PARA ebreuecha engaksï imani Echerini jimbo irekapka enga Tata Diosï Aiakuapka, imeecheri uéxurhini ueenasïreendi jiáni engaksï ueeneenga tarheni ka jatsintani ambe ma, jiánksï úsïreendi ini ambe enga iásï jindeeka para jucha septiembri ka oktubri.

Kʼuiripuechaksï Lunani úrasïreendi paraksï exeni namuni jurhiatikuechani jukaapirini ma mesi, jimboka Luna 29 o 30 jurhiatikua jimbo niárasïreendi kʼéni. Ka Jurhiatanksï úrasïreendi paraksï míteni na xánipirini ma uéxurhini. Engaksï Jurhiatani úreenga paraksï míteni na xánispi ma uéxurhini, sánderu uánikua jurhiatikuecha uérasïreendi eska Lunani jimbo. Ísï jimbosï uétarhiendi úni ambe ma parakaksï jurhiatikuecha terukuntapiringa. Ka parakaksï terukuntapiringa, máru mesichanksï jatsikuantasïreendi máru jurhiatikuechani o ma uéxurhini ma mesiksï jatsikuntani ka jamberi indeni ambeksï ueendi ante de ueenani máteru uéxurhini. Engaksï ísï ueenga, kalendariu terukuntasïreendi imani jurhiatikuecha jingoni engaksï jatsinteenga ambe ma o engaksï pʼikuntapiringa.

Moisésiri jurhiatikuecha jimbo, Tata Diosï Jeoba arhispti imeeri iretani eska uéxurhini ueenapiringa mesi abibi (o nisáni) enga iásï jindeepiringa marsu o abrili (Éx. 12:2; 13:4). Imani mesini jimbo israelitechaksï kʼuínchikua ma úntasïreendi paraksï kéjtsïtakuni Tata Diosï Jeobani orheta frutu sebaderini engaksï pʼikunteenga (Éx. 23:15, 16).

Emil Schürer enga istorieri ambe míteka, uandasïndi: “Fásilispti para mítenhani káni jatsikunhantapirini ma jurhiatikua o ma mesi: Paskueri kʼuínchikua jiáni jatsispti para únhantani enga luna sánderu kʼénharhipiringa mesi de Nisánini jimbo (14 de Nisánini). Ka méntkisï i jurhiatikua jatsipirindi para ísï tátsekua niárani enga na inchapiringia primabera, jiáni enga chúrikua ka jurhiakua méntkuni ioskajka […]. Enga na kʼamarani jarhengia uéxurhini ka israelitechaksï kuenta íntskukuarheni eska kʼuínchikua Paskueri antesi niárapiringa eska káni enga ueenapiringa primabera, ma mesiksï jatsikusïreendi antesi de mesi de Nisáni niárani” (Historia del pueblo judío en tiempos de Jesús 175 a. C. - 135 d. C., ini tradusirintasti J. Cosgaya ka A. Piñero).

Jeobaeri testiguechachi májkueni úsïnga parachi úni míteni káni enga úkuarhiaka Tateeri Sena enga marsuni o abrilinisï úkuarhijka ka terukuntasïndi kalendariu ebreu jingoni, 14 de nisánini. Iámu parhakpini anapu kúnguarhikuechaksï aiangunhasïndi káni úkuarhia Miántskua. *

Joperu, ¿nénaksï mítesïreni ebreuecha káni kʼamarasïreni ka káni ueenasïreni mesi ma? Iásï fásilisti indeni ambe míteni engachi exejka kalendariu ma o juchaari selularini. Joperu imani tiempuni jimbo enga Biblia karanhapka no xáni fásilispti míteni ini ambe.

Noéri jurhiatikuecha jimbo, mándani mesi 30 jurhiatikuecherispti (Gén. 7:11, 24; 8:3, 4). Ísï tátsekua enga kalendariu ebreu uaxastanhapka, nóksï iámindu mesicha 30 jurhiatikuerispti. Jimbanhi mesi ma jiáni ueenakuarhisïreendi enga Luna ueenengia xarharani.

Ma xanhari Dabidi ka Jonatáni paraksï uandani eska ueenapiringia jimbanhi mesi ma uandasptiksï: “Pauani jimbanhi luna jauatia” (1 Sam. 20:5, 18). Ísï jimbo, jamberi para siglu onseni ante de Jesúsi, úsïrengaksïa míteni namuni jurhiatikuechaksï jukapirindi mesicha. ¿Ka israelitechaksï néna úsïreni míteni káni ueenapirini jimbanhi mesi ma? Ambe enga uandajka libru ma enga arhinhajka Misná enga uandajka judiuecheri pʼindekuecheri ambe ka juramukuecheri, jarhuatasïndijtsïni míteni. I libru uandasïndi eska engaksï judiuecha na kʼuanhatsentapkia Babilonia uératini, judá anapu juesichaksï xarhentku tánguarhintasïreendi enga na niárengia jurhiatikua 30 imani 7 mesicheri enga kʼuínchikua ma úkuarhipiringa paraksï uandani káni ueenapirini máteru mesi. ¿Nénaksï mítesïreni káni ueenapirini máteru mesi?

Axaasïrendiksï máru achamasïchani juáta sapirhaticharhu karhakisï Jerusaléni uanondanisï parakaksï exepiringa auandani chúrikuechani. Engaksï exenga eska Luna apenasi ueenani jarhasïreenga xarharani, jirejiresïksï aianguasïreendi judá anapu juesichani. Engaksï juesicha na seguru jarhengia, uandantasïrendiksï  eska ueenani jarhasïrengia máteru mesi. ¿Ka enga no xarharapiringia Luna jimboka janikua jatanhaskuarhipiringa o jimboka xúmu jatapiringa? Enga ísï úkuarhienga, juesichaksï uandasïreendi eska ima mesi engaksï jarhenga, 30 jurhiatikua jukapiringa ka eska máteru mesi ísï pauandikua uérapiringa.

Misná uandasïndi eskaksï Jerusaléni anapu juesicha uandantasïreenga káni enga ueenapiringa máteru mesi, kʼéri ma chpiri úparini juáta Olibusï jimbo, Jerusaléni no iauanisï ka máteru juáta kʼératicharhisï engaksï Israeli no iauani japka. Tátsekua, nóteruksï úrasïrendia chpiri paraksï uandantani, sino uandakua párichanksï úraasïrendia. Ísï úparini, iámindu judiuechaksï engaksï Jerusaléni irekapka o máteru naniisï, úsïreendiksï míteni káni ueenasïreeni jimbanhi mesi ka ísïksï iáminduecha úsïreendi mismu jurhiatikua jimbo uaantani kʼuínchikuechani.

Kalendariu enga ini jorhenguarhikua jimbo jaka, jarhuatatijtsïni míteani ióntki anapu Israeliri mesichani, kʼuínchikuechani ka tiempuechani.