SÁNO iámindu kʼuiripuechaksï mítesti eska Jesúsi uándikunhaska chkarirhu ma, máteru tsimani kʼuiripuecha jingoni engaksï no sési úripka (Mat. 27:35-38). Biblia uandasïndi eska ísï tátsekua enga Jesúsi na uándikunhapkia eska imeeri kuerpu prepararinhaspka para tumbarhu ma peeranhani (Mar. 15:42-46). Joperu máruksï uandasïndi eska no ísïiska eska Biblia na uandajka.

Máru kʼuiripuecha engaksï inbestigarijka Ebanjeliuechaeri ambe, nóksï jakajkusïndi eskaksï Roma anapuecha jurajpipiringa parakaksï imeecha engaksï no sési úripka jatsinhantapiringa tumbarhu ma. Eratsesïndiksï eskaksï máteru ambe úsïreenga ini kuerpuecha jingoni. Periodista Ariel Sabar uandaspti rebistarhu enga arhinhajka Smithsonian andiksïsï máru niárajki ísï eratseni. Karaspti: “Imeechantkuksïsï krusifikariuendi engaksï no sési úripka. Ka máru kʼuiripuecha engaksï mítekuka íri ambe, uandasïndiksï eskaksï Roma anapuecha méntku no sáni uékapiringa parakaksï i járhati kʼuiripuecha jatsinhantapiringa tumbarhu ma”. Roma anapuechaksï uékasïreendi eskaksï i kʼuiripuecha kómu uarhipiringa ka eskaksï kʼuratsetanhapiringa. Ísï jimbo, sáno méntkisïksï jurajkuauasïreendi kuerpuechani chkarirhu parakaksï animalicha auantaapiringa. Ka enga pakareenga ma parti kuerpueri, posurhuksï ma kʼuanikusïreendi.

Joperu arkeolojia xarhatastia eskaksï máru judiuecha engaksï ísï uándikunhapka jatsinhantaspkaksï. Uéxurhini 1968 jimbo, Jerusaléni no iauani exenhantaspti familieri tumba ma engaksï judiuepka, jimaksï exentaspti únicha acheetiri ma engaksï primeru siglurhu uándikupka. Únichaksï jima jatarixapti enga ísï mítekateka komu osariu jima engaksï únicha jatsiranhajka. Jima jatarixapti úni ma enga irandurakuarhu anapuepka ka chkarirhu chátakata jarhaspti parhantsï tiámueri ma jingoni enga 11.5 sentimetru (4.5 pulgada) kʼépka. Sabar uandasïndi: “Úni, enga jamberi jindeeka acheetiri ma enga Jeoanáni arhinheenga, marhuaspti para xarhatani eska jamberi ísïiska eska Jesúsi jatsinhantaspka tumbarhu ma, ísï eskaksï na uandajka Ebanjeliuecha”. I ambe kánikua jukaparhakuesti jimboka Jeoanániri “úni xarhataska eska jiánisï enga Jesúsi irekapka, Roma anapuechaksï jurajpisïreenga paraksï máru kʼuiripuecha engaksï krusifikarinheenga jatsinhantapiringa ísï eskaksï na pʼindepka judiuecha”.

Engaksï exentapka ini únini irandurakuarhu anapuni, úspti eskaksï uánikuecha ueenapiringa mámaru ambe uandani na enga tirhipanhapka Jesúsi chkarirhu. Joperu kʼóru ambe enga ísïika, jindeesti eskaksï máru no sési úricha engaksï chkarirhu ma uándikunheenga jurajkunhasïrengaksï paraksï jatsinhantani tumbarhu ma ka no nomasiksï posurhu ma kʼuaninhaani. Ísï jimbo, ambe enga Biblia uandajka na enga jatsinhantapka Jesúsi ísïisti: imeeri kuerpunksï tumbarhu ma peeraspti. Ka jarhasti uánikua ambe enga xarhatajka eska ísïiska.

Ka sánderu jukaparhakua ambe, Tata Diosï Jeoba uandasptia eskaksï Jesúsini tumba ma jimbo jatsintapiringa enga rikueriri máepka ka no nema úsïndi úni ambe ma paraka no úkuarhiaka ambe enga Tata Diosï uandajka (Is. 53:9; 55:11).