1, 2. a) Eska na arhijka Salmo 40:5, ¿ambe ka ambejtsïni intsïmbiski Jeoba? b) ¿Andichisï exea ini tanimu intsïmperakua ambe?

JEOBA Tata Diosï máesti enga intsïmpitika. Ju je eratsentani máru ambe engajtsïni ima intsïmbika: Echeri, sési jásï lugari ma nani engachi irekaka; kamatsïta (cerebro), ambe ma enga kánikua sési úkata jaka, ka Biblia, imeri Karakata enga kánikua jukaparhakueka. Ini tanimu ambe jingoni engajtsïni Jeoba intsïmbika, íntskustijtsïni lugari ma parachi irekani, ústi eskachi uáka eratseni ka uandani ka eskachi exeantauaka mókuntskuechani imani kurhamarhikuecheri engachi sánderu úkuarhiajka (arhinta je Salmo 40:5).

² Ini jorhenguarhikua jimbochi exeaka ini tanimu intsïmperakua ambe engajtsïni Jeoba íntskuka. Engachi sánderu eratsentaska ini intsïmperakua ambe jimbo, sánderuchi jukaparharauaka ka sánderuchi uékaaka sési pʼikuastani juchari Kuerajpirini engajtsïni xáni xénchajka (Jaŋ. 4:11). Ístu, sánderuchi míteaka néna jarhuataani imechani engaksï eratsejka eska kʼuiripuni no nema kueraaska.

3. ¿Andisï Echeri no májkuenii eska máteru planetecha?

³ Engachi jingontku exeska na enga kueraaka Tata Diosï Echerini, úsïngachi exeni na enga xáni jánhaskatiika (Rom. 1:20; Ebr. 3:4). Nájkirukaksï jaka máteru planetecha engaksï Jurhiatani uantsïtani jaka, no jarhasti máteru planeta enga xásïka eska Echeri, jimboka ixújkusï jaka iámindu ambe enga xáni uétarhijka para kʼuiripu úni irekani.

4. ¿Néna xarhatasïni eska Tata Diosï jánhaskatiska na enga kueraakata jaka Echeri?

⁴ Úpiringachi uandani eska Echeri ísïska eska abioni ma enga uánikua kʼuiripu jatarini jaka ka enga unibersurisï kárani jaka. Joperu no májkuenisti abioni ma enga kʼuiripu úka ka juchari  planeta. Por ejemplu, ¿náksï xáni ióni úpirini jámani kʼuiripuecha abionirhu engaksï jatsipiringa para imecha úkuarhini tarhiata, tʼirekua ka itsï, ka nóksï úni basura ambe kʼuanikuni uérakua ísï? ¿A no eskaksï no ióni jimbo uarhipiringa? Peru ixú Echerirhu, uánikua ambe jarhasti enga tsípiti jaka. Juchari planeta jimbo jarhasti na engachi xáni tarhiata, tʼirekua ka itsï uétarhinchajka. Ka no méni kʼamakurhisïndi i ambe enga xáni uétarhijka para tsípikua jarhani. Ka ístu, nájkiruka ixú pakarajka ambe enga nóteru marhuajkia, Echeri útasï kánikua sési jáxesti ka kʼuiripuechaksï útasï úxati irekani. ¿Néna úsïni i ambe úkuarhini? Jeoba ísï kuerasti Echerini paraka ménderu uéntaka úrani imani ambe enga nóteru marhuajkia. Ju je exeani tsimani ejempluechani: ambe enga úkuarhijka para tarhiata no méni kʼamakurhini ka ambe enga úkuarhijka para itsï no méni kʼamakurhini.

5. a) ¿Ambe úkuarhisïni para tarhiata no méni kʼamakurhini? b) ¿Ka i ambe enga úkuarhijka ambe xarhatasïni?

⁵ Tarhiata, ambe máesti enga újka eskaksï kʼuiripuecha ka animalicha tsípiti jauaka. Uandanhasïndi eska iámindu ambe enga tsípiti jaka, mándani uéxurhini kánikua tarhiata jirejtasïnga. Peru engaksï na jirejtajkia, úsïndiksï eska jauaka tarhiata enga no marhuajka (dióxido de carbono). Peru tarhiata ambakiti no méni kʼamakurhisïndi ka auanda no méni uinisïndi dióxido de karbonu jingoni. ¿Andisï tarhiata no méni kʼamakurhijki? Imani ambe jimbo enga úkuarhijka tarhiata jingoni. Jeoba, mámaru jásï plantechani uásti ka engaksï mámaru kʼéraka paraksï dióxido de karbonu úrani ka ambakiti tarhiataksï úntani. Ambe enga úkuarhijka para tarhiata no méni kʼamakurhini, sési xarhatasïndi ambe enga uandajka Tata Diosïri ambe, Ukuecha 17:24, 25: “Jimboka imamindu jindeska enga tsípikua íntspijka ka jirejtakua ka iámindu ambe”.

6. a) ¿Ambe úkuarhisïni para itsï no méni kʼamakurhini? b) ¿Ka i ambe enga úkuarhijka ambe xarhatasïni? (Exe je ístu rekuadruni “ Itsï, Jeobaeri intsïmperakua máesti”).

⁶ Echerirhu jarhasti itsï jimboka juchari planeta séskisï jarharitixaka Jurhiatani. Enga sánderu sáni andarhierapiringa, iámu itsï suárapirindi ka i ambe úpirindi eska Echeri kánikua jorhepepiringa ka eska no ma ambe japiringa. Joperu enga sánderu sáni iauani japiringa, iámu itsï ielu úkuarhipirindi ka ístu Echeri. Jimboka Jeoba, ambakiti lugari ma jimbo peeraska Echerini, itsï no méni kʼamakurhisïndi ka úsïndi eska tsípikua jauaka. ¿Néna jimbo itsï no méni kʼamakurhisïni? Jurhiata jorheperasïndi itsïni enga Echerirhu ka maricharhu ísï jaka, tátsekua niárasïndi suárani ka xúmu úkuarhini. Mándani uéxurhini, Jurhiata úsïndi eska itsï suáraaka sáno 500,000 kilometru kúbiku (120,000 millas cúbicas). Inde itsï, ma diesi jurhiatikua ísï pakarasïndi auandarhu ka tátsekua niárasïndi iauani o janini ka ménderu niántasïndi maricharhu o nani enga kánikua itsï jaka. Ka ménderu uéntasïndi i ambe úkuarhini. I ambe enga úkuarhijka itsï jingoni ka enga no méni kʼamakurhijka Echerirhu, xarhatasïndi eska Jeoba jánhaskatiska ka uinhapitiini (Job 36:27, 28; Ecl. 1:7).

7. ¿Nénachi uá xarhatani eskachi jukaparharasïnga imani intsïmperakuani enga Salmo 115:16 jimbo uandajka?

⁷ Parachi sánderu jukaparharani Echerini ka iámindu ambe enga ixú jaka, jatsiskachi para eratsentani ambe enga xáni Jeoba kueraaka (arhinta je Salmo 115:16). I ambejtsïni jarhuataati parachi pauani pauani diosmeiamukua arhini Jeobani iámindu ambakiti ambe jimbo engajtsïni ima íntskujka. Ka ístuchi uáka xarhatani eskachi jukaparharasïnga ambe engajtsïni ima íntskujka engachi méntkisï jánguarhintaska sési jándu jarhani nani engachi jucha irekani jaka.

8. ¿Andichisï újki uandani eska juchari kamatsïta kánikua sési úkata jarhaska?

⁸ Kʼuiripuecheri kamatsïta kánikua sési úkata jarhasti. Engachi juchari nándiri matrisirhu  japka, juchari kamatsïta sánhani arhispti úkuarhini ísï eska Jeoba na uaxastakata jatsikia. ¡Ka mándani minutu, uánikua selulechaksï úkuarhixapti juchari kamatsïtarhu! Sientifikuechaksï uandasïndi eska kamatsïta kʼuiripu kʼériri ma jimbo, sáno 100,000 miioni neuronechaksï jarhaska, i járhati selulechaksï solu éjpurhuksï jarhasïdi. Íksï selulecha juchari kamatsïtarhu jarhasti enga solu 1,5 kilu (3,3 libras) kʼuetsapeka. Ju je exeni máru ambe enga juchari kamatsïta újka.

9. ¿Andijtsïsï cha seguru jaki eska Tata Diosïri intsïmperakua máeska engachi újka uandani?

⁹ Kʼéri milagru máesti engachi újka uandani. Ju je eratsentani sáni ambe enga xáni úkuarhijka juchari kuerpurhu engachi uandajka. Parachi ma uandakuajku uandani, juchari kamatsïta jatsisïndi para ma sieni muskuluechani manataani juchari katambarhu, gargantarhu, penchumikuarhu, kʼenchemekuarhu ka kʼénhekuarhu. Iámindu i muskuluechaksï no májku kʼéri manakuarhisïndi parakaksï uandakuecha uáka kurhangukuarhini. Ka engachi újka mámaru jásï idioma uandani, 2019 jimbo uéraspti karakata ma enga xarhatajka eskaksï charhakuecha engaksï apenasi andajpenujka, úsïngaksïa jorhenguarhiani uadakuechani. I ambe terukuntasïndi imani ambe jingoni engaksï uánikua sientifikuecha uandajka: eskachi ísï andajpenusïnga parachi úni míteantani ka jorhenguarhiani idiomechani. Ísïsti, Tata Diosïri intsïmperakua máesti engachi újka uandani (Éx. 4:11).

10. ¿Nénachi uá xarhatani eskachi jukaparharasïnga engachi újka uandani?

¹⁰ Ma ambe engachi uáka úni parachi xarhatani eskachi jukaparharasïnga engachi újka uandani, jindesti aianguani imechani engaksï jakajkujka eska kʼuiripuni no nema kueraaska, andichisï jakajkujki eska Tata Diosï kueraaska iámindu ambe (Sal. 9:1; 1 Ped. 3:15). Imecha engaksï jorhentpejka eska kʼuiripuni no nema kueraaska, uékasïndiksï eskachi jakajkuaka eska Echerini ka tsípikuani no nema úska. Uákachi úrani Bibliani ka máru ambe engachi ixú jorhenguarhiaka parachi kuájpini juchari Táti auandarhu anapuni ka aianguani imechani engaksï uéjka míteni andichisï jakajkujki eska Jeoba jindeska enga Kueraaka Echerini ka auandani (Sal. 102:25; Is. 40:25, 26).

11. ¿Ambe máteru ambe jimbochi uá uandani eska juchari kamatsïta kánikua sési úkata jarhaska?

¹¹ Kánikua ambakiti ambesti engachi újka uánikua ambe miáni. Sáni iónistia enga sientifiku ma uandapka eska kʼuiripueri kamatsïta úsïnga miáni uánikua ambe, xánisï komueska 20 miioni libruecha. Peru iásï uandanhasïndi eskachi úsïnga miáni iauani sánderu ambe. Ístu, ini ambe jimbo engachi újka miáni, úsïngachi úni ambe ma enga kánikua jukaparhakueka. Ju je exeni ambeski.

12. Engachi ísï újka ambakiti ambe jorhenguarhini ima amberi engachi nitamakuarhijka, ¿ambechi úsïni úni kʼuiripuecha?

¹² Iámindu amberi enga xáni kueraakata jaka ixú Echerirhu, kʼuiripuechajkuchisï újka ambakiti ambe jorhenguarhini ima amberi engachi nitamakuarhijka. Miáni ka eratsentani ambe engachi nitamakuarhikia, jarhuatasïndijtsïni parachi ambakiti ambe jorhenguarhini ka parachi mójtakuni na engachi eratsejka ka jámani (1 Kor. 6:9-11;  Kol. 3:9, 10). Astachi uáka jorhendani juchari konsiensiani para úni míteni ambe sési jarhaski ka ambe nómbe (Ebr. 5:14). Úsïngachi jorhenguarhini parachi xarhatani uékperakua ka pʼamojperakua, ka ístuchi úsïnga jorhenguarhini parachi májkueni jurhimbikua jingoni jámani eska Jeoba.

13. Eska na uandajka Salmo 77:11, 12, ¿nénachi jatsiski para úrani intsïmperakuani engachi újka uánikua ambe miáni?

¹³ Ma ambe engachi uáka úni parachi xarhatani eskachi jukaparharasïnga engachi uánikua ambe miájka, jindesti jánguarhintani no mirikurhini na engajtsïni Jeoba xáni jarhuatakia ka uinhaperantani. Ísïchi uáka sánderu mintsikani eskajtsïni ima jarhuataaka sánderu orhepani (arhinta je Salmo 77:11, 12; 78:4, 7). Máteru ambe engachi uáka úni parachi xarhatani eskachi jukaparharasïnga indeni intsïmperakuani, jindesti miáni ambe engaksï xáni újka máteruecha juchantsïni jimbo ka diosmeiamukua arhipariani. Sientifikuechaksï uandasïndi eskaksï ima kʼuiripuecha engaksï diosmeiamukua arhijpijka, sánderuksï tsípikua jingoni irekasïnga. Ístuchi májkueni úsïnga eska Jeoba engachi erakujka mirikurhini máru ambe. Por ejemplu, nájkiruka ima méntku no ma ambe mirikurhijka, imajtsïni puáchentasïndi ka erakusïndi mirikurhini ambe engachi no sési újka engachi jucha moantajka (Sal. 25:7; 130:3, 4). Ka ima uékasïndi eskachi jucha májkueni uáka imecha jingoni engajtsïni no sési pʼikuastajka ka engajtsïni kurhachijka eskachi puákuantauaka (Mat. 6:14; Luk. 17:3, 4).

14. ¿Nénachi uá xarhatani eskachi jukaparharasïnga juchari kamatsïtani enga xáni sési úkata jaka?

¹⁴ Xarhatasïngachi eskachi jukaparharasïnga juchari kamatsïtani enga xáni sési úkata jaka, engachi úrajka para kʼéri ambe arhini imani engajtsïni intsïmbika. Máru kʼuiripuechaksï no sési úrasïndi ini intsïmperakuani ka jandiajkuksï uandasïndi ambe sési jarhaski ka ambe nómbe. Peru jimbokajtsïni Jeoba kueraaska, jimbosï sánderu sésiiti ambe enga ima uandajka eska sési jarhaska ka no ambe engachi jucha jandiajku erakuakuarhijka (Rom. 12:1, 2). Engachi újka ambe engajtsïni ima juramuchijka, pínandikua jingonchi irekasïnga (Is. 48:17, 18). Ka mítesïngachi ambe engachi jimbo irekani jaka: para kʼéri ambe arhini ka sési pʼikuastani juchari Kuerajpirini ka Tátini (Prov. 27:11).

15. ¿Néna xarhatasïni na engajtsïni xáni xénchajka Jeoba engajtsïni intsïmbika Bibliani?

¹⁵ Engajtsïni Tata Diosï intsïmbika Bibliani, xarhatasïndi na engajtsïni xáni xénchajka. Ima ústi eskaksï ióntki anapu achamasïcha karapiringa Bibliani jimbokajtsïni kánikua jukaparharasïnga. Imeri Karakata jimbo, Jeobajtsïni mókucheantasïndi imani kurhamarhikuechani engachi sánderu úkuarhiajka. Por ejemplu arichani: ¿nanichi uératini jurhaski?, ¿andichisï irekani jaki? ka ¿ambe úkuarhia sánderu orhepani? Jimboka Jeoba uékasïnga eskaksï imeri uájpecha míteaka ini ambe, jarhuajpixati paraka Biblia uáka uánikua idiomecha jimbo jarhani. Ini jurhiatikuecha jimbo, iámu o ma parti, Biblia jukari tresi mili idiomecha jimbo jarhasti. I jindesti libru enga sánderu etsakunhajka ka tradusirikuarhini desde iónisïa. Nani uéjki irekani kʼuiripu ma o náki uéjki idioma uandani, sáno iáminduechaksï úsïndi míteni ambe enga Biblia jorhentpijka imecheri idioma jimbo (exe je rekuadruni “ Bibliaeri traduksioni, África anapu idiomecha jimbo”).

16. Exeparini ambe enga uandajka Mateu 28:19, 20, ¿nénachi uá xarhatani eskachi jukaparharasïnga Bibliani?

¹⁶ ¿Nénachi uá xarhatani eskachi jukaparharasïnga Bibliani? Pauani pauani arhintaparini, eratsentaparini ambe enga jorhentpijka ka jánguarhintaparini úni ambe engachi jorhenguarhijka. Ístu, xarhatakusïngachi eskachi jukaparharasïnga Bibliani engachi jánguarhintajka na engachi xáni uáka para aianguani máteru kʼuiripuechani ambe enga Biblia jorhentpijka (Sal. 1:1-3; Mat. 24:14; arhinta je Mateu 28:19, 20).

17. ¿Náki intsïmperakua ambechi exeski ini jorhenguarhikua jimbo ka ambechi exea máteru jorhenguarhikua jimbo?

¹⁷ Ini jorhenguarhikua jimbo, exeskachi tanimu ambe engajtsïni Jeoba intsïmbika: Echerini, nani engachi irekani jaka; juchari kamatsïta enga xáni sési úkata jaka ka imeri Karakatani enga jindeka Biblia. Peru máru ambe engajtsïni Jeoba intsïmbika, nóchi úsïnga exeani. Máteru semana jimbo, jorhenguarhiakachi ini intsïmperakua ambe engachi no újka exeani.