Pirenchi ma enga Sara arhinhajka, * uandasïndi: “Chésïnga máteru kʼuiripuecha jingoni jarhani. Jimbosïni no tsitijka kʼuiripu ma jingoni jarhani enga sóntku ikiajka o enga uinhamarhitspejka. Peruni sési pʼikuarherasïnga kʼuiripu ma jingoni jarhani enga tekaantstika ka kaxumbitini. Engani xárhati kʼuiripuecha jingoni jarhajka, no úkua jukanchasïnga uandontskuarhekuani ambe engani pʼikuarherajka o juchiti uandanhiatecheri ambe. Xárhati amiguechani jatsiaska”.

Ambe enga Sara uandajka, xarhatasïndi eska kaxumbikua jindeska ambe ma enga újka eskaksï máteruecha uékaaka juchari amigueni. Ka Jeoba sési exeasïndi imani kʼuiripuechani engaksï kaxumbitiika. Imeri Karakata jimbojtsïni kurhachesïndi eskachi kaxumbitiuaka (Kol. 3:12). ¿Ambeski kaxumbikua? ¿Néna xarhataspi Jesusi ini ambakiti ambe? ¿Ka nénajtsïni uá jarhuatani parachi sánderu tsípikua jingoni irekani?

Kaxumbikua, ambakiti ambesti engaksï imecha xarhatajka engaksï sési pʼikuarherajka mintsitarhu. Imecha engaksï kaxumbitiika, ambakiti kʼuiripuesïndiksï ka sésiksï kámpini, úsïndiksï pʼíngukuarhini ka tekaantskua jingoni orhepani uérakuani uandanhiatechani.

Kʼuiripu ma enga kaxumbitiika, xarhatasïndi eska úsïnga uánikua ambe tekaantani. Uandakua griegu enga Bibliarhu tradusirikuarhika kaxumbikua, úrakuarhisïrendi para imani kabaiuni arhikuekani enga orheta no sési jámenga ka tátsekua mansu únhani. Kabaiu ma kánikua uinhapisïndi peru tekantskua jingoni jorhendanhasïndi para úni pʼíngukuarhini. Májkueni úkuarhisïndi engachi kaxumbitijka: pʼíngusïngachi ambe engachi pʼikuarherajka ka sésichi pájperasïnga máteruecha jingoni.

Jamberichi eratsejka eskachi no uáka kaxumbitini. Ístu, úkua jukasti kaxumbitini, jimbokaksï kʼuiripuecha no tekaantstiska ka no sésiksï kámpini (Rom. 7:19). Parachi kaxumbitini, jatsiskachi para kánikua jánguarhintani, peru Jeobaeri espiritu santujtsïni jarhuataati parachi no kuatantani (Gal. 5:22, 23). ¿Andichisï jatsi para jánguarhintani kaxumbitini?

Kaxumbitini, úsïndi eskaksï máteruecha uékaaka juchari amigueni. Ísï eska na uandapka Sara, sésichi pʼikuarherasïnga kʼuiripuecha jingoni jarhani engaksï kaxumbitijka. Jesusi mítekatespti kaxumbikua jimbo ka enga sési kámpienga (2 Kor. 10:1). Asta sapiicha engaksï no káni mítepka, uékasïrendiksï imani jingoni jarhani (Mar. 10:13-16).

Kaxumbitini, marhuachesïndijtsïni juchantsïni ka máteruechani. Engachi kaxumbitiuaka, nóchi sóntku ikiauaka (Prov. 16:32). Ísï úni, uáti eskachi no niáraaka no sési pʼikuarherani jimbokachi no no sési úkuaka  nemani, ka sánderia nemani engachi xénchajka. Ístu kaxumbitini, marhuakuasïndi máteruechani jimboka engachi pʼíngukuarhijka, nóchi no sési úkuasïnga.

Nájkiruka méntkisï úni jarhenga ambe ma, Jesusi méntkisï kaxumbikua xarhataspti. Uánikua kʼuiripu mámaru ambe jimbo úkua jukanchasïrendi ka uánikua uandanhiatechani jatsiani. Uétarhinchasïrendiksï eska nema sési pʼikuastantaapiringa. Ísï jimbo, kánikua uinhaperantaapti enga Jesusi arhiapka eskaksï andarhierapiringa imani enga kaxumbitipka ka no teparakuarhini imeri mintsitarhu (Mat. 11:28, 29).

¿Nénachi uá májkueni kaxumbitini eska Jesusi? Orheta, arhintani Tata Diosïri Karakatani para jorhenguarhini néna kámpisïreni Jesusi ka néna orhepani uérakuasïreni uandanhiatechani. Tátsekua, engachi nitamakuarhini jauaka ambe ma jimbo enga úpiringa úkua jukani kaxumbitini, ju je jánguarhintani ísï úni eska Jesusi (1 Ped. 2:21). Ju je exeni tanimu ambe enga jarhuatapka Jesusini para kaxumbitini.

Jesusi sési jimbo kaxumbitispti. Ima mismu uandaspti eska kaxumbitispka ka no teparakuarhini imeri mintsitarhu (Mat. 11:29). Bibliarhu, someni májku kʼéri úraasïndi ini uandakuechani, kaxumbikua ka no teparakuarhini, jimbokaksï i uandakuecha sáno májkueniska (Efes. 4:1-3).

Kaxumbikuajtsïni jarhuatasïndi parachi no kʼéramakuarhini ni sóntku no sési pʼikuarherani. ¿Ambe úspi Jesusi enga ísku jatini arhinhapka eska acheeti máespka enga jukari tʼirenga ka enga jukari binu arhenga? Imeri ejemplu jingoni, pínastaraaspti imechani engaksï arhinchenga ka kaxumbikua jingoni uandaspti: “Ambakiti jorhengua xarharasïndi eska ambakiska imani jimbo engachi janhanharhijka [o úkuecha jimbo]” (Mat. 11:19).

Engajtsïni nema arhinchaska juchari xukuparhakua jimbo, nani engachi anapueka o máteru ambe jimbo, ju je jánguarhintani kaxumbikua jingoni mókuntani. Sudafrica anapu orhejtsïkuti ma enga Pablu arhinhajka, uandantasïndi: “Enga nema uandajka ambe ma engarini sáni ikiatajka, eratsesïnga ambe enga úpiringa Jesusi”. Ka ístu uandasïndi: “Jorhenguarhiskia no xáni juchiti ambejkuni eratseni”.

Jesusi mítespti eskaksï kʼuiripuecha kʼamanharhintstiska. Jesusiri chúxapatichaksï uékasïrendi ambakiti ambe úni, peruksï no méntkisï úsïrendi ísï úni kʼamanharhintskua jimbo. Por ejemplu, ima chúrikua ante de Jesusi uarhini, Pedru, Santiagu ka Juanu nóksï tsínharhitixapti ísï eska Jesusi na arhiapka. Jesusi uandaspti: “Espiritu jarhasti para ambakiti ambe úni, peru chári kuerpu jindesti enga debilika” (Mat. 26:40, 41). Jesusi no ikiaspti imeri apostulicha jingoni jimboka mítespka eskaksï imecha kʼamanharhintstispka.

Ju je exeni ambe enga nitamakuarhika pirenchi ma enga Mandy arhinhajka. Ióntki, kʼuiripu máespti enga iámu ambe no sési exenga máteruecheri, peru iásï jánguarhintasïndi májkueni kaxumbitini eska Jesusi, ima uandasïndi: “Jánguarhintasïnga miántani eskachi iámindu kʼuiripuecha kʼamanharhintstiska ka ístuni jánguarhintasïnga ambakiti ambe exeni mándani kʼuiripueri ísï eska Jeoba na újka”. Májkueni eska Jesusi na pʼamojkuauenga kʼuiripuechani engaksï kʼamanharhintstipka, ístu Mandy májkueni úsïndia iásï. Engachi juchajtu májkueni úska, nóchi úkua jukanchaaka kaxumbikua xarhatakuani máteruechani.

Jesusi iámindu ambe Tata Diosïni jurajkukusïrendi. Jiáni enga Echerirhu japka, jatsispti para tekaantani enga no jurhimbikua jingoni kánhapka. Kʼuiripuechaksï no sési exesïrendi ambe enga ima uandenga o úni, nóksï jiókuarhispti ka kánikuaksï no sési kámaspti. Peru méntkisï kaxumbispti jimboka eiangukuarhisïrenga “imani enga jurhimbitku jusgarpijka” (1 Ped. 2:23). Jesusi mítespti eska auandarhu anapu Táti jemba pendienti japiringa imani jimbo ka eska Jeoba mítespka na jatini kastigariani imechani engaksï no sési kámapka.

Engachi niáraska ísku jatini no sési kánhani ka juchachi ikiani, úpiringachi úni ambe ma ka sánderuchi no sési ambe niátani. Jimbosï xáni jukaparhakueti ambe engajtsïni Biblia arhijka: “Jimboka ma kʼuiripu enga sóntku ikiajka, no úsïnga [ambe] enga jurhimbitkueka Diosïni japarini” (Sant. 1:20). Asta jiáni engachi jatsiaka rasoni para ikiani, úpiringachi no sési ambe úni jimbokachi kʼamanharhintstika.

Alemania anapu pirenchi ma enga Cathy arhinhajka, eratsesïrendi eska no nema kuájpepiringa enga ima no jánguarhintapiringa kuájpikuarhini. Peru mójtakurhispti jiáni enga uénapka mintsikani Jeobani. Ima uandasïndi: “Iásï jánguarhintasïnguia kaxumbitini, jimbokani míteska eska Jeobajkusï uáka iámu ambe sési peentani”. Májkueni mintsikani Tata Diosïni ísï eska Jesusi na úpka, jarhuataatijtsïni kaxumbitini jiáni engachi niáraaka ísku jatini no sési kánhani.

Jesusi uandaspti eska parachi úni tsípikua jingoni irekani jatsiskachi para kaxumbitini. Ima uandaspti: “Tsípisïndiksï imecha engaksï sési pʼikuastpijka” (Mat. 5:5, TNM). Ju je exeni na engajtsïni kaxumbikua mámaru ambe jimbo marhuachejka.

Úsïndi eskaksï temungurhiricha no xáni arhirperaaka. Australia anapu erachi ma enga Robert arhinhajka, uandantasïndi: “Juchiti uarhiitini uánikua ambe arhiska enga no sési pʼikuatspijka ka engani no meru pʼikuarherenga. Peru engari na uandajkia mámaru ambe ikiatapu jimbo, nóteruri úsïnguia kuanhaskuntani ambe ma. Kánikua no sési pʼikuarherasïrenga na engani no sési úkuenga juchiti uarhiitini”.

Engachi uandajka ambe ma, iáminduechachi “mámaru ambe jimbo pekadu úsïnga”. Ka imani ambe enga ma no eratseparini uandajka, uáti eska uandanhiata ambe jauaka temungurhirikuarhu (Sant. 3:2). Para no i ambe úkuarhini, kaxumbikuajtsïni jarhuataati parachi no ikiani ka pʼímukukuarhini (Prov. 17:27).

Robert kánikua jánguarhintasti para nóteru sóntku ikiania ka para pʼíngukuarhini. ¿Úski ísï úni? Ima uandantasïndi: “Iásï engani no úni jarhajka terukutani ambe ma juchiti uarhiiti jingoni, jánguarhintasïnga para iatsitakuarhu uandontskuarheni ka no jurajkuni eskani ikiauaka. Sánderuni sési pájperasïnguia juchiti uarhiiti jingoni”.

Jarhuatasïndijtsïni parachi sánderu sési pájperani máteruecha jingoni. Imecha engaksï sóntku no sési exejka ambe ma, nóksï uánikua amiguechani jatsiasïndi. Peru imecha engaksï kaxumbitiika úsïndiksï méntkisï sési pájperani máteruecha jingoni (Efes. 4:2, 3). Cathy engachi antesi uandaka, uandasïndi: “Kaxumbikua úsïndi eskani sési pʼikuarheraaka máteruecha jingoni jarhani nájkiruka ménisï úkua jukaaka ísï úni máru kʼuiripuecha jingoni”.

Úsïndi eskachi sési pʼikuarhinhiaka. Biblia uandasïndi eska “ambakiti eratsekua enga karhakua uératini jurhajka” terukuntasïnga kaxumbikua ka pínandikua jingoni (Sant. 3:13, 17). Kʼuiripu kaxumbiti ma, no sóntku ikiasïndi (Prov. 14:30). Marcos kánikua jánguarhintasti para kaxumbitini, uandantasïndi: “Iásï sánderuni kurhangutspisïnguia, nóteruni xáni uinhamarhitspesïnguia ka sánderuni sési pʼikuarherasïnga ka tsípikua jingoni irekani”.

Jamberichi jatsiaka para kánikua jánguarhintani parachi kaxumbitini. Erachi ma uandasïndi: “Sési jimbo, iásï jamberi ménisï niárasïnga kánikua ikiani”. Peru jimbokajtsïni Jeoba arhijka eskachi kaxumbitiuaka, imajtsïni jarhuataati parachi ísï úni (Is. 41:10; 1 Tim. 6:11). Imajtsïni kʼamaraati arhistacheni ka uáti eskachi uinhapikua jatsiaka (1 Ped. 5:10). Ka sánhani arhiakachi xarhatani “na enga xáni kaxumbika Kristu ka na enga xáni uékpijka” ísï eska na úpka apostuli Pablu (2 Kor. 10:1).