Salmo 12:7 arhisïndi: “T’uri kuidariuauaka indeechani”. ¿Ambeksï arhikuekasïni i uandakuecha? ¿Kʼuiripuechani engaksï kómu nitamakuarhijka (bersikulu 5) o ambe enga Tata Diosï uandajka (bersikulu 6)?

Kontekstu xarhatasïndi eska i bersikulu kʼuiripuechanisï arhikuekaani jaka.

Salmo 12:1-4 jimbo, uandasïndi eskaksï nóteru kʼuiripuecha jingoni jarhaspkia imeecha engaksï kurhajcheenga Tata Diosïni. Iásï ju je exeani bersikuluechani 5 a 7 parachi úni mókuntani kurhamarhikuani.

Bersikulu 5 xarhatasïndi ambe enga Tata Diosï uaaka imani kʼuiripuecha jimbo engaksï kómu nitamakuarhijka, jo, kuájpiauati.

Bersikulu 6 ístu uandasïndi: “Ambe enga Tata Diosï Jeoba uandajka pímbinhasïisti; ísïisti komueska plata enga siete xanhari pímbinhajkunhatajka”. Ka ambakiti kristianuechachi uandasïnga eska i ambe meru ísïiska (Sal. 18:30; 119:140).

Iásï ju je exeni Salmo 12:7: “T’uri kuidariuauaka indeechani, oh, Tata Diosï Jeoba; t’uri kuájchakuauaka mándani arini indeni kʼuiripuecheeri engaksï iásï irekani jaka ka engaksï xáni no sési úriika, ka ísïri uaaka para méntkisï”. Ini ambe jimbo, máruksï eratsesïndi eska bersikulu 7 arhikuekasïnga eska Tata Diosï imani ambesï kuidariuaka ambe enga ima uandajka jimboka Bersikulu 6 imeeri ambe uandaxaka enga Tata Diosï Jeoba uandajka. Ka míteskachi eska Tata Diosï Jeoba kuidariiskia ka kuájchakuni Biblia jimbokaksï uánikuecha no uékasïreenga eskaksï kʼuiripuecha jatsipiringa Bibliani ka uékasïreendiksï kʼamajkuni (Is. 40:8; 1 Ped. 1:25).

Joperu ístuchi míteska eska ísïiska ambe enga bersikulu 5 uandajka, eska Tata Diosï Jeoba jarhuataaskia ka pʼímutaantani kʼuiripuechani engaksï kómu nitamakuarhijka jimbokaksï no sési kánhasïnga ka seguiriini jauati kuájpiani (Job 36:15; Sal. 6:4; 31:1, 2; 54:7; 145:20).

Jiájkani, ¿neechanisï kuidariuapirini Tata Diosï Jeoba, kʼuiripuechani o imani ambe enga ima uandajka?

Exeparini ambe enga uandajka máru bersikuluecha antesi, úsïngachi exeni eska kʼuiripuechanisï arhikuekaani jaka.

Salmo 12:1, 2 uandasïndi eskaksï uánikua kʼuiripuecha jarhaspka engaksï chkuandereenga ka engaksï jamberi támisï paapkia imeechani engaksï kurhajcheenga Tata Diosïni. Tátsekua uandasïndi eska Tata Diosï Jeoba no sési úkuauaka imeechani engaksï no sési úrajka katambani. Jiájkani, ambe enga Salmo uandajka, xarhatachesïndijtsïni eska Tata Diosï meru jarhuataaka imeeri iretani jimboka pímbinhasïiska ambe enga ima uandajka.

Ísï jimbo, enga Salmo 12:7 uandajka “t’uri kuidariuauaka indeechani” ka “t’uri kuájchakuauaka mándani arini”, imani kʼuiripuechanisï arhikuekaani jati engaksï no sési kánhajka.

Jiájkani, ¿andisï máru Bibliecharhu ísï kurhangukuarhijki eska imani ambesï arhikuekajka enga Tata Diosï Jeoba uandajka? Jimbokaksï ísï kurhangutarpisïnga máru ióntki anapu kopiecha engaksï mintsinharhikueka Karakateecheeri engaksï Ebreu jimbo Karanhaka, eska kʼuiripuechanisï arhikuekaani jaka ka ístu imani ambe enga Tata Diosï uandajka. Joperu Septuagintarhu, traduksioni ma enga griegu jimbo jaka, Salmo 12:7 tsimani xanhari úrasïndi uandakuani ma enga juchantsïni arhikuekajka, Tata Diosïiri ambakiti marhuariichani. Ka ístu, bersikulu 7 ka 8 uandasïndi eska Tata Diosï Jeoba kuájchakuauaka mándani arhini imeeri ambakiti marhuariichani parakaksï ima kʼuiripuecha engaksï no sési jásï ambe niátajka no no sési ambe úkuauaka (Sal. 12:7, 8). Ka máteru Bibliarhu enga arameu jimbo jaka, bersikulu 7 ísï tradusirinhantasti: “Tʼu, oh, TATA, kuájchakuauakari imeechani engaksï sési jámajka, tʼuri kuidariuauaka ini generasioniiri enga xáni no sési jámajka ka ísïiri uaaka para méntkisï. No sési úriichaksï iápurisï jámaxati komueska sanguijuelecha engaksï iurhiri akurhiajka kʼuiripuechani”. Iámindu i ambe xarhatasïndi eska Salmo 12:7 no imani ambesï arhikuekajka enga Tata Diosï Jeoba uandajka.

Ísï jimbo, i bersikulu aiakuaxati imeechani engaksï kurhajchajka Tata Diosï Jeobani eska ima jarhuatauaka ka kuájchakuani.