakuraspti (Job 42:8-10).

10. ¿Andijtsïnisï no sési úchijki jatanhetspini? (Efesu 4:31, 32).

¹⁰ Jatanhetspini kánikuajtsïni no sési úchisïndi. Jatanhekuni nemani, ísïisti komu kʼuetsapeti ambe páni jarhani ka Tata Diosï Jeoba no uékasïndi eskachi jucha ísï pʼikuarheraaka (arhinta je Efesu 4:31, 32). Arhisïndijtsïni: “Jurajku ikiatapuni, asï ikia” (Sal. 37:8). Ísï úni eska i konseju na uandajka, kánikuajtsïni sési úchisïndi jimboka jatanhekuni nemani úsïndi eskachi pʼamenchaaka ka eskachi no sési eratseaka (Prov. 14:30). Jatanhekuni nemani, ísïisïndi komueska benenu atsïkuarhini jarhani: juchajkuminduchisï no sési úkuarhini jarhajka. Ísï jimbo, engachi puákuantaska máteruechani, sésichi pʼikuarheraaka ka uaakachi seguirini jarhani marhuakuni Tata Diosï Jeobani (Prov. 11:17).

11. ¿Ambe uandasïni Biblia engachi uékaaka no sési úkuantani máteruechani? (Roma 12:19-21).

¹¹ Ju je jurajkuni eska Tata Diosï Jeoba uaaka ambe ma. Tata Diosï Jeobajtsïni no sésikua íntskusti parachi no sési úkuantani imeechani engajtsïni  no sési ambe úchika (arhinta je Roma 12:19-21). Jimbokachi imperfektueska ka nóchi úsïnga iámindu ambe kurhanguni, nóchi úsïnga ísï jusgarpini eska Tata Diosï Jeoba (Ebr. 4:13). Ka ménichani, ambe engachi pʼikuarherajka úsïndi eskachi no sési ambe uaaka. Tata Diosïri jarhuajperata jimbo, Santiagu karaspti: “Jimboka ma kʼuiripu enga sóntku ikiajka, no úsïnga [ambe] enga jurhimbikueka [Tata] Diosïni japarini” (Sant. 1:20). Uaakachi seguru jarhani eska Tata Diosï Jeoba imani ambe uaaka enga sési jaka ka eska justisia uaaka jiáni enga ima sési exeaka.

12. ¿Nénachi xarhatasïni eskachi mintsikasïnga eska Tata Diosï Jeoba justisia uaaka?

¹² Engachi puátspentajka xarhatasïngachi eskachi mintsikasïnga eska Tata Diosï Jeoba justisia uaaka. Engachi imeeri jájki jimbo jurajkuaka iámindu ambe, xarhatasïngachi eskachi seguru jarhaska eska ima sési peentaaka iámu ambe enga úkuarhini jaka pekadu jimbo. Jimbanhi parhakpinirhu engajtsïni Tata Diosï aiachika, nóteruchi miántaakia no sési jásï ambe “ka i ambe nóteru no sési pʼikuastaatia mintsitani” (Is. 65:17). ¿Peruchi meru uaa no jatanhekuni ni ikiakuni nemani engajtsïni kánikua no sési úchika? Ju je exeni na engaksï máru úkia ísï úni.

13, 14. ¿Ambeksïni jorhendasïni Tonyri ka Joséri ejemplu?

¹³ Uánikua erachichaksï puákuantastia máteruechani, asta imeechani engaksï kánikua no sési ambe úkuapka. ¿Néna jarhuataaskia engaksï ísï úka?

¹⁴ Ju je exeni ambe enga nitamakuarhika Tony * enga Filipinas irekaka. Uánikua uéxurhini ante de Jeobaeri testigueni, mítespti eska acheeti ma enga José arhinheenga uándikuspka imeeri ermanu jémbani. Jimboka Tony kánikua no sési jámasïreenga, uékasïreendi atantani ini acheetini. Josénksï ónhaspti imani ambe jimbo enga úpka. Ka enga na uéntapkia karselirhu, Tony uandaspti eska nipiringa jirinhantani para uándikuni, ísï jimbo piákuarhispti pistola ma. Peru jiánisï ueenaspti jorhenguarhini Biblieri ambe Jeobaeri testiguecha jingoni. Ima uandantasïndi: “Jorhenguarhispka eskani jatsispka parani ménderueni jámani ka nóteruni sóntku ikiania”. Tony itsï atakuarhispti ka tátsekua niáraspti orhejtsïkutini kúnguarhikuarhu. ¡Ísku pakaraspti enga mítepka eska Joséjtu Jeobaeri testigu  úkuarhispka! Engaksï exejperapka, uinhamuksï kamajchakperaspti ka Tony arhispti Joséni eska puákuntaspkia. Tony uandantasïndi eska kánikua sési pʼikuarheraspka enga puákuntapka Joséni. I kristianu úspti puátspentani ka Tata Diosï Jeoba újchakuraspti enga ísï úpka.

15, 16. ¿Ambeksïni jorhendasïni ambe engaksï nitamakuarhipka Peter ka Sue?

¹⁵ Uéxurhini 1985 jimbo, Peter ka Sue tánguarhikuarhuksï jarhaspti ka ma repentku bomba ma charaspti. Acheeti ma, bomba ma peeraspti Kʼumanchikua Reinuerirhu. Engaksï ini ambe úkuarhinchapka, Sue nóteru úsïrendia sïpiruni, sési exeni ka ni kurhaani. * I temungurhiri mémindu kurhamarhikuarhisïreendi: “¿Né tekaaspi xáni no sési jásï ambe úni?”. Uánikua uéxurhini tátsekua, ima acheeti enga ísï úpka ka enga no Jeobaeri testiguepka, ónhanhaspti ka no méni úpirini uéntani karselirhu. Peter ka Suenksï kurhamarhispti sinksï puákuntaspkia imani acheetini ka imaksï uandaspti: “Tata Diosï Jeobajtsïni jorhendasïndi eska ikiatapu ka jatanhetspini kánikuajtsïni no sési úchisïnga. Ísï jimbo, desde jiáni engachi ini ambe úkuarhinchapka, kurhakuspkachi Tata Diosï Jeobani eskajtsïni jarhuatapiringa parachi no ikiani ni jatanhetspini ka parachi úni orhepani uérani”.

¹⁶ ¿Fásilispi para i temungurhiri puákuntani indeni acheetini? No méntkisï. Ju je exeni ambe engaksï uandajka. “Ménisï enga Sue ueenajka no sési pʼikuarherani imani ambe jimbo engachi úkuarhinchapka, kánikuachi ikiasïnga. Peru jimbokachi jánguarhintasïnga no indeni ambejku eratseni jarhani, jarhuatasïndijtsïni parachi nóteru ikiania. Ka úsïngachi iámu mintsita jingoni uandani eska enga ima acheeti niárapiringa juchaari erachi máeni, sésichi erokapiringa Tata Diosï Jeobaeri iretarhu. I ambe engachi nitamakuarhika, jorhendasïndijtsïni eska úni ambe enga Biblia uandajka kánikuajtsïni jarhuatasïnga. Ístu, kánikuajtsïni sési pʼikuastantasïndi míteni eska no ióni jimbo Tata Diosï Jeoba sési peentaaka iámindu no sési jásï ambe”.

17. ¿Ambeksïni jorhendasïni Maríeri ejemplu?

¹⁷ María uambuchatixaptia ka tsimani uájpeechani kaasïreendi enga ueenapka jorhenguarhini  Biblieri ambe. Peru imeeri acheeti no uékaspti jorhenguarhini. Tátsekua, imeeri acheeti máteru uarhiiti jingoni niraspti ka jurajkuspti imeeri familiani. María uandantasïndi: “Engajtsïni juchiiti acheeti jurajkupka, májkueni no sési pʼikuarheraspka eska imeecha engaksï traisionarinhajka: no nemani mintsikasïreenga, kánikua no sési pʼikuarherasïreenga, kulparikuarhisïreenga ka ikiasïreenga”. Nájkirukaksï jurajperapkia, María seguirixapti no sési pʼikuarherani enga uámba ísï traisionaripka. Ístu uandasïndi: “Ióni ísï pʼikuarheraspka ka kuenta íntskukuarhespka eskani nóteruni sési pájperasïrengia Tata Diosï Jeoba jingoni ni máteruecha jingoni”. Iásï María uandasïndia eska nóteru ikiakusïnga imani enga uámbeepka ka eska no uékapiringa eska úkuarhinchapiringa ambe ma. Sánderu sési, María erokuarhisïndi eska ma jurhiani uékaaka jorhenguarhini Tata Diosïri ambe. Ka nóteru eratsesïndia imani ambe enga úkuarhinchapka, sino imani ambe enga sánderu orhepani úkuarhiaka. Nájkiruka jatsipka para jandiajku jorhendaani imeeri uájpeechani Tata Diosïri ambe, iásï kánikua sési pʼikuarherasïndi marhuakuni Tata Diosï Jeobani imeeri uájpeecha ka imeecheri familiecha jingoni.

18. Jimboka Tata Diosï Jeoba jindeeska Sánderu ambakiti Juesi, ¿ambeerichi seguru jarhaski?

¹⁸ Jimboka Tata Diosï Jeoba jindeeska sánderu ambakiti Juesi enga jaka juchachi no jatsiska para uandani na engaksï jusgarinhaaka kʼuiripuecha, imasï uaati ini ambe (Rom. 14:10-12). Uaakachi seguru jarhani eska ima méntkisï sési jusgarpiaka jimboka imajkusï míteka ambe enga sési jaka ka ambe nómbe (Gén. 18:25; 1 Rey. 8:32). Ima méntkisï jurhimbikua jingoni úsïndi iámu ambe.

19. ¿Ambe uaa Tata Diosï Jeoba jimboka iámu ambe jurhimbikua jingoni úsïnga?

¹⁹ Tata Diosï Jeoba sési peentaati iámindu ambe enga no sési úkuarhini jaka pekaduni jimbo. ¡Meruchi uékaxakaia eska ísï úkuarhiaka! Tata Diosï Jeoba uaati eskachi nóteru méni pʼamenchaaka ka eskachi nóteru no sési pʼikuarheraakia (Sal. 72:12-14; Jaŋ. 21:3, 4). Ka nóteruchi méni miántaakia ambe engachi úkuarhinchaka. Enga jamberi niáraaka inde jurhiatikua, ju je agradesidu jarhani engajtsïni Tata Diosï Jeoba jorhendaka puákuantani máteruechani ísï eska ima.