1. ¿Ambe uandaspi Jesusi auandarhu anapu jatsikuarhekueri ambe?

¿JARHASKI intsïmperakua o jatsikuarhekua ambe enga no xarharajka? Jo, ima ambe enga no xarharajka jindestiksï engaksï sánderu jukaparhakueka. Enga Jesusi Juátarhu Arhijtsïkpipka, auandarhu anapu jatsikuarhekueri ambe uandaspti enga iauani sánderu ambakitiika eska náki uéjki máteru jatsikuarhekua ambe ixú echerirhu. Ístu uandaspti: “Jimboka nani enga jauaka chári jatsikuarhekua, jimajtu jauaka chári mintsita” (Mat. 6:19-21). Juchari mintsita uáti eskachi imani ambe jirinhaaka engachi sánderu jukaparharajka. Auandarhuchi patsasïnga juchari jatsikuarhekua ambe engachi jánguarhintajka ambakiti pájperakua ma jatsini Jeoba jingoni. Ísï eska Jesusi na uandapka, no ma ambe ni nema uá kʼamajkuni o sïpani ini jatsikuarhekua ambe.

2. a) ¿Ambejtsïni pʼímarhisïni úni apostuli Pablu ixú 2 Korintu 4:17, 18 jimbo? b) ¿Ambechi exea ini jorhenguarhikua jimbo?

² Apostuli Pablujtsïni pʼímarhisïndi parachi pendienti páni “indeni ambe jimbo enga no xarharajka” (arhinta je 2 Korintu 4:17, 18). Ima jatsikuarhekua ambe enga no xarharajka, ístuksï jindesti ima kóntperatecha engajtsïni Tata Diosï jimbanhi parhakpinirhu íntsauaka. Ini jorhenguarhikua jimbo, tʼámu jatsikuarhekua ambechi exeaka enga no xarharajka ka engachi jatsikia: ambakiti pájperakua ma Tata Diosï jingoni, kómarhikua, espiritu santueri jarhuajperata ka na engajtsïni jarhuatajka aianhpikuarhu Jeoba, Jesusi ka ánjelicha. Ístuchi exeaka nénachi xarhataa eskachi jukaparhasïnga ini ambe.

3. ¿Nákiski ima jatsikuarhekua enga sánderu jukaparhakueka engachi no újka exeni ka andichisï újki jatsini?

³ Ambakiti pájperakua ma jatsini Jeoba jingoni, ambe máesti  enga iauani sánderu jukaparhaka ka enga no xarharajka (Sal. 25:14). Joperu ¿néna uá Tata Diosï amigueni kʼuiripuecheri engaksï kʼamanharhintstika ka útasï kʼamakʼamasï pímbinhasïni? Jimboka Jesusiri uarhikua ‘késtataasïnga parhakpini anapuecheri’ kʼamanharhintskuechani (Juanu 1:29). Ante de Jesusi uarhini, Jeoba mítesptia eska Jesusi méntkisï marhuakupiringa asta uarhikuarhu jamberi para úni pʼímutantaani kʼuiripuechani. Ini ambe jimbo, Tata Diosï úspti ambakiti pájperakua ma jatsini imani kʼuiripuecha jingoni engaksï jiáni irekapka ante de Jesusi uarhini (Rom. 3:25).

4. Uandaa je máru Tata Diosïri amiguechani engaksï irekapka ante de Jesusi uarhini.

⁴ Ju je uandaani máru Tata Diosïri amiguechani engaksï irekapka ante de Jesusi uarhini. Abraani, kʼéri jakajkukua ma jatsispti. Nájkiruka jukari mili uéxurhini ísï nitamapkia enga Abraani uarhipka, Jeoba uandaspti eska imeri amiguespka (Is. 41:8). Ísï jimbo, nájkirukaksï kʼuiripuecha uarhijkia, Jeoba útasï ísï exeani jarhasïndi komueska imeri amiguecha. Jeoba útasï miáxati Abraanini (Luk. 20:37, 38). Máteru ambakiti ejemplu jindesti Jobu. Ma xanhari enga Jeoba ánjelicha jingoni tánguarhintatini jápka, uandaspti na enga xáni mintsikenga Jobuni. Ísï uandaspti imeri ambe: “I achamasï ambakiti kʼuiripuesti ka iámindu ambe jurhimbitku úsïndi, kurhajchasïndi Tata Diosïni ka jánguarhintasïndi iámindu ambe sési úni” (Job 1:6-8). ¿Ka ambe eratsesïrendi Jeoba, Danieliri ambe enga sési marhuakupka ma ochenta uéxurhinisï paisi ma jimbo engaksï kʼuiripuecha diosï úkatechani kómarhiauenga? Enga Danieli kánikua jatiripkia, ánjelichaksï tanimu xanhari arhispti eska Tata Diosï kánikua jukaparharasïrenga (Dan. 9:23; 10:11, 19). Sésichi mítetixaka eska Jeoba tsípikua jingoni erokuarhixaka jiáni enga tsítantauaka imeri amiguechani (Job 14:15).

5. ¿Ambechi jatsiski para úni parachi ambakiti pájperakua ma jatsini Jeoba jingoni?

⁵ Ini jurhiatikuecha jimbo, uánikua kʼuiripuecha engaksï kʼamanharhintstika, jatsistiksï ambakiti pájperakua ma Jeoba jingoni. Uánikua interu parhakpini anapu acheeticha, uarhiiticha ka sapiicha, xarhataxatiksï imecheri jángua jingoni eskaksï uékasïnga Tata Diosïri amigueni. Biblia uandasïndi eska Jeoba ambakiti pájperakua ma jatsiska imani kʼuiripuecha jingoni engaksï jurhimbitku jámajka (Prov. 3:32). Íksï kʼuiripuecha úsïndi ambakiti pájperakua ma jatsini Jeoba jingoni jimbokaksï mintsikasïnga Jesusiri uarhikuani. Euajpintskua jimbo, Jeobajtsïni íntskusïndi sésikua parachi úni aiakukuarheni imani ka itsï atakuarhini. Engachi ini ambe újka enga xáni jukaparhakueka, úsïngachi imani kristianuecha jingoni kuenta úkuarhini engaksï aiakukuarhikia ka itsï atakuarhini ka engaksï ambakiti pájperakua ma jatsika imani jingoni enga sánderu kʼéri ambeka iámu parhakpinirhu.

6. ¿Nénachi uá xarhatani eskachi jukaparharasïnga ambakiti pájperakua ma jatsini Jeoba jingoni?

⁶ ¿Nénachi uá xarhatani eskachi jukaparharasïnga ambakiti pájperakua ma jatsini Jeoba jingoni? Májkueni úparini eska Abraani ka Jobu. Imaksï sési marhuakuspti Jeobani jukari sieni uéxurhini jimbo. No arhiparini na engachi xáni ióni páni jakaia Jeobani marhuakuni ini parhakpini jimbo, juchajtuchi jatsiska para májkueni úni. Ístuchi jatsiska para sánderu jukaparharani juchari ambakiti pájperakua Jeoba jingoni ka eska juchari tsípikuani, májkueni eska Danieli (Dan. 6:7, 10, 16, 22). Jeobaeri jarhuajperata jimbo, uákachi tekaantani náki uéjki tsʼéjkukuani ka seguirinchi ambakiti pájperakua ma jatsini Jeoba jingoni (Filip. 4:13, TNM).

7. a) Eska na uandajka Proverbios 15:8, ¿néna exeasïni Jeoba juchari kómarhikuechani? b) ¿Néna mókuantaasïni Jeoba juchari kómarhikuechani?

⁷ Máteru jatsikuarhekua ambe enga no xarharajka jindesti kómarhikua. Ambakiti amiguechaksï tsitisïndi aianhperani ambe ma ka ístu na engaksï pʼikuarherajka. Májkueni ambe  úkuarhisïndi juchari ambakiti pájperakua Jeoba jingoni. Ima úrasïndi imeri Karakatani parajtsïni uandajpani ka indeni jimbojtsïni aiangusïndi ambe enga eratsejka ka pʼikuarherani. Ka juchachi kómarhikua jimbo uandajpasïnga imani. Engachi kómarhijka, úsïngachi aianguni ambe engachi eratsejka ka ambe engachi pʼikuarhinhejka mintsitarhu. Jeoba kánikua tsitisïndi kurhaani juchari kómarhikuechani (arhinta je Proverbios 15:8). Ima, amigu máesti engajtsïni xénchajka, jimbosï no solu kurhauajti juchari kómarhikuechani, ístu mókuantasïndi. Ménisïjtsïni sóntku mókucheantasïndi kómarhikuechani. Peru ménisïchi jatsisïnga para méntku kómarhini jarhani. Néna uéjkini, uákachi mintsikani eskajtsïni Jeoba mókuchentaaka jiáni engachi uétarhinchani jauaka ka na enga ima sési exeaka. Jamberi mókuntskua no jindeuati ima engachi jucha erokuarhini japka. Por ejemplu, jamberijtsïni no kénditachiati tsʼéjkukua ma, perujtsïni íntskuati jánhaskakua ka uinhapikua parachi úni tekaantani (1 Kor. 10:13).

8. ¿Nénachi uá xarhatani eskachi jukaparharasïnga kómarhikuani?

⁸ ¿Nénachi uá xarhatani eskachi jukaparharasïnga ini kʼéri intsïmperakuani enga jindeka kómarhikua? Arini ambe úparini engajtsïni Tata Diosï arhijka: “Méntku jauena je kómarhini” (1 Tes. 5:17). Jeoba no afuersa uékasïndi eskachi kómarhiaka. Sánderu sési, jurajkusïndi eskachi jucha erakuaka kómarhini. Ísï jimbo, uákachi xarhatani eskachi jukaparharasïnga ini ambe engachi someni kómarhiska pauani pauani. Peru engachi kómarhiaka, ju je no mirikurhini kʼéri ambe arhini Jeobani ka diosmeiamukua arhini (Sal. 145:2, 3).

9. ¿Néna exesïni kómarhikuani erachi ma enga Chris arhinhajka? b) ¿Nénajtsï exesïni cha kómarhikuani?

⁹ Engachi sánderu ióni páni jauaka Jeobani marhuakuni ka exeni na engajtsïni mókucheantajka juchari kómarhikuechani, sánderuchi jukaparharaaka kómarhikuani. Ju je exeni ambe enga uandapka Chris, erachi ma enga 47 uéxurhini páni jakaia kʼamakʼamasï marhuakuni Jeobani, uandaspti: “Kánikua tsitisïnga xarhentkuni jauarani ka úni kómarhini Jeobani. Kánikua sési pʼikuarherakuarhesïndi Jeobani jingoni uandontskuarheni jarhani jiáni enga jurhiata andarani jarhajka. Ini ambe úni, úsïndi eskani uékaaka diosmeiamukua arhini Jeobani iámindu  ambe jimbo engajtsïni intsïmbijka, ka ístu engachi újka kómarhini. Ka chúrikua sési pʼikuarherasïnga nirani kʼuíni engani na kómarhijkia”.

10. ¿Andichisï jatsi para kánikua jukaparharani Tata Diosïri espiritu santuni?

¹⁰ Máteru jatsikuarhekua ambe enga no xarharajka ka engachi jatsika para kánikua jukaparharani, jindesti Tata Diosïri espiritu santu. Jesusi uandaspti eskachi jatsiska para someni kurhajkuarhini jarhani espiritu santu (Luk. 11:9, 13). Jeoba úrasïndi espiritu santuni parajtsïni íntskuni “uinhapikua enga xáni kʼéri ambeka” (2 Kor. 4:7; Uku. 1:8). Tata Diosïri espiritu santueri jarhuajperata jingoni, úsïngachi tekaantani náki uéjki tsʼéjkukuani engachi jatsijka.

11. ¿Nénajtsïni uá jarhuatani espiritu santu?

¹¹ Espiritu santujtsïni jarhuatasïndi parachi sési úni ánchikuarhita ambe engachi Jeobaeri kúnguarhikuarhu intsïnhajka. Uáti úni eskachi sánderu sési uáka imani ambe engachi jorhenakia úni. Míteskachi eska espiritu santueri jarhuajperata jimboeska ambe engachi újka para Jeobani marhuakuni ka no juchari uinhapikua jimbo.

12. Eska na uandajka Salmo 139:23, 24, ¿ambechi uá kurhajkuarhini kómarhikua jimbo?

¹² Máteru ambe engachi uáka úni para xarhatani eskachi jukaparharasïnga espiritu santuni, jindesti kurhakuni Jeobani eskajtsïni jarhuataaka exeni sinchi eratsesïni o tsitisïni imani ambe enga no sési jaka (arhinta je Salmo 139:23, 24). Parajtsïni mókuchentani, Jeoba uáti úrani imeri espirituni parajtsïni exerani ambe engachi jatsiaka para mójtakuni. Ka engachi jatsiaka para ísï úni, ju je kurhakuni eskajtsïni espiritu santu jarhuataaka parachi kénditani indeni no sési jásï eratsekuani o ambe engachi tsitijka. Engachi ísï úska, Jeoba exeati eskachi no uékasïnga úni ambe enga no sési jaka ka imajtsïni uáti méntkisï jarhuatani imeri espiritu santu jingoni (Efes. 4:30).

13. ¿Nénachi uá sánderu jukaparharani espiritu santuni?

¹³ Uákachi sánderu jukaparharani espiritu santuni engachi eratsentaaka imani ambe enga úni jaka ini jurhiatikuecha jimbo. Ante de Jesusi auandarhu karhanchentani, arhiaspti imeri chúxapatichani: “Chájtsï intsïnhaaka uinhapikua espiritu santueri enga juuaka paraksïni jukaratini jarhani, ka uandantaakajtsï juchiti ambe [...] iápuru parhakpinirhu asta jima enga sánderu  iauanika” (Uku. 1:8). Ka i ambesï úkuarhini jati iásï. Espiritu santueri jarhuajperata jimbo, ma ocho miioni ka terujkani iápurisï anapuechaksï marhuakuxati Jeobani. Ístu, iámindu Jeobaeri ireta májku kʼéri jarhasti jimbokajtsïni espiritu santu jarhuatasïnga parachi uékpini, tsípini, pínandikua jatsini, ióni tekaantani, sési kámpini, ambakini, Tata Diosïni mintsikani, kaxumbini ka pʼíngukuarhini. Espiritu santujtsïni jarhuatasïndi parachi iámindu ini ambe xarhatani (Gal. 5:22, 23). Ísïsti, espiritu santu intsïmperakua máesti enga kánikua jukaparhakueka.

14. ¿Náki jarhuajperatachi intsïnhasïni aianhpikuarhu?

¹⁴ Jatsiskachi máteru jatsikuarhekua ambe enga no xarharajka: májku kʼéri ánchikuarhini Jeoba, Jesusi ka ánjelicha jingoni (2 Kor. 6:1). Imajtsïni jarhuatasïndi méni engachi nirajka jorhendaani kʼuiripuechani. Pablu arini ambe uandaspti imeri ambe ka máteru aianhpiricheri: Jindeskachi “Diosïri jarhuajpiricha” (1 Kor. 3:9). Engachi nirajka aianhpini, ístuchi ánchikuarhisïnga Jesusi jingoni. Ju je miáni eska ísï tátsekua enga Jesusi na juramukuapkia imeri chúxapatichani eskaksï nipiringa “jorhendaani iámindu kʼuiripuechani”, arhiaspka eska imecha jingoni japiringa (Mat. 28:19, 20). ¿Ka nénajtsïni jarhuatasïni ánjelicha? Kánikuachi jukaparharasïnga engajtsïni ánjelicha orhechipajka jiáni engachi aianguani jarhajka “ambakiti aianhperakuani enga jindeka para méntkisï [...] iámindu kʼuiripuechani” (Jaŋ. 14:6).

15. ¿Náki Bibliarhu anapu ejemplu xarhatasïni ambe enga újka Jeoba parajtsïni jarhuatani aianhpikuarhu?

¹⁵ Engachi aianhpijka Tata Diosïri Reinueri ambe, máru kʼuiripuecha engaksï ambakiti mintsita ma jukaka, uékasïndiksï sánderu ambe míteni (Mat. 13:18, 23). ¿Né úsïni eskaksï i kʼuiripuecha uékaaka sánderu ambe míteni ka niárani Jeobani marhuakuni? Jesusi uandaspti eska no nema úsïnga imeri chúxapatiini enga no “andarhiteraaka Táti” (Juanu 6:44). Bibliarhuchi exentasïnga ejemplu ma enga xarhatajka eska i ambe ísïska. Ma xanhari, Pablu aianguaspti Tata Diosïri ambe máru uarhiitichani engaksï Filipusi uéramanisï japka. Ju je exeni ambe enga uandajka Biblia uarhiitiri ma enga jima japka enga Lidia arhinhenga: Jeoba “pʼárhikuspti imeri mintsitani paraka sési kurhandipiringa ambe enga Pablu arhijpienga” (Uku. 16:13-15). Májkueni eska na úpka Lidia jingoni, Jeoba ústi eskaksï uánikua kʼuiripuecha andaparhakueraaka imeri iretarhu.

16. ¿Né jatsiski para kʼéri ambe arhinhani engajtsïni sési nichejka aianhpikuarhu?

¹⁶ ¿Né jatsiski para kʼéri ambe arhinhani engajtsïni sési nichejka aianhpikuarhu? Ambe enga Pablu karapka Korintu anapu kúnguarhikueri ambe, mókuntasïndi ini kurhamarhikuani: “Jí ikaraska ka Apolusï itsï jatsikusti, kʼóru Diósïni jimbosï újti ambe kʼéni. Jimajkani Diósïjkusï kʼériti enga k’uiriperpejka, ikarati ka itsï jatsikuti nóksï úsïndi kʼuiriperpeni, ka nóksï ambemesti” (1 Kor. 3:6, 7, Táta Diósïri Uandakua Tata Jesukristueri Aiatsperakua). Méni engajtsïni sési nicheaka aianhpikuarhu, jatsiskachi para Jeobani kʼéri ambe arhini májkueni eska na úpka Pablu.

17. ¿Nénachi uá xarhatani eskachi jukaparharasïnga kʼéri kóntperatani engachi újka májku kʼéri ánchikuarhini Jeoba, Jesusi ka ánjelicha jingoni?

¹⁷ ¿Nénachi uá xarhatani eskachi jukaparharasïnga kʼéri kóntperatani engachi újka májku kʼéri ánchikuarhini Jeoba, Jesusi ka ánjelicha jingoni? Jánguarhintaparini iámindu kʼuiripuechani aianguani ambakiti aianhperakueri ambe. Ka uákachi ísï úni xanharu ísï ka kʼumanchikuecha jimbo (Uku. 20:20). Uánikua erachichaksï tsitisïndi Tata Diosïri ambe aianhpini nani uéjkiksï jámani jarhani. Engaksï exentajka nemani engaksï no míteka, sésiksï uandajpasïndi ka jánguarhintasïndiksï uénani uandontskuarheni imani jingoni. Engaksï exejka eska kʼuiripu uékasïnga uandontskuarheni, iatsitakuarhuksï aiangusïndi Tata Diosïri Reinueri ambe.

18, 19. a) ¿Ambechi jatsiski para úni enga kʼuiripu ma uéjka sánderu ambe míteni? b) ¿Jeoba néna jarhuataski Raphalalanini?

 ¹⁸ Jimbokachi jindeska “Diosïri jarhuajpiricha”, nóchi solu jatsiska para ma xanharijku uandontskuarhekuani kʼuiripuechani Reinueri ambe, sino someni pʼorhembiantani. Enga kʼuiripu ma tsitijka Bibliaeri ambe, jánguarhintasïngachi paraka ima uékaaka sánderu ambe jorhenguarhini ochi arhisïnga máteru nemani eska niuaka pʼorhembini para uénani Bibliaeri jorhenguarhikua ma. Enga Bibliaeri jorhenguarhiri ma sánhani arhijka Jesusiri chúxapati úkuarhini, kánikuachi tsípisïnga engachi exejka na enga Jeoba jarhuatani jaka mójtakuni imeri eratsekuani ka mintsitani.

¹⁹ Ju je exeni Raphalalaniri ejemplu, Sudafrica anapu ma enga sïkuamipka. Kánikua tsitisïrendi ambe enga jorhenguarhini japka Bibliaeri ambe. Peru úkua jukanchaspti jiókuarhini ambe enga uandajka Tata Diosïri Karakata enga nema uarhiricha jingoni uandontskuarhejka (Deut. 18:10-12). Sánhani arhispti jurajkuni eska Tata Diosï mójtakupiringa ambe enga ima eratsenga. Ka tátsekua jurajkuspti sïkuamikua ambe nájkiruka imeri ánchikuarhitepka. Raphalalani enga 60 jatirikia uandasïndi: “Kánikua jukaparharasïnga na engajtsïni Jeobaeri testiguecha jarhuataka uánikua ambe jimbo, por ejemplu, parani úni ánchikuarhita ma exentani. Peru sánderuni diosmeiamukua arhisïnga Jeobani engarini jarhuataka mójtakuni juchiti irekuani ka iásï úsïnguia aianhpini komueska Jeobaeri testigu ma ka itsï atakuarhiskia”.

20. ¿Ambechi uékasïni úni?

²⁰ Ini jorhenguarhikua jimbo, uandaaskachi tʼámu jatsikuarhekua ambe engaksï no xarharajka. Peru enga sánderu jukaparhakueka jindesti eska Jeoba juchari amigueska. I kʼéri kóntperata, úsïndi eskachi jatsiaka máteru jatsikuarhekua ambe enga no xarharajka: kómarhini Jeobani, espiritu santueri jarhuajperata ka jatsini auandarhu anapu jarhuajperata parachi úni aianhpini. Uékasïngachi sánderu ka sánderu jukaparharaani ini jatsikuarhekua ambe engaksï no xarharajka. Ka nóchi méni jurajkuaka diosmeiamukua arhini Jeobani jimboka ambakiti amigu máeska.